യുവാവിനെ കൊലപ്പെടുത്താന്‍ ശ്രമിച്ച കേസ്: ഒരാൾ അറസ്റ്റിൽ : Deepika.com Nattu Visesham

KOTTAYAM

യുവാവിനെ കൊലപ്പെടുത്താന്‍ ശ്രമിച്ച കേസ്: ഒരാൾ അറസ്റ്റിൽ

Saturday, June 29, 2024 6:49 AM IST

കടുത്തുരുത്തി: ആദിത്യപുരത്ത് പ്രവര്‍ത്തിക്കുന്ന ബിവറേജില്‍ വച്ച് യുവാവിനെ കൊലപ്പെടുത്താന്‍ ശ്രമിച്ച കേസില്‍ ഒരാളെ പോലീസ് അറസ്റ്റ് ചെയ്തു. ആയാംകുടി ഭാഗത്ത് മേലേടത്തു കുഴുപ്പില്‍ വീട്ടില്‍ അനുരാഗി(27) നെയാണ് കടുത്തുരുത്തി പോലീസ് അറസ്റ്റ് ചെയ്തത്. ഇയാളും സുഹൃത്തുക്കളും ചേര്‍ന്ന് കഴിഞ്ഞദിവസം രാത്രി 8.30ന് ആദിത്യപുരത്തെ ബിവറേജ് ഔട്ട്‌ലെറ്റില്‍ എത്തിയ മുട്ടുചിറ സ്വദേശിയായ യുവാവിനെ കൈയില്‍ കരുതിയിരുന്ന ഷേവിംഗ് ബ്ലേഡ് കൊണ്ട് ആക്രമിച്ച് കൊലപ്പെടുത്താന്‍ ശ്രമിച്ചുവെന്നാണ് കേസ്.

സംഭവം സംബന്ധിച്ച് പോലീസ് പറയുന്നതിങ്ങനെ - ബിവറേജില്‍വച്ച് അനുരാഗിന്‍റെ കൂടെയുണ്ടായിരുന്നയാളുടെ തോളില്‍ യുവാവ് തട്ടി. ഇതേത്തുടര്‍ന്ന് അനുരാഗും സുഹൃത്തും ചേര്‍ന്ന് യുവാവിനെ ചീത്തവിളിച്ചു. ഇതു യുവാവ് ചോദ്യം ചെയ്തിരുന്നു. ഇതിലുള്ള വിരോധംമൂലം യുവാവ് ബിവറേജില്‍ നില്‍ക്കുന്ന സമയം ഇവര്‍ സംഘം ചേര്‍ന്നെത്തി യുവാവിനെ ആക്രമിക്കുകയായിരുന്നു.

കേസെടുത്ത കടുത്തുരുത്തി പോലീസ് നടത്തിയ തെരച്ചിലിലാണ് ഇയാളെ പിടികൂടിയത്. കടുത്തുരുത്തി സ്റ്റേഷന്‍ എസ്എച്ച്ഒ കെ. ധനപാലന്‍, എസ്‌ഐമാരായ ശരണ്യ എസ്. ദേവന്‍, സജി ജോസഫ്, സിപിഒ മധു എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്.

ഇയാള്‍ക്ക് കടുത്തുരുത്തി സ്റ്റേഷനില്‍ നിരവധി ക്രിമിനല്‍ കേസുകള്‍ നിലവിലുണ്ട്. മറ്റു പ്രതികള്‍ക്കായി തെരച്ചില്‍ ശക്തമാക്കിയതായും പോലീസ് അറിയിച്ചു.