ലണ്ടൻ: യുക്മ കേരളപൂരം വള്ളംകളിയുടെ ആവേശം ഒട്ടും ചോരാതെ പ്രേക്ഷക ഹൃദയങ്ങളിലേക്ക് എത്തിക്കാൻ റണ്ണിംഗ് കമന്‍ററി ടീം ഒരുങ്ങികഴിഞ്ഞു. വള്ളംകളി കമന്‍ററി ടീം സി.എ. ജോസഫിന്‍റെ നേതൃത്വത്തിലാണ് ഒരുങ്ങുന്നത്.
മുൻ വർഷങ്ങളിൽ യുക്മ സംഘടിപ്പിച്ച മത്സര വള്ളംകളികളെ വൻ വിജയമാക്കി മാറ്റിയതിൽ വലിയ പങ്കാണ് റണ്ണിംഗ് കമന്‍ററി ടീം നിർവഹിച്ചത്. കോവിഡ് കാരണം രണ്ട് വര്‍ഷത്തെ ഇടവേളയ്ക്ക് ശേഷം 2022ൽ മത്സരവള്ളംകളി മടങ്ങിയെത്തിയപ്പോൾ വലിയ ആവേശത്തോടെയാണ് ബ്രിട്ടനിലെ മലയാളികള്‍ സ്വീകരിച്ചത്.
വള്ളംകളി നേരിട്ട് കാണാനെത്തുന്നവര്‍ക്കും ലൈവ് പ്രക്ഷേപണം ചെയ്യുന്ന മാഗ്ന വിഷന്‍ ടിവിയിലൂടെ കാണുന്ന ലോകമെമ്പാടുമുള്ള വള്ളംകളി പ്രേമികള്‍ക്കും ഓളപ്പരപ്പിലുയരുന്ന വീറും വാശിയും ആവേശവുമെല്ലാം പകര്‍ന്നു നല്‍കുന്നതിന് റണ്ണിംഗ് കമന്‍ററി ടീം തയാറെടുത്തു കഴിഞ്ഞു.
യുകെ മലയാളികളുടെ പ്രിയങ്കരനായ സി.എ. ജോസഫിനൊപ്പം പ്രതിഭാധനരും പരിചയസമ്പന്നരുമായ ഷൈമോന്‍ തോട്ടുങ്കല്‍ (യുകെ വാര്‍ത്ത എഡിറ്റര്‍), തോമസ് പോള്‍ (സ്റ്റോക്ക് ഓണ്‍ ട്രന്‍റ്), ജോൺസൺ കളപ്പുരയ്ക്കൽ (പ്രെസ്റ്റൺ), ജിനോ സെബാസ്റ്റ്യൻ (നനീട്ടൺ) എന്നിവരും ചേരുമ്പോള്‍ കാണികളെ ആവേശക്കൊടുമുടിയിലേക്ക് ഉയര്‍ത്തും.
യുക്മ സാംസ്കാരികവേദി രക്ഷാധികാരി കൂടിയായ സി.എ. ജോസഫ് എന്ന മുന്‍ അധ്യാപകന്‍ സാഹിത്യവും കഥകളും ഗ്രാമീണപദപ്രയോഗങ്ങളും നാടന്‍ ശൈലിയും ചരിത്രവും വഞ്ചിപ്പാട്ടുകളുമെല്ലാം ഇടകലര്‍ത്തി നല്‍കുന്ന തത്സമയ വിവരണം കാണികളെ ആവേശഭരിതരാക്കും.
യുകെയിലെ മലയാളി സമൂഹത്തില്‍ ഏറെ ശ്രദ്ധേയരായ ഷൈമോന്‍ തോട്ടുങ്കലും തോമസ് പോളും ജോൺസൺ കളപ്പുരയ്ക്കലും ജിനോ സെബാസ്റ്റ്യനും എല്ലാം നാട്ടില്‍ പ്രസംഗ അനൗണ്‍സ്മെന്‍റ് വേദികളിൽ തിളങ്ങിയ താരങ്ങളാണ്.
യുക്മ ടിഫിൻ ബോക്സ് കേരളപൂരം വള്ളംകളിയുടെ പ്രധാന സ്പോൺസേഴ്സ് ടിഫിൻ ബോക്സ്, ലൈഫ് ലൈൻ പ്രൊട്ടക്റ്റ് ലിമിറ്റഡ്, ഫസ്റ്റ് കോൾ, ക്ലബ് മില്ല്യണയർ, പോൾ ജോൺ സോളിസിറ്റേഴ്സ്, ട്യൂട്ടേഴ്സ് വാലി, മട്ടാഞ്ചേരി കാറ്ററിംഗ് ടോണ്ടൻ, മലബാർ ഗോൾഡ്, തെരേസാസ്, കൂട്ടം, ഗ്ലോബൽ സ്റ്റഡി ലിങ്ക്, ഏലൂർ കൺസൽറ്റൻസി, മലബാർ ഫുഡ്സ് ലിമിറ്റഡ് എന്നിവരാണ്.
യുക്മ ദേശീയ സമിതി ഭാരവാഹികളായ ഡോ.ബിജു പെരിങ്ങത്തറയുടെ നേതൃത്വത്തിൽ കുര്യൻ ജോർജ്, ഡിക്സ് ജോർജ്, ഷിജോ വർഗീസ്, ലീനുമോൾ ചാക്കോ, പീറ്റർ താണോലിൽ, സ്മിത തോട്ടം, എബ്രഹാം പൊന്നും പുരയിടം, മനോജ്കുമാർ പിള്ള, അലക്സ് വർഗീസ്, അഡ്വ. എബി സെബാസ്റ്റ്യൻ തുടങ്ങിയവരുടെ നേതൃത്വത്തിൽ റീജിയണൽ ഭാരവാഹികൾ, അംഗ അസോസിയേഷൻ ഭാരവാഹികൾ തുടങ്ങിയവരാണ് വള്ളംകളിയുടെ സംഘാടകർ.
ഈ മാസം 31ന് റോഥർഹാമിലെ മാൻവേഴ്സ് തടാകക്കരയിലേക്ക് സ്വാഗതം ചെയ്യുന്നതായി യുക്മ പ്രസിഡന്‍റ് ഡോ.ബിജു പെരിങ്ങത്തറ, ജനറൽ സെക്രട്ടറി കുര്യൻ ജോർജ്, ജനറൽ കൺവീനർ അഡ്വ.എബി സെബാസ്റ്റ്യൻ എന്നിവർ അറിയിച്ചു.
കേരളപൂരം വള്ളംകളി നടക്കുന്ന വേദിയുടെ വിലാസം: Manvers Lake, Station Road, WathUponDearne, Rotherham, South Yorkshire. S63 7DG.
ആവേശം കൂട്ടാൻ ലൈവ് മ്യൂസിക് ബാൻഡുമായി ചായ & കോഡ്സ്
യുക്മയുടെ വള്ളംകളി മത്സരത്തിന് ആവേശം പകരാൻ ഇത്തവണ സംഗീതത്തിന്‍റെ മാസ്മരിക ലോകമൊരുക്കി ലൈവ് ബാൻഡുമായി ചായ & കോഡ്സ് എത്തുന്നു. പിന്നണി ഗായകനും സിനിമാ സംഗീത സംവിധായകനുമായ ഗോകുൽ ഹർഷന്‍റെ നേതൃത്വത്തിലാണ് ഈ അഞ്ച് അംഗ ബാൻഡ് എത്തുന്നത്.
നാട്ടിലെ മെഗാഷോകളിലും സംഗീത നിശകളിലും സ്ഥിരം സാന്നിധ്യമായിരുന്ന സംഗീതജ്ഞരാണ് ഈ ബാൻഡിന്‍റെ പിന്നിൽ പ്രവർത്തിക്കുന്നത്. ഗോകുൽ ഹർഷന് പുറമേ ആശിഷ് രമേഷ്, എബിൻ തോമസ്, കൃഷ്ണ ജഗദീഷ്, സുബിൻ പാപ്പച്ചൻ തുടങ്ങിയവരാണ് ബാൻഡിലെ മറ്റ്‌ അംഗങ്ങൾ.
|