കെഎസ്ആർടിസി ബസ് തടഞ്ഞ സംഭവം: മെമ്മറി കാർഡ് കാണാനില്ല : Deepika.com Kerala News |

Click here for detailed news of all items

കെഎസ്ആർടിസി ബസ് തടഞ്ഞ സംഭവം: മെമ്മറി കാർഡ് കാണാനില്ല

Friday, May 3, 2024 4:51 AM IST

തിരുവനന്തപുരം: പാളയം സാഫല്യം കോംപ്ലക്സിനു മുന്നിൽ കെഎസ്ആർടിസി ബസിനു കുറുകേ മേയർ ആര്യ രാജേന്ദ്രനും ഭർത്താവ് സച്ചിൻദേവ് എംഎൽഎയും ബസ് തടഞ്ഞ സംഭവത്തിലെ നിർണായക ദൃശ്യങ്ങൾ അടങ്ങിയ സിസിടിവി ദൃശ്യങ്ങൾ ശേഖരിച്ചിരുന്ന മെമ്മറി കാർഡ് കാണാനില്ല.

സൂപ്പർഫാസ്റ്റ് ബസിൽ സ്ഥാപിച്ചിരുന്ന മൂന്നു സിസിടിവി കാമറകളുടെ ദൃശ്യങ്ങൾ പരിശോധിക്കാനായി പോലീസ് ഡിവിആർ പരിശോധിച്ചപ്പോഴാണു മെമ്മറി കാർഡ് കാണാതായ വിവരം പോലീസിന്‍റെ ശ്രദ്ധയിൽപ്പെട്ടത്. മേയർ ആര്യ രാജേന്ദ്രനെയും സച്ചിൻദേവ് എംഎൽഎയെയും രക്ഷിക്കാനായി ആരോ മെമ്മറി കാർഡ് എടുത്ത് മാറ്റിയതാണെന്ന ആരോപണവും ഉയരുന്നുണ്ട്.

മെമ്മറി കാർഡ് കാണാതായ സംഭവത്തിൽ അന്വേഷണം നടത്തണമെന്നാവശ്യപ്പെട്ട് കെഎസ്ആർടിസി അധികൃതർ തന്പാനൂർ പോലീസിൽ നൽകിയ പരാതിയെത്തുടർന്ന് പോലീസ് കേസെടുത്തു.

തന്പാനൂരിലെ കെഎസ്ആർടിസി ബസ് ടെർമിനലിൽ പാർക്ക് ചെയ്തിരുന്ന വേളയിലായിരിക്കും ബസിൽനിന്നു മെമ്മറി കാർഡ് നഷ്ടപ്പെട്ടതെന്നാണ് പോലീസ് സംശയിക്കുന്നത്. ആരോ ഇളക്കി മാറ്റിയെന്നാണു പോലീസും സംശയിക്കുന്നത്.

ബസ് ടെർമിനൽ ഭാഗങ്ങളിലെ സിസിടിവി കാമറ ദൃശ്യങ്ങൾ അന്വേഷണത്തിന്‍റെ ഭാഗമായി പോലീസ് പരിശോധിക്കാൻ തീരുമാനിച്ചിരിക്കുകയാണ്. കൂടാതെ ജീവനക്കാരിൽനിന്നും മൊഴിയെടുക്കും. അതേസമയം തെളിവ് നശിപ്പിക്കാൻ കെഎസ്ആർടിസി അധികൃതരും പോലീസും കൂട്ടുനിന്നെന്നാണ് ഉയരുന്ന ആരോപണം.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.