ADVERTISEMENT

ADVERTISEMENT

’പീപ് ഫോർ ഓൾ’ ഉദ്ഘാടനം

സുൽത്താൻ ബത്തേരി: വടക്കനാട് എൽപി സ്കൂളിൽ ’പീപ് ഫോർ ഓൾ’ നൂൽപ്പുഴ പഞ്ചായത്ത് പ്രസിഡന്‍റ് ഷീജ സതീഷ് ഉദ്ഘാടനം ചെയ്തു. ആൽബി എൽദോസ് സക്കറിയാസ് അധ്യക്ഷത വഹിച്ചു. ഫാ.ജോസ് മോളോപറന്പിൽ ലോഗോ പ്രകാശനം ചെയ്തു.

പ്രധാനാധ്യാപിക വി. മീനാക്ഷി, ജോയിന്‍റ് സെക്രട്ടറി ശ്രീഷ, അഞ്ജന സോമൻ, നിഖില, സിതാര, അൽജോസ് എന്നിവർ പ്രസംഗിച്ചു. അനു തോമസ് സ്വാഗതം പറഞ്ഞു.

ADVERTISEMENT

ചൂരൽമല, മുണ്ടക്കൈ പ്രദേശത്ത് നിരോധനം

കൽപ്പറ്റ: ജില്ലയിൽ വരും ദിവസങ്ങളിൽ ശക്തമായ മഴ മുന്നറിയിപ്പ് ലഭിച്ചതിനാൽ മുണ്ടക്കൈ, ചൂരൽമല പ്രദേശത്തേക്കുള്ള പ്രവേശനം നിരോധിച്ചതായി ജില്ലാ കളക്ടർ ഡി.ആർ. മേഘശ്രീ അറിയിച്ചു. മുണ്ടക്കൈ, ചൂരൽമല ഉരുൾപൊട്ടലിന്‍റെ ശേഷിപ്പുകൾ ശക്തമായ മഴയിൽ ഇടിഞ്ഞ് പുന്നപ്പുഴയിൽ കുത്തൊഴുക്കും ജലനിരപ്പ് ഉയരാനും സാധ്യതയുള്ളതിനാലാണ് നിരോധനം ഏർപ്പെടുത്തിയത്. ഗോ സോണ്‍, നോ ഗോ സോണ്‍ ഭാഗങ്ങളിലേക്കും പ്രദേശത്തെ തോട്ടം മേഖലയിലേക്കും പ്രവേശനം കർശനമായി നിരോധിച്ചതായി ജില്ലാ കളക്ടർ അറിയിച്ചു.

കാരുണ്യസ്പർശം ചാരിറ്റബിൾ ട്രസ്റ്റ് പഠനോപകരണങ്ങൾ വിതരണം ചെയ്തു

സുൽത്താൻ ബത്തേരി: മലങ്കര ഓർത്തഡോക്സ് സുറിയാനി സഭ ബത്തേരി ഭദ്രാസനത്തിനു കീഴിൽ പ്രവർത്തിക്കുന്ന കാരുണ്യസ്പർശം ചാരിറ്റബിൾ ട്രസ്റ്റ് പുന്നപ്പാലം എംജിഎം പബ്ലിക് സ്കൂൾ, ബത്തേരി നിർമലമാതാ പബ്ലിക് സ്കൂൾ, ഗോവിന്ദമൂല ഉന്നതി എന്നിവിടങ്ങളിൽനിന്നു തെരഞ്ഞെടുത്ത 85 വിദ്യാർഥികൾക്ക് പഠനോപകരണങ്ങൾ വിതരണം ചെയ്തു. ഭദ്രാസന മെത്രാപ്പോലീത്തയും ട്രസ്റ്റ് മാനേജിംഗ് ട്രസ്റ്റിയുമായ ഡോ.ഗീവർഗീസ് മാർ ബർന്നബാസ് ഉദ്ഘാടനം ചെയ്തു. ഭദ്രാസന സെക്രട്ടറി ഫാ.ബേബി ജോണ്‍, മത്തായി നെടിയാനക്കുഴി, ഉന്നതി മൂപ്പൻ ജി. പാലൻ എന്നിവർ പ്രസംഗിച്ചു. വൈദികർ, ട്രസ്റ്റ് ഭാരവാഹികൾ എന്നിവർ പങ്കെടുത്തു.

റോട്ടറി കബനി വാലി: ഭാരവാഹികൾ ചുമതലേയേറ്റു

മാനന്തവാടി: റോട്ടറി കബനി വാലി ഭാരവാഹികളായി ഷാജി ഏബ്രഹാം(പ്രസിഡന്‍റ്), കെ.പി. റിൻസ്(സെക്രട്ടറി), ജോബി കെ. ജോസ്(ട്രഷറർ) എന്നിവർ ചുമതലയേറ്റു. ഫേണ്‍ ട്രീ റിസോർട്ടിൽ നടന്ന ചടങ്ങിൽ ജില്ലയിൽനിന്നുള്ള ആദ്യ റോട്ടറി ഗവർണർ ബിജോഷ് മാനുവേൽ മുഖ്യ പ്രഭാഷണം നടത്തി. റൊട്ടേറിയൻ ദീപക് കുമാർ കൊറോത്ത് മുഖ്യാതിഥിയായി. ജോണ്‍സൻ ജോണ്‍, കെ.ടി. പ്രാഭിലാഷ്, കെ.ജി. സുനിൽ, ഡോ. രമേഷ്കുമാർ, രവീന്ദ്രനാഥ്, കെ.കെ. പ്രവീണ്‍, സി.കെ. സണ്ണി, ഡോ.സന്തോഷ് സ്കറിയ, വിനീത് വയനാട് എന്നിവർ പ്രസംഗിച്ചു. ജില്ലയിലെ വിവിധ റോട്ടറി ക്ലബ് അംഗങ്ങൾ പങ്കെടുത്തു. വിദ്യാഭ്യാസ, പരിസ്ഥിതി സംരക്ഷണ പദ്ധതികൾ നടപ്പാക്കുമെന്ന് പ്രസിഡന്‍റ് പ്രഖ്യാപിച്ചു.

വിദ്യാഭ്യാസ സ്ഥാപനങ്ങൾക്ക് ഇന്ന് അവധി

കൽപ്പറ്റ: കേന്ദ്ര കാലാവസ്ഥ വകുപ്പ് ജില്ലയിൽ ഓറഞ്ച് അലർട്ട് പ്രഖ്യാപിച്ചതിനാൽ ഇന്ന് ജില്ലയിലെ വിദ്യാഭ്യാസ സ്ഥാപനങ്ങൾക്ക് ജില്ലാ കളക്ടർ ഡി.ആർ. മേഘശ്രീ അവധി പ്രഖ്യാപിച്ചു. പ്രഫഷണൽ കോളജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾ, അങ്കണവാടികൾ, ട്യൂഷൻ സെന്‍ററുകൾ, മതപഠന ക്ലാസുകൾ, സ്പെഷൽ ക്ലാസുകൾക്ക് അവധി ബാധകമാണ്. പിഎസ്‌സി പരീക്ഷകൾ, റസിഡൻഷൽ സ്കൂളുകൾ, കോളജുകൾക്ക് അവധി ബാധകമല്ല.

ബത്തേരിയിൽ നവീകരിച്ച ലിങ്ക് റോഡ് ഉദ്ഘാടനം ചെയ്തു

സുൽത്താൻ ബത്തേരി: നഗരസഭയിലെ നവീകരിച്ച മിനി ബൈപാസ്-സ്റ്റേഡിയം ലിങ്ക് റോഡ് ചെയർമാൻ ടി.കെ. രമേശ് ഉദ്ഘാടനം ചെയ്തു. വൈസ് ചെയർപേഴ്സണ്‍ എൽസി പൗലോസ് അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി അധ്യക്ഷരായ ലിഷ, ടോം ജോസ്, വാർഡ് വികസന സമിതി കണ്‍വീനർ പി.ജെ. ജോസഫ് എന്നിവർ പ്രസംഗിച്ചു. പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ കെ. റഷീദ് സ്വാഗതം പറഞ്ഞു.

പുഞ്ചിരിമട്ടം ദുരന്തം അതിജീവിച്ച കുട്ടികൾ കിൻഷിപ്പ് ഫോസ്റ്റർ കെയർ പദ്ധതിക്ക് കീഴിൽ

കൽപ്പറ്റ: കരൾ പിളരും വേദന നൽകിയ പുഞ്ചിരിമട്ടം ദുരന്തത്തിന് ഒരു വയസാകുന്നു. നാട് ഇതുവരെ കാണാത്ത കനത്ത ആഘാതത്തിന്‍റെയും സങ്കടക്കടലിന്‍റെയും മുഖത്തു നിന്നും അതിജീവിതരും ബന്ധുക്കളും നാടും പതിയെ ഉയിർത്തെഴുന്നേൽക്കുകയാണ്. കൽപ്പറ്റ എൽസ്റ്റണ്‍ എസ്റ്റേറ്റിലെ പുനരധിവാസ ടൗണ്‍ഷിപ്പിൽ ഉയരുന്ന പുതിയ വീടും പുതിയ ജീവിതവുമായി പുത്തൻ പ്രതീക്ഷകൾ തുന്നുകയാണ് അവർ. ദുരന്തത്തിൽ ഏഴ് കുട്ടികൾക്കാണ് മാതാപിതാക്കളെ ഒന്നിച്ചു നഷ്ടപ്പെട്ടത്. ഇതിൽ രണ്ട് പേർക്ക് 18 വയസ് പൂർത്തിയാകാൻ ഏതാനും മാസങ്ങളെ ഉണ്ടായിരുന്നുള്ളൂ. അവർക്ക് ഇപ്പോൾ പ്രായപൂർത്തിയായി. ബാക്കി അഞ്ചു കുട്ടികളും അടുത്ത ബന്ധുക്കളുടെ കൂടെ ഒരു വർഷത്തെ കിൻഷിപ്പ് ഫോസ്റ്റർ കെയർ പദ്ധതിയിലാണ്. ജില്ലാ ശിശു സംരക്ഷണ യൂണിറ്റ് ഉദ്യോഗസ്ഥർ ഓരോ ആഴ്ച്ചയും ഫോണ്‍ വഴിയും ഓരോ മാസവും നേരിട്ടും അവരെ സന്ദർശിച്ച് സുഖവിവരം ഉറപ്പാക്കുന്നുണ്ട്. അഞ്ച് മുതൽ 16 വയസ് വരെയുള്ളവരാണിവർ. അഞ്ചു പേരിൽ മൂന്നും പെണ്‍കുട്ടികളാണ്. എല്ലാവരും സ്കൂളിൽ പോകുന്നു. ചെറിയച്ഛന്‍റെയോ വലിയച്ഛന്‍റെയോ അതുപോലുള്ള അടുത്ത ബന്ധുക്കളുടെയോ വീടുകളിലാണ് അവർ കഴിയുന്നത്. ഇതിൽ ഏറ്റവും പ്രായക്കുറവുള്ള അഞ്ച് വയസുകാരിക്ക് ബന്ധുവീട്ടിൽ സന്തോഷമായത് അമ്മയുടെ സഹോദരി അടുത്തിടെ ജൻമം നൽകിയ കുഞ്ഞാണ്. മറ്റൊരു എട്ട് വയസുകാരിയുടെ ബന്ധുവീട്ടിൽ മൂന്ന് കുട്ടികളുണ്ട്. അവരുടെ ലോകത്തിലെ കളിചിരി വിശേഷങ്ങളാണ് അവളുടെ ജീവിതത്തിൽ നിറങ്ങൾ തിരികെ കൊണ്ടുവന്നത്. പ്രായപൂർത്തിയായ രണ്ട് പേരിൽ ഒരാളുടെ ഡിഗ്രി വിദ്യാഭ്യാസത്തിന്‍റെ മുഴുവൻ ചെലവുകളും സുൽത്താൻ ബത്തേരി ഡോണ്‍ ബോസ്കോ കോളജ് മാനേജ്മെന്‍റാണ് വഹിക്കുന്നത്. മറ്റൊരാൾ പ്ലസ് വണ്ണിന് കോഴിക്കോട് ജില്ലയിലാണ് പഠിക്കുന്നത്. നേരത്തെ ഡ്രോപ്പ് ഒൗട്ട് ആയ ഇദ്ദേഹം ദുരന്തത്തിന് ശേഷം പഠനം പുനരാരംഭിക്കുകയായിരുന്നു. ഈ വിദ്യാർഥി ഒഴികെ എല്ലാവരും വയനാട്ടിൽ തന്നെയാണ്. വേറെ 11 കുട്ടികളുടെ അച്ഛനെയും മൂന്ന് കുട്ടികളുടെ അമ്മയെയും ഉരുളെടുത്തു. അച്ഛനെ നഷ്ടപ്പെട്ടവർ അമ്മയുടെ കൂടെയും അമ്മയെ നഷ്ടപ്പെട്ടവർ അച്ഛന്‍റെ കൂടെയുമാണ് നിലവിൽ കഴിയുന്നത്. ഇതിൽ വെറും രണ്ട് മാസം പ്രായമുള്ള അച്ഛനെ നഷ്ടപ്പെട്ട കുഞ്ഞും ഉൾപ്പെടുന്നു. ഈ 14 പേരിൽ രണ്ട് പേർ തമിഴ്നാട് സ്വദേശികളാണ്. ഇവരുടെയും മാനസിക, ഉല്ലാസ, പഠന, പാഠ്യേതര കാര്യങ്ങളും കൃത്യമായി ശിശു സംരക്ഷണ യൂണിറ്റ് ശ്രദ്ധിക്കുന്നു. കുട്ടികൾ പഠിക്കുന്ന സ്കൂളുകളിലെ കൗണ്‍സലർമാർക്ക് പ്രത്യേക നിർദേശം നൽകിയിട്ടുണ്ട്. അച്ഛനും അമ്മയും നഷ്ടപ്പെട്ടവർക്ക് 10 ലക്ഷം രൂപയും ആരെങ്കിലും ഒരാൾ നഷ്ടപ്പെട്ടവർക്ക് 5 ലക്ഷം രൂപയും സംസ്ഥാന സർക്കാർ സാന്പത്തിക സഹായം നൽകിയിട്ടുണ്ട്. ഇത് കുട്ടിയുടെയും ജില്ലാ ശിശു സംരക്ഷണ ഓഫീസറുടെയും പേരിൽ തുടങ്ങിയ ജോയിന്‍റ് അകൗണ്ടിൽ സ്ഥിരനിക്ഷേപമായി ഇട്ടിരിക്കുകയാണ്. അതിന്‍റെ പലിശ അവർക്ക് ലഭിക്കുന്നുണ്ട്. 19 കുട്ടികൾക്ക് കേന്ദ്രസർക്കാറിന്‍റെ സ്പോണ്‍സർഷിപ്പ് പദ്ധതിയിൽ പ്രതിമാസം 4,000 രൂപ ലഭിക്കുന്നു. ഇതിന് പുറമെ മാതാപിതാക്കൾ ഇരുവരും നഷ്ടപ്പെട്ട ആറ് കുട്ടികൾക്ക് സ്വകാര്യ സംഘടനകളും വ്യക്തികളും സംസ്ഥാന സർക്കാർ മുഖാന്തിരം 31.24 ലക്ഷം രൂപയും കൈമാറി.

തേങ്ങയുടെ വില സർവകാല റിക്കാർഡിൽ: പിടിച്ചുനിൽക്കാൻ കഴിയാതെ ഹോട്ടൽ മേഖല

മാനന്തവാടി: തേങ്ങയുടെയും വെളിച്ചെണ്ണയുടെയുംവില സർവകാല റിക്കാർഡിൽ എത്തിയതോടെ പിടിച്ചുനിൽക്കാൻ കഴിയാതെ ഹോട്ടൽ മേഖല. ഇതോടൊപ്പം അവശ്യസാധനങ്ങളുടെവില ഉയർന്നതും ഹോട്ടൽ മേഖലയെ കടുത്ത പ്രതിസന്ധിയിലാക്കുന്നു. വിപണിയിൽ സർക്കാർ ഇടപെടൽ അത്യാവശ്യമെന്ന് ഹോട്ടൽ വ്യാപാരികൾ പറയുന്നു. തേങ്ങയുടെയും വെളിച്ചെണ്ണയുടെയുംവില സർവകാല റിക്കാർഡിൽ എത്തിയതോടെ പിടിച്ചുനിൽക്കാൻ പാടുപെടുകയാണ് ഹോട്ടൽ മേഖല. ഒരുകിലോ തേങ്ങയ്ക്ക് 90 രൂപവരെയാണ് ഇപ്പോൾ വില. ചെറിയ ഹോട്ടലിൽപ്പോലും ദിവസം കുറഞ്ഞത് 20 തേങ്ങയെങ്കിലും വേണ്ടിവരുന്നുണ്ട്. വെജിറ്റേറിയൻ ഹോട്ടലുകളിൽ പലഹാരങ്ങൾക്കും കറികൾക്കുമെല്ലാം തേങ്ങ അത്യാവശ്യമാണ്. വെളിച്ചെണ്ണയ്ക്ക് 420 മുതൽ 440 രൂപ വരെയാണ് വില. അരിവിലയും 15 രൂപയോളം ഉയർന്നു. ചെറുപയറിന് കിലോയ്ക്ക് 2020ൽ 80 രൂപയായിരുന്നത് ഇപ്പോൾ 150 രൂപയിലെത്തി. ഉഴുന്നിനും തുവരയ്ക്കും കടലയ്ക്കും സൂര്യകാന്തി എണ്ണയ്ക്കും ഉണക്കമുളകിനും മല്ലിക്കും റവയ്ക്കും ആട്ടയ്ക്കും മൈദയ്ക്കുമെല്ലാം 20 മുതൽ 40 രൂപവരെ കൂടി. പാചകവാതകത്തിന് 700 രൂപയോളം വർധിച്ചു. നിത്യോപയോഗ സാധനങ്ങളുടെയും വിലയിൽ അടുത്തിടെ ഉണ്ടായ വിലവർധനയിൽ ഒരാഴ്ചയിൽ നാൽപ്പതിനായിരം രൂപയുടെ ചെലവ് അധികം വന്നതായി ഹോട്ടൽവ്യാപാരികൾ പറയുന്നു. നിത്യോപയോഗ സാധനങ്ങളുടെയും വിലവർധനമൂലം ഹോട്ടലുകൾ നടത്തിക്കൊണ്ടുപോകാൻ പ്രയാസമാണ്. വിപണിയിൽ സർക്കാരിന്‍റെ അടിയന്തര ഇടപെടലുണ്ടാകണമെന്നാണ് ഹോട്ടൽ വ്യാപാരികൾ ആവശ്യപ്പെടുന്നത്.

ഉന്നതിയിൽ ലഹരിവിരുദ്ധ ബോധവത്കരണം നടത്തി

തരിയോട്: ’നവജീവ് 2025’ എന്ന പേരിൽ നടത്തുന്ന ലഹരിവിരുദ്ധ പ്രവർത്തനങ്ങളുടെ ഭാഗമായി സെന്‍റ് മേരീസ് യുപി സ്കൂൾ അധ്യാപകരും വിദ്യാർഥികളും ചെക്കണ്ണിക്കുന്ന് ഉന്നതിയിൽ ബോധവത്കരണം നടത്തി. ’ലഹരിപദാർഥങ്ങളെ പൂർണമായി ഉപേക്ഷിക്കാം, ആരോഗ്യത്തോടെ ജീവിക്കാം’ എന്ന സന്ദേശം ഉൾകൊള്ളുന്ന ലീഫ്ലെറ്റ് വിതരണം ചെയ്തു.

ആസ്പിരേഷണൽ ജില്ലകളിൽ വയനാട് മാതൃക: ജില്ലാ കളക്ടർ

കൽപ്പറ്റ: ആസ്പിരേഷണൽ ജില്ലകളിൽ മികച്ച വികസന മുന്നേറ്റം നടത്തുന്ന വയനാട് മാതൃകയാണെന്നും വിവിധ വകുപ്പുകളുടെ പങ്കാളിത്തത്തോടെ പ്രവർത്തനങ്ങൾ മികവുറ്റതാക്കണമെന്നും ജില്ലാ കളക്ടർ ഡി.ആർ. മേഘശ്രീ. ജില്ലാ ഭരണകൂടം, ആരോഗ്യ വകുപ്പ്, ആരോഗ്യ കേരളം എന്നിവയുടെ സംയുക്താഭിമുഖ്യത്തിൽ ആസ്പിരേഷണൽ ബ്ലോക്ക് പദ്ധതിയുടെ ഭാഗമായി ആരോഗ്യ മേഖലയിലെ കാര്യക്ഷമമായ തുടർപ്രവർത്തനങ്ങൾക്കായി ജില്ലയിലെ മെഡിക്കൽ ഓഫീസർമാർ, പ്രോഗ്രാം ഓഫീസർമാർ, ആരോഗ്യ മേഖലയിലെ ജീവനക്കാർ എന്നിവർക്ക് സംഘടിപ്പിച്ച ശിൽപ്പശാല ഉദ്ഘാടനം ചെയ്യുകയായിരുന്നു അവർ. തരിയോട് പരിശീലന കേന്ദ്രത്തിൽ നടന്ന ശിൽപ്പശാലയിൽ ജില്ലാ മെഡിക്കൽ ഓഫീസർ ഡോ.ടി. മോഹൻദാസ് അധ്യക്ഷത വഹിച്ചു. ജില്ലാ ആർസിഎച്ച് ഓഫീസർ ഡോ.ജെറിൻ എസ്. ജെറോഡ് ആരോഗ്യ മേഖലയിലെ ലക്ഷ്യങ്ങൾ വിശദീകരിച്ചു. ജില്ലാ പ്ലാനിംഗ് ഓഫീസർ എം. പ്രസാദൻ, ദേശീയ ആരോഗ്യ ദൗത്യം ജില്ലാ പ്രോഗ്രാം മാനേജർ ഡോ.സമീഹ സെയ്തലവി, ജില്ലാ എഡ്യുക്കേഷൻ ആൻഡ് മീഡിയ ഓഫീസർ കെ.എം. മുസ്തഫ, ആസൂത്രണ വകുപ്പ് റിസർച്ച് അസിസ്റ്റന്‍റ് കെ.എം. ഷംസുദ്ദീൻ എന്നിവർ പ്രസംഗിച്ചു.

എബിസി പദ്ധതി: പുൽപ്പള്ളിയിൽ തെരുവുനായ പിടിത്തം തുടങ്ങി

പുൽപ്പള്ളി: മൃഗസംരക്ഷണ വകുപ്പും തദ്ദേശ സ്വയംഭരണ സ്ഥാപനങ്ങളും ചേർന്ന് നടപ്പാക്കുന്ന അനിമൽ ബർത്ത് കണ്‍ട്രോൾ പ്രോഗ്രാമിൽ(എബിസി) ടൗണിലും സമീപങ്ങളിലും തെരുവുനായ പിടിത്തം തുടങ്ങി. ബത്തേരി എബിസി സെന്‍റർ കേന്ദ്രീകരിച്ച് പ്രവർത്തിക്കുന്ന ഡോഗ് ക്യാച്ചർമാരുടെ സംഘം പഞ്ചായത്തിലെ വിവിധ ഭാഗങ്ങളിൽനിന്നു 30 ഓളം നായ്ക്കളെ കഴിഞ്ഞ ദിവസം പിടികൂടി. വിജയ സ്കൂൾ, കളനാടിക്കൊല്ലി, ജയശ്രീ സ്കൂൾ, മത്സ്യ-മാംസ മാർക്കറ്റ്, പോലീസ് സ്റ്റേഷൻ, ചുണ്ടക്കൊല്ലി, ബസ്‌സ്റ്റാൻഡ് പരിസരങ്ങളിൽ നിന്നാണ് നായകളെ പിടിച്ചത്. ഇവയെ ബത്തേരി എബിസി സെന്‍ററിൽ വന്ധ്യംകരണ ശസ്ത്രക്രിയയ്ക്ക് വിധേയമാക്കും. മൂന്ന് ദിവസത്തെ ചികിത്സക്കും നിരീക്ഷണത്തിനും ശേഷം പേവിഷ പ്രതിരോധ കുത്തിവയ്പ് നൽകി ചെവിയിൽ അടയാളമിട്ട് പിടിച്ച പ്രദേശങ്ങളിൽ തുറന്നുവിടും. മൃഗസംരക്ഷണ വകുപ്പിന്‍റെ കണക്കനുസരിച്ച് പഞ്ചായത്തിൽ 185 ഓളം തെരുവു നായകളാണുള്ളത്. ബത്തേരി എബിസി സെന്‍ററിൽ രണ്ട് ഡോക്ടർമാരും സഹായികളും ഉൾപ്പെടുന്ന സംഘമാണ് ശസ്ത്രക്രിയയ്ക്ക് നേതൃത്വം നൽകുന്നത്. പെണ്‍ നായകളെ ഗർഭപാത്രവും ആണ്‍ നായകളെ വൃക്ഷണവും നീക്കം ചെയ്താണ് തിരികെ വിടുന്നത്. ജൂണ്‍ 20ന് പ്രവർത്തനം തുടങ്ങിയ ബത്തേരി എബിസി യൂണിറ്റിൽ 500 ഓളം നായകളെയാണ് ശസ്ത്രക്രിയയ്ക്ക് വിധേയമാക്കിയത്.

ലഹരിവിരുദ്ധ സായാഹ്ന സദസ് നടത്തി

മുള്ളൻകൊല്ലി: സെന്‍റ് തോമസ് എയുപി സ്കൂളിൽ ലഹരിവിരുദ്ധ വാരം ആചരിച്ചു. ഇതിന്‍റെ ഭാഗമായി സ്കൂൾ ലഹരിവിരുദ്ധ ക്ലബിന്‍റെ നേതൃത്വത്തിൽ സന്ദേശ പ്രചാരണ യാത്ര, ഫ്ളാഷ് മോബ്, ലഹരിവിരുദ്ധ പ്രതിജ്ഞയെടുപ്പ്, സായാഹ്ന സദസ് എന്നിവ നടത്തി. പഞ്ചായത്തംഗം മഞ്ജു ഷാജി ഉദ്ഘാടനം ചെയ്ത, പഞ്ചായത്തിന്‍റെ വിവിധ ഭാഗങ്ങളിൽ പര്യടനം നടത്തിയ ദ്വിദിന സന്ദേശ പ്രചാരണ യാത്രയുടെ സമാപനത്തോടനുബന്ധിച്ചായിരുന്നു സായാഹ്ന സദസ്. പഞ്ചായത്ത് പ്രസിഡന്‍റ് പി.കെ. വിജയൻ ഉദ്ഘാടനം ചെയ്തു. പിടിഎ പ്രസിഡന്‍റ് നോബി പള്ളിത്തറ അധ്യക്ഷത വഹിച്ചു. വാർഡ് അംഗം പി.കെ. ജോസ് ലഹരിവിരുദ്ധ സന്ദേശം നൽകി. ഹെഡ്മിസ്ട്രസ് മിനി ജോണ്‍, അധ്യാപകരായ ജോയ്സി ജോർജ്, എം.എം. ആന്‍റണി, കെ.എം. നൗഫൽ, ധന്യ സഖറിയാസ്, സിസ്റ്റർ മെറിൻ, അലീന വർഗീസ്, കെ.ജെ. എൽദോസ്, സജി വർഗീസ് എന്നിവർ നേതൃത്വം നൽകി.

കടമാൻതോട് പദ്ധതിയുമായി സർക്കാർ മുന്നോട്ട്: വീണ്ടും തീപിടിച്ച് വാദപ്രതിവാദം

കൽപ്പറ്റ: കബനി ജലത്തിൽ കേരളത്തിനു അവകാശപ്പെട്ട വിഹിതത്തിന്‍റെ ഭാഗം ഉപയോഗപ്പെടുത്തുന്നതിനും പുൽപ്പള്ളി, മുള്ളൻകൊല്ലി പഞ്ചായത്തുകളിൽ വേനലിലും ജല ലഭ്യത ഉറപ്പുവരുത്തുന്നതിനും വിഭാവനം ചെയ്ത കടമാൻതോട് പദ്ധതിയുമായി ജലവിഭവ വകുപ്പും സർക്കാരും മുന്നോട്ടുപോകുന്നതിനെ അനുകൂലിച്ചും എതിർത്തും ജനം. കടമാൻതോട് പദ്ധതിക്കു ഡിപിആർ തയാറാക്കുന്നതിന് സർക്കാർ ഭരണാനുമതി നൽകിയ വിവരം പുറത്തുവന്നതോടെ പുൽപ്പള്ളി, മുള്ളൻകൊല്ലി പഞ്ചായത്തുകളിൽ ആളുകൾ ഭിന്ന ചേരികളിലായി. സർക്കാർ നടപടി സ്വാഗതം ചെയ്യുന്ന ഒരു വിഭാഗം പദ്ധതി അടിയന്തര പ്രാധാന്യത്തോടെ നടപ്പാക്കണമെന്ന നിലപാടിലാണ്. എന്നാൽ കുടിയേറ്റപ്രദേശങ്ങളിൽ ജനജീവിതത്തിന്‍റെ ഗതിമാറ്റത്തിനു കാരണമാകുന്ന പദ്ധതി ഉപേക്ഷിക്കണമെന്ന പക്ഷത്തിലാണ് മറുവിഭാഗം. 1990ൽ രൂപീകരിച്ച കാവേരി നദീജലതർക്ക ട്രിബ്യൂണലിന്‍റെ 2007ലെ അന്തിമ വിധിയനുസരിച്ച് കബനി ജലത്തിൽ 21 ടിഎംസി വയനാടിനു അവകാശപ്പെട്ടതാണ്. ഇതിൽ ഏകദേശം ഒന്പത് ടിഎംസി വെള്ളമാണ് ബാണാസുര, കാരാപ്പുഴ അണകളിലടക്കം ജില്ലയിൽ ഉപയോഗപ്പെടുത്തുന്നത്. ബാക്കി ജലം പ്രയോജനപ്പെടുത്തുന്നതിന് വിഭാവനം ചെയ്തതിൽ പ്രധാനപ്പെട്ടതാണ് കടമാൻ തോട് പദ്ധതി. മാനന്തവാടി എടവക തൊണ്ടാർ പദ്ധതിയും ജലിവിഭവ വകുപ്പിന്‍റെ സജീവ പരിഗണനയിലുണ്ട്. ഈ പദ്ധതിക്കു ഡിപിആർ തയാറാക്കുന്നതിനും ഭരണാനുമതിയായിട്ടുണ്ട്. ജില്ലയുടെ മറ്റുഭാഗങ്ങളെ അപേക്ഷിച്ച് വളരെ കുറഞ്ഞ അളവിൽ മഴ ലഭിക്കുന്നതാണ് കർണാടകയോടു ചേർന്നുള്ള മുള്ളൻകൊല്ലി, പുൽപ്പള്ളി പഞ്ചായത്തുകൾ. വേനൽക്കാലങ്ങളിൽ രണ്ട് പഞ്ചായത്തുകളിലെയും പല പ്രദേശങ്ങളും വരൾച്ചയുടെയും കുടിവെള്ള ക്ഷാമത്തിന്‍റെയും പിടിയിലാകാറുണ്ട്. അതിനാൽ കടമാൻ തോട് പദ്ധതി അനിവാര്യതയാണെന്നാണ് മുള്ളൻകൊല്ലി പഞ്ചായത്തിലെ ജനങ്ങളുടെ പൊതു അഭിപ്രായം. പുൽപ്പള്ളി പഞ്ചായത്ത് നിവാസികളിൽ ഭൂരിപക്ഷവും ഇതോടു യോജിക്കുന്നവരാണ്. എന്നാൽ പുൽപ്പള്ളി ആനപ്പാറയ്ക്കു സമീപം അണക്കെട്ട് നിർമിക്കുന്നതോടെ മുങ്ങിപ്പോകുന്ന പ്രദേശങ്ങളിൽ താമസിക്കുന്നവരിൽ നല്ലൊരു പങ്കും പദ്ധതിക്ക് എതിരാണ്. ഡാം വിരുദ്ധ സമിതി രൂപീകരിച്ച് പ്രവർത്തിക്കുന്ന ഇവർക്ക് പുൽപ്പള്ളിയിലെ കോണ്‍ഗ്രസ് നേതാക്കളിൽ ചിലരുടെയും വയനാട് പ്രകൃതി സംരക്ഷണ സമിതി ഉൾപ്പെടെ ഏതാനും പരിസ്ഥിതി സംഘടനകളുടെയും പിന്തുണയുണ്ട്. കടമാൻതോട് പദ്ധതിയുടെ ഭൂതല, ലിഡാർ സർവേ നേരത്തേ പൂർത്തിയായതാണ്. 2023 നവംബറിലാണ് ലിഡാർ സർവേ അവസാനിച്ചത്. ജലവിഭവ വകുപ്പ് ഉദ്യോഗസ്ഥരുടെ മേൽനോട്ടത്തിൽ ഡൽഹി ആസ്ഥാനമായുള്ള സ്വകാര്യ കന്പനിയാണ് സർവേ നടത്തിയത്. പ്രദേശത്തിന്‍റെ ഭൂഘടന, കെട്ടിടങ്ങൾ, റോഡുകൾ, തോടുകൾ, കൃഷിസ്ഥലങ്ങൾ, ആയക്കെട്ട് ഏരിയ തുടങ്ങിയവ സംബന്ധിച്ച വിവരശേഖരണം സർവേയുടെ ഭാഗമായി നടന്നു. ഭൂതല, ലിഡാർ സർവേ റിപ്പോർട്ടുകൾ സംയോജിപ്പിച്ചണ് പദ്ധതിയുടെ അന്തിമ രൂപരേഖ തയാറാക്കേണ്ടത്. കടമാൻതോട് പദ്ധതി നടപ്പാക്കണമെന്നാണ്പുൽപ്പള്ളി, മുള്ളൻകൊല്ലി പ്രദേശങ്ങളിലെ എൽഡിഎഫ് നേതക്കളുടെയും പ്രവർത്തകരുടെയും അഭിപ്രായം. നാടിന്‍റെയും ജനങ്ങളുടെയും ഭാവിയെ സംബന്ധിച്ചിടത്തോളം പദ്ധതി സുപ്രധാനമാണെന്ന് സിപിഎം ജില്ലാ കമ്മിറ്റിയംഗവും പുൽപ്പള്ളി ഏരിയ മുൻ സെക്രട്ടറിയുമായ എം.എസ്. സുരേഷ്ബാബു പറഞ്ഞു. ജനങ്ങളുടെ ആശങ്ക ദൂരീകരിച്ചും മുങ്ങിപ്പോകുന്ന പ്രദേശങ്ങളിലെ ജനങ്ങളുടെ കൈവശമുള്ള ഭൂമിയും മറ്റു സ്വത്തുക്കളും ഏറ്റവും ഉയർന്ന വിലയും നഷ്ടപരിഹാരവും നൽകി ഏറ്റെടുത്തും പദ്ധതി നടപ്പാക്കണമെന്ന് അദ്ദേഹം ആവശ്യപ്പെട്ടു. ജനഹിതം കണക്കിലെടുക്കാതെയാണ് പദ്ധതി പ്രവർത്തനങ്ങളുമായി സർക്കാർ മുന്നോട്ടുപോകുന്നതെന്ന് ഡാം വിരുദ്ധ കർമ സമിതി ചെയർമാൻ ബേബി തയ്യിൽ പറഞ്ഞു. സമിതി എല്ലാ സാധ്യതകളും ഉപയോഗപ്പെടുത്തി പദ്ധതിയെ എതിർക്കുമെന്ന് അദ്ദേഹം വ്യക്തമാക്കി. പുൽപ്പള്ളി, മുള്ളൻകൊല്ലി പഞ്ചായത്തുകളിൽ കാർഷിക, ഗാർഹിക ആവശ്യങ്ങൾക്കുള്ള ജല ലഭ്യത ഉറപ്പുവരുത്തുന്നതിന് ചെറുകിട പദ്ധതികൾ പര്യാപ്തമാണെന്ന് ബേബി പറഞ്ഞു. വയനാടിനും കർഷകർക്കും ആവശ്യമുള്ളതല്ല കടമാൻതോട്, തൊണ്ടാർ പദ്ധതികളെന്ന് പ്രകൃതി സംരക്ഷണ സമിതി പ്രസിഡന്‍റ് എൻ. ബാദുഷ, സെക്രട്ടറി തോമസ് അന്പലവയൽ എന്നിവർ പറഞ്ഞു. ജില്ലയിൽ കാരാപ്പുഴയിലും പടിഞ്ഞാറത്തറയിലും വൻകിട ജല പദ്ധതികളുണ്ട്. മുള്ളൻകൊല്ലി പഞ്ചായത്ത് അതിർത്തിയിൽനിന്നു ഏറെ അകലെയല്ല കർണാടകയിലെ ബീച്ചനഹള്ളി ഡാം. ഇനിയും വൻകിട അണകളെ താങ്ങാനുള്ള ശേഷി ജില്ലയ്ക്കില്ല. ഗൂഢ താത്പര്യങ്ങൾ ഉള്ളവർക്കാണ് കടമാൻതോട് പദ്ധതി നടപ്പാക്കണമെന്ന നിർബന്ധം. ഇക്കൂട്ടത്തിൽ അഴിമതിക്കാരായ ഉദ്യോഗസ്ഥരും രാഷ്ട്രീയ നേതാക്കളും കരാറുകാരും ഉണ്ട്. കബനി ജലം പ്രയോജനപ്പെടുത്തുന്നതിന് ചെറുകിട കുടിവെള്ള, ജലസേചന പദ്ധതികളാണ് ആവശ്യമെന്നും സമിതി ഭാരവാഹികൾ പറഞ്ഞു.

ഇഞ്ചിക്കർഷകർക്കു മറ്റൊരു പ്രഹരമായി പൈറിക്കുലാരിയ രോഗവ്യാപനം

കൽപ്പറ്റ: വയനാട്ടിലും കർണാടകയുടെ വിവിധ ഭാഗങ്ങളിലുമുള്ള ഇഞ്ചിക്കർഷകർക്ക് മറ്റൊരു പ്രഹരമായി പൈറിക്കുലാരിയ രോഗ വ്യാപനം. ജില്ലയുടെ വിവിധ ഭാഗങ്ങളിലും കർണാടകയിലെ കൂർഗ്, മൈസൂരു, ഹാസൻ, ചാമരാജ്നഗർ, ഷിമോഗ ജില്ലകളിലും ഇഞ്ചിക്കൃഷിയിടങ്ങളെ രോഗം കടന്നാക്രമിക്കുകയാണ്. രോഗബാധയേറ്റ ഇഞ്ചിച്ചെടിയുടെ ഇലകളും തണ്ടും മഞ്ഞനിറമാകുകയും പിന്നീട് കരിയുകയുമാണ്. രോഗബാധയുള്ള ചെടിയുടെ വേരിലും കിഴങ്ങിലും പ്രത്യക്ഷത്തിൽ കുഴപ്പം കാണുന്നില്ലെങ്കിലും കനത്ത ഉത്പാദനനഷ്ടം നേരിടേണ്ടിവരുമെന്ന ആശങ്കയിലാണ് കർഷകർ. ഇഞ്ചിച്ചെടികളിൽ കിഴങ്ങിന്‍റെ വളർച്ചാഘട്ടത്തിലാണ് ഇലകളും തണ്ടും നശിക്കുന്നത്. ഇത് കിഴങ്ങിന്‍റെ വളർച്ച മുരടിക്കുന്നതിനിടയാക്കുമെന്ന് കർഷകർ പറയുന്നു. കർണാടകയിൽ പൊതുവെ നവംബർ, ഡിസംബർ മാസങ്ങളിലാണ് ഇഞ്ചി വിളവെടുപ്പിന് പാകമാകുന്നത്. ഇഞ്ചിക്ക് ഉത്പാദനച്ചെലവിന് ആനുപാതികമായ വില ഇല്ലാത്തതിന്‍റെ വേദനയിൽ കഴിയുന്പോഴാണ് പൈറിക്കുലാരിയ രോഗം കർഷകർക്ക് തലവേദനയായത്. ഈ രോഗം കർണാടകയിൽ ചോളം കൃഷിയെയും ബാധിക്കുന്നുണ്ട്. ചോളത്തിന്‍റെ ഇലകളിൽ വെളുപ്പുനിറമാണ് പടരുന്നത്. അരി, ഗോതന്പ്, ബാർലി തുടങ്ങിയ മോണോകോട്ട് സസ്യങ്ങളിൽ ബ്ലാസ്റ്റ് രോഗത്തിനു ഇടയാക്കുന്ന പൈറികുലാരിയ ഫംഗസ് രോഗം ഇഞ്ചിപ്പാടങ്ങളിൽ കണ്ടെത്തിയിട്ട് അധികകാലമായില്ല. കഴിഞ്ഞവർഷം കൂർഗ് ജില്ലയുടെ വിവിധ ഭാഗങ്ങളിൽ ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പൈസസ് റിസർച്ചിലെ(കോഴിക്കോട്) വിദഗ്ധർ ഈ രോഗം തിരിച്ചറിഞ്ഞിരുന്നു. ഒരു ചെടിയിൽ പിടിപെട്ടാൽ മണിക്കൂറുകൾക്കുള്ളിൽ കൃഷിയിടമാകെ വ്യാപിക്കുന്നതാണ് രോഗം. മാസങ്ങൾ നീണ്ട പരിശ്രമത്തിലൂടെയാണ് കൂർഗിൽ ഇഞ്ചിക്കൃഷിക്ക് പുതിയ ഭീഷണിയായത് പൈറിക്കുലാരിയ ഫംഗസ് രോഗമാണെന്ന് വിദഗ്ധർ സ്ഥിരീകരിച്ചത്. കൂർഗിലെ പ്രത്യേക കാലാവസ്ഥയാണ് രോഗത്തിനും വ്യാപനത്തിനും കാരണമെന്നാണ് വിദഗ്ധർ അഭിപ്രായപ്പെട്ടത്. കർണാടകയുടെ മറ്റു ഭാഗങ്ങളിലും കേരളത്തിലും ഈ രോഗം ഉപദ്രവമാകില്ലെന്നായിരുന്നു അവരുടെ അനുമാനം. ഇതിനു വിരുദ്ധമായാണ് രോഗവ്യാപനം. രോഗനിയന്ത്രണത്തിന് പ്രത്യേക ഇനം കുമിൾനാശിനികളുടെ നിശ്ചിത അളവിലും സമയങ്ങളിലുമുള്ള പ്രയോഗമാണ് വിദഗ്ധർ ശിപാർശ ചെയ്യുന്നത്.

കോണ്‍ഗ്രസുകാർ വി.എസ്. ജോയിയെ മാതൃകയാക്കണം: കെപിസിസി പ്രസിഡന്‍റ്

കൽപ്പറ്റ: തദ്ദേശ തെരഞ്ഞെടുപ്പിന് ഒരുങ്ങുന്ന കോണ്‍ഗ്രസുകാർ മലപ്പുറം ഡിസിസി പ്രസിഡന്‍റ് വി.എസ്. ജോയിയെ മാതൃകയാക്കണമെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. ചന്ദ്രഗിരി ഓഡിറ്റോറിയത്തിൽ കോണ്‍ഗ്രസ് ജില്ലാ സമരസംഗമവും വാർഡ് പ്രസിഡന്‍റുമാർക്കുള്ള തിരിച്ചറിയൽ കാർഡ് വിതരണവും ഉദ്ഘാടനം ചെയ്യുകയായിരുന്നു അദ്ദേഹം. നിലന്പൂർ ഉപതെരഞ്ഞെടുപ്പിൽ സ്ഥാനാർഥിയാക്കുന്നതിന് വി.എസ്. ജോയിയുടെയും ആര്യാടൻ ഷൗക്കത്തിന്‍റെയും പേരുകളാണ് ഉയർന്നുവന്നത്. വിവിധതലങ്ങളിൽ കൂടിയാലോചനയ്ക്കുശേഷം ആര്യാടൻ ഷൗക്കത്തിനെ സ്ഥാനാർഥിയായി പ്രഖ്യാപിച്ചു. സ്ഥാനാർഥിത്വം ലഭിക്കാതിരുന്ന വി.എസ്. ജോയി പ്രവർത്തനത്തിൽനിന്നു പിന്നാക്കം പോകുകയല്ല ചെയ്തത്. യുഡിഎഫ് സ്ഥാനാർഥിയുടെ വിജയത്തിന് മുൻനിരയിൽനിന്ന് കഠിനാധ്വാനം ചെയ്തു. ഇത് മാതൃകയാണ്. തദേശ തെരഞ്ഞെടുപ്പിൽ ത്രിതല പഞ്ചായത്ത് വാർഡുകളിലും മുനിസിപ്പാലിറ്റികളിലും സ്ഥാനാർഥിയാക്കുന്നതിന് ഒന്നിലധികം പേരുകൾ നിർദേശിക്കപ്പെട്ടേക്കാം. സ്ഥാനാർഥിയെ തീരുമാനിച്ചുകഴിഞ്ഞാൽ പ്രവർത്തനം ഒറ്റക്കെട്ടാകണം. അർഹത മാത്രം മാനദണ്ഡമാക്കിയായിരിക്കും സ്ഥാനാർഥി നിർണയം. ഒരാളെയും നൂലിൽക്കെട്ടി ഇറക്കില്ല. കുറ്റമറ്റ വോട്ടർ പട്ടിക ഉണ്ടാകുന്നതിലടക്കം കോണ്‍ഗ്രസ് പ്രവർത്തകർ ജാഗ്രത പുലർത്തണം. ജനകീയ പ്രശ്നങ്ങൾ ഏറ്റെടുക്കുന്നതിന്‍റെ ഭാഗമായാണ് പാർട്ടി ജില്ലകൾ തോറും സമരസംഗമം സംഘടിപ്പിക്കുന്നത്. ഇതിനകം നടന്ന സമരസംഗമങ്ങളിൽ ഏറ്റവും മികച്ചത് മൂന്നു അസംബ്ലി മണ്ഡലങ്ങൾ മാത്രമുള്ള വയനാട്ടിലേതാണ്. കാർഷിക മേഖലയിലെ പ്രതിസന്ധി, അനുദിനം വർധിക്കുന്ന വന്യജീവി ശല്യം, നിത്യോപയോഗസാധനങ്ങളുടെ വിലക്കയറ്റം, തൊഴിലില്ലായ്മ, പട്ടികവർഗക്കാർക്കിടയിലെ ഭൂ, ഭവന രാഹിത്യം... ഇങ്ങനെ നീളുന്നതാണ് ജില്ലയിലെ ജനകീയ പ്രശ്നങ്ങൾ. ഇതിനൊന്നും പരിഹാരം കാണാൻ ഇടതുസർക്കാരിനു കഴിയുന്നില്ല. വന്യജീവി ആക്രമണ പ്രശ്നത്തിൽ പലപ്പോഴായി കോണ്‍ഗ്രസ് പ്രതിനിധികൾ നിയമസഭയിൽ കൊണ്ടുവന്ന അടിയന്തര പ്രമേയത്തിന് അവതരണാനുമതി ലഭിച്ചില്ല. ഇടതു സർക്കാർ ബജറ്റുകളിൽ വയനാട് പാക്കേജ് ആവർത്തിച്ച് പ്രഖ്യാപിച്ചെങ്കിലും ഒന്നും നടന്നില്ലെന്നും കെപിസിസി പ്രസിഡന്‍റ് പറഞ്ഞു. ഡിസിസി പ്രസിഡന്‍റ് എൻ.ഡി. അപ്പച്ചൻ അധ്യക്ഷത വഹിച്ചു. കെപിസിസി വർക്കിംഗ് പ്രസിഡന്‍റുമാരായ ഷാഫി പറന്പിൽ എംപി, എ.പി. അനിൽകുമാർ എംഎൽഎ, ജില്ലയുടെ ചുമതലയുള്ള കെപിസിസി ജനറൽ സെക്രട്ടറി അഡ്വ.സജീവ് ജോസഫ് എംഎൽഎ, ടി. സിദ്ദിഖ് എംഎൽഎ, ഐ.സി. ബാലകൃഷ്ണൻ എംഎൽഎ, കെപിസിസി രാഷ്ടീയകാര്യ സമിതിയംഗം പി.കെ. ജയലക്ഷ്മി, കെപിസിസി എക്സിക്യുട്ടീവ് കമ്മിറ്റിയംഗങ്ങളായ കെ.എൽ. പൗലോസ്, കെ.ഇ. വിനയൻ, കെപിസിസി സെക്രട്ടറിമാരായ ടി.ജെ. ഐസക്, എൻ.കെ. വർഗീസ്, നേതാക്കളായ പി.ടി. ഗോപാലക്കുറുപ്പ്, സംഷാദ് മരക്കാർ, എം.ജി. ബിജു, എം.എ. ജോസഫ്, അമൽ ജോയി, ചിന്നമ്മ ജോസ്, സജീവൻ മടക്കിമല തുടങ്ങിയവർ പ്രസംഗിച്ചു.

റവന്യു ഡിജിറ്റൽ കാർഡ് നവംബറോടെ നടപ്പാക്കും: മന്ത്രി കെ. രാജൻ

കൽപ്പറ്റ: സംസ്ഥാനത്ത് റവന്യു ഡിജിറ്റൽ കാർഡ് 2025 നവംബറോടെ നടപ്പാക്കുമെന്ന് റവന്യു ഭവന നിർമാണ മന്ത്രി കെ. രാജൻ. പൊതുജനങ്ങൾക്ക് ഒരേ സർട്ടിഫിക്കറ്റ് ഒരേ ആവശ്യത്തിന് ഒരേ സ്ഥാപനത്തിൽ നിന്നും ഒന്നിലധികം തവണ ലഭ്യമാക്കേണ്ട സാഹചര്യം ശ്രദ്ധയിൽപ്പെട്ടതിനാൽ ഭൂമി സംബന്ധമായ 14 ഓളം വിവരങ്ങൾ അടങ്ങിയ കാർഡ് ലഭ്യമാക്കുകയാണ് സർക്കാരിന്‍റെ ലക്ഷ്യം. മീനങ്ങാടി ഗ്രാമപ്പഞ്ചായത്ത് ഹാളിൽ നടന്ന ജില്ലാതല പട്ടയമേള ഓണ്‍ലൈനായി ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. സംസ്ഥാനത്തെ 312 വില്ലേജുകളിൽ ഡിജിറ്റൽ സർവേ പൂർത്തിയാവുകയാണ്. സർവേ പൂർത്തിയാകുന്ന മുറയ്ക്ക് എല്ലാ വില്ലേജുകളിലെയും ജനങ്ങൾക്ക് അവരുടെ ഭൂമിയും കെട്ടിടവും ഉൾപ്പെടുന്ന സന്പൂർണ വിവരങ്ങൾ അടങ്ങിയ ഡിജിറ്റൽ റവന്യു കാർഡ് വിതരണം ചെയ്യുകയാണ് ലക്ഷ്യം. ഒരു വ്യക്തിയുടെ പേരിലുള്ള ഭൂമിയുടെ നികുതി, ഭൂമിയുടെ തരം, സ്വഭാവം തുടങ്ങി ഭൂമിയുമായി ബന്ധപ്പെട്ട് ലഭിക്കേണ്ട എല്ലാ വിവരങ്ങളും ചിപ്പ് ഘടിപ്പിച്ച ഡിജിറ്റർ കാർഡ് മുഖേന ലഭിക്കും. വില്ലേജ് ഓഫീസർ ഒപ്പിടുന്ന വിശ്വസ്തതയോടെ കാർഡ് വിതരണം ചെയ്യാനുള്ള നടപടികളാണ് സ്വീകരിക്കുന്നത്. ഘട്ടംഘട്ടമായി ഡിജിറ്റൽ ലോക്കർ സംവിധാനത്തിൽ ഓരോ കുടുംബങ്ങളെ സംബന്ധിക്കുന്ന വിവരങ്ങൾ ഉൾപ്പെടുത്തും. സംസ്ഥാനത്ത് കുറഞ്ഞ കാലയളവിൽ റവന്യു വകുപ്പ് വിതരണം ചെയ്തത് 12 കോടി ഇ സർട്ടിഫിക്കറ്റുകളാണ്. ഡിജിറ്റൽ സർവേയുടെ ഭാഗമായി കണ്ടെത്തുന്ന കൈവശമുള്ളതും എന്നാൽ ആരുടെയും പേരിലല്ലാത്ത ഭൂമിയുടെ ഉടമസ്ഥതയും അർഹതയും പരിശോധിച്ച് പട്ടയം വിതരണം ചെയ്യാനുള്ള ക്രമീകരണങ്ങളും നടത്തുന്നുണ്ട്. ഭൂരഹിതരായ ഒരാളുമില്ലാത്ത കേരളം കെട്ടിപ്പടുക്കുകയാണ് സർക്കാരെന്നും മന്ത്രി കൂട്ടിച്ചേർത്തു. ഭൂരഹിതരായ മുഴുവൻ ആളുകളെയും ഭൂവുടമകളാക്കുകയാണ് സർക്കാർ. കഴിഞ്ഞ ഒന്പത് വർഷക്കാലം 4,09,000 പട്ടയങ്ങൾ വിതരണം ചെയ്തു. രണ്ടാം പിണറായി സർക്കാർ നാല് വർഷം പിന്നിടുന്പോൾ 2,02,300 പട്ടയങ്ങളും വിതരണം ചെയ്തു. 50 വർഷക്കാലമായുള്ള വിവിധ ഭൂമി പ്രശ്നങ്ങൾ പരിഹരിക്കാൻ പട്ടയ ഡാഷ് ബോർഡിലൂടെ സാധിച്ചിട്ടുണ്ടെന്നും മന്ത്രി കൂട്ടിച്ചേർത്തു. സാധാരണക്കാരായ അർഹരായ ആളുകൾക്ക് ഭൂമി ലഭിക്കാൻ നിയമങ്ങളിലോ ചട്ടങ്ങളിലോ മാറ്റം വരുത്തേണ്ടതുണ്ടെങ്കിൽ ആവശ്യമായ ഭേദഗതി വരുത്താൻ സർക്കാർ മടിക്കില്ല. അർഹതപ്പെട്ടവന് ഭൂമി എന്നതിൽ സർക്കാരിന് കൃത്യമായ ധാരണയുണ്ട്. കൈവശക്കാർ, കുടിയേറ്റക്കാർ, കയ്യേറ്റക്കാർ എന്നിവരെ ഒരു പോലെയല്ല സർക്കാർ കാണുന്നത്. കുടിയേറ്റക്കാരായ മനുഷ്യർ മറ്റു നിവർത്തികളില്ലാതെ ജീവിത ലക്ഷ്യത്തിനായി പണിയെടുക്കാനും താമസിക്കാനും കുടിയേറിയവരാണ്. പട്ടയ അർഹതയുടെ വരുമാനപരിധി രണ്ടര ലക്ഷം രൂപയായി ഉയർത്താൻ സർക്കാർ നടപടി സ്വീകരിക്കുമെന്നും മന്ത്രി പറഞ്ഞു. ലാൻഡ് അസൈൻമെന്‍റ് വിഭാഗത്തിൽ 141, മിച്ചഭൂമി ഇനത്തിൽ 66, ക്രയ സർട്ടിഫിക്കറ്റ്, ലാൻഡ് ട്രൈബ്യൂണൽ പട്ടയമായി 785, കൈവശ രേഖ (വനാവകാശം)അഞ്ച് പട്ടയങ്ങളാണ് ഇന്നലെ വിതരണം ചെയ്തത്.

ഫുട്ബോൾ താരത്തിന് നിർമിച്ച വീട് കൈമാറി

കൽപ്പറ്റ: 2022ൽ സന്തോഷ് ട്രോഫി നേടിയ കേരള ടീം അംഗം റാഷിദിന് ടി. സിദ്ദിഖ് എംഎൽഎയുടെ കെയർ പദ്ധതിയിൽ മുണ്ടേരിയിൽ നിർമിച്ച ഉമ്മൻചാണ്ടി ഭവനം കൈമാറി. വിവിധ സംഘടനകളുടെയും ഉദാരമനസ്കരുടെയും ഖത്തർ ഇൻകാസിന്‍റെയും സഹകരണത്തോടെ നിർമാണം പൂർത്തിയാക്കിയ വീടിന്‍റെ താക്കോൽദാനം കെപിസിസി പ്രസിഡന്‍റ് സണ്ണി ജോസഫ് എംഎൽഎയും ആധാര കൈമാറ്റം എ.പി. അനിൽകുമാർ എംഎൽഎയും നിർവഹിച്ചു. ടി. സിദ്ദിഖ് എംഎൽഎ അധ്യക്ഷത വഹിച്ചു. സജീവ് ജോസഫ് എംഎൽഎ, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, പി.പി. ആലി, ടി. ഹംസ, റസാഖ് കൽപ്പറ്റ, പി.ടി. ഗോപാലകുറുപ്പ്, ടി.ജെ. ഐസക്, എം.എ. ജോസഫ്, ചന്ദ്രിക കൃഷ്ണൻ, ഹാരിസ് കണ്ടിയൻ, കെ.ഇ. വിനയൻ, കെ.കെ. ഉസ്മാൻ, സിദ്ദിഖ് കുറായിൽ തുടങ്ങിയവർ പങ്കെടുത്തു.

സഹപാഠി സംഗമം വേറിട്ടതായി

വാഴവറ്റ: മാനസിക അസ്വാസ്ഥ്യവും വൈഷ്യമ്യങ്ങളും അനുഭവിക്കുന്ന സഹോദരരെ പുനരധിവസിപ്പിച്ചിരിക്കുന്ന അഗതിമന്ദിരത്തിൽ സഹായമെത്തിച്ച് സഹപാഠികളുടെ വേറിട്ട ഒത്തുചേരൽ. മേപ്പാടി ഗവ. ഹൈസ്കൂളിൽ 1986 - 1987 ബാച്ചിലെ സഹാപാഠികളുടെ കൂട്ടായ്മ ഓർമ്മച്ചെപ്പിന്‍റെ ആഭിമുഖ്യത്തിലാണ് വിജയ മംഗളം എന്ന പേരിൽ വാഴവറ്റ ജ്യോതി നിവാസ് അഗതിമന്ദിരത്തിൽ ഒത്തുചേരൽ സംഘടിപ്പിച്ചത്. ഐ.സി. ബാലകൃഷ്ണൻ എംഎൽഎ പരിപാടി ഉദ്ഘാടനം ചെയ്തു. കൂട്ടായ്മയിലെ അംഗങ്ങളുടെ മക്കളിൽ എസ്എസ്എൽസി, പ്ലസ് ടു പരീക്ഷയിൽ ഉന്നത വിജയം നേടിയവർക്ക് അദ്ദേഹം മെമന്‍റോ നൽകി. പോലീസ് ഓഫീസർ ജബലുറഹ്മാൻ, ജ്യോതി നിവാസ് ഡയറക്ടർ ജോണി, കലാകാരനും എഴുത്തുകാരനുമായ റഷീദ് എന്നിവരെ ആദരിച്ചു. ഓർമ്മച്ചെപ്പ് കൂട്ടായ്മ പ്രസിഡന്‍റ് വി.എസ്. ബെന്നി അധ്യക്ഷത വഹിച്ചു. മുട്ടിൽ ഗ്രാമപ്പഞ്ചായത്ത് അംഗങ്ങളായ സുമ, പി.ജി. സജീവ്, ഭാരവാഹികളായ ടി.കെ. നാസർ, കെ.കെ. പ്രസാദ്, സാഹിറാബാനു, പുഷ്പ, വി. റഷീദ്, വിജയ, കെ. അഷ്റഫ്, എ.എം. നാസർ, ജോണി പള്ളിത്താഴത്ത്, അഡ്വ. മരിയാ ലൂയിസ്, നിഖിൽ എന്നിവർ പ്രസംഗിച്ചു.

അച്ചടക്ക നടപടി ചോദിച്ചുവാങ്ങരുത്: നേതാക്കൾക്ക് താക്കീതുമായി കെപിസിസി അധ്യക്ഷൻ

കൽപ്പറ്റ: കോണ്‍ഗ്രസിൽ അനൈക്യത്തിനു വളമിടുന്ന നേതാക്കൾക്കും പ്രവർത്തകർക്കും കെപിസിസി അധ്യക്ഷൻ സണ്ണി ജോസഫ് എംഎൽഎയുടെ താക്കീത്. അച്ചടക്ക നടപടി ചോദിച്ചുവാങ്ങരുതെന്ന് ചന്ദ്രഗിരി ഓഡിറ്റോറിയത്തിൽ കോണ്‍ഗ്രസ് ജില്ലാ സമരസംഗമവും വാർഡ് പ്രസിഡന്‍റുമാർക്കുള്ള തിരിച്ചറിയൽ കാർഡ് വിതരണവും ഉദ്ഘാടനം ചെയ്യവേ കെപിസിസി പ്രസിഡന്‍റ് മുന്നറിയിപ്പുനൽകി. പാടിച്ചിറയിൽ പാർട്ടി മുള്ളൻകൊല്ലി മണ്ഡലം വികസന സെമിനാറിനിടെ ഡിസിസി പ്രസിഡന്‍റ് എൻ.ഡി. അപ്പച്ചനുനേരേയുണ്ടായ കൈയേറ്റ ശ്രമത്തിന്‍റെയും ഇതേത്തുടർന്നു പാർട്ടി ജില്ലാ ഘടകത്തിലുണ്ടായ പ്രശ്നങ്ങളുടെയും പശ്ചാത്തലത്തിലായിരുന്നു കെപിസിസി അധ്യക്ഷന്‍റെ താക്കീത്. പാർട്ടിയുമായി ബന്ധപ്പെട്ട് സമീപ ദിവസങ്ങളിൽ മാധ്യമങ്ങളിൽ വരുന്നത് സന്തോഷകരമല്ലാത്ത വാർത്തകളാണ്. പാർട്ടിയിൽ ഐക്യം പരമപ്രധാനമാണ്. ഐക്യത്തിനു പോറൽ ഏൽപ്പിക്കുന്ന ഇടപെടലുകൾ നേതാക്കളുടെയും പ്രവർത്തകരുടെയും ഭാഗത്ത് ഉണ്ടാകരുത്. കോണ്‍ഗ്രസ് സമ്മേളനങ്ങളിൽ പതിവായി പങ്കെടുക്കുന്നതിലും വളരെ അധികം അണികളും അനുഭാവികളും പുറത്തുണ്ട്. അവരാണ് തെരഞ്ഞെടുപ്പുകളിൽ പാർട്ടിക്ക് വലിയ വിജയം സമ്മാനിക്കുന്നത്. നേതാക്കൾ നന്നാകണമെന്ന്് അവരെക്കൊണ്ട് പറയിക്കരുത്. പാർട്ടി അച്ചടക്കം ഓരോ കോണ്‍ഗ്രസുകാരന്‍റെയും കടമയും ഉത്തരവാദിത്വവുമാണ്. തെറ്റുകൾ സംഭവിച്ചാൽ തിരുത്തണം. സംസ്ഥാനത്ത് കോണ്‍ഗ്രസിന് ഏറ്റവും ശക്തിയുള്ള ജില്ല വയനാടാണ്. ഈ ശക്തി നിലനിർത്താനും വർധിപ്പിക്കാനും പാർട്ടി പ്രവർത്തകർ പരിശ്രമിക്കണമെന്നും സണ്ണി ജോസഫ് പറഞ്ഞു. ഡിസിസി പ്രസിഡന്‍റ് എൻ.ഡി. അപ്പച്ചൻ അധ്യക്ഷത വഹിച്ചു.

തിക്താനുഭവം പരാമർശിക്കാതെ എൻ.ഡി. അപ്പച്ചൻ

കൽപ്പറ്റ: പാടിച്ചിറയിൽ കോണ്‍ഗ്രസ് മുള്ളൻകൊല്ലി മണ്ഡലം വികസന സെമിനാറിനിടെ തനിക്കുനേരേ ഉണ്ടായ കൈയേറ്റ ശ്രമം ചന്ദ്രഗിരി ഓഡിറ്റോറിയത്തിൽ ജില്ലാ കോണ്‍ഗ്രസ് സമരസംഗമത്തിൽ പരാമർശിക്കാതെ ഡിസിസി പ്രസിഡന്‍റ് എൻ.ഡി. അപ്പച്ചൻ. ആരെയും കുത്തിനോവിക്കാതെയും പാർട്ടിയോടുള്ള പ്രതിബദ്ധത വ്യക്തമാക്കിയുമായിരുന്നു അദ്ദേഹത്തിന്‍റെ അധ്യക്ഷ പ്രസംഗം. അവസാന ശ്വാസം വരെ പാർട്ടിക്കുവേണ്ടി പ്രവർത്തിക്കണമെന്നാണ് ആഗ്രഹം. പാർട്ടിയിലെ സ്ഥാനം അപ്രധാനമാണ്. ഇപ്പോൾ വഹിക്കുന്ന ഡിസിസി പ്രസിഡന്‍റ് സ്ഥാനം ആഗ്രഹിക്കാതെയും പരിശ്രമിക്കാതെയും വന്നുചേർന്നതാണ്. മുന്പ് ഡിസിസി അധ്യക്ഷനായിരുന്നപ്പോഴും ഉത്തരവാദിത്വം സാധ്യമായവിധം നിറവേറ്റിയിട്ടുണ്ട്. ജില്ലയിലെ കോണ്‍ഗ്രസ് പ്രവർത്തകരുമായുള്ളത് ആത്മബന്ധമാണ്. ഇതാണ് ഈ പ്രായത്തിലും ഓടിനടന്നു പ്രവർത്തിക്കുന്നതിനു പ്രചോദനമാകുന്നത്. വരുന്ന തദ്ദേശ തെരഞ്ഞെടുപ്പിൽ ജില്ലയിലെ 23 പഞ്ചായത്തുകളിലും മൂന്നു മുനിസിപ്പാലിറ്റികളിലും മികച്ച പ്രകടനം കാഴ്ചവയ്ക്കാൻ കോണ്‍ഗ്രസിനും യുഡിഎഫിനും കഴിയണം. അടുത്ത നിയമസഭാ തെരഞ്ഞെടുപ്പ് കഴിയുന്പോൾ കോണ്‍ഗ്രസിൽനിന്നുള്ള ഒരു നേതാവ് മുഖ്യമന്ത്രിയാകണം. തെരഞ്ഞെടുപ്പ് വിജയത്തിന് ഓരോ കോണ്‍ഗ്രസ് പ്രവർത്തകനും കഠിനപ്രയത്നം നടത്തണമെന്നും അപ്പച്ചൻ പറഞ്ഞു.

കെഎസ്ടിജിഎ വിദ്യാഭ്യാസ അവാർഡുകൾ വിതരണം ചെയ്തു

കയ്യൂന്നി: കെഎസ്ടിജിഎ(കയ്യൂന്നി ചെറുകിട തേയില കർഷക സംഘം) കരിയർ സെൽ വിദ്യാഭ്യാസ അവാർഡുകൾ വിതരണം ചെയ്തു. സംഘത്തിന്‍റെ പ്രവർത്തന പരിധിയിലുള്ള കയ്യൂന്നി ജിഎച്ച്എസ്, ചേരന്പാടി ജിഎച്ച്എസ്എസ്, എരുമാട് ജിഎച്ച്എസ്എസ്, എരുമാട് നീലഗിരി മെട്രിക്യുലേഷൻ സ്കൂൾ, കയ്യൂന്നി സേക്രഡ് ഹാർട്ട് മെട്രിക്കുലേഷൻ സ്കൂൾ എന്നിവിടങ്ങളിൽ കഴിഞ്ഞ അധ്യയന വർഷം എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ 16 കുട്ടികൾക്കും വിവിധ വിഷയങ്ങളിൽ പിഎച്ച്ഡി നേടിയ അരുണ്‍ ജോണ്‍, ബി. ശ്രീനയന, ലിന്േ‍റാ സിബി, പി.ടി. അനുമോൾ, എം.ആർ. മഞ്ജുഷ എന്നിവർക്കുമാണ് അവാർഡ് നൽകിയത്. പൊത്തുകൊല്ലി കഐസ്ടിജിഎ ഹാളിൽ നടന്ന ചടങ്ങ് ചേരന്പാടി ഗവ.ഹയർ സെക്കൻഡറി സ്കൂൾ ഹെഡ്മാസ്റ്റർ ഡോ.സി.എ. കൃഷ്ണദാസ് ഉദ്ഘാടനം ചെയ്തു. കരിയർ സെൽ കണ്‍വീനർ എ.ഒ. ജോയി അധ്യക്ഷത വഹിച്ചു. കൂട് ട്രസ്റ്റ് ഡയറക്ടർ ഡോ.കെ.ജെ. സണ്ണി മുഖ്യാതിഥിയായി. റിട്ട.അധ്യാപകൻ കെ.പി. ജാഫർ, ഡോ.കെ.ജെ. സണ്ണി എന്നിവരെ ആദരിച്ചു. ഡോ.സി.എ. കൃഷ്ണദാസ്, ഡോ.കെ.ജെ. സണ്ണി, ഭാസ്കരൻ മാസ്റ്റർ, ടി.ജെ. പവീണ്‍, ഫിലിപ്പ് മാസ്റ്റർ, മുൻ വർഷത്തെ പ്ലസ് ടു സ്റ്റേറ്റ് അവാർഡ് ജേത്രി അഭിയ അലക്സ് എന്നിവർ അവാർഡ് വിതരണം നിർവഹിച്ചു. കെഎസ്ടിജിഎ പ്രസിഡന്‍റ് ജോസ് കുര്യൻ സ്വാഗതവും സെക്രട്ടറി എം. രാജീവ് നന്ദിയും പറഞ്ഞു.

ലഹരി ഭൂതത്തെ കത്തിച്ച് ലഹരിക്കെതിരെ പോരാടി നടവയൽ സെന്‍റ് തോമസ് എൽപി സ്കൂൾ

നടവയൽ: ലഹരി നിർമാർജന സന്ദേശം വിദ്യാർഥികളിലേക്ക് ആഴത്തിൽ ഉറപ്പിക്കാൻ ദൃശ്യ അവസരം ഒരുക്കി നടവയൽ സെന്‍റ് തോമസ് എൽപി സ്കൂൾ. സ്കൂളിൽ നിർമിച്ച ലഹരി ഭൂതത്തെ അഗ്നിക്കിരയാക്കിയാണ് തങ്ങൾ ലഹരി ഉപേക്ഷിക്കുന്നു എന്ന വാക്യങ്ങൾ കുട്ടികൾ ആവർത്തിച്ചത്. കുട്ടികൾക്ക് ലഹരി ഉപേക്ഷിക്കേണ്ടതിന്‍റെ ആവശ്യകതയെക്കുറിച്ച് ഹെഡ്മാസ്റ്റർ ബെന്നി സന്ദേശം നൽകി. അധ്യാപകരായ സിസ്റ്റർ മഞ്ജു ജോണ്‍, മാത്യു, സിന്‍റ, നീതു, ഐശ്വര്യ എന്നിവർ പ്രസംഗിച്ചു. പിടിഎ പ്രസിഡന്‍റ് വിജേഷ് കോയിക്കാട്ടിൽ, മദർ പിടിഎ പ്രസിഡന്‍റ് സോണിയ പതിക്കൽ, രക്ഷാകർത്തൃ പ്രതിനിധികൾ എന്നിവരും ചടങ്ങിൽ പങ്കെടുത്തു.

കർഷക കടാശ്വാസ കമ്മീഷൻ അദാലത്ത്: 600 അപേക്ഷകൾ പരിഗണിച്ചു

കൽപ്പറ്റ: സംസ്ഥാന കർഷക കടാശ്വാസ കമ്മീഷൻ കളക്ടറേറ്റിൽ നടത്തുന്ന മൂന്നു ദിവസത്തെ അദലാത്തിന്‍റെ ആദ്യ ദിനത്തിൽ 600 അപേക്ഷകൾ പരിഗണിച്ചു. 2020 ഓഗസ്റ്റ് 31ന് മുന്പുള്ള കാർഷിക വായ്പകൾ സംബന്ധിച്ച അപേക്ഷകളാണ് പരിഗണിച്ചത്. കമ്മീഷൻ അംഗങ്ങളായ എൻ.യു. ജോണ്‍കുട്ടി, അഡ്വ.കെ.ആർ. രാജൻ, പി.എം. ഇസ്മയിൽ, ജോസ് പാലത്തിനാൽ, കെ.സി. വിജയൻ എന്നിവർ പങ്കെടുത്തു. അദാലത്ത് ഇന്നും നാളെയും തുടരും.

നഞ്ച കൃഷിക്കൊരുങ്ങി മാനന്തവാടിയിലെ പാടശേഖരങ്ങൾ

മാനന്തവാടി: ട്രാക്ടറും ടില്ലറുമുപയോഗിച്ച് നഞ്ച കൃഷിക്കായി പാടം ഉഴുതുമറിക്കുന്ന തിരക്കിലാണ് മാനന്തവാടിയിലും പരിസര പ്രദേശങ്ങളിലുമുള്ള പാടശേഖരങ്ങളിലെ കർഷകർ. നിലമൊരുക്കിയ ശേഷം ഓഗസ്റ്റ് ആദ്യ വാരം മുതൽ വിതയും നാട്ടിയും ആരംഭിക്കും. ഒരാഴ്ച മുന്പ് മുതൽ നിലമൊരുക്കൽ തുടങ്ങിയിരുന്നു. ഇനിയും ഒട്ടേറെ വയലുകൾ ഒരുക്കാനുള്ളതിനാൽ കർഷക ത്തൊഴിലാളികളും തിരക്കിലാണ്. മാനന്തവാടിയിലെ വിശാലമായ പാടശേഖരങ്ങളിൽ ചിലതായ വേമം, കൊയിലേരി, ആറാട്ടുതറ എന്നിവിടങ്ങളിലെല്ലാം നിലമൊരുക്കൽ തകൃതിയായി നടക്കുന്നുണ്ട്. നിലം ഉഴുതുമറിക്കുന്പോൾ കൊറ്റികൾ കൂട്ടംകൂടി ഇര തേടുന്നത് സീസണിലെ സാധാരണ കാഴ്ചയാണ്. ആയിരം കണ്ണി, ആതിര, കുള്ളൻ ആതിര, പവിഴം, ഉമ തുടങ്ങിയ വിത്തിനങ്ങളെല്ലാം കർഷകർ കൃഷിക്കുപയോഗിക്കുന്നുണ്ട്. ചിലവേറിയതിനാൽ ഞാറു പറിച്ചു നടന്നതിന് പകരം നേരിട്ടുള്ള വിത പിന്തുടരുന്നവരുമുണ്ട്. ലാഭനഷ്ടങ്ങൾ നോക്കാതെ മുടങ്ങാതെ എല്ലാ വർഷവും കൃഷിയിറക്കുന്നവരാണ് ഈ ഭാഗങ്ങളിലെ നെൽകർഷകർ.

തൊഴിൽ അന്വേഷകരുടെ സംഗമം നടത്തി

സുൽത്താൻ ബത്തേരി: ’ഓണത്തിന് ഒരു ലക്ഷം തൊഴിൽ’ എന്ന വിജ്ഞാന കേരളം കാന്പയിന്‍റെ ഭാഗമായി ബത്തേരി ബ്ലോക്ക് പഞ്ചായത്തിന്‍റെ നേതൃത്വത്തിൽ തൊഴിൽ അന്വേഷകരുടെ സംഗമം നടത്തി. ട്രൈസം ഹാളിൽ ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ ഉദ്ഘാടനം ചെയ്തു. വിജ്ഞാനകേരളം ജില്ലാ മിഷൻ കോഓർഡിനേറ്റർ സി.എസ്. ശ്രീജിത്ത് അധ്യക്ഷത വഹിച്ചു. ബ്ലോക്ക് പഞ്ചായത്ത് സെക്രട്ടറി എ.എം. ബിജേഷ്, ജനറൽ എക്സ്റ്റൻഷൻ ഓഫീസർ കെ.പി. ശിവദാസൻ, വിജ്ഞാനകേരളം അസിസ്റ്റന്‍റ് കോഓർഡിനേറ്റർ ആന്‍റോ ജോസഫ്, അസാപ് കോ ഓർഡിനേറ്റർ ഷഹന, ബ്ലോക്ക് പഞ്ചായത്ത് അംഗം ഗ്ലാഡിസ് സ്കറിയ, കില കോഓർഡിനേറ്റർ ശരത്ചന്ദ്രൻ എന്നിവർ പ്രസംഗിച്ചു. തൊഴിൽ അന്വേഷകരെയും തൊഴിൽ ദാതാക്കളെയും നൈപുണ്യ പരിശീലന സ്ഥാപനങ്ങളെയും ഒരു ഡിജിറ്റൽ പ്ലാറ്റ്ഫോമിൽ കൊണ്ടുവരുന്ന ഡിജിറ്റൽ വർക്ക്ഫോഴ്സ് മാനേജ്മെന്‍റ് സിസ്റ്റം(ഡിഡബ്യുഎംഎസ്) പോർട്ടലിന്‍റെ പ്രവർത്തനരീതി വിജ്ഞാനകേരളം കോഓർഡിനേറ്റർമാർ വിശദീകരിച്ചു. 18നും 59നും ഇടയിൽ പ്രായമുള്ള അഭ്യസ്തവിദ്യരായ തൊഴിലന്വേഷകർക്ക് പോർട്ടലിൽ രജിസ്റ്റർ ചെയ്യാം. ഗ്രൂപ്പ് ഡിസ്കഷൻ, മോക്ക് ഇന്‍റർവ്യൂ, തൊഴിലിടങ്ങളിലെ ആശയവിനിമയ വൈദഗ്ധ്യം,പേഴ്സണാലിറ്റി ഡെവലപ്മെന്‍റ് ട്രെയിനിംഗ, ഇംഗ്ലീഷ് സ്കോർ ടെസ്റ്റ്, സൈക്കോമെട്രിക് ടെസ്റ്റ്, കരിയർ കൗണ്‍സലിംഗ് എന്നിവ പോർട്ടലിലൂടെ ലഭ്യമാക്കും.

കല്ലൂർ കല്ലുമുക്കിൽ കാട്ടാനശല്യം അതിരൂക്ഷം

സുൽത്താൻ ബത്തേരി: നൂൽപ്പുഴ പഞ്ചായത്തിലെ കല്ലൂർ കല്ലുമുക്കിലാണ് കാട്ടാനശല്യം അതിരൂക്ഷമായിരിക്കുന്നത്. കഴിഞ്ഞ് ഏതാനും ആഴ്ചകളായി ഒരുദിവസംപോലും ഒഴിവില്ലാതെയാണ് കാട്ടാന ഇവിടെ ഇറങ്ങുന്നത്. സന്ധ്യമയങ്ങുന്പോഴേക്കും കാടിറങ്ങുന്ന കാട്ടാന മനുഷ്യജീവനും ഭീഷണിയാകുകയാണ്. കഴിഞ്ഞദിവസം പ്രദേശവാസിയ കടന്പക്കാട് സജിയുടെ മകൻ കാട്ടാനയുടെ മുന്നിൽ നിന്ന് രക്ഷപ്പെട്ടത് തലനാരിഴയ്ക്കാണ്. വൈകുന്നേരം ഏഴോടെ കടയിൽ പോയിവരുകയായിരുന്ന സജിയുടെ മകൻ വീടിനുസമീപത്ത് വച്ചാണ് കാട്ടാനയുടെ മുന്നിൽപെട്ടത്. ആനവരുന്നത് കണ്ട് ഓടിരക്ഷപ്പെടാൻ ശ്രമിക്കുന്നതിനിടെ വീണ് പരിക്കേൽക്കുകയും ചെയ്തു. കഴിഞ്ഞവർഷം കാട്ടാന ആക്രമണത്തിൽ കർഷകൻ കൊല്ലപ്പെട്ട മാറോട് നിന്ന് എതാനും കിലോമീറ്ററുകൾ മാത്രം അകലെയാണ് കല്ലുമുക്ക് പ്രദേശം. ചക്കയും മാങ്ങയും തിന്നാനായാണ് കാട്ടാന എത്തുന്നത്. നിരന്തരം കാട്ടാന എത്തിട്ടും നടപടിയെടുക്കാത്തതിനാൽ കർഷകജനത പ്രതിഷേധത്തിലാണ്. കാട്ടാനകൾ ജനവാസമേഖലയിൽ ഇറങ്ങുന്നത് തടയാൻ നടപടികൾ കാര്യക്ഷമമാക്കണമെന്ന ആവശ്യമാണ് ഉയരുന്നത്. ഇതിനായി ജാഗ്രതസമിതി വിളിക്കാൻ വനംവകുപ്പിനോട് പ്രദേശവാസികൾ ആവശ്യപ്പെട്ടിട്ടുണ്ട്. കാട്ടാനശല്യത്തിന് പരിഹാരമായില്ലെങ്കിൽ ശക്തമായ പ്രതിഷേധവുമായി രംഗത്തിറങ്ങുമെന്നാണ് കർഷകർ നൽകുന്ന മുന്നറിയിപ്പ്.

‘കൃഷിഭൂമിയിൽ ഈട്ടിമരങ്ങൾ വളർത്തുന്നതിനും മുറിക്കുന്നതിനും കർഷകരെ അനുവദിക്കണം’

അന്പലവയൽ: പട്ടയമുള്ള കൃഷിഭൂമിയിൽ ഈട്ടിമരങ്ങൾ വളർത്തുന്നതിനും മുറിക്കുന്നതിനുമുള്ള അനുവാദം കർഷകർക്ക് നൽകണമെന്ന് കേരള കർഷക സംഘം അന്പലവയൽ വില്ലേജ് സമ്മേളനം സർക്കാരിനോട് ആവശ്യപ്പെട്ടു. നിലവിൽ കൃഷിഭൂമിയിലെ ഈട്ടിമരങ്ങൾ കർഷകർക്ക് മുറിക്കാൻ അനുവാദമില്ലാത്തതിനാൽ ആർക്കും പ്രയോജനമില്ലാത്ത നശിച്ച് പോകുന്ന സ്ഥിതിയാണുള്ളത്. ഈ കാര്യത്തിൽ സർക്കാരിന്‍റെ ഭാഗത്ത് നിന്നും കർഷകർക്ക് അനുഭാവപൂർണമായ നടപടി ഉണ്ടാകണം. കേന്ദ്രസർക്കാർ കഴിഞ്ഞ രണ്ട് വർഷം കൊണ്ട് 84,000 കോടി രൂപയുടെ വളം സബ്സിഡി വെട്ടിക്കുറച്ചു. കർഷകദ്രോഹ നിലപാടുകളിൽ നിന്നും കേന്ദ്രസർക്കാർ പിന്തിരിയണമെന്നും സമ്മേളനം ആവശ്യപ്പെട്ടു. കർഷകസംഘം ജില്ലാ കമ്മിറ്റിയംഗവും മീനങ്ങാടി ഏരിയ പ്രസിഡന്‍റുമായ സി. അസൈനാർ സമ്മേളനം ഉദ്ഘാടനം ചെയ്തു. വില്ലേജ് കമ്മിറ്റി പ്രസിഡന്‍റ് എൻ.കെ. ജോർജ് അധ്യക്ഷത വഹിച്ചു. വില്ലേജ് സെക്രട്ടറി എം.യു. പൈലിക്കുഞ്ഞ് പ്രവർത്തന റിപ്പോർട്ട് അവതരിപ്പിച്ചു. മീനങ്ങാടി ഏരിയ സെക്രട്ടറി ടി.ടി. സ്കറിയ സംഘടനാരേഖ അവതരിപ്പിച്ചു. 21 അംഗ വില്ലേജ് കമ്മിറ്റിയെയും ഏരിയ സമ്മേളന പ്രതിനിധികളെയും സമ്മേളനം തെരഞ്ഞെടുത്തു. ഭാരവാഹികൾ: എൻ.കെ. ജോർജ് (പ്രസിഡന്‍റ്), എം.യു. പൈലിക്കുഞ്ഞ് (സെക്രട്ടറി), എൻ.സി. കുര്യാക്കോസ് (ട്രഷറർ), പി.യു. സെബാസ്റ്റ്യൻ, ഗ്ലാഡിസ് സ്കറിയ (വൈസ് പ്രസിഡന്‍റുമാർ), സരുണ്‍ മാണി, ഷിനോജ് (ജോയിന്‍റ് സെക്രട്ടറിമാർ).

കാട്ടാന ആക്രമണം ; ഭീതിയൊഴിയാതെ നടവയൽ മേഖലയിൽ കാട്ടാനശല്യം രൂക്ഷം

നടവയൽ: പനമരം, പൂതാടി, കണിയാന്പറ്റ പഞ്ചായത്തുകളിലായി കിടക്കുന്ന നടവയൽ മേഖലയിൽ കാട്ടാനശല്യം രൂക്ഷമാകുന്നു. പാതിരി സൗത്ത് സ്റ്റേഷനിൽ നിന്നുള്ള കാട്ടാനയാണ് നെയ്ക്കുപ്പ, വേലിയന്പം ഭാഗങ്ങളിലെ ജനവാസ കേന്ദ്രത്തിൽ വിലസുന്നത്. കഴിഞ്ഞദിവസംരാത്രി കാടിറങ്ങിയ ആന നെയ്ക്കുപ്പ പന്നിക്കോട് ബേബി, കാരിക്കോട് ബൈജു, താഴത്തെവീട്ടിൽ ബേബി എന്നിവരുടെ വാട്ടർ ടാങ്ക്, ഇരുചക്രവാഹനം, കോഴിക്കൂട് തുടങ്ങിയവ നശിപ്പിച്ചിരുന്നു. ഈ പ്രദേശത്തെ കൃഷികളും വാഷിംഗ് മെഷീനും ആനപോയ വഴിയിലുള്ള മറ്റ് വസ്തുക്കളും ആന നശിപ്പിച്ചു. പൊക്കം കുറഞ്ഞ ചെറിയ ആനയാണ് ശല്യക്കാരനായി ജനവാസ കേന്ദ്രത്തിലെത്തുന്നത്. കഴിഞ്ഞദിവസം എത്തിയ ആനയ്ക്ക് നേരെ ടോർച്ചടിച്ചപ്പോൾ ആന വീടിന് നേരെ എത്തുകയും വാതിൽ കുത്തിത്തുറക്കാൻ ശ്രമിക്കുകയും ചെയ്തിരുന്നു. കൃഷിയിടങ്ങളിൽ നിന്നും നേരം പുലർന്ന ശേഷം മാത്രമാണ് കാട്ടാന വനത്തിലേക്ക് മടങ്ങുന്നത്. രാത്രികാലങ്ങളിൽ വൈദ്യുതവേലി ഓണാക്കുന്നതിനു മുൻപേ കാട്ടാന കൃഷിയിടത്തിൽ തന്പടിക്കുകയാണ്. കഴിഞ്ഞദിവസം ഉച്ചയോടെ ഈ പ്രദേശത്ത് തൊഴിലുറപ്പ്ജോലി ചെയ്യുന്ന തൊഴിലാളികളുടെ അടുത്തും ആന എത്തി. വനപാലകരുടെ ഭാഗത്തുനിന്നും വൻ അനാസ്ഥയാണ് ഉണ്ടാകുന്നതെന്ന് പ്രദേശവാസികൾ ആരോപിച്ചു.

തുടർച്ചയായ മഴ: ഇഞ്ചി കർഷകർ പ്രതിസന്ധിയിൽ

സുൽത്താൻ ബത്തേരി: തുടർച്ചയായി പെയ്യുന്ന മഴ കാരണം ജില്ലയിലെ ഇഞ്ചികർഷകർ പ്രതിസന്ധിയിലായി. വയലുകളിൽ ഇടവിളയായി നട്ട ഇഞ്ചിചീഞ്ഞ് നശിക്കുകയാണ്. വന്യമൃഗങ്ങളിൽ നിന്ന് സംരക്ഷിച്ചുനിറുത്തിയ ഇഞ്ചി ചീഞ്ഞ് നശിക്കുന്നത് കാരണം വലിയ സാന്പത്തിക പ്രതിസന്ധിയിലേക്കാണ് കർഷകർ കടക്കുന്നത്. വനഗ്രാമമായ നൂൽപ്പുഴ മാറോട് പ്രദേശത്ത് ഇഞ്ചികൃഷിയിറക്കിയ ഭൂരിപക്ഷം കർഷകരുടെയും ഇഞ്ചി തണ്ടുകൾ ചീഞ്ഞ് നശിക്കുകയാണ്. വയലുകളിൽ നട്ട ഇഞ്ചിയാണ് ഇത്തരത്തിൽ ചീഞ്ഞ് നശിക്കുന്നത്. തുടർച്ചയായി മഴപെയ്യുന്നതുകാരണം ചാലുകളിൽ വെള്ളം കെട്ടിനിൽക്കുന്നതാണ് നിലവിലെ പ്രശ്നത്തിന് കാരണം. മിക്കകർഷകരും കേട് കാണുന്പോഴേക്കും മരുന്നുകൾ പ്രയോഗിക്കുന്നെണ്ടിലും ഫലമപ്രദമാകുന്നില്ല. വനമേഖലയായതിനാൽ കുരങ്ങ്, മാൻ, പന്നി, കാട്ടാന അടക്കമുള്ള വന്യമൃഗങ്ങളെ പ്രതിരോധിച്ചാണ് കൃഷിയിറക്കാറ്. അതും തുടർമഴ കാരണം നശിക്കുന്ന കാഴ്ചയാണ് ജില്ലയിൽ വിവിധയിടങ്ങളിൽ.

കോൺഗ്രസ് ഫോറസ്റ്റ് ഓഫീസ് മാർച്ച് നടത്തി

പുൽപ്പള്ളി: വാകേരി മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിൽ വാകേരി മൂടക്കൊല്ലി പ്രദേശങ്ങളിൽ വർധിച്ചുവരുന്ന വന്യമൃഗ അക്രമങ്ങൾക്കെതിരേ ഇരുളം ഫോറസ്റ്റ് സ്റ്റേഷൻ ഉപരോധിച്ചു. ഉപരോധ സമരം ജില്ലാ കോണ്‍ഗ്രസ് ജില്ലാകമ്മിറ്റി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് സണ്ണി സെബാസ്റ്റ്യൻ അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ മുഖ്യപ്രഭാഷണം നടത്തി. കെപിസിസി എക്സിക്യുട്ടീവ് അംഗം കെ.എൽ. പൗലോസ്, കെ.കെ. വിശ്വനാഥൻ, വർഗീസ് മുരിയൻകാവിൽ, കോണ്‍ഗ്രസ് പഞ്ചായത്ത് പ്രസിഡന്‍റ് മിനി പ്രകാശൻ, പി.ഡി. സജി, സ്റ്റാൻഡിൽ കമ്മിറ്റി ചെയർമാൻ കെ.ജെ. സണ്ണി, പഞ്ചായത്ത് വൈസ് പ്രസിഡന്‍റ് പ്രഭാകരൻ, കെ.പി. മധു, പി.ജെ. സിജോ, കെ.ആർ. ബാലൻ, വത്സ വിജയൻ, സി.പി. ഷമീർ, സാബു നീറാകുളം തുടങ്ങിയവർ പ്രസംഗിച്ചു.

പാടിച്ചിറ ക്വാറിയിലേക്ക് ജനകീയ മാർച്ച് നടത്തി

പുൽപ്പള്ളി: മുള്ളൻകൊല്ലി ഗ്രാമപഞ്ചായത്തിലെ പാടിച്ചിറ ഗവണ്‍മെന്‍റ് ആശുപത്രിക്ക് സമീപം കൃഷിയിടത്തിൽ പ്രവർത്തിക്കുന്ന കരിങ്കൽ ക്വാറിയിലേക്ക് പ്രദേശവാസികൾ ജനകീയ മാർച്ച് സംഘടിപ്പിച്ചു. കിഴക്കേഭാഗത്ത് ഷിജു, കിഴക്കേഭാഗത്ത് ടോമി എന്നിവരുടെ കൃഷിയിടത്തിൽ മുക്കം സ്വദേശി സുകുമാരന്‍റെ ലൈസൻസിയിൽ പ്രവർത്തിക്കുന്ന ക്വാറി ജനജീവിതം പ്രതിസന്ധിയിലാക്കുന്നതായും വലിയ സ്ഫോടനത്തിന്‍റെ ഭാഗമായി ചിതറുന്ന കരിങ്കൽ ചീളുകൾ സമീപത്തെ വീടുകളിൽ പതിക്കുന്നു പ്രദേശത്തെ വീടുകൾ വിണ്ടുകീറുകയും ചെയ്യുന്നതായി പ്രദേശവാസികൾ ആരോപിച്ചു. സമീപത്തെ ബോറുകളിൽ കുടിവെള്ളത്തിന്‍റെ ലഭ്യത കുറയുകയും ജീവഹാനി ഭയന്ന് കൃഷിയിടത്തിൽ ധൈര്യമായി പണിയെടുക്കാൻ സാധിക്കുന്നുമില്ല. ക്വാറിയുടെ സമീപ പ്രദേശത്ത് കൃഷിപ്പണിക്ക് ആളെ കിട്ടുന്നില്ല. സ്വന്തം വീടിന്‍റെ മുറ്റത്ത് ധൈര്യമായി നടക്കാനോ കുട്ടികൾക്ക് വീട്ടിൽ ഇരുന്ന് പഠിക്കാൻ പോലും പറ്റാത്ത അവസ്ഥയാണ്. ക്ഷീരമേഖലയെ ആശ്രമിച്ച് മാത്രം ജീവിക്കുന്ന സമീപത്തെ ആളുകൾക്ക് പശുവിന് തീറ്റപ്പുല്ല് ശേഖരിക്കാൻ പോലും കൃഷിയിടത്തിൽ ഇറങ്ങാൻ പറ്റാത്ത അവസ്ഥയാണ്. നിയമങ്ങൾ കാറ്റിൽപറത്തി ഉദ്യോഗസ്ഥ രാഷ്ട്രീയ കൂട്ടുകെട്ടിൽ ക്വാറി പ്രവർത്തിപ്പിക്കുന്നത് അവസാനിപ്പിക്കണമെന്ന് മാർച്ച് നടത്തിയ പ്രദേശവാസികൾ ആവശ്യപ്പെട്ടു.

കൃഷിയും കർഷകനും സംരക്ഷിക്കപ്പെടണം: കെസിവൈഎം

മാനന്തവാടി: കെസിവൈഎം മാനന്തവാടി രൂപതയുടെ 31-ാമത് അർധവാർഷിക സെനറ്റ് സമ്മേളനം തരിയോട് മേഖലയുടെ നേതൃത്വത്തിൽ കുറന്പാല യൂണിറ്റിൽ നടത്തി. കെസിവൈഎം രൂപത മുൻ പ്രസിഡന്‍റ് മാത്യു തറയിൽ സെനറ്റ് സമ്മേളനം ഉദ്ഘാടനം ചെയ്തു. രൂപത പ്രസിഡന്‍റ് ബിബിൻ പിലാപ്പിള്ളിൽ അധ്യക്ഷത വഹിച്ചു. സംസ്ഥാന അംഗം റ്റിജിൻ ജോസഫ് വെള്ളപ്ലാക്കിൽ പ്രമേയം അവതരിപ്പിച്ചു. വയനാട് പോലുള്ള മലയോര മേഖലയിലെ കാർഷിക ജീവിതം നിലനിർത്തുന്നതിന് സർക്കാർ നയപരമായി ഇടപെടേണ്ടതിന്‍റെ അത്യാവശ്യത പ്രമേയത്തിലൂടെ ഉന്നയിച്ചു. വിള ഇൻഷ്വറൻസ്, കർഷക സംരക്ഷണ ബോർഡ്, വന്യമൃഗശല്യത്തിനുള്ള നഷ്ടപരിഹാര സംവിധാനം തുടങ്ങിയവ കൃത്യമായി പ്രാവർത്തികമാക്കണമെന്നും പ്രമേയം ആവശ്യപ്പെട്ടു. മേഖല, രൂപത റിപ്പോർട്ട് അവതരണവും സംഘടനാതല ചർച്ചകളും നടന്നു. എന്‍റെ ഗ്രാമം, ഗ്രീൻ ഫ്യൂച്ചർ, പ്രവർത്തനമാസാചരണം തുടങ്ങിയ പദ്ധതികളിൽ മികച്ച പ്രവർത്തനം നടത്തിയ മേഖലയെയും യൂണിറ്റുകളെയും ചടങ്ങിൽ ആദരിച്ചു. രൂപതാ ഡയറക്ടർ ഫാ. സാന്േ‍റാ അന്പലത്തറ, വൈസ് പ്രസിഡന്‍റ് ആഷ്ന പാലാരിക്കുന്നേൽ, ജനറൽ സെക്രട്ടറി വിമൽ കൊച്ചുപുരയ്ക്കൽ, സെക്രട്ടറി ഡ്യൂണ മരിയ കിഴക്കേമണ്ണൂർ, ട്രഷറർ നവീൻ പുലകുടിയിൽ, ആനിമേറ്റർ സിസ്റ്റർ റോസ് ടോം എസ്എബിഎസ് രൂപത സിൻഡിക്കേറ്റ് അംഗങ്ങൾ നേതൃത്വം നൽകി.

നടവയൽ സെന്‍റ് തോമസ് എൽപി സ്കൂൾ ലഹരിവിരുദ്ധ വാരാചരണം സംഘടിപ്പിച്ചു

നടവയൽ: സെന്‍റ് തോമസ് എൽപി സ്കൂളിലെ വിദ്യാർഥികൾ വ്യത്യസ്ത രീതിയിൽ ലഹരി വിരുദ്ധ വാരാചരണം സംഘടിപ്പിച്ചു. ലഹരി വിരുദ്ധ വാചകങ്ങൾ എഴുതിയും ലഹരിക്കെരെയുള്ള സന്ദേശങ്ങൾ പതിച്ചും ചുമരിൽ ഒട്ടിച്ച വെള്ളത്തുണിയിൽ ഒപ്പുകളും പതിപ്പിച്ചുമാണ് ലഹരി വിരുദ്ധ വാരാചരണം സംഘടിപ്പിച്ചത്. ലഹരി വിരുദ്ധ പ്രവർത്തനത്തിൽ സ്കൂൾ അസിസ്റ്റന്‍റ് മാനേജർ ഫാ. ക്രിസ്റ്റി പൂതക്കുഴിയിൽ പ്രവർത്തനത്തിൽ പങ്കെടുത്ത് ലഹരി വിരുദ്ധ സന്ദേശം നൽകി. ഒന്നു മുതൽ നാലു വരെയുള്ള ക്ലാസിലെ എല്ലാ കുട്ടികളും തങ്ങളുടെ ഒപ്പുകൾ തുണിയിൽ പതിപ്പിച്ച് ഈ പ്രവർത്തനത്തിൽ പങ്കാളികളായി. ഹെഡ്മാസ്റ്റർ ബെന്നി, സീനിയർ അസിസ്റ്റന്‍റ് മോളി, മേഴ്സി എന്നിവർ പ്രസംഗിച്ചു. അധ്യാപകർ, പിടിഎ പ്രസിഡന്‍റ് ബിജേഷ് കോയിക്കാട്ടിൽ, മദർ പിടിഎ പ്രസിഡന്‍റ് സോണിയ പതിക്കൽ, പിടിഎ അംഗങ്ങൾ രക്ഷാകർത്താക്കൾ എന്നിവർ പങ്കെടുത്തു.

നൂൽപ്പുഴ മാറോട് കർഷകൻ കാട്ടാന ആക്രമണത്തിൽ കൊല്ലപ്പെട്ടിട്ട് ഒരു വർഷം: വാഗ്ദാനം പാലിക്കാതെ സർക്കാർ

സുൽത്താൻ ബത്തേരി: കാട്ടനയുടെ ആക്രമണത്തിൽ കർഷകൻ കൊല്ലപ്പെട്ട് ഒരുവർഷമാകുന്പോഴും നൂൽപ്പുഴ മാറോട് ഗ്രാമത്തിൽ ഇതുവരേ പൂർണമായ രീതിയിൽ വാഗ്ദാനങ്ങൽ പാലിക്കപ്പെട്ടിട്ടില്ല. ഈ ഭാഗത്തേക്കുള്ള റോഡ് കോണ്‍ക്രീറ്റ്, തെരുവുവിളക്കുകൾ സ്ഥാപിക്കൽ, വനാതിർത്തിയിലെ തൂക്ക് വേലിയടക്കമുള്ള കാര്യങ്ങൾ പൂർണമാകാത്തതാണ് ദുരിതമാകുന്നത്. കഴിഞ്ഞവർഷം ജൂലൈ പകുതിയോടെയാണ് കല്ലുമുക്ക് മാറോട് കുറുമ ഉന്നതിയിലെ രാജുവിനെ കാട്ടാന കൃഷിയിടത്തിൽ് ആക്രമിച്ചത്. കൃഷിയിടത്തിൽ ആനയിറങ്ങിയിട്ടുണ്ടോ എന്ന് നോക്കാനായി വീടിനോട് ചേർന്ന് വയലിലേക്ക് എത്തിയതാണ്. ഈ സമയം കാട്ടാന പാഞ്ഞെത്തി ആക്രമിക്കുകയായിരുന്നു. മാറോട് കാട്ടാനശല്യത്തിന് പരിഹാരം കാണണമെന്ന് ആവശ്യപ്പെട്ട് രാജുവിന്‍റെ മൃതദേഹവുമായി പ്രദേശവാസികൾ പ്രതിഷേധിച്ചു. കല്ലൂരിൽ ദേശീയപാത 766 ഉപരോധിക്കുകയും ചെയ്തു. തുടർന്ന് പട്ടികവർഗ-പിന്നാക്ക ക്ഷേമ മന്ത്രി ഒ.ആർ. കേളു, വനം മന്ത്രി എ.കെ. ശശീന്ദ്രൻ എന്നിവർ പ്രദേശവാസികളുമായി ചർച്ച നടത്തി നിരവധി വാഗ്ദാനങ്ങൾ നൽകിയതല്ലാതെ രാജു കൊല്ലപ്പെട്ട് ഒരുവർഷമാകുന്പോഴും ഇതുവരെയും പാലിച്ചില്ല. ഇവിടങ്ങളിൽ കാൽനടപോലും ദുരിതമാണ്. വാഹനങ്ങൾ പോകാൻപറ്റാത്ത അവസ്ഥയിലാണ്. ഇതുകാരണം സ്കൂൾ ബസുകളും ഇവിടേക്ക് എത്തുന്നില്ലെന്നാണ് നാട്ടുകാരുടെ ആരോപണം. അന്പതോളം കുടുംബങ്ങളാണ് ഇവിടെ താമസിക്കുന്നത്. രണ്ടാഴ്ചമുന്പ് ഇവിടെ വളർത്തുനായയെ കടുവ പിടികൂടി. പ്രതിരോധ സംവിധാനങ്ങൾ കാര്യക്ഷമമാക്കി കാട്ടാനകൾ കൃഷിയിടത്തിൽ ഇറങ്ങുന്നത് തടയണമെന്നാണ് കർഷകർ ആവശ്യപ്പെടുന്നത്.

ലഹരിക്കെതിരെ മാരത്തോണ്‍

പുൽപ്പള്ളി: ലഹരിക്കെതിരെയുള്ള കാന്പയിനിന്‍റെ ഭാഗമായി കബനിഗിരി നിർമല ഹൈസ്കൂളിലെ വിദ്യാർഥികൾ പാടിച്ചിറ ടൗണിൽ മാരത്തോണ്‍ സംഘടിപ്പിച്ചു. മുള്ളൻകൊല്ലി ഗ്രാമപ്പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർമാനും സ്കൂൾ പിടിഎ പ്രസിഡന്‍റുമായ ഷിനു കച്ചിറയിൽ മാരത്തോണ്‍ ഉദ്ഘാടനം ചെയ്തു. സ്കൂൾ വിദ്യാർഥികളുടെ ഫ്ളാഷ് മോബും ഉണ്ടായിരുന്നു. സ്കൂൾ ഹെഡ്മാസ്റ്റർ എ.ടി. ഷാജി അധ്യക്ഷത വഹിച്ചു. എം.ടി. ബിനു, ജോമറ്റ് മാത്യു, ഷിനി ജോണ്‍സണ്‍, എം.ടി. ബിനു ബിഗ് എന്നിവർ നേതൃത്വം നൽകി.

ലഹരിക്കെതിരേ കുടുംബശ്രീയും എക്സൈസും

കൽപ്പറ്റ: ലഹരിക്കെതിരേ എക്സൈസ് വകുപ്പുമായി കൈകോർത്ത് കുടുംബശ്രീ ജില്ലാ മിഷൻ സംഘടിപ്പിച്ച ലഹരി മുക്ത കാന്പയിനിന്‍റെ ജില്ലാതല പരിശീലനം ജില്ലാ എക്സൈസ് ഡെപ്യൂട്ടി കമ്മീഷണർ എ.ജെ. ഷാജി ഉദ്ഘാടനം ചെയ്തു. കുടുംബശ്രീ ജില്ലാ മിഷൻ കോഓർഡിനേറ്റർ പി.കെ. ബാലസുബ്രഹ്മണ്യൻ അധ്യക്ഷത വഹിച്ചു. ദിനംപ്രതി അധികരിച്ചു വരുന്ന ലഹരി ഉപയോഗം തടയുന്നതിന്‍റെ ആദ്യഘട്ടം കുടുംബങ്ങളിൽ നിന്ന് തുടങ്ങണമെന്നതിനെ മുൻനിർത്തിയാണ് കുടുംബശ്രീ ലഹരി മുക്ത കാന്പയിനിന്‍റെ ഭാഗമാകുന്നത്. കൽപ്പറ്റ ഹരിതഗിരി ഓഡിറ്റോറിയത്തിൽ സംഘടിപ്പിച്ച പരിപാടിയിൽ ജില്ലയിലെ സിഡിഎസ് ചെയർപേഴ്സണ്‍മാർക്കും കമ്മ്യൂണിറ്റി കൗണ്‍സിലർമാർക്കും റിസോഴ്സ് പേഴ്സണ്‍മാർക്കുമാണ് ആദ്യഘട്ട പരിശീലനം നൽകിയത്. ജില്ലാ എക്സൈസ് വകുപ്പ് പ്രിവന്‍റീവ് ഓഫീസർ ജോഷി തുന്പാനം, വിമുക്തി മിഷൻ ജില്ലാ കോഓർഡിനേറ്റർ എൻ.സി. സജിത്ത്കുമാർ അച്ചൂരാനം, ജില്ലാ മിഷൻ അസിസ്റ്റന്‍റ് കോഓർഡിനേറ്റർമാരായ വി.കെ. റെജിന, കെ.എം. സലീന, ജില്ലാ പ്രോഗ്രാം മാനേജർമാരായ പി.കെ. സുഹൈൽ, ആശ പോൾ എന്നിവർ പ്രസംഗിച്ചു.

വയനാട് മഡ് ഫെസ്റ്റ് സമാപന പരിപാടി ഇന്ന് മന്ത്രി ഒ.ആർ. കേളു ഉദ്ഘാടനം ചെയ്യും

കൽപ്പറ്റ: മണ്‍സൂണ്‍കാല വിനോദസഞ്ചാരം പ്രോത്സാഹിപ്പിക്കുന്നതിന്‍റെ ഭാഗമായി ജില്ലാ ടൂറിസം പ്രമോഷൻ കൗണ്‍സിലിന്‍റെ നേതൃത്വത്തിൽ സംഘടിപ്പിച്ച വയനാട് മഡ് ഫെസ്റ്റ്സീസണ്‍ 3 സമാപന സമ്മേളനം ഇന്ന് വൈകുന്നേരം നാലിന് വള്ളിയൂർക്കാവ് കണ്ണിവയലിൽ പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും. വിനോദസഞ്ചാര വകുപ്പ്, വിവിധ ടൂറിസം സംഘടനകൾ എന്നിവരുടെ സഹകരണത്തോടെ സംഘടിപ്പിക്കുന്ന പരിപാടിയുടെ അവസാന ദിനമായ 17ന് 50 പേർക്കായി ചീങ്ങേരിയിലേക്ക് നടത്തുന്ന മണ്‍സൂണ്‍ ട്രക്കിംഗ് ഓടെയാണ് അവസാനിക്കുക.

കുടിവെള്ള കിണറും പന്പ് ഹൗസും നടപ്പാതയും കാടുമൂടിയ നിലയിൽ

ഗൂഡല്ലൂർ: നെല്ലാക്കോട്ട പഞ്ചായത്തിലെ താഴെ കൈവട്ടയിൽ പഞ്ചായത്തിന്‍റെ കുടിവെള്ള കിണറും പന്പ് ഹൗസും നടപ്പാതയും കാടുമൂടിയ നിലയിൽ. കിണറിന് ചുറ്റും കാടുമൂടി കിടക്കുകയാണ്. പന്പ് ഹൗസും കാടുകൾക്കുള്ളിലായി. മെയിൻ റോഡിൽ നിന്ന് കിണറിലേക്കുള്ള സിമന്‍റ് റോഡും കാടുമൂടി കിടക്കുകയാണ്. സ്വിച്ച് ഓണ്‍ ചെയ്യാൻ പോലും പന്പ് സെറ്റ് ഓപ്പറേറ്റർക്ക് പന്പ് ഹൗസിലേക്ക് പോകാൻ പറ്റാത്ത അവസ്ഥയാണ്. വർഷങ്ങൾക്ക് മുന്പാണ് കാടുകൾ വെട്ടിമാറ്റിയത്. ഈ മേഖലകാട്ടാനകളുടെ താവളവുമാണ്. 25 കുടുംബങ്ങൾക്കാണ് ഈ കുടിവെള്ള പദ്ധതിയിൽ നിന്ന് കുടിവെള്ളം വിതരണം ചെയ്യുന്നത്. കിണർ ശുചീകരിച്ചിട്ട് നാല് വർഷമായി. കിണറിൽ ചേറും ചെളിയും നിറഞ്ഞിരിക്കുകയാണ്. കിണർ ശുചീകരിക്കുകയും കാടുകൾ വെട്ടിമാറ്റുകയും ചെയ്യണമെന്ന് നാട്ടുകാർ ആവശ്യപ്പെട്ടു.

കേസിൽ പ്രതിയാക്കിയതിനെതിരേ പരാതി നൽകി

പുൽപ്പള്ളി: മുള്ളൻകൊല്ലിയിൽ നടന്ന കോണ്‍ഗ്രസ് വികസനസമിതി യോഗത്തിനിടെയുണ്ടായ കയ്യേറ്റവുമായി ബന്ധപ്പെട്ട് തനിക്കെതിരേ വ്യാജമായി കേസെടുക്കുകയും അപവാദ പ്രചാരണം നടത്തുകയും ചെയ്തതായി പി.ഡി. സജി ബത്തേരി ഡിവൈഎസ്പി ക്ക് നൽകിയ പരാതിയിൽ പറഞ്ഞു. വികസന സെമിനാർ കഴിഞ്ഞയുടൻ താൻ വീട്ടിലേക്ക് പോയെന്നും ഇതിനുള്ള തെളിവുകൾ തന്‍റെ കൈവശമുണ്ടെന്നും പരാതിക്കാരനെ തടഞ്ഞുവച്ച് മർദിച്ചെന്നുള്ള കേസ് വ്യാജമാണെന്നും സജി പരാതിയിൽ പറഞ്ഞു. തന്നെ അപമാനിക്കാൻ പരാതി നൽകിയ ശേഷം സോഷ്യൽമീഡിയ ഗ്രൂപ്പുകളിൽ പരസ്യമായി അപവാദ പ്രചാരണം നടത്തി മാനഹാനി വരുത്തിവച്ചു. ഇതിനെതിരേ നടപടി സ്വീകരിക്കണമെന്നും വ്യാജ പരാതിയുടെ അടിസ്ഥാനത്തിൽ കേസിൽ നിന്ന് തന്നെ ഒഴിവാക്കണമെന്നും പി.ഡി. സജി ആവശ്യപ്പെട്ടു.

തകർന്ന റോഡുകൾ നന്നാക്കാൻ ഫണ്ട് അനുവദിക്കണമെന്ന്

കോട്ടത്തറ: കാലവർഷത്തിലും കാലപ്പഴക്കത്തിലും തകർന്ന പഞ്ചായത്തിലെ റോഡുകൾ നന്നാക്കാൻ സർക്കാർ പ്രത്യേക ഫണ്ട് അനുവദിക്കണമെന്ന് പഞ്ചായത്ത് യുഡിഎഫ് എക്സിക്ക്യുട്ടീവ് യോഗം സർക്കാരിനോട് ആവശ്യപ്പെട്ടു. ജില്ലയിൽ കാലവർഷത്തിലും വെള്ളപ്പൊക്കത്തിലും ഏറ്റവും കൂടുതൽ റോഡ് തകരാറിലാകുന്നത് വെള്ളപ്പൊക്കകെടുതി നേരിടുന്ന കോട്ടത്തറ പഞ്ചായത്തിലാണെന്ന് യോഗം ചൂണ്ടിക്കാട്ടി. ടി. സിദ്ദിഖ് എംഎൽഎ യോഗം ഉദ്ഘാടനം ചെയ്തു. വി. അബ്ദുള്ള വൈപ്പടി അധ്യക്ഷത വഹിച്ചു. നിയോജക മണ്ഡലം ചെയർമാൻ ടി. ഹംസ മുഖ്യ പ്രഭാഷണം നടത്തി. പഞ്ചായത്ത് കണ്‍വീനർ സുരേഷ് ബാബു വാളൽ, സി.സി. തങ്കച്ചൻ, പോൾസണ്‍ കൂവക്കൽ, മാണി ഫ്രാൻസിസ്, വി.സി. അബൂബക്കർ, ജീവോദി മമ്മുട്ടി, സി.കെ. ഇബ്രാഹിം, പി.ഇ. വിനോജ്, കെ.കെ. മുഹമ്മദലി, എം.സി. മോയിൻ, കെ.കെ. നാസർ, പി.എ. നസീമ, പുഷ്പ സുന്ദരൻ, ഇ.കെ. വസന്ത, ബിന്ദു മാധവൻ എന്നിവർ പ്രസംഗിച്ചു.

കുംകികൾ കാട്ടുകൊന്പൻമാരെ തുരത്തി അതിർത്തിയിൽ നിലയുറപ്പിച്ചു

സുൽത്താൻ ബത്തേരി: വാകേരി കൂടല്ലൂർ മേഖലയിലെ ജനവാസകേന്ദ്രത്തിലിറങ്ങി ജനങ്ങളുടെ ജീവനും സ്വത്തിനും ഭീഷണിയായി മാറിയ കാട്ടുകൊന്പൻമാരെ കുംകിയാനകൾ ഉൾവനത്തിലേക്ക് തുരത്തി. മുത്തങ്ങ ആന ക്യാന്പിൽ നിന്ന് കൊണ്ടുവന്ന ഭരത്, പ്രമുഖ എന്നി കുംകികളുടെ സഹായത്തോടെയാണ് ആർആർടി വനപാലക സംഘം കാട്ടാനക്കൂട്ടത്തെ വനാതിർത്തിയിൽ നിന്ന് ഉൾവനത്തിലേയ്ക്ക് ഓടിച്ചത്. കഴിഞ്ഞ നാല് ദിവസമായി തുടരുന്ന ദൗത്യം ഇന്നലെയാണ് ഫലം കണ്ടത്. വനത്തിൽ നിന്ന് സ്ഥിരമായി ജനവാസമേഖലയിലേക്ക് ഇറങ്ങുന്ന വഴികളിൽ രണ്ട് കുംകികളും നിലകൊണ്ടതോടെയാണ് കൊന്പൻമാർക്ക് ജനവാസമേഖലയിലിറങ്ങാൻ പറ്റാതായത്. രണ്ട് ദിവസം കൂടി അതിർത്തിയിൽ കുംകിയാനകളെ ഉപയോഗിച്ച് നിരീക്ഷണം നടത്താനാണ് വനംവകുപ്പ് തീരുമാനം. സ്ഥിരമായി കർഷകരുടെ കൃഷിയിടങ്ങളിലിറങ്ങി കൃഷി നശിപ്പിക്കുന്ന കാട്ടാനകൾ വീണ്ടും എത്തുമെന്നാണ് കർഷകർ പറയുന്നത്. റെയിൽപാളവേലിയും കിടങ്ങുമില്ലാത്ത മൂടക്കൊല്ലി മുതൽ വാകേരി വരെയുള്ള 2.8 കിലോമീറ്റർ ദൂരത്തിൽ ആന പ്രതിരോധ വേലി അടിയന്തരമായി നിർമിക്കുകയും വേലി തകർന്ന് കിടക്കുന്നയിടങ്ങൾ യുദ്ധകാലാടിസ്ഥാനത്തിൽ നന്നാക്കാൻ നടപടിസ്വീകരിക്കണമെന്നാണ് പ്രദേശവാസികളുടെ ആവശ്യം.

വയനാട് ടൂറിസം കേരള ടൂറിസത്തിന് അനിവാര്യം: മന്ത്രി പി.എ. മുഹമ്മദ് റിയാസ്

മാനന്തവാടി: വയനാട് ടൂറിസം കേരള ടൂറിസത്തിന് അനിവാര്യമാണെന്ന് പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ്. വയനാട് പാക്കേജിൽ ഉൾപ്പെടുത്തി പഴശി പാർക്കിൽ 1.20 കോടി രൂപ ചെലവിൽ പൂർത്തിയാക്കിയ പ്രവൃത്തികൾ ഉദ്ഘാടനം ചെയ്യുകയായിരുന്നു അദ്ദേഹം. ജില്ലയിലെ വിനോദസഞ്ചാര മേഖലയുടെ വികസനത്തിന് സർക്കാർ വലിയ ഇടപെടലാണ് നടത്തിയത്. ജില്ലയിലെത്തുന്ന സഞ്ചാരികളുടെ എണ്ണം വർധിച്ചിട്ടുണ്ട്. രാജ്യത്തെ പ്രധാന വിനോദസഞ്ചാരകേന്ദ്രമായി വയനാട് മാറിയെന്നും മന്ത്രി പറഞ്ഞു. പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു അധ്യക്ഷത വഹിച്ചു. അസിസ്റ്റന്‍റ് കളക്ടർ പി.പി. അർച്ചന, നഗരസഭാ ചെയർപേഴ്സണ്‍ സി.കെ. രത്നവല്ലി, ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, നഗരസഭാ കൗണ്‍സിലർ അരുണ്‍കുമാർ, ജില്ലാ ടൂറിസം ഡെപ്യൂട്ടി ഡയറക്ടർ ഡി.വി. പ്രഭാത്, ഡിടിപിസി സെക്രട്ടറി ബിനോഷ് കുഞ്ഞപ്പൻ, എക്സിക്യുട്ടീവ് കമ്മിറ്റി അംഗം പി.വി. സഹദേവൻ, ടൂറിസം വികസന ഉപസമിതി അംഗം അലി ബ്രാൻ, നഗരസഭാ സിഡിഎസ് ചെയർപേഴ്സണ്‍ ഡോളി രഞ്ജിത്ത് തുടങ്ങിയവർ പങ്കെടുത്തു. പാർക്കിൽ സോർബിംഗ് ബോൾ, മൾട്ടി സീറ്റർ സീസോ, മൾട്ടി പ്ലേ ഫണ്‍ സിസ്റ്റം, മെറി ഗോ റൗണ്ട്, ബഞ്ച്, വാട്ടർ കിയോസ്ക് എന്നിവ പുതുതായി ഒരുക്കിയിട്ടുണ്ട്.

സുഗമ ഗതാഗതം സർക്കാർ ഉത്തരവാദിത്തം: മന്ത്രി മുഹമ്മദ് റിയാസ്

കൽപ്പറ്റ: ജില്ലയിലെ സുഗമ ഗതാഗതം സർക്കാരിന്‍റെ ഉത്തരവാദിത്തമാണെന്ന് പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ്. കോട്ടത്തറ പഞ്ചായത്തിലെ കല്ലട്ടിയിൽ പാലം പ്രവൃത്തി ഉദ്ഘാടനം ചെയ്യുകയായിരുന്നു അദ്ദേഹം. വെണ്ണിയോട് വലിയപുഴയ്ക്കു കുറുകെ 8.12 കോടി രൂപ ചെലവിലാണ് പാലം നിർമിക്കുന്നത്. 78.5 മീറ്റർ നീളത്തിലും ഇരു ഭാഗങ്ങളിലും നടപ്പാതയോടുകൂടി 11 മീറ്റർ വീതിയിലുമാണ് പ്രവൃത്തി പൂർത്തിയാക്കുക. പാലങ്ങൾ ഒരു നാടിന്‍റെ വികാരമാണ്. കല്ലട്ടി പാലം പണി സമയബന്ധിതമായി പൂർത്തിയാക്കാൻ പ്രത്യേക സംവിധാനം ഒരുക്കും. സംസ്ഥാനത്ത് നാല് വർഷത്തിനിടെ 150 പാലം നിർമിച്ചു. നിയോജകമണ്ഡലത്തിൽ 257 കിലോമീറ്റർ റോഡ് ബിഎം ആൻഡ് ബിസി പാതകളായി മെച്ചപ്പെടുത്തുമെന്നും മന്ത്രി പറഞ്ഞു. ടി. സിദ്ദിഖ് എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ, കോട്ടത്തറ പഞ്ചായത്ത് പ്രസിഡന്‍റ് പി.പി. റെനീഷ്, ബ്ലോക്ക് പഞ്ചായത്ത് അംഗം പി.കെ. അബ്ദുറഹ്മാൻ, പൊതുമരാമത്ത് സൂപ്രണ്ടിംഗ് എൻജിനിയർ ഇ.ജെ. വിശ്വപ്രകാശ്, എക്സിക്യുട്ടീവ് എൻജിനിയർ സി.എസ്. അജിത്ത്, അസിസ്റ്റന്‍റ് എക്സിക്യുട്ടീവ് എൻജിനിയർ കെ.ബി. നിത തുടങ്ങിയവർ പങ്കെടുത്തു.

എന്‍.ഡി. അപ്പച്ചനെ കൈയേറ്റം ചെയ്യാന്‍ ശ്രമിച്ചവര്‍ക്കെതിരേ നടപടി സ്വീകരിക്കണം: വ്യാപാരി കോണ്‍ഗ്രസ്

കല്‍പ്പറ്റ: പാടിച്ചിറയില്‍ കോണ്‍ഗ്രസ് മുള്ളന്‍കൊല്ലി മണ്ഡലം വികസന സെമിനാറിനിടെ ഡിസിസി പ്രസിഡന്‍റ് എന്‍.ഡി. അപ്പച്ചനോട് മോശമായി പെരുമാറുകയും കൈയേറ്റത്തിനു മുതിരുകയും ചെയ്തവര്‍ക്കെതിരേ പാര്‍ട്ടി നേതൃത്വം കര്‍ശന അച്ചടക്ക നടപടി സ്വീകരിക്കണമെന്ന് വ്യാപാരി വ്യവസായി കോണ്‍ഗ്രസ് ജില്ലാ കമ്മിറ്റി ആവശ്യപ്പെട്ടു. ജില്ലയില്‍ അഞ്ച് പതിറ്റാണ്ടിലധികമായി കോണ്‍ഗ്രസിനുവേണ്ടി അധ്വാനിക്കുന്ന നേതാവാണ് അപ്പച്ചന്‍. ഇദ്ദേഹത്തിനെതിരായ നീക്കത്തിനു പിന്നില്‍ പ്രവര്‍ത്തിച്ചവരെ പാര്‍ട്ടി നേതൃത്വം തിരിച്ചറിയണമെന്നും യോഗം ആവശ്യപ്പെട്ടു. സംസ്ഥാന ജനറല്‍ സെക്രട്ടറി വേണുഗോപാല്‍ കിഴിശേരി ഉദ്ഘാടനം ചെയ്തു. ജില്ലാ പ്രസിഡന്റ് ഫൈസല്‍ പാപ്പിന അധ്യക്ഷത വഹിച്ചു. ജനറല്‍ സെക്രട്ടറി ഷിജു ഗോപാല്‍, ട്രഷറര്‍ രാമകൃഷ്ണന്‍ മൂത്തൊടി, ഷാഫി കമ്പളക്കാട്, ജിതേഷ് ചീരാല്‍, സി. സുനി, എം. ശിഹാബ്, പി.ജെ. നെല്‍ത്സണ്‍, പി. ഷാജഹാന്‍, കെ. ഫറാസ് എന്നിവര്‍ പ്രസംഗിച്ചു.

എൻഎഫ്പിഒ കിസാൻ രത്ന പദ്ധതി ഉദ്ഘാടനം നാളെ

സുൽത്താൻ ബത്തേരി: മറുനാടൻ കർഷക സംഘടനയായ നാഷണൽ ഫാർമേഴ്സ് പ്രൊഡ്യൂസേഴ്സ് ഓർഗനൈസേഷന്‍റെ(എൻഎഫ്പിഒ) കിസാൻ രത്ന പദ്ധതി ഉദ്ഘാടനം നാളെ രാവിലെ 10ന് മീനങ്ങാടി ചോളയിൽ ഓഡിറ്റോറിയത്തിൽ ഐ.സി. ബാലകൃഷ്ണൻ എംഎൽഎ നിർവഹിക്കും. ഓർഗനൈസേഷൻ ചെയർമാൻ ഫിലിപ്പ് ജോർജ്, കണ്‍വീനർ കെ.വി. ശങ്കരനാരായണൻ, എക്സിക്യുട്ടീവ് ഡയറക്ടർമാരായ തോമസ് മിറർ, ഉദയൻ എന്നിവർ വാർത്താസമ്മേളനത്തിൽ അറിയിച്ചതാണ് വിവരം. അംഗം മരണപ്പെട്ടാൽ കുടുംബത്തിന് അഞ്ച് ലക്ഷം രൂപ സഹായം നൽകുന്നതാണ് പദ്ധതി. സംഘടനയിൽ സജീവ അംഗത്വമുള്ളവർക്ക് 2,000 രൂപ അടച്ച് പദ്ധതിയിൽ ചേരാം. ചടങ്ങിൽ എൻഎഫ്പിഒ ചെയർമാൻ ഫിലിപ്പ് ജോർജ് അധ്യക്ഷത വഹിക്കും. ടി. സിദ്ദിഖ് എംഎൽഎ കുടുംബസഹായനിധി കൈമാറും. മലബാർ ഭദ്രാസനാധിപൻ ഡോ.ഗീവർഗീസ് മോർ സ്തേഫാനോസ് മുഖ്യപ്രഭാഷണം നടത്തും. ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ അംഗത്വവിതരണവും മീനങ്ങാടി പഞ്ചായയത്ത് പ്രസിഡന്‍റ് കെ.ഇ. വിനയൻ അപേക്ഷ സ്വീകരണവും ഉദ്ഘാടനം ചെയ്യും. എൻഎഫ്പിഒ കന്പനി ചെയർമാൻ വി.എൽ. അജയകുമാർ, ബോബി ഏബ്രഹാം, മാത്യു അഗസ്റ്റിൻ, ഇ.വി. സെബാസ്റ്റ്യൻ എന്നിവർ പ്രസംഗിക്കും. അഡ്വ.ജോസ് വി. തണ്ണിക്കോട് സ്വാഗതവും ശങ്കരനാരായണൻ നന്ദിയും പറയും.

ഗൂഡല്ലൂരിൽ കാട്ടാന വീടുകൾ തകർത്തു

ഗൂഡല്ലൂർ: നെല്ലാക്കോട്ട പഞ്ചായത്തിലെ മേഫീൽഡിൽ കാട്ടാനക്കൂട്ടം രണ്ട് എസ്റ്റേറ്റ് പാടികൾ തകർത്തു. നാലാം നന്പർ പാടികളിലെ രണ്ട് വീടുകളാണ് തകർത്തത്. കഴിഞ്ഞ ദിവസം രാത്രിയിലാണ് സംഭവം. ആനക്കുട്ടിയാണ് ആദ്യം വീട്ടിനുള്ളിൽ കയറിയത്. പിന്നീട് മറ്റ് ആനകളും ഉള്ളിലേക്ക് കയറുകയായിരുന്നു. വീടുകളിൽ ആളില്ലാത്തതിനാൽ വലിയ അപകടം ഒഴിവായി. കൈവട്ടയിൽ കാട്ടാനയുടെ മുന്പിൽ നിന്ന് വയോധികൻ രക്ഷപ്പെട്ടത് തലനാരിഴക്ക്. ഇന്നലെ പുലർച്ചെ 5.30ന് ഗൂഡല്ലൂർ-സുൽത്താൻ ബത്തേരി അന്തർ സംസ്ഥാന പാതയിലെ കൈവട്ടയിൽ പ്രഭാത സവാരിക്കെത്തിയ അച്ചുവിനെ (64) കാട്ടാന ആക്രമിക്കാൻ ശ്രമിച്ചത്. ഭാഗ്യം കൊണ്ടാണ് ഇയാൾ രക്ഷപ്പെട്ടത്. ആന ആക്രമിക്കാൻ ശ്രമിക്കുന്നതിനിടെ നിർത്തിയിട്ട കാറിന് അടിയിൽ ഒളിക്കുകയായിരുന്നു ഇദ്ദേഹം. കലി പൂണ്ട ആന കാർ ആക്രമിച്ചു. പ്രദേശവാസിയായ സുമന്‍റെ കാറാണ് അക്രമിക്കപ്പെട്ടത്. വിവരമറിഞ്ഞ് വനംവകുപ്പ് ജീവനക്കാരും നാട്ടുകാരും സ്ഥലത്തെത്തിയാണ് അച്ചുവിനെ രക്ഷപ്പെടുത്തിയത്. ആനകൾ സ്ഥിരമായി ഈ മേഖലയിലേക്ക് ഇറങ്ങി വ്യാപക കൃഷിനാശവും വരുത്തുന്നുണ്ട്. ആന ശല്യത്തിന് പരിഹാരം കാണണമെന്ന് നാട്ടുകാർ നിരന്തരം ആവശ്യപ്പെട്ടുവരികയാണ്.

മഹിളാ കോണ്‍ഗ്രസ് പഠനക്യാന്പ് നടത്തി

സുൽത്താൻ ബത്തേരി: മഹിളാ കോണ്‍ഗ്രസ് ജില്ലാ കമ്മിറ്റി അധ്യാപക ഭവനിൽ ദ്വിദിന പഠന ക്യാന്പ് നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. മഹിളാ കോണ്‍ഗ്രസ് ജില്ലാ പ്രസിഡന്‍റ് ജിനി തോമസ് അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ മുഖ്യപ്രഭാഷണം നടത്തി. കെപിസിസി നിർവാഹകസമിതിയംഗം കെ.എൽ. പൗലോസ്, നേതാക്കളായ ഡി.പി. രാജശേഖരൻ, മേഴ്സി സാബു, കെ.ഇ. വിനയൻ, സംഷാദ് മരക്കാർ, നിസി അഹമ്മദ് എന്നിവർ പ്രസംഗിച്ചു.

മഡ് ഫെസ്റ്റ് സീസണ്‍ മൂന്നിനു തുടക്കമായി

സുൽത്താൻ ബത്തേരി: മഴക്കാല വിനോദസഞ്ചാരം പ്രോത്സാഹിപ്പിക്കുന്നതിന് ജില്ലാ ടൂറിസം പ്രമോഷൻ കൗണ്‍സിൽസംഘടിപ്പിച്ച മഡ് ഫെസ്റ്റ് സീസണ്‍ മൂന്നിന് തുടക്കമായി. സപ്ത റിസോർട്ടിനു സമീപം പുളവയലിൽ പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു. എംഎൽഎമാരായ ഐ. സി. ബാലകൃഷ്ണൻ, ടി. സിദ്ദീഖ്, ജില്ലാ കളക്ടർ ഡി.ആർ. മേഘശ്രീ, ഡിടിപിസി സെക്രട്ടറി ബിനോഷ് കുഞ്ഞപ്പൻ തുടങ്ങിയവർ പങ്കെടുത്തു. ഇന്നലെ മഡ് ഫുട്ബോൾ മത്സരത്തിൽ 14 ടീം പങ്കെടുത്തു. ഇതിൽ എട്ട് ടീമുകളെ 15ന് മാനന്തവാടി വള്ളിയൂർക്കാവിൽ നടക്കുന്ന ഫൈനൽ റൗണ്ടിലേക്ക് തെരഞ്ഞെടുത്തു. 17 വരെയാണ് മഡ് ഫെസ്റ്റ് സീസണ്‍ മൂന്ന്.

പി.എം. റിൻഷാദ് എംഎസ്എഫ് ജില്ലാ പ്രസിഡന്‍റ്

കൽപ്പറ്റ: എംഎസ്എഫ് ജില്ലാ പ്രസിഡന്‍റായി പി.എം. റിൻഷാദിനെ തെരഞ്ഞെടുത്തു. മറ്റു ഭാരവാഹികൾ: ശുഹൈബ് മാനന്തവാടി, അമീൻ നായ്ക്കെട്ടി, മുബഷീർ കൽപ്പറ്റ, മുത്തലിബ് ദ്വാരക, ഫസൽ കന്പളക്കാട്, അസീന മാടക്കര(വൈസ് പ്രസിഡന്‍റുമാർ), ഫായിസ് തലയ്ക്കൽ(ജനറൽ സെക്രട്ടറി), റയീസ് വേങ്ങൂർ, റുമൈസ് വെള്ളമുണ്ട, നിഹാൽ വാളത്തൂർ, നാസർ അഞ്ചുകുന്ന്, ഷെഫിൻ ചെതലയം, ജിൻഷാദ് എടവക, ഇഹ്സാന മേപ്പാടി(ജോയിന്‍റ് സെക്രട്ടറിമാർ), അജിനാസ് വെള്ളമുണ്ട(ട്രഷറർ),ഹഫീസ് ജവാദ്, റാഷിദ് പീച്ചങ്ങോട്, ഷിബിലി പടിഞ്ഞാറത്തറ(വിംഗ് കണ്‍വീനർമാർ). ജില്ലാ ലീഗ് ഓഫീസിൽ എംഎസ്എഫ് ജില്ലാ കൗണ്‍സിൽ യോഗത്തിലായിരുന്നു തെരഞ്ഞെടുപ്പ്. മുസ്ലിംലീഗ് സംസ്ഥാന സെക്രട്ടറി അബ്ദുറഹ്മാൻ രണ്ടത്താണി ഉദ്ഘാടനം ചെയ്തു. എംഎസ്എഫ് സംസ്ഥാന പ്രസിഡന്‍റ് പി.കെ. നവാസ് അധ്യക്ഷത വഹിച്ചു. സംസ്ഥാന ട്രഷറർ അസ്ഹർ പെരുമുക്ക്, മുസ്ലിംലീഗ് ജില്ലാ ജനറൽ സെക്രട്ടറി ടി. മുഹമ്മദ്, സെക്രട്ടറി കെ. ഹാരിസ്, എംഎസ്എഫ് സംസ്ഥാന സെക്രട്ടറിമാരായ അഡ്വ.മുനവറലി സാദത്ത്, അൽ റസീൻ എന്നിവർ പങ്കെടുത്തു.

സിവിൽ സ്റ്റേഷൻ പരിസരത്ത് പൊതുശൗചാലയം നിർമിക്കണമെന്ന്

കൽപ്പറ്റ: സിവിൽ സ്റ്റേഷൻ പരിസരത്ത് പൊതുശൗചാലയം നിർമിക്കണമെന്ന് ദേശീയ മനുഷ്യാവകാശ സംരക്ഷണ സമിതി വൈത്തിരി താലൂക്ക് കമ്മിറ്റി ആവശ്യപ്പെട്ടു. സിവിൽ സ്റ്റേഷനു സമീപം പൊതുശൗചാലയം ഇല്ലാത്തത് ജനങ്ങൾക്ക് വലിയ പ്രയാസമാണ് സൃഷ്ടിക്കുന്നതെന്ന് യോഗം ചൂണ്ടിക്കാട്ടി. നഗരത്തിലെ തെരുവുനായ ശല്യം പരിഹരിക്കണമെന്ന ആവശ്യവും ഉന്നയിച്ചു. ജില്ലാ പ്രസിഡന്‍റ് അനിൽ എസ്. നായർ ഉദ്ഘാടനം ചെയ്തു. വന്ദന ഷാജു അധ്യക്ഷത വഹിച്ചു. കെ.ആർ. രാധാകൃഷ്ണൻ, എം.വി. രാജൻ, കെ. ശശികുമാർ, കെ. ബാബു, ആർ. രജിത്ത്, വിനു വയനാട്, വിപിൻ ജോസ്, ബെന്നി വട്ടപ്പറന്പിൽ, ആർ. ഗോപാലകൃഷ്ണൻ, ദിലീപ്കുമാർ, വി. ഹംസ, പ്രതീഷ് ചീരാൽ, കെ.എൻ. ബിന്ദു, ടി.കെ. ഗിരിജ, അനുപമ വിനോദ് എന്നിവർ പ്രസംഗിച്ചു. താലൂക്ക് കമ്മിറ്റി ഭാരവാഹികളായി എം.വി. രാജൻ(പ്രസിഡന്‍റ്), ആർ. രഞ്ജിത്ത്(സെക്രട്ടറി), വിപിൻ ജോസ്(ട്രഷറർ), വിനു വയനാട്(മീഡിയ കണ്‍വീനർ) എന്നിവരെ തെരഞ്ഞെടുത്തു.

ഒരു നൂറ്റാണ്ട് മുന്പുള്ള ഹാർമോണിയം ജീവിതത്തിന്‍റെ ഭാഗമാക്കി ഡൊമിനിക്

പുൽപ്പള്ളി: ഒരു നൂറ്റാണ്ടു മുന്പുള്ള ഹാർമോണിയത്തെ ഇന്നും ജീവിതത്തിന്‍റെ ഭാഗമാക്കി വച്ചിരിക്കുകയാണ് പുൽപ്പള്ളി സീതാമൗണ്ട് എഴുത്തുപള്ളിയ്ക്കൽ വീട്ടിൽ ഇ.ജെ. ഡൊമിനിക്. പാട്ടിനോട് എന്നും പ്രിയമായിരുന്നു. അങ്ങനെയാണ് ഈ ഹാർമോണിയത്തിലേക്ക് എത്തുന്നത്. പേരാവൂർ കോളയാടുള്ള സുഹൃത്തിന്‍റെ കൈയ്യിലായിരുന്നു ആദ്യം ഈ ഹാർമോണിയം ഉണ്ടായിരുന്നത്. അത് കൊടുക്കുന്നതറിഞ്ഞാണ് അങ്ങോട്ടേക്ക് പോയത്. ഇറ്റലിയിൽ നിന്നും വന്ന ഒരു പുരോഹിതന്‍റെ കൈയ്യിൽ നിന്നാണ് അദ്ദേഹത്തിന് ഈ ഹാർമോണിയം ലഭിക്കുന്നത്. അന്നതിന് 65 വർഷം പഴക്കമുണ്ടായിരുന്നു. അക്കാലത്ത് 500 രൂപ നൽകി ഹാർമോണിയം വാങ്ങി വയനാട്ടിലേക്ക് വന്നു. ഇപ്പോൾ അഞ്ച് പതിറ്റാണ്ടിലേറെയായി ജീവിതത്തിനൊപ്പം ഈ ഹാർമോണിയവുമുണ്ട്. ഹാർമോണിയത്തിന് ഇപ്പോൾ 120 വർഷത്തെ പഴക്കമുണ്ടെന്ന് ഡൊമിനിക് പറഞ്ഞു. ചെറുപ്പത്തിലെ മാതാപിതാക്കൾ മരിച്ചു. ആ ദുഖം മറക്കാനുള്ള ശ്രമത്തിന്‍റെ ഭാഗമായാണ് സംഗീതത്തിലേക്ക് അടുക്കുന്നത്. പാട്ടിനോടായിരുന്നു പ്രിയം. അങ്ങനെ സ്വന്തം നിലയിലും അല്ലാതെയും പാട്ടുകൾ പഠിച്ചു. പിന്നെ പള്ളികളിലെ ക്വയറുകളിലെ സ്ഥിരം പാട്ടുകാരനായി. ഹാർമോണിയം വായിച്ച് പാടുന്നതിനാൽ സംഗീതപ്രേമികൾക്കെല്ലാം എന്നും പ്രിയപ്പെട്ടവനായിരുന്നു ഡൊമിനിക്. ഒരുകാലത്ത് നാടകത്തിന്‍റെ പിന്നണിയിലും അദ്ദേഹം പ്രവർത്തിച്ചിരുന്നു. ഒരുപാട് ഓർമ്മകൾ സമ്മാനിക്കുന്ന ഹാർമോണിയത്തിൽ വിരൽ മീട്ടി പാട്ടുപാടാൻ ഇപ്പോഴും സമയം കണ്ടെത്താറുണ്ടെന്നും അദ്ദേഹം കൂട്ടിച്ചേർക്കുന്നു. ഒഴിവുസമയങ്ങളിൽ എഴുത്തുപള്ളിയ്ക്കൽ വീട്ടിൽ നിന്നും ഡൊമിനികിന്‍റെ പാട്ടും ഹാർമോണിയത്തിന്‍റെ ശബ്ദവും കേൾക്കാം. അന്നും ഇന്നും പ്രോത്സാഹനങ്ങളുമായി കുടുംബവും അദ്ദേഹത്തിന് ഒപ്പമുണ്ട്. ഇനിയും പാട്ടും സംഗീതവും തുടരുമെന്നും അദ്ദേഹം കൂട്ടിച്ചേർത്തു. ചിന്നമ്മയാണ് ഡൊമിനികിന്‍റെ ഭാര്യ. ജയിംസ്, വിൻസെന്‍റ് എന്നിവരാണ് മക്കൾ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]