കൊരട്ടി: തദ്ദേശീയർക്കും ദേശീയ പാതയിലെ യാത്രക്കാർക്കും ഏറെ ഗുണകരമാവുന്ന വഴിയോര വിശ്രമകേന്ദ്രം നാടിനു സമർപ്പിച്ചു. കൊരട്ടി ദേശീയപാതയോരത്തു നിർമാണം പൂർത്തിയാക്കിയ കേന്ദ്രത്തിന്റെ ഉദ്ഘാടനം സനീഷ്കുമാർ ജോസഫ് എംഎൽഎ നിർവഹിച്ചു. ഗ്രാമപഞ്ചായത്ത് പ്രസിഡന്റ് പി.സി.ബിജു അധ്യക്ഷത വഹിച്ചു. 3500 ചതുരശ്ര അടി വിസ്തീർണത്തിൽ നിർമിച്ച കെട്ടിടത്തിൽ ആധുനിക ടോയ്ലറ്റ് ബ്ലോക്ക്, ജനകീയ ഹോട്ടൽ, ഇക്കോ ഷോപ്പ്, ഷോപ്പിംഗ് ഹാൾ തുടങ്ങിയ സൗകര്യങ്ങൾ ഒരുക്കിയിട്ടുണ്ട്.
കൊരട്ടി പഞ്ചായത്ത് ഇ - പഞ്ചായത്ത് ആക്കാനുള്ള ഇ - അസെറ്റ് പദ്ധതിയുടെ പുസ്തക പ്രകാശനം, "സാരി തരൂ സഞ്ചിതരൂ' പദ്ധതിയും ചടങ്ങിൽ ഉദ്ഘാടനം ചെയ്തു. ജില്ലാ പഞ്ചായത്ത് മെന്പർ ലീല സുബ്രഹ്മണ്യൻ, പഞ്ചായത്ത് വൈസ് പ്രസിഡന്റ് ഷൈനി ഷാജി, സ്ഥിരംസമതി ചെയർമാന്മാരായ അഡ്വ. കെ.ആർ. സുമേഷ്, കുമാരി ബാലൻ, നൈനു റിച്ചു, ബ്ലോക്ക് മെന്പർ സിന്ധു രവി, പഞ്ചായത്ത് അംഗങ്ങളായ വർഗീസ് തച്ചുപറന്പിൽ, ബിജോയ് പെരേപ്പാടൻ, പി.ജി. സത്യപാലൻ, പോളി സബാസ്റ്റ്യൻ, കെ.പി. തോമാസ്, പഞ്ചായത്ത് സെക്രട്ടറി പി.എസ്. പ്രദീപ്കുമാർ എന്നിവർ പ്രസംഗിച്ചു. പഞ്ചായത്ത് അസി. എൻജിനീയർ എ.വി. ആന്റു റിപ്പോർട്ട് അവതരിപ്പിച്ചു.