ADVERTISEMENT

ADVERTISEMENT

നാലു പേര്‍ അറസ്റ്റില്‍

പത്തനംതിട്ട: നിരോധിത പുകയില ഉത്പന്നങ്ങളുമായി വിത്യസ്ത കേസുകളിലായി നാലു പേര്‍ അറസ്റ്റിൽ.

അടൂര്‍ പന്നിവിഴ മേലേതില്‍ അക്കര പുത്തന്‍ വീട്ടില്‍ ശരത് കുമാർ(38), ഏനാത്ത് വാരുവില്‍ പുരയിടം എസ്. സുനില്‍ (49), പശ്ചിമ ബംഗാള്‍ സ്വദേശികളായ പങ്കജ് (27), ഉമേഷ് ശങ്കര്‍ (35) എന്നിവരെയാണ് അറസ്റ്റിലായത്.

ADVERTISEMENT

വീട്ടമ്മയുടെ പരാതിയിൽ അടൂർ എസ്ഐക്കു സ്ഥലംമാറ്റം

അടൂർ: ജാമ്യമില്ലാ കേസെടുത്ത ആളെ അന്വേഷിച്ച് രാത്രിയിൽ സ്ത്രീകൾ മാത്രമുള്ള വീട്ടിലെത്തി പരിശോധന നടത്തിയെന്ന പരാതിയിൽ എസ്ഐയ്ക്ക് സ്ഥലംമാറ്റം. അടൂർ പോലീസ് സ്റ്റേഷനിലെ എസ്ഐ അനൂപ് ചന്ദ്രനെയാണ് ജില്ലാ പോലീസ് മേധാവി പത്തനംതിട്ട കൺട്രോൾ റൂമിലേക്ക് സ്ഥലം മാറ്റിയത്. അടൂർ കരുവാറ്റ മേരീഭവനിൽ ജോമോന്‍റെ ഭാര്യ ഐനസാണ് ജില്ലാ പോലീസ് മേധാവിക്ക് പരാതി നൽകിയത്. വീട്ടിൽ താനും രണ്ട് പെൺമക്കളും മാത്രം ഉള്ളപ്പോൾ എസ്ഐയും മറ്റ് ഏഴ് പോലീസുകാരും എത്തിയെന്നും തങ്ങളെ ഭീഷണിപ്പെടുത്തിയതായും ഇതു മാനസിക വിഷമമുണ്ടാക്കിയതായും ഐനസ് പാരാതിയിൽ പറയുന്നു. കഴിഞ്ഞ മേയ് ഒന്പതിന് കരുവാറ്റ ക്ഷേത്രത്തിലെ ഉത്സവത്തിന് സംഘർഷമുണ്ടാക്കി എന്നതിന് ജോമോനെതിരേ അടൂർ പോലീസ് ജാമ്യമില്ലാ കേസെടുത്തിരുന്നു. എന്നാൽ ഈ കേസിൽ പോലീസ് അകാരണമായി ജോമോനെ മർദിക്കുകയായിരുന്നുവെന്നും കള്ളക്കേസാണ് എടുത്തതെന്നുമാണ് ഐനസ് പറയുന്നത്. കൂടാതെ ജോമോൻ മുൻകൂർ ജാമ്യത്തിനായി ഹൈക്കോടതിയെ സമീപിച്ചതോടെയാണ് ചൊവ്വാഴ്ച രാത്രി ജോമോനെ കസ്റ്റഡിയിൽ എടുക്കാൻ പോലിസ് വീട്ടിലെത്തിയതെന്നും ഐനസ് ആരോപിക്കുന്നു. എന്നാൽ ഉത്സവ സ്ഥലത്ത് തർക്കത്തിനിടയിൽ ജോമോൻ ഡ്യൂട്ടിയിലുണ്ടായിരുന്ന പോലീസിനെ മർദിച്ചതിനാണ് കേസെടുത്തതെന്നാണ് അടൂർ പോലീസ് പറയുന്നത്.

കാട്ടാനക്കൂട്ടത്തെ നിരീക്ഷിക്കാന്‍ മൂന്ന് സ്ഥലത്ത് കാമറ

കോന്നി: ജനവാസമേഖലയില്‍ ഇറങ്ങിയ കാട്ടാനക്കൂട്ടത്തെ നിരീക്ഷിക്കാന്‍ കാമറ സ്ഥാപിച്ചു. കുളത്തുമണ്‍, ചെളിക്കുഴി, കല്ലേലി ഭാഗങ്ങളിലാണ് കാമറ സ്ഥാപിച്ചത്. കാമറ നിരീക്ഷണത്തിലൂടെ ആനയുടെ സഞ്ചാരപാത കണ്ടെത്തി തുടര്‍നടപടിയിലേക്ക് കടക്കും. കഴിഞ്ഞ ദിവസം കമ്പകത്തുംപച്ചയില്‍ നിന്ന് ആനക്കൂട്ടത്തെ കിളിയറ ഭാഗത്തേക്ക് തിരിച്ചു വിട്ടിരുന്നു. ആനക്കൂട്ടത്തിന്‍റെ സഞ്ചാരപാത മനസിലാക്കുന്നതിനാണ് കാമറ സ്ഥാപിച്ചത്. കാട്ടാനക്കൂട്ടത്തെ കണ്ടെത്താന്‍ റാപിഡ് റെസ്പോണ്‍സ് ടീം, വനംവകുപ്പ് ജീവനക്കാരും നാട്ടുകാരും ചേര്‍ന്ന മൂന്ന് സംഘമാണ് തിരച്ചിലില്‍ ഏര്‍പ്പെട്ടത്. ആനകളെ ഉള്‍ക്കാട്ടിലേക്ക് കയറ്റി വിടുന്നതിന് പമ്പ് ആക്ഷന്‍ ഗണ്‍ ഉപയോഗിക്കും. സംഘത്തിന് വേണ്ട നിര്‍ദേശം നല്‍കുന്നതിന് വനത്തിന് പുറത്ത് ടീമുണ്ട്. കഴിഞ്ഞ ദിവസങ്ങളില്‍ കോന്നി വനം ഡിവിഷനിലെ ജനവാസമേഖലയില്‍ കാട്ടനക്കൂട്ടം ഇറങ്ങി നിരന്തരം നാശനഷ്ടം ഉണ്ടാക്കിയിരുന്നു. ഇതേത്തുടർന്നാണ് നടപടികൾ. വന്യമൃഗസംഘര്‍ഷവുമായി ബന്ധപ്പെട്ട് അടിയന്തര സാഹചര്യത്തില്‍ ബന്ധപ്പെടേണ്ട നമ്പർ. കോന്നി- 9188407513, റാന്നി- 9188407515.

ജില്ലയില്‍ ഒമ്പത് ദുരിതാശ്വാസ ക്യാമ്പുകള്‍

പത്തനംതിട്ട: ജില്ലയില്‍ ദുരിതാശ്വാസ ക്യാമ്പുകള്‍ ഒമ്പത്. തിരുവല്ല താലൂക്കിലാണ് ക്യാമ്പുകളെല്ലാം പ്രവര്‍ത്തിക്കുന്നത്. 90 കുടുംബങ്ങളിലായി 108 പുരുഷന്‍മാരും 127 സ്ത്രീകളും 72 കുട്ടികളും ഉള്‍പ്പെടെ 307 പേരാണ് ക്യാമ്പിലുള്ളത്. വിദ്യാഭ്യാസ സ്ഥാപനങ്ങള്‍ക്ക് അവധി പത്തനംതിട്ട: ജില്ലയില്‍ ദുരിതാശ്വാസ ക്യാമ്പായി പ്രവര്‍ത്തിക്കുന്ന തിരുവല്ല താലൂക്കിലെ വേങ്ങല്‍ എംടിഎല്‍പി സ്‌കൂൾ, മേപ്രാല്‍ സര്‍ക്കാര്‍ എല്‍പി സ്‌കൂള്‍ എന്നിവയ്ക്കും സുരക്ഷ മുന്‍നിര്‍ത്തി പെരിങ്ങര കാരയ്ക്കല്‍ എല്‍പി സ്‌കൂളിനും ജില്ലാ കളക്ടര്‍ എസ് പ്രേം കൃഷ്ണന്‍ ഇന്ന് അവധി പ്രഖ്യാപിച്ചു.

പന്പാനദിയിൽ മുങ്ങിമരിച്ച നിലയിൽ

കോഴഞ്ചേരി: പമ്പാനദിയില്‍ കുളിക്കാനെത്തിയ വയോധികന്‍ മുങ്ങിമരിച്ചു. ഛത്തീസ്ഗഡില്‍ സ്ഥിരതാമസമാക്കിയ ഭിലായ്, മോത്തിലാല്‍ നെഹ്റു നഗര്‍, പി.ഡി. ഷാജിയാണ് (64) മരിച്ചത്. ആറന്മുള പഞ്ചായത്ത് ഓഫിസിനു സമീപം ബന്ധുവീടുകളുള്ള ഷാജി മൂന്നു ദിവസം മുന്പാണ് ഇവിടെ എത്തിയത്. രണ്ട് ദിവസവും ബന്ധുവീടുകളില്‍ കഴിഞ്ഞിരുന്ന ഇദ്ദേഹം ബുധനാഴ്ച രാവിലെ രവി എന്ന ബന്ധുവിന്‍റെ വീട്ടില്‍ നിന്ന് പ്രഭാതഭക്ഷണത്തിനു ശേഷം പുറത്തേക്കു പോയിരുന്നു. ആറ്റുതീരത്തേക്ക് പോയ ഷാജി കുളിക്കാന്‍ ശ്രമിക്കുന്നതിനിടെ കാല്‍വഴുതി പമ്പയാറ്റിലേക്കു വീണതാകാമെന്ന് പോലീസ് പറഞ്ഞു. രണ്ട് മണിക്കൂറിനു ശേഷം സത്രക്കടവിനു താഴെയായി ആറ്റുതീരത്തോടടുത്തായി മൃതദേഹം കണ്ട നാട്ടുകാരാണ് വിവരം പോലീസിനെയും അഗ്‌നിശമന സേനയെയും അറിയിച്ചത്. സേന എത്തി കരയ്‌ക്കെടുത്ത മൃതദേഹത്തില്‍ നിന്നു ലഭിച്ച ആധാര്‍ കാര്‍ഡ് വഴിയാണ് ആളിനെ തിരിച്ചറിഞ്ഞത്. ഷാജിയുടെ അച്ഛന്‍റെ കാലത്ത് ആറന്മുളയിൽ നിന്നും ഛത്തീസ്ഗഡിലെത്തി സ്ഥിരതാമസം തുടങ്ങിയതാണ്.

തെറ്റുപാറ നിവാസികളുടെ ദുരിതം കാണാന്‍ കളക്ടറെത്തി

പുല്ലാട്: തെറ്റുപാറ നിവാസികളുടെ ദുരിതം നേരില്‍ കാണാന്‍ ജില്ലാ കളക്ടറെത്തി. കോയിപ്രം ഗ്രാമപഞ്ചായത്തിലെ ഏഴാംവാര്‍ഡില്‍പ്പെട്ട തെറ്റുപാറ നഗറിനു സമീപം പിഐപി വലതുകര കനാലിന്‍റെ സമീപം താമസിക്കുന്ന 25 കുടുംബങ്ങൾക്കാണ് മഴ കനക്കുന്നതോടെ വെള്ളം കയറുന്നതു കാരണം സ്ഥിരമായി ദുരിതാശ്വാസ ക്യാന്പുകളിലേക്കു മാറേണ്ടിവരുന്നത്. പിഐപി കനാലിനു സമീപത്തുകൂടി കടന്നുപോകുന്ന തോട്ടില്‍ മാലിന്യങ്ങള്‍ ഓരോ മഴക്കാലത്തും കൂമ്പാരമാകുകയും തുടര്‍ന്ന് പ്രദേശവാസികളുടെ വീടുകളിലും കൃഷിയിടങ്ങളിലും വെള്ളം കയറുന്നതും പതിവാകുകയായിരുന്നു. അശാസ്ത്രീയമായ രീതിയില്‍ തോട് നവീകരിച്ചതുകൊണ്ടാണ് വെള്ളം കയറുന്നത്. ഇവരുടെ ദുരിതാവസ്ഥ മാധ്യമങ്ങള്‍ റിപ്പോര്‍ട്ട് ചെയ്തതിനേ തുടര്‍ന്ന് ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി അധ്യക്ഷന്‍ ജിജി മാത്യു കളക്ടര്‍ക്ക് നിവേദനം നല്‍കുകയും സ്ഥലം നേരില്‍ കാണുന്നതിന് അഭ്യർഥിക്കുകയും ചെയ്തതിനേ തുടര്‍ന്നാണ് ജില്ലാ കളക്ടർ എസ്. പ്രേംകൃഷ്ണൻ കഴിഞ്ഞദിവസം സ്ഥലം സന്ദർശിച്ചത്. കളക്ടറോടൊപ്പം റവന്യൂ, പിഐപി, ഇറിഗേഷന്‍ ഉദ്യോഗസ്ഥരുമുണ്ടായിരുന്നു. പ്രദേശവാസികളുടെയും ജനപ്രതിനിധികളുടെയും ദുരവസ്ഥ കളക്ടറുടെ ശ്രദ്ധയില്‍പെടുത്തിയതിനേതുടര്‍ന്ന് തന്‍റെ ചേംബറില്‍ അടിയന്തരമായി ഇറിഗേഷന്‍, പിഐപി, റവന്യൂ , ജനപ്രതിനിധികള്‍ എന്നിവരുടെ യോഗം ചേര്‍ന്ന് യുദ്ധകാലാടിസ്ഥാനത്തില്‍ പരിഹാരം കണ്ടെത്താമെന്നും ഇതിന് ദുരന്ത നിവാരണ അഥോറിറ്റിയുടെ സഹായം തേടുമെന്നും കളക്ടര്‍ ഉറപ്പു നല്‍കി. പിഐപി കനാലിന് മുകളിലൂടെ തോട് നിർമിക്കുകയും കുടിവെള്ളത്തിനായി കിണറുകള്‍ നിർമിക്കുകയും ചെയ്താല്‍ മാത്രമേ വെള്ളക്കെട്ടിനു ശാശ്വത പരിഹാരം ഉണ്ടാകുകയുള്ളൂവെന്ന പ്രദേശവാസികളുടെ ആവശ്യം അനുഭാവപൂർവം പരിഗണിക്കാമെന്നും കളക്ടർ പറഞ്ഞു. പദ്ധതിക്കായി വിശദമായ പ്രോജക്ട് റിപ്പോർട്ട് നൽകണമെന്ന് പിഐപി ഉദ്യോഗസ്ഥരോടു കളക്ടർ നിർദേശിച്ചു. ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി അധ്യക്ഷൻ ജിജി മാത്യു, ഗ്രാമപഞ്ചായത്തംഗം ലിജോ കുന്നപ്പുഴ, മുന്‍ മെംബര്‍ ഷിബു കുന്നപ്പുഴ, വിവിധ രാഷ്ട്രീയ പാര്‍ട്ടി പ്രതിനിധികൾ എന്നിവർ സന്നിഹിതരായിരുന്നു.

വെള്ളക്കെട്ട് ഒഴിയാതെ പെരിങ്ങരയിലെ ഗ്രാമീണ റോഡുകൾ

തിരുവല്ല: കാവുംഭാഗം - ചാത്തങ്കരി റോഡ് ഉന്നത നിലവാരത്തിൽ നിർമിച്ചതിനു പിന്നാലെ ഉപ റോഡുകൾ വെള്ളത്തിലായി. കാവുംഭാഗം - ചാത്തങ്കരി റോഡ് രണ്ടടിയോളം ഉയർത്തിയതോടെയാണ് മറ്റ് റോഡുകൾ വെള്ളത്തിനടിയിലായത്. പെരിങ്ങര - കാരയ്‌ക്കൽ, യമ്മർകുളങ്ങര ഗണപതിക്ഷേത്രം, കാനേകാട്ടുപടി -പുതുക്കുളങ്ങര, വായനശാല-സ്വാമിപാലം റോഡുകളാണ് ആഴ്ചകളായി വെള്ളക്കെട്ടിൽ വലയുന്നത്. കാലവർഷത്തെ തുടർന്ന് ഉണ്ടായ വെള്ളപ്പൊക്കത്തിൽ രൂപപ്പെട്ട വെളളം പ്രദേശത്തെ പലഭാഗങ്ങളിലും ഒഴുകി മാറാതെ കെട്ടിക്കിടക്കുകയാണ്. പ്രദേശത്തിന്‍റെ പലഭാഗങ്ങളിലും വെള്ളം ഇറങ്ങിപ്പോകാൻ ഇനിയും ദിവസങ്ങൾ കാത്തിരിക്കണം. ഇതിനിടെ വീണ്ടും മഴ പെയ്താൽ കാത്തിരിപ്പ് പിന്നെയും നീളും. ചെളിവെള്ളത്തിലൂടെ നീന്തിയാണ് നാട്ടുകാരുടെ യാത്ര. മണ്ണിട്ടുയർത്തി നിർമിച്ച റോഡുകളും പാലങ്ങളും മറ്റു നിർമാണങ്ങളുമെല്ലാം വെള്ളത്തിന്‍റെ സുഗമമായ ഒഴുക്കിനെ തടസപ്പെടുത്തിയിരിക്കുകയാണ്. വാഹനങ്ങളും തകരാറിലാകും. പെരിങ്ങര പഞ്ചായത്ത് ഓഫീസിലും വെള്ളക്കെട്ടാണ്. നേരത്തേ പെരിങ്ങര മാതകത്തിൽ തോട്ടിൽ നിന്നുള്ള വെള്ളം നിരവധി വാച്ചാലുകൾ കടന്നു കൂരച്ചാൽ മാണിക്കത്തകിടി പാടശേഖരത്തിൽ എത്തിച്ചേരുകയും അവിടെനിന്നും ഒഴുകി ചാത്തങ്കരി തോട്ടിലേക്ക് ഒഴുകിപ്പോയിരുന്നതുമാണ്. എന്നാൽ ഇന്നിപ്പോൾ തോട്ടിലെ നീരൊഴുക്ക് തടസപ്പെട്ടു. നിരവധി വീടുകളും അവിടേക്കെല്ലാം വഴികളും നിർമിച്ചതോടെ പ്രശ്നം സങ്കീർണമായി. ഇതിനിടെയാണ് മറ്റു സ്ഥലങ്ങളിലെയും വെള്ളക്കെട്ട് പ്രശ്നം ഉയർന്നുവന്നത്. അഞ്ച് വർഷങ്ങൾക്ക് മുമ്പ് പ്രദേശവാസികളുടെ പരാതിയേതുടർന്ന് പെരിങ്ങര പഞ്ചായത്തിലെ 11,12 വാർഡുകളിലെ പ്രദേശങ്ങൾ മൈനർ ഇറിഗേഷൻ വകുപ്പ് ഉദ്യോഗസ്ഥ സംഘം സന്ദർശനം നടത്തി. വെള്ളക്കെട്ട് പരിഹരിക്കാനായി സംഘം പരിശോധന നടത്തിയെങ്കിലും തുടർനടപടികൾ ഉണ്ടായില്ല. വെള്ളക്കെട്ട് പതിവാകുന്ന പഞ്ചായത്ത് കാര്യാലയം, പണിക്കോട്ടിൽ ഭാഗം, മറിയപ്പള്ളിൽ ഭാഗം, പെരുഞ്ചാത്ര, മുണ്ടന്താനത്ത് പടി എന്നിവിടങ്ങളിൽ സംഘം സന്ദർശിച്ചു. തോടിന്‍റെ സ്ഥലനിർണയവും സംഘം നടത്തി. ഇതിനു സമീപത്തെ ഭൂമിയുടെ സർവേ നമ്പരും കണ്ടെത്തി. ലഭ്യമായ വിവരങ്ങൾ സ്ഥലം എംഎൽഎയ്ക്കും ജില്ലാ കളക്ടർക്കും നൽകാനും തോടുകൾ വീണ്ടെടുത്ത് നീർച്ചാലുകൾ പുനരുജ്ജീവിപ്പിക്കാനുമെല്ലാം നടപടികളെടുക്കാനും തീരുമാനിച്ചതാണ്. തുടർ നടപടികൾ നടന്നില്ലെന്നു മാത്രം.

അങ്കമാലി - എരുമേലി - തിരുവനന്തപുരം സമാന്തര പാതയ്ക്കും സാധ്യത

പത്തനംതിട്ട: ശബരി റെയിൽപ്പാത എരുമേലിയിൽ നിന്നു പത്തനംതിട്ട, പുനലൂർ വഴി തിരുവനന്തപുരം പാതയായി വികസിക്കാനും സാധ്യത. തലസ്ഥാന നഗരിയിലേക്ക് കേരളത്തിലൂടെയുള്ള മൂന്നാമത്തെ പാതയായി ഇതു മാറും. പാത കൂടുതൽ ലാഭകരമാകാനും പദ്ധതി ഉപകരിക്കും. നിലവിൽ എരുമേലി വരെയുള്ള പാത ശബരിമല തീർഥാടകരെ ലക്ഷ്യംവച്ചാണ് നിർമിക്കുന്നത്. എരുമേലിയിൽനിന്നു റാന്നി, പത്തനംതിട്ട , കുമ്പഴ, കോന്നി, പത്തനാപുരം, പുനലൂർ, അഞ്ചൽ, കുളത്തൂപ്പുഴ, മടത്തറ, പാലോട്, നെടുമങ്ങാട്‌, നെയ്യാറ്റിൻകര, ബാലരാമപുരം വഴി വിഴിഞ്ഞം സീപോർട്ട്‌ വരെയുള്ള ഒരു പാതയ്ക്കാണ് നിർദേശമുള്ളത്. 1990 കളിൽ ശബരി പാതയെ സംബന്ധിച്ച പഠനങ്ങൾ നടന്നപ്പോൾ അങ്കമാലിയിൽ നിന്ന് എരുമേലി വഴി പുനലൂരിലേക്കാണ് പരിഗണിച്ചിരുന്നത്. എരുമേലി മുതൽ പുനലൂർ വരെയുള്ള ഭാഗത്തും ചില സർവേകൾ പൂർത്തിയാക്കിയിരുന്നു. പുനലൂരിലെത്തുന്ന പാതയ്ക്ക് കൊല്ലം - ചെങ്കോട്ട പാതയുമായി ബന്ധമുണ്ടാകും. ഇതോടെ തമിഴ്നാട്ടിലേക്ക് മറ്റൊരു പാത കൂടി യാഥാർഥ്യമാകും. ചെന്നൈ, ട്രിച്ചി, തെങ്കാശി, ചെങ്കോട്ട ഭാഗങ്ങളിൽ നിന്നുമുള്ള ശബരിമല തീർഥാടകർക്കും യാത്ര സുഗമമാകും. പത്തനംതിട്ട , കൊല്ലം, തിരുവനന്തപുരം ജില്ലകളിലെ മലയോര മേഖലകളിൽ താമസിക്കുന്നവർക്ക് തീവണ്ടി യാത്രാ സൗകര്യം ലഭിക്കാൻ നിർദിഷ്ട പാത സഹായകരമാകും. ശബരിമല കൂടാതെ വേളാങ്കണ്ണി ഉൾപ്പെടെയുള്ള ആരാധനാലയങ്ങൾ , ടൂറിസ്റ്റ് കേന്ദ്രങ്ങൾ , മറ്റു വിവിധ സർക്കാർ സ്വകാര്യ സ്ഥാപനങ്ങൾ, തിരുവനന്തപുരം, നെടുമ്പാശേരി വിമാനത്താവളങ്ങൾ, നിർദിഷ്ട എരുമേലി വിമാനത്താവളം എന്നിവയുമായി ബന്ധപ്പെടുത്തിയാകും പാത നിർമിക്കാനാകുക. വിഴിഞ്ഞം സീപോർട്ടിൽ നിന്നും കപ്പലിൽ വരുന്ന കണ്ടെയ്നറുകൾ റെയിൽവേ മുഖാന്തിരം വിവിധ പ്രദേശങ്ങളിലേക്കു കൊണ്ടു പോകുന്നതിനും പാത വഴി സാധ്യമാകും. 1997 - 1998 കാലഘട്ടത്തിൽ ഇതു സംബന്ധിച്ച പുതിയ അലൈൻമെന്‍റ് റെയിൽവേ അധികൃതർ നടത്തിയിരുന്നു. പുതിയ റെയിൽവേ ലൈൻ മലയോര മേഖലകളെ ബന്ധിപ്പിച്ച് അധികൃതർ ആരംഭിക്കണമെന്ന് ആവശ്യപ്പെട്ടു കൊണ്ട് ബന്ധപ്പെട്ട പ്രദേശങ്ങളിൽ വിവിധ സന്നദ്ധ സംഘടനകൾ ഇതു സംബന്ധിച്ച് കേന്ദ്ര, സംസ്ഥാന സർക്കാരുകൾ, കേന്ദ്ര റെയിൽവേ മന്ത്രാലയം, നിർദിഷ്ട റെയിൽപ്പാത കടന്നു പോകുന്ന പ്രദേശത്തെ പ്രധാന ജനപ്രതിനിധികൾ ഉൾപ്പെടെയുള്ളവർക്ക് നിവേദനങ്ങൾ നൽകുകയും വിവിധ പ്രക്ഷോഭ സമര പരിപാടികൾ നടത്തിയിരുന്നതുമാണ്. തീർഥാടകരുടെ എണ്ണത്തിലും വർധന ശബരി റെയിൽപാത പൂർത്തിയായാൽ ശബരിമലയിൽ എത്തുന്ന തീർഥാടകരുടെ എണ്ണത്തിലും ഗണ്യമായ വർധന പ്രതീക്ഷിക്കുന്നുണ്ട്. നിലവിൽ ശബരിമലയിലെത്തുന്ന ഇതര സംസ്ഥാനക്കാരിൽ 70 ശതമാനവും തീവണ്ടി സർവീസുകളെയാണ് ആശ്രയിക്കുന്നത്. ‌‌ ചെങ്ങന്നൂർ, കോട്ടയം റെയിൽവേ സ്റ്റേഷനുകളിലെത്തിയാണ് ഇവർ പന്പയിലേക്ക് യാത്ര ചെയ്യുന്നത്. എരുമേലി വരെ തീവണ്ടി എത്തിയാൽ തീർഥാടകരുടെ എണ്ണത്തിൽ 15 ശതമാനം വർധന പ്രതീക്ഷിക്കുന്നുണ്ട്. ആന്ധ്രപ്രദേശ്, തെലങ്കാന, കർണാടക, തമിഴ്നാട്, മഹാരാഷ്ട്ര സംസ്ഥാനങ്ങളിൽ നിന്നുള്ള തീർഥാടകരുടെ എണ്ണം ഓരോ വർഷവും കൂടിവരികയുമാണ്. നിലവിൽ തെലങ്കാനയിൽ നിന്നുള്ള തീർഥാടകരാണ് കൂടുതലായി എത്തുന്നത്. റെയിൽവേ ശബരിമല സ്പെഷൽ ട്രെയിനുകൾ ഏറ്റവും കൂടുതൽ ഓടിക്കുന്നതും ആന്ധ്രപ്രദേശ്, തെലങ്കാന മേഖലകളിലേക്കാണ്. കഴിഞ്ഞ തീർഥാടനകാലത്ത് റെയിൽവേ 415 സ്പെഷൽ സർവീസ് ശബരിമല തീർഥാടകർക്കായി നടത്തി. 2023 - 24 തീർഥാടനകാലത്തെ അപേക്ഷിച്ച് 37 ശതമാനം വർധനയുണ്ടായി. 301 സ്പെഷൽ ട്രെയിനുകളാണ് അക്കാലയളവിൽ ഓടിച്ചത്. റോഡിലെ തിരക്ക് കുറയ്ക്കാം റെയിൽപാത സജ്ജമായാൽ ശബരിമല തീർഥാടനകാലത്ത് റോഡിൽ ഉണ്ടാകുന്ന തിരക്കിന് ഒരുപരിധിവരെ പരിഹാരമാകും. ഇതര സംസ്ഥാനക്കാരായ തീർഥാടകർ നിലവിൽ പന്പ വരെ എത്താനുള്ള സൗകര്യത്തിനും മറ്റു തീർഥാടനകേന്ദ്രങ്ങളിലേക്കു കൂടി യാത്ര ചെയ്യാനുമായി ബസുകൾ വാടകയ്ക്കെടുത്താണ് എത്തുന്നത്. എരുമേലിയിലെത്തി അവിടെനിന്നു നിലയ്ക്കൽ വരെ ഇവർ ബസുകളിലും മറ്റും വാഹനങ്ങളിലുമെത്തുകയാണ് പതിവ്. തീവണ്ടി യാത്രാ സൗകര്യം വർധിച്ചാൽ നിരത്തുകളിൽ വാഹനങ്ങളുടെ എണ്ണത്തിൽ കുറവുണ്ടാകുമെന്നാണ് പ്രതീക്ഷ. വിമാനത്താവളങ്ങളെ ബന്ധിപ്പിച്ച് തീവണ്ടി സർവീസ് ഉണ്ടായാൽ അവിടേക്കുള്ള യാത്രക്കാർക്കും പ്രയോജനപ്പെടും. കേരളം ഒറ്റക്കെട്ടായി നിന്നു: ആന്‍റോ ആന്‍റണി പത്തനംതിട്ട: ശബരി റെയിൽപ്പാത യാഥാർഥ്യമാക്കണമെന്ന ആവശ്യത്തിൽ കേരളം ഒറ്റക്കെട്ടായി നിന്നുവെന്ന് ആന്‍റോ ആന്‍റണി എംപി. താനുൾപ്പെടെ കേരളത്തിലെ എംപിമാർ ഇക്കാര്യ പാർലമെന്‍റിൽ നിരവധി തവണ ഉന്നയിച്ചു. പദ്ധതിയോട് അനുകൂലമായ സമീപനമാണ് കേന്ദ്ര സർക്കാർ പുലർത്തിയിരുന്നത്. പദ്ധതിച്ചെലവുമായി ബന്ധപ്പെട്ട അനിശ്ചിതത്വം കൂടി പരിഹരിച്ച് പദ്ധതി വേഗത്തിലാക്കുകയാണ് വേണ്ടതെന്ന് എംപി പറഞ്ഞു. പാത എരുമേലിയിൽ അവസാനിപ്പിക്കാതെ റാന്നി, പത്തനംതിട്ട, പുനലൂർ വഴി നെടുമങ്ങാട്ടേക്കു നീട്ടുന്നത് ജനങ്ങൾക്ക് ഏറെ പ്രയോജനപ്പെടും. സംസ്ഥാനത്തിന്‍റെ വികസനത്തിനു തന്നെ ഉതകുന്ന അന്തർ സംസ്ഥാന പാതയായി ഇതു മാറുമെന്നും ഇക്കാര്യത്തിൽ പരിശ്രമം തുടരുമെന്നും ആന്‍റോ ആന്‍റണി പറഞ്ഞു.

പരിസ്ഥിതിസൗഹൃദമാകാൻ കളക്ടറേറ്റ് ജീവനക്കാരെത്തിയതും ബസുകളിൽ

പത്തനംതിട്ട: പരിസ്ഥിതി ദിനത്തിൽ കാർബൺ ന്യൂട്രൽ ആശയങ്ങൾക്ക് വ്യത്യസ്ത മാതൃകയുമായി പത്തനംതിട്ട ജില്ലാ കളക്ടറുടെ ഓഫീസ്. ജില്ലാ കളക്ടറുടെ കോൺഫിഡൻഷ്യൽ അസിസ്റ്റന്‍റ് സന്ധ്യയുടെ നേതൃത്വത്തിൽ ഓഫീസ് ജീവനക്കാരും ഇതിൽ പങ്കാളികളായി. കളക്ടറുടെ ഫേസ് ബുക്ക് കുറിപ്പിലെആഹ്വാന പ്രകാരം പൊതുഗതാഗത സംവിധാനത്തിലാണ് ജീവനക്കാർ എല്ലാവരും ഓഫീസിൽ എത്തിയത്. സ്വന്തം വാഹനങ്ങളിൽ വന്നിരുന്നവർ അതുപേക്ഷിച്ച് കെഎസ്ആർടിസി, സ്വകാര്യ ബസുകളെ ആശ്രയിച്ച് കളക്ടറേറ്റ് പടിക്കൽ വന്നിറങ്ങി. ഒപ്പം കളക്റ്ററേറ്റിൽ ആരംഭിച്ച ഫുഡ് സ്കേപ്പിംഗിന്‍റെ ഭാഗമായി ഹരിതകർമ സേനാംഗങ്ങൾ നട്ടുപരിപാലിക്കുന്ന മഞ്ഞൾ കൃഷി പരിപാലിക്കുകയും കാട് കയറി കിടന്നവ എല്ലാം വൃത്തിയാക്കുകയും ചെയ്തു ഒപ്പം വൃക്ഷത്തൈ നടുകയും ചെയ്തു. വിയറ്റ്നാം സൂപ്പർ ഏർളി എന്ന പേരിൽ പ്രചാരം നേടിയ പ്ലാവിനമാണ് നട്ടത്. ഇന്ത്യൻ കൗൺസിൽ ഓഫ് അഗ്രിക്കൾച്ചറൽ റിസർച്ച് സ്ഥാപിച്ച പത്തനംതിട്ട ജില്ലയിലെ തടിയൂർ കൃഷി വിജ്ഞന കേന്ദ്രമാണ് പ്ലാവിൻ തൈ നൽകിയത്. പരിസ്ഥിതി സൗഹൃദ രീതികളിൽ കളക്റ്ററേറ്റ് ഒരു മാതൃക ആയി മാറുന്ന സാഹചര്യത്തിലാണ് കളക്ടറുടെ സ്വന്തം ഓഫീസിലെ ജീവനക്കാരുടെ ഇത്തരം പ്രവൃത്തികൾ അനുകരണീയമെന്ന് കളക്ടർ എസ്. പ്രേംകൃഷ്ണനും അഭിപ്രായപ്പെട്ടു. ഹരിത ഓഫീസ് സമുച്ചയം ആയി കളക്റ്ററേറ്റിനെ മാറുന്നതിനുള്ള ദൗത്യവുമായി മുന്നേറുകയാണെന്നും എല്ലാ ഓഫീസിലെയും ജീവനക്കാരും ഇതിൽ പങ്കാളികളാകണമെന്നും കളക്ടർ നിർദേശിച്ചു. പത്തനംതിട്ട നഗരസഭ ഹരിത കർമസേനയുടെ നേതൃത്വ്തിൽ ജൈവ മാലിന്യ സംസ്കരണ യൂണിറ്റുകൾ സ്ഥാപിച്ച് തുടങ്ങിയ പദ്ധതികളുമായി മുന്നോട്ടു പോകുകയാണെന്നും ഇവിടെ ഉത്പാദിപ്പിക്കുന്ന ജൈവ വളം ഉപയോഗിച്ച് ഫുഡ് സ്കേപ്പിംഗ് മാതൃക വ്യാപിപ്പിക്കുന്നതിനാണ് ആലോചനയെന്നും അദ്ദേഹം കൂട്ടിച്ചേർത്തു. ഓഫീസ് പരിസരങ്ങളിൽ ഒഴിഞ്ഞു കിടക്കുന്ന സ്ഥലങ്ങൾ നഗരസഭയുടെ സഹകരണത്തോടെ കൃഷി ചെയ്യുന്ന പദ്ധതി ആണ് ഫുഡ് സ്കേപ്പിംഗ്.

പരിസ്ഥിതിദിനത്തില്‍ കെഎസ്ആർടിസി ബസിൽ യാത്രക്കാരനായി ജില്ലാ കളക്ടർ

പത്തനംതിട്ട: ലോക പരിസ്ഥിതി ദിനത്തിൽ പച്ചഷർട്ടിട്ട് താമസസ്ഥലത്തു നിന്നു കുലശേഖരപതി ബസ് സ്റ്റോപ്പിൽ നിൽക്കുന്ന ജില്ലാ കളക്ടർ എസ്. പ്രേംകൃഷ്ണനെ കണ്ട നാട്ടുകാർക്കും കൗതുകം. രാവിലെ 9.20ന് പത്തനംതിട്ടയിലേക്കുള്ള കെഎസ്ആര്‍ടിസി ഓർഡിനറി ബസ് കുലശേഖരപതിയില്‍ നിർത്തിയപ്പോൾ അദ്ദേഹവും അതിൽ കയറി. ടിക്കറ്റെടുത്ത് ഗണ്‍മാനോടൊപ്പം ജില്ലാ കളക്ടറെ കണ്ടപ്പോള്‍ യാത്രക്കാര്‍ക്ക് അത്ഭുതം. സ്റ്റാന്‍ഡില്‍ ബസ് എത്തിയപ്പോള്‍ കാഴ്ചക്കാരുടെ എണ്ണം കൂടി. അപ്രതീക്ഷിതമായി വിഐപിയെ കണ്ട യാത്രക്കാര്‍ സെല്‍ഫി പകര്‍ത്താന്‍ തിരക്കുകൂട്ടി. ഇതിനിടയിൽ കെഎസ്ആർടിസിക്കാരുടെ വക ചായ എത്തി. അതു കുടിച്ചപ്പോഴേക്കും ഷാളുമായി ഒരു യാത്രക്കാരൻ എത്തി. തുടർന്ന് കോട്ടയത്തേക്കുള്ള കെഎസ്ആര്‍ടിസിയുടെ അടുത്ത ഓർഡിനറി ബസില്‍ സെന്‍റ് പീറ്റേഴ്സ് ജംഗ്ഷനിലേക്ക്. പിന്നീട് കാല്‍നടയായി കളക്ടറേറ്റിലേക്ക്. കളക്ടറേറ്റ് അങ്കണത്തില്‍ ഫലവൃക്ഷത്തൈ നട്ടശേഷമാണ് ചേംബറിലേക്കു പോയത്. പരിസ്ഥിതി ദിനത്തില്‍ 'പച്ച' മനുഷ്യനായി ഔദ്യോഗിക ജീവിതത്തിലേക്ക് കളക്ടര്‍ കടന്നു. പരിസ്ഥിതി ദിനത്തില്‍ ഞാന്‍ ഔദ്യോഗിക വാഹനം ഉപേക്ഷിച്ചു ജനങ്ങള്‍ക്കൊപ്പം പൊതുഗതാഗതത്തെ ഉപയോഗിക്കാന്‍ തീരുമാനിച്ചിരിക്കുന്നു. ഇതേ പോലെ എനിക്കൊപ്പം പത്തനംതിട്ടയും കൂടെ ചേര്‍ന്നാല്‍ ഒരു ദിവസമെങ്കിലും നമുക്ക് വായു മലിനീകരണത്തില്‍ നിന്നും നമ്മുടെ പ്രകൃതിയെ രക്ഷിക്കാം .... ഫേസ്ബുക്കില്‍ കഴിഞ്ഞദിവസം കുറിച്ച സന്ദേശം ജില്ലാ കളക്ടര്‍ പ്രാവര്‍ത്തികമാക്കുകയായിരുന്നു. പൊതുഗതാഗത സംവിധാനം യാത്രയ്ക്ക് ഉപയോഗിക്കുന്നതിലൂടെ പരിസ്ഥിതി മലിനീകരണം കുറയ്ക്കാനാകുമെന്ന് ജില്ലാ കളക്ടര്‍ പറഞ്ഞു. മറ്റു നഗരങ്ങളില്‍ ബസ് യാത്ര ചെയ്യാറുണ്ടെങ്കിലും ഇവിടെ സാധിക്കാറില്ലെന്ന് അദ്ദേഹം പരിതപിച്ചു.

വൃക്ഷത്തൈകൾ നട്ട് നാടെങ്ങും പരിസ്ഥിതിദിനാചരണം

പത്തനംതിട്ട: പരിസ്ഥിതിദിനത്തിൽ നാടെങ്ങും വൃക്ഷത്തൈകൾ നട്ടു. വിദ്യാലയങ്ങളിലും സർക്കാർ പൊതുമേഖല ഓഫീസുകളും കൂടാതെ വിവിധ സംഘടനകൾ, സ്ഥാപനങ്ങൾ, രാഷ്ട്രീയ പ്രസ്ഥാനങ്ങൾ എന്നിവയുടെ നേതൃത്വത്തിലും പരിസ്ഥിതിദിനം ആഘോഷിച്ച് തൈകൾ നട്ടു. തൈകൾ നട്ടവർ ഇതിനെ പരിപാലിച്ചുകൊള്ളാമെന്ന പ്രതിജ്ഞയും എടുത്താണ് മടങ്ങിയത്. പരിസ്ഥിതിദിന സന്ദേശവുമായി പ്രത്യേക പരിപാടികളും സംഘടിപ്പിച്ചിരുന്നു. പ്ലാസ്റ്റിക്കിനെതിരേയുള്ള ബോധവത്കരണവുമായി വിവിധ സംഘടനകൾ റാലികളും സെമിനാറുകളും നടത്തി. നാട്ടുമരങ്ങൾക്കൊരിടമൊരുക്കി കല്ലൂപ്പാറ: കല്ലൂപ്പാറ അഗ്രികൾച്ചർ പ്രൊഡ്യൂസേഴ്സ് ആൻഡ് പ്രമോട്ടേഴ്സ് അസോസിയേഷനും(കപ്പ ) കല്ലൂപ്പാറ എൻജിനിയറിംഗ് കോളജ് ഭൂമിത്രസേനയും ചേർന്ന് ലോക പരിസ്ഥിതി ദിനം ആചരിച്ചു. കോളജ് ഓഡിറ്റോറിയത്തിൽ ചേർന്ന പരിസ്ഥിതി ദിനാചരണ പരിപാടികൾ പ്രിൻസിപ്പൽ ഡോ.ജെ. ദീപ ഉദ്ഘാടനം ചെയ്തു. കപ്പ പ്രസിഡന്‍റ് സി.കെ. മത്തായി അധ്യക്ഷത വഹിച്ചു. സെക്രട്ടറി ലെജു ഏബ്രഹം പദ്ധതി വിശദീകരിച്ചു. ടി. ഡീൻ രാജ് കുമാർ,അജോയ് തോമസ്, വിജോയ് പുത്തോട്ടിൽ, വി.എസ്. ദീപു, സി. രാജേഷ്, എസ്. പാർത്ഥൻ, ജെയിംസ് ഏബ്രഹാം എന്നിവർ പ്രസംഗിച്ചു. നാട്ടുമരങ്ങൾക്കൊരിടം എന്ന പേരിൽ സംഘടിപ്പിച്ച പരിപാടിയിൽ നാട്ടുമരങ്ങളുടെ ആയിരത്തോളം തൈകളാണ് കോളജ് അങ്കണത്തിലും സമീപ പ്രദേശങ്ങളിലുമായി നട്ടത്. നാടൻ പ്ലാവിനങ്ങളായ താമരചക്ക, വാകത്താനം വരിക്ക, ചെമ്പരത്തി വരിക്ക, ഉണ്ട ചക്ക, ഇരുവള്ളിപ്ര വരിക്ക, മുട്ടൻ വരിക്ക , തെള്ളിയൂർ വരിക്ക, മാവിനങ്ങളായ മൂവാണ്ടൻ, കിളിച്ചുണ്ടൻ, കപ്പമാവ്, പേരയ്ക്ക മാവ്, വിവിധതരം നാട്ടുമാവുകൾ എന്നിവയുടൈ തൈകളാണ് പ്രധാനമായും നട്ടത്. ഇവയ്ക്കു പുറമെ നീർമാതളം, കമണ്ഡലു തുടങ്ങിയ അപൂർവ മരങ്ങളുടൈ തൈകളും നട്ടു. വിവിധ സന്നദ്ധ സംഘടനകളുടെയും പരിസ്ഥിതി പ്രവർത്തകരുടെയും സഹകരണത്തോടെ സംസ്ഥാനത്തിന്‍റെ വിവിധഭാഗങ്ങളിൽനിന്നാണ് വംശനാശ ഭീഷണി നേരിടുന്ന വൃക്ഷങ്ങളുടെ തൈകൾ സംഘടിപ്പിച്ചത്, സതീഷ് ഏബ്രഹാം, റെജി ഏബ്രഹാം, മാത്യു ജോൺ, അനി കുടായി തുടങ്ങിയവർ നേതൃത്വം നൽകി. ഇൻഫാം നേതൃത്വത്തിൽ റാന്നി: പരിസ്ഥിതി ദിനത്തോടനുബന്ധിച്ച് ഇൻഫാം റാന്നി കാർഷിക താലൂക്കിന്‍റെയും വിവിധ ഗ്രാമസമിതികളുടെയും നേതൃത്വത്തിൽ തൈ നടീലും ആഗോള താപനിയന്ത്രണത്തിന്‍റെ ഭാഗമായി വിളക്കണയ്ക്കൂ വിശ്വം കാക്കൂ എന്ന സന്ദേശത്തിലൂന്നിയുള്ള പരിപാടികളും സംഘടിപ്പിച്ചു. പെരുനാട് ഗ്രാമസമിതിയിൽ നടന്ന പരിപാടിയിൽ മീൻകുഴി - ചിറ്റാർ ഗ്രാമസമിതി ഡയറക്ടർ ഫാ. സെബിൻ ഉള്ളാട്ട് മുഖ്യസന്ദേശവും തൈ വിതരണ ഉദ്ഘാടനവും നിർവഹിച്ചു. റാന്നി കാർഷിക താലൂക്ക് ഡയറക്ടർ ഫാ. ജേക്കബ് കൈപ്പൻപ്ലാക്കലിന്‍റെ അധ്യക്ഷതയിൽ പത്തനംതിട്ട കാർഷിക താലൂക്ക് പ്രസിഡന്‍റ് സണ്ണി ജോർജ്, റാന്നി കാർഷിക താലൂക്ക് മഹിളാ വിഭാഗം പ്രസിഡന്‍റ് ഷൈനി ജോസഫ്, ഷാന്‍റി ആന്‍റണി, സിസിലി റോബിച്ചൻ, ലൗലി ജോസ് എന്നിവർ പ്രസംഗിച്ചു. വിവിധ യൂണിറ്റുകളുടെ കീഴിൽ പിന്നീട് തൈ വിതരണവും നടീലും യൂണിറ്റ് ഡയറക്ടർമാർ നിർവഹിച്ചു.

ഇലക്‌ട്രിക് കേബിളിനു തീപിടിച്ചു, വന്‍ ശബ്ദത്തോടെ പൊട്ടിത്തെറി

പന്തളം: തുമ്പമണ്‍ പഞ്ചായത്ത് ഓഫീസിനു സമീപം ഇന്‍സുലേറ്റഡ് ഹൈടെന്‍ഷന്‍ ഇലക്ട്രിക് കേബിളിനു തീപിടിച്ചത് പരിഭ്രാന്തി പരത്തി. ഇന്നലെ പുലര്‍ച്ചെ രണ്ടോടെയാണ് സംഭവം. ശക്തമായ പൊട്ടിത്തെറി കേട്ട് സമീപവാസികള്‍ ഉണര്‍ന്നു നോക്കുമ്പോള്‍ ലൈനില്‍ തീ പിടിക്കുന്നതായി കണ്ട് ഫയര്‍ഫോഴ്‌സിനെ വിളിച്ചുവരുത്തി. ഫയര്‍ഫോഴ്‌സ് സംഘം അടൂരിലെ കെഎസ്ഇബി ഓഫീസിലും വിവരം നല്‍കി. വെള്ളം പമ്പു ചെയ്ത് തീഅണച്ചു. സമീപവീടുകളിലേക്കുള്ള സര്‍വീസ് കേബിൾ, ഒപ്റ്റിക്കല്‍ ഫൈബര്‍ കേബിള്‍ എന്നിവയെല്ലാം തീ കത്തി നശിച്ചു. വൈദ്യുത പോസ്റ്റിലൂടെയുള്ള ഇന്‍സുലേറ്റഡ് ഹൈ ടെന്‍ഷന്‍ കേബിളില്‍ ഇന്‍സുലേറ്റഡ് അല്ലാത്ത ലൈനില്‍ നിന്നും ഷോര്‍ട്ട് സര്‍ക്യൂട്ട് വഴി തീപീടിക്കുകയായിരുന്നെന്ന് കെഎസ്ഇബി പറയുന്നു.

കാതോലിക്കേറ്റ് കോളജ് ബോട്ടണി വകുപ്പ് സപ്തതി ആഘോഷം ഉദ്ഘാടനം ഇന്ന്

പത്തനംതിട്ട: കാതോലിക്കേറ്റ് കോളജിലെ ബോട്ടണി വിഭാഗം സപ്തതി ആഘോഷങ്ങള്‍ക്ക് ഇന്ന് തുടക്കമാകും. 1955ല്‍ ബിരുദ പ്രോഗ്രാമും 1966ല്‍ ബിരുദാനന്തര ബിരുദ വിഭാഗവും 1990ല്‍ ഗവേഷണ കേന്ദ്രവുമായി ബോട്ടണി വിഭാഗം മാറി. നിലവില്‍ ബിഎസ്്‌സി ബോട്ടണി, എംഎസ്്‌സി ബോട്ടണി, പിഎച്ചഡി പ്രോഗ്രാമുകള്‍ക്ക് സൗകര്യമുണ്ട്. കൂണ്‍ കൃഷി പരിശീലനം, പഴവര്‍ഗ സംസ്‌കരണം എന്നിവയില്‍ സര്‍ട്ടിഫിക്കറ്റ് കോഴ്‌സുകളും നല്‍കും. ഒരുവര്‍ഷം നീളുന്ന സപ്തതി ആഘോഷങ്ങളുടെ ഉദ്ഘാടനം രാവിലെ 11ന് മഹാത്മാഗാന്ധി സര്‍വകലാശാല രജിസ്ട്രാര്‍ ഡോ.ബിസ്മി ഗോപാലകൃഷ്ണന്‍ ഉദ്ഘാടനം ചെയ്യും. കാതോലിക്കേറ്റ് കോളജ് മാനേജര്‍ ഡോ.ഏബ്രഹാം മാര്‍ സെറാഫിം മെത്രാപ്പോലീത്ത അധ്യക്ഷത വഹിക്കും. എംഒസി കോളജുകളുടെ സെക്രട്ടറി ഡോ.എം.ഇ. കുര്യാക്കോസ്, കോളജ് പ്രിന്‍സിപ്പല്‍ ഡോ. സിന്ധു ജോണ്‍സ്, പൂര്‍വ അധ്യാപകന്‍ പ്രഫ.ഉമ്മന്‍ ജേക്കബ് തുടങ്ങിയവര്‍ പ്രസംഗിക്കും. എംജി സര്‍വകലാശാല ബോട്ടണി ബിരുദ പരീക്ഷയില്‍ ഒന്നാംറാങ്ക് ജേതാവായ ഭദ്ര കൃഷ്ണകുമാര്‍ നായരെ അനുമോദിക്കും. ലോഗോ പ്രകാശനം, 70 ഔഷധ സസ്യങ്ങളുടെ വിതരണം, പൂര്‍വ വിദ്യാര്‍ഥി സമ്മേളനം, സെമിനാറുകൾ തുടങ്ങിയവ ഇതോടനുബന്ധിച്ച് സംഘടിപ്പിക്കുമെന്ന് വകുപ്പ് മേധാവി ഡോ.ബിനോയ് ടി. തോമസ്, സപ്തതി കോ ഓര്‍ഡിനേറ്റര്‍ ഡോ. ഗോകുല്‍ ജി. നായര്‍ എന്നിവര്‍ അറിയിച്ചു.

നിരണത്ത് യുഡിഎഫിൽ വീണ്ടും വിള്ളൽ; സ്വതന്ത്രാംഗം എൽഡിഎഫ് പിന്തുണയിൽ പ്രസിഡന്‍റ്

തിരുവല്ല: നിരണം ഗ്രാമപഞ്ചായത്തിൽ എൽഡിഎഫ് പിന്തുണയോടെ സ്വതന്ത്രാംഗം പ്രസിഡന്‍റായി തെരഞ്ഞെടുക്കപ്പെട്ടു. കഴിഞ്ഞ ദിവസം നടന്ന തെരഞ്ഞെടുപ്പിൽ പഞ്ചായത്തിലെ നാലാം വാർഡ് അംഗം അന്നമ്മ ജോർജാണ് പ്രസിഡന്‍റായത്. മുൻ പഞ്ചായത്ത് പ്രസിഡന്‍റ് കോൺഗ്രസിലെ അലക്സ് പുത്തൂപ്പള്ളി , പതിമൂന്നാം വാർഡ് അംഗം കോൺഗ്രസിലെ ജോളി ജോർജ് , രണ്ടാം വാർഡ് അംഗം എൽഡിഎഫിലെ രവി മുട്ടാണി എന്നിവരുടെ വോട്ടുകൾ അസാധുവായി. മുൻ പ്രസിഡന്‍റും കോൺഗ്രസിൽ നിന്നു സസ്പെൻഡ് ചെയ്യപ്പെട്ടയാളുമായ കെ.പി. പുന്നൂസ് അന്നമ്മ ജോർജിനു വോട്ടു ചെയ്തു. 13 അംഗ ഭരണസമിതിയിൽ ആറു പേരുടെ പിന്തുണയിലാണ് അന്നമ്മ ജോർജ് തെരഞ്ഞെടുക്കപ്പെട്ടത്. യുഡിഎഫ് സ്ഥാനാർഥിയായിരുന്ന ജോളി ഈപ്പന് നാല് വോട്ടുകൾ ലഭിച്ചു. മൂന്ന് വോട്ടുകൾ അസാധുവായി.

ഹെലൻ കെല്ലറും മലാലയും ഇനി വിരൽത്തുമ്പിൽ

റാന്നി: കുട്ടികൾ ഏറെ ഇഷ്ടപ്പെടുന്ന ഹെലൻ കെല്ലറുടെയും മലാലയുടെയും ആത്മകഥകൾ പുസ്തകത്താളുകൾപോലെ സ്ക്രീനിൽ വിടർന്നപ്പോൾ കീർത്തനയ്ക്കും കൂട്ടുകാർക്കും വിസ്മയം. പ്രമോദ് നാരായൺ എംഎൽഎയുടെ പ്രാദേശിക വികസന ഫണ്ടിൽ നിന്നും 12.5 ലക്ഷം രൂപ ചെലവഴിച്ച് റാന്നി നോളജ് വില്ലേജ് പദ്ധതിയുടെ ഭാഗമായി റാന്നി എംഎസ് സ്കൂളിൽ ആരംഭിച്ച ഡിജിറ്റൽ ലൈബ്രറിയിലാണ് കുട്ടികൾക്ക് വായന നവ്യാനുഭവമായത്. ബെന്യാമിന്‍റെ ആടുജീവിതം മുതൽ ഷേക്സ്പിയർ കൃതികൾ വരെയുള്ള ആറായിരത്തിലധികം പുസ്തകങ്ങൾ വായനയുടെ പുതുവഴികൾ തുടർന്ന് ഡിജിറ്റൽ ലൈബ്രറിയിൽ ഒരുക്കിയിട്ടുണ്ട്. പുസ്തക രചനയിൽ അഭിരുചിയുള്ള വിദ്യാർഥികൾക്ക് എഴുത്തുകാരാകാൻ അവസരം ഒരുക്കി അവരുടെ രചനകൾ ലൈബ്രറിയിലെ ഈ പബ്ലിഷിംഗ് സംവിധാനം വഴി പ്രസിദ്ധീകരിക്കുവാൻ സൗകര്യമൊരുക്കുമെന്ന് എംഎൽഎ പറഞ്ഞു. ഡിജിറ്റൽ ലൈബ്രറിയുടെ ഉദ്ഘാടനവും എംഎൽഎ നിർവഹിച്ചു. സ്കൂൾ മാനേജർ കെ. സി. ജേക്കബ് അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റ് കെ. ആർ. പ്രകാശ്, പ്രിൻസിപ്പൽ സ്മിജു ജേക്കബ്, ഹെഡ്മാസ്റ്റർ ബിനോയി ഏബ്രഹാം, മുൻ പ്രിൻസിപ്പൽ ടീന ഏബ്രഹാം, ജോജോ കോവൂർ, രവി കുന്നക്കാട് എന്നിവർ പ്രസംഗിച്ചു.

കാന്‍സര്‍ പ്രതിരോധ കാമ്പെയിന്‍ രണ്ടാംഘട്ടത്തിന് തുടക്കം

പത്തനംതിട്ട: ആരോഗ്യം ആനന്ദം 2.0 കാന്‍സര്‍ പ്രതിരോധ കാമ്പെയിന്‍റെയും ലോകപുകയില വിരുദ്ധ ദിനാചരണത്തിന്‍റെയും ഉദ്ഘാടനം പുല്ലാട് സെന്‍റ് ആന്‍റണീസ് മലങ്കര സുറിയാനി കാത്തലിക് ചര്‍ച്ച് ഹാളില്‍ ജില്ലാപഞ്ചായത്ത് വൈസ് പ്രസിഡന്‍റ് ബീന പ്രഭ നിര്‍വഹിച്ചു. കോയിപ്രം ഗ്രാമപഞ്ചായത്ത് പ്രസിഡന്‍റ് പി. സുജാത അധ്യക്ഷത വഹിച്ചു. ജില്ലാ മെഡിക്കല്‍ ഓഫീസ്, ആരോഗ്യ കേരളം പത്തനംതിട്ട , കാഞ്ഞീറ്റുകര സാമൂഹികാരോഗ്യ കേന്ദ്രം, കോയിപ്രം പ്രാഥമികാരോഗ്യ കേന്ദ്രം എന്നിവയുടെ ആഭിമുഖ്യത്തിലാണ് സംഘടിപ്പിച്ചത്. ജില്ലാ മെഡിക്കല്‍ ഓഫീസര്‍ ഡോ.എല്‍ അനിതകുമാരി മുഖ്യപ്രഭാഷണം നടത്തി. കോയിപ്രം ബ്ലോക്ക് പഞ്ചായത്ത് വൈസ് പ്രസിഡന്‍റ് എല്‍സ തോമസ് പ്രതിജ്ഞ ചൊല്ലി. കോയിപ്രം ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി ചെയര്‍മാന്‍ കെ. അജിത, ഗ്രാമ പഞ്ചായത്ത് ആരോഗ്യവിദ്യാഭ്യാസ സ്ഥിരം സമിതി ചെയര്‍മാന്‍ പി.എം റോസ, ഡെപ്യൂട്ടി ജില്ലാ മെഡിക്കല്‍ ഓഫീസര്‍ ഡോ. ഐപ്പ് ജോസഫ്, കാഞ്ഞീറ്റുകര ബ്ലോക്ക് മെഡിക്കല്‍ ഓഫീസര്‍ ഡോ. പി. രാജേഷ്, കോയിപ്രം പ്രാഥമികാരോഗ്യ കന്ദ്രം മെഡിക്കല്‍ ഓഫീസര്‍ ഡോ. രജനി കൃഷ്ണന്‍ നായർ, ജില്ലാ എഡ്യൂക്കേഷന്‍ ആന്‍ഡ് മീഡിയ ഓഫീസര്‍ എസ് ശ്രീകുമാര്‍ , കാഞ്ഞീറ്റുകര ഹെല്‍ത്ത് സൂപ്പര്‍വൈസര്‍ കെ ഷിബു എന്നിവര്‍ പങ്കെടുത്തു. പുകയില ഉത്പന്നങ്ങളുടെയും മറ്റ് ലഹരി പദാര്‍ഥങ്ങളുടെയും ഉപയോഗം - പ്രശ്‌നങ്ങളും പ്രതിവിധികളും, കാന്‍സര്‍ പ്രതിരോധം - നമുക്ക്എന്തുചെയ്യാന്‍കഴിയും വിഷയങ്ങളില്‍ ഡോ. റ്റി. സാഗര്‍, ഡോ. അനീഷ് സോമന്‍ എന്നിവര്‍ ക്ലാസെടുത്തു. പൊയ്യാനില്‍ നഴ്‌സിംഗ് കോളേജ് വിദ്യാര്‍ഥികള്‍ അവതരിപ്പിച്ച കലാപരിപാടികളും സിഗ്നേച്ചര്‍ കാന്പെയിനും നടന്നു. പുകയിലക്കെതിരെ ബോധവത്കരണം, പുകയില രഹിതവിദ്യാലയം, വദനാര്‍ബുദ സ്‌ക്രീനിംഗ് , വന്‍കുടല്‍ അര്‍ബുദ ബോധവത്്കരണം തുടങ്ങിയ പ്രവര്‍ത്തനങ്ങളാണ് രണ്ടാംഘട്ട ക്യാമ്പയിനുമായി ബന്ധപ്പെട്ട് സംഘടിപ്പിച്ചിട്ടുള്ളതെന്ന് ജില്ലാ മെഡിക്കല്‍ ഓഫീസര്‍ അറിയിച്ചു.

സ്വകാര്യ ബസുകളില്‍ കൺസഷൻ നിരക്ക് പ്രദർശിപ്പിക്കണം

പത്തനംതിട്ട: സ്വകാര്യ ബസുകളിൽ വിദ്യാർഥികളുടെ കൺസഷൻ നിരക്ക് പ്രദർശിപ്പിക്കണമെന്ന് ജില്ലാ കളക്ടർ എസ്. പ്രേംകൃഷ്ണൻ നിർദേശിച്ചു. രാവിലെ ആറ് മുതല്‍ രാത്രി ഏഴുവരെ വിദ്യാർഥികൾക്ക് കൺസഷൻ അനുവദിക്കണം. ദിവസം രണ്ടു യാത്ര അനുവദനീയമാണ്. 40 കിലോമീറ്റർ വരെയാണ് കൺസഷൻ യാത്രാപരിധി. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന സ്റ്റുഡന്‍റസ് ട്രാവല്‍ ഫെസിലിറ്റി കമ്മിറ്റി യോഗം കൺസഷൻ സംബന്ധിച്ച വിഷയങ്ങൾ ചർച്ച ചെയ്തു. ബസുകളില്‍ ആര്‍ടിഒ എന്‍ഫോഴ്സ്മെന്‍റ് നമ്പറുകള്‍ പ്രദര്‍ശിപ്പിക്കണം. കൺസഷന്‍ സംബന്ധിച്ച പരാതികള്‍ ഇതിലൂടെ അറിയിക്കാം. യൂണിഫോമിന്‍റെയും സ്‌കൂള്‍ തിരിച്ചറിയല്‍ കാര്‍ഡിന്‍റെയും അടിസ്ഥാനത്തില്‍ 12-ാം ക്ലാസ് വരെയുള്ള വിദ്യാര്‍ഥികള്‍ക്ക് കൺ‌സഷൻ നല്‍കണമെന്ന് കളക്ടർ നിർദേശിച്ചു. അംഗീകൃത കോളജ് വിദ്യാര്‍ഥികളുടെ കൈവശം സ്ഥാപന മേധാവികള്‍ നല്‍കുന്ന തിരിച്ചറിയല്‍ കാര്‍ഡുണ്ടാകണം. ദിവസം രണ്ടു യാത്ര മാത്രമേ കണ്‍സഷന്‍ കാര്‍ഡ് ഉപയോഗിച്ച് അനുവദിക്കൂ. റീജിയണല്‍ ട്രാന്‍സ്പോര്‍ട്ട് ഓഫീസര്‍ വി. ജോയ്, വിദ്യാഭ്യാസ സ്ഥാപനം, വിദ്യാര്‍ഥി സംഘടന, പ്രൈവറ്റ് ബസ് ഓപ്പറേറ്റേഴ്സ് പ്രതിനിധികൾ, ഉദ്യോഗസ്ഥര്‍ തുടങ്ങിയവര്‍ യോഗത്തിൽ പങ്കെടുത്തു.

കസ്റ്റഡിയിലെടുത്തയാൾ മരിച്ച സംഭവത്തിൽ കോയിപ്രം എസ്എച്ച്ഒയെ സസ്പെൻഡ് ചെയ്തു

പത്തനംതിട്ട: കഞ്ചാവു ബീഡി വലിച്ചതിനു കോയിപ്രം പോലീസ് കസ്റ്റഡിയിലെടുത്തയാൾ പിന്നീട് തൂങ്ങിമരിക്കുകയും പോസ്റ്റുമോർട്ടം റിപ്പോർട്ടിൽ ശരീരത്തിൽ മാരകക്ഷതമുണ്ടെന്നു കണ്ടെത്തുകയും ചെയ്ത സംഭവത്തിൽ കോയിപ്രം എസ്എച്ച്ഒയ്ക്കു സസ്പെൻഷൻ. പോലീസ് കസ്റ്റഡിയിൽ മർദനമുണ്ടായെന്ന ആക്ഷേപത്തേ തുടർന്നാണ് കോയിപ്രം എസ്എച്ച്ഒ ജി. സുരേഷ് കുമാറിനെ സംസ്ഥാന പോലീസ് മേധാവി സസ്പെൻഡ് ചെയ്തത്. ദക്ഷിണമേഖ ഡിഐജിയുടെ ശിപാർശ പ്രകാരമാണ് നടപടി. കഞ്ചാവ് ബീഡി വലിച്ചതിന് കഴിഞ്ഞ മാർച്ചിൽ കസ്റ്റഡിയിലെടുത്തു വിട്ടയച്ച വരയന്നൂര്‍ സ്വദേശി കെ.എം. സുരേഷിനെ പിന്നീടു കോന്നിയില്‍ മരിച്ചനിലയില്‍ കണ്ടെത്തുകയായിരുന്നു. സുരേഷിനെ കസ്റ്റഡിയിലെടുക്കുകയും കഞ്ചാവ് വലിച്ചു എന്ന കുറ്റംചുമത്തി കേസ് രജിസ്റ്റര്‍ ചെയ്യുകയുമായിരുന്നു. പിന്നീട് സ്റ്റേഷന്‍ ജാമ്യം നല്‍കി സുരേഷിനെ വിട്ടയച്ചു എന്നാണ് പോലീസ് വിശദീകരണം. എന്നാല്‍, മാര്‍ച്ച് 22ന് സുരേഷിനെ കോന്നി ഇളകൊള്ളൂരിന് സമീപമുള്ള ഒരു തോട്ടത്തില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു. പോസ്റ്റുമോര്‍ട്ടത്തില്‍ സുരേഷിന്‍റെ ശരീരത്തില്‍ വാരിയെല്ലിനടക്കം ക്ഷതവും ചൂരല്‍കൊണ്ട് അടിച്ചതിനു സമാനമായ പാടുകളും ഉണ്ടായിരുന്നുവെന്നാണ് കണ്ടെത്തൽ. ഇതിന്‍റെ അടിസ്ഥാനത്തില്‍ സുരേഷിന്‍റെ ബന്ധുക്കള്‍ പോലീസില്‍ പരാതി നല്‍കിയെങ്കിലും അന്വേഷണം നടത്തിയ കോന്നി ഡിവൈഎസ്പി ടി. രാജപ്പൻ റാവുത്തർ കസ്റ്റഡി മർദനമില്ലെന്ന തരത്തിൽ റിപ്പോർട്ടു നൽകി. സുരേഷിന്‍റെ മരണത്തെ സംബന്ധിച്ച് മാധ്യമവാര്‍ത്തകള്‍ വന്നശേഷമാണ് വീണ്ടും സംഭവത്തിൽ ഡിഐജി അജിതാ ബേഗം അന്വേഷണം പ്രഖ്യാപിച്ചത്. ബന്ധുക്കള്‍ നല്‍കിയ പരാതിയിന്മേല്‍ പ്രാഥമിക അന്വേഷണം പൂര്‍ത്തിയാക്കിയാണ് സര്‍ക്കിള്‍ ഇന്‍സ്പെക്ടറെ സസ്പെന്‍ഡ് ചെയ്തിരിക്കുന്നത്. അഡീഷണല്‍ എസ്പി നടത്തിയ പ്രാഥമിക അന്വേഷണത്തില്‍ കസ്റ്റഡി മര്‍ദനം, അന്യായമായി വാഹനം, മൊബൈല്‍ ഫോണ്‍ എന്നിവ പിടിച്ചുവയ്ക്കല്‍ എന്നിങ്ങനെ മൂന്ന് പ്രധാനകാര്യങ്ങള്‍ കണ്ടെത്തി. ഇവ മുന്‍നിര്‍ത്തിയാണ് സിഐ സുരേഷ്‌കുമാറിനെതിരേ നടപടി ഉണ്ടായിരിക്കുന്നത്. അഡീഷണല്‍ എസ്പി അന്വേഷണ റിപ്പോര്‍ട്ട് ഡിഐജിക്ക് കൈമാറി.

കാട്ടാനക്കൂട്ടത്തെ വനത്തിലേക്ക് തുരത്താനുള്ള ദൗത്യം ആരംഭിച്ചു

കോന്നി: കുളത്തുമണ്‍ ജനവാസമേഖലയില്‍ ഇറങ്ങിയ കാട്ടാനക്കൂട്ടത്തെ വനത്തിലേക്ക് തുരത്തുന്നതിനുള്ള നടപടിക്കു തുടക്കമായി. വനംവകുപ്പിന്റെ നേതൃത്വത്തില്‍ നടത്തിയ തെരച്ചിലില്‍ കാട്ടാനക്കൂട്ടത്തെ കമ്പകത്തുംപച്ചയില്‍ കണ്ടെത്തി. റാപ്പിഡ് റെസ്പോണ്‍സ് ടീമും, വനംവകുപ്പ് ജീവനക്കാരും നാട്ടുകാരുമാണ് തെരച്ചിലില്‍ ഏര്‍പ്പെട്ടത്. കാട്ടാനക്കൂട്ടത്തെ കണ്ടെത്താന്‍ സംഘം മൂന്നായി തിരിഞ്ഞാണ് അന്വേഷണം നടത്തിയത്. ആനക്കൂട്ടത്തിന്‍റെ സഞ്ചാരപാത കണ്ടെത്തി സുരക്ഷിതമായി വനത്തിലേക്ക് അയയയ്ക്കുകയാണ് ദൗത്യം. ഡ്രോണ്‍ സംവിധാനവും ഉപയോഗിച്ചു. ആനകളെ ഉള്‍ക്കാട്ടിലേക്ക് കയറ്റി വിടുന്നതിന് പമ്പ് ആക്ഷന്‍ ഗണ്‍ കരുതിയിട്ടുണ്ട്. സംഘത്തിനു വേണ്ട നിര്‍ദേശം നല്‍കുന്നതിന് വനത്തിന് പുറത്ത് ടീമുണ്ട്. കഴിഞ്ഞ ദിവസങ്ങളില്‍ കോന്നി വനം ഡിവിഷനിലെ ജനവാസമേഖലയില്‍ കാട്ടാനക്കൂട്ടം ഇറങ്ങി നാശനഷ്ടം ഉണ്ടാക്കിയിരുന്നു. കലഞ്ഞൂര്‍, അരുവാപ്പുലം, മലയാലപ്പുഴ പഞ്ചായത്തുകളിലെ കാട്ടാനശല്യം നേരിടുന്നതിനായി കെ.യു. ജനീഷ്‌കുമാര്‍ എംഎല്‍എയുടെ നേതൃത്വത്തില്‍ കളക്ടറേറ്റില്‍ നടന്ന യോഗത്തെ തുടര്‍ന്നാണ് ഡ്രൈവ് സംഘടിപ്പിച്ചത്. ആനകളെ ഉള്‍ക്കാട്ടില്‍ എത്തിച്ചതിനുശേഷം പ്രദേശത്ത് സോളാര്‍ ഫെന്‍സിംഗ് സ്ഥാപിക്കാനും കുളത്തുമണ്‍ കേന്ദ്രീകരിച്ച് വന സംരക്ഷണ സമിതി രൂപീകരിക്കുന്നതിനും തീരുമാനമുണ്ട്. കല്ലേലി റോഡില്‍ വനംവകുപ്പ് പട്രോളിംഗ് ഏര്‍പ്പെടുത്തും. വട്ടത്തറ, മുക്കുഴി, പുതുക്കുളം പ്രദേശങ്ങളില്‍ ഫോറസ്റ്റ് ക്യാമ്പ് ഷെഡ് സ്ഥാപിക്കുന്നതിനും സോളാര്‍ ഫെന്‍സിംഗ് അറ്റകുറ്റപ്പണി പൂര്‍ത്തീകരിക്കുന്നതിനും എംഎല്‍എ ഡിഎഫ്ഒമാര്‍ക്ക് നിര്‍ദേശം നല്‍കി. വന്യമൃഗ ആക്രമണവുമായി ബന്ധപ്പെട്ട് അടിയന്തര സാഹചര്യത്തില്‍ ബന്ധപ്പെടേണ്ട നമ്പർ. കോന്നി- 9188407513, റാന്നി- 9188407515.

പോലീസിലും മുറുമുറുപ്പ് : പോക്‌സോ കേസുകളിലെ അട്ടിമറി: സിഡബ്ല്യുസിയും പരാതി നൽകും

പത്തനംതിട്ട: പ്രമുഖരുള്‍പ്പെടുന്ന പോക്‌സോ കേസുകള്‍ വഴിതിരിച്ചുവിടാന്‍ ശ്രമിച്ച അന്വേഷണ ഉദ്യോഗസ്ഥർക്കെതിരേ നടപടികൾ. കോന്നി ഡിവൈഎസ്പി ടി. രാജപ്പൻ റാവുത്തർ, എസ്എച്ച്ഒ പി. ശ്രീജിത്ത് എന്നിവരെയാണ് കഴിഞ്ഞദിവസം ആഭ്യന്തരവകുപ്പ് പോക്സോ കേസ് അട്ടിമറി ആരോപണവുമായി ബന്ധപ്പെട്ട് സസ്പെൻഡ് ചെയ്തത്. പോലീസ് അന്വേഷണ റിപ്പോർട്ടിൽ ജില്ലാ ചൈൽഡ് വെൽഫെയർ കമ്മിറ്റിക്കെതിരേയും ആക്ഷേപം ഉയർന്നിരുന്നു. എന്നാൽ ഇതിനെതിരേ മുഖ്യമന്ത്രിയെ സമീപിക്കാനൊരുങ്ങുകയാണ് സിഡബ്ല്യുസി. ഇരകളാക്കപ്പെടുന്നവര്‍ നേരിട്ടു പരാതി നല്‍കിയാലും കേസെടുക്കുന്നതു വൈകിപ്പിക്കുകയും എഫ്‌ഐആറില്‍ തിരിമറി നടത്തുകയും ചെയ്യുന്നതായ പരാതികൾ ജില്ലയിൽ ഏറുന്ന പശ്ചാത്തലത്തിലാണ് പോലീസും സിഡബ്ല്യുസിയും നേർക്കുനേർ ഏറ്റുമുട്ടലിന്‍റെ വക്കിലെത്തിയത്. ഉന്നത പോലീസ് ഉദ്യോഗസ്ഥരുടെ അറിവോടെ നടക്കുന്ന ഇത്തരം നീക്കങ്ങള്‍ സംബന്ധിച്ചു പരാതികളുണ്ടാകുമ്പോള്‍ ലോക്കല്‍ സ്‌റ്റേഷന്‍റെ ഉത്തരവാദിത്വം മാത്രമായി മാറുകയും ചെയ്യുന്നു. അഭിഭാഷകന്‍ കുറ്റാരോപിതനായ പോക്സോ കേസില്‍ എഫ്ഐആര്‍ വൈകിപ്പിച്ച സംഭവത്തിലാണ് കഴിഞ്ഞ ദിവസം കോന്നി ഡിവൈഎസ്പി ടി. രാജപ്പൻ റാവുത്തറെയും എസ്എച്ച്ഒ പി.ശ്രീജിത്തിനെയും ആഭ്യന്തര വകുപ്പ് അന്വേഷണ വിധേയമായി സസ്പെന്‍ഡ് ചെയ്തത്. ഇരുവരുടെയും ഭാഗത്തു ഗുരുതരമായ കൃത്യവിലോപം ചൂണ്ടിക്കാട്ടി ഡിജിപി സര്‍ക്കാരിലേക്ക് റിപ്പോര്‍ട്ട് നല്‍കിയിരുന്നു. ഡിവൈഎസ്പിയുടെയും എസ്എച്ച്ഒയുടെയും സസ്പെൻഷനു പിന്നാലെ പോലീസ് ഉദ്യോഗസ്ഥരിലും അതൃപ്തി പടരുകയാണ്. പോക്സോ കേസുകളിൽ നൽകിയ റിപ്പോർട്ടുകൾ ജില്ലാ പോലീസ് മേധാവിയുടെ ഓഫീസിൽ പൂഴ്ത്തിവച്ചശേഷം സംഭവം വിവാദമായപ്പോൾ അന്വേഷണ ഉദ്യോഗസ്ഥരെ പഴിചാരുന്നതിലാണ് അതൃപ്തി. ഹൈക്കോടതി അഭിഭാഷകന്‍ കൂടിയായ നൗഷാദ് തോട്ടത്തിലിനെതിരേ പെണ്‍കുട്ടി പോലീസില്‍ പരാതി നല്‍കിയിട്ടും നടപടി ഉണ്ടാകാതെ വന്നപ്പോള്‍ ഡിഐജിയെ നേരില്‍കണ്ടപ്പോള്‍ ഇതേവിഷയം ഉന്നയിക്കപ്പെടുകയായിരുന്നു. ഡിഐജി ജില്ലാ പോലീസ് മേധാവിയിൽ നിന്നു റിപ്പോർട്ട് തേടിയതിനു പിന്നാലെയാണ് കോന്നിയിലെ ഉദ്യോഗസ്ഥർക്കെതിരേ കൃത്യവിലോപം ചുമത്തപ്പെട്ടത്. നൗഷാദ് ഒളിവിൽ, ജാമ്യാപേക്ഷ സുപ്രീം കോടതിയിൽ പതിനേഴ് വയസുള്ള പെണ്‍കുട്ടിയെ പീഡിപ്പിച്ച കേസില്‍ അഭിഭാഷകനായ നൗഷാദ്, പെണ്‍കുട്ടിയുടെ ബന്ധുവായ സ്ത്രീ എന്നിവരാണ് പ്രതിപ്പട്ടികയിലുള്ളത്. പെണ്‍കുട്ടിയുടെ മാതാപിതാക്കളുടെ വിവാഹമോചനക്കേസില്‍ പിതാവ് നിയോഗിച്ച അഭിഭാഷകനാണ് കുട്ടിയെ പീഡിപ്പിച്ചതായി പരാതി ഉണ്ടായത്. കഴിഞ്ഞ ഓഗസ്റ്റ് 29ന് പെണ്‍കുട്ടിയുടെ പിതാവ് അഭിഭാഷകനെതിരേ പരാതി നല്‍കിയെങ്കിലും കേസെടുക്കാന്‍ എസ്എച്ച്ഒ ശ്രീജിത്ത് തയാറായില്ലെന്നു പറയുന്നു. 2023 ജൂണ്‍ മുതല്‍ ഒരുവര്‍ഷത്തോളം പെണ്‍കുട്ടിയെ കോഴഞ്ചേരിയിലെയും കുമ്പഴയിലെയും ലോഡ്ജ് മുറികളിലെത്തിച്ച് പീഡിപ്പിച്ചെന്നാണ് മൊഴി. അഭിഭാഷകനു വേണ്ട സഹായം ചെയ്തു നല്‍കിയ അതിജീവിതയുടെ പിതൃസഹോദരിയെ ആറന്മുള പോലീസ് അറസ്റ്റ് ചെയ്തിരുന്നു. കുറ്റാരോപിതനായ നൗഷാദ് പെണ്‍കുട്ടിക്ക് മദ്യം നല്‍കി മയക്കി ക്രൂരമായ ലൈംഗിക പീഡനത്തിനു വിധേയനാക്കിയിരുന്നുവെന്ന് അന്വേഷണത്തില്‍ കണ്ടെത്തി. കേസിനേ തുടര്‍ന്ന് ഒളിവില്‍ പോയ അഭിഭാഷകനെ അറസ്റ്റ് ചെയ്യാതിരിക്കാനും പോലീസ് ഒത്തുകളിയുണ്ടായെന്ന് ആരോപണം ഉയര്‍ന്നു. ഹൈക്കോടതിയില്‍ ഇയാള്‍ നല്‍കിയ മുന്‍കൂര്‍ ജാമ്യാപേക്ഷ തള്ളിയതിനേ തുടര്‍ന്നാണ് സുപ്രീംകോടതിയില്‍ ജാമ്യത്തിനായി ശ്രമിക്കുന്നത്. കേസ് ഇപ്പോഴും സുപ്രീംകോടതിയുടെ പരിഗണനയിലാണ്. ഇതിനിടെ പെൺകുട്ടിയുടെ മാതാവിനെയും ഇതേ അഭിഭാഷകൻ പീഡിപ്പിച്ചെന്ന പരാതിയിൽ പോലീസ് കേസെടുത്തിട്ടുണ്ട്. സിഡബ്ല്യുസിയുമായി ആലോചിച്ചില്ല കോന്നി ഡിവൈഎസ്പിയും സിഐയും നടപടി നേരിട്ട കേസില്‍ ജില്ലാ ചൈൽഡ് വെൽഫെയർ കമ്മിറ്റിയുടെ ഇടപെടൽ സംബന്ധിച്ച റിപ്പോർട്ടിലെ പരാമർശം തെറ്റിധാരണാജനകമാണെന്ന് കമ്മിറ്റിയംഗങ്ങൾ പറയുന്നു. അതിജീവിതയ്ക്കു കൗണ്‍സലിംഗ് നല്‍കുവാൻ നടപടിയെടുക്കണമെന്ന പോലീസ് റിപ്പോര്‍ട്ട് ലഭിച്ചതിനേ തുടർന്ന് ഇതിനുള്ള നടപടി ഉണ്ടായതാണ്. ഡിസംബർ മൂന്നിന് സിഡബ്ല്യുസിയുടെ മുന്പാകെ നിർഭയയിൽ നിന്നു കേസ് റിപ്പോർട്ട് ചെയ്യപ്പെട്ടപ്പോൾ പത്തിന് പെൺകുട്ടിയെ കൗൺസലിംഗിനു വിധേയയാക്കി. 12ന് സൈക്കോളജിസ്റ്റിനെ ബന്ധപ്പെടുത്തി. 13നു കോന്നി എസ്എച്ച്ഒയ്ക്കു റിപ്പോർട്ട് നൽകുകയും ചെയ്തുവെന്ന് രേഖകളിൽ പറയുന്നു. ഇക്കാര്യങ്ങൾ പരിശോധിക്കാതെയാണ് പോലീസ് റിപ്പോർട്ട് തയാറാക്കിയതെന്ന് സിഡബ്ല്യുസി വൃത്തങ്ങൾ വിശദീകരിച്ചു. മുഖ്യമന്ത്രിക്കും വകുപ്പുമന്ത്രിക്കും ഇതു സംബന്ധിച്ച് പരാതി നൽകും. പോലീസ് റിപ്പോർട്ട് മൂന്നു മാസത്തോളം പൂഴ്ത്തിവയ്ക്കുകയായിരുന്നു. ഇക്കാര്യത്തിൽ ഉന്നത പോലീസ് ഉദ്യോഗസ്ഥർക്കടക്കം വീഴ്ചയുണ്ടായത് മറച്ചുപിടിക്കാനാണ് സിഡബ്ല്യുസിയെ പഴിചാരുന്നതെന്ന് ആക്ഷേപമുണ്ട്. പെണ്‍കുട്ടി ഹെല്‍പ് ലൈനില്‍ നേരിട്ട് വിളിച്ചതിനേ തുടര്‍ന്നാണ്കേസ് ഏറ്റെടുത്തതെന്നും ഇക്കാര്യം പോലീസിനെ അറിയിക്കുന്നതില്‍ സിഡബ്ല്യുസിയുടെ ഭാഗത്തും വീഴ്ചയുണ്ടായെന്നുമാണ് ഡിജിപിയുടെ റിപ്പോര്‍ട്ടില്‍ പറയുന്നത്. വനിതാ എസ്ഐയ്ക്കെതിരേയും റിപ്പോർട്ട് നൽകി ട്യൂഷന്‍ ടീച്ചറുടെ പിതാവ് ഏഴുവയസുകാരിയെ പീഡിപ്പിച്ചെന്ന മറ്റൊരു കേസിൽ സിഡബ്ല്യുസി ഇടപെട്ടിട്ടും പോലീസ് ഉദ്യോഗസ്ഥയെ സംരക്ഷിച്ചതും വിവാദമായിട്ടുണ്ട്. പീഡന പരാതി എത്തിയിട്ടും കേസെടുക്കാതെ കുറ്റാരോപിതനെ രക്ഷിക്കാന്‍ വനിത എസ്‌ഐ ശ്രമിച്ചുവെന്ന് സിഡബ്ല്യുസിക്കും ബോധ്യപ്പെട്ടിട്ടും വകുപ്പുതല നടപടിക്ക് ശിപാർശ ചെയ്തില്ലെന്നാണ് ആക്ഷേപം. എന്നാൽ വനിത എസ്ഐയുടെ വീഴ്ച പത്തനംതിട്ട ഡിവൈഎസ്പിയുടെ ശ്രദ്ധയില്‍പെടുത്തിയിരുന്നതാണെന്ന് സിഡബ്ല്യുസി പറയുന്നു. എസ്‌ഐയ്‌ക്കെതിരേ ഒരു നടപടി ഉണ്ടായില്ലെന്നു മാത്രമല്ല, അവരെ സംരക്ഷിക്കാനാണ് പോലീസ് ഉദ്യോഗസ്ഥര്‍ ശ്രമിച്ചതെന്നാണ് ആക്ഷേപം. ഇതു സംബന്ധിച്ചു പെണ്‍കുട്ടിയുടെ പിതാവ് നല്‍കിയ പരാതി പൂഴ്ത്തിയതായും ആക്ഷേപമുണ്ട്.

വൃക്ഷത്തൈകൾ നൽകി

പത്തനംതിട്ട: ലോക പരിസ്ഥിതി ദിനത്തിന്‍റെ ഭാഗമായി ജില്ലാ സ്പോർട്സ് കൗൺസിൽ പ്രസിഡന്‍റ് കെ. അനിൽകുമാർ വൃക്ഷത്തൈകൾ കായികതാരങ്ങൾക്ക് കൈമാറി. സ്പോർട്സ് കൗൺസിൽ ജീവനക്കാരായ എൽ.എസ്. ബെൻലി, എസ്. അക്ഷയ്, പി.കെ. ഉമേഷ്, ബി. സുരേന്ദ്രൻ നായർ കാതോലിക്കേറ്റ് കോളജിലെ സോഫ്റ്റ് ബോൾ കായിക താരങ്ങൾ എന്നിവർ പങ്കെടുത്തു.

ഓർമമരം നട്ട് എഐവൈ എഫ്

അടൂർ: എഐവൈഎഫ് നേതൃത്വത്തിൽ പരിസ്ഥിതി വാരാചാരണത്തിന് അടൂരിൽ തുടക്കമായി. സിപിഐ ജില്ലാ കമ്മിറ്റി അംഗം റ്റി. ആർ. ബിജുവിന്‍റെ ഓർമകൾ ഉറങ്ങുന്ന വസതിയിൽ ഓർമമരം നട്ടുകൊണ്ട് ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. എഐവൈഎഫ് ജില്ലാ വൈസ് പ്രസിഡന്‍റ് അജിത്ത് ശാന്തകുമാർ അധ്യക്ഷത വഹിച്ചു. എഐവൈഎഫ് മണ്ഡലം സെക്രട്ടറി എം മനു സ്വാഗതവും മണ്ഡലം പ്രസിഡന്‍റ അഞ്ജലി വിജയൻ നന്ദിയും പറഞ്ഞു.

വെള്ളക്കെട്ട് ഒഴിഞ്ഞു, പടിഞ്ഞാറൻ മേഖലയിൽ സ്കൂളുകൾ തുറക്കാൻ അനുമതി

തിരുവല്ല: മഴക്കെടുതികളേ തുടർന്നു പ്രവേശനോത്സവം മുടങ്ങിയ സ്കൂളുകൾക്ക് ഇന്നു മുതൽ പ്രവർത്തിച്ചു തുടങ്ങാം. തിരുവല്ല താലൂക്കിന്‍റെ പടിഞ്ഞാറൻ മേഖലയിൽ കഴിഞ്ഞ ദിവസങ്ങളിൽ സ്കൂളുകൾക്ക് അവധിയായിരുന്നു. ദുരിതാശ്വാസ ക്യാന്പുകളായി പ്രവർത്തിക്കുന്ന സ്കൂളുകൾ കൂടാതെ വെള്ളക്കെട്ട് നിലവിലുള്ള പെരിങ്ങര കാരയ്ക്കൽ എൽപിഎസിനു മാത്രമാണ് ഇന്ന് ജില്ലാ കളക്ടർ അവധി നൽകിയിരിക്കുന്നത്. മറ്റ് സ്കൂൾ പരിസരങ്ങളിലെ വെള്ളക്കെട്ടുകൾ ഒഴിഞ്ഞതായ റിപ്പോർട്ടുകളേ തുടർന്നാണ് അവധി നൽകാതിരുന്നത്. എന്നാൽ സ്കൂളുകൾ തുറക്കണമെങ്കിൽ ശുചീകരണം അടക്കം നടക്കേണ്ടതുണ്ട്. പലയിടത്തും ക്ലാസ് മുറികളിൽ വെള്ളം കയറിയിരുന്നു. സ്കൂൾ പരിസരത്തും ചെളി നിറഞ്ഞിരിക്കുകയാണ്. ഇഴജന്തുകൾ അടക്കമുള്ളവയുടെ ശല്യവും പലയിടങ്ങളിലുണ്ടായി. വെള്ളം കയറിയ പ്രദേശങ്ങളിൽ ശുചീകരണം നടത്തിയശേഷം ക്ലാസുകൾ ആരംഭിക്കാനാണ് സ്കൂൾ അധികൃതർ ഉദ്ദേശിക്കുന്നത്. അടുത്ത ദിവസങ്ങളിൽ ബക്രീദ് അവധി കൂടി വരുന്നതിനാൽ തിങ്കളാഴ്ച മുതൽ ക്ലാസുകൾ ആരംഭിക്കാനാണ് സ്കൂൾ അധികൃതരുടെ താത്പര്യം. വെള്ളം കയറിയ പ്രദേശങ്ങളിൽ ശുചീകരണം അടക്കമുള്ള ജോലികളിൽ തദ്ദേശ സ്ഥാപനങ്ങളോ ആരോഗ്യവകുപ്പോ മുൻകൈയെടുക്കുന്നില്ലെന്നും പരാതിയുണ്ട്. ഫണ്ടിന്‍റെ അഭാവം കാരണം തദ്ദേശ സ്ഥാപനങ്ങൾ ഇത്തരം ജോലികളിൽ നിന്നു വിട്ടു നിൽക്കുകയാണ്. ഇതുകാരണം പ്രദേശത്ത് പകർച്ചവ്യാധി ഭീഷണി അടക്കം നിലനിൽക്കുകയാണ്. വെള്ളം കയറി കുടിവെള്ള സ്രോതസുകൾ അടക്കം മലിനപ്പെട്ടതോടെ ശുദ്ധജലക്ഷാമം അടക്കം നേരിടുകയാണ് പല പ്രദേശങ്ങളും. ശൗചാലയങ്ങൾ അടക്കം ഉപയോഗയോഗ്യമല്ലാതായിരിക്കുകയാണ്. അധികൃതരുടെ നിസംഗത കാരണം വരുംദിവസങ്ങളിൽ ഗുരുതരമായ ആരോഗ്യ പ്രശ്നങ്ങൾ ഉണ്ടാകുമെന്ന ആശങ്ക പ്രദേശവാസികൾക്കുണ്ട്. മഴ മാറിയതോടെ റോഡുകളിലെ വെള്ളം നീങ്ങിയതോടെ പ്രധാന പാതകളിൽ ഗതാഗതം പുനഃസ്ഥാപിച്ചു. ആറ് സ്കൂളുകൾക്ക് അവധി പത്തനംതിട്ട ജില്ലയിൽ ദുരിതാശ്വാസ ക്യാന്പുകൾ പ്രവർത്തിക്കുന്ന മുത്തൂർ ഗവൺമെന്‍റ് എൽപിഎസ്, കാവുംഭാഗം വേങ്ങൽ എംടിഎൽപിഎസ്, നിരണം എരത്തോട് സെന്‍റ് ജോർജ് യുപി സ്കൂൾ, പെരിങ്ങര മേപ്രാൽ ഗവൺമെന്‍റ് എൽപി സ്കൂൾ, കവിയൂർ പടിഞ്ഞാറ്റുംചേരി ഗവൺമെന്‍റ് എൽപി സ്കൂൾ എന്നിവയ്ക്കും പ്രളയക്കെടുതി തുടരുന്ന കാരയ്ക്കൽ എൽപി സ്കൂളിനും ജില്ലാ കളക്ടർ ഇന്ന് അവധി നൽകി. ജില്ലയില്‍ 11 ദുരിതാശ്വാസ ക്യാമ്പുകള്‍ പത്തനംതിട്ട: ജില്ലയില്‍ ദുരിതാശ്വാസ ക്യാമ്പുകള്‍ 11. തിരുവല്ല താലക്കിലാണ് ക്യാമ്പുകളെല്ലാം പ്രവര്‍ത്തിക്കുന്നത്. 128 കുടുംബങ്ങളിലായി 165 പുരുഷന്‍മാരും 160 സ്ത്രീകളും 100 കുട്ടികളും ഉള്‍പ്പെടെ 425 പേരാണ് ക്യാമ്പിലുള്ളത്.

അടൂര്‍ ബൈപാസില്‍ കാറും ലോറിയും കൂട്ടിയിടിച്ചു; നാല് യുവാക്കള്‍ക്ക് ഗുരുതര പരിക്ക്

അടൂർ: അടൂര്‍ ബൈപാസില്‍ കാറും ലോറിയും കൂട്ടിയിടിച്ച് പന്തളം സ്വദേശികളായ നാല് യുവാക്കള്‍ക്ക് ഗുരുതര പരിക്ക്. സബിന്‍, വിഷ്ണു, ആദര്‍ശ്, സൂരജ് എന്നിവര്‍ക്കാണ പരിക്കേറ്റത്. പരിക്കേറ്റ വിഷ്ണു, സൂരജ് എന്നിവരെ കോട്ടയം മെഡിക്കല്‍ കോളജില്‍ പ്രവേശിപ്പിച്ചു. ഇന്നലെ പുലര്‍ച്ചെ 3.45ന് ബൈപാസില്‍ ഫാത്തിമ സൂപ്പര്‍ മാര്‍ക്കറ്റിനു സമീപം എറണാകുളത്തു നിന്നും തിരുവനന്തപുരത്തേക്ക് പോയ കെആര്‍എസ് പാഴ്‌സല്‍ സർവീസ് ലോറിയും കൊട്ടാരക്കരയില്‍ നിന്നും കോട്ടയത്തേക്ക് പോയ കാറും കൂട്ടിയിടിച്ചായിരുന്നു അപകടം. ഇടിയുടെ ആഘാതത്തില്‍ പാഴ്‌സല്‍ ലോറി റോഡിനു കുറുകെ മറിഞ്ഞു. കാര്‍ പൂര്‍ണമായും തകര്‍ന്നു. ലോറിയിലെ ഡ്രൈവര്‍ക്ക് പരിക്കുകളില്ല. കാര്‍ അമിതവേഗത്തില്‍ തെറ്റായ ദിശയില്‍ വന്ന് ലോറിയില്‍ ഇടിക്കുകയായിരുന്നുവെന്ന് പറയുന്നു. ക്രെയിന്‍ കൊണ്ടുവന്ന് ലോറി മാറ്റിയ ശേഷമാണ് ബൈപാസില്‍ ഗതാഗതം പുന സ്ഥാപിച്ചത്. അടൂര്‍ ഫയര്‍ സ്റ്റേഷന്‍ ഓഫീസര്‍ വിനോദ് കുമാര്‍, സീനിയര്‍ റെസ്‌ക്യൂ ഓഫീസര്‍ അജിഖാന്‍ യൂസുഫ് എന്നിവരുടെ നേതൃത്വത്തില്‍ ഓഫീസര്‍മാരായ അനീഷ്, രാഹുല്‍, സജാദ്, ശ്രീകുമാര്‍, സന്തോഷ്, ജോര്‍ജ്, എന്നിവര്‍ രക്ഷാപ്രവര്‍ത്തനത്തില്‍ പങ്കെടുത്തു.

ലോക പരിസ്ഥിതി ദിനാചരണം

തിരുവല്ല: ലോക പരിസ്ഥിതി ദിനത്തിന്‍റെ ഭാഗമായി, വനംവകുപ്പിന്‍റെ സഹകരണത്തോടെ പുഷ്പഗിരിയിൽ വൃക്ഷത്തൈ നടീൽ നടന്നു. ഫോറസ്റ്റ് അസി. ഫോറസ്റ്റ് കൺസർവേറ്റർ ബി. രാഹുൽ ഉദ്ഘാടനം ചെയ്തു. തിരുവല്ല ഡിവൈഎസ്പി എസ്. നന്ദകുമാർ മുഖ്യാതിഥി ആയിരുന്നു. പാമ്പു കടിയേറ്റാൽ നൽകേണ്ട പ്രാഥമിക ശുശ്രൂഷയെ സംബന്ധിച്ച ക്ലാസ് പുഷ്പഗിരി എമർജൻസി വിഭാഗം അസി. പ്രഫസർ ഡോ. അർജുൻ ജയിംസ് നയിച്ചു. പുഷ്പഗിരി ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് സിഇഒ റവ. ഡോ. ബിജു വർഗീസ് പയ്യമ്പള്ളിൽ, ആശുപത്രി അഡ്മിനിസ്ട്രേറ്റർ ഫാ. മാത്യു തുണ്ടിയിൽ, മെഡിക്കൽ ഡയറക്ടർ ഡോ. ഏബ്രഹാം വർഗീസ് തുടങ്ങിയവർ പ്രസംഗിച്ചു. മൈലപ്ര: ലോക പരിസ്ഥിതി ദിനത്തിനോടനുബന്ധിച്ച് മൈലപ്ര സൗഹൃദകൂട്ടായ്മയുടെ നേതൃത്വത്തിൽ വൃക്ഷത്തൈനടീലും പരിസ്ഥിതിസമ്മേളനവും നടത്തി . ഫാ. രാജു ഡാനിയേൽ വൃക്ഷത്തൈനട്ട് പരിസ്ഥിതി സമ്മേളനം ഉദ്ഘാടനം ചെയ്തു . സലിം പി. ചാക്കോ അധ്യക്ഷത വഹിച്ചു. റെജി പ്ലാതോട്ടത്തിൽ, ജോസ് പി. തോമസ്, ഷിനു ജോൺ, പ്രീനു ടി .മാത്യൂസ്, ഡൊമിനിക് ബേബി, വിൻസന്‍റ് വർഗീസ്, റോഷിൻ പി .വറുഗീസ് എന്നിവർ പ്രസംഗിച്ചു . പത്തനംതിട്ട: ക്രൈസ്തവ സഭകളുടെ കൂട്ടായ്മയായ നാഷണൽ ക്രിസ്ത്യൻ മൂവ്മെന്‍റ് ഫോർ ജസ്റ്റീസ് ആറന്മുള അസംബ്ലി പ്രവർത്തക സമ്മേളനവും പരിസ്ഥിതി ദിനാചരണവും ഇന്ന് മൂന്നിന് സുവാർത്ത ചർച്ച് മാരാമണ്ണിൽ നടക്കും. എൻസിഎംജെ ജില്ലാ പ്രസിഡന്‍റ് ഫാ. ബെന്യാമിൻ ശങ്കരത്തിൽ അധ്യക്ഷത വഹിക്കുന്ന യോഗം സംസ്ഥാന പ്രസിഡന്‍റ് ഡോ.പ്രകാശ് പി. തോമസ് ഉദ്ഘാടനം ചെയ്യും. അടൂർ: ലോക പരിസ്ഥിതി ദിനാചരണം ലൈഫ് ലൈൻ മൾട്ടി സ്പെഷാലിറ്റി ആശുപത്രിയിൽ ഇന്നു രാവിലെ എട്ടിന് ഡോ. പ്രസന്നകുമാരിയുടെ നേതൃത്വത്തിൽ വൃക്ഷത്തൈകൾ നട്ട് ആചരിക്കും. ഡോ. അനുസ്മിത ആൻഡ്രൂസ് പരിസ്ഥിതി ബോധവത്കരണ ക്ലാസ് നയിക്കും. ഡോ. ജോർജ് ചാക്കച്ചേരി പ്രഭാഷണം നടത്തും. ഡോ. ജെസ്ന ഹസൻ പ്രസംഗിക്കും.

ഹരിതകേരളം മിഷൻ ജില്ലാതല പരിസ്ഥിതിദിനാഘോഷം തുന്പമണ്ണിൽ

പത്തനംതിട്ട: ജില്ലാ ശുചിത്വ മിഷന്‍റെയും ഹരിതകേരളം മിഷന്‍റെ നേതൃത്വത്തിൽ ജില്ലാതല പരിസ്ഥിതി ദിനാഘോഷം ഇന്ന് തുമ്പമൺ എംജിഎച്ച്എസ്എസിൽ നടക്കും. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം ഉദ്ഘാടനം ചെയ്യും. കാതോലിക്കേറ്റ് ആൻഡ് എംഡി സ്കൂൾസ് കോർപറേറ്റ് മാനേജർ ഡോ. ഗബ്രിയേൽ മാർ ഗ്രിഗോറിയോസ് മെത്രാപ്പോലീത്ത പരിസ്ഥിതിദിന സന്ദേശം നൽകും. ബ്ലോക്ക് പഞ്ചായത്ത് പ്രസിഡന്‍റ് ബി.എസ്. അനീഷ്‍മോൻ, ജില്ലാ പഞ്ചായത്ത് മെംബർ റോബിൻ പീറ്റർ, തദ്ദേശ സ്വയം ഭരണ വകുപ്പ് ജോയിന്‍റ് ഡയറക്ടർ എ. എസ്. നൈസാം, പത്തനംതിട്ട ജില്ലാ ശുചിത്വ മിഷൻ കോ ഓർഡിനേറ്റർ നിഫി എസ്. ഹക്ക്, ഹരിതകേരളം മിഷൻ ജില്ലാ മിഷൻ കോ ഓർഡിനേറ്റർ ജി. അനിൽ കുമാർ, പൊതുവിദ്യാഭ്യാസ വകുപ്പ് - ഹയർ സെക്കൻഡറി വിഭാഗം ഡെപ്യൂട്ടി ഡയറക്ടർ കെ. സുധ എന്നിവർ പ്രസംഗിക്കും. ജില്ലയിലെ മികച്ച സ്നേഹരാമം തയാറാക്കി പരിപാലിക്കുന്ന എംജിഎച്ച്എസ്എസ് എൻഎസ്എസ് യൂണിറ്റിനെ പത്തനംതിട്ട ജില്ലാ ശുചിത്വ മിഷൻ ആദരിക്കും. പരിസ്ഥിതി ദിനാചരണത്തിന്‍റെ ഭാഗമായി സ്കൂൾ കുട്ടികൾക്കായി ശുചിത്വം, മാലിന്യ നിർമാർജ്ജന തുടങ്ങിയ വിഷയങ്ങളുമായി ബന്ധപ്പെട്ട് ചിത്രരചന, പോസ്റ്റർ രചന, പസിൽ ഗെയിം എന്നിവ നടത്തും. ജില്ലയിലെ ബ്ലോക്ക് പഞ്ചായത്തുകൾ കേന്ദ്രീകരിച്ച് പരിസ്ഥിതി ദിനാഘോഷങ്ങൾക്ക് അതാത് തദ്ദേശ സ്ഥാപനങ്ങളും നേതൃത്വം നൽകും. ഇന്നു മുതൽ 30 വരെ നീണ്ടുനിൽക്കുന്ന വിപുലമായ പരിപാടികൾക്കാണ് ജില്ലാ ശുചിത്വ മിഷൻ തുടക്കമിടുന്നത്.

നാട്ടുമരങ്ങൾ നട്ടു പരിസ്ഥിതിദിനവും വ്യത്യസ്തമാക്കും

കല്ലൂപ്പാറ: നാട്ടിൻപുറങ്ങളിൽ വിവിധ പേരുകളിൽ അറിയപ്പെട്ടിരുന്ന പ്ലാവുകളുടെയും മാവുകളുടെയും പെരുമ നഷ്ടമാകാതിരിക്കാൻ കല്ലൂപ്പാറ അഗ്രികൾച്ചർ പ്രൊഡ്യൂസേഴ്സ് ആൻഡ് പ്രമോട്ടേഴ്സ് അസോസിയേഷൻ (കപ്പ ) നാട്ടുമരങ്ങൾക്കൊരിടം എന്ന പേരിൽ പരിസ്ഥിതിദിനത്തെ വ്യത്യസ്തമാക്കും. കല്ലൂപ്പാറ എൻജിനിയറിംഗ് കോളജ് ഭൂമിത്രസേനയുടെ സഹകരണത്തിൽ ഇന്ന് എൻജിനിയറിംഗ് കോളജ് അങ്കണത്തിൽ നാടൻമരങ്ങളുടെ തൈകൾ നട്ടാകും ദിനാചരണം. നാടൻ പ്ലാവുകളുടെയും മാവുകളുടെയും തൈകളാണ് പ്രധാനമായും നടുക. ഇവയ്ക്കൊപ്പം മറ്റു നാട്ടുമരങ്ങളുടെ തൈകളും ഉണ്ടാകും. രാവിലെ 10.30 കോളജ് പ്രിൻസിപ്പൽ ഡോ. ദീപ ജയൻ പരിപാടി ഉദ്ഘാടനം ചെയ്യും. വാകത്താനം വരിക്ക, തെള്ളിയൂർ വരിക്ക, ചെമ്പരത്തി വരിക്ക, തേൻ വരിക്ക, ഇരുവള്ളിപ്ര വരിക്ക, ഉണ്ടച്ചക്ക, താമര ചക്ക തുടങ്ങിയ പ്ലാവിനങ്ങൾ, മൂവാണ്ടൻ, കിളിച്ചുണ്ടൻ, കപ്പമാവ്, വിവിധ ഇനം നാട്ടു മാവുകൾ എന്നിവയുടെ തൈകളും വിത്തുകളു മാണ് പ്രധാനമായും നടുക. ഇതിനൊപ്പം അപൂർവ നാട്ടു മരങ്ങളുടെ തൈകളും നടും. photo: കല്ലൂപ്പാറയിൽ കപ്പയുടെ ആഭിമുഖ്യത്തിൽ സംഘടിപ്പിച്ച വിത്തുവേലിച്ചന്ത.

ഇന്ന് ലോകപരിസ്ഥിതിദിനം : കല്ലൂപ്പാറയുടെ പച്ചപ്പ് തിരികെപ്പിടിച്ച് "കപ്പ'

ബിജു കുര്യൻ കല്ലൂപ്പാറ: രാജകീയ പ്രൗഢിയുള്ള നാടാണ് കല്ലൂപ്പാറ. തന്പുരാക്കന്മാരുടെ കാലഘട്ടത്തിൽ കാർഷിക രംഗത്തും തനതായ പ്രാമുഖ്യം നേടിയ നാട്. സ്വന്തം പേരിൽ ബ്രാൻഡ് ചെയ്യപ്പെട്ട നിരവധി കാർഷികോത്പന്നങ്ങൾ വിളയിച്ചിരുന്ന കല്ലൂപ്പാറയെ പഴയകാല പ്രതാപത്തിലേക്ക് തിരികെ കൊണ്ടുവരാനുള്ള ശ്രമത്തിലാണ് കല്ലൂപ്പാറ അഗ്രികൾച്ചർ പ്രൊഡ്യൂസേഴ്സ് ആൻഡ് പ്രമോട്ടേഴ്സ് അസോസിയേഷൻ. "കപ്പ' എന്ന ചുരുക്കപ്പേരിലറിയപ്പെടാനാണ് നാട്ടിലെ കർഷകരായ അസോസിയേഷൻ അംഗങ്ങളുടെ താത്പര്യം. അന്പതോളം കർഷകർ അസോസിയേഷനിൽ അംഗങ്ങളായുണ്ട്. കർഷക കൂട്ടായ്മ വാട്സ്ആപ് ഗ്രൂപ്പിൽ പ്രദേശവാസികളെ കൂടുതലായി ഉൾപ്പെടുത്തിയിട്ടുണ്ട്. കഴിഞ്ഞ ഒരു വർഷത്തിനിടെ ശ്രദ്ധേയമായ പല പ്രവർത്തനങ്ങളും "കപ്പ' നടത്തി. കറുത്തവടശേരിക്കടവ് പാലത്തിനു സമീപത്ത് പച്ചത്തുരുത്ത് ഒരുക്കിക്കൊണ്ടായിരുന്നു തുടക്കം. മണിമലയാറിന്‍റെ തീരത്ത് വെള്ളപ്പൊക്കത്തെ അതിജീവിച്ചു വളരാൻ ശേഷിയുള്ള ഇനം മരങ്ങൾ നട്ടു സംരക്ഷണം ഉറപ്പാക്കിയാണ് പച്ചത്തുരുത്ത് നിർമിച്ചിട്ടുള്ളത്. കല്ലൂപ്പാറ വിത്തുവേലി ചന്തയാണ് അസോസിയേഷൻ ഏറ്റെടുത്ത മറ്റൊരു ഉദ്യമം. ഏറെ ആകർഷണീയമായി മാറിയ വിത്തുവേലി ചന്ത കർഷകർക്ക് പുതിയ ഒരിടം ഒരുക്കൽ കൂടിയായി. കർഷകരിൽ നിന്നു നേരിട്ടു നാടൻ വിളവുകളും വിത്തുകളും വാങ്ങാൻ ഒരിടമെന്ന നിലയിലാണ് വിത്തുവേലി ചന്ത ഒരുങ്ങിയത്. നാടൻ, സങ്കര ഇങ്ങളിൽപെട്ട പച്ചക്കറി വിത്തുകളും തൈകളും അപൂർവയിനം വൃക്ഷങ്ങളുടെ തൈകളും വില്പന നടത്തി. കൂൺ വിത്ത്, കൂൺ വിഭവങ്ങൾ, തേൻ, ചക്ക ഉത്പന്നങ്ങൾ, കറിപ്പൊടികൾ, ജൈവരീതിയിൽ കൃഷി ചെയ്ത് തവിടു കളയാതെ കുത്തിയെടുത്ത അരി തുടങ്ങിയവയും വില്പനയ്ക്കെത്തി. കല്ലൂപ്പാറ പാളത്തൈരിന്‍റെ പെരുമ പുതുതലമുറയിലേക്കെത്തിക്കാനും വിത്തുവേലി ചന്ത വഴിയൊരുക്കി. കല്ലൂപ്പാറ തനത് ഉത്പന്നങ്ങളിലൊന്നായ പാളത്തൈര് വില്പനയ്ക്കെത്തിയപ്പോൾ പുതുമയോടെ ആളുകൾ സ്വീകരിച്ചു. കുത്തിയെടുത്ത പാളയിൽ പശുവിൻപാൽ ഉറയൊഴിച്ച് പരന്പരാഗത രീതിയിൽ തയാറാക്കിയ തൈരിന്‍റെ രുചി പുതുതലമുറയും അനുഭവിച്ചു. കമുകിൻ ചുവട്ടിൽ വീഴുന്ന പഴുത്ത പാള എടുത്ത് ഇത് തൈര് നിറയ്ക്കാൻ പാകത്തിൽ കുത്തിയെടുക്കാൻ അറിയാവുന്നവരും ഇന്ന് അപൂർവമാണ്. പാള കുത്തിയെടുത്ത് തൈര് നിറച്ച് മുകൾ ഭാഗം വാഴനാര് ഉപയോഗിച്ച് കെട്ടിയെടുത്താണ് വില്പനയ്ക്കെത്തുന്നത്. നാടൻ കന്നുകാലികളുടെ പ്രദർശനവും വിത്തുവേലി ചന്തയിൽ ഒരുക്കിയിരുന്നു. കാട്ടുപന്നി ശല്യത്തിൽ നിന്നു കർഷകരെ രക്ഷിക്കാൻ ചെലവു കുറഞ്ഞ വൈദ്യുത വേലി നിർമാണത്തിനു ക്ലാസെടുത്തു. പഞ്ചായത്തിന്‍റെയും വനംവകുപ്പിന്‍റെയും സഹായത്തോടെ കല്ലൂപ്പാറയിൽ കാട്ടുപന്നി നിർമാർജനത്തിനു നടപടിയെടുത്തു. കാടു കയറിക്കിടന്ന പുരയിടങ്ങൾ തെളിക്കാനും അസോസിയേഷൻ മുൻകൈയെടുത്തു. കൃഷി ഒരു പാഠം എന്ന പേരിൽ കുട്ടികൾക്കായി അവധിക്കാലത്ത് പ്രത്യേക ക്ലാസുകളും മത്സരങ്ങളും നടത്തി സമ്മാനങ്ങൾ നൽകി. പുതുതലമുറയെയും കൂട്ടിയോജിപ്പിച്ചുകൊണ്ടാണ് കല്ലൂപ്പാറയിൽ പച്ചപ്പ് തിരികെ പിടിക്കാൻ ശ്രമിക്കുന്നെതന്ന് കപ്പ ഭാരവാഹികൾ പറഞ്ഞു. നാട്ടിൽ നിന്നും നഷ്ടമായിക്കൊണ്ടിരിക്കുന്ന കിഴങ്ങുവർഗങ്ങളുടെ കൃഷിയാണ് നിലവിൽ കപ്പ ഏറ്റെടുത്തിരിക്കുന്ന മറ്റൊരു ദൗത്യം. കല്ലൂപ്പാറയുടേതു മാത്രമെന്ന് അവകാശപ്പെടാവുന്ന പലതരം കിഴങ്ങുവർഗങ്ങളും നാമാവശേഷമാകുന്നതൊഴിവാക്കാൻ ഇവയുടെ കൃഷിയെ പ്രോത്സാഹിപ്പിക്കുന്നുണ്ട്. കാലമറിഞ്ഞ് കൃഷിയിലേക്ക് എന്ന പദ്ധതിക്കും തുടക്കമിട്ടു. കാട്ടുപന്നിയുടെ നിരന്തരമായ ശല്യത്തെ മറികടന്നാണ് ഇത്തരം കൃഷികളുമായി കർഷകർ മുന്നോട്ടു പോകുന്നത്. കല്ലൂപ്പാറയുടെ സ്വന്തം മരച്ചീനിയും കുരുമുളകും കിഴങ്ങുവർഗങ്ങളുമെല്ലാം പ്രതാപത്തോടെ നിലനിൽക്കണമെന്ന ആഗ്രഹത്തോടെയാണ് അസോസിയേഷൻ നീങ്ങുന്നതെന്ന കപ്പ പ്രസിഡന്‍റ് സി.കെ. മത്തായിയും ജനറൽ സെക്രട്ടറി ലെജു ഏബ്രഹാമും പറഞ്ഞു.

മരത്തിൽനിന്നു വീണു യുവാവ് മരിച്ചു

കോഴഞ്ചേരി: വൃക്ഷശിഖരം മുറിക്കുന്നതിനിടെ യുവാവ് താഴെ വീണു മരിച്ചു.തിരുവനന്തപുരം പാലോട് നന്ദിയോട് രാജേഷ് ഭവനിൽ യേശുദാസിന്‍റെ മകൻ രാജേഷാണ് (42) മരിച്ചത്. ഇന്നലെ വൈകുന്നേരം 6.30 ഓടെ ആറന്മുള തറയിൽമുക്കിനു സമീപം മാപ്പിളേത്തു ഷീലയുടെ വീട്ടിലെ തേക്കു മരത്തിന്‍റെ കൊമ്പ് വെട്ടാൻ കയറിയപ്പോഴാണ് അപകടം ഉണ്ടായത്. മല്ലപ്പുഴശേരിയിൽ ഭാര്യ ഷീബയ്ക്കും മകൻ അവിനാഷിനും ഒപ്പം വാടകയ്ക്കു താമസിക്കുന്ന രാജേഷ് രണ്ടു ദിവസമായി മരത്തിന്‍റെ ശിഖരങ്ങൾ വെട്ടിനീക്കുന്ന ജോലി ചെയ്തു വരികയായിരുന്നു. മൃതദേഹം ജില്ലാ ആശുപത്രി മോർച്ചറിയിൽ.

സ്വര്‍ണവും ഇലക്‌ട്രോണിക് ഉപകരണങ്ങളും കവര്‍ന്ന കേസില്‍ രണ്ടു പേര്‍ അറസ്റ്റില്‍

മല്ലപ്പള്ളി: അടച്ചിട്ട വീട് കുത്തിത്തുറന്ന് 20 പവന്‍ സ്വര്‍ണവും പണവും ഇലക്ട്രോണിക് ഉപകരണങ്ങളും കവര്‍ന്ന കേസില്‍ കൊടുംക്രിമിനല്‍ ഉള്‍പ്പെടെ രണ്ടുപേരെ പോലീസ് അറസ്റ്റ് ചെയ്തു. നെയ്യാറ്റിന്‍കര പള്ളിച്ചല്‍ ഭഗവതിനട വട്ട വിളപുത്തന്‍ വീട്ടില്‍ അനില്‍കുമാര്‍(44), പേരൂര്‍ക്കട കുടപ്പനക്കുന്ന് ജെപി ലെയ്ന്‍ പുല്ലുകുളം വീട്ടില്‍ ബിജു കുമാര്‍ (43) എന്നിവരെയാണ് കീഴ്‌വായ്പൂര് പോലീസ് അറസ്റ്റ് ചെയ്തത്. കുന്നന്താനം കല്ലുങ്കല്‍ നെടുങ്ങാടപ്പള്ളി കിഴക്കയില്‍ മത്തായിയുടെ വീട്ടിലാണ് കവര്‍ച്ച നടന്നത്. 15ന് ഇവര്‍ കഴക്കൂട്ടത്തെ ബന്ധുവീട്ടില്‍ പോയിരുന്നു. 17ന് വൈകുന്നേരം അഞ്ചോടെയാണ് തിരിച്ചെത്തിയത്. ഈ സമയമാണ് മോഷണം നടന്നതായി തിരിച്ചറിഞ്ഞത്. കിടപ്പുമുറിയിലെ സ്റ്റീല്‍ അലമാരയിലും ഭിത്തിഅലമാരയിലുമായി സൂക്ഷിച്ചിരുന്ന 20 പവന്‍ സ്വര്‍ണവും, ലാപ് ടോപ്പും സിസിടിവിയുടെ ഡിവിആറും, മോണിറ്ററും അഞ്ച് വാച്ചുകളും നഷ്ടപ്പെട്ടിരുന്നു. വിരലടയാള വിദഗ്ധര്‍ ശാസ്ത്രീയ അന്വേഷണം സംഘം ഡോഗ് സ്‌ക്വാഡ് എന്നിവ സ്ഥലത്തെത്തി പരിശോധന നടത്തി തെളിവുകള്‍ ശേഖരിച്ചു. അറസ്റ്റിലായ അനില്‍കുമാര്‍ തിരുവനന്തപുരം പേരൂര്‍ക്കട പോലീസ് സ്റ്റേഷനില്‍ രജിസ്റ്റര്‍ ചെയ്ത കവര്‍ച്ച, മോഷണം മനപ്പൂര്‍വമല്ലാത്ത നരഹത്യാശ്രമം, ആയുധനിയമം ഉള്‍പ്പെടെയുള്ള 17 കേസുകളില്‍ പ്രതിയാണ്. പേരൂര്‍ക്കട പോലീസ് സ്റ്റേഷനിലെ കാപ്പ കേസ് പ്രതികൂടിയാണ് ഇയാള്‍. രണ്ടാം പ്രതി പോക്‌സോ ഉള്‍പ്പെടെ മൂന്ന് കേസുകളിലും ഉള്‍പ്പെട്ടിട്ടുണ്ട്. തിരുവല്ല ഡിവൈഎസ്പി എസ് നന്ദകുമാറിന്‍റെ മേല്‍നോട്ടത്തില്‍ കീഴ്വായ്പ്പൂര്‍ എസ് എച്ച് ഓ വിപിന്‍ ഗോപിനാഥന്‍, എസ് ഐമാരായ സതീഷ് ശേഖര്‍, മനോജ് കുമാര്‍ തുടങ്ങിയവരുടെ നേതൃത്വത്തിലുമുള്ള പ്രത്യേകസംഘം ഇവരെ തിരുവനന്തപുരത്തുനിന്നും കസ്റ്റഡിയിലെടുത്ത് സ്റ്റേഷനിലെത്തിക്കുകയായിരുന്നു. പ്രതികളെ കസ്റ്റഡിയില്‍ വാങ്ങി കൂടുതല്‍ ചോദ്യംചെയ്യാനാണ് പോലീസ് നീക്കം.

പിക്കിൾ ബോൾ ടൂർ‌ണമെന്‍റ് ഉദ്ഘാടനം ചെയ്തു

തിരുവല്ല: മാമ്മൻ മത്തായി ഫൗണ്ടേഷൻ രാസലഹരിക്കെതിരേ നടത്തുന്ന സേ നോ ടു ഡ്രഗ്സ്, സേ യേസ് ടു സ്പോർട്സ് പ്രചാരണത്തിന്‍റെ ഭാഗമായി തിരുവല്ല സെന്‍റ് മേരീസ്‌ ടെന്നീസ് ആൻഡ് പിക്കിൾബോൾ അക്കാഡമിയിൽ സംഘടിപ്പിച്ച പിക്കിൾബോൾ ടൂർണമെന്‍റ് മാത്യു ടി. തോമസ് എംഎൽഎ ഉദ്ഘാടനം ചെയ്തു. ജോബ് മൈക്കിൾ എംഎൽഎ ലഹരി വിരുദ്ധ സമ്മേളനത്തിന്‍റെ ഉദ്ഘാടനവും സമ്മാനദാനവും നിർവഹിച്ചു. ടൂർണമെന്‍റിൽ നാല് വിഭാഗങ്ങളിലായി 35 മത്സരാർഥികൾ പങ്കെടുത്തു. ടൂർണമെന്‍റിനു മുന്നോടിയായി മൂന്നാഴ്ചത്തെ സൗജന്യ പിക്കിൾബോൾ പരിശീലന ക്യാമ്പും ഫൗണ്ടേഷൻ സംഘടിപ്പിച്ചിരുന്നു. മാമ്മൻ മത്തായി ഫൗണ്ടേഷന്‍റെ അംഗങ്ങളായ എലിസബത്ത് മാമ്മൻ മത്തായി, ധന്യ മാമ്മൻ മത്തായി, ദീപക് മാമ്മൻ മത്തായി, ചെറിയാൻ പോളച്ചിറക്കൽ, ടി.ഒ. ഏബ്രഹാം, ടി. എം. തോമസ് കുറ്റൂർ, മാത്യൂസ് കെ. ജേക്കബ്, മനോജ് കുറ്റൂർ, സന്തോഷ് തോമസ്, റോബിൻ ജോർജ്, സനൽ ജി. പണിക്കർ, ഡോ.നിജി മനോജ്, നന്ദകുമാർ വർമ, റോയ് കണ്ണോത്ത് എന്നിവർ നേതൃത്വം നൽകി.

നിയന്ത്രണംവിട്ട കാറിടിച്ച് സ്കൂട്ടർ യാത്രക്കാരനും കാൽനടയാത്രികർക്കും പരിക്ക്

പുല്ലാട്: നിയന്ത്രണം വിട്ട കാർ ഇടിച്ച് സ്കൂട്ടർ യാത്രക്കാരനെയും വ്യാപാരിയെയും കാൽനട യാത്രക്കാരെയും ഇടിച്ചു. ഇന്നലെ രാത്രി 7.45 ന് കോഴഞ്ചേരി - കോട്ടയം പാതയിൽ പുല്ലാടിനും വടക്കേ കവല ജംഗ്ഷനും മധ്യേയാണ് അപകടം. പുല്ലാട് ജംഗ്ഷനിൽ നിന്ന് അമിത വേഗത്തിൽ വന്ന വാഗൺ ആർ കാറാണ് എതിർ ദിശയിൽ നിന്ന് വന്ന സ്കൂട്ടർ യാത്രികനായ കുളനട സ്വദേശി ആർ. രാഹുലിനെ (28) ഇടിച്ചു തെറിപ്പിച്ചു. ഗുരുതരമായി പരിക്കേറ്റ ഇതുവഴി വന്ന കെഎസ്ആർടിസി ബസിലാണ് രാഹുലിനെ ആശുപത്രിയിലെത്തിച്ചത്. കോഴഞ്ചേരിയിലെ ജില്ലാ ആശുപത്രിയിലെത്തിച്ചശേഷം പരിക്ക് ഗുരുതരമായതിനാൽ കോട്ടയം മെഡിക്കൽ കോളജിലേക്ക് മാറ്റി. റോഡിന്‍റെ വശത്ത് മരച്ചീനി കച്ചവടം നടത്തുന്നയാളെയും കാർ ഇടിച്ചു. ഇതിനു മുന്പ് കാൽനട യാത്രക്കാരെയും കാൽ ഇടിച്ചു. പരിക്കേറ്റവർ വിവിധ ആശുപത്രികളിൽ ചികിത്സ തേടി.

607 പേർ ദുരിതാശ്വാസ ക്യാന്പുകളിൽ

പത്തനംതിട്ട: മഴക്കെടുതികളേ തുടർന്ന് ജില്ലയില്‍ 19 ദുരിതാശ്വാസ ക്യാമ്പുകളിലായി 607 പേർ. 195 കുടുംബങ്ങളിലെ 237 പുരുഷന്‍മാരും 250 സ്ത്രീകളും 120 കുട്ടികളും ഉള്‍പ്പെടെയാണ് ക്യാന്പുകളിലുള്ളത്. തിരുവല്ല താലൂക്കിലാണ് ഏറ്റവും അധികം ക്യാമ്പുകള്‍. 17 ക്യാമ്പുകളിലായി 182 കുടുംബങ്ങളിലെ 569 പേരാണ് ക്യാന്പുകളിലുള്ളത്. കോഴഞ്ചേരി, അടൂര്‍ താലൂക്കുകളില്‍ ഓരോ ക്യാമ്പുകളുണ്ട്. കോഴഞ്ചേരി താലൂക്കില്‍ വല്ലന എസ്എന്‍ഡിപി യുപിഎസില്‍ 10 കുടുംബങ്ങളിലെ 29 പേരും അടൂര്‍ താലൂക്കില്‍ പന്തളം മുടിയൂര്‍ക്കോണം എംടിഎല്‍പി സ്‌കൂളില്‍ മൂന്ന് കുടുംബങ്ങളിൽ ഒമ്പത് പേരുമാണുള്ളത്.

നഷ്ടപരിഹാരം നൽകണം: കർഷക കോൺഗ്രസ്‌

പത്തനംതിട്ട: പ്രകൃതിക്ഷോഭം മൂലം നഷ്ടമുണ്ടായ മുഴുവൻ കർഷകർക്കും അടിയന്തരമായി നഷ്ടപരിഹാരം നൽകണമെന്ന് കർഷക കോൺഗ്രസ്. കോടിക്കണക്കിനു രൂപയുടെ നാശനഷ്ടമാണ് ഒരാഴ്ച തുടർന്ന് കാറ്റിലും മഴയിലും ഉണ്ടായത്. പടിഞ്ഞാറൻ മേഖലയിൽ നഷ്ടത്തിന്‍റെ കണക്കെടുപ്പ് പൂർത്തിയായിട്ടില്ല. ഓണവിപണി ലക്ഷ്യമിട്ട് ബാങ്ക് വായ്പയെടുത്തും , കെട്ടുതാലി പണയപ്പെടുത്തിയും പണം മുടക്കി കൃഷിയിറക്കിയവർ കണ്ണീരിലായി. ഇൻഷ്വറൻസ് തുക ലഭിച്ചാൽകൂടി നഷ്ടം നികത്താനാവില്ലെന്നു കർഷകർ. വന്യ മൃഗങ്ങളുടെ ആക്രമണത്താൽ കൃഷി ഉപേക്ഷിക്കേണ്ട അസ്ഥയിലാണ് കർഷകർ. ഇതിനിടെയിലാണ് പ്രകൃഷിക്ഷോഭം മൂലം നഷ്ടമുണ്ടാകുന്നത്. കർഷകരുടെ ദുരവസ്ഥയ്ക്കു പരിഹാരം കാണണമെന്നും കൃഷി നാശം സംഭവിച്ച മുഴുവൻ കർഷകർക്കും അടിയന്തരമായി അവരുടെ നഷ്ടത്തിന് ആനുപാതികമായ നഷ്ട പരിഹാരം ഉടൻ നൽകണമെന്നും വന്യമൃഗങ്ങളുടെ ആക്രമണങ്ങൾക്ക് ശാശ്വത പരിഹാരം ഉണ്ടാകണമെന്നും കർഷക കോൺഗ്രസ്‌ സംസ്ഥാന വൈസ് പ്രസിഡന്‍റ് സുരേഷ് കോശി, സെക്രട്ടറി ജോജി ഇടക്കുന്നിൽ എന്നിവർ ആവശ്യപ്പെട്ടു.

കാലവർഷക്കെടുതി: നഷ്ടപരിഹാര വിതരണം വേഗത്തിലാക്കണമെന്ന് ഡിസിസി

പത്തനംതിട്ട: കാറ്റും പേമാരിയും മൂലം ജില്ലയില്‍ വീട് നഷ്ടപ്പെട്ടവര്‍ക്കും കൃഷിനാശം സംഭവിച്ച കര്‍ഷകര്‍ക്കും അടിയന്തര ദുരിതാശ്വാസ സഹായം എത്തിക്കണമെന്ന് ജില്ലയിലെ കോണ്‍ഗ്രസ് ബ്ലോക്ക് പ്രസിഡന്‍റുമാരുടെ നേതൃയോഗം ആവശ്യപ്പെട്ടു. കാറ്റിലും മഴയിലും വൻ നാശനഷ്ടമാണ് ജില്ലയിലുണ്ടായത്. കോടിക്കണക്കിനു രൂപയുടെ കൃഷിനാശമുണ്ടായി. നൂറു കണക്കിനു വീടുകൾ താമസയോഗ്യമല്ലാതായി. ജനങ്ങളുടെ ബുദ്ധിമുട്ടുകൾ നേരിൽക്കാണാൻ പോലും ജനപ്രതിനിധികൾ തയാറാകാത്തത് ഖേദകരമാണെന്ന് യോഗം അഭിപ്രായപ്പെട്ടു. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പില്‍ അധ്യക്ഷത വഹിച്ചു. ഡിസിസി ഭാരവാഹികളായ എ. സുരേഷ് കുമാർ, സാമുവല്‍ കിഴക്കുപുറം, സജി കൊട്ടയ്ക്കാട്, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റുമാരായ സഖറിയ വര്‍ഗീസ്, പ്രഫ. പി.കെ. മോഹന്‍രാജ്, കെ. ശിവപ്രസാദ്, ജെറി മാത്യു സാം, ദീനാമ്മ റോയി, ആർ. ദേവകുമാര്‍, സിബി താഴത്തില്ലത്ത്, ബിനു. വി. ഈപ്പൻ, ബിനു കളിക്കല്‍, അനില്‍ തോമസ് നെടുമ്പള്ളില്‍ എന്നിവര്‍ പ്രസംഗിച്ചു.

മഴക്കാലപൂർവ ശുചീകരണം പാളി; വെള്ളക്കെട്ട് ഒഴിയാതെ അപ്പർകുട്ടനാട്

തിരുവല്ല: മഴക്കാല പൂർവ ശുചീകരണ പ്രവർത്തനങ്ങൾ പാളി, പടിഞ്ഞാറൻ മേഖലകളിൽ വെള്ളക്കെട്ട് ഒഴിയുന്നില്ല. പ്രളയം നേരിട്ട താഴ്ന്ന പ്രദേശങ്ങളിലാകെ വെള്ളമിറങ്ങാതെ വെള്ളക്കെട്ട് ഭീഷണി തുടരുകയാണ്. കടൽ ശാന്തമായിരുന്നതിനാലും തോട്ടപ്പള്ളി സ്പിൽവേ വഴി കൂടുതൽ വെള്ളം ഇറങ്ങിപ്പോകുന്നതിനാലും മഴക്കെടുതിയിലെ വെള്ളക്കെട്ടും വേഗത്തിൽ ഒഴിയേണ്ടതായിരുന്നു. നിരത്തുകളിലും കാനകളിലും മറ്റും ചപ്പു ചവറുകളും മണ്ണും ചെളിയും വന്ന് നിറഞ്ഞപ്പോൾ ഒഴുകിപ്പോകാനിടമില്ലാതെ വെള്ളം സ്ഥാപനങ്ങളുടെയും വീടുകളുടെയും പരിസരങ്ങളിൽ കെട്ടിക്കിടക്കുകയാണ്. വെള്ളക്കെട്ട് ഒഴിയാത്തത് പകർച്ചവ്യാധികളും മറ്റ് രോഗങ്ങളും വ്യാപകമാകാനുമിടയാകും. താലൂക്ക് ആശുപത്രികളിലും പ്രാഥമികാരോഗ്യ കേന്ദ്രങ്ങളിലും പനി, ചുമ , ത്വക് രോഗം തുടങ്ങിയവ ബാധിച്ചു ചികിത്സ തേടുന്നവരുടെ എണ്ണവും ഗണ്യമായി വർധിച്ചിട്ടുണ്ട്. മഴക്കാലം ആരംഭിച്ചതിനു പിന്നാലെ തുടങ്ങിയ പകർച്ചപ്പനിയെ ലാഘവത്തോടെയാണ് അധികൃതരും സമീപിച്ചിരിക്കുന്നത്. ഇതേ സമയം കോവിഡ് രോഗികൾ വർധിക്കുന്നുണ്ടങ്കിലും ഇതു സംബന്ധിച്ച ഒരു കണക്കും അധികൃതർ പുറത്തുവിടുന്നില്ല. കോവിഡ് ബാധിതരും പകർച്ചപ്പനിയെന്ന ലാഘവത്തിൽ മറ്റുള്ളവരുമായി ഇടപഴകുന്ന സാഹചര്യം സംജാതമായാൽ സ്ഥിതിഗതികൾ ഗുരുതരമാകും. പകർച്ചപ്പനി ബാധിതരായി എത്തുന്നവരിൽ ഏറെപ്പേരെയും കോവിഡ് പരിശോധനക്ക് വിധേയമാക്കുന്നില്ലെന്ന് ആരോഗ്യ മേഖലയിൽ ഉള്ളവർ തന്നെ ചൂണ്ടിക്കാട്ടുന്നു. ശുചീകരണവും നിലച്ചു ഡെങ്കിപ്പനിയും എലിപ്പനിയും പടരാനിടയാക്കുന്ന ഗുരുതരമായ സാഹചര്യം നിലനിൽക്കുമ്പോൾ അപ്പർകുട്ടനാടൻ മേഖലകളിൽ ക്ലോറിനേഷനും പരിസര ശുചീകരണത്തിനും ആവശ്യമായ മരുന്നുകൾ തദ്ദേശ സ്ഥാപനങ്ങൾ വിതരണം ചെയ്തിട്ടില്ല. വെള്ളംകെട്ടിക്കിടക്കുന്ന സ്ഥലങ്ങളിലെ കുടിവെള്ളം ഇതിനകം മലിനമായിട്ടുണ്ട്. പലയിടത്തും കിണറുകളും ശൗചാലയ ടാങ്കുകളും നിറഞ്ഞു കവിഞ്ഞിരുന്നു. ഇവ പരസ്പരം കൂടിക്കലർന്ന് കുടിവെള്ളം മലിനപ്പെട്ടിരിക്കുകയാണ്. ഇഴജന്തുക്കളും പക്ഷികളും അടക്കം മഴക്കെടുതിയിൽ ചത്തൊടുങ്ങിയവയുടെ അവശിഷ്ടങ്ങൾ ഒഴുകിയെത്തി ജലസ്രോതസുകളിൽ വന്നടിയുന്നുണ്ട്. മുൻകരുതലുകളോ ആരോഗ്യസുരക്ഷാ ക്രമീകരണങ്ങളോ നടത്താൻ പ്രാദേശിക ഭരണകൂടങ്ങൾ ഇനിയും തയാറായിട്ടില്ല. വില്ലേജ് ഓഫീസും കൃഷിഭവനും വെള്ളത്തിൽ പെരിങ്ങര വില്ലേജ് ഓഫീസ്, നെടുമ്പ്രം, പെരിങ്ങര കൃഷി ഭവനുകൾ എന്നിവിടങ്ങളിൽ വെള്ളമിറങ്ങാതെ പ്രവർത്തിക്കാൻ കഴിയാത്ത സ്ഥിതിയാണ്. വെള്ളം കയറിയതിനു പിന്നാലെ രണ്ട് ഓഫീസുകളുടെയും പ്രവർത്തനം മാറ്റിയിരുന്നു. വില്ലേജ് ഓഫീസ് താലൂക്ക് ഓഫീസിനോടു ചേർന്നു കൃഷി ഭവൻ തിരുവല്ലയിലെ അസിസ്റ്റന്‍റ് ഡയറക്ടർ ഓഫീസിനോടു ചേർന്നുമാണ് താത്കാലികമായി പ്രവർത്തിക്കുന്നത്. മഴക്കെടുതിയിൽ വീടുകൾക്കും കെട്ടിടങ്ങൾക്കുമുണ്ടായ നഷ്ടം വില്ലേജ് ഓഫീസിലും കാർഷികനഷ്ടം കൃഷിഭവനിലും റിപ്പോർട്ട് ചെയ്യേണ്ടതുണ്ട്. എന്നാൽ ഓഫീസുകൾ വെള്ളക്കെട്ടിലായതോടെ ഇവയുടെ തുടർ പ്രവർത്തനങ്ങൾക്ക് ഓഫീസ് സേവനം ലഭിക്കാൻ ബുദ്ധിമുട്ടുണ്ട്. വെള്ളം ഇറങ്ങാത്തതിനാൽ കാർഷിക നഷ്ടത്തിന്‍റെ പ്രാഥമിക കണക്കുപോലും എടുക്കാനായിട്ടില്ല. ഏത്തവാഴ, നെല്ല്, പച്ചക്കറികൾ അടക്കം വൻ നഷ്ടമാണ് കാർഷിക മേഖലയ്ക്കുണ്ടായിരിക്കുന്നത്. താഴ്ന്ന പുരയിടങ്ങളിൽ അഞ്ച് ദിവസങ്ങളിലായി മഴവെള്ളം കെട്ടിക്കിടക്കുന്നതുമൂലം കൃഷിനാശം വൻതോതിലാണ്. തോട്ടപ്പള്ളി സ്പിൽവേയിൽ വെള്ളം ഒഴുകിപ്പോകാൻ സംവിധാനമൊരുക്കിയത് വെള്ളക്കെട്ട് രൂക്ഷമാകാതിരിക്കാൻ ഇടയാക്കിയെന്ന് നാട്ടുകാർ പറയുന്നു.. കൂടാതെ താഴ്ന്ന പുരയിടങ്ങളിൽ അഞ്ച് ദിവസങ്ങളിലായി മഴവെള്ളം കെട്ടിക്കിടക്കുന്നുമൂലം വൻതോതിൽ കൃഷി നാശം ഉണ്ടായിട്ടുണ്ട്.

പ്രവേശനം ഉത്സവമാക്കി ഇൻഫന്‍റ് ജീസസ് സെൻട്രൽ സ്കൂൾ

തുവയൂർ: ഇൻഫന്‍റ് ജീസസ് സ്കൂളിലെ പ്രവേശനോത്സവം അടൂർ എൻജിനിയറിംഗ് കോളജ് പ്രിൻസിപ്പൽ ഡോ.ജോൺ ജോർജ് ഉദ്ഘാടനം ചെയ്തു. സ്കൂൾ ഡയറക്ടർ ഫാ. ജോബിൻ ജോസ് പുളിവിള അധ്യക്ഷത വഹിച്ചു. സ്കൂൾ അസിസ്റ്റന്റ് ഡയറക്ടർ ഫാ. സക്കറിയ പുത്തൻപുരയ്ക്കൽ, പ്രിൻസിപ്പൽ ‌ സിസ്റ്റർ ഷീജ എസ് സിവി, വൈസ് പ്രിൻസിപ്പൽ റീന ഡാനിയേൽ, നഴ്സറി സ്കൂൾ പ്രിൻസിപ്പൽ സിസ്റ്റർ നാൻസി എസ് സിവി, പിടിഎ പ്രസിഡന്‍റ് ഷാജി നെടുമ്പുറത്ത് തുടങ്ങിയവർ പ്രസംഗിച്ചു. കുട്ടികളുടെ കലാപരിപാടികൾ പ്രവേശനോത്സവത്തെ വർണാഭമാക്കി.

നിയന്ത്രണം വിട്ട പിക്കപ്പ് ഇടിച്ച് കാൽനട യാത്രക്കാരി മരിച്ചു

അടൂർ: നിയന്ത്രണം വിട്ട പിക്കപ്പിടിച്ച് കാൽനട യാത്രക്കാരി മരിച്ചു. അടൂർ പള്ളിക്കൽ മറ്റാന്‍റയ്യത്ത് രാധാമണിയമ്മയാണ് (78) മരിച്ചത്. ഇന്നലെ രാവിലെ 11ന് ആനയടി- കൂടൽ റോഡിൽ മേക്കുന്നുമുകൾ പാലത്തിലായിരുന്നു അപകടം. ആനയടി ഭാഗത്തു നിന്നും പഴകുളത്തേക്ക് വരികയായിരുന്ന തമിഴ്നാട് രജിസ്ട്രേഷൻ പിക്കപ്പ് നിയന്ത്രണം വിട്ട് ആദ്യം പാലത്തിന്‍റെ തൂണിൽ ഇടിച്ചു. തുടർന്ന് മുമ്പോട്ടു നീങ്ങിയ പിക്കപ്പ് നടന്നു പോകുകയായിരുന്ന രാധാമണിയമ്മയെ ഇടിക്കുകയായിരുന്നു. ഗുരുതര പരിക്കേറ്റ ഇവരെ അടൂർ ജനറൽ ആശുപത്രിയിൽ എത്തിച്ചെങ്കിലും മരിച്ചു. ഭർത്താവ്: പരേതനായ ശിവരാമൻ. മക്കൾ: എം.എസ്. പിള്ള, സുരേഷ് കുമാർ. മരുമക്കൾ: സുപ്രീയ,സീമ. സംസ്കാരം ഇന്ന് രണ്ടിന് വീട്ടുവളപ്പിൽ.

സ്കൂളുകളിൽ പരാതിപ്പെട്ടി സ്ഥാപിച്ച് പോലീസ്

പുല്ലാട്: സ്കൂൾ പ്രൊട്ടക്‌ഷൻ ഗ്രൂപ്പി(എസ് പി ജി)ന്‍റെ ആഭിമുഖ്യത്തിൽ കുട്ടികൾക്കായുള്ള പരാതിപ്പെട്ടിയുടെയും ജില്ലാതല ലഹരി വിരുദ്ധ ബോധവത്കരണ പരിപാടിയുടെയും ഉദ്ഘാടനം പുല്ലാട് വിവേകാനന്ദ ഹൈസ്കൂളിൽ നടന്നു. പരാതിപ്പെട്ടിയുടെ ഉദ്ഘാടനം നർക്കോർട്ടിക് സെൽ ഡിവൈഎസ്പി ബി. അനിൽ നിർവഹിച്ചു. ലഹരിക്കെതിരേയുള്ള ബോധവത്കരണ ക്ലാസും അദ്ദേഹം നയിച്ചു. പ്രവേശനോത്സവം ഡോ.യുയാക്കിം മാർ കൂറിലോസ് സഫ്രഗൻ മെത്രാപ്പോലീത്ത ഉദ്ഘാടനം ചെയ്തു. എസ്പിസി ഗാർഡിയൻ പ്രസിഡന്റ്‌ ജയദേവദാസ് അധ്യക്ഷത വഹിച്ചു. ഹെഡ്മാസ്റ്റർ സുധീർ ചന്ദ്രൻ, കോയിപ്രം ഗ്രാമപഞ്ചായത്ത്‌ പ്രസിഡന്റ്‌ പി. സുജാത, കോയിപ്രം എസ്എച്ച്ഒ ജി. സുരേഷ് കുമാർ, വാർഡ് മെംബർ ലിജോയ് കുന്നപ്പുഴ, പിടിഎ പ്രസിഡന്റ്‌ കെ. ജി രാജേന്ദ്രൻ നായർ, ജി. സുരേഷ് കുമാർ , ബിന്ദു കെ. നായർ എന്നിവർ പ്രസംഗിച്ചു.

പ്രവേശനോത്സവത്തിനു കൈത്താങ്ങായി എംസിവൈഎം

പത്തനംതിട്ട: പുതിയ അധ്യയന വർഷ ആരംഭവുമായി ബന്ധപ്പെട്ട് അക്ഷര ലോകത്തേക്ക് കടന്നു വരുന്ന പ്രതിഭകൾക്കായി വിവിധ പ്രവർത്തനങ്ങളുമായി എംസിവൈഎം പത്തനംതിട്ട രൂപതയിലെ അഞ്ച് വൈദിക ജില്ലകളും രൂപതയിലെ 100 യൂണിറ്റുകളും. പ്രവേശനോത്സവവുമായി ബന്ധപ്പെട്ട് പത്തനംതിട്ട രൂപതയിലെ വിവിധ പ്രദേശങ്ങൾ കേന്ദ്രികരിച്ച് സ്കൂൾ പരിസരങ്ങൾ വൃത്തിയാക്കൽ, അടിസ്ഥാന സൗകര്യങ്ങൾ മെച്ചപ്പെടുത്തൽ, ആയിരത്തോളം സ്കൂൾ കിറ്റ് വിതരണങ്ങൾ, പ്രവേശനോത്സവങ്ങൾ, ഗ്രീറ്റിംഗ് കാർഡ് വിതരണങ്ങൾ, ലഹരിക്കെതിരേ ബോധവത്കരണം തുടങ്ങി വിവിധ പ്രവർത്തനങ്ങളാണ് മലങ്കര കത്തോലിക്ക യുവജന പ്രസ്ഥാനത്തിന്‍റെ നേതൃത്വത്തിൽ നടന്നത്. പത്തനംതിട്ട ഭദ്രാസനത്തിലെ കോന്നി,പത്തനംതിട്ട, പന്തളം, സീതത്തോട്, റാന്നിപെരുനാട് എന്നീ വൈദിക ജില്ലകളാണ് യൂണിറ്റുകളെ ഏകോപിപ്പിച്ചു കൊണ്ട് പരിപാടികൾ സംഘടിപ്പിച്ചത്. പത്തനംതിട്ട രൂപതയുടെ കീഴിൽ പ്രവർത്തിക്കുന്ന എംസിവൈഎം യൂണിറ്റുകളും വൈദിക ജില്ലാ ഘടകങ്ങളും അവരുടെ പ്രാദേശികമായ പ്രദേശങ്ങൾ കേന്ദ്രീകരിച്ചുകൊണ്ടാണ് സ്കൂൾ പ്രവേശനോത്സവവുമായി ബന്ധപ്പെട്ട പ്രവർത്തനങ്ങൾ സംഘടിപ്പിച്ചത്.

അക്ഷരലോകത്തേക്കും മൂവർ ഒന്നിച്ച്

അടൂർ: ഒന്നിച്ചെത്തിയ മൂന്നംഗസംഘം അക്ഷര ലോകത്തേക്ക്. തുവയൂർ ഇൻഫന്‍റ് ജീസസ് സെൻട്രൽ സ്കൂളിൽ ഇന്നലെ ഒന്നാം ക്ലാസിൽ പ്രവേശനം നേടിയ ഇവ, ആത്മിക, ദിയ എന്നിവർ സഹോദരങ്ങളാണ്. മണ്ണടി കല്ലുവിളയത്തില്‍ ബിജോയ്‌സില്‍ ബിനോയി ജോണ്‍സണ്‍, ജിഷ റെയ്ച്ചല്‍ ജോര്‍ജ് ദമ്പതികളുടെ മക്കളായ ഇവർ ഒറ്റപ്രസവത്തിൽ പിറന്നവരാണ്. കെജി ക്ലാസിലും ഒന്നിച്ചായിരുന്ന ഇവർ സ്കൂളിൽ ഏറെ പ്രിയപ്പെട്ടവരായിരുന്നു. മാനേജർ ഫാ.ജോബിൻ ജോസ് പുളിവിളയിൽ, ഹെഡ്മിസ്ട്രസ് സിസ്റ്റർ ഷീജ എസ് സിവി എന്നിവർ ചേർന്നു കുട്ടികളെ സ്വീകരിച്ചു. മണക്കാല എൻജിനിയറിംഗ് കോളജിലെ പ്രഫ. ജോൺ ജോർജ് പ്രവേശനോത്സവം ഉദ്ഘാടനം ചെയ്തു.

ജനറൽ ആശുപത്രിയിൽ വേണ്ടിവരുന്നത് താത്കാലിക ക്രമീകരണം മാത്രമെന്ന് മന്ത്രി

പത്തനംതിട്ട: ജനറൽ ആശുപത്രിയുടെ ബി ആൻഡി സി ബ്ലോക്കിന്‍റെ അറ്റകുറ്റപ്പണി നടത്തുന്ന ഘട്ടത്തിലേക്ക് ബന്ധപ്പെട്ട കമ്മിറ്റികളുടെ നിർദേശപ്രകാരമുള്ള താത്കാലിക ക്രമീകരണങ്ങൾ മാത്രമാണ് നടത്തുന്നതെന്ന് മന്ത്രി വീണാ ജോർജ്. കോന്നി മെഡിക്കൽ കോളജിലേക്ക് ശസ്ത്രക്രിയ വിഭാഗങ്ങൾ മാറ്റേണ്ടത് ഈ ഘട്ടത്തിൽ അനിവാര്യമാണ്. ബി ആൻഡ് സി ബ്ലോക്കിന്‍റെ ദുർബലാവസ്ഥ ആർക്കും ബോധ്യപ്പെടും. ഇത് അടിയന്തരമായി നവീകരിക്കേണ്ടതുണ്ട്. ശോച്യാവസ്ഥയിലായ കെട്ടിടം നവീകരിക്കേണ്ടതില്ലെന്നു പറയുന്ന യുഡിഎഫ് നിലപാട് വികസന വിരുദ്ധമാണ്. 19 വർഷം പഴമുള്ള കെട്ടിടമാണ്‌ ദുർബലാവസ്ഥ നേരിടുന്നത്. കെട്ടിടത്തിന്‍റെ തൂണുകൾക്ക്‌ ബലക്ഷയം ഉണ്ടായിരിക്കുകയാണ്‌. ഇത്‌ സാങ്കേതിക വിദഗ്ധരടക്കമുള്ള സമിതി പരിശോധിച്ചു. തുടർന്നാണ് കെട്ടിടത്തിന്‍റെ അറ്റകുറ്റപ്പണി നടത്തണമെന്ന്‌ നിർദേശിച്ചത്‌. പില്ലറുകൾ ദ്രവിച്ച്‌ കമ്പി തെളിഞ്ഞിരിക്കുകയാണ്‌. പലഭാഗങ്ങളിലും കോൺക്രീറ്റ്‌ അടർന്ന്‌ മാറിയിരിക്കുകയാണ്‌. ശൗചാലയങ്ങൾ ഉപയോഗശൂന്യമാണ്. പലയിടത്തും വെള്ളം ഒലിച്ചിറങ്ങുന്ന സ്ഥിതിയുണ്ട്. ബി ആൻഡ്‌ സി ബ്ലോക്കിന്‍റെ ഏറ്റവും മുകളിലത്തെ നിലയിലുള്ള ഓപ്പറേഷൻ തീയേറ്റർ ചോർന്നൊലിക്കുന്നു. അപടകരമായ നിലയിലാണ് കെട്ടിടഭാഗങ്ങളുള്ളത്‌. കെട്ടിട ഭാഗങ്ങളുടെ സാമ്പിൾ ശേഖരിച്ച്‌ ശാസ്‌ത്രീയമായ പരിശോധന നടത്തി. തുടർന്നാണ് കെട്ടിടത്തിന്‌ അറ്റകുറ്റപ്പണി അനിവാര്യമായി വന്നത്‌. ഓപ്പറേഷൻ തിയേറ്റർ ഉൾപ്പെടുന്ന ഏറ്റവും മുകളിലത്തെ നിലയും തൊട്ടുതാഴത്തെ നിലയിലെ വാർഡുമാണ് അറ്റകുറ്റപ്പണി നടത്തുന്നത്. മൂന്ന്‌ മാസത്തിനകം പണി പൂർത്തിയാക്കാനാണ് ആലോചിച്ചിരിക്കുന്നത്‌. ഒപി വിഭാഗം ജനറൽ ആശുപത്രിയിൽ തുടരും. ശസ്ത്രക്രിയ വേണ്ടിവരുന്നവരെ ജനറൽ ആശുപത്രിയിൽനിന്ന്‌ കോന്നിയിലേക്ക്‌ രോഗികളെ കൊണ്ടുപോകാനും സംവിധാനം ഏർപ്പെടുത്തും. അറ്റകുറ്റപ്പണിയുമായി ബന്ധപ്പെട്ട് ആശുപത്രിയിൽ ഏർപ്പെടുത്തേണ്ട ക്രമീകരണങ്ങളിൽ എച്ച്എംസി യോഗം തീരുമാനമെടുക്കും. യുഡിഎഫിന്‍റെത്‌ വിചിത്രമായ വാദം രോഗികളുടെയും കൂട്ടിരുപ്പുകാരുടെയും സുരക്ഷ കണക്കാക്കി നടത്താൻ പോകുന്ന അറ്റകുറ്റപ്പണികൾ വേണ്ടയെന്ന യുഡിഎഫിന്‍റെ വാദം വിചിത്രമെന്ന് മന്ത്രി പറഞ്ഞു. നിർമാണം നടക്കാത്തതിനെതിരേയാണ് സാധാരണ സമരം നടക്കുന്നത്‌. ഇവിടെ നിർമാണം നടത്തരുതെന്ന്‌ യുഡിഎഫ്‌ പറയുന്നു. കെട്ടിടത്തിന്‍റെ ശോച്യാവസ്ഥ മനസിലാക്കി അടിയന്തരമായി അറ്റകുറ്റപ്പണി നടത്തണമെന്ന നിർദേശത്തിനലാണ് പണികൾ ആരംഭിക്കുന്നത്‌. ഇതിനായി ഒരു കോടി രൂപയും അനുവദിച്ചു. ജില്ലാ പഞ്ചായത്ത്‌ പ്രസിഡന്‍റ് ജോർജ്‌ ഏബ്രഹാം, സ്റ്റാൻഡിംഗ് കമ്മിറ്റി ചെയർമാൻ ആർ. അജയകുമാർ, ആശുപത്രി സൂപ്രണ്ട്‌ ഡോ. എം. ഷാനി, ആർഎംഒ ഡോ. ദിവ്യ ആർ. ജയൻ തുടങ്ങിയവർ മന്ത്രിക്കൊപ്പം ഉണ്ടായിരുന്നു.

എട്ടാംതരം മലയാളം പാഠാവലിയിൽ സ്വാധീനമായും പത്തനംതിട്ട

പത്തനംതിട്ട: മാതൃഭാഷയോടും സാംസ്കാരിക കാവ്യ സന്പത്തിനോടും അഭിനിവേശവും സ്നേഹവും പുലർത്തി സ്വന്തം നാടിനും പങ്കാളിത്തം നൽകിയാണ് എട്ടാംക്ലാസിലെ മലയാളം പാഠാവലി തയാറാക്കിയത്. പത്തനംതിട്ടയുമായി ബന്ധമുള്ള നാല് അധ്യാപകരാണ് എട്ടാംതരം മലയാളം പുസ്തകത്തിന്‍റെ രചന നിർവഹിക്കാനുള്ള സമിതിയിൽ അംഗങ്ങളായിരുന്നത്. പത്തനംതിട്ട സെന്‍റ് മേരീസ് ഹൈസ്കൂളിലെ ഭാഷാധ്യാപകൻ ബിനു കെ. സാം, മാങ്കോട് ഗവ. ഹയർ സെക്കൻഡറി സ്കൂളിലെ അധ്യാപികയും പെരുമൺ സ്വദേശിനിയുമായ എസ്. സൗമ്യ എന്നിവരാണ് സമിതിയിൽ ജില്ലയിലെ സ്കൂളുകളിൽ നിന്നുൾപ്പെട്ടത്. പത്തനംതിട്ട കോന്നി സ്വദേശി ഡോ.ആർ. പ്രിയ (എംഎസ്എം എച്ച്എസ്എസ്, കായംകുളം), പത്തനംതിട്ട കൊന്നമൂട് സ്വദേശി നെജീന നാസർ (ഗവ. എച്ച്എസ്എസ്, കാച്ചാണി) എന്നിവരും സമിതിയംഗങ്ങളായിരുന്നു. എസ് സിഇആർടി റിസർച്ച് ഓഫീസർ ഡോ.എം.ടി. ശശിയുടെ മേൽനോട്ടത്തിൽ ഡോ.അനിൽ വള്ളത്തോൾ ഉപദേശകനായും ഡോ.പി. സത്യനേശൻ ചെയർമാനുമായാണ് പാഠപുസ്തക രചന നടത്തിയത്. നിത്യജീവിതവുമായി കുട്ടികളെ ചേർത്തു നിർത്താൻ കഴിയുന്ന തരത്തിലുള്ള ആശയങ്ങൾ ചെറുഭാഗങ്ങളായി തയാറാക്കിയതാണ് പുസ്തകരചനയിലെ പുതുമയെന്ന് സമിതിയംഗം ബിനു കെ. സാം പറഞ്ഞു. സങ്കീർണമായ പാഠങ്ങൾ കുട്ടികളെ ഭാഷാ പഠനത്തിൽ നിന്നകറ്റുമെന്നതും സമിതി പ്രത്യേകം നിരീക്ഷിച്ചിരുന്നു. വ്യാകരണം കഥകളിലൂടെ പറയുന്ന നിപ്രസം ഉപ്രസം ആ എന്ന വ്യാകരണ ഗ്രന്ഥത്തിന്‍റെ രചയിതാവ് കൂടിയായ ബിനു കെ.സാം ഭാഷാ പഠനത്തെ ലഘൂകരിക്കുകയെന്ന ആശയത്തിന്‍റെ ഉടമകൂടിയാണ്. കൃഷിയും സംസ്കാരവും കലയും സ്ത്രീ ശക്തീകരണവും അടിസ്ഥാന വർഗ സംരക്ഷണവും എല്ലാം കോർത്തിണക്കിയാണ് പുസ്തകം പുറത്തിറക്കിയത്. വി. സാംബശിവന്‍റെ ആയിഷയുടെ കഥാപ്രസംഗഭാഗം പുസ്തകത്തിന്‍റെ ഭാഗമായത്, അന്യംനിന്നു പോകുന്ന ഒരു കലയെ പുതിയ തലമുറയ്ക്ക് പരിചയപ്പെടുത്തുകയെന്ന ലക്ഷ്യത്തോടെയാണ്. ഒപ്പം വയലാറിന്‍റെ ആയിഷ എന്ന കഥാപാത്രത്തിനു കുട്ടികളുടെ മനസിൽ ഇടവും കണ്ടെത്താനാകും. കെ.ആർ. മീരയുടെ ആരാച്ചാരുടെ തുടക്കം, മസാല യൂസഫ് സായിയുടെ പ്രസംഗ ഭാഗം പി. പത്മരാജന്‍റെ തിങ്കളാഴ്ച നല്ലദിവസം തിരക്കഥ എന്നിവ അതത് മേഖലകളിൽ കുട്ടികളെ പ്രാപ്തരാക്കാൻ പ്രേരണ നൽകും. മലയാളത്തിന്‍റെ പ്രിയപ്പെട്ട ഉള്ളൂർ, അക്കിത്തം, ഒഎൻവി, എ.അയ്യപ്പൻ എന്നിവരുടെ കവിതകളും ഉൾപ്പെടുന്നുണ്ട്. കടമ്മനിട്ടയുടെ കുറത്തി ഉൾപ്പെടുത്താനായത് പത്തനംതിട്ടക്കാരായ സമിതിയംഗങ്ങളുടെ നേട്ടമായി. ഇതിലൂടെ കീഴാള ജനതയുടെ അതിജീവനത്തിന്‍റെ അനിവാര്യത പുതുതലമുറയുടെ ഉള്ളിൽ നിറയ്ക്കുമെന്നും സമിതിയംഗങ്ങൾ വിലയിരുത്തി.

ഉപ്പുമാവിനു പകരം ബിരിയാണി; ശങ്കുവിന്‍റെ ആഗ്രഹം സാധിച്ച് മന്ത്രി

പത്തനംതിട്ട: അങ്കണവാടിയില്‍ ഉപ്പുമാവിന് പകരം ബിരിയാണി വേണമെന്ന ശങ്കുവിന്‍റെ ആഗ്രഹം സാധിച്ച് മന്ത്രി വീണാ ജോര്‍ജ്. മന്ത്രി പറഞ്ഞതു പ്രകാരം അങ്കണവാടി കുട്ടികള്‍ക്കുള്ള ഭക്ഷണ മെനു വനിത ശിശുവികസന വകുപ്പ് പരിഷ്‌കരിച്ചു. അങ്കണവാടി വിദ്യാർഥിയായ ശങ്കുവിന്‍റെ വീഡിയോ ശ്രദ്ധയില്‍പെട്ട മന്ത്രി ഭക്ഷണ മെനു പരിശോധിക്കുമെന്ന് ഉറപ്പ് നല്‍കിയിരുന്നു. തുടര്‍ന്ന് വനിത ശിശുവികസന വകുപ്പ് വിവിധ തലങ്ങളില്‍ യോഗം ചേര്‍ന്ന് കുട്ടികളുടെ ആരോഗ്യം ഉറപ്പ് വരുത്തി ഭക്ഷണ മെനു പരിഷ്‌കരിച്ചത്. ‌അങ്കണവാടി പ്രവേശനോത്സവത്തിന്‍റെ സംസ്ഥാനതല ഉദ്ഘാടനം മെഴുവേലി മുള്ളന്‍വാതുക്കല്‍ 72 ാം നന്പർ അങ്കണവാടിയിൽ ഇന്നലെ മന്ത്രി വീണാ ജോർജ് നിർവഹിച്ചു. അങ്കണവാടിയില്‍ നിന്ന് ഈ അധ്യയന വര്‍ഷം സ്‌കൂളിലേക്ക് പോകുന്ന കരുന്നുകള്‍ക്കായി പ്രത്യേക പരിപാടിയും ഇതോടനുബന്ധിച്ചു നടന്നു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിച്ചു. വനിത ശിശുവികസന വകുപ്പ് ഡയറക്ടര്‍ ഹരിത വി. കുമാർ, ജില്ലാ കളക്ടര്‍ എസ്. പ്രേംകൃഷ്ണൻ, പന്തളം ബ്ലോക്ക് പഞ്ചായത്ത് പ്രസിഡന്‍റ് ബി. എസ്. അനീഷ് മോൻ, മുൻ എംഎൽഎ കെ.സി. രാജഗോപാലൻ, മെഴുവേലി ഗ്രാമപഞ്ചായത്ത് പ്രസിഡന്‍റ് പിങ്കി ശ്രീധര്‍, ബ്ലോക്ക് പഞ്ചായത്ത് വൈസ് പ്രസിഡന്‍റ് അശ്വതി വിനോജ്, ജില്ലാ പഞ്ചായത്ത് ആരോഗ്യ, വിദ്യാഭ്യാസ സ്ഥിരം സമിതി ചെയര്‍മാന്‍ ആർ. അജയകുമാര്‍, ക്ഷേമകാര്യ സ്ഥിരം സമിതി ചെയര്‍മാന്‍ ജിജി മാത്യു, ബ്ലോക്ക് പഞ്ചായത്ത് സ്ഥിരം സമിതി ചെയര്‍മാന്‍മാരായ പോള്‍ രാജൻ, ലാലി ജോണ്‍, വി. എം മധു, ഗ്രാമപഞ്ചായത്ത് വൈസ് പ്രസിഡന്‍റ് അനില ചെറിയാന്‍, ഉദ്യോഗസ്ഥര്‍ തുടങ്ങിയവര്‍ പ്രസംഗിച്ചു. കുന്പഴ അങ്കണവാടിയിൽ പത്തനംതിട്ട: നഗരസഭ പതിനാറാം വാർഡ് 95ാം നമ്പര്‍ അങ്കണവാടിയിൽ പ്രവേശനോത്സവം നഗരസഭ ആരോഗ്യകാര്യ സ്ഥിരം സമിതി അധ്യക്ഷൻ ജെറി അലക്സ്‌ ഉദ്ഘാടനം ചെയ്തു. കൗൺസിലറുടെ കൈത്താങ്ങ് പദ്ധതിയിലൂടെ ബാഗും ബുക്കുകളും പഠനോപകരണങ്ങളും മധുരവും അടങ്ങുന്ന കിറ്റുകൾ കുട്ടികൾക്ക് നൽകി. അങ്കണവാടി അധ്യാപിക ശാന്തകുമാരി, വർക്കർ ഗിരിജാമ്മാൾ, സിഡിഎസ് മെംബർ സന്ധ്യ പനക്കൽ, എഡിഎസ്‌ പ്രസിഡന്‍റ് ഉഷ ചന്ദ്രൻ എന്നിവർ പ്രസംഗിച്ചു. റാന്നി പഴവങ്ങാടിയിൽ റാന്നി: പഴവങ്ങാടി ഗ്രാമപഞ്ചായത്ത് പത്താം വാർഡിൽ 65 ാം നമ്പർ അങ്കണവാടിയിൽ പഞ്ചായത്ത് തല പ്രവേശനോത്സവം ഗ്രാമപഞ്ചായത്ത് വാർഡ് മെംബർ അനിത അനിൽകുമാർ ഉദ്ഘാടനം ചെയ്തു. അങ്കണവാടി ജാഗ്രത സമിതി അംഗം ജോളി ജോസഫ് അധ്യക്ഷത വഹിച്ചു. കുട്ടികൾക്ക് പഠനോപകരണങ്ങൾ ഇസാഫ് ബാങ്ക് മാനേജർ പി. മനു സമ്മാനിച്ചു. ഏഴംകുളത്ത് ഏഴംകുളം: അങ്കണവാടി പ്രവേശനോത്സവത്തോടനുബന്ധിച്ച് ഏഴംകുളം ജനമൈത്രി കുഞ്ഞുങ്ങൾക്ക് പഠനോപകരണങ്ങൾ വിതരണം ചെയ്തു. ജനമൈത്രിയുടെ പിഎസ് സി കോച്ചിംഗ് സെന്‍ററിൽ നടന്ന യോഗം ഗ്രാമപഞ്ചായത്ത് പ്രസിഡന്‍റ് വി.എസ്. ആശ ഉദ്ഘാടനം ചെയ്തു. ജനമൈത്രി അംഗം ഷറഫുദ്ദീൻ അബ്ദുൽ അസീസ് കുട്ടികൾക്കുള്ള പഠനോപകരണം സമ്മാനിച്ചു. ഗ്രാമപഞ്ചായത്ത് മെംബർമാരായ ഷെമീൻ, സുരേഷ് ബാബു, സദാനന്ദൻ, രജിത, ഷീജ, ശാന്തി കെ. കുട്ടൻ, ലിജി, ഷീബ, അനിൽ തുടങ്ങിയവർ പ്രസംഗിച്ചു.

ധൈര്യമായിട്ടു പഠിച്ചോളൂ... പുസ്തകം രചിച്ചത് നമ്മുടെ സ്വന്തം സാറന്മാരാ...

പത്തനംതിട്ട: പുത്തൻ പുസ്തകം കൈയിലെത്തിയപ്പോൾ അതിലെ രചന നിർവഹിച്ചവരിൽ നമ്മുടെ സ്വന്തം സാറന്മാരുമുണ്ടെന്ന കാര്യം മറക്കണ്ട കേട്ടോ.. ചില പുസ്തകങ്ങളുടെ പുറംചട്ടയും ഉള്ളിലെ ചിത്രങ്ങളുമൊക്കെ നമ്മുടെ സ്വന്തം കാർട്ടൂണിസ്റ്റ് ഷാജി മാത്യുവിന്‍റേതുമാണ്. പുതിയ അധ്യയന വർഷത്തിൽ പുതിയ കാലഘട്ടത്തിനനുസരിച്ചുള്ള പാഠപുസ്‌തകങ്ങൾ രചിക്കാൻ ഇക്കുറി പത്തനംതിട്ടയിൽനിന്ന്‌ തെരഞ്ഞെടുക്കപ്പെട്ട സംഘത്തിൽ പത്തനംതിട്ടക്കാരായ പത്തോളം അധ്യാപകർ ഉണ്ടായിരുന്നു. പാഠപുസ്തക രചനാ സമിതികളിൽ പത്തനംതിട്ട ജില്ലയ്ക്ക് ഇത്രയധികം പ്രാതിനിധ്യം ഇതിനു മുന്പു ലഭിച്ചിട്ടില്ല. നാലാം ക്ലാസിലെ മലയാളവും ഗണിതവും ആറാം ക്ലാസിലെ സയൻസും മലയാളവും എട്ടാം ക്ലാസിലെ ഇംഗ്ലീഷും കേരളപാഠാവലിയും പത്താംക്ലാസിലെ സംസ്‌കൃതം എന്നീ പുസ്‌തകങ്ങളുടെ രചനയിലാണ് നമ്മുടെ അധ്യാപകരും പങ്കാളികളായത്‌. കോഴഞ്ചേരി ഗവ. ഹൈസ്‌കൂളിലെ ജി. ശ്രീരഞ്‌ജു, റാന്നി പഴവങ്ങാടി ഗവ. യുപി സ്‌കൂളിലെ എഫ്‌. അജിനി, റാന്നി വരവൂർ ഗവ. യുപിഎസിലെ ജെ. ജയശ്രീദേവി, ചന്ദനക്കുന്ന്‌ മൂലൂർ സ്‌മാരക ഗവ. യുപി സ്‌കൂളിലെ ഐശ്വര്യ സോമൻ, പൊങ്ങലടി എസ്‌വിഎച്ച്‌എസിലെ പ്രജിത്‌ പ്രസന്നകുമാർ, അടൂർ പന്നിവിഴ സെന്‍റ് തോമസ്‌ വിഎച്ച്‌എസ്‌എസിലെ ശ്രീജിത്ത്‌ എസ്‌. ചന്ദ്രൻ, പത്തനംതിട്ട സെന്‍റ് മേരീസ്‌ എച്ച്‌എസിലെ ബിനു കെ സാം, മാങ്കോട് ഗവ . ഹയർ സെക്കൻഡറി സ്കൂളിലെ എസ്. സൗമ്യ, കോന്നി സ്വദേശിയും കായംകുളം എംഎസ്എം എച്ചഎസ്എസ് അധ്യാപികയുമായ ഡോ.ആർ. പ്രിയ, പത്തനംതിട്ട കൊന്നമൂട് സ്വദേശിയും കാച്ചാണി ഗവ. എച്ച്എസ്എസ് അധ്യാപികയുമായ നെജീന നാസർ എന്നിവരാണ് എൽപി, യുപി സ്‌കൂളുകളിലെ പുസ്‌തകരചനയിൽ പങ്കുചേർന്നത്‌. രണ്ട്, നാല്, ആറ്, എട്ട്, പത്ത് ക്ലാസുകളിലെ പുസ്തകങ്ങളാണ് ഇക്കുറി മാറിയത്. പിന്നിട്ട കാലത്തെ പ്രതിസന്ധികളുടെ ഓർമപ്പെടുത്തലും അവയെ തരണം ചെയ്യാൻ പഠിപ്പിക്കലുമാണ്‌ നാലാം ക്ലാസിലെ മലയാളം പാഠപുസ്‌തകമെന്ന്‌ അധ്യാപകർ പറഞ്ഞു. കഴിഞ്ഞ വർഷം ആറാം ക്ലാസിലെ സയൻസ്‌ പുസ്‌തകത്തിൽ കുട്ടികൾക്ക്‌ കഠിനമായ ചില പാഠഭാഗങ്ങൾ ഉണ്ടായിരുന്നത്‌ ഒഴിവാക്കിയിട്ടുണ്ട്‌. ഒന്നാം ഭാഷയായി മലയാളം എടുക്കാത്തവർക്കും കൂടുതൽ സഹായകമാകുന്ന നിലയിലാണ് മലയാളം പാഠങ്ങളുടെ അവതരണം. ഗണിതപുസ്‌തകങ്ങളിൽ ഭിന്ന നിലവാരക്കാരായ കുട്ടികളെ പരിഗണിച്ച്‌ അവർക്കിഷ‌്ടപ്പെടുന്ന പഠന സന്ദർഭങ്ങൾ തയാറാക്കിയിട്ടുണ്ട്‌. നിർമിതബുദ്ധിയുടെ സാധ്യതകളെ പരിചയപ്പെടുത്തുന്നതാണ് എട്ടാംക്ലാസിലെ ഇംഗ്ലീഷ്‌ പുസ്‌തകം. ശാസ്‌ത്രവും വിവര സാങ്കേതിക വിദ്യയും ഉൾപ്പെടുത്തി തൊഴിൽ സാധ്യതയും വർധിപ്പിക്കുന്നതാണ് ‌ പത്താം ക്ലാസിലെ സംസ്‌കൃതം (ഓറിയന്‍റഡ്‌) പുസ്‌തകം. പുസ്തകങ്ങൾ പ്രിന്‍റ് ചെയ്യുന്നതിനു മുന്പായി അധ്യാപക പരിശീലകർക്ക് നൽകി ചർച്ച ചെയ്തിരുന്നു. പിന്നാലെ അധ്യാപക പരിശീലനങ്ങളും നടന്നു. പരിശീലന വേദികളിൽ പരാതികൾക്കധികം ഇടനൽകാതെയാണ് ഇത്തവണ രചനകൾ നടത്തിയതെന്നത് അഭിമാനകരമെന്ന് അധ്യാപകർ പറഞ്ഞു.

പൊതുവിദ്യാലയങ്ങളിൽ കുട്ടികളുടെ കുറവ്; ഒന്നാംക്ലാസിൽ ചേർന്നത് 4273 കുട്ടികൾ

പത്തനംതിട്ട: ജില്ലയിലെ ഗവൺമെന്‍റ്, എയ്ഡഡ് വിദ്യാലയങ്ങളിൽ ഇക്കൊല്ലവും കുട്ടികളുടെ എണ്ണത്തിൽ വൻ കുറവെന്ന് സൂചന. പുതിയ അധ്യയന വർഷത്തിന്‍റെ ആരംഭത്തിൽ 4273 കുട്ടികൾ മാത്രമാണ് ഒന്നാം ക്ലാസിൽ ചേർന്നിട്ടുള്ളത്. 2234 കുട്ടികൾ ഗ‌വൺമെന്‍റ് സ്കൂളുകളിലും 2039 കുട്ടികൾ എയ്ഡഡ് സ്കൂളിലും പ്രവേശനം നേടി. ആറാം പ്രവൃത്തിദിനം വരെ കുട്ടികളെ പ്രവേശിപ്പിക്കാനാകുമെന്നതിനാൽ കണക്കുകൾ പൂർണമല്ല. മറ്റു ക്ലാസുകളിൽ കൊഴിഞ്ഞുപോക്ക് കൂടുതലായിട്ടില്ലെങ്കിലും കഴിഞ്ഞ വർഷത്തെ അപേക്ഷിച്ച് കുട്ടികളുടെ എണ്ണത്തിൽ കുറവുണ്ടാകും. 9923 കുട്ടികളാണ് കഴിഞ്ഞ അധ്യയന വർഷം ജില്ലയിലെ പൊതുവിദ്യാലയങ്ങളിൽ എസ്എസ്എൽസി പരീക്ഷ എഴുതിയത്. ഇത്രയും കുട്ടികൾ പുറത്തുപോയ സാഹചര്യത്തിൽ പുതുതായി ചേർന്നത് 4273 കുട്ടികൾ മാത്രമാണ്. സംസ്ഥാനത്തുതന്നെ പൊതുവിദ്യാലയങ്ങളിൽ ഏറ്റവും കുറവ് കുട്ടികളുള്ളത് പത്തനംതിട്ട ജില്ലയിലാണ്. പത്തിൽ താഴെ കുട്ടികളുള്ള സ്കൂളുകൾ ഏറ്റവുമധികം ഉള്ളതും പത്തനംതിട്ടയിലാണ്. ഇത്തവണ ഒന്നാം ക്ലാസിൽ ഒരു കുട്ടി പോലും ഇല്ലാത്ത സ്കൂളുകളും ജില്ലയിലുണ്ട്. പത്തിൽ താഴെ കുട്ടികളുള്ള സ്കൂളുകളുടെ എണ്ണത്തിലും വർധനയുണ്ട്. ഒരു ക്ലാസിൽ 15 കുട്ടികളെങ്കിലും ഉള്ള സ്കൂളുകൾ മാത്രമാണ് സർക്കാർ ആദായ സ്കൂൾ പട്ടികയിലുള്ളത്. കുട്ടികളെ കാത്ത് മൂക്കന്നൂർ സ്കൂൾ അയിരൂർ മൂക്കന്നൂർ എൽപി സ്കൂളിൽ കുട്ടികൾ ആരും എത്താത്ത സാഹചര്യത്തിൽ അടച്ചുപൂട്ടൽ നടപടിക്രമങ്ങളിലേക്ക്. 1903ൽ പ്രവർത്തനം തുടങ്ങിയ സ്കൂളിൽ കഴിഞ്ഞ അധ്യയന വർഷം ഒരു വിദ്യാർഥിനിയാണ് ഉണ്ടായിരുന്നത്. നാലാം ക്ലാസിൽ നിന്ന് ഈ കുട്ടിയും പോയതോടെ സ്കൂളിലേക്ക് പുതിയ അഡ്മിഷൻ വന്നില്ല. വർഷങ്ങളായി സ്ഥിരം അധ്യാപകരില്ലാത്തതിനാൽ താത്കാലിക അധ്യാപകരാണ് സ്കൂൾ നടത്തിവന്നത്. കഴിഞ്ഞ വർഷം ആദ്യവും ആരും ഉണ്ടായിരുന്നില്ല. നാലാം ക്ലാസിൽ അവശേഷിച്ച ഒരു കുട്ടി ടിസി വാങ്ങി പോയെങ്കിലും പിന്നീട് തിരികെ വന്നു. ഇതോടെ ഒരു കുട്ടിയുമായി ഒരുവർഷം പ്രവർത്തിച്ചു. താത്കാലിക അധ്യാപികയെ മാനേജർ നിയമിച്ച് പഠനം നടത്തി. ഉച്ചഭക്ഷണവും യൂണിഫോമും എല്ലാം കൃത്യമായി എത്തിക്കുകയും ചെയ്തു. ഇക്കൊല്ലം അഡ്മിഷനെടുക്കാൻ തന്നെ ആരുമുണ്ടായില്ല. ആറാം പ്രവൃത്തിദിനത്തിനുള്ളിൽ ആരെങ്കിലും വന്നാൽ പ്രവേശനം നൽകാൻ മാനേജ്മെന്‍റ് തയാറാണ്. ഇതു സാധ്യമാകുന്നില്ലെങ്കിൽ സ്കൂൾ അടച്ചുപൂട്ൽ നടപടികളിലേക്ക് കടക്കും. പിന്നീട് ഒരു വർഷം കഴിഞ്ഞു മാത്രമേ നടപടികൾ പൂർണമാകൂ. രേഖകളെല്ലാം ഉപജില്ലാ വിദ്യാഭ്യാസ ഓഫീസിൽ സൂക്ഷിക്കണമെന്നാണ് വ്യവസ്ഥ. വെണ്ണിക്കുളം ഉപജില്ലയിലാണ് മൂക്കന്നൂർ എൽപിഎസ്. 2023ൽ തെള്ളിയൂർ സെൻട്രൽ എൽപി സ്കൂൾ അടച്ചുപൂട്ടി. 2002 മുതൽ പത്തനംതിട്ട ജില്ലയിൽ നിരവധി സ്കൂളുകൾ കുട്ടികളില്ലാതെ പ്രവർത്തനം നിർത്തിയിട്ടുണ്ട്. പ്രഥമാധ്യാപക തസ്തികകളിലേക്കും ആളില്ല കുട്ടികൾ കുറവായതിന്‍റെ പേരിൽ നിയമനം തടയപ്പെട്ട എയ്ഡഡ് വിദ്യാലയങ്ങളിൽ സ്ഥിരം അധ്യാപകരും പ്രഥമാധ്യാപകരും ഇല്ലാത്ത സ്ഥിതിയാണ്. പ്രഥമാധ്യാപക തസ്തികകളിൽ നിയമിക്കാൻ യോഗ്യതയുള്ള സ്ഥിരാധ്യാപകർ മാനേജ്മെന്‍റുകളില്ലില്ല. ഇക്കാരണത്താൽ പലയിടത്തും അധ്യാപകർക്ക് ചുമതല നൽകിയാണ് പ്രവർത്തനം. സ്കൂളുകളിൽ അധ്യാപക തസ്തികകളിൽ താത്കാലിക നിയമനമാണ് വർഷങ്ങളായി നടത്തിവരുന്നത്. സർക്കാർ പ്രൈമറി സ്കൂളുകളിലും പ്രഥമാധ്യാപക തസ്തിക ഏറ്റെടുക്കാൻ അധ്യാപകർ മടിക്കുകയാണ്.

കളിചിരികൾ നിറഞ്ഞു, ആവേശപ്പൊലിമയിൽ സ്കൂളുകൾ

പത്തനംതിട്ട: വ്യത്യസ്തതകളിൽ വർണങ്ങൾ നിറച്ച് സ്കൂളുകളിൽ പ്രവേശനോത്സവം. മേളങ്ങളും വർണബലൂണുകളും ആട്ടവും പാട്ടുമെല്ലാം അകന്പടിയായ പ്രവേശനോത്സവം ഏറെ ആകർഷണീയങ്ങളായി. പുതിയ അധ്യയനവർഷത്തിനു തുടക്കം കുറിച്ച ഇന്നലെ പുത്തൻ പ്രതീക്ഷകളുമായി വിദ്യാലയ മുറ്റത്തേക്ക് കാലെടുത്തുവച്ച കുരുന്നുകളെ സ്വീകരിക്കാൻ അധ്യാപകരും പിടിഎ ഭാരവാഹികളും ജനപ്രതിനിധികളുമെല്ലാം കാത്തുനിന്നു. മധുരവും വർണബലൂണുകളും നൽകി കുട്ടികളെ സ്വീകരിച്ചു. മാതാപിതാക്കളുടെ കൈപിടിച്ചെത്തിയ കുരുന്നുകൾ വളരെ വേഗം സ്കൂളിലെ ആഘോഷങ്ങളിൽ ആവേശത്തോടെ പങ്കാളികളായി. സ്കൂളുകൾ കേന്ദ്രീകരിച്ചുള്ള പ്രവേശനോത്സവത്തിനു പുറമേ പഞ്ചായത്ത്, ബ്ലോക്ക്, നഗരസഭ, ജില്ലാതലങ്ങളിൽ ഉദ്ഘാടന പരിപാടികളും ഉണ്ടായിരുന്നു. സർക്കാർ, എയ്ഡഡ് മേഖലയിലെ പൊതുവിദ്യാലയങ്ങളിലാണ് ഇന്നലെ സർക്കാർ നിർദേശപ്രകാരമുള്ള പ്രവേശനോത്സവം സംഘടിപ്പിച്ചത്. ജില്ലയിൽ ദുരിതാശ്വാസ ക്യാന്പുകളായി പ്രവർത്തിക്കുന്നതും പ്രളയഭീഷണിയുള്ള പടിഞ്ഞാറൻ മേഖലയിലെയും സ്കൂളുകൾ ഒഴികെയുള്ളിടങ്ങളിൽ പ്രവേശനോത്സവം നടന്നു. തിരുവല്ല എസ് സിഎസിൽ തിരുവല്ല: എസ് സി സെമിനാരി സ്കൂൾ പ്രവേശനോത്സവം മാർത്തോമ്മ സഭാ സെക്രട്ടറി റവ.എബി ടി മാമ്മൻ ഉദ്ഘാടനം ചെയ്തു. പിടിഎ പ്രസിഡന്‍റ് തോമസ് കോശിയുടെ അധ്യക്ഷതയിൽ റവ.എബി കെ ജോഷ്വ നവാഗതരായ കുട്ടികൾക്ക് സമ്മാനം വിതരണം ചെയ്തു. കോർപറേറ്റ് മാനേജർ കുരുവിള മാത്യു, ഹെഡ്മിസ്ട്രസ് റെനി വർഗീസ് , ഡോ.മാത്യു തോമസ് , പ്രിൻസിപ്പൽ ജോൺ കെ. തോമസ്, എ.വി.ജോർജ് , ആൻ മരിയ സുനിൽ , സാവിയോ സുനിൽ, മേഴ്സി മത്തായി, കൺവീനർ ശിമോനി ഏബൽ, നിഷ മേരി ജോസഫ് , ആശാലത എന്നിവർ പ്രസംഗിച്ചു. നവാഗതരായ കുട്ടികൾ പ്രവേശന ഗാനത്തിന്‍റെ അകമ്പടിയോടെ തിരി തെളിച്ചു . കുട്ടികളുടെ കലാപരിപാടികളും നടത്തി. ഇരുവെള്ളിപ്ര സ്കൂളിൽ തിരുവല്ല: തിരുമൂലപുരം ഇരുവള്ളിപ്ര സെന്‍റ് തോമസ് ഹയർ സെക്കൻഡറി സ്കൂളിൽ പ്രവേശനോത്സവം സ്കൂൾ മാനേജർ ഫാ.വർഗീസ് ചാമക്കാലയിൽ ഉദ്ഘാടനം ചെയ്തു. ഹെഡ്മാസ്റ്റർ ഷാജി മാത്യു അധ്യക്ഷത വഹിച്ചു. പിടിഎ പ്രസിഡൻ്റ് സജി.ഏബ്രഹാം, സ്റ്റാഫ് സെക്രട്ടറി സിബി സ്റ്റീഫൻ, സീനിയർ അധ്യാപിക റിനു അൽഫോൺസ് എന്നിവർ പ്രസംഗിച്ചു.തുടർന്ന് കുട്ടികളുടെ വിവിധ കലാപരിപാടികളും അരങ്ങേറി. ബഡ്സ് റീഹാബിലിറ്റേഷൻ സെന്‍ററിൽ അടൂർ: ഭിന്നശേഷി കുട്ടികളെ മുഖ്യധാരയിലേക്ക് കൊണ്ടുവരണമെന്ന് നിയമസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍. ബഡ്സ് റീഹാബിലിറ്റേഷന്‍ സെന്‍റര്‍ ജില്ലാതല പ്രവേശനോത്സവത്തിന്‍റെ ഉദ്ഘാടനം പള്ളിക്കല്‍ ബഡ്സ് സെന്‍ററില്‍ നിര്‍വഹിച്ചു പ്രസംഗിക്കുകയായിരുന്നു ഡെപ്യൂട്ടി സ്പീക്കർ. ഗ്രാമപഞ്ചായത്ത് പ്രസിഡന്‍റ് സുശീലാ കുഞ്ഞമ്മകുറുപ്പ് അധ്യക്ഷത വഹിച്ചു. കുടുംബശ്രീ ജില്ലാ മിഷന്‍ കോഓര്‍ഡിനേറ്റര്‍ എസ്. ആദില മുഖ്യപ്രഭാഷണം നടത്തി. പഞ്ചായത്ത് വൈസ് പ്രസിഡന്‍റ് എം. മനു, ബ്ലോക്ക് പഞ്ചായത്ത് അംഗങ്ങളായ എ. പി. സന്തോഷ്, പി.ബി. ബാബു, ആര്യ വിജയൻ, ഗ്രാമപഞ്ചായത്ത് സ്ഥിരം സമിതി അധ്യക്ഷരായ കെ.ജി. ജഗദീശന്‍, സിന്ധു ജയിംസ്, ഷീന റെജി, അംഗങ്ങളായ സുപ്രഭ, പ്രമോദ്, യമുന മോഹന്‍, ശ്രീജ, രഞ്ജിനി കൃഷ്ണകുമാര്‍, ജില്ലാ ആസൂത്രണ സമിതി അധ്യക്ഷന്‍ അജിത് എന്നിവര്‍ പ്രസംഗിച്ചു. അടൂർ മൂന്നാളത്ത് അടൂര്‍: മൂന്നാളത്ത് ആരംഭിച്ച ബഡ്സ് റിഹാബിലിറ്റേഷന്‍ സെന്‍റര്‍ പ്രവേശനോത്സവത്തിന്‍റെ ഉദ്ഘാടനം ഡെപ്യൂട്ടി സ്പീക്കർ ചിറ്റയം ഗോപകുമാർ നിർവഹിച്ചു. അടൂര്‍ നഗരസഭ ചെയര്‍പേഴ്സണ്‍ ദിവ്യ റെജി മുഹമ്മദ് അധ്യക്ഷത വഹിച്ചു. സ്ഥിരം സമിതി അധ്യക്ഷരായ അജി പി. വര്‍ഗീസ്, ബീന ബാബു, വരിക്കോലില്‍ രമേഷ് കുമാര്‍, ശോഭാ തോമസ്, കൗണ്‍സിലര്‍മാരായ അപ്സര സനൽ, രജനി രമേശ്, ശ്രീജ ആർ. നായര്‍, ബിന്ദു കുമാരി, സിന്ധു തുളസീധരക്കുറുപ്പ്, അനിതദേവി, മഹേഷ്‌കുമാർ, കുടുംബശ്രീ ജില്ലാ കോഓര്‍ഡിനേറ്റര്‍ എസ്. ആദില, സിഡിഎസ് ചെയര്‍പേഴ്സണ്‍ വത്സല പ്രസന്നന്‍ എന്നിവര്‍ പ്രസംഗിച്ചു. പന്തളം തെക്കേക്കരയിൽ പന്തളം: തെക്കേക്കര പഞ്ചായത്തുതല സ്‌കൂള്‍ പ്രവേശനോത്സവം പൊങ്ങലടി എസ് വിഎച്ച്എസില്‍ ഗ്രാമപഞ്ചായത്ത് പ്രസിഡന്‍റ് എസ്. രാജേന്ദ്രപ്രസാദ് ഉദ്ഘാടനം നിര്‍വഹിച്ചു. നവാഗതരായ കുട്ടികളെ ജനപ്രതിനിധികളും അധ്യാപകരും പിടിഎ അംഗങ്ങളും ചേര്‍ന്ന് സ്വീകരിച്ചു. ഗ്രാമപഞ്ചായത്ത് അംഗം രഞ്ജിത്ത് അധ്യക്ഷത വഹിച്ചു. കവി കോന്നിയൂര്‍ ബാലചന്ദ്രന്‍ മുഖ്യപ്രഭാഷണം നടത്തി. പ്രധാനാധ്യാപിക പ്രിയാ റാണി, സ്‌കൂള്‍ മാനേജര്‍ സോയ, ബിആര്‍സി ട്രെയിനര്‍ ഗംഗ, ജെഎച്ച്ഐ വിനോദ് എന്നിവര്‍ പ്രസംഗിച്ചു. ഇടമുറി സ്കൂളിൽ റാന്നി: നാറാണംമൂഴി ഗ്രാമ പഞ്ചായത്തുതല പ്രവേശനോത്സവം ഇടമുറി ഗവ.ഹയര്‍ സെക്കന്‍ഡറി സ്കൂളില്‍ നടന്നു.പ്രസിഡന്‍റ് സോണിയ മനോജ് ഉദ്ഘാടനം ചെയ്തു. വൈസ് പ്രസിഡന്‍റ് രാജന്‍ നീറംപ്ലാക്കല്‍ അധ്യക്ഷത വഹിച്ചു. സ്കൂളിലെ മുഴുവന്‍ കുട്ടികള്‍ക്കുമുള്ള പഠനോപകരണങ്ങളുടെ വിതരണം വാര്‍ഡംഗം സാംജി ഇടമുറി നിര്‍വഹിച്ചു. ജനപ്രതിനിധി റെനി വര്‍ഗീസ്, പ്രിന്‍സിപ്പല്‍ എസ്.എല്‍ ബിവിന്‍, പ്രഥമധ്യാപിക ആര്‍. ഓമന, എസ്എംസി ചെയര്‍മാന്‍ എം.വി. പ്രസന്നകുമാര്‍, മറിയാമ്മ മാത്യു, വിജയമ്മാള്‍, കെ.കെ ശശീന്ദ്രന്‍,പ്രസാദ്, ആരതി വിജയന്‍, എസ്. ചിഞ്ചു, സി.ജി. ഉമേഷ്, പി സിനി, രാജേഷ് കുമാര്‍ എന്നിവര്‍ പ്രസംഗിച്ചു. അട്ടത്തോട് ട്രൈബൽ സ്കൂളിൽ അട്ടത്തോട്: ഗവൺമെന്‍റ് ട്രൈബൽ സ്കൂളിൽ പ്രവേശനോത്സവം വർണാഭമായി. വാർഡ് മെംബർ മഞ്ജു പ്രമോദ് അധ്യക്ഷത വഹിച്ച യോഗത്തിൽ പെരിയാർ ടൈഗർ റിസർവ് ഡെപ്യൂട്ടി റേഞ്ചർ ബൈജു പ്രവേശനോത്സവം ഉദ്ഘാടനം ചെയ്തു. പുതിയതായി സ്കൂളിൽ എത്തിയ ഒമ്പത് കുട്ടികളെ മധുരവും പഠനോപകരണങ്ങളും ബാഗും വാട്ടർ ബോട്ടിലും നൽകി സ്വീകരിച്ചു. സ്കൂൾ ഹെഡ്മാസ്റ്റർ ബിജു തോമസ്, ഊരു മൂപ്പൻ നാരായണൻ, വനം വകുപ്പ് ഉദ്യോഗസ്ഥരായ രാജേഷ്, ഗിരീഷ്, സൗമ്യ, അജീഷ്, സ്കൂൾ അധ്യാപക അധ്യാപകരായ സുബീഷ് ആശാനന്ദൻ, അമിത എന്നിവർ പ്രസംഗിച്ചു. കോന്നി റിപ്പബ്ലിക്കൻ വിഎച്ച്എസ്എസിൽ കോന്നി : കോന്നി റിപ്പബ്ലിക്കൻ വൊക്കേഷണൽ ഹയർ സെക്കൻഡറി സ്കൂളിലെ പ്രവേശനോത്സവം വിവിധ പരിപാടികളോടെ നടന്നു. ചെണ്ടമേളത്തിന്‍റെ അകമ്പടിയോടുകൂടിയാണ് നവാഗതരെ സ്വീകരിച്ചത് , പ്രവേശനോത്സവഗാനം ദേശഭക്തിഗാനം , സൂംബ ഡാൻസ് എന്നീ കലാപരിപാടികൾ കുട്ടികൾ അവതരിപ്പിച്ചു. പിറ്റിഎ പ്രസിഡന്‍റ് മനോജ് പുളിവേലിൽ അധ്യക്ഷത വഹിച്ച യോഗം ജില്ലാ പഞ്ചായത്തംഗം റോബിൻ പീറ്റർ ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡന്‍റ് ആർ. ദേവകുമാർ, സ്കൂൾ മാനേജർ എൻ. മനോജ്, ഹെഡ്മാസ്റ്റർ ആർ.സുരേഷ് കുമാർ, എസ്. സന്തോഷ് കുമാർ, ഷിനി , രാജലക്ഷ്മി എന്നിവർ പ്രസംഗിച്ചു.

ജില്ലാതല പ്രവേശനോത്സവത്തിൽ പങ്കാളിയായി മന്ത്രിയും

പത്തനംതിട്ട: ജില്ലാതല സ്കൂൾ പ്രവേശനോത്സവം കോഴഞ്ചേരി കാരംവേലി ഗവൺമെന്‍റ് എൽപി സ്കൂളിൽ നടന്നു. മന്ത്രി വീണാ ജോർജ് ഉദ്ഘാടനംനിർവഹിച്ചു. ഭാഷയും സാഹിത്യവാസനയും പരിപോഷിപ്പിക്കുന്ന മികച്ച പഠനാന്തരീക്ഷമാണ് പൊതുവിദ്യാലയങ്ങളിലേതെന്ന് മന്ത്രി പറഞ്ഞു. ബാലസുരക്ഷ ഉറപ്പാക്കാന്‍ വനിതാ ശിശു വികസനവകുപ്പിന്‍റെ നേതൃത്വത്തില്‍ വിവിധ പ്രവര്‍ത്തനം നടക്കുന്നുണ്ടെന്നും വീണാജോർജ് ചൂണ്ടിക്കാട്ടി. പ്രവേശനോത്സവത്തിനെത്തിയ കുട്ടികളുടെ ചിത്രം പതിച്ച സര്‍ട്ടിഫിക്കറ്റും എല്‍എസ്എസ് വിജയികള്‍ക്കുള്ള മൊമെന്‍റോ വിതരണവും മന്ത്രി നിര്‍വഹിച്ചു. ഉജ്ജ്വല ബാല്യം ജേതാക്കളായ നന്ദന നായര്‍, ഹനാന്‍ റേച്ചല്‍ പ്രമോദ് എന്നിവരെ അനുമോദിച്ചു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിച്ചു. ജില്ലാ കളക്ടര്‍ എസ്. പ്രേംകൃഷ്ണന്‍ മുഖ്യാതിഥിയായിരുന്നു. ജില്ലാ പഞ്ചായത്ത് സ്ഥിരം സമിതി അധ്യക്ഷന്‍ ആര്‍. അജയകുമാർ, വിദ്യാഭ്യാസ ഉപഡയറക്ടര്‍ ബി. ആർ. അനില, എസ്എസ്‌കെ ജില്ലാ പ്രോജക്ട് കോഓര്‍ഡിനേറ്റര്‍ റെനി ആന്‍റണി, ത്രിതല പഞ്ചായത്ത് അഗങ്ങൾ, വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

പ്രവേശനോത്സവത്തിനു കടലവണ്ടിയും

പ്രമാടം: സ്കൂളിൽ കടലവണ്ടിക്കെന്താ കാര്യം എന്ന് ചോദിക്കാൻ വരട്ടെ. അധ്യാപികമാർ വറത്തെടുത്ത കപ്പലണ്ടി കൊറിച്ച് കുട്ടികളുടെ ആദ്യ വിദ്യാലയ പ്രവേശം പോഷക സമൃദ്ധമാക്കിയാണ് പ്രമാടം നേതാജി ഹയർ സെക്കൻഡറി സ്കൂൾ വ്യത്യസ്തമായത്. ബലൂണുകൾ കൊണ്ട് അലങ്കരിച്ച കടല വണ്ടി സ്കൂളിലൊരുക്കി. 15 കിലോ നിലക്കടല മണൽച്ചട്ടിയിൽ തത്സമയം വറുത്ത് കുട്ടികൾക്കും രക്ഷിതാക്കൾക്കും വർണ ക്കുമ്പിളിൽ വിതരണം ചെയ്ത് പ്രവേശനോൽസവം കളറാക്കി. ലഹരി വിരുദ്ധ കാന്പെയിന്‍റെ ഭാഗമായി സ്കൂൾ കാമ്പസിൽ സന്ദേശപ്പൂക്കള മൊരുക്കി പ്രവേശനോൽസവത്തെ സാമൂഹ്യ പ്രസക്തിയുള്ളതാക്കി മാറ്റി. പ്രവേശനോത്സവഗാനത്തിന്‍റെ നൃത്താവിഷ്കാരം അളകനന്ദ ,നിരഞ്ജന എന്നിവർ അവതരിപ്പിച്ചു. സ്കൂൾ കായിക താരങ്ങൾ സ്പോർട്സ് ഫാഷൻ ഷോയും സുംബാ നൃത്തവും അവതരിപ്പിച്ചു. പിടിഎ പ്രസിഡന്‍റ് ഫാ. ജിജി തോമസിന്‍റെ അധ്യക്ഷതയിൽ നടന്ന സമ്മേളനം പ്രമാടം പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ രാജി സി. ബാബു നിർവഹിച്ചു. പ്രഥമാധ്യാപിക സി. ശ്രീലത, സ്റ്റാഫ് സെക്രട്ടറി കെ. ബി. ലാൽ, പ്രിൻസിപ്പൽ ബി. ആശ, എൻ. എസ്. അജൻ പിള്ള , അജി ഡാനിയേൽ എന്നിവർ പ്രസംഗിച്ചു.

ഓപ്പറേഷൻ സിന്ദൂർ @ എണ്ണൂറാംവയൽ

വെച്ചൂച്ചിറ: പ്രവേശനോത്സവം വ്യത്യസ്തതകൾ തീർത്തപ്പോൾ രാജ്യസ്നേഹത്തിന്‍റെ പ്രതീകമായി ഓപ്പറേഷൻ സിന്ദൂറിന്‍റെ സ്മരണകൂടി അയവിറക്കിയാണ് വെച്ചൂച്ചിറ എണ്ണൂറാംവയൽ സിഎംഎസ് എൽപി സ്കൂളിൽ കുരുന്നുകൾക്ക് അവിസ്മരണീയ വിരുന്നൊരുക്കിയത്. നവാഗതരെയും വിദ്യാലയത്തിലേക്ക് തിരികെ എത്തുന്ന മുതിർന്ന ക്ലാസിലെ കുട്ടികളെയും വരവേറ്റത് വിസ്മയകാഴ്ചകളുടെ വർണപ്പെരുമഴ തന്നെ ആയിരുന്നു. പഹൽഗാം ഭീകരാക്രമണത്തിന്‍റെയും ഓപ്പറേഷൻ സിന്ദൂറിന്‍റെയും പശ്ചാത്തലത്തിൽ ദേശസ്നേഹത്തിന്‍റെയും സമാധാനത്തിന്‍റെയും സന്ദേശം പകരുന്ന കാഴ്ചകളായിരുന്നു കുട്ടികൾക്കായി ഒരുക്കിയത്. റാന്നി സെന്‍റ് തോമസ് കോളജ് എൻസിസി കേഡറ്റുകളായിരുന്നു കുട്ടികളെ വരവേൽക്കാൻ എത്തിയത്. വാദ്യ മേളങ്ങളുടെ അകമ്പടിയോടെ പൂക്കളും ബലൂണുകളും മധുരവും നൽകി കേഡറ്റുകൾ കുരുന്നുകളെ സ്വീകരിച്ചു. ആകാശത്തു പാറിപ്പറന്ന ഡ്രോണുകൾ വർഷിച്ച സിന്ദൂര മഴയിൽ കുളിച്ച കുട്ടികൾ കൗതുകത്തോടെയുംഅമ്പരപ്പോടെയും ആദ്യദിനം ആഘോഷമാക്കി. ഗ്രാമ പഞ്ചായത്ത്‌ പ്രസിഡന്‍റ് ഇ. വി. വർക്കി പ്രവേശനോത്സവം ഉദ്ഘാടനം ചെയ്തു. സ്കൂൾ ലോക്കൽ മാനേജർ റവ. സോജി വർഗീസ് ജോൺ അധ്യക്ഷത വഹിച്ചു. റവ.ബൈജു ഈപ്പൻ, പഞ്ചായത്ത്‌ വൈസ് പ്രസിഡന്‍റ് പൊന്നമ്മ ചാക്കോ, ഗ്രാമ പഞ്ചായത്ത്‌ അംഗങ്ങളായ ടി. കെ. രാജൻ, ഷാജി കൈപ്പുഴ, പി. ടി. മാത്യു, എം ടി മത്തായി, സാം ഏബ്രഹാം, സാം സി. മാത്യു, സോമി ജയ്സൻ, പിടിഎ പ്രസിഡന്‍റ് ഷൈനു ചാക്കോ, വൈസ് പ്രസിഡന്‍റ് ആഷിക് പീടികപ്പറമ്പിൽ, മദർ പിടിഎ പ്രസിഡന്‍റ് ഷൈനി ജോർജ്, മഞ്ജു രാജ് എന്നിവർ പ്രസംഗിച്ചു. പഹൽഗാം ഭീകരാക്രമണവും ഓപ്പറേഷൻ സിന്ദൂരും പ്രമേയമാക്കി എൻസിസി കേഡറ്റുകൾ അവതരിപ്പിച്ച ദൃശ്യാവിഷ്കാരവും കലാ പരിപാടികളും കുട്ടികൾക്ക് ദൃശ്യവിരുന്നായി.

മേക്കൊഴൂരിൽ ഒരുമയുടെ പ്രവേശനോത്സവം

മേക്കൊഴൂർ: മേക്കൊഴൂരിലെ പൊതു വിദ്യാലയ കൂട്ടായ്മയായ ഒരുമയുടെ നേതൃത്വത്തിൽ മാർത്തോമ്മ എച്ച്എസ്, എസ്എൻഡിപി യുപിഎസ്, എംഡിഎൽപിഎസ് എന്നിവിടങ്ങളിലെ സംയുക്ത പ്രവേശനോത്സവം കാർട്ടൂണിസ്റ്റ് ഷാജി മാത്യു ഉദ്ഘാടനം ചെയ്തു. റവ. ബി. മാത്യു അധ്യക്ഷത വഹിച്ചു. പ്രഥമാധ്യാപകരായ എം.ആർ. ശ്രീജാകുമാരി, വി.എസ്. സുശല, ജെസി ടി.കോശി, ജനപ്രതിനിധികളായ അനിതാ തോമസ്. ജനകമ്മ ശ്രീധരൻ, എസ്. സുനിൽ കുമാർ, എസ്എൻഡിപി യോഗം ശാഖ പ്രസിഡന്‍റ് ശശിധരൻ കൊയ്പ്പള്ളിൽ, ഒരുമ സെക്രട്ടറി ഏബ്രഹാം സാമുവേൽ, പിടിഎ പ്രസിഡന്‍റുമാരായ ജോൺ എ. സാമുവേൽ, സൗമ്യ അഭിലാഷ്, സുഷമദേവി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]