സ്വതന്ത്ര കർഷക സംഘം സമ്മേളനം: സ്വാഗതസംഘം രൂപീകരിച്ചു : Deepika.com Nattu Visesham

ചൂരൽമലയിലെ റോപ് റസ്ക്യൂ പുനരാവിഷ്കരിച്ച് അഗ്നി-രക്ഷാസേന

കൽപ്പറ്റ: പുഞ്ചിരിമട്ടം ഉരുൾ ദുരന്തത്തെത്തുടർന്ന് ചൂരൽമലയിൽ പ്രാവർത്തികമാക്കിയ റോപ് റസ്ക്യൂ രീതി പുനരാവിഷ്കകരിച്ച് അഗ്നി-രക്ഷാ സേന. എസ്കഐംജെ സ്കൂൾ ഗ്രൗണ്ടിലെ എന്‍റെ കേരളം പ്രദർശന-വിപണന നഗരിയിലെ സ്റ്റാളിലാണ് റോപ് റസ്ക്യൂ പുനരാവിഷ്കാരം. ദുരന്തത്തിന്‍റെ ആദ്യദിനങ്ങളിൽ ആളുകളെ പുന്നപ്പുഴ കടത്താൻ ഈ രീതിയാണ് സേന ഉപയോഗപ്പെടുത്തിയത്. ജലാശയ രക്ഷാ പ്രവർത്തനത്തിനു ഉപയോഗിക്കുന്ന അണ്ടർ വാട്ടർ സ്ക്യൂബ ഡൈവിംഗ് ഉപകരണങ്ങൾ പരിചയപ്പെടുത്തുന്ന സ്റ്റാളിൽ അടിയന്തര ഘട്ടങ്ങളിലെ പ്രാഥമിക രക്ഷാപ്രവർത്തനം സംബന്ധിച്ച് അറിവ് പകരുന്നുണ്ട്.

കൗതുകമായി എഐ സ്മാർട് സിറ്റി

കൽപ്പറ്റ:"എന്‍റെ കേരളം’ പ്രദർശന-വിപണന മേളയിൽ പൊതുവിദ്യാഭ്യാസ വകുപ്പിന്‍റെ സ്റ്റാളിൽ പള്ളിക്കുന്ന് ലൂർദ്മാത എൽഎംഎച്ച്എസ്എസ് സ്കൂളിലെ എം.ആർ. അമൻ അഫ്ലഹ് പ്രദർശിപ്പിക്കുന്ന എഐ സ്മാർട്ട് സിറ്റി സന്ദർശകർക്ക് കൗതുകമായി. ഉരുൾപൊട്ടൽ സാധ്യതകൾ കണ്ടെത്തൽ, വന്യമൃഗങ്ങളുടെ കാടിറക്കം മുൻകൂട്ടി അറിയൽ, അപകടങ്ങൾ ഒഴിവാക്കൽ തുടങ്ങിയവയ്ക്ക് ഉതകുന്നതാണ് എഐ സ്മാർട് സിറ്റി. എഐ സംവിധാനം ഉരുൾപൊട്ടൽ സാധ്യത രണ്ട് ദിവസം മുന്പ് ആളുകളിൽ എത്തിക്കും.വനമേഖലയിൽ നിന്നു വന്യമൃഗങ്ങൾ ജനവാസ കേന്ദ്രങ്ങളിൽ ഇറങ്ങുന്നത് കാമറ സഹായത്തോടെ കണ്ടെത്തിയാണ് ജനങ്ങൾക്ക് മുന്നറിയിപ്പ് നൽകുക. ചുരം റോഡിലൂടെ അപകടകരമായി വാഹനങ്ങൾ സഞ്ചരിക്കുന്നുണ്ടെങ്കിൽ എഐ സംവിധാനത്തിന്‍റെ സഹായത്തോടെ അറിയാൻ കഴിയും.

കെപിഎ ജില്ലാ കണ്‍വൻഷൻ: രക്തദാന ക്യാന്പ് നടത്തി

മാനന്തവാടി: മേയ് 10ന് മുട്ടിലിൽ നടക്കുന്ന ജില്ലാ കണ്‍വൻഷന്‍റെ ഭാഗമായി കേരള പോലീസ് അസോസിയേഷൻ "ജീവിതമാണ് ലഹരി, സേ നോ ടു ഡ്രഗ്സ്’ എന്ന മുദ്രാവാക്യം ഉയർത്തി മെഡിക്കൽ കോളജ് ബ്ലഡ് സെന്‍ററുമായി സഹകരിച്ച് രക്തദാന ക്യാന്പ് നടത്തി. എസ്എംഎസ് ഡിവൈഎസ്പി ഹിദായത്തുള്ള മാന്പ്ര ഉദ്ഘാടനം ചെയ്തു. കെപിഎ ജില്ലാ പ്രസിഡന്‍റ് ബിപിൻ സണ്ണി അധ്യക്ഷത വഹിച്ചു. മെഡിക്കൽ കോളജ് സൂപ്രണ്ട് ഡോ. മൃദുലേഷ് മുഖ്യാതിഥിയായി. മെഡിക്കൽ ഓഫീസർ ഡോ.ഷാജിത, കെപിഎ ജില്ലാ സെക്രട്ടറി ഇർഷാദ് മുബാറക്, ട്രഷറർ എം.ബി. ബിഗേഷ്, സംസ്ഥാന നിർവാഹക സമിതി അംഗം ജോർജ് നിറ്റസ്, ജില്ലാ നിർവാഹക സമിതി അംഗം ടി.ജെ. സാബു എന്നിവർ പ്രസംഗിച്ചു.

വനാതിർത്തി പ്രദേശങ്ങളിൽ ടൂറിസം നിയന്ത്രിക്കണം: പ്രകൃതി സംരക്ഷണ സമിതി

കൽപ്പറ്റ: വനാതിർത്തി പ്രദേശങ്ങളിൽ ടൂറിസം നിയന്ത്രിക്കണമെന്ന് വയനാട് പ്രകൃതി സംരക്ഷണ സമിതി ആവശ്യപ്പെട്ടു. കഴിഞ്ഞ ദിവസം മേപ്പാടി എരുമക്കൊല്ലി പൂളക്കുന്നിൽ മുൻ തോട്ടം തൊഴിലാളി അറുമുഖൻ കാട്ടാന ആക്രമണത്തിൽ കൊല്ലപ്പെടാൻ ഇടയാക്കിയത് പ്രദേശത്തിനടുത്ത് നടന്നുവരുന്ന അനിയന്ത്രിത ടൂറിസം പ്രവർത്തങ്ങളാണെന്ന് യോഗം ആരോപിച്ചു. മേപ്പാടി പഞ്ചായത്തിൽ മാത്രം 500ൽ അധികം ടൂറിസം സംരംഭങ്ങൾ നിയമവിരുദ്ധമായി പ്രവർത്തിക്കുന്നുണ്ടെന്ന് കുറ്റപ്പെടുത്തി. വിഷയത്തിൽ സർക്കാരിന്‍റെയും ജില്ലാ ഭരണകൂടത്തിന്‍റെയും അടിയന്തര ഇടപെടൽ ഉണ്ടാകണമെന്ന് ആവശ്യപ്പെട്ടു. പ്രസിഡന്‍റ് എൻ. ബാദുഷ അധ്യക്ഷത വഹിച്ചു. എം. ഗംഗാധരൻ, തോമസ് അന്പലവയൽ, ഒ.ജെ. മാത്യു, ബാബു മൈലന്പാടി, എ.വി. മനോജ്, സണ്ണി മരക്കടവ്, പി.എം. സുരേഷ് എന്നിവർ പ്രസംഗിച്ചു.

അറുമുഖനെ കൊലപ്പെടുത്തിയ ആനയെ കണ്ടെത്താനായില്ല

കൽപ്പറ്റ: മേപ്പാടി പൂളക്കുന്നിൽ മുൻ തോട്ടം തൊഴിലാളി അറുമുഖനെ കൊലപ്പെടുത്തിയ ആനയെ ഉൾക്കാട്ടിലേക്ക് തുരത്തുന്നതിന്‍റെ ഭാഗമായി കണ്ടെത്തുന്നതിന് വനസേന ഇന്നലെ നടത്തിയ ശ്രമം വിഫലം. മേപ്പാടി റേഞ്ച് ഫോറസ്റ്റ് ഓഫീസർ, വൈത്തിരി സ്റ്റേഷൻ ഡെപ്യൂട്ടി റേഞ്ച് ഫോറസ്റ്റ് ഓഫീസർ, സെക്ഷൻ ഫോറസ്റ്റ് ഓഫീസർമാർ, സ്റ്റാഫ്, കൽപ്പറ്റ, മേപ്പാടി ആർആർ ടീം അംഗങ്ങൾ എന്നിവർ മൂന്നു സംഘങ്ങളായി പൂളക്കുന്നു, കടൂർ, ഇളന്പ ലേരി, പുഴമൂല ഭാഗങ്ങളിൽ നടത്തിയ തെരച്ചലിൽ അക്രമകാരിയായ ആനയെ കണാനായില്ല. മുത്തങ്ങയിൽനിന്നു എത്തിച്ച രണ്ട് കുംകി ആനകളുടെ സഹായത്തോടെയായിരുന്നു തെരച്ചിൽ. അക്രമകാരിയായ ആന കുംകി ആനകളുടെ സാന്നിധ്യം മനസിലാക്കി തൊട്ടടുത്ത വന മേഖലയിലേക്ക് മാറിയിരിക്കാമെന്ന് സൗത്ത് വയനാട് ഡിഎഫ്ഒ അജിത് കെ. രാമൻ പറഞ്ഞു. തെരച്ചിൽ ഇന്നു രാവിലെ പുനരാരംഭിക്കും. കാട്ടാനകൾ ഇറങ്ങാൻ സാധ്യതയുള്ള പ്രദേശങ്ങളിൽ വനസേന പട്രോളിംഗ് ശക്തമാക്കി.

കൽപ്പറ്റ ബൈപാസ്: പരാതി പരിഹരിക്കണമെന്ന് മനുഷ്യാവകാശ കമ്മീഷൻ

കൽപ്പറ്റ: ബൈപാസിൽ ലിയോ ആശുപത്രിക്ക് സമീപം സ്ഥലത്ത് മണ്ണെടുത്തതിനെത്തുടർന്നു കുഴികളിൽ മഴവെള്ളം കെട്ടിനിന്ന് കിണറുകൾ മലിനമായെന്ന പരാതി അടിയന്തരമായി പരിഹരിക്കണമെന്ന് മനുഷ്യാവകാശ കമ്മീഷൻ ജുഡീഷൽ അംഗം കെ. ബൈജുനാഥ്. പ്രദേശവാസി സി. പി. ഉണ്ണിക്കൃഷ്ണന്‍റെ പരാതിയിൽ കേരള റോഡ് ഫണ്ട് ബോർഡ് എക്സിക്യുട്ടീവ് എൻജിനിയർക്കാണ് കമ്മീഷൻ നിർദേശം. പരാതിയിൽ കമ്മീഷൻ കിഫ്ബി എക്സിക്യുട്ടീവ് എൻജിനിയറുടെ റിപ്പോർട്ട് തേടിയിരുന്നു. മലയോര ഹൈവേ ഫേസ് 2 പ്രവൃത്തിയുമായി ബന്ധപ്പെട്ടാണ് പരാതിയെന്ന് എക്സിക്യുട്ടീവ് എൻജിനിയർ കമ്മീഷനെ അറിയിച്ചു. പ്രവൃത്തി ഏറ്റെടുത്ത കരാർ കന്പനിയെ പരാതികളെത്തുടർന്ന് നീക്കം ചെയ്തു. പുതിയ കന്പനി പ്രവൃത്തി പുനരാരംഭിച്ചിട്ടുണ്ട്. കിണർ വെള്ളം മലിനമാകുന്നുവെന്ന് പരാതി പരിഹരിക്കുമെന്നും എക്സിക്യുട്ടീവ് എൻജിനിയർ അറിയിച്ചു. ഇതിന്‍റെ അടിസ്ഥാനത്തിൽ കമ്മീഷൻ പരാതി തീർപ്പാക്കി.

സർക്കാർ ജീവനക്കാർക്ക് ആനുകൂല്യങ്ങൾ സമയബന്ധിതമായി നൽകണം: ഇ.ജെ. ബാബു

വന്യമൃഗ ആക്രമണം: ടി. സിദ്ദിഖ് കത്ത് നൽകി

കൽപ്പറ്റ: ജില്ലയിലെ വന്യമൃഗ ആക്രമണത്തിന് ശാശ്വത പരിഹാരം കാണുന്നതിന് ശാസ്ത്രീയ നടപടികൾ ആവശ്യപ്പട്ട് ടി. സിദ്ദിഖ് എംഎൽഎ വനം മന്ത്രി എ.കെ. ശശീന്ദ്രന് കത്ത് നൽകി. കഴിഞ്ഞ ദിവസം മേപ്പാടി പൂളക്കുന്നിൽ കാട്ടാന കൊലപ്പെടുത്തിയ അറുമുഖന്‍റെ ആശ്രിതർക്ക് 25 ലക്ഷം രൂപ സമാശ്വാധധനം നൽകണമെന്ന ആവശ്യവും കത്തിലുണ്ട്. കാടും നാടും വേർതിരിക്കാതെ വന്യമൃഗാക്രമണങ്ങളിൽനിന്നു മനുഷ്യരെ രക്ഷിക്കാനാകില്ല. ജില്ലയിലെ വന്യമൃഗാക്രമണം തടയുന്നതിനുള്ള പദ്ധതികൾക്ക് കഴിഞ്ഞ ബജറ്റുകളിൽ പ്രത്യേകം തുക വകയിരുത്തിയിട്ടില്ല. കഴിഞ്ഞ സർക്കാരിന്‍റെ അവസാനകാലത്ത് മുഖ്യമന്ത്രി പ്രഖ്യാപിച്ച 7,000 കോടി രൂപയുടെ പാക്കേജിലും വന്യജീവി പ്രതിരോധത്തിന് ഫണ്ടില്ല. ജനങ്ങളുടെ ജീവന് വിലയില്ലാത്ത അവസ്ഥ ഏറെ വേദനിപ്പിക്കുന്നതും ആശങ്ക ഉളവാക്കുന്നതുമാണ്. ഇതിന് സർക്കാർതലത്തിൽ പരിഹാരം ഉണ്ടാകണം. പുലിയോ കടുവയോ കാട്ടാനയോ ജനവാസമേഖലകളിലെത്താത്ത ഒരു ദിവസം പോലും ജില്ലയിലില്ല. ഈ സാഹചര്യത്തിൽ കാടും നാടും വേർതിരിക്കുന്നതിന് സത്വര നടപടി സ്വീകരിക്കണമെന്ന് കത്തിൽ ആവശ്യപ്പെട്ടു.

