സെൻസെക്സ് 80,519ൽനിന്ന് 80,893 റിക്കാർഡ് തകർത്തു പുതിയ ചരിത്രമായ 81,587 വരെ കുതിച്ചതോടെ ലാഭമെടുപ്പിന് ഇടപാടുകാർ മത്സരിച്ചു. വാരാന്ത്യം 80,604ലാണ്. ഈ വാരം 81,478-82,353ൽ പ്രതിരോധം. ബജറ്റ് പ്രതികൂലമായാൽ സൂചികയ്ക്ക് 79,837-79,071ൽ താങ്ങുണ്ട്. വിദേശഫണ്ടുകൾ മൊത്തം 10,945.98 കോടി രൂപയുടെ വാങ്ങൽ നടത്തി. ആഭ്യന്തരഫണ്ടുകൾ ഇടപാടുകൾ നടന്ന നാലു ദിവസവും വില്പനക്കാരായി നിലകൊണ്ട് 4226.29 കോടി രൂപയുടെ ഓഹരികൾ വിറ്റു.
രൂപയ്ക്ക് ഇടിവ് രൂപയുടെ മൂല്യം മുൻവാരം ഇതേ കോളത്തിൽ സൂചിപ്പിച്ച പ്രതിരോധമായ 83.80ലേക്ക് ഇടിഞ്ഞു. 83.54ൽനിന്ന് രൂപ റിക്കാർഡ് തകർച്ചയിലേക്കു നീങ്ങിയതിനിടെ റിസർവ് ബാങ്ക് കരുതൽധനം ഇറക്കി രൂപയുടെ മുഖം ഒന്നിലധികം തവണ മിനുക്കിയതോടെ 83.65ലേക്കു മെച്ചപ്പെട്ടെങ്കിലും ക്ലോസിംഗിൽ 83.69ലാണ്. ഈ വാരം 83.90ലേക്കും തുടർന്ന് 84ലേക്കും മൂല്യം സഞ്ചരിക്കാം. ഇന്ന് ബജറ്റ് വേളയിലെ ചാഞ്ചാട്ടം നിയന്ത്രിക്കാനാവശ്യമായ ഒരുക്കങ്ങൾ ആർബിഐ നടത്തിയിട്ടുണ്ട്.
അന്താരാഷ്ട്ര സ്വർണവിലയിൽ റിക്കാർഡ്. ട്രോയ് ഒൗണ്സിന് 2410 ഡോളറിൽനിന്ന് 2454 പ്രതിരോധം തകർത്ത് 2484 ഡോളർ വരെ കുതിച്ചു. ഈ അവസരത്തിൽ ഫണ്ടുകൾ ലാഭമെടുപ്പിനു മത്സരിച്ചതിനാൽ 2392 ഡോളറിലേക്ക് ഇടിഞ്ഞങ്കിലും വാരാന്ത്യം 2400 ഡോളറിലാണ്.
സാങ്കേതികമായി വിലയിരുത്തിയാൽ വിപണി ദുർബലാവസ്ഥയിലേക്കു മുഖംതിരിക്കുന്ന സാഹചര്യത്തിൽ മുന്നിലുള്ള മൂന്നു മാസങ്ങളിൽ 2700 ഡോളർ മറികടക്കാൻ ക്ലേശിക്കും.
പൊന്നാണ്! ഡോളറും ജാപ്പനീസ് യെന്നുമായുള്ള യുദ്ധം മുന്നിലുള്ള ദിവസങ്ങളിൽ സ്വർണത്തിൽ പ്രതിഫലിക്കും. ഈ വാരം 2376 ഡോളറിലെ സപ്പോർട്ട് നിർണായകമാണ്. 50 ദിവസങ്ങളിലെ ശരാശരിവില ഈ റേഞ്ചിലാണ്. ഈ താങ്ങ് നിലനിർത്തിയാൽ 2500ലേക്ക് അതിവേഗം ഉയരാനാകും. അത്തരമൊരു കുതിപ്പിനു വിപണി സാക്ഷ്യംവഹിച്ചാൽ ചിങ്ങത്തിൽ നമ്മുടെ ആഭരണകേന്ദ്രങ്ങളിൽ പവൻ ചരിത്രനേട്ടം സ്വന്തമാക്കും.