മഹീന്ദ്ര സൂപ്പര്‍ ലീഗ് കേരളയുടെ ടൈറ്റില്‍ സ്‌പോണ്‍സര്‍
Wednesday, September 4, 2024 10:49 PM IST
കൊച്ചി: രാജ്യത്തെ പ്രമുഖ എസ്‌യുവി നിര്‍മാതാക്കളായ മഹീന്ദ്ര ആന്‍ഡ് മഹീന്ദ്ര ലിമിറ്റഡ് സൂപ്പര്‍ ലീഗ് കേരളയുമായി (എസ്എല്‍കെ) ടൈറ്റില്‍ സ്‌പോണ്‍സര്‍ഷിപ്പ് കരാര്‍ ഒപ്പിട്ടു.
ഏഴിന് കൊച്ചി ജവഹര്‍ലാല്‍ നെഹ്‌റു സ്റ്റേഡിയത്തിലാണു മഹീന്ദ്ര സൂപ്പര്‍ ലീഗ് കേരള എന്നപേരില്‍ അറിയപ്പെടുന്ന ഫുട്‌ബോള്‍ ലീഗിന്‍റെ അരങ്ങേറ്റ സീസണിന് തുടക്കം കുറിക്കുന്നത്.
ഫോര്‍സ കൊച്ചി എഫ്‌സി, മലപ്പുറം എഫ്‌സി, തിരുവനന്തപുരം കൊമ്പന്‍സ് എഫ്‌സി, കണ്ണൂര്‍ വാരിയേഴ്‌സ് എഫ്‌സി, കാലിക്കറ്റ് എഫ്‌സി, തൃശൂര്‍ എഫ്‌സി എന്നിങ്ങനെ ആറ് ഫ്രാഞ്ചൈസി ടീമുകളാണ് ഉദ്ഘാടന സീസണില്‍ പങ്കെടുക്കുന്നത്. മഹീന്ദ്രയുടെ മുന്‍നിര എസ്‌യുവികള്‍ മത്സരങ്ങള്‍ നടക്കുന്ന വേദികളില്‍ പ്രദര്‍ശിപ്പിക്കും.
ഐപിഎല്‍, ഫിഫ ലോകകപ്പ്, ഐസിസി മെന്‍സ് ക്രിക്കറ്റ് ലോകകപ്പ്, ഐബിഎ വിമണ്‍സ് വേള്‍ഡ് ബോക്‌സിംഗ് ചാമ്പ്യന്‍ഷിപ്പ് തുടങ്ങിയ കായിക മാമാങ്കങ്ങളുമായും നേരത്തേ മഹീന്ദ്ര സഹകരിച്ചിരുന്നു.