ചീക്കല്ലൂർ സാഹിത്യോത്സവം നടത്തി

കണിയാന്പറ്റ: ചീക്കല്ലൂർ ദർശന ലൈബ്രറി വാർഷികാഘോഷത്തിന്‍റെ ഭാഗമായി ചീക്കല്ലൂർ സാഹിത്യോത്സവം നടത്തി. വയൽ വയനാട് റിസോർട്ടിൽ കവി വീരാൻകുട്ടി ഉദ്ഘാടനം ചെയ്തു. അക്ഷരങ്ങൾ അടിസ്ഥാനപ്പെടുത്തി നടത്തുന്ന ഗ്രാമോത്സവങ്ങൾ സമൂഹത്തിന്‍റെ ഉള്ളകങ്ങളിലേക്ക് മാനവികതയും മതേതര ബോധവും എത്തിക്കാൻ സഹായിക്കുമെന്ന് അദ്ദേഹം പറഞ്ഞു. ദർശന ലൈബ്രറി പ്രസിഡന്‍റ് എം. ശിവൻപിള്ള അധ്യക്ഷത വഹിച്ചു. പി.സി. മജീദ് മുഖ്യപ്രഭാഷണം നടത്തി. വിവിധ സെഷനുകളിൽ എഴുത്തുകാരായ ഹാരിസ് നെൻമേനി, ബാലൻ വേങ്ങര, സാദിർ തലപ്പുഴ, ജോസ് പാഴുക്കാരൻ, ഡോ.കെ.എസ്. പ്രേമൻ, ഡോ.ബാവ കെ. പാലുകുന്ന്, ബിജു പോൾ കാരക്കാമല, വാസുദേവൻ ചീക്കല്ലൂർ, അനിൽ കുറ്റിച്ചിറ, ഡോ.കെ.പി. നിതീഷ്കുമാർ, ഷാജി പുൽപ്പള്ളി, എം. ഗംഗാധരൻ എന്നിവർ കഥ, കവിത, നോവൽ, യാത്രാവിവരണം, പ്രാദേശിക ചരിത്രം, ഗോത്രജീവിതം എന്നീ മേഖലകൾ അധികരിച്ച് സംസാരിച്ചു. കവിയരങ്ങിൽ ദാമോദരൻ ചീക്കല്ലൂർ, മുസ്തഫ ദ്വാരക, പ്രതീഷ് താനിയാട്, അതുൽ പൂതാടി, സിന്ധു ചെന്നലോട്, പ്രജീഷ ജയരാജ്, സജി വയനാട്, ലേഖ വയനാട്, ഹരി ശ്രീരാഗം, കെ.ജി. സരോജിനിയമ്മ, വമ്മേരി രാഘവൻ, ദിവ്യ രാംദാസ് എന്നിവർ പങ്കെടുത്തു. ദർശന ലൈബ്രറി സെക്രട്ടറി പി. ബിജു സ്വാഗതവും സാഹിത്യോത്സവം കമ്മിറ്റി കണ്‍വീനർ ഷാജി പുൽപ്പള്ളി നന്ദിയും പറഞ്ഞു. ലൈബ്രറി പ്രവർത്തകരായ ഇ. സുരേഷ് ബാബു, പി. അശോകൻ, ഉണ്ണിക്കൃഷ്ണൻ ചീക്കല്ലൂർ, സി.പി. സുകുമാരൻ, ടി.എസ്. സുരേഷ്, ഷീബ ജയൻ, കെ.ബി. ശ്രാവണ്‍ എന്നിവർ നേതൃത്വം നൽകി.

പ്രഫ.എം.ജി.എസ് നാരായണന്‍റെ നിര്യാണത്തിൽ അനുശോചിച്ചു

കൽപ്പറ്റ: പ്രഫ.എം.ജി.എസ് നാരായണന്‍റെ നിര്യാണത്തിൽ വയനാട് പ്രകൃതി സംരക്ഷണ സമിതി അനുശോചിച്ചു. വയനാടിന്‍റ ചരിത്ര സന്പന്നത അനാവരണം ചെയ്ത മഹാപണ്ഡിതനാണ് അദ്ദേഹമെന്ന് യോഗം ചൂണ്ടിക്കാട്ടി.അന്പലവയലിൽ ചരിത്ര മ്യൂസിയവും വയനാട് ചരിത്ര പഠന കേന്ദ്രവും സ്ഥാപിക്കാൻ മുൻകൈയെടുത്തത് എം.ജി.എസും സംഘവുമായിരുന്നുവെന്ന് യോഗം അനുസ്മരിച്ചു. സെക്രട്ടറി തോമസ് അന്പലവയൽ അധ്യക്ഷത വഹിച്ചു. എൻ. ബാദുഷ, ബാബു മൈലന്പാടി, എം. ഗംഗാധരൻ, എ.വി. മനോജ്, സണ്ണി മരക്കടവ്, ഒ.ജെ. മാത്യു, സി.എസ്. ഗോപാലകൃഷ്ണൻ, പി.എം. സുരേഷ്, രാമകൃഷണൻ തച്ചന്പത്ത് എന്നിവർ പ്രസംഗിച്ചു.

സിപിഐ പുൽപ്പള്ളി ലോക്കൽ സമ്മേളനം ഇന്ന്

പുൽപ്പള്ളി: സിപിഐ ലോക്കൽ സമ്മേളനം ഇന്ന് വീട്ടിമൂല വി.എൻ. ലക്ഷ്മണൻ സംസ്കാരിക നിലയത്തിൽ നടക്കും. പ്രതിനിധി സമ്മേളനം രാവിലെ 11ന് ജില്ലാ സെക്രട്ടറി ഇ.ജെ. ബാബു ഉദ്ഘാടനം ചെയ്യും. ജില്ലാ അസിസ്റ്റന്‍റ് സെക്രട്ടറിമാരായ പി.എം. ജോയി, സി.എസ്. സ്റ്റാൻലി, ജില്ലാ കൗണ്‍സിൽ അംഗം ടി.ജെ. ചാക്കോച്ചൻ തുടങ്ങിയവർ പങ്കെടുക്കും. വൈകുന്നേരം നാലിന് ടൗണിൽ പ്രകടനവും തുടർന്ന് പൊതുസമ്മേളനം, ഗാനമേള എന്നിവയും ഉണ്ടാകും.

"വേനൽ വൈബ്’ സമ്മർ ക്യാന്പ് 29ന് തുടങ്ങും

കൽപ്പറ്റ: സാമൂഹിക, സന്നദ്ധ സംഘടനയായ തണലിനു കീഴിലുള്ള ദയ റിഹാബിലിറ്റേഷൻ ട്രസ്റ്റ് ജില്ലയിൽ നടപ്പാക്കുന്ന ചൈൽഡ് ആൻഡ് വിമൻ റെസിലിയൻസ് പ്രോജക്ടിന്‍റെ ഭാഗമായി എസ്എസ്എൽസി, പ്ലസ് ടു എഴുതി ഫലം കാത്തിരിക്കുന്നവർക്കായി ഏകദിന കരിയർ ഗൈഡൻസ് ശിൽപശാലയും"വേനൽ വൈബ്’ എന്ന പേരിൽ ദ്വിദിന സമ്മർ ക്യാന്പും നടത്തുന്നു. നാളെ രാവിലെ ഒന്പത് മുതൽ കൈനാട്ടി വ്യാപാര ഭവൻ ഹാളിലാണ് ശിൽപശാല. കരിയർ ട്രെയിനർ എം.എസ്. ജലീൽ നേതൃത്വം നൽകുന്ന സൗജന്യ ശിൽപശാലയിൽ പങ്കെടുക്കാൻ 200 പേർക്കാണ് അവസരം. ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ ഉദ്ഘാടനം ചെയ്യും. 29, 30 തീയതികളിൽ ബീനാച്ചി ആൽഫ ഹൗസിലാണ് സമ്മർ ക്യാന്പ്. വിദ്യാഭ്യാസ-നൈപുണ്യ പരിശീലനം, കരിയർ ഗൈഡൻസ്, ശാരീരിക-മാനസിക ആരോഗ്യ അവബോധ ക്ലാസ്, കലാകായിക മത്സരങ്ങൾ തുടങ്ങിയവ ക്യാന്പിന്‍റെ ഭാഗമാണ്. മാതാവോ പിതാവോ നഷ്ടമായ 14നും 18നും ഇടയിൽ പ്രായമുള്ള കുട്ടികളിൽ 40 പേർക്കാണ് പങ്കെടുക്കാൻ അവസരം. ക്യാന്പ് ഉദ്ഘാടനം 29ന് രാവിലെ 9.30ന് ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ നിർവഹിക്കും. വിശദവിവരത്തിന് 9207474587, 7593858835 എന്നീ നന്പറുകളിൽ വിളിക്കാമെന്ന് സംഘാടക സമിതി ഭാരവഹികളായ ഡോ.നൂർജഹാൻ കണ്ണഞ്ചേരി, സി.എച്ച്. സുബൈർ, അനു കെ. ദാസ്, യു. സൗരവ്, പി.എസ്. കവിത, ആർ. ബീയ്യൂട്ടി, എം. ആയിഷ എന്നിവർ വാർത്താസമ്മേളനത്തിൽ അറിയിച്ചു.

കേരള ഉറുദു ടീച്ചേഴ്സ് അസോസിയേഷൻ സംഗമം

കൽപ്പറ്റ: കേരള ഉറുദു ടീച്ചേഴ്സ് അസോസിയേഷൻ ദ്വിദിന സംസ്ഥാന നേതൃസംഗമം ലക്കിടിയിൽ നടത്തി. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു. മഹാരാഷ്ട്രയിൽ സൂചനാബോർഡുകളിൽ ഉറുദു ഉപയോഗിക്കുന്നതിന് എതിരായ ഹർജി തള്ളിയ മുംബൈ ഹൈക്കോടതി വിധി ശരിവച്ച് സുപ്രീംകോടതി നടത്തിയ നിരീക്ഷണങ്ങൾ മഹത്തരമാണെന്ന് അദ്ദേഹം പറഞ്ഞു. കെയുടിഎ സംസ്ഥാന പ്രസിഡന്‍റ് കെ.പി. ഷംസുദ്ദീൻ അധ്യക്ഷത വഹിച്ചു. സലാം മലയമ്മ, നജീബ് മണ്ണാർ, ടി.എ. റഷീദ് എന്നിവർ പ്രസംഗിച്ചു.

സംരക്ഷിതരാകേണ്ടത് സ്വന്തം ഉത്തരവാദിത്വം: ക്രിക്കറ്റ് താരം സജ്ന സജീവൻ

കൽപ്പറ്റ: ലഹരി വസ്തുക്കളുടെ വിപണനവും ഉപഭോഗവും വർധിച്ച സമൂഹത്തിൽ നല്ല ലക്ഷ്യങ്ങൾ ഉൾക്കൊണ്ട് സംരക്ഷിതരാകേണ്ടത് ഓരോ വ്യക്തിയുടെയും സ്വന്തം ഉത്തരവാദിത്വമാണെന്ന് ദേശീയ വനിതാ ക്രിക്കറ്റ് താരം സജ്ന സജീവൻ. എസ്കെഎംജെ സ്കൂൾ ഗ്രണ്ടിലെ എന്‍റെ കേരളം വേദിയിൽ എക്സൈസും ആരോഗ്യ വകുപ്പും സംയുക്തമായി സംഘടിപ്പിച്ച ലഹരി വിരുദ്ധ ബോധവത്കരണ സംവാദം ഉദ്ഘാടനം ചെയ്യുകയായിരുന്നു സജ്ന. സമൂഹത്തിന് മാതൃകയാകുന്നതും ഓരോരുത്തർക്കും താത്പര്യമുള്ളതുമായ നല്ല കാര്യങ്ങളിൽ വ്യാപൃതരാകുകയാണെങ്കിൽ ലഹരി ആസക്തി മറികടക്കാമെന്നു അവർ പറഞ്ഞു. നോണ്‍ കമ്മ്യൂണിക്കബിൾ ഡിസീസസ് ജില്ലാ നോഡൽ ഓഫീസർ ഡോ കെ.ആർ. ദീപ, കൈനാട്ടി ജനറൽ ആശുപത്രി സൈക്യാട്രി വിഭാഗം ജൂണിയർ കണ്‍സൾട്ടന്‍റ് ഡോ.കെ.ആർ. ഹരീഷ് കൃഷ്ണൻ, ജില്ലാ എഡ്യുക്കേഷൻ ആൻഡ് മാസ് മീഡിയ ഓഫീസർ കെ.എം. മുസ്തഫ, അസിസ്റ്റന്‍റ് എക്സൈസ് കമ്മീഷണർ എ.ജെ. ഷാജി, എക്സൈസ് സർക്കിൾ ഇൻസ്പെക്ടർ ടി. ഷറഫുദ്ദീൻ, മാധ്യമപ്രവർത്തക നീനു മോഹൻ, വനിതാ ചേംബർ ഓഫ് കൊമേഴ്സ് പ്രസിഡന്‍റ് ബിന്ദു മിൽട്ടണ്‍ തുടങ്ങിയവർ പങ്കെടുത്തു. താലൂക്ക് ലൈബ്രറി കൗണ്‍സിൽ അംഗം ഷാജൻ ജോസ് മോഡറേറ്ററായി. പനമരം ഗവ.നഴ്സിംഗ് കോളജ് വിദ്യാർഥികൾ ലഹരി വിരുദ്ധ ബോധവത്കരണ ആശയവുമായി നൃത്തം അവതരിപ്പിച്ചു.

"എന്‍റെ കേരളം’: ഇന്ന് വിവിധ വിഷയങ്ങളിൽ സെമിനാർ

കൽപ്പറ്റ: സംസ്ഥാന സർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി എസ്കഐംജെ സ്കൂൾ ഗൗണ്ടിൽ നടത്തുന്ന പ്രദർശന-വിപണന മേളയിലെ പ്രധാന വേദിയിൽ ഇന്ന് വിവിധ വിഷയങ്ങളിൽ സെമിനാർ ഉണ്ടാകും. രാവിലെ 10.30 ന് സാക്ഷരതാ മിഷന്‍റെ നേതൃത്വത്തിൽ "തുടർ വിദ്യാഭ്യാസത്തിന്‍റെ അനന്തസാധ്യതകൾ’ എന്ന വിഷയത്തിലാണ് ആദ്യ സെമിനാർ. ജില്ലാ കളക്ടർ ഡി.ആർ. മേഘശ്രീ ഉദ്ഘാടനം ചെയ്യും. ശാസ്ത്ര ഡയറക്ടർ ഡോ.വി.ആർ.വി. ഏഴോം, എസ്‌സിഇആർടി റിസർച് ഓഫീസർ ഡോ.ടി.വി. വിനീഷ് എന്നിവർ പങ്കെടുക്കും. സാക്ഷരതാമിഷൻ ജില്ലാ കോഓർഡിനേറ്റർ പി. പ്രശാന്ത്കുമാർ മോഡറേറ്ററാകും. ഉച്ചകഴിഞ്ഞ് രണ്ടിന് വിനോദ സഞ്ചാര വകുപ്പിന്‍റെ നേതൃത്വത്തിൽ ’സാഹസിക വിനോദ സഞ്ചാരം: വികസനം, കാഴ്ചപ്പാട്’, ’ഡിജിറ്റൽ മാർക്കറ്റിംഗ്ധ, ’ആർട്ടിഫിഷൽ ഇന്‍റലിജൻസ്’ എന്നീ വിഷയങ്ങളിൽ സെമിനാർ നടത്തും. ടൂറിസം-പൊതുമരാമത്ത് മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്യും. മേള നഗരിയിൽ രാത്രി 7.30ന് മാങ്കോസ്റ്റിൻ മ്യൂസിക് ബാൻഡ് സംഗീതവിരുന്ന് ഒരുക്കും.

ചീരാലിൽ ശല്യം ചെയ്യുന്ന പുലിയെ കണ്ടെത്താനായില്ല

സുൽത്താൻ ബത്തേരി: മേപ്പാടി റേഞ്ച് ഫോറസ്റ്റിലെ മുട്ടിൽ സെക്ഷൻ പരിധിയിലുള്ള ചീരാൽ മേഖലയിൽ ശല്യം ചെയ്യുന്ന പുലിയെ കണ്ടെത്തുത്തിന് വനസേന ശ്രമം തുടരുന്നു. സൗത്ത് വയനാട് ഡിവിഷണൽ ഫോറസ്റ്റ് ഓഫീസറുടെ നിർദേശപ്രകാരം വനപാലകർ ഇന്നലെ പുലിയെ തെരഞ്ഞെങ്കിലും സാന്നിധ്യം സ്ഥിരീകരിക്കാനായില്ല. വനത്തിനു പുറമേ ജനവാസകേന്ദ്രത്തിലെ കാടുപിടിച്ച പ്രദേശങ്ങളിലും സേനാംഗങ്ങൾ തെരച്ചിൽ നടത്തി. പുലിയെ പിടിക്കുന്നതിന് പ്രദേശത്ത് കൂട് സ്ഥാപിക്കുന്നതിന് നടപടി സ്വീകരിച്ചുവരികയാണെന്ന് മേപ്പാടി റേഞ്ച് ഓഫീസർ കെ.വി. ബിജു അറിയിച്ചു.

ആറുവയസുകാരൻ മുങ്ങിമരിച്ചു

കണിയാന്പറ്റ: ചീക്കല്ലൂരിലെ സ്വകാര്യ റിസോർട്ടിന്‍റെ ഭാഗമായ നീന്തൽക്കുളത്തിൽ ആറുവയസുകാരൻ മുങ്ങിമരിച്ചു. തെലുങ്കാന ജോഗിപെട്ട് ചിറ്റ്കുൾ സ്വദേശി ദിലീപ് റെഡ്ഢിയുടെ മകൻ നിവിൻ റെഡ്ഢിയാണ് മരിച്ചത്. നിവിന്‍റെയും ഇരട്ട സഹോദരിയുടെയും ജൻമദിനം ആഘോഷിക്കാൻ കുടുംബസമേതം എത്തിയതായിരുന്നു ദിലീപ് റെഡ്ഢി. ഇന്നലെ രാവിലെ ഒന്പതരയോടെ കുട്ടി നീന്തൽക്കുളത്തിന്‍റെ ഭാഗത്തേക്ക് പോകുകയും അപകടത്തിൽപ്പെടുകയുമായിരുന്നു. ഈ സമയം ഭക്ഷണം കഴിക്കുകയായിരുന്നു മറ്റുള്ളവർ. പുറത്തെടുത്ത് മാനന്തവാടി ഗവ.മെഡിക്കൽ കോളജ് ആശുപത്രിയിൽ എത്തിച്ചപ്പോഴേക്കും കുട്ടിയുടെ ജീവൻ നഷ്ടപ്പെട്ടിരുന്നു.

കെ സ്മാർട്ട്: സെമിനാർ നടത്തി

"ജിഎസ്ടി ആംനെസ്റ്റി സ്കീമിൽ പണം അടയ്ക്കുന്നതിന് സമയം നീട്ടണം’

കൽപ്പറ്റ: ജിഎസ്ടി ആംനെസ്റ്റി സ്കീമിൽ പണം അടയ്ക്കുന്നതിന് സമയം ജൂണ്‍ 30 വരെ നീട്ടണമെന്ന് കേരള ടാക്സ് പ്രാക്ടീഷണേഴ്സ് അസോസിയേഷൻ ജില്ലാ സമ്മേളനം ആവശ്യപ്പെട്ടു. 2020-21, 2021-22 വർഷങ്ങൾ കൂടി സ്കീമിൽ ഉൾപ്പെടുത്തണമെന്ന ആവശ്യവും ഉന്നയിച്ചു. ഗ്രീൻ ഗേറ്റ്സ് ഹാളിൽ സംസ്ഥാന വൈസ് പ്രസിഡന്‍റ് എ. സുരേശൻ ഉദ്ഘാടനം ചെയ്തു. ജില്ലാ പ്രസിഡന്‍റ് കെ.ജി. സന്തോഷ് അധ്യക്ഷത വഹിച്ചു. ജില്ലാ സെക്രട്ടറി കെ. നാരായണൻ റിപ്പോർട്ടും ട്രഷറർ ടി.കെ. ഹരീഷ്കുമാർ വരവുചെലവ് കണക്കും അവതരിപ്പിച്ചു. കെ. മണിരഥൻ, അരവിന്ദാക്ഷൻ പുത്തൂർ, കെ.പി. സന്തോഷ് എന്നിവർ പ്രസംഗിച്ചു. ഭാരവാഹികളായി കെ. നാരായണൻ(പ്രസിഡന്‍റ്), എം. ശൈലജ(വൈസ് പ്രസിഡന്‍റ്), കെ.വി. ശശികുമാർ(സെക്രട്ടറി), ടി.കെ. ഹരീഷ്കുമാർ(ജോയിന്‍റ് സെക്രട്ടറി), ജെസി സന്തോഷ് (ട്രഷറർ) എന്നിവരെ തെരഞ്ഞെടുത്തു.

ലഹരിക്കെതിരേ ജില്ലാ പോലീസ് ഫുട്ബോൾ ടൂർണമെന്‍റ് സംഘടിപ്പിക്കുന്നു

കൽപ്പറ്റ: ലഹരിവിരുദ്ധ പ്രവർത്തനങ്ങളുടെ ഭാഗമായി "നോക്ക് ഒൗട്ട് ഡ്രഗ്സ്’ എന്ന പേരിൽ ജില്ലാ പോലീസ് ഫുട്ബോൾ ടൂർണമെന്‍റ് സംഘടിപ്പിക്കുമെന്ന് ജില്ലാ പോലീസ് മേധാവി തപോഷ് ബസുമതാരി അറിയിച്ചു. മേയ് രണ്ട് മുതൽ 15 വരെ ബ്ലോക്ക് തലത്തിൽ മത്സരങ്ങൾക്ക് തുടക്കമാകും. കൽപ്പറ്റ, മാനന്തവാടി, ബത്തേരി, പനമരം എന്നീ ബ്ലോക്കുകളിൽ ഓരോ ബ്ലോക്കിലും എട്ട് ടീമുകളെ ഉൾപ്പെടുത്തി ആകെ 32 ടീമുകളാണ് മത്സരത്തിൽ മാറ്റുരയ്ക്കുക. കൽപ്പറ്റ ബ്ലോക്കിലെ മത്സരങ്ങൾ പൊഴുതനയിലും മാനന്തവാടിയിൽ തലപ്പുഴയിലും ബത്തേരിയിൽ മുനിസിപ്പൽ സ്റ്റേഡിയത്തിലും പനമരം ബ്ലോക്കിൽ നടവയലിലുമാണ് മത്സരങ്ങൾ. സെമി ഫൈനൽ, ഫൈനൽ മത്സരങ്ങൾ വള്ളിയൂർക്കാവ് മൈതാനത്ത് നടക്കും. ജില്ലാ ഫുട്ബോൾ അസോസിയേഷന്‍റെയും സ്പോർട്സ് കൗണ്‍സിലിന്‍റെയും സഹകരണത്തോടെ നടത്തുന്ന ടൂർണമെന്‍റിൽ പങ്കെടുക്കാൻ ആഗ്രഹിക്കുന്ന ടീമുകളുടെ/ക്ലബ്ബുകളുടെ പേരുവിവരങ്ങൾ ജില്ലാ ഫുട്ബോൾ അസോസിയേഷൻ മുഖേന സ്വീകരിക്കും. ടൂർണമെന്‍റിൽ പങ്കെടുക്കുന്ന ക്ലബുകൾ ഒന്നരമിനിറ്റ് ദൈർഘ്യമുള്ള ഒരു വീഡിയോ 30ന് മുന്പായി അയച്ചു നൽകണം. ഈ വീഡിയോയിൽ ടീമുകളുടെ/ക്ലബ്ബുകളുടെ വിവരങ്ങളും അവർ ലഹരിക്കെതിരേ നടത്തിയിട്ടുള്ള പരിപാടികളുടെ വിവരങ്ങളും ജില്ലാ പോലീസിന്‍റെ നേതൃത്വത്തിൽ നടത്തുന്ന "നോക്ക് ഒൗട്ട് ഡ്രഗ്സ്’ എന്ന കാന്പയിന്‍റെ കാര്യങ്ങളും പ്രതിപാദിക്കണം. വീഡിയോയുടെ ഉള്ളടക്കത്തിൽ വ്യത്യസ്തത പുലർത്താൻ ഭാരവാഹികൾ ശ്രദ്ധിക്കണം. വയനാട് പോലീസ് സംഘടിപ്പിക്കുന്ന ടൂർണമെന്‍റിന്‍റെ വിജയകരമായ നടത്തിപ്പിന് ജില്ലാ അഡി.എസ്പി ടി.എൻ. സജീവ് നോഡൽ ഓഫീസറായി കമ്മിറ്റി രൂപീകരിച്ചു.

"നിങ്ങളുടെ ഇഷ്ടതാരങ്ങൾ വെള്ളിത്തിരയിൽ’

സുൽത്താൻ ബത്തേരി: തൊണ്ണൂറുകളെ അവസാനത്തോടെ കേരളത്തിന്‍റെ ഗ്രാമ നഗരങ്ങളിൽ നിന്ന് അപ്രത്യക്ഷമായ ഒന്നാണ് സിനിമ വിവരങ്ങളുടെ അനൗണ്‍സ്മെന്‍റ് രീതി. സോഷ്യൽമീഡിയയുടെ കടന്നുവരവോടെ നഗര ഗ്രാമങ്ങളിൽ നിന്ന് നാടുനീങ്ങിയ ഒന്നാണ് സിനിമ റിലീസ്, എത്രആഴ്ചയായി പ്രദർശനം തുടങ്ങി എന്നതടക്കം അറിയിക്കുന്ന വാഹനങ്ങളിലെ അനൗണ്‍സ്മെന്‍റ്. ഇക്കാലത്ത് പുതിയ സിനിമ റിലീസുകൾ അറിയിക്കാൻ ഇപ്പോൾ സോഷ്യൽമീഡിയ പ്ലാറ്റ്ഫോമുകളാണ് എല്ലാവരും ഉപയോഗിക്കുന്നത്. എന്നാൽ ആ പഴയകാല രീതിയിൽ ഇപ്പോൾ അനൗണ്‍സ്മെന്‍റ് നടത്തുകയാണ് സുൽത്താൻ ബത്തേരിയിൽ മിന്‍റ് സിനിമാസ്. മോഹൻലാലും ശോഭനയും നായിക നായകൻമാരായെത്തുന്നതും നാളെ റിലീസാകുന്നതുമായ തുടരും സിനിമയുടെ വിവരമാണ് ജീപ്പിലൂടെ മൈക്ക് കെട്ടി അനൗണ്‍സ്മെന്‍റ് നടത്തിയത്. ബത്തരി താലൂക്കിലെ ഗ്രാമഗ്രാമന്തരങ്ങളിലൂടെയാണ് റിലീസ് അറിയിപ്പുമായി അനൗണ്‍സ്മെന്‍റ് ജീപ്പ് ഓടിയത്. നാടകനടനും അനൗണ്‍സ്മെന്‍ററുമായ ആണ്ടൂർ ബാലകൃഷ്ണനാണ് തുടരും സിനിമയുടെ വിവരങ്ങൾ മൈക്കിലൂടെ ജനത്തെ വിളിച്ചറിയളച്ച് പഴയകാല ഓർമ്മകളിലേക്ക് ആളുകളെ കൂട്ടികൊണ്ടുപോയത്. മുൻകാലങ്ങളിൽ സിനിമ റിലീസ് വിവരങ്ങളും രണ്ടും മൂന്നും നാലുംവാരങ്ങൾ ഓടുന്ന സിനിമയുടെ വിവരങ്ങൾ ഇ്ത്തരത്തിൽ അറിയിക്കാറുണ്ടായിരുന്നുവെന്ന പുതുതലമുറയ്ക്ക് പരിചയപ്പെടുത്തൽ കൂടിയാണ് ഇതെന്ന് മിന്‍റ് സിനിമാസ് എം.ഡി. മാത്യുസെബാസ്റ്റ്യൻ പറഞ്ഞു. ഗ്രാമങ്ങളിലൂടെ സിനിമ അനൗണ്‍സ്മെന്‍റുമായി ജീപ്പെത്തിയത് പുതുതലമുറയിലെ കുട്ടികൾക്ക് കൗതുകമായപ്പോൾ പഴയതലമുറയ്ക്ക് അതൊരു ഗൃഹാതുരത്വം കൂടിയാണ് സമ്മാനിച്ചത്.

കാട്ടാന ആക്രമണം: യുഡിഎഫ് മേപ്പാടി റേഞ്ച് ഫോറസ്റ്റ് ഓഫീസ് പടിക്കൽ ധർണ നടത്തി

മേപ്പാടി: യുഡിഎഫ് പഞ്ചായത്ത് കമ്മിറ്റിയുടെ ആഭിമുഖ്യത്തിൽ ഫോറസ്റ്റ് റേഞ്ച് ഓഫീസ് മാർച്ചും ധർണയും നടത്തി. വന്യജീവി ആക്രമണത്തിൽനിന്നു മനുഷ്യരുടെ ജീവനും സ്വത്തിനും സംരക്ഷണം നൽകുക, കഴിഞ്ഞദിവസം കാട്ടാന ആക്രമണത്തിൽ കൊല്ലപ്പെട്ട പൂളക്കുന്ന് അറുമുഖന്‍റെ ആശ്രിതർക്ക് 50 ലക്ഷം രൂപ സമാശ്വാസധനം അനുവദിക്കുക, സർവകക്ഷി യോഗത്തിൽ നൽകിയ ഉറപ്പുകൾ വനം വകുപ്പ് പാലിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. കെപിസിസി അംഗം പി.പി. ആലി ഉദ്ഘാടനം ചെയ്തു. യുഡിഎഫ് പഞ്ചായത്ത് കമ്മിറ്റി ചെയർമാൻ പി.കെ. അഷ്റഫ് അധ്യക്ഷത വഹിച്ചു. നിയോജകമണ്ഡലം ചെയർമാൻ ടി. ഹംസ മുഖ്യപ്രഭാഷണം നടത്തി. ബി. സുരേഷ് ബാബു, ആർ. ഉണ്ണിക്കൃഷ്ണൻ, സി. ശിഹാബ്, ഒ. ഭാസ്കരൻ, എ. രാംകുമാർ, ജോണ്‍ മാതാ, എ. മുസ്തഫ മൗലവി, നോറിസ് മേപ്പാടി, പി. ജലീൽ, എൻ. മജീദ്, ടി.എ. മുഹമ്മദ്, ടി. റിയാസ്, രാധ രാമസ്വാമി, റംല ഹംസ, എ. അഷറഫ് എന്നിവർ പ്രസംഗിച്ചു.

സർക്കാർ ആശുപത്രികളിൽ ഡോക്ടറെ കാണാൻ മുൻകൂട്ടി ടോക്കണ്‍ എടുക്കാം; യുഎച്ച്ഐഡി കാർഡ് ഉപയോഗിച്ച്

കൽപ്പറ്റ: സംസ്ഥാനത്തെ എല്ലാ ഇ ഹെൽത്ത് അധിഷ്ഠിത ആശുപത്രികളിലും ഉപയോഗിക്കാവുന്ന യുഎച്ച്ഐഡി കാർഡ് എടുക്കാൻ എന്‍റെ കേരളം പവലിയനിലെ ആരോഗ്യവകുപ്പ് സ്റ്റാളിലാണ് സൗകര്യമുള്ളത്. പൊതുജനങ്ങൾക്ക് ആധാർ കാർഡുമായി വന്ന് യുഎച്ച്ഐഡി കാർഡുകൾ നേടാം. കുട്ടികൾക്ക് ആധാർ കാർഡ് എടുക്കാം, ആധാർ കാർഡിലെ തെറ്റ് തിരുത്താം. സംസ്ഥാന ഐടി മിഷന്‍റെ സ്റ്റാളിൽ ഏർപ്പെടുത്തിയ അക്ഷയ സർവീസ് കൗണ്ടറിൽ വിവിധ ആധാർ സേവനം ലഭിക്കാൻ ജനത്തിരക്ക്. കുട്ടികളുടെ ആധാർ കാർഡ് എടുക്കൽ, 10 വർഷം പഴക്കമുള്ള ആധാർ പുതുക്കൽ, ആധാർ കാർഡിലെ തെറ്റ് തിരുത്തൽ, ഫോട്ടോ മാറ്റൽ, അഞ്ച്, 15 വയസുകളിൽ നടത്തേണ്ട നിർബന്ധിത ബയോമെട്രിക് അപ്ഡേഷൻ, ആധാറിൽ മൊബൈൽ നന്പർ ചേർക്കൽ തുടങ്ങി ആധാറുമായി ബന്ധപ്പെട്ട് പൊതുജനങ്ങൾ അഭിമുഖീകരിക്കുന്ന മുഴുവൻ പ്രശ്നങ്ങൾക്കും പരിഹാരം പ്രദർശന മേളയിലെ അക്ഷയ സ്റ്റാളിൽ ലഭ്യമാണ്. അക്ഷയയിലൂടെ ലഭ്യമാകുന്ന സേവനങ്ങളെപ്പറ്റിയും അക്ഷയ സംരംഭകനാകാൻ ഉള്ള മാർഗനിർദേശങ്ങളും സ്റ്റാളിൽ ലഭിക്കും.

തിരുനാൾ ആഘോഷം

മൂഴിമല സെന്‍റ് ജോർജ് കപ്പേളയിൽ പുൽപ്പള്ളി: മരകാവ് സെന്‍റ് തോമസ് പള്ളിയുടെ കീഴിലുള്ള മൂഴിമല സെന്‍റ് ജോർജ് കപ്പേളയിൽ വിശുദ്ധ ഗീവർഗീസ് സഹദായുടെ തിരുനാൾ ഇന്ന് നടക്കും. വൈകുന്നേരം 4.30ന് കൊടിയേറ്റ്. അഞ്ചിന് ആഘോഷമായ വിശുദ്ധ കുർബാന. മാനന്തവാടി രൂപത ചാൻസലർ ഫാ. അനൂപ് ചാക്കോ കാളിയാനിക്കൽ മുഖ്യ കാർമികത്വം വഹിക്കും. 6.30ന് ലദീഞ്ഞ്. തുടർന്ന് പരിശുദ്ധ കുർബാനയുടെ ആശീർവാദം. ഏഴിന് സ്നേഹവിരുന്ന്. കൊളവയൽ സെന്‍റ് ജോർജ് ദേവാലയം കൊളവയൽ: സെന്‍റ് ജോർജ് ദേവാലയത്തിൽ വിശുദ്ധ ഗീവർഗീസിന്‍റെയും പരിശുദ്ധ ദൈവമാതാവിന്‍റെയും വിശുദ്ധ സെബസ്റ്റ്യാനോസിന്‍റെയും തിരുനാളും പ്ലാറ്റിനം ജൂബിലി സമാപന പരിപാടികളും തുടങ്ങി. മെയ് നാലുവരെ നീളുന്ന തിരുനാളിന് വികാരി ഫാ.സുനിൽ തെക്കേപേര കൊടിയേറ്റി. മേയ് മൂന്നും നാലുമാണ് പ്രധാന തിരുനാൾ ദിനങ്ങൾ. ഇന്നു വൈകുന്നേരം അഞ്ചിന് വിശുദ്ധ കുർബാനയിലും നൊവേനയിലും ഫാ.സജി ഇളയിടത്ത് കാർമികനാകും. നാളെ രാവിലെ ഏഴിന് വിശുദ്ധ കുർബാന, നൊവേന. 28 മുതൽ മേയ് രണ്ട് വരെ വൈകുന്നേരം അഞ്ചിന് വിശുദ്ധ കുർബാന, നൊവേന. യഥാക്രമം ഫാ.ലൂയിസ് റോയി തുരുത്തിയിൽ, ഫാ.എബി ജയിംസ് പാറേപ്പറന്പിൽ ടിഒആർ, ഫാ.വിനോദ് മങ്കുത്തേൽ, ഫാ.റെന്നി മലാന സിഎംഐ, മാനന്തവാടി രൂപത വികാരി ജനറാൾ മോണ്‍.പോൾ മുണ്ടോളിക്കൽ എന്നിവർ കാർമികരാകും. നവീകരിച്ച സെമിത്തേരി വെഞ്ചരിപ്പ് മേയ് മൂന്നിനു വൈകുന്നേരം 4.30ന് മാനന്തവാടി രൂപത സഹായമെത്രാൻ മാർ അലക്സ് താരാമംഗലം നിർവഹിക്കും. തുടർന്നു അർപ്പിക്കുന്ന തിരുനാൾ ബലിയിൽ അദ്ദേഹം മുഖ്യകാർമികനാകും. 6.30ന് നെൻമേനി കപ്പേളയിലേക്ക് പ്രദക്ഷിണം, ലദീഞ്ഞ്. സന്ദേശം: ഫാ.ബിനു കുടുക്കാംതടത്തിൽ സിഎംഐ. രാത്രി 8.30ന് പരിശുദ്ധ കുർബാനയുടെ ആശീർവാദം. തുടർന്ന് താളമേളങ്ങൾ, ആകാശവിസ്മയം. നാലിന് രാവിലെ ഏഴിന് വിശുദ്ധ കുർബാന. 10ന് മാനന്തവാടി രൂപത മെത്രാൻ മാർ ജോസ് പൊരുന്നേടത്തിന്‍റെ മുഖ്യകാർമികത്വത്തിൽ ആഘോഷമായ തിരുനാൾ കുർബാന, നൊവേന. 12ന് കൊരലാടി കുരിശടിയിലേക്ക് പ്രദക്ഷിണം. 12.30ന് സമാപന ആശീർവാദം. ഉച്ചകഴിഞ്ഞ് 2.30ന് കൊടിയിറക്ക്.

കോണ്‍ഗ്രസ് ശിബിരം 28ന് കൽപ്പറ്റയിൽ; മുഖ്യമന്ത്രിയുടെ രാജി ആവശ്യപ്പെട്ട് കളക്ടറേറ്റ് മാർച്ച് മേയ് ആറിന്

കൽപ്പറ്റ: ബൂത്ത്, വാർഡ്തല നേതാക്കളും മണ്ഡലം ബ്ലോക്ക് ജില്ലാ കമ്മിറ്റി അംഗങ്ങളും സീനിയർ നേതാക്കളും ജനപ്രതിനിധികളും പോഷക സംഘടനാ നേതാക്കളും ഉൾപ്പെട്ട ശിബിരം 28ന് രാവിലെ 10 മുതൽ കൽപ്പറ്റ ചന്ദ്രഗിരി ഓഡിറ്റോറിയത്തിൽ നടക്കുമെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ വാർത്താസമ്മേളനത്തിൽ അറിയിച്ചു. കോണ്‍ഗ്രസ് നയപ്രഖ്യാപനത്തിന്‍റെ ഭാഗമായ ന്യായ്പഥ് പ്രമേയത്തിന്‍റെ ആശയവും അതിന്‍റെ സാരവും ലക്ഷ്യ ബോധവും നഷ്ടപ്പെടാതെ താഴെത്തട്ടിൽ എത്തിക്കുന്നതിനായാണ് കാന്പയിൻ. ഏപ്രിൽ എട്ടിന് ഗുജറാത്തിലെ അഹമ്മദാബാദിൽ കോണ്‍ഗ്രസ് വിശാല വർക്കിഗ് കമ്മിറ്റിയും എഐസിസി സമ്മേളനവും നടന്നു. ഈ സമ്മേളനത്തിൽ അവതരിപ്പിച്ച് അംഗീകാരം നേടിയ ന്യായ്പദ്ധതി പ്രമേയം കോണ്‍ഗ്രസ് പാർട്ടിയുടെ സൈദ്ധ്യാന്തികവും നയപരവുമായ ദിശനിർണയിക്കുന്നത്തിന് ഭരണഘടനാ മൂല്യങ്ങളും ജനാധിപത്യവും ഉൾക്കൊള്ളുന്ന സമഗ്രമായ വികസനം രാജ്യത്തിന് ആവശ്യമാണെന്ന പ്രതിബദ്ധതയ്യിൽ ഉൗന്നിനിൽക്കുന്ന പ്രഖ്യാപനമായിരുന്നു. ഇതിന്‍റെ ഭാഗമായാണ് ശിബിരം നടത്തുന്നത്. അഴിമതിയിൽ മുങ്ങിക്കുളിച്ചു നിൽക്കുന്ന മുഖ്യമന്ത്രി പിണറായി വിജയൻ രാജിവയ്ക്കണമെന്ന് ആവശ്യപ്പെട്ട് മേയ് ആറിന് കളക്ടറേറ്റ് മാർച്ച് നടത്തും.സാധു ജനങ്ങളുടെ സർക്കാരാണെന്ന് അവകാശപ്പെടുന്ന സംസ്ഥാന സർക്കാർ മുഖ്യ മന്ത്രിയുടെ ഓഫീസിൽ നിന്നും തുടങ്ങി സാധാരണക്കാരന്‍റെ വീടിന്‍റെ അടുക്കളവരെ നീളുന്ന അഴിമതി കഥകളാണ് ദിനംപ്രതി പുറത്തുവരുന്നത്. മുഖ്യമന്ത്രിയുടെ പ്രിൻസിപ്പൽ സെക്രട്ടറി ആയിരുന്ന ശിവശങ്കറിന് ഐഎഎസ് ലൈഫ് ഭവന പദ്ധതിയുടെയും സ്വർണക്കടത്തിന്‍റെയും പേരിൽ ജയിലിൽ കഴിയേണ്ടി വന്നു. ഇപ്പോൾ മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി കെ.എം. ഏബ്രഹാം വരവിൽകവിഞ്ഞ സ്വത്ത് സന്പാദിച്ചതായി കേരള ഹൈക്കോടതി കണ്ടെത്തിയിരിക്കുന്നു. ഇത്തരത്തിലുള്ള നിരവധി ആരോപണങ്ങൾക്ക് പുറമേ സ്വന്തം മകൾ വീണാ വിജയൻ എക്സലോജിക് കന്പനി മുഖേന സിഎംആർഎൽ നിന്നും കോടിക്കണക്കിന് രൂപ മാസപ്പടി വാങ്ങിയെന്നും കുറ്റക്കാരിയാണെന്നും വിവിധ സർക്കാർ ഏജൻസികൾ കണ്ടെത്തി. എന്നിട്ടും മുഖ്യമന്ത്രി കസേരയിൽ കടിച്ചുതൂങ്ങി സ്വന്തം ബന്ധു ജനങ്ങളെ സഹായിക്കുന്ന തിരക്കിലാണ് മുഖ്യമന്ത്രി. ഒരു നിമിഷം പോലും അധികാരത്തിൽ തുടരാൻ യോഗ്യതയില്ലാത്ത ഈ സർക്കാരിനെ കേരളത്തിലെ ജനങ്ങൾ വെറുത്തു കഴിഞ്ഞു. വന്യമൃഗ ആക്രമണത്തിൽ കഷ്ടപെടുന്ന ജനങ്ങളോട് നിസഹകരണം പ്രഖ്യാപിച്ച സർക്കാർ കടുവയുടെയും പുലിയുടെയും ആനയുടെയും ആക്രമണത്തിൽ കഴിഞ്ഞ രണ്ടു മാസത്തിനുള്ളിൽ ഏഴു മനുഷ്യ ജീവനുകളും കുറെ വളർത്തു മൃഗങ്ങളുടെയും ജീവനുകൾ പൊലിഞ്ഞിട്ടും അവരുടെ കുടുംബത്തെപോലും മാനുഷിക പരിഗണന നൽകി സഹായിക്കാൻ തയാറായിട്ടില്ല. ഏറ്റവുമൊടുവിൽ എരുമക്കൊല്ലിയിൽ അറുമുഖൻ എന്നയാളുടെ ജീവൻ കൂടി കാട്ടാനയുടെ ആക്രമണത്തിൽ നഷ്ടമായിരിക്കുകയാണ്. മനുഷ്യജീവനുകൾ തുടർച്ചയായി നഷ്ടമാകുന്പഴും പതിവുപല്ലവിയല്ലാതെ വന്യമൃഗ ആക്രമണത്തിന് പരിഹാരം കാണാൻ സർക്കാരിന്‍റെ ഭാഗത്ത് നിന്നും കാര്യമായനടപടികളൊന്നുമുണ്ടാകുന്നില്ലെന്നും അദ്ദേഹം പറഞ്ഞു. അന്താരാഷ്ട്ര വിപണിയിൽ ക്രൂഡോയിൽ വില 60 ഡോളറായി താഴ്ന്നിട്ടും ഇന്ധനവില കുറയ്ക്കാത്ത കേന്ദ്രസർക്കാർ നടപടി ജനദ്രോഹപരമാണെന്നും അദ്ദേഹം കുറ്റപ്പെട്ടുത്തി. കെപിസിസി അംഗം പി.പി. ആലി, ഡിസിസി വൈസ്പ്രസിഡന്‍റ് ഒ.വി. അപ്പച്ചൻ എന്നിവർ വാർത്താ സമ്മേളനത്തിൽ പങ്കെടുത്തു.

ഇടതു ഭരണത്തിനും ബത്തേരി നഗരസഭയ്ക്കും എതിരേ യുഡിഎഫ് ജനകീയ സമരം

സുൽത്താൻ ബത്തേരി: കെട്ടിടനികുതിയും ഭൂനികുതിയും പെർമിറ്റ്ഫീസും വർധിപ്പിച്ചു വാർഷിക പദ്ധതി വിഹിതം വെട്ടികുറയ്ക്കുകയും എല്ലാ മാസവും കരണ്ട് ചാർജും വെള്ളക്കരവും ഭീമമായി വർധിപ്പിച്ചതിനെതിരേ 28ന് രാവിലെ 9.30 മുതൽ വൈകുന്നേരം നാല് വരെ യുഡിഎഫ് ജനകീയ സമരം നടത്തും. സുൽത്താൻ ബത്തേരി നഗരസഭ ഓഫീസിന് മുന്പിലാണ് സമരം. ചരിത്രത്തിലെങ്ങുമില്ലാത്ത രീതിയിൽ സാധാരണക്കാരന് താങ്ങാവുന്നതിലപ്പുറം നികുകി ഭീമമായി വർധിപ്പിക്കുകയും മന്ത്രിമാരും കുടുംബാംഗങ്ങളും അഴിമതിയിൽ മുങ്ങി നിൽക്കുകയും ചെയ്യുകയാണ് പിണറായി സർക്കാരിന്‍റെ കാലത്ത്. ബത്തേരി നഗരസഭ ഇടതുഭരണം 10 വർഷം പൂർത്തിയാക്കുന്പോഴും നഗരസഭയിലെ സാധാരണക്കാരന്‍റെ അടിസ്ഥാന ആവശ്യങ്ങൾ നിറവേറ്റാൻ കഴിയാതെ പുറംമോടിയും മനംമയക്കുന്ന മുദ്രാവാക്യങ്ങളും മാത്രമായി മുന്നോട്ട് പോകുന്ന സ്ഥിതിയാണ് കാണുന്നത്. എടുത്തു കാണിക്കാൻ പറ്റിയ ഒരു നിർമാണ പ്രവർത്തനവും തുടങ്ങാൻ ഈ ഭരണസമിതിക്ക് കഴിഞ്ഞിട്ടില്ല. കഴിഞ്ഞ നാലുവർഷം നഗരസഭയെ ഇരുട്ടിലാക്കി പിന്നീട് ഗ്രാമങ്ങളിൽ വച്ച സ്ട്രീറ്റ് ലൈറ്റുകൾ നിലവാരമില്ലാത്തതിനാൽ ഇപ്പോൾ പ്രവർത്തനരഹിതമാവുകയും ചെയ്തു. ഭരണകക്ഷിയുടെ സ്വജനപക്ഷപാതവും അഴിമതിയും നാട്ടിൽ പാട്ടാണ്. നിറം വച്ച നഗരമുഖത്തിന് പിന്നിൽ തകർന്ന ഗ്രാമീണ റോഡുകൾ ഗ്രാമീണരുടെ മുഖത്ത് സന്തോഷം ഉണ്ടെന്ന സ്പോണ്‍സേർഡ് വർക്ക് നഗരവാസികൾക്ക് ബോധ്യമാകും. ജില്ലയിലെ ചില പഞ്ചായത്തുകളും മുനിസിപ്പാലിറ്റികളും ദേശീയ സംസ്ഥാന ശുചിത്വ സൂചികയിൽ സ്റ്റാർ കാറ്റഗറിയിൽ വരുന്പോഴും നമ്മുടെ നഗരസഭയ്ക്ക് ഇതുവരെ സ്റ്റാർ കാറ്റഗറിയിൽ എത്താൻ കഴിഞ്ഞിട്ടില്ലെന്നത് ഭരണസമിതിയുടെ പോരായ്മയാണ്. വന്യമൃഗശല്യം ഇല്ലാതാക്കാൻ ശാശ്വതമായ ഒരു പദ്ധതിയും ഈ ഭരണസമിതിയുടെ കയ്യിലില്ല. പത്രമാധ്യമങ്ങളിലൂടെ കൊട്ടിഘോഷിച്ച് നാട്ടുകാർക്ക് പ്രതീക്ഷ നൽകിയ ബുലെവാഡ്ന്ധ പദ്ധതി നടപ്പാക്കിയിട്ടില്ല. കടമാൻചിറ, മണിച്ചിറ പദ്ധതികൾ പ്രഖ്യാപനത്തിൽ മാത്രം ഒതുങ്ങി. സത്രംകുന്ന് ടൂറിസം പദ്ധതി ഉപേക്ഷിച്ചു എന്ന് മാത്രമല്ല പ്രദേശവാസികളുടെ എതിർപ്പിനെ മറികടന്ന് മാലിന്യ പ്ലാന്‍റ് സ്ാപിക്കാൻ ശ്രമിക്കുന്നു. വർധിച്ചുവരുന്ന തെരുവ്നായശല്യം കുറയ്ക്കാൻ പ്രഖ്യാപിച്ച എബിസി പദ്ധതി ഒട്ടും കാര്യക്ഷമമല്ല. നഗരസഭയിലെ ഭവനരഹിതർക്ക് വീടും സ്ഥലവും കണ്ടെത്താൻ കഴിഞ്ഞിട്ടില്ല. കുടുംബശ്രീ, തൊഴിലുറപ്പ് പദ്ധതി, ഹരിതകർമ്മസേന എന്നീ പ്രവർത്തന മേഘലകളിലും വലിയ ആക്ഷേപങ്ങൾ നിലനിൽക്കുന്നുണ്ട്. പൂച്ചട്ടിയുടെയും വർണങ്ങളുടെയും പേരിൽ പത്തുവർഷം തള്ളിനീക്കിയ ജനവിരുദ്ധ ഭരണസമിതി ഉണർന്നു പ്രവർത്തിക്കണം എന്നാവശ്യപ്പെട്ടാണ് ഈ സമരം നടത്തുന്നത്. ഐ.സി. ബാലകൃഷ്ണൻ എംഎൽഎ സമരം ഉദ്ഘാടനം ചെയ്യും. സമാപന സമ്മേളനം യൂത്ത് ലീഗ് സംസ്ഥാന ട്രഷറർ പി. ഇസ്മായിൽ ഉദ്ഘാടനം ചെയ്യും. യുഡിഎഫിന്‍റെ ഉന്നതരായ മറ്റ് നേതാക്കളും പങ്കെടുക്കുന്ന സമരപരിപാടിയിൽ മുഴുവൻ ഐക്യജനാധിപത്യ മുന്നണി പ്രവർത്തകരും പങ്കെടുക്കും. കണ്‍വീനർ ബാബു പഴുപ്പത്തൂർ, യുഡിഎഫ് മുനിസിപ്പൽ ചെയർമാൻ ഷബീർ അഹമ്മദ്, നഗരസഭ കൗണ്‍സിലർ സി.കെ. ആരിഫ്, അഡ്വ. സതീഷ് പുതുക്കാട് തുടങ്ങിയവർ പ്രസംഗിച്ചു.

മുട്ടികൊന്പൻ ഭീതിയിൽ വടക്കനാട് കർഷകജനത

മൂന്നുവർഷമായി സ്ഥിരമായി കൊന്പൻ ഭീതിപരത്തുന്നു സുൽത്താൻ ബത്തേരി: മുട്ടികൊന്പൻ ഭീതിയിൽ കർഷകജനത. നൂൽപ്പുഴ, കല്ലൂർകുന്ന്, കരിപ്പൂര്, വടക്കനാട്, വള്ളുവാടി പ്രദേശങ്ങളിലെ കർഷകജനതയാണ് കഴിഞ്ഞ മൂന്ന് വർഷമായി മുട്ടികൊന്പനെന്ന കാട്ടാനയെകൊണ്ട് ജീവിതം ദുസഹമായിരിക്കുന്നത്. കൃഷികൾ നശിപ്പിക്കുന്നതിന് പുറമേ കർഷകരുടെ ജീവനും കാട്ടാന ഭീഷണിയാവുകയാണ്. നിരന്തരം ഈ പ്രദേശങ്ങളിലിറങ്ങി കാട്ടുകൊന്പൻ കാർഷിക വിളകൾ വ്യാപകമായി നശിപ്പിക്കുകയാണ്. കഴിഞ്ഞദിവസങ്ങളിൽ പ്രദേശത്തിറങ്ങിയ കൊന്പൻ കല്ലൂർ ഗംഗാധരൻ, ജയചന്ദ്രൻ, ആലക്കാട്ട് മാലി ജനാർധനൻ എന്നിവരുടെ കാർഷികവിളകൾ വ്യാപകമായി നശിപ്പിച്ചു. കായ്ഫലമുള്ള നാല് തെങ്ങുകൾ, കമുക്, കാപ്പി എന്നിവയും വാഴകളുമാണ് കൊന്പൻ നശിപ്പിച്ചത്. കൂടാതെ പശുക്കൾക്ക് നൽകാനായി വച്ചുപിടിപ്പിച്ച തീറ്റപ്പുല്ലും കാട്ടാന നശിപ്പിച്ചു. പ്രദേശത്ത് സ്ഥിരമായി കാട്ടാന ഇറങ്ങിയിട്ടും തുരത്താനാവശ്യമായ നടപടികൾ വനംവകുപ്പ് എടുക്കാത്തതിൽ ശക്തമായപ്രതിഷേധമാണ് കർഷകരിൽ നിന്ന് ഉയരുന്നത്. കുറിച്യാട് റേഞ്ചൽപ്പെടുന്ന താത്തൂർ വനമേഖലയിൽ നിന്ന് കല്ലൂർകുന്ന് വയൽപ്രദേശത്തുകൂടെയാണ് മുട്ടികൊന്പൻ ജദനവാസകേന്ദ്രത്തിലെത്തുന്നത്. ഇവിടെ മൂന്നിടങ്ങളിൽ ആനപ്രതിരോധ കിടങ്ങ് പൂർണമായി ഇടിഞ്ഞുകിടക്കുകയാണ്. വനത്തിനകത്ത് കിടങ്ങിനോട് ചേർന്ന് ഒരുഭാഗത്ത് തൂക്ക് വേലിയും കൃഷിയിടങ്ങളോട് ചേർന്ന് ഭാഗത്ത് ഫെൻസിംഗും സ്ഥാപിച്ചിട്ടുണ്ട്. എന്നാൽ ഇതെല്ലാം മറികടന്നാണ് കൊന്പൻ ജനവാസകേന്ദ്രത്തിലേക്ക് കടക്കുന്നത്. പ്രതിരോധ സംവിധാനങ്ങളിലെ പാളിച്ചയാണ് ഇതിന് കാരണം. പേരിനുമാത്രം ഫെൻസിംഗ് സ്ഥാപിച്ച് വനംവകുപ്പ് കർഷകരെ കബളിപ്പിക്കുകയാണെന്നാണ് ആരോപണം. കാർഷിക വിളകൾ നശിപ്പിക്കുന്നതിന് പുറമേ കർഷകർക്കുനേരെയും കാട്ടാന ഓടിയടുക്കുന്നതും നിത്യസംഭവമാണ്. കഴിഞ്ഞവർഷം ജൂലൈയിൽ കല്ലൂർ മാറോട് രാജുവെന്ന കർഷകനെ കൃഷിയിടത്തിൽ അക്രമിച്ചുകൊന്നതും മുട്ടികൊന്പനാണ്. അതിനാൽ ആന കൃഷിയിടത്തിലിറങ്ങിയാൽ ഓടിക്കാനും കർഷകർ ഭയക്കുകയാണ്. പലകർഷകരും മുട്ടികൊന്പന്‍റെ ആക്രമണത്തിൽ നിന്ന് തലനാരിഴയ്ക്കാണ് രക്ഷപ്പെട്ടിട്ടുളളത്. ആന കൃഷിയിടത്തിലിറങ്ങിയതറിഞ്ഞ് ടോർച്ചടിച്ചാൽ കർഷകർക്കുനേരെ കൊന്പൻ പാഞ്ഞടുക്കും. ഇതുകാരണം നംവകുപ്പ് വാച്ചർമാരും മുട്ടികൊന്പനെ രാത്രികാലങ്ങളിൽ തുരത്താൻ ഭയക്കുകയാണ്. മാസങ്ങൾക്ക് മുന്പ് മുത്തങ്ങയിൽ നിന്ന് കുങ്കിയാനകളെ ഉപയോഗിച്ച് ഉൾക്കാട്ടിലേക്ക് തുരത്തിയെങ്കിലും ഫലമുണ്ടായില്ല. ഇനിയും പ്രതിരോധമാർഗങ്ങൾ ശക്തിപ്പെടുത്താൻ വനംവകുപ്പ് തയാറായില്ലെങ്കിൽ പ്രത്യക്ഷസമരപരിപാടികളുമായി രംഗത്തിറങ്ങുമെന്നാണ് കർഷകർ നൽകുന്ന മുന്നറിയിപ്പ്.

കൊന്പനിൽനിന്ന് ബെന്നി രക്ഷപ്പെട്ടത് തലനാരിഴയ്ക്ക്

സുൽത്താൻ ബത്തേരി: മുട്ടികൊന്പന്‍റെ ആക്രമണത്തിൽ നിന്ന് ജീവനുംകൊണ്ട് തലനാരിഴയ്ക്ക് രക്ഷപ്പെട്ട ആശ്വാസത്തിലാണ് വള്ളുവാടി കുളത്തൂർകുന്ന മലേക്കുളങ്ങര ബെന്നി. ഇന്നലെ പുലർച്ചെ രണ്ടരയോടെയാണ് സംഭവം. വീടിനോട് ചേർന്നുള്ള പ്ലാവിൽ നിന്ന് ചക്കവീഴുന്ന ശബ്ദംകേട്ടാണ് ബെന്നി ഉണർന്ന് കോലായിലെത്തിയത്. തുടർന്ന് ലൈറ്റിടാതെയും ശബദംമുണ്ടാക്കാതെയും വാതിൽതുറന്ന് വരാന്തയിലേക്ക് കാലെടുത്തുവച്ചതേ ഓർമ്മയുള്ളു. മുറ്റത്ത് ഒരുകോണിൽ നിൽക്കുകയായിരുന്ന മുട്ടികൊന്പൻ ബെന്നിക്കുനേരെ പാഞ്ഞടുക്കുകയായിരുന്നു. പെട്ടന്ന് കോലായിലേക്ക് കയറി വാതിലടക്കാൻ സാധിച്ചതിനാൽ രക്ഷപ്പെടുകയായിരുന്നുവെന്നും താൻ കോലായിലേക്ക് കയറുന്പോഴേക്കും മുട്ടികൊന്പൻ തൊട്ടടുത്ത് എത്തിയിരുന്നതായും ബെന്നി പറഞ്ഞു. ബെന്നിക്കുനേരെ പാഞ്ഞെത്തിയ മുട്ടിക്കൊന്പൻ മേൽക്കൂരയിലെ ഷീറ്റുകളും കഴുക്കോലും പട്ടികയും തകർത്തു. രണ്ട് വർഷംമുന്പും മുട്ടികൊന്പന്‍റെ മുന്നിൽ നിന്ന് സമാനമായ രീതിയിലാണ് ബെന്നി രക്ഷപ്പെട്ടത്. വീടിനുപുറകിൽ നിന്ന് മരംകുലുക്കുന്ന ശബ്ദംകേട്ട് പുറത്തിറങ്ങിയ ബെന്നിക്കുനേരെ അന്നും മുട്ടികൊന്പൻ പാഞ്ഞടുത്തിരുന്നു ചക്കയുടെ കാലമായതിനാൽ കാട്ടാന ഇനിയും വരാനുള്ള സാധ്യത കണക്കിലെടുത്ത് വീടിനോട് ചേർന്നുള്ള പ്ലാവുകളിലെ ചക്കകളും ബെന്നി വെട്ടികളഞ്ഞു.

അറുമുഖന്‍റെ പോസ്റ്റ്മോർട്ടം നടപടികൾ പൂർത്തിയാക്കിയത് കനത്ത പോലീസ് സുരക്ഷയിൽ

വയനാട്ടിൽ കലിപൂണ്ട് കാട്ടാനകൾ : വള്ളുവാടിയിൽ വീടിനുനേരേ കാട്ടാന ആക്രമണം

സുൽത്താൻ ബത്തേരി: വയനാട് വന്യജീവി സങ്കേതം പരിധിയിലുള്ള വള്ളുവാടിയിൽ വീടിനുനേരേ കാട്ടാന ആക്രമണം. കുളത്തൂർക്കുന്ന് മലേകുളങ്ങര ബെന്നിയുടെ വീടിനുനേരേയാണ് ആക്രമണം ഉണ്ടായത്. ഇന്നലെ പുലർച്ചെ രണ്ടരയോടെയാണ് സംഭവം. വീടിനു കേടുപറ്റി. ശബ്ദം കേട്ട് പുറത്തിറങ്ങിയ ബെന്നിക്കുനേരേ ആന പാഞ്ഞടുത്തുവെങ്കിലും അദ്ഭുതകരമായി രക്ഷപ്പെട്ടു. തോൽപ്പെട്ടിയിൽ നിർത്തിയിട്ട കാർ കാട്ടാന ഭാഗികമായി തകർത്തു. ഫോറസ്റ്റ് ചെക്പോസ്റ്റിനു സമീപം ആലസംപാടം സജീർ നിർത്തിയിട്ട കാറിനുനേരേയാണ് ഇന്നലെ പുലർച്ചെ നാലോടെ ആനയുടെ ആക്രമണം നടന്നത്. വീട്ടിലേക്ക് ഇറക്കാനുള്ള സൗകര്യക്കുറവുമൂലമാണ് കാർ റോഡരികിൽ പാർക്ക് ചെയ്തത്. പുലർച്ചെ ശബ്ദംകേട്ട് നോക്കിയപ്പോഴാണ് കാട്ടാന കാർ ആക്രമിക്കുന്നത് കണ്ടെതെന്നു സജീർ പറഞ്ഞു.

പ്രതിഷ്ഠാദിന മഹോത്സവം

കന്പളക്കാട്: ഏച്ചോം ചെറുവിലാട്ടിടത്തിൽ മലക്കാരി ക്ഷേത്രത്തിൽ പ്രതിഷ്ഠാദിന മഹോത്സവം 26, 27 തീയതികളിൽ ആഘോഷിക്കും. ബ്രഹ്മശ്രീ കല്ലന്പള്ളി കൃഷ്ണൻ എന്പ്രാന്തിരി പൂജകളിൽ മുഖ്യകാർമികനാകും. നാളെ വൈകുന്നേരം നടുവിൽവീട് ഉന്നതിയിൽനിന്നു ക്ഷേത്രത്തിലേക്ക് താലപ്പൊലി ഉണ്ടാകും. തുടർന്ന് തുടികൊട്ട്, ശിങ്കാരിമേളം, കൈകൊട്ടിക്കളി, ഗാനമേള, പ്രാദേശിക കലാപരിപാടികൾ എന്നിവ നടക്കും. 27ന് രാവിലെ പൂജകൾക്കുശേഷം പുൽപ്പള്ളി ജയശ്രീ ഹയർ സെക്കൻഡറി സ്കൂൾ അധ്യാപകൻ പി.ആർ. തൃദീപ്കുമാർ ആധ്യാത്മിക പ്രഭാഷണം നടത്തും.

ലഹരി വിരുദ്ധ ബോധവത്കരണം

പുൽപ്പള്ളി: മാനന്തവാടി രൂപതാ മുള്ളൻകൊല്ലി മേഖല മാതൃവേദിയുടെ നേതൃത്വത്തിൽ പുൽപ്പള്ളി വൈഎംസിഎ, ബംഗളൂരു ധർമാരാം സിഎംഐ ബ്രദേഴ്സ്, വ്യാപാരി വ്യവസായി യൂത്ത് വിംഗ് എന്നിവരുടെ സഹകരണത്തോടെ മേയ് ഒന്ന്, രണ്ട് തീയതികളിൽ ലഹരിവിരുദ്ധ ബോധവത്കരണ പരിപാടികൾ സംഘടിപ്പിക്കുമെന്ന് ഭാരവാഹികൾ വാർത്താസമ്മേളനത്തിൽ പറഞ്ഞു. പുൽപ്പള്ളി, മുള്ളൻകൊല്ലി, പൂതാടി പഞ്ചായത്തുകളിലെ 12 സ്ഥലങ്ങൾ കേന്ദ്രീകരിച്ചാണ് തെരുവ് നാടകം ഉൾപ്പെടെയുള്ള ബോധവത്കരണ പരിപാടികൾ നടത്തുക. മേയ് ഒന്നിന് രാവിലെ പത്തിന് ഇരുളത്തുവച്ച് വയനാട് എക്സൈസ് അസി. കമ്മീഷണർ എ.ജെ. ഷാജി ഉദ്ഘാടനം ചെയ്യും. തുടർന്ന് ഷെഡ്, അമരക്കുനി, കാപ്പിസെറ്റ്, മുള്ളൻകൊല്ലി എന്നിവിടങ്ങളിലെ പര്യടനങ്ങൾക്ക് ശേഷം പാടിച്ചിറയിൽ സമാപിക്കും. ഫാ. ബിജു മാവറ, ഫാ. ഷിന്‍റോ സിഎംഐ, സിൽവി ജോയി, സി.കെ. ജോർജ്, ലിയോ പള്ളത്ത് എന്നിവർ വാർത്താസമ്മേളനത്തിൽ പങ്കെടുത്തു.

ലോക പുസ്തകദിനം ആഘോഷിച്ചു

വെള്ളമുണ്ട: പബ്ലിക് ലൈബ്രറിയിൽ ലോകപുസ്തകദിനാഘോഷവും ക്ലാസിക് പുസ്തകങ്ങളുടെ പ്രദർശനവും നടത്തി. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു. ലൈബ്രറി വൈസ് പ്രസിഡന്‍റ് ടി.എം. ഖമർലൈല അധ്യക്ഷത വഹിച്ചു. യുവ എഴുത്തുകാരി സഫു വയനാടിനെയും മുതിർന്ന വായനക്കാരൻ കെ.എം. മുഹമ്മദിനെയും ആദരിച്ചു. വിഷ്വൽ ഇഫക്ടിന് തുടർച്ചയായി രണ്ടുതവണ സംസ്ഥാന അവാർഡ് നേടിയ സുമേഷ് ഗോപാലൻ പ്രത്യേക ക്ഷണിതാവായിരുന്നു. എം. മണികണ്ഠൻ, കെ.കെ. സുരേഷ്, എ.കെ. രമണി, എം. സരസമ്മ, എം.ജെ. ത്രേസ്യ, എൻ.കെ. ബാബുരാജ്, എം. നാരായണൻ, എം. മോഹനകൃഷ്ണൻ എന്നിവർ പ്രസംഗിച്ചു.

അനുശോചന പ്രതിഷേധ റാലി നടത്തി

പുൽപ്പള്ളി: കേരളാ സ്റ്റേറ്റ് എക്സ് സർവ്വീസ് ലീഗ് പുൽപ്പള്ളി യൂണിറ്റിന്‍റെ നേതൃത്വത്തിൽ കാശ്മീരിലെ പഹൽഗാമിൽ ഭീകരർ നടത്തിയ അക്രമത്തിൽ മൃതിയടഞ്ഞ വർക്ക് അനുശോചനമറിയിച്ചു പുൽപ്പള്ളിയിൽ മെഴുകുതി കത്തിച്ചു പ്രകടനം നടത്തി. കെ എസ് ഇ എസ് എൽ യൂണിറ്റ് പ്രസിഡന്‍റ് ജോർജ് കോതാട്ടുകാലായിൽ അധ്യക്ഷത വഹിച്ചു. നിരപരാധികളായവർക്കെതിരെ ഭീകരർ നടത്തുന്ന കടന്നാക്രമങ്ങളെ ശക്തമായി തിരിച്ചടിക്കണമെന്നും ഇക്കാര്യത്തിൽ എക്സ് സർവ്വീസ് ലീഗിന്‍റെ എല്ലാ പിൻതുണയും ഉണ്ടാകുമെന്നറിയിക്കുകയും ചെയ്തു. ജോളി ടി എം, ജോണ്‍ കെ. വി, വർഗീസ് എം എം എന്നിവർ പ്രസംഗിച്ചു

സൈക്ലിംഗ് സമ്മർ കോച്ചിംഗ് ക്യാന്പ്

മുട്ടിൽ: ജില്ലാ സ്പോർട്സ് കൗണ്‍സിൽ, ജില്ലാ സൈക്ലിംഗ് അസോസിയേൻ, ഗ്രാമിക കുട്ടമംഗലം എന്നിവയുടെ സംയുക്താഭിമുഖ്യത്തിൽ ഡബ്ല്യുഎംഒ ഇംഗ്ലീഷ് അക്കാദമിയിൽ സമ്മർ സൈക്ലിംഗ് കോച്ചിംഗ് ക്യാന്പ് ആരംഭിച്ചു. സ്പോർട്സ് കൗണ്‍സിൽ വൈസ് പ്രസിഡന്‍റ് സലിം കടവൻ ഉത്ഘാടനം ചെയ്തു. കെ. നിസാർ അധ്യക്ഷത വഹിച്ചു. ജില്ലാ സൈക്ലിംഗ് അസോസിയേഷൻ സെക്രട്ടറി സുബൈർ ഇളകുളം, ഡബ്ല്യുഎംഒ ഇംഗ്ലീഷ് അക്കാദമി സൂപ്രണ്ട് സലിം, ഇ.എം. മുഹമ്മദ്, അസ്കർ അലിഖാൻ എന്നിവർ പ്രസംഗിച്ചു. എൻ.സി. സാജിത് സ്വാഗതം പറഞ്ഞു. അയാൻ സലിം കടവൻ, അഭിഷ സിബി, ഡിയോണ ജോബിഷ് എന്നിവരാണ് ക്യാന്പിനു നേതൃത്വം നൽകുന്നത്.

മണ്ണിനെ മനസിലാക്കിയുള്ള കൃഷിക്ക് കർഷകരെ സജ്ജരാക്കണമെന്ന് ആവശ്യം

കൽപ്പറ്റ: മണ്ണിനെ അറിഞ്ഞുള്ള കൃഷിക്ക് കർഷകരെ സജ്ജരാക്കുന്നതിന് സർക്കാരും ബന്ധപ്പെട്ട ഏജൻസികളും നടപടികൾ സ്വീകരിക്കണമെന്ന് പുതുതായി രൂപീകരിച്ച കോഫി ഗ്രോവേഴ്സ് ആൻഡ് ബയോ ഡൈവേഴ്സിറ്റി കണ്‍സർവേഷൻ കമ്മിറ്റി ഭാരവാഹികൾ വാർത്താസമ്മേളനത്തിൽ ആവശ്യപ്പെട്ടു. മണ്ണ് പരിശോധിക്കാതെ രാസവളം പ്രയോഗിക്കുന്പോൾ കാപ്പിയും കുരുമുളകും ഉൾപ്പെടെ ചെടികളിൽ ഇലകൾ വാടും. ഇത് രോഗമെന്ന് തെറ്റിദ്ധരിച്ച് കർഷകർ കീടനാശിനിയും കുമിൾനാശിനിയും പ്രയോഗിക്കും. ഇത് മണ്ണിലെ സൂക്ഷ്മാണുക്കളും മിത്രകീടങ്ങളും മറ്റു ജീവജാലങ്ങളും ചത്തൊടുങ്ങുന്നതിനും ജലവും വായുവും മലിനമാകുന്നതിനും കാരണമാകുമെന്ന് സംഘടന വ്യക്തമാക്കി. 2023-24ൽ മാനന്തവാടി ഗവ.മെഡിക്കൽ കോളജ് ആശുപത്രിയിൽ 3,379 കാൻസർ കേസുകളാണ് റിപ്പോർട്ട് ചെയ്തത്. രാജ്യത്ത് വംശനാശം സംഭവിക്കുന്ന ജീവജാലങ്ങളിൽ കൂടുതലും വയനാട്ടിലാണെന്നാണ് 2022ൽ സുവോളജിക്കൽ സർവേ ഓഫ് ഇന്ത്യ സംസ്ഥാന ജൈവ വൈവിധ്യ ബോർഡിന് ലഭ്യമാക്കിയ റിപ്പോർട്ടിൽ പറയുന്നത്. കോഫി ബോർഡിന്‍റെ കണക്കനുസരിച്ച് 59,972 കാപ്പിക്കൃഷിക്കാരുണ്ട്. 1,68,565 ഏക്കറിലാണ് ഇത്രയും പേർ കാപ്പി കൃഷിയ്യുന്നത്. ജില്ലയിൽ 96,500 ഏക്കറിലായിരുന്ന നെൽക്കൃഷി 15,000 ഏക്കറായി കുറഞ്ഞിരിക്കയാണ്. ജില്ലയിലെ മൂന്നു താലൂക്കുകളിലും മണ്ണ് പരിശോധനയ്ക്ക് ആധുനിക ലാബുകൾ സജ്ജമാക്കണം. പരിശോധനയുടെ അടിസ്ഥാനത്തിൽ മാത്രം മണ്ണിൽ രാസവളം പ്രയോഗിക്കണം. പരിശോധനയ്ക്ക് മണ്ണ് ശേഖരിക്കുന്ന ശാസ്ത്രീയ രീതി കർഷകരെ അഭ്യസിപ്പിക്കണം. ഫീൽഡിൽ പ്രവർത്തിക്കാൻ സന്നദ്ധരായ ഉദ്യോഗസ്ഥരെ കൃഷിഭവനുകളിൽ നിയമിക്കണം. ഒരു ഏക്കറിന് രണ്ടുവീതം തേനീച്ചപ്പെട്ടികൾ കാപ്പി കർഷകർക്ക് നൽകാൻ കോഫി ബോർഡ് നടപടി സ്വീകരിക്കണം. കൃഷിഭവനുകളിൽനിന്നു രാസകീടനാശിനികൾക്ക് പകരം ജൈവ കീടനാശനികൾ കർഷകർക്ക് നൽകണം. മണ്ണിൽ ഓർഗാനിക് കാർബണ്‍ വർധിപ്പിക്കുന്നതിന് ജൈവ കന്പോസ്റ്റ് യൂണിറ്റ് നിർമാണത്തിനും ജലസേചന സൗകര്യം ഒരുക്കുന്നതിനും ത്രിതല പഞ്ചായത്തുകൾ ബജറ്റിൽ തുക വകയിരുത്തണം. മണ്ണുപരിശോധനയുമായി സഹകരിക്കാത്ത കർഷകർക്ക് ആനുകൂല്യങ്ങൾ നൽകില്ലെന്ന തീരുമാനം സർക്കാർതലത്തിൽ ഉണ്ടാകണം. ഇക്കാര്യങ്ങളിൽ കൃഷി വകുപ്പിനും കോഫി ബോർഡിനും നിവേദനം നൽകുമെന്നു കമ്മിറ്റി ഭാരവാഹികൾ പറഞ്ഞു. പ്രസിഡന്‍റ് ടി.സി. ജോസഫ്, വൈസ് പ്രസിഡന്‍റ് സെലിൻ മാനുവൽ, സെക്രട്ടറി കെ. മനോജ്കുമാർ, ജോയിന്‍റ് സെക്രട്ടറി പി.ഡി. ദാസൻ, ട്രഷറർ കെ.എൻ. ദേവേഷ്കുമാർ എന്നിവർ പങ്കെടുത്തു.

ദേശീയ മാസ്റ്റേഴ്സ് കായികമേള: അജ്മലിനു രണ്ട് സ്വർണം

കൽപ്പറ്റ: ഹിമാചൽ പ്രദേശിൽ നടക്കുന്ന ദേശീയ മാസ്റ്റേഴ്സ് കായികമേളയിൽ കേരളത്തിനുവേണ്ടി രണ്ട് സ്വർണം നേടി വയനാട് സ്വദേശി. വെള്ളമുണ്ട പോലീസ് സ്റ്റേഷനിലെ സീനിയർ സിവിൽ പോലീസ് ഓഫീസർ അജ്മലാണ് 400 മീറ്റർ ഹർഡിൽസിലും ട്രിപ്പിൾ ജംപിലും ഒന്നാമനായത്. കണിയാന്പറ്റ മില്ലുമുക്ക് സ്വദേശിയാണ് ഇദ്ദേഹം. അഞ്ചു തവണ ദേശീയ പോലീസ് കായികമേളയിൽ പങ്കെടുത്തിട്ടുണ്ട്.

എൻജിഒഎ പ്രവർത്തകർ ധർണ നടത്തി

വൈത്തിരി: ജില്ലാ പ്രസിഡന്‍റ് കെ.ടി. ഷാജിയെ അന്യായമായി സ്ഥലം മാറ്റിയതിൽ പ്രതിഷേധിച്ച് എൻജിഒ അസോസിയേഷൻ പ്രവർത്തകർ താലൂക്ക് ഓഫീസ് പടിക്കൽ ധർണ നടത്തി. സംസ്ഥാന കമ്മിറ്റി അംഗം സി. കെ. ജിതേഷ് ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് ലൈജു ചാക്കോ അധ്യക്ഷത വഹിച്ചു. നസീമ, രജീഷ് കെ. തോമസ്, ബിജേഷ് പോൾ, ജയൻ ആൻസി തോമസ്, കെ. ബിജുല, മീഹ, സിന്ധു, പി. ഷമീർ എന്നിവർ നേതൃത്വം നൽകി.

ഇന്ദുചൂഡൻ ഫൗണ്ടേഷൻ സാംസ്കാരികോത്സവം കൽപ്പറ്റയിൽ

കൽപ്പറ്റ: തൃശൂർ ഇന്ദുചൂഡൻ ഫൗണ്ടേഷനും സമൂഹത്തിന്‍റെ വിവിധ തുറകളിലുള്ളവർ ഉൾപ്പെടുന്ന ഞാറ്റുവേല വാട്സ്ആപ്പ് കൂട്ടായ്മയും ചേർന്ന് കൽപ്പറ്റ എസ്കഐംജെ ജൂബിലി ഹാളിൽ തൂവൽമേള എന്ന പേരിൽ ഇന്നു മുതൽ 27 വരെ സാംസ്കാരികോത്സവം നടത്തുന്നു. പ്രസിദ്ധ പക്ഷിനിരീക്ഷകനും കേരളത്തിലെ പക്ഷികൾ എന്ന പുസ്തകത്തിന്‍റെ രചയിതാവുമായ ഇന്ദുചൂഡന്‍റെ(പ്രഫ.കെ.കെ. നീലകണ്ഠൻ) ജീവിതസന്ദേശവും ജീവജാലങ്ങളോടുള്ള കരുണയും സ്നേഹവും മലയാളഭാഷയോടുള്ള പ്രതിപത്തിയും പ്രചരിപ്പിക്കുന്നതിനുള്ള പ്രവർത്തനങ്ങളുടെ ഭാഗമായാണ് പരിപാടിയെന്ന് ഫൗണ്ടേഷൻ സെക്രട്ടറിയും ചലച്ചിത്ര-സാംസ്കാരിക പ്രവർത്തകനുമായ വി.കെ. ശ്രീരാമൻ, സാംസ്കാരികോത്സവം ക്യുറേറ്റർ എം. രാമചന്ദ്രൻ, ’ഞാറ്റുവേല’ അംഗങ്ങളും ഫോട്ടോഗ്രാഫർമാരുമായ കെ.പി. ഡിജുമോൻ, സണ്ണി ജോസഫ് ചെങ്ങമനാട് എന്നിവർ വാർത്താസമ്മേളനത്തിൽ അറിയിച്ചു. പാടിപ്പറക്കുന്ന മലയാളം എന്ന പേരിൽ പക്ഷിച്ചിത്ര പ്രദർശനം, കുട്ടികൾക്ക് പക്ഷിച്ചിത്ര രചനാമത്സരം, സിനിമ, ഡോക്യുമെന്‍ററി പ്രദർശനം, പ്രഭാഷണങ്ങൾ, ഗായകൻ റാസയുടെ ഗസൽ സന്ധ്യ എന്നിവ സാംസ്കാരികോത്സവത്തിന്‍റെ ഭാഗമാണ്. കേരളത്തിലെ പക്ഷികൾ എന്ന പുസ്തകത്തിൽ 261 ഇനം പക്ഷികളെക്കുറിച്ചാണ് വിശദീകരിക്കുന്നത്. ഇതിൽ 60 ഓളം ഇനം പക്ഷികളുടെ ചിത്രമാണ് പക്ഷിച്ചിത്ര പ്രദർശനത്തിൽ ഉണ്ടാകുക. ഫൗണ്ടേഷൻ സംഘടിപ്പിക്കുന്ന ഒന്പതാമത് പക്ഷിച്ചിത്ര പ്രദർശനമാണ് കൽപ്പറ്റയിലേത്. മൂന്നു ദിവസവും രാവിലെ 11 മുതൽ വൈകുന്നേരം ആറ് വരെയാണ് പ്രദർശനം. സാംസ്കാരികോത്സവം ഉദ്ഘാടനം ഇന്നു രാവിലെ 11ന് പ്രകൃതിസ്നേഹിയും മുൻ എംപിയുമായ എം.വി. ശ്രേയാംസ്കുമാർ നിർവഹിക്കും. യുപി വിഭാഗം വിദ്യാർഥികളുടെ പക്ഷിച്ചിത്ര രചനാമത്സരം 11.30 മുതൽ 12.15 വരെ നടത്തും. വൈകുന്നേരം അഞ്ചിന് കൽപ്പറ്റ നാരായണന്‍റെ പ്രഭാഷണവും തുടർന്ന് സിനിമ പ്രദർശനവും ഉണ്ടാകും. നാളെ രാവിലെ 11ന് ഹൈസ്കൂൾ വിഭാഗം കുട്ടികളുടെ പക്ഷിച്ചിത്ര രചനാമത്സരം തുടങ്ങും. വൈകുന്നേരം അഞ്ചിന് സുരേഷ് ഇളമണിന്‍റെ പ്രഭാഷണം. തുടർന്ന് സിനിമ പ്രദർശനം. 27ന് വൈകുന്നേരം അഞ്ചിന് സമാപന സമ്മേളനം, ഗസൽ.

നന്പ്യാർകുന്നിൽ പുലി ആടിനെ കൊന്നു

സുൽത്താൻ ബത്തേരി: വയനാട്ടിലെ നന്പ്യാർകുന്നിൽ പുലി ആടിനെ കൊന്നു. കിളിയന്പ്രയിൽ ജോയിയുടെ ആടാണ് ചത്തത്. ബുധനാഴ്ച രാത്രി വൈകിയണ് സംഭവം. ആട്ടിൻകൂട്ടിൽനിന്നുള്ള ബഹളം കേട്ട് ഉണർന്ന വീട്ടുകാർ ഒച്ചയിട്ടപ്പോൾ പുലി ഓടിമറഞ്ഞു. നന്പ്യാർകുന്നിന് അടുത്തുള്ള വെള്ളച്ചാലിൽ ഒപ്പമറ്റം റെജിയുടെ പശുവിനെ കഴിഞ്ഞ ദിവസം പുലി ആക്രമിച്ചിരുന്നു. പുലിശല്യം; നാട്ടുകാർ പ്രതിഷേധവുമായി രംഗത്ത് ചീരാൽ : ചീരാൽ നന്പ്യാർകുന്ന് മേഖലയിൽ പുലി ശല്യം വർധിച്ചിട്ടും പുലിയെ കൂട്വച്ച് പിടികൂടുന്നതിന് യാതൊരുവിധ നടപടിയും സ്വീകരിക്കാത്തതിൽ വനം വകുപ്പിനെതിരേ പ്രദേശവാസികൾ വ്യാപക പ്രതിഷേധമാണ് ഉയർത്തിയത്. ആടിനെ പുലി പിടിച്ചിട്ടും വാഹനമില്ലെന്ന് പറഞ്ഞ് സ്ഥലത്തെത്താൻ വൈകിയത് വനം വകുപ്പിനെതിരേ നാട്ടുകാരുടെ രോഷം ആളിക്കത്തി. മേപ്പാടി റേഞ്ചിന് കീഴിലാണ് പുലിയെ കണ്ടെത്തിയ മേഖല. പുലിയെ എത്രയും വേഗം കൂട്വച്ച് പിടികൂടിയില്ലെങ്കിൽ ശക്തമായ സമരപരിപാടികളുമായി രംഗത്തിറങ്ങുമെന്ന് നാട്ടുകാർ മുന്നറിയിപ്പ് നൽകി. അതേ സമയം പുലിയെ കണ്ട മേഖലയിൽ ഇന്നലെ മുതൽ വനം വകുപ്പ് നിരീക്ഷണം ആരംഭിച്ചു.

സംഗീത വിരുന്ന് 27ന്

കൽപ്പറ്റ: ടൂറിസം വകുപ്പ് വയനാട് വൈബ്സ് എന്ന പേരിൽ മാനന്തവാടി 27ന് വളളിയൂർക്കാവ് ഗ്രൗണ്ടിൽ സംഗീത വിരുന്ന് നടത്തും. വൈകുന്നേരം 5.30ന് ആരംഭിക്കും. ദേശീയതലത്തിൽ ശ്രദ്ധേയരായ കലാകാരൻമാർ പരിപാടിയുടെ ഭാഗമാകുമെന്ന് ടൂറിസം മന്ത്രി പി.എ. മുഹമ്മദ് റിയാസ് പറഞ്ഞു. പ്രശസ്ത ഡ്രമ്മർ ശിവമണിയും കീബോർഡിസ്റ്റ് സ്റ്റീഫൻ ദേവസിയും ഒരുക്കുന്ന താളവാദ്യ പ്രകടനമാണ് വയനാട് വൈബ്സിലെ മുഖ്യ ആകർഷണം. ഈ അവതരണത്തിൽ ആട്ടം കലാവേദിയുടെ 25 ശിങ്കാരിമേളക്കാരും അണിനിരക്കും. കാണികളെയും പങ്കാളികളാക്കിയായിരിക്കുംതാളവാദ്യ പ്രകടനം. വാദ്യോപകരണങ്ങൾക്കുപകരം പാത്രം, കന്പ്, കോല്, പലക എന്നിവ ഉപയോഗിച്ച് കാണികൾക്ക് സംഗീത പ്രകടനത്തിൽ പങ്കുചേരാം. തുടിതാളം കലാസംഘത്തിന്‍റെ അവതരണം സംഗീതവിരുന്നിന്‍റെ ഭാഗമാണ്. 20 ഓളം കലാകാരൻമാർ ഈപരിപാടിയിൽ പങ്കെടുക്കും. പിന്നണി ഗായകൻ ഹരിചരണിന്‍റെ നേതൃത്വത്തിൽ ലൈവ് കണ്‍സേർട്ട് അരങ്ങേറും. ചലച്ചിത്ര സംവിധായകൻ ടി.കെ. രാജീവ്കുമാറാണ് വയനാട് വൈബ്സ് ഷോ ഡയറക്ടർ.

ആർ. ഉണ്ണിക്കൃഷ്ണൻ മൂപ്പൈനാട് പഞ്ചായത്ത് പ്രസിഡന്‍റ്

കുട്ടിക്കെതിരേ ലൈംഗികാതിക്രമം: പ്രതിക്ക് ഏഴു വർഷം തടവും പിഴയും

സുൽത്താൻ ബത്തേരി: കുട്ടിക്കെതിരായ ലൈംഗികാതിക്രമക്കേസിൽ പ്രതിക്ക് ഏഴു വർഷം തടവും 6,000 രൂപ പിഴയും ശിക്ഷ വിധിച്ചു. പാലക്കാട് ആലത്തൂർ പുളിക്കൽപറന്പ് പ്രദീപിനെയാണ്(52) ഫാസ്റ്റ് ട്രാക്ക് കോടതി ജഡ്ജ് ഹരിപ്രിയ പി. നന്പ്യാർ ശിക്ഷിച്ചത്. മീനങ്ങാടി പോലീസ് സ്റ്റേഷനിൽ 2023 ഡിസംബറിൽ രജിസ്റ്റർ ചെയ്ത കേസിലാണ് വിധി. അന്നത്തെ മീനങ്ങാടി എസ്ഐ സി. രാംകുമാറാണ് കേസ് തുടക്കത്തിൽ അന്വേഷിച്ചത്. എസ്എംഎസ് ഡിവൈഎസ്പി പി.കെ. സന്തോഷാണ് അന്വേഷണം പൂർത്തിയാക്കി കുറ്റപത്രം സമർപ്പിച്ചത്. സിപിഒമാരായ സബിത, സിന്ധു, പുഷ്പ എന്നിവരും ഉൾപ്പെടുന്നതായിരുന്നു അന്വേഷണസംഘം. പ്രോസിക്യൂഷനുവേണ്ടി സ്പെഷൽ പ്രോസിക്യൂട്ടർ അഡ്വ.ഓമന വർഗീസ് ഹാജരായി.

രേഖകളില്ലാത്ത 57,55,200 രൂപ പിടിച്ചെടുത്തു

മാനന്തവാടി: മതിയായ രേഖകളില്ലാതെ കാറിൽ കടത്തുകയായിരുന്ന 57,55,200 രൂപ പോലീസ് പിടിച്ചെടുത്തു. ഇതുമായി ബന്ധപ്പെട്ട് തമിഴ്നാട് സ്വദേശികളായ ശങ്കരരാജ്, രാജ എന്നിവരെ കസ്റ്റഡിയിലെടുത്തു. കഴിഞ്ഞ ദിവസം തലപ്പുഴ 43-ാം മൈലിൽ എസ്ഐ കെ.എം. സാജു, പ്രൊബേഷൻ എസ്ഐമാരായ കെ.പി. മൻസൂർ, മിഥുൻ അശോക്, സിപിഒ സോഹൻലാൽ എന്നിവർ അടങ്ങുന്ന സംഘം വാഹന പരിശോധനയിലാണ് പണം കണ്ടെടുത്തത്. പണത്തിന്‍റെ ഉറവിടം വ്യക്തമാക്കുന്ന ഒരു രേഖയും കാർ യാത്രികരുടെ പക്കൽ ഉണ്ടായിരുന്നില്ലെന്ന് പോലീസ് അറിയിച്ചു.

കുരിശുമല കയറ്റവും പുതുഞായർ ആഘോഷവും

പുൽപ്പള്ളി: വയനാടിന്‍റെ മലയാറ്റൂർ എന്നറിയപ്പെടുന്ന ശിശുമലയിൽ 55-ാമത് കുരിശുമലകയറ്റവും പുതുഞായർ ആഘോഷവും മലയടിവാരത്ത് പുതുതായി നിർമിച്ച വിശുദ്ധ തോമാശ്ലീഹായുടെ നാമത്തിലുള്ള കപ്പേളയുടെ വെഞ്ചിരിപ്പും 25, 26, 27 തീയതികളിൽ നടക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. ഇന്ന് രാവിലെ 7.30ന് കുരിശിന്‍റെ വഴി, എട്ടിന് വികാരി ഫാ. ബിജു മാവറ കുരിശുമലയിൽ തിരുനാളിന് കൊടി ഉയർത്തും. 8.15ന് വിശുദ്ധ കുർബാന, വൈകുന്നേരം 4.30ന് കരുണ കൊന്ത, 4.45ന് മാനന്തവാടി രൂപതാ വികാരി ജനറാൾ മോണ്‍. പോൾ മുണ്ടോളിക്കലിന്‍റെ കാർമികത്വത്തിൽ കപ്പേളയുടെ വെഞ്ചിരിപ്പും ആഘോഷമായ വിശുദ്ധ കുർബാനയും സന്ദേശവുമുണ്ടാകും. തുടർന്ന് ഇസ്രായേൽ ഫ്രണ്ട്സ് ഒരുക്കുന്ന സ്നേഹവിരുന്നും ഉണ്ടാകും. നാളെ വൈകുന്നേരം 4.30ന് കുരിശിന്‍റെ വഴി, അഞ്ചിന് മലമുകളിൽ വിശുദ്ധ കുർബാന, ഞായറാഴ്ച രാവിലെ 6.45ന് ബത്തേരി ബിഷപ് ഡോ. ജോസഫ് മാർ തോമസിന്‍റെ കാർമികത്വത്തിൽ ആഘോഷമായ കുർബാന, ഒന്പതിന് മലയടിവാരത്തുനിന്നും ആഘോഷമായ കുരിശിന്‍റെവഴി, പത്തിന് മാനന്തവാടി രൂപത പ്രൊക്യുറേറ്റർ ഫാ. ജോസ് കൊച്ചറക്കലിന്‍റെ കാർമികത്വത്തിൽ ആഘോഷമായ വിശുദ്ധ കുർബാനയും സന്ദേശവും. രാവിലെ 8.30 മുതൽ കുരിശുമല കയറുന്ന എല്ലാ ഭക്തജനങ്ങൾക്കും നേർച്ച ഭക്ഷണവുമുണ്ടാകും. തിരുനാൾ ദിവസങ്ങളിൽ കഴുന്ന്, മുടി എന്നിവ എടുക്കുന്നതിനും നേർച്ച കാഴ്ചകൾ സമർപ്പിക്കുന്നതിനും സൗകര്യമുണ്ടാകും. മലകയറാനെത്തുന്നവർക്കാവശ്യമായ കുടിവെള്ളം, ഭക്ഷണം, വൈദ്യസഹായം, വിശ്രമസൗകര്യം തുടങ്ങിയവ ക്രമീകരിച്ചതായി ഭാരവാഹികൾ അറിയിച്ചു. വികാരി ഫാ. ബിജു മാവറ, തങ്കച്ചൻ അമരിക്കാട്ട്, ആന്േ‍റാ കാക്കോനാൽ, രാജു പുതുപ്പറന്പിൽ, സണ്ണി മുട്ടത്ത്, ബിനോയി ഓലിക്കര, ബിനോയി മുട്ടനോലിൽ തുടങ്ങിയവർ വാർത്താസമ്മേളനത്തിൽ പങ്കെടുത്തു.

എന്‍റെ കേരളം: സന്ദർശകരുടെ ശ്രദ്ധ നേടി പോലീസ് സ്റ്റാൾ

കൽപ്പറ്റ: സംസ്ഥാനസർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി എസ്കഐംജെ സ്കൂൾ ഗ്രൗണ്ടിൽ നടക്കുന്ന എന്‍റെ കേരളം പ്രദർശന-വിപണന മേളയിൽ സന്ദർശകരുടെ ശ്രദ്ധ നേടി ജില്ലാ പോലീസ് സ്റ്റാൾ. എകെ 47 മുതൽ റിവോൾവർ വരെ ആയുധങ്ങളുടെയും തിരകളുടെയും ശേഖരം സ്റ്റാളിലുണ്ട്. ആയുധങ്ങളെക്കുറിച്ച് മനസിലാക്കാനും ഫോട്ടോയെടുക്കാനും ബോംബ് സ്ക്വാഡിന്‍റെയും ടെലി കമ്യൂണിക്കേഷന്‍റെയും പ്രവർത്തനം മനസിലാക്കാനും സ്റ്റാളിൽ സൗകര്യം ഒരുക്കിയിട്ടുണ്ട്. സോഷ്യൽ പോലീസിംഗിനു കീഴിലുള്ള സ്റ്റുഡന്‍റ് പോലീസ് കേഡറ്റ്, ജനമൈത്രി, ഹോപ്പ്, ചിരി, തുണ, പോൾ ആപ്പ്, യോദ്ധാവ് തുടങ്ങിയ പദ്ധതികൾ, സൈബർ കുറ്റകൃത്യങ്ങൾ എന്നിവയിൽ ബോധവത്കരണം സ്റ്റാളിൽ നൽകുന്നുണ്ട്. വനിതാ പോലീസ് ഉദ്യോഗസ്ഥരുടെ നേതൃത്വത്തിൽ വനിതകൾക്ക് സ്വയം പ്രതിരോധ പരിശീലനത്തിന് സൗകര്യവും സ്റ്റാളിലുണ്ട്. ജനമൈത്രി പോലീസിന്‍റെ വിവിധ പദ്ധതികൾ, നിയമങ്ങൾ എന്നിവയുമായി ബന്ധപ്പെട്ട ബുക്ലെറ്റുകളും നോട്ടീസും സ്റ്റാളിൽ വിതരണം ചെയ്യുന്നുണ്ട്.

ബത്തേരി - താളൂർ അന്തർ സംസ്ഥാന പാത നവീകരണം : ഗതാഗതം തിരിച്ചുവിട്ട റോഡ് തകർന്നു

സുൽത്താൻ ബത്തേരി: ബത്തേരി താളൂർ അന്തർ സംസ്ഥാന പാതയുടെ നവീകരണവുമായി ബന്ധപ്പെട്ട് മാത്തൂർ പാലം പൊളിച്ച് പണിയുന്നതിനായി ഗതാഗതം തിരിച്ചുവിട്ട റോഡ് തകർന്ന് തരിപ്പണമായി. റോഡിന് ഉൾകൊള്ളാൻ കഴിയുന്നതിലുമധികം വാഹനങ്ങൾ ഇതിലൂടെ സഞ്ചരിക്കാൻ തുടങ്ങിയതാണ് കാരണം. നെൻമേനി പഞ്ചായത്ത് ഓഫീസിന് മുന്നിലൂടെ പോകുന്ന വലിയവട്ടം തവനി മാടക്കര റോഡാണ് തകർന്നത്. കോളിയാടിക്കും മാടക്കരക്കും ഇടയിലുള്ള മാത്തൂർ പാലം കഴിഞ്ഞ ഫെബ്രുവരിയിലാണ് നവീകരണത്തിന്‍റെ ഭാഗമായി പൊളിച്ച് പണിയാൻ തുടങ്ങിയത്. പാലം പൊളിച്ചതോടെ ഗതാഗതം വലിയവട്ടം തവനി വഴി മാടക്കരയിലെത്തിച്ചേരുന്ന വിധമാക്കി. എന്നാൽ ഈ റോഡ് വളരെ ഇടുങ്ങിയതും ഒരേ സമയം ഒന്നിലധികം വാഹനത്തിന് കടന്ന് പോകാൻ പറ്റാത്തതുമാണ്. കോളിയാടിയിൽനിന്നാരംഭിക്കുന്ന റോഡ് ഏറിയ ഭാഗവും വയലിലൂടെയാണ് പോകുന്നത്. ഈ ഭാഗത്തെ റോഡിന്‍റെ രണ്ട് വശങ്ങളുമാണ് തകർന്നിരിക്കുന്നത്. ബദൽ പാലം നിർമിക്കാതെ വാഹനങ്ങൾ ദുർഘടമായ പാതയിലൂടെ വഴി തിരിച്ചുവിട്ടതിനെതിരേ തുടക്കത്തിൽ തന്നെ എതിർപ്പ് ഉയർന്നിരുന്നു. സ്വകാര്യ ബസുടമകൾ ഇതുവഴി ഗതാഗതം നടത്താൻ കഴിയുകയില്ലെന്ന് അറിയിച്ചിരുന്നു. താത്കാലിക പാലം നിർമിക്കാൻ നിലവിലുള്ള പാലത്തിന് സമീപം ആവശ്യത്തിന് സ്ഥല സൗകര്യമുണ്ടായിട്ടും അതൊന്നും ചെയ്യാതെയാണ് കോളിയാടിയിൽ നിന്നും വാഹനം വഴി തിരിച്ചുവിട്ടത്. ഇത് കാരണം കോളിയാടി മുതൽ മാത്തൂർ വരെയുള്ള ഭാഗത്തെ ജനങ്ങൾക്ക് പൊതുഗതാഗത സൗകര്യം നിഷേധിക്കപ്പെട്ടിരിക്കുകയാണ്. വാഹനങ്ങൾ വഴി തിരിച്ചുവിടുക വഴി അഞ്ച് കിലോമീറ്ററോളം കൂടുതൽ സഞ്ചരിക്കേണ്ടിവരികയാണ്. ബത്തേരി താളൂർ, അന്പലവയൽ റൂട്ടിൽ മാത്രമായി ഇരുപത്തിയെട്ട് കഐസ്ആർടിസി ബസുകളും എട്ട് സ്വകാര്യ ബസുകളും സർവീസ് നടത്തുന്നു. ഇവയ്ക്ക് പുറമേ അന്തർ സംസ്ഥാന സർവീസുകളായ കോയന്പത്തൂർ, ഗൂഡല്ലൂർ, അയ്യൻകൊല്ലി ബസുകളും അന്തർജില്ലാ സർവീസുകളായ തൃശൂർ, കോഴിക്കോട് ബസുകളും വഴിതിരിച്ചുവിട്ട ഈ ദുർഘടമായ പാതയിലൂടെയാണ് സർവീസ് നടത്തുന്നത്. ഇത്രയധികം ബസുകളും മറ്റ് സ്വകാര്യ വാഹനങ്ങളും ഇതുവഴി പോകാൻ തുടങ്ങിയതോടെയാണ് റോഡ് പല ഭാഗത്തും ഇടിഞ്ഞ് താഴാൻ തുടങ്ങിയത്. അന്തർ സംസ്ഥാന പാത വീതികൂട്ടി നവീകരണം പൂർത്തീകരിക്കുന്പോഴേക്കും ഇപ്പോൾ ഗതാഗതം വഴി തിരിച്ചുവിട്ട റോഡ് പൂർണമായും തകർന്ന് ഗതാഗതം സാധ്യമല്ലാത്തവിധമാകുമെന്നാണ് പ്രദേശവാസികൾ പറയുന്നത്. ഇടിഞ്ഞ റോഡിന്‍റെ ഇരു വശങ്ങളും അടിയന്തരമായി നന്നാക്കാൻ നടപടി സ്വീകരിച്ചില്ലെങ്കിൽ ഇതുവഴിയുള്ള ഗതാഗതവും നിലയ്ക്കുമെന്ന് യാത്രക്കാർ ഭയപ്പെടുന്നു.

ഷോക്കേറ്റ് പോത്ത് ചത്തു

പനമരം: ട്രാൻസ്ഫോർമറിൽനിന്നു ഷോക്കേറ്റ് പോത്ത് ചത്തു. നെല്ലിയന്പം റോഡിൽ വലിയ പാലത്തിനു സമീപമുള്ള ട്രാൻസ്ഫോർമറിൽനിന്നാണ് ഷോക്കേറ്റത്. പ്രദേശത്തെ മുത്തലിബിന്‍റേതാണ് പോത്ത്.

അഖില കേരള വോളിബോൾ ടൂർണമെന്‍റ് നടത്തി

പുൽപ്പള്ളി: പെരിക്കല്ലൂർ കെസിസിയുടെയും പൗരവേദിയുടെയും ചേർന്ന് ജീവകാരുണ്യ പ്രവർത്തനത്തിന്‍റെ ഭാഗമായി നടത്തിയ അഖില കേരള വോളിബോൾ ടൂർണമെന്‍റ് പെരിക്കല്ലൂർ സെന്‍റ് തോമസ് ഫ്ളഡ് ലിറ്റ് സ്റ്റേഡിയത്തിൽ പനമരം ബ്ലോക്ക് പഞ്ചായത്ത് സ്ഥിരസമിതി അംഗം മേഴ്സി ബെന്നി ഉദ്ഘാടനം ചെയ്തു മനോജ് ഉതുപ്പാൻ അധ്യക്ഷത വഹിച്ചു. ഗ്രാമപഞ്ചായത്ത് അംഗങ്ങളായ ജീസ്റ മുനീർ, സുധ നടരാജൻ, ജോയി ജോസഫ്, ജോണി പുത്തൻകണ്ടം എന്നിവർ പ്രസംഗിച്ചു.

കാഷ്മീർ തീവ്രവാദ ആക്രമണത്തിൽ മരണമടഞ്ഞവർക്ക് ആദരാഞ്ജലികൾ അർപ്പിച്ചു

കൽപ്പറ്റ: കാഷ്മീർ തീവ്രവാദ ആക്രമണത്തിൽ മരണമടഞ്ഞവർക്ക് ബിജെപി കൽപ്പറ്റ മണ്ഡലം കമ്മിറ്റി ആദരാഞ്ജലികൾ അർപ്പിച്ച് ദീപം തെളിയിച്ചു. ശക്തമായ തിരിച്ചടി നൽകണമെന്നും മതം നോക്കി വധിച്ചവരെ രാജ്യവ്യാപകമായി ഒറ്റപ്പെടുത്തണമെന്നും ഭയാനകമായ അന്തരീക്ഷം സൃഷ്ടിച്ചവർക്ക് മാപ്പില്ലെന്നും അധ്യക്ഷത വഹിച്ച മണ്ഡലം അധ്യക്ഷൻ ശിവദാസൻ പറഞ്ഞു. സംസ്ഥാന സമിതി അംഗം എം. ശാന്തകുമാരി, ബിജെപി ജില്ലാ ജനറൽ സെക്രട്ടറി സുബീഷ്, ജില്ലാ വൈസ് പ്രസിഡന്‍റ് കെ. സുബ്രഹ്മണ്യൻ, ജില്ലാ ട്രഷറർ പി. ന്യൂട്ടൻ, അഖിൽ കൃഷ്ണ, കൃഷ്ണൻ, ഹരികൃഷ്ണൻ, പ്രമോദ്കുമാർ, രഞ്ജിത്ത്, പ്രശോബ് തുടങ്ങിയവർ പങ്കെടുത്തു.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD