കൊരട്ടി: കൊരട്ടിമുത്തിയുടെ തിരുനാളിന്റെ മുന്നൊരുക്കങ്ങൾ വിലയിരുത്താനും വിവിധ സർക്കാർ വകുപ്പുകളുടെ സഹകരണത്തോടെ പ്രവർത്തനങ്ങൾ കൂടുതൽ കാര്യക്ഷമമാക്കാനും ഗ്രാമപഞ്ചായത്ത് ഹാളിൽ അവലോകനയോഗം ചേർന്നു. സനീഷ് കുമാർ ജോസഫ് എംഎൽഎ ഉദ്ഘാടനംചെയ്തു. ഗ്രാമപഞ്ചായത്ത് പ്രസിഡന്റ് പി.സി. ബിജു അധ്യക്ഷനായി. പോലീസ്-എക്സൈസ് വകുപ്പുകളുടെ നേതൃത്വത്തിൽ മയക്കുമരുന്ന്, അനധികൃത ലഹരിവിൽപ്പന തുടങ്ങിയവക്കെതിരെ ശക്തമായ നടപടി സ്വീകരിക്കും.
ഒരുവർഷത്തോളമായി ഇരുട്ടിലായ റെയിൽവേ മേൽപ്പാലത്തിൽ വഴിവിളക്കുകൾ സ്ഥാപിക്കാനും യാചക നിരോധിത പ്രവർത്തനങ്ങൾ കാര്യക്ഷമമാക്കാനും തീരുമാനമെടുത്തിട്ടുണ്ട്. ഗതാഗതതടസം സൃഷ്ടിക്കുന്ന വഴിയോരക്കച്ചവടം അനുവദിക്കില്ല. 24 മണിക്കൂറും ചികിത്സാസഹായം ലഭ്യമാക്കും. മാലിന്യങ്ങൾ നീക്കം ചെയ്യുന്നതിന് ഹരിതകർമസേനയുടെ സേവനവും ഉറപ്പാക്കും. പോലീസ്, വാട്ടർ അഥോറിറ്റി, കഐസ്ഇബി, ഇറിഗേഷൻ, കഐസ്ആർടിസി, ബസ് ഓണേഴ്സ് അസോസിയേഷൻ, മർച്ചന്റ്സ് അസോസിയേഷൻ, ഡ്രൈവേഴ്സ് യൂണിയൻ പ്രതിനിധികൾ, അടക്കമുള്ളവർ യോഗത്തിൽ പങ്കെടുത്തു. ഫൊറോന വികാരി ഫാ. ജോസ് ഇടശേരി, ബ്ലോക്ക് പഞ്ചായത്ത് പ്രസിഡന്റ് വേണു കണ്ടരുമഠത്തിൽ, ഷൈനി ഷാജി, പ്രിൻസിപ്പൽ എസ്ഐ ഷാജു എടത്താടൻ, എ.കെ. വാസുദേവൻ, കെ.ആർ. സുമേഷ്, കുമാരി ബാലൻ, സി.എൻ. ഷിനിൽ എന്നിവർ പ്രസംഗിച്ചു.