ADVERTISEMENT

ADVERTISEMENT

പഠന മികവിന് സ്കൂളുകൾക്ക് ഗ്രാന്‍റ് നൽകണമെന്ന്

കോടഞ്ചേരി: സംസ്ഥാനത്തെ സ്കൂളുകളുടെ പഠന നിലവാരത്തിനനുസരിച്ച് എൽപി, യുപി, ഹൈസ്കൂൾ തലങ്ങളിൽ ഗ്രേഡിംഗ് നടത്തി ഗ്രാന്‍റ് അനുവദിക്കണമെന്ന് കെഎസ്‌സി -എം സംസ്ഥാന പ്രസിഡന്‍റ് ബ്രൈറ്റ് വട്ടനിരപ്പേൽ ആവശ്യപ്പെട്ടു.

കെഎസ്‌സി -എം സംസ്ഥാന വ്യാപകമായി തെരഞ്ഞെടുക്കപ്പെട്ട സ്കൂളുകളിലെ കുട്ടികൾക്ക് നൽകി വരുന്ന പഠനോപകരണ വിതരണത്തിന്‍റെ ജില്ലാ തല ഉദ്ഘാടനം മുറമ്പാത്തി ഗവ. എൽപി സ്കൂളിൽ നിർവഹിച്ച് സംസാരിക്കുകയായിരുന്നു അദ്ദേഹം. പഞ്ചായത്ത് അംഗം ഷാജി മുട്ടത്ത് അധ്യക്ഷത വഹിച്ചു.

കേരള കോൺഗ്രസ്-എം ജില്ലാ പ്രസിഡന്‍റ് ടി.എം. ജോസഫ്, കെഎസ്‌സി-എം സംസ്ഥാന ജനറൽ സെക്രട്ടറി അനേക് തോണിപ്പാറ,എം.പി. സിന്ധു, പിടിഎ പ്രസിഡന്‍റ് അൻവർ പാണക്കോട്ടിൽ, എസ്എംസി ചെയർമാൻ സുധീർ തച്ചംപറമ്പിൽ,

ജോൺസൺ പാലയ്ക്കാപ്രായിൽ, അബ്ദുറഹ്മാൻ, കെഎസ്‌സി -എം സംസ്ഥാന സെക്രട്ടറിയേറ്റ് അംഗങ്ങളായ ബിനിൽ മാവേലിൽ, ജേക്കബ് ഷൈൻ, കെ.ജെ. ലിയോ, സ്റ്റീവ് സെബാസ്റ്റ്യൻസ് തുടങ്ങിയവർ പ്രസംഗിച്ചു.

ADVERTISEMENT

ഇരുത്തുള്ളിപ്പുഴയോരത്ത് മുളവനമൊരുങ്ങുന്നു

കോടഞ്ചേരി: പഞ്ചായത്തിലെ കരിമ്പാലക്കുന്ന് ഇരുതുള്ളിപ്പുഴയോരത്ത് പഞ്ചായത്തിന്‍റെ നേതൃത്വത്തില്‍ മുളവനമൊരുങ്ങുന്നു. പഞ്ചായത്തിന്‍റെ കാര്‍ബണ്‍ ന്യൂട്രല്‍ പ്രോഗ്രാമിന്‍റെ ഭാഗമായി ദേശീയ തൊഴിലുറപ്പ് പദ്ധതിയില്‍ ഉള്‍പ്പെടുത്തിയാണ് വനമൊരുക്കുന്നത്. പുഴയോരത്ത് തരിശായി കിടക്കുന്ന പഞ്ചായത്തിന്‍റെ ഉടമസ്ഥതയിലുള്ള അഞ്ചേക്കര്‍ ഭൂമിയില്‍ 1000 തൈകളാണ് നട്ടുപിടിപ്പിക്കുന്നത്. പദ്ധതിയുടെ ഉദ്ഘാടനം മുളത്തൈ നട്ട് പഞ്ചായത്ത് പ്രസിഡന്‍റ് അലക്‌സ് തോമസ് ചെമ്പകശേരി നിര്‍വഹിച്ചു. ഇരുത്തുള്ളി പുഴ സംരക്ഷണ സമിതി പ്രസിഡന്‍റ് ബാബു കുടുക്കില്‍ മുഖ്യപ്രഭാഷണം നടത്തി.പഞ്ചായത്ത് വൈസ് പ്രസിഡന്‍റ് ജമീല അസീസ് അധ്യക്ഷത വഹിച്ചു.

താമരശേരിയിൽ കെട്ടിടത്തിന് മുകളിൽ തീപിടിച്ചു

താമരശേരി: കാരാടിയിലുള്ള കെകെജി ഷോപ്പിംഗ് കോംപ്ലക്സിനു മുകളില്‍ തീപിടിച്ചു. സൂപ്പർമാർക്കറ്റിലെ സാധനങ്ങൾ സൂക്ഷിച്ച ഭാഗത്താണ് തീ ആളിപ്പടർന്നത്. ഓടിക്കൂടിയ നാട്ടുകാരും വ്യാപാരികളും ചേർന്ന് ആദ്യഘട്ടം തീയണക്കാൻ ശ്രമിച്ചെങ്കിലും വിഫലമായി. പിന്നീട് മുക്കത്തുനിന്നും ഫയർഫോഴ്സ് എത്തിയാണ് തീ പൂർണ്ണമായും അണച്ചത്. ഇന്നലെ ഉച്ചയ്ക്ക് ഒരു മണിയോടെയാണ് സംഭവം.

പുലി ഭീതി വിട്ടൊഴിയാതെ മലയോര മേഖല

കൂടരഞ്ഞി : പൂവാറംതോട് മേഖലയിൽ പൂലി ഭീതിയിൽ കഴിയുന്ന ജനങ്ങളുടെ ജീവൻ സുരക്ഷിതമാക്കാൻ അത്മാർത്ഥ ശ്രമം വനം വകുപ്പ് നടത്തണമെന്ന് കൂടരഞ്ഞി പഞ്ചായത്ത് യുഡി എഫ് കമ്മിറ്റി ആവശ്യപ്പെട്ടു. പുലിയെ പിടികൂടാൻ സ്ഥാപിച്ച കൂട് മാറ്റി സ്ഥാപിക്കാൻ നടപടി സ്വീകരിക്കണമെന്ന് യോഗം ആവശ്യപ്പെട്ടു. യോഗത്തിൽ പഞ്ചായത്ത് കമ്മിറ്റി ചെയർമാൻ ജോണി പ്ലാക്കാട്ട് അധ്യക്ഷതവഹിച്ചു. നിയോജക മണ്ഡലം ചെയർമാൻ സി.കെ. കാസീം ഉദ്ഘാടനം ചെയ്തു. സിബു തോട്ടത്തിൽ, സണ്ണി കിഴക്കരക്കാട്ട്, വി.എ. നസീർ, സണ്ണി പെരികിലം തറപ്പേൽ, എൻ.ഐ. അബ്ദുൾ ജബ്ബാർ തുടങ്ങിയവർ പ്രസംഗിച്ചു.

തെരുവുനായ ശല്യം രൂക്ഷം

പെരുവണ്ണാമൂഴി: കടിയങ്ങാട് - പെരുവണ്ണാമൂഴി റൂട്ടിൽ തെരുവുനായ ശല്യം രൂക്ഷം. കഴിഞ്ഞ ദിവസം സ്കൂട്ടറിൽ പെരുവണ്ണാമൂഴിക്ക് വൈകീട്ട് ഏഴരയോടെ യാത്ര ചെയ്ത അമ്മക്കും മകൾക്കും നേരേ പട്ടാണിപ്പാറയിൽ വച്ച് രണ്ട് തെരുവു നായകൾ പാഞ്ഞടുത്തു. ആദ്യം ഭയന്നെങ്കിലും മനസാന്നിധ്യം വിടാതെ അധ്യാപിക കൂടിയായ അമ്മ സ്കൂട്ടർ മുന്നോട്ടെടുക്കുകയായിരുന്നു. ഒരു കിലോമീറ്റർ ദൂരത്തിൽ നായകൾ പിന്നാലെയുണ്ടായിരുന്നു. ടോർച്ചടിച്ച് വരുന്ന വഴി പോക്കരെ കണ്ടാണ് നായകൾ പിന്തിരിഞ്ഞത്. വണ്ടി നിർത്തിയാൽ അക്രമണം ഉറപ്പായിരുന്നെന്ന് അധ്യാപിക പറഞ്ഞു. താഴത്തുവയൽ, പെരുവണ്ണാമൂഴി എന്നിവിടങ്ങളിലും അക്രമകാരികളായ തെരുവു നായകളുടെ കേന്ദ്രമാണ്.

കാട്ടാന നശിപ്പിച്ച കൃഷിയിടം സന്ദർശിച്ചു

തിരുവമ്പാടി: കാട്ടാന നശിപ്പിച്ച കൃഷിയിടം തിരുവമ്പാടി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ നേതാക്കൾ സന്ദർശിച്ചു. ഓളിക്കൽ മങ്ങാട്ട് സിജോയുടെ വീടിനോട് ചേർന്ന് കൃഷിയിടത്തിലെ തെങ്ങ്, കമുക്, ജാതി, കൊക്കൊ, വാഴ, കപ്പ മുതലായവ കാട്ടാന നശിപ്പിച്ചിരുന്നു.തുടർച്ചയായി കാട്ടാന ഇറങ്ങുന്ന പ്രദേശമാണിത്. വന്യമൃഗങ്ങൾ ജനവാസ മേഖലയിലേക്ക് കടന്നു കയറുന്നത് തടയുന്നതിന് വനംവകുപ്പ് അടിയന്തരമായി ശാശ്വത പരിഹാരം കാണണമെന്ന് നേതാക്കൾ ആവശ്യപ്പെട്ടു. തിരുവമ്പാടി മണ്ഡലം കോൺഗ്രസ് കമ്മിറ്റി വൈസ് പ്രസിഡന്‍റ് ജിതിൻ പല്ലാട്ട്, കർഷക കോൺഗ്രസ് സംസ്ഥാന ജനറൽ സെക്രട്ടറി ബോസ് ജേക്കബ്, പഞ്ചായത്ത് പ്രസിഡന്‍റ് ബിന്ദു ജോൺസൺ, വികസന കാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ലിസി മാളിയേക്കൽ, ഉറുമി വാർഡ് മെമ്പർ ലിസി സണ്ണി എന്നിവർ നേതൃത്വം നല്കി.

സെൻട്രൽ മാർക്കറ്റ് നവീകരണം: കച്ചവടക്കാര്‍ ഈ മാസം പത്തിനകം ഒഴിയും

കോഴിക്കോട്: നഗരത്തിലെ പുരാതന മാർക്കറ്റായ സെൻട്രൽ മാർക്കറ്റ് മാളാക്കി നവീകരിക്കുന്നതിന് മുന്നോടിയായി കച്ചവടക്കാരോട് ഈ മാസം 10ന് മുമ്പ് ഒഴിയാൻ നിർദേശം. ബലിപെരുന്നാളിനു പിന്നാലെ കച്ചവടക്കാർ ഒഴിയുന്നതോടെ നിർമാണ പ്രവർത്തനങ്ങളിലേക്ക് കടക്കാനാകുമെന്നാണ് പ്രതീക്ഷ. 55.17 കോടിയുടെ നവീകരണത്തിനാണ് സർക്കാർ അനുമതിയായത്. ഒഴിയേണ്ടിവരുന്ന നിലവിലുള്ള കച്ചവടക്കാർക്ക് മൂന്നിടത്തായാണ് പകരം സംവിധാനമൊരുക്കുന്നത്. ഇതിനായി ഇപ്പോഴത്തെ മാർക്കറ്റ് കെട്ടിടത്തിന്‍റെ എതിർവശത്തായി 50 സെന്‍റ് സ്ഥലം കോർപറേഷൻ വാടകക്കെടുത്തിട്ടുണ്ട്. അഞ്ച് ലക്ഷം രൂപയാണ് പ്രതിമാസ വാടക. ഇവിടെ താൽക്കാലിക സൗകര്യമൊരുക്കുന്ന പ്രവൃത്തി നടന്നുവരുകയാണ്. നിലവിലുള്ള മാർക്കറ്റിനോട് ചേർന്ന് കോർപറേഷന്‍റെ തന്നെ കൈവശമുള്ള മറ്റ് രണ്ട് സ്ഥലത്തുകൂടി കച്ചവടക്കാർക്ക് സൗകര്യമൊരുക്കുന്നുണ്ട്. ഇതിലൊരു ഭാഗത്ത് 37 താൽക്കാലിക ഷെഡ് നിർമിക്കും. ഷെഡ് കച്ചവടക്കാർതന്നെയാകും നിർമിക്കുക. ഇതിനായി ശരാശരി 90,000 രൂപ കോർപറേഷൻ കച്ചവടക്കാർക്ക് നൽകും. ഇതിനു തൊട്ടടുത്തായി മാർക്കറ്റിന്‍റെ തെക്കുഭാഗത്ത് വെള്ളം കെട്ടിനിൽക്കുന്ന ഒമ്പതു സെന്‍റ് സ്ഥലവും ഒരുക്കുന്നുണ്ട്. ഉണക്ക മീൻ കച്ചവടക്കാർക്ക് ഈ സ്ഥലമാണ് നൽകുക. ഹാളും കച്ചവടകേന്ദ്രവുമടങ്ങിയ രണ്ട് നിലയുള്ള കെട്ടിടം രണ്ടുവർഷത്തിനകം നിർമാണം പൂർത്തിയാക്കാനാണ് ലക്ഷ്യമിടുന്നത്. മത്സ്യലേലത്തിനും ചെറുകച്ചവടത്തിനുമുള്ള ഇടങ്ങളും ശീതീകരിച്ച മാർക്കറ്റും ഡോർമെറ്ററിയും വലിയ ഹാളും പുതിയ കെട്ടിടത്തിലുണ്ടാകും. റിക്രിയേഷൻ ഹാൾ, മീൻ വിഭവങ്ങളുള്ള ഹോട്ടൽ, പാർക്കിങ് സൗകര്യം എന്നിവയുമുണ്ടാകും. മീൻ മണമില്ലാത്തവിധം മുഴുവൻ ശീതീകരിച്ച ഹാളിൽ ഇപ്പോൾ കച്ചവടം ചെയ്യുന്നവർക്കെല്ലാം സ്ഥലം നൽകും.

മെറിറ്റ് ഡേ സംഘടിപ്പിച്ചു

മുക്കം: 178 വിദ്യാർഥികൾ മുഴുവൻ വിഷയങ്ങൾക്കും 46 വിദ്യാർഥികൾ ഒന്പത് വിഷയങ്ങൾക്കും എപ്ലസ് നേടി സംസ്ഥാനത്ത് തന്നെ മികച്ച വിജയം കരസ്ഥമാക്കിയ കൊടിയത്തൂർ പിടിഎം ഹൈസ്കൂൾ വിദ്യാർഥികളെ ആദരിക്കുന്നതിനായി സംഘടിപ്പിച്ച മെറിറ്റ് ഡേ വേറിട്ടതായി. മുഴുവൻ വിദ്യാർഥികൾക്കും അവരുടെ രക്ഷിതാക്കൾ തന്നെയാണ് വിശിഷ്ടാതിഥികളുടെ സാന്നിധ്യത്തിൽ ഉപഹാരം നൽകിയത്. പരിപാടി നജീബ് കാന്തപുരം എംഎൽഎ ഉദ്ഘാടനം ചെയ്തു. സ്കൂൾ ഓഡിറ്റോറിയത്തിൽ നടന്ന ചടങ്ങിൽ പിടിഎ പ്രസിഡന്‍റ് സി. ഫസൽ ബാബു അധ്യക്ഷനായി. കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബു അനുമോദന പ്രസംഗം നടത്തി. വാർഡ് മെമ്പർ വി. ഷംലൂലത്ത്, പ്രിൻസിപ്പാൾ എം.എസ്. ബിജു, എസ്.എ. നാസർ, ഉമ്മാച്ചക്കുട്ടി, നാസർ കാരങ്ങാടൻ, സി. മഹ്ജൂർ, കെ.പി. മുഹമ്മദ്, ഷരീഫ് അമ്പലക്കണ്ടി, മുഹമ്മദലി കുനിയിൽ പ്രസംഗിച്ചു.

മലയോര മേഖലയിൽ കക്കൂസ് മാലിന്യം തള്ളൽ തുടർക്കഥ

മുക്കം: മലയോര മേഖലയിൽ വിവിധ ഭാഗങ്ങളിൽ രാത്രിയുടെ മറവിൽ കക്കൂസ് മാലിന്യം തള്ളൽ തുടർക്കഥയാവുന്നു. മുക്കം നഗരസഭയുടെയും ചാത്തമംഗലം പഞ്ചായത്തിന്‍റെയും അതിർത്തിയിൽ മുത്താലം ഷാൻഗ്രില ഒഡിറ്റോറിയത്തിന് സമീപത്ത് റോഡരികിലെ കൃഷിയിടത്തിലാണ് കഴിഞ്ഞ ദിവസം രാത്രി കക്കൂസ് മാലിന്യം തള്ളിയത്. നിരവധി കർഷകരുടെ വാഴ‌, ചേന, കമുങ്ങ് ഉൾപ്പടെ കൃഷി ചെയ്യുന്ന സ്ഥലമാണിത്. കാഞ്ഞിരത്തിങ്ങൽ മണാശേരി തോട് ഉത്ഭവിക്കുന്ന കണ്ണിപൊയിൽ വയലിൽ കക്കൂസ് മാലിന്യം തള്ളിയതോടെ നിരവധി പേർ കുളിക്കാനും മറ്റ് ആവശ്യങ്ങൾക്കും ഉപയോഗിക്കുന്ന തോടും തോടിന്‍റെ തീരത്തുള്ള കിണറും മലിനമാകും. ത് വലിയ പകർച്ചാ വ്യാധിക്ക് കാരണമാകുമെന്നും നാട്ടുകാർ പറയുന്നു.

പരിസ്ഥിതി ദിനം ആചരിച്ചു

കൂടരഞ്ഞി: കൂടരഞ്ഞി സെന്‍റ് സെബാസ്റ്റ്യൻസ് എൽപി സ്കൂളിൽ പരിസ്ഥിതി ദിനം വിപുലമായ പരിപാടികളോടെ ആചരിച്ചു. വാർഡ് മെമ്പർ ജോസ് തോമസ് മാവറ, പിടിഎ പ്രസിഡന്‍റ് ബോബി വർഗീസ് എന്നിവർ ചേർന്ന് വൃക്ഷത്തൈ നട്ട് പരിപാടി ഉദ്ഘാടനം ചെയ്തു. പ്ലാസ്റ്റിക് മലിനീകരണം അവസാനിപ്പിക്കുക എന്ന ഈ വർഷത്തെ പരിസ്ഥിതിദിന സന്ദേശത്തെ മുൻ നിർത്തി വിദ്യാർഥികൾ പരിസ്ഥിതിദിന പ്രതിജ്ഞയെടുത്തു. ചടങ്ങിൽ വാർഡ് മെമ്പർ ജോസ് തോമസ് മാവറ അധ്യക്ഷത വഹിച്ചു. പരിസ്ഥിതി സംരക്ഷിക്കേണ്ടതിന്‍റെ ആവശ്യകതയെ കുറിച്ച് കുട്ടികൾക്ക് ബോധവത്കരണം നൽകി. സ്കൂൾ ഹെഡ്മിസ്ട്രസ് സോഫിയ തോമസ്, പിടിഎ പ്രസിഡന്‍റ് ബോബി വർഗീസ്, അധ്യാപക പ്രതിനിധി ബീന മാത്യു എന്നിവർ പ്രസംഗിച്ചു. പരിപാടികൾക്ക് അധ്യാപകരായ സ്വപ്ന മാത്യു, ബീന മാത്യു എന്നിവർ നേതൃത്വം നൽകി.

എരപ്പാൻതോട്-കാറ്റുള്ളമല റോഡിന്‍റെ ശോചനീയാവസ്ഥ പരിഹരിക്കണമെന്ന്

കൂരാച്ചുണ്ട്: എരപ്പാൻതോട്- കാറ്റുള്ളമല റോഡിന്‍റെ ശോചനീയാവസ്ഥക്ക് ഉടൻ പരിഹാരം കാണണമെന്ന് വാർഡ് കോൺഗ്രസ് കമ്മിറ്റി യോഗം ആവശ്യപ്പെട്ടു .റോഡിന്‍റെ ശോചനീയ പരിഹരിക്കാൻ അറ്റകുറ്റപ്പണിക്കായി ഫണ്ട് അനുവദിച്ചിട്ടും കരാറുകാരുടെ അനാസ്ഥ മൂലം പ്രവൃത്തി എങ്ങുമെത്താതെ നീണ്ടു പോകുകയാണെന്ന് യോഗം കുറ്റപ്പെടുത്തി. ഓലിക്കൽ ഭാഗം മുതൽ വ്യൂ പോയിന്‍റ് വരെയുള്ള ഇക്കോ ടൂറിസം റോഡ് പലയിടങ്ങളിലും മൂന്നു മീറ്റർ വീതി മാത്രമേയുള്ളൂ. ഇതിനാൽ മേഖല സന്ദർശിക്കുന്ന ടൂറിസ്റ്റുകളുടെ വാഹനങ്ങൾ അപകടത്തിൽപ്പെടുന്നത് നിത്യ സംഭവമായി മാറുകയാണ്. ആയതിനാൽ എത്രയും വേഗം റോഡിനാവശ്യമായ വീതി വർധിപ്പിക്കുകയും റോഡ് തകർന്ന്‌ ഗതാഗത യോഗ്യമല്ലാത്ത സ്ഥലങ്ങളിൽ അനുവദിച്ച ഫണ്ട് ഉപയോഗിച്ച് റോഡ് ഗതാഗത യോഗ്യമാക്കണമെന്നും യോഗം ആവശ്യപ്പെട്ടു. വാർഡ് പ്രസിഡന്‍റ് തോമസ് അനിക്കാട്ട് അധ്യക്ഷത വഹിച്ചു. പോളി കാരക്കട, ബേബി മുണ്ടക്കപ്പടവിൽ, ഷാജു കൊച്ചുവീട്ടിൽ, ജോസ് കോട്ടക്കുന്നേൽ, ഷൈനി പുളിക്കൽ, ഷൈനി കോലക്കൽ, ലിസമ്മ മുണ്ടയ്ക്കപ്പടവിൽ, സുബിൻ എന്നിവർ പ്രസംഗിച്ചു.

മഴയും വെയിലും കൊണ്ട് മാലിന്യ ചാക്കുകള്‍ വീണ്ടും റോഡരികില്‍

കോഴിക്കോട്: ഹരിത കര്‍മ്മ സേന വീടുകളില്‍ നിന്നും സ്ഥാപനങ്ങളില്‍ നിന്നും ശേഖരിക്കുന്ന മാലിന്യ ചാക്കുകെട്ടുകള്‍ വീണ്ടും റോഡരികില്‍ ചീഞ്ഞുനാറുന്നു. പലയിടത്തും ചാക്കുകെട്ടുകള്‍ മഴയും വെയിലും കൊണ്ട് ദുര്‍ഗന്ധം പരത്തി നഗരത്തിന്‍റെ വിവിധ ഭാഗങ്ങളില്‍ കൂമ്പാരമായിരിക്കുകയാണ്. മഴ ശക്തമായതോടെ പലയിടത്തും ഇതില്‍ നിന്നും ഒലിച്ചിറങ്ങുന്ന ദുര്‍ഗന്ധം വമിക്കുന്ന വെള്ളം ചവിട്ടിവേണം വിദ്യാര്‍ഥികളും പ്രായമായവരുമടക്കം നഗരത്തിലെ പ്രധാന റോഡുകളിലൂടെ പോലും യാത്ര ചെയ്യാന്‍. നഗരമധ്യത്തില്‍ ടൗണ്‍ ഹാള്‍ റോഡിന് സമീപം മാലിന്യം ശേഖരിക്കാനായി രണ്ടു കണ്ടെയ്‌നറിനുകള്‍ സ്ഥാപിച്ചിട്ടുണ്ടെങ്കിലും കണ്ടെയ്‌നറിന് പിന്‍വശത്തായി മാലിന്യചാക്കുകള്‍ കൂടികിടക്കുന്ന അവസ്ഥയാണ്. കാരപ്പറമ്പ്, സിവില്‍ സ്റ്റേഷന്‍, കല്ലായി, കോതി, മാറാട്, ബേപ്പൂര്‍ ഗ്വോതീശ്വരം തുടങ്ങി പലയിടത്തും ഇത്തരത്തില്‍ മാലിന്യചാക്കുകള്‍ കൂടികിടക്കുകയാണ്. ഇതോടെ പേവിഷബാധ മരണങ്ങള്‍ അടക്കം ജില്ലയില്‍ തെരുവുനായ ശല്യം രൂക്ഷമാകുന്നതിനിടയിലാണ് ബന്ധപ്പെട്ട അധികൃതര്‍ തന്നെ ഇത്തരം അപകട സാഹചര്യങ്ങള്‍ ഉണ്ടാക്കുന്നതെന്ന രൂക്ഷ വിമര്‍ശനവും ഉയരുന്നുണ്ട്. കൂടാതെ പനി, മഞ്ഞപിത്തം, ഡെങ്കിപ്പനി, കൊവിഡ് തുടങ്ങിയ കേസുകള്‍ കൂടുന്ന സാഹചര്യത്തിലാണ് കോര്‍പറേഷന്‍റെ നിരുത്തരവാദപരമായ സമീപനം. അതേസമയം നഗരത്തിലെ പല പ്രധാന റോഡുകള്‍ക്ക് വശങ്ങളിലും നടപ്പാതയോട് ചേര്‍ന്നും ഒറ്റപ്പെട്ട ചാക്കുകളില്‍ മാലിന്യം നിക്ഷേപ്പിക്കുന്ന സ്ഥിതിയുമുണ്ട്. വസ്ത്രങ്ങള്‍, പ്ലാസ്റ്റിക് കവറുകള്‍, ഭക്ഷണ അവശിഷ്ടങ്ങള്‍ എന്നിവയാണ് പല ചാക്കുകളിലുമുള്ളത്. ചാലപ്പുറം മുതല്‍ മൂരിയാട് വരെയുള്ള ഭാഗങ്ങളില്‍ ഇന്‍റര്‍ലോക്ക് വിരിച്ച നടപ്പാതകള്‍ക്ക് സമീപവും ഇത്തരം ചാക്കുകള്‍ കാണാം. റാം മോഹന്‍ റോഡിലെ ക്രൈംബ്രാഞ്ച് ഓഫീസിനു മുന്‍പിലും ഇത്തരത്തില്‍ ഉപേക്ഷിച്ച നിലയില്‍ വസ്ത്രങ്ങളടങ്ങിയ ചാക്കുകള്‍ ഉണ്ട്.

പാലിയേറ്റീവ്‌ ഉപകരണങ്ങൾ വിതരണം ചെയ്തു

താമരശേരി: പഞ്ചായത്ത്‌ ഭരണസമിതിയുടെ നേതൃത്വത്തിൽ പാലിയേറ്റീവ്‌ പ്രവർത്തനങ്ങളുടെ ധനശേഖരണാർഥം സംഘടിപ്പിച്ച ഓമശേരി ഫെസ്റ്റിൽ മിച്ചം വന്ന തുക ഉപയോഗിച്ച്‌ ഓമശേരി ഗവ. കുടുംബാരോഗ്യ കേന്ദ്രത്തിലെ പാലിയേറ്റീവ്‌ വിഭാഗത്തിന്‌ ഉപകരണങ്ങൾ കൈമാറി. ഒന്നര ലക്ഷം രൂപയോളം വില വരുന്ന സാധന സാമഗ്രികളാണ്‌ ഭരണസമിതിയുടെയും ഫെസ്റ്റ്‌ സംഘാടക സമിതിയുടെയും നേതൃത്വത്തിൽ എഫ്‌എച്ച്‌സിക്ക്‌ നൽകിയത്‌. കട്ടിലുകൾ, എയർ ബെഡുകൾ, വീൽ ചെയർ, വാക്കർ, മെബുലൈസർ എന്നിവയും ഫാമിലി ഹെൽത്ത്‌ സെന്‍ററിൽ രജിസ്റ്റർ ചെയ്ത ഡയാലിസിസ്‌ ചെയ്യുന്ന മുഴുവൻ രോഗികൾക്കുമുള്ള ഡയലൈസറും ബ്ലഡ്‌ ടൂബിംഗ് സെറ്റും വിതരണം ചെയ്തവയിൽ പെടും. ഓമശേരി എഫ്‌എച്ച്‌സി അങ്കണത്തിൽ നടന്ന ചടങ്ങിൽ പഞ്ചായത്ത്‌ പ്രസിഡന്‍റ് കെ. കരുണാകരൻ മെഡിക്കൽ ഓഫീസർ ഡോ. പി. രമ്യക്ക്‌ പാലിയേറ്റീവ്‌ ഉപകരണങ്ങൾ കൈമാറി വിതരണോദ്ഘാടനം നിർവഹിച്ചു. ഫെസ്റ്റ്‌ സംഘാടക സമിതി ചെയർമാൻ പി.കെ. ഗംഗാധരൻ അധ്യക്ഷത വഹിച്ചു.

ഉപഹാരം നൽകി ആദരിച്ചു

കൂരാച്ചുണ്ട്: പ്ലസ് ടു പരീക്ഷയിൽ ടോപ് സ്കോറർ ആയി ഉന്നത വിജയം നേടിയ കൂരാച്ചുണ്ട് സെന്‍റ് തോമസ് ഹയർ സെക്കൻഡറി സ്കൂൾ വിദ്യാര്‍ഥിനിയും പുളിവയൽ സ്വദേശിനിയുമായ തെരേസ് ജോസഫൈൻ താന്നിയാന്നിക്കലിനെ ഫ്രണ്ട്സ് പുളിവയലിന്‍റെ നേതൃത്വത്തിൽ ഉപഹാരം നൽകി ആദരിച്ചു. പഞ്ചായത്ത് അംഗം ആൻസി ജോസഫ് ചടങ്ങിൽ അധ്യക്ഷത വഹിച്ചു. ഒന്നാം വാർഡ് മെമ്പർ വിൽസൺ പാത്തിച്ചാലിൽ വിദ്യാര്‍ഥിനിയ്ക്ക് ഉപഹാരം നൽകി ആദരിച്ചു. 1200 മാർക്കിൽ 1999 മാർക്ക് നേടി കൊണ്ടാണ് തെരേസ് ഉന്നത വിജയം കരസ്ഥമാക്കിയത്. ചടങ്ങിൽ തമ്പാൻ തോമസ്, മനോജ് തോമസ്, സോണി പുത്തൻപുരയിൽ, മുബീർ കുഴിച്ചാലിൽ, സന്തോഷ് മരിയ ഭവൻ, അജീഷ് ഇല്ലിക്കൽ, മാണി പേണ്ടാനത്ത് തുടങ്ങിയവർ നേതൃത്വം നൽകി. പുളിവയലിലെ കർഷകൻ താന്നിയാനിയിൽ ബിജു ഫിലിപ്പ് - ശാലോം ജീവനക്കാരിയായയ ഷിജിമോൾ ദമ്പതികളുടെ മൂത്തമകളാണ് തെരേസ്. സഹോദരി ലിസ്ബെറ്റ് കൂരാച്ചുണ്ട് സെന്‍റ് തോമസ് ഹൈസ്കൂൾ ഒൻപതാം തരം വിദ്യാര്‍ഥിനിയാണ്.

സ്വകാര്യ ബസ് ജീവനക്കാർ തമ്മിലുള്ള സംഘർഷം കണ്ടെത്താൻ എസ്എച്ച്ഒമാർക്ക് നിർദേശം

കോഴിക്കോട്: സ്വകാര്യ ബസുകളിലെ ജീവനക്കാർ തമ്മിലുണ്ടാകുന്ന സംഘർഷവും ഗതാഗതനിയമലംഘനങ്ങളും മറ്റ് കുറ്റകൃത്യങ്ങളും കണ്ടെത്തുന്നതിന് നഗരത്തിലെ എല്ലാ എസ്എച്ച്ഒമാർക്കും നിർദേശം നൽകിയതായി സിറ്റി പോലീസ് കമ്മീഷണർ മനുഷ്യാവകാശ കമ്മീഷനെ അറിയിച്ചു. സ്വകാര്യബസുകളിൽ മൊബൈൽ ഗുണ്ടാപ്പട എന്ന തലക്കെട്ടിൽ സ്വകാര്യബസ് ജീവനക്കാർ തമ്മിലുള്ള സംഘർഷത്തെക്കുറിച്ച് പ്രസിദ്ധീകരിച്ച പത്രവാർത്തയുടെ അടിസ്ഥാനത്തിൽ രജിസ്റ്റർ ചെയ്ത കേസിൽ അടിയന്തര നടപടികൾ സ്വീകരിക്കാൻ കമ്മീഷൻ ജുഡീഷ്യൽ അംഗം കെ. ബൈജുനാഥ് നിർദേശം നൽകിയിരുന്നു. ഇതിന്‍റെ അടിസ്ഥാനത്തിലാണ് റിപ്പോർട്ട് നൽകിയത്. ബസ് ജീവനക്കാർ തമ്മിലുള്ള സംഘർഷം ശ്രദ്ധയിൽ വന്നിട്ടുണ്ടെന്നും കർശനനിയമനടപടികൾ സ്വീകരിക്കുന്നുണ്ടെന്നും റിപ്പോർട്ടിൽ പറയുന്നു. ബസുകളുടെ സമയത്തെ ചൊല്ലി വാക്കേറ്റവും അടിപിടിയും നടക്കുന്നുണ്ട്. ജീവനക്കാരിൽ ഭൂരിഭാഗവും ചെറുപ്പക്കാരും ലഹരിമരുന്നുകൾ ഉപയോഗിക്കുന്നവരുമാണ്. അശാസ്ത്രിയമായി പെർമിറ്റ് നൽകുന്നതിനാൽ ഒരു റൂട്ടിൽ ഒരു മിനിറ്റിൽ രണ്ട് ബസുകളാണ് സർവീസ് നടത്തുന്നത്. ഇതിനിടയിൽ ഗതാഗതകുരുക്കുണ്ടായാൽ ബസുകൾ തമ്മിൽ മത്സരവും സമയത്തെചൊല്ലി തർക്കവുമുണ്ടാകുന്നു. നഗരത്തിലെ പ്രധാന സ്ഥലങ്ങളിലെല്ലാം രൂക്ഷമായ ഗതാഗതക്കുരുക്ക് അനുഭവപ്പെടാറുണ്ട്. മിക്ക ബസുകളും സമയക്രമം പാലിക്കാതെ ട്രിപ്പ് മുടങ്ങുന്നതായി ശ്രദ്ധയിൽപ്പെട്ടിട്ടുണ്ട്. ബസുകൾ തമ്മിലുള്ള തർക്കവുമായി ബന്ധപ്പെട്ട് 2024 സെപ്റ്റംബർ 20 വരെ സിറ്റിയിൽ 22 കേസുകൾ രജിസ്റ്റർ ചെയ്ത് അന്വേഷണം നടത്തിവരുന്നുണ്ട്. മദ്യപിച്ച് ബസോടിക്കുന്നവരെ കണ്ടെത്താൻ സ്പേഷ്യൽ ഡ്രൈവുകൾ നടത്താറുണ്ട്.

ബോധവത്കരണ ക്ലാസ്

കൂരാച്ചുണ്ട്: കല്ലാനോട് സെന്‍റ് മേരീസ് ഹയർ സെക്കൻഡറി സ്കൂളിൽ വിദ്യാർഥികൾക്കായി പരിസര ശുചിത്വവും വ്യക്തി ശുചിത്വവും എന്ന വിഷയത്തിൽ ബോധവത്കരണ ക്ലാസ് സംഘടിപ്പിച്ചു. കൂരാച്ചുണ്ട് കുടുംബാരോഗ്യ കേന്ദ്രം ജൂനിയർ ഹെൽത്ത് ഇൻസ്പെക്ടർ ജോൺസൺ ജോസഫ് ക്ലാസ് നയിച്ചു. സ്കൂൾ പ്രിൻസിപ്പൽ സജി ജെ. കരോട്ട്, എൻഎസ്എസ് കോർഡിനേറ്റർ ജെസി മോൾ, സ്കൗട്ട് മാസ്റ്റർ ജസ്റ്റിൻ ജോസ്, ഗൈഡ് ക്യാപ്റ്റൻ പി. ജിജിത, സൗഹൃദ കോഡിനേറ്റർ രഞ്ജിനി ഗ്രേസ്, കരിയർ ഗൈഡൻസ് കോർഡിനേറ്റർ ബോണി ജേക്കബ് എന്നിവർ നേതൃത്വം നൽകി.

കഞ്ചാവുമായി യുവാവ് പിടിയിൽ

നാദാപുരം: വിൽപനക്കായി കൊണ്ടുവന്ന കഞ്ചാവുമായി തൂണേരിയിൽ യുവാവ് പോലീസ് പിടിയിൽ. ചെക്യാട് പഞ്ചായത്തിലെ പാറക്കടവ് സ്വദേശിയായ പഴയങ്ങാടിയിൽ മുഹമ്മദ് (37) ആണ് നാദാപുരം പോലീസിന്‍റെ പിടിയിലായത്. തൂണേരി പട്ടാണി പെട്രോൾ പമ്പ് പരിസരത്ത് നാദാപുരം പോലീസും ഡിവൈഎസ്പിയുടെ സ്ക്വാഡ് അംഗങ്ങളും നടത്തിയ പരിശോധനക്കിടയിലാണ് പ്രതി പിടിയിലായത്. സംശയാസ്പദമായ സാഹചര്യത്തിൽ കണ്ട ഇയാളെ കസ്റ്റഡിയിലെടുത്ത് ചോദ്യം ചെയ്യുകയായിരുന്നു. ചെറു പൊതികളിലാക്കി സൂക്ഷിച്ച 31 ഗ്രാം കഞ്ചാവ് ഇയാളിൽ നിന്ന് കണ്ടെടുത്തു. വളയം പോലീസ് സ്റ്റേഷൻ പരിധിയിൽ മോഷണം ഉൾപ്പെടെയുള്ള കേസുകളിൽ പ്രതിയായിരുന്നു മുഹമ്മദ് എന്ന് പോലീസ് പറഞ്ഞു. പ്രതി സഞ്ചരിച്ചിരുന്ന ബൈക്ക് പോലീസ് കസ്റ്റഡിയിൽ എടുത്തു.

പരിസ്ഥിതിയെ സ്നേഹിച്ച്... നാടാകെ ഒന്നിച്ചു : ലോക പരിസ്ഥിതി ദിനം ആചരിച്ചു

കോഴിക്കോട്: സംസ്ഥാന ശാസ്ത്ര സാങ്കേതിക പരിസ്ഥിതി കൗണ്‍സില്‍, മലബാര്‍ ബൊട്ടാണിക്കല്‍ ഗാര്‍ഡന്‍ ആന്‍ഡ് ഇന്‍സ്റ്റിറ്റ്യൂട്ട് ഫോര്‍ പ്ലാന്‍റ് സയന്‍സ്, സെന്‍റര്‍ ഫോര്‍ വാട്ടര്‍ റിസോഴ്‌സസ് ഡെവലപ്‌മെന്‍റ് ആന്‍ഡ് മാനേജ്‌മെന്‍റ്, ദേവഗിരി കോളജ്, ഇഐഎസിപിപിസി ഹബ് എന്നിവയുടെ സഹകരണത്തോടെ ദേവഗിരി സെന്‍റ് ജോസഫ്‌സ് കോളജില്‍ സംഘടിപ്പിച്ച ലോക പരിസ്ഥിതി ദിനാചരണം ജില്ലാ കളക്ടര്‍ സ്‌നേഹില്‍ കുമാര്‍ സിംഗ് ഉദ്ഘാടനം ചെയ്തു. ദിനാചരണത്തിന്‍റെ ഭാഗമായി ജില്ലാ വൃക്ഷമായി തെരഞ്ഞെടുത്ത ഈയകം കളക്ടര്‍ ക്യാമ്പസില്‍ നട്ടു. സംസ്ഥാന ശാസ്ത്ര സാങ്കേതിക പരിസ്ഥിതി കൗണ്‍സില്‍ എക്‌സിക്യൂട്ടീവ് വൈസ് പ്രസിഡന്‍റ് പ്രെഫ. കെ.പി സുധീര്‍ അധ്യക്ഷത വഹിച്ചു. കേരള യൂണിവേഴ്‌സിറ്റി ഓഫ് ഫിഷറീസ് ആന്‍ഡ് ഓഷ്യന്‍ സ്റ്റഡീസിലെ ഡോ. ബിജുകുമാര്‍, സ്‌കൂള്‍ ഓഫ് എന്‍വയോണ്‍മെന്‍റല്‍ സ്റ്റഡീസ് ഡയറക്ടര്‍ ഡോ. അരുണ്‍ ബാബു എന്നിവര്‍ പഠന സെഷനുകള്‍ക്ക് നേതൃത്വം നല്‍കി. സംസ്ഥാന ശാസ്ത്ര സാങ്കേതിക പരിസ്ഥിതി കൗണ്‍സില്‍ മെമ്പര്‍ സെക്രട്ടറി പ്രഫ. എ. സാബു, കോളജ് മാനേജര്‍ ഫാ. ബിജു കെ. ഐസക്, പ്രിന്‍സിപ്പല്‍ ഫാ. ഡോ. ബിജു ജോസഫ്, ഡോ. മനോജ് പി. സാമുവല്‍, ഡോ. എന്‍.എസ്. പ്രദീപ്, ഡോ. പി. ഹരിനാരായണന്‍, ഡോ. കെ.എം. മഞ്ജുള തുടങ്ങിയവര്‍ പ്രസംഗിച്ചു. ഉത്തരമേഖല സോഷ്യല്‍ ഫോറസ്ട്രി ഡിവിഷന്‍റെ ആഭിമുഖ്യത്തില്‍ മാനാഞ്ചിറ ബിഇഎം ഗേള്‍സ് ഹയര്‍ സെക്കന്‍ഡറി സ്‌കൂളില്‍ സംഘടിപ്പിച്ച പരിസ്ഥിതി ദിനാചരണവും ബോധവത്കരണ റാലിയും മേയര്‍ ഡോ. ബീനാ ഫിലിപ്പ് ഉദ്ഘാടനം ചെയ്തു. ഡെപ്യൂട്ടി പോലീസ് കമീഷണര്‍ അരുണ്‍ കെ. പവിത്രന്‍ റാലി ഫ്ളാഗ് ഓഫ് ചെയ്തു. ഫോറസ്റ്റ് അസി. കണ്‍സര്‍വേറ്റര്‍ കെ. നീതു, സോഷ്യല്‍ ഫോറസ്ട്രി ഉത്തരമേഖല കണ്‍സര്‍വേറ്റര്‍ ആര്‍. കീര്‍ത്തി തുടങ്ങിയവര്‍ പങ്കെടുത്തു. ഗുരുവായൂരപ്പന്‍ കോളജ്, ആസ്റ്റര്‍ മിംസ് ഹോസ്പിറ്റല്‍ വളണ്ടിയര്‍മാര്‍ എന്നിവരുടെ സഹകരണത്തോടെ കോഴിക്കോട് ബീച്ച്, ലുലുമാള്‍ എന്നിവിടങ്ങളില്‍ ഫ്ളാഷ് മോബ് അവതരിപ്പിച്ചു. കൊയിലാണ്ടി നഗരസഭാതല പരിസ്ഥിതി ദിനാചരണം കൊടക്കാട്ടുംമുറി ജൈവ വൈവിധ്യ പാര്‍ക്കില്‍ വൃക്ഷത്തൈ നട്ട് ചെയര്‍പേഴ്‌സണ്‍ സുധ കിഴക്കെപ്പാട്ട് ഉദ്ഘാടനം ചെയ്തു. വൈസ് ചെയര്‍മാന്‍ അഡ്വ. കെ. സത്യന്‍ അധ്യക്ഷത വഹിച്ചു. സ്ഥിരം സമിതി അധ്യക്ഷരായ കെ. ഷിജു, കെ.എ. ഇന്ദിര, സി. പ്രജില, നിജില പറവക്കൊടി, വാര്‍ഡ് കൗണ്‍സിലര്‍ രമേശന്‍ വലിയാട്ടില്‍, പ്രദീപ് കുമാര്‍, ജമീഷ്, സീന, ഷൈനി, വിജി, ബാവ കൊന്നേങ്കണ്ടി, രമ്യ തിരുവലത്ത് തുടങ്ങിയവര്‍ പ്രസംഗിച്ചു. നഗരസഭ ക്ലീന്‍ സിറ്റി മാനേജര്‍ സതീഷ്‌കുമാര്‍ പരിസ്ഥിതിദിന പ്രതിജ്ഞ ചൊല്ലിക്കൊടുത്തു. കൊയിലാണ്ടി ഗവ. വൊക്കേഷണല്‍ ഹയര്‍ സെക്കന്‍ഡറി എന്‍എസ്എസ് വളണ്ടിയര്‍മാരും പുളിയഞ്ചേരി യുപി സ്‌കൂളിലെ ജൈവവൈവിധ്യ ക്ലബ് അംഗങ്ങളും അധ്യാപകരും പങ്കാളികളായി. കൂടരഞ്ഞി പഞ്ചായത്ത് കുടുംബാരോഗ്യ കേന്ദ്രത്തിന്‍റെ ആഭിമുഖ്യത്തില്‍ പരിസ്ഥിതി ദിനാചാരണം സംഘടിപ്പിച്ചു. പരിപാടിയുടെ ഭാഗമായി കൂമ്പാറ കുടുംബാരോഗ്യ കേന്ദ്രത്തില്‍ പഞ്ചായത്ത് പ്രസിഡന്‍റ് ആദര്‍ശ് ജോസഫ് നെല്‍കൃഷി വിത്ത് വിതക്കലും ഫലവൃക്ഷത്തൈ നടീലും നിര്‍വഹിച്ചു. വൈസ് പ്രസിഡന്‍റ് മേരി തങ്കച്ചന്‍, മെഡിക്കല്‍ ഓഫീസര്‍ ഡോ. കെ. ദിവ്യ, ഹോമിയോ മെഡിക്കല്‍ ഓഫീസര്‍ ഡോ. ഹബീനത്ത്, ഹെല്‍ത്ത് ഇന്‍സ്പെക്ടര്‍ രാജീവന്‍, ആര്‍ആര്‍ടി മെമ്പര്‍മാര്‍, ആരോഗ്യ പ്രവര്‍ത്തകര്‍, ആശ പ്രവര്‍ത്തകര്‍ എന്നിവരും പങ്കെടുത്തു. ജില്ലാ സാക്ഷരതാ മിഷന്‍ തുല്യത പഠന കേന്ദ്രങ്ങള്‍ മുഖേന നടത്തുന്ന പരിസ്ഥിതി വാരാചരണത്തിന്‍റെ ഉദ്ഘാടനം തുല്യത പഠിതാക്കള്‍ക്ക് വൃക്ഷത്തൈ നല്‍കി ജില്ലാ പഞ്ചായത്ത് ആരോഗ്യ-വിദ്യാഭ്യാസ സ്ഥിരംസമിതി അധ്യക്ഷ നിഷ പുത്തന്‍പുരയില്‍ നിര്‍വഹിച്ചു. സിവില്‍ സ്റ്റേഷന്‍ വാര്‍ഡിലെ ഹരിതകര്‍മസേന അംഗങ്ങളായ കെ. ഷര്‍മിള മോഹന്‍, കെ.പി. ശകുന്തള എന്നിവരെ ചടങ്ങില്‍ ആദരിച്ചു. ജില്ലാ പഞ്ചായത്ത് സീനിയര്‍ സൂപ്രണ്ട് ഡോ. ടി. അബ്ദുനാസര്‍ പ്രതിജ്ഞ ചൊല്ലി. ജില്ലാ പഞ്ചായത്ത് അംഗങ്ങളായ നാസര്‍ എസ്റ്റേറ്റ്മുക്ക്, എന്‍.എം. വിമല, സീനിയര്‍ സൂപ്രണ്ട് പി. ശെല്‍വരത്നം, ജില്ലാ സാക്ഷരതാ മിഷന്‍ കോഓഡിനേറ്റര്‍ പി.വി. ശാസ്തപ്രസാദ്, ജീവനക്കാരായ പി.കെ. അഞ്ജലി, പി. ഷെമിത കുമാരി തുടങ്ങിയവര്‍ പ്രസംഗിച്ചു. എളേറ്റിൽ എംജെ ഹയർ സെക്കൻഡറി സ്കൂളിലെ സ്റ്റുഡന്‍റ്സ് പോലീസ് കേഡറ്റുകൾ പരിസ്ഥിതി സംരക്ഷണത്തിനായി ഒപ്പ് മരം നിർമിച്ചു. പരിസ്ഥിതി ദിനത്തിന്‍റെ ഭാഗമായി വൃക്ഷ തൈ നടൽ, കൊളാഷ് നിർമാണം, ക്വിസ് മത്സരം എന്നിവയും സംഘടിപ്പിച്ചു. പരിപാടിയുടെ ഉദ്ഘാടനം കൊടുവള്ളി ബ്ലോക്ക് പഞ്ചായത്ത് പ്രസിഡന്‍റ് കെ.എം. അഷ്‌റഫ് നിർവഹിച്ചു. