പാഠപുസ്തകങ്ങളെ ആകർഷകമാക്കി ജോയലിന്‍റെയും കൂട്ടുകാരുടെയും സൃഷ്ടികൾ : Deepika.com Nattu Visesham

KOTTAYAM

പാഠപുസ്തകങ്ങളെ ആകർഷകമാക്കി ജോയലിന്‍റെയും കൂട്ടുകാരുടെയും സൃഷ്ടികൾ

Sunday, June 30, 2024 5:47 AM IST

പുതുപ്പള്ളി: പഠനത്തോടൊപ്പം പാഠപുസ്തകങ്ങളിലെ ചിത്രങ്ങള്‍ വരച്ചും ശ്രദ്ധേയനാകുകയാണു പുതുപ്പള്ളി സ്വദേശിയായ ജോയല്‍.

തിരുവനന്തപുരം ഫൈന്‍ ആര്‍ട്ട്‌സ് കോളജിലെ രണ്ടാം വര്‍ഷ വിദ്യാര്‍ഥിയായ പയ്യപ്പാടി പൂന്തോട്ടംപറമ്പില്‍ ജോയല്‍ ചാക്കോയുടെയും കൂട്ടുകാരുടെയും സൃഷ്ടിയില്‍ വിരിഞ്ഞ ചിത്രങ്ങള്‍ ഇത്തവണത്തെ അഞ്ചാംക്ലാസിലെ സയന്‍സ്, സംസ്‌കൃത പാഠപുസ്തകങ്ങളെ വേറിട്ടതും കൂടുതല്‍ ആകര്‍ഷണീയവുമാക്കുന്നു.

സഹപാഠികളായ മെല്‍വിന്‍ രൂപേഷ്, അനന്തു റെജി, ആല്‍ബിന്‍ ഫ്രാന്‍സിസ്, ആര്‍. ഷിജുരാജു എന്നിവരും ജോയലിനെ സഹായിക്കാനുണ്ടായിരുന്നു. അവിചാരിതമായിട്ടാണ് ഫൈന്‍ ആര്‍ട്ട്‌സിലെ വിദ്യാര്‍ഥികള്‍ക്ക് ചിത്രങ്ങള്‍ നല്കാന്‍ അവസരം ലഭിച്ചത്. ഇവരുടെ കഴിവുകള്‍ തിരിച്ചറിഞ്ഞ വിദ്യാഭ്യാസവകുപ്പിലെ ബന്ധപ്പെട്ടവര്‍ ആവശ്യപ്പെട്ടതോടെ ജോയലും സുഹൃത്തുക്കളും ചിത്രങ്ങള്‍ വരച്ചു നല്കുകയായിരുന്നു.

പയ്യപ്പാടി കീച്ചാല്‍ പൂന്തോട്ടംപറമ്പില്‍ എന്‍.സി. ചാക്കോയുടെയും ആലീസ് ചാക്കോയുടെയും മകനാണ് ജോയല്‍. സഹോദരി ലിയ മാന്നാനം കെഇ കോളജില്‍ പിജി വിദ്യാര്‍ഥിനിയാണ്. പാഠപുസ്തകങ്ങളില്‍ ചിത്രങ്ങള്‍ അച്ചടിച്ചു വന്നതിന്‍റെ സന്തോഷത്തിലാണ് ഫൈന്‍ ആര്‍ട്ടസ് കോളജിലെ വിദ്യാര്‍ഥികള്‍.