ക്രൂഡ് ഓയിൽ ബാരലിന് 70 ഡോളറിൽനിന്ന് 79 ഡോളറിലേയ്ക്ക് ഉയർന്നത് ബുൾ റാലിക്ക് അവസരം ഒരുക്കാം. ഇറാനിൽ ഇസ്രയേൽ ആക്രമണം തുടർന്നാൽ പ്രതിദിനം ഒരു ദശലക്ഷം ബാരൽ എണ്ണ ഉത്പാദനം കുറഞ്ഞാൽ എണ്ണ 84 ഡോളറിലെ പ്രതിരോധം തകർത്ത് 94-104 ഡോളറിനെ ലക്ഷ്യമാക്കും. ഉത്പാദനം ഉയർത്താൻ ഒപ്പെക്ക് അടിയന്തര നീക്കം നടത്താനും ഇടയുണ്ട്.
തകർന്ന് വിപണികൾ നിഫ്റ്റി തുടക്കത്തിൽ മികവിലായിരുന്നെങ്കിലും റിക്കാർഡ് തകർക്കാനായില്ല. 26,178ൽനിന്ന് 26,277 പോയിന്റിലെ നിർണായക പ്രതിരോധം ഭേദിക്കാൻ ശ്രമിച്ചതിനിടയിലെ ലാഭമെടുപ്പ് പിന്നീട് വിൽപന സമ്മർദമായി. ഇതോടെ മുൻവാരം സൂചിപ്പിച്ച 25,672 സപ്പോർട്ട് തകർത്ത് നിഫ്റ്റി 24,969ലേയ്ക്ക് ഇടിഞ്ഞ ശേഷം ക്ലോസിംഗിൽ 25,014 ലാണ്.
ഡെയ്ലി ചാർട്ടിൽ ബുള്ളിഷായി നീങ്ങിയ വിപണിയെ അടിമുടി ഉഴുതുമറിച്ച് ബിയറിഷാക്കാൻ ശ്രമം നടന്നു. എന്നാൽ വാരാന്ത്യം സാങ്കേതികമായി ഓവർ സോൾഡായതിനാൽ കൂടുതൽ വിൽപനകൾക്ക് ആദ്യദിനങ്ങളിൽ നീക്കം നടത്തില്ല. ഇൻഡിക്കേറ്ററുകൾ പലതും സെല്ലർമാർക്ക് അനുകൂലമായത് തളർച്ച വിട്ടുമാറാൻ ചെറിയ കാലതാമസം സൃഷ്ടിക്കാം. ഈവാരം 24,381-23,748 താങ്ങുണ്ട്. താഴ്ന്ന റേഞ്ചിൽ ബയിംഗ് നടന്നാൽ തിരിച്ചുവരവിൽ 25,911-26,908ലും പ്രതിരോധം തല ഉയർത്താം.
നിഫ്റ്റി ഒക്ടോബർ സീരീസ് ഓപ്പൺ ഇന്ററസ്റ്റിൽ വൻ ഇടിവ്. 26,345ൽനിന്നുള്ള തകർച്ചയ്ക്ക് ഇടയിൽ ലോംഗ് കവറിംഗിന് ഓപ്പറേറ്റർമാർ തിടുക്കം കാണിച്ചത് തകർച്ചയുടെ ആക്കം ഇരട്ടിപ്പിച്ചു. വാരാന്ത്യം 25,174ലാണ്. 25,000ലെ നിർണായക സപ്പോർട്ട് നഷ്ടപ്പെട്ടാൽ 24,350നെ ഉറ്റുനോക്കാം. ഒരു തിരിച്ചുവരവിന് ശ്രമിച്ചാൽ 25,500 വരെ ഉയരാം.
സെൻസെക്സ് 85,571ൽനിന്നും 85,972 വരെ കയറിയെങ്കിലും തൊട്ട് മുൻവാരം സൃഷ്ടിച്ച 85,987ലെ റിക്കാർഡ് ഭേദിക്കാനായില്ല. വിൽപ്പന സമ്മർദത്തിൽ ആടിയുലഞ്ഞ വിപണി 81,532ലേയ്ക്ക് ഇടിഞ്ഞങ്കിലും ക്ലോസിംഗിൽ 81,688ലാണ്. വിൽപന സമ്മർദം തുടർന്നാൽ 80,156-78,184 ലേയ്ക്ക് പരീക്ഷണത്തിന് ഇടയുണ്ട്. വിപണിയുടെ പ്രതിരോധം 84,569 പോയിന്റിലാണ്.
രൂപയ്ക്ക് ഇടിവ് രൂപയുടെ മൂല്യം 83.66ൽനിന്നും 84.13ലേയ്ക്ക് ദുർബലമായ ശേഷം വാരാന്ത്യം 83.97ലാണ്. സാങ്കേതികവശങ്ങൾ വിലയിരുത്തിയാൽ 84.19ലേയ്ക്കും 84.27ലേയ്ക്കും സഞ്ചരിക്കാം, രൂപയുടെ താങ്ങ് 83.01 ലാണ്. വിദേശ ഓപ്പറേറ്റർമാർ 41,720 കോടി രൂപയുടെ ഓഹരികൾ പോയവാരം വിറ്റു, ആഭ്യന്തര ഫണ്ടുകൾ 39,962 കോടി രൂപ നിക്ഷേപിച്ചു.
ന്യൂയോർക്ക് എക്സ്ചേഞ്ചിൽ സ്വർണത്തിന് തിളക്കം നഷ്ടപ്പെടുന്നു. ട്രോയ് ഔൺസിന് 2658 ഡോളറിൽ നിന്നു 2670 ഡോളർ വരെ ഉയർന്ന ശേഷം വാരാന്ത്യം 2658 ലേയ്ക്ക് താഴ്ന്നു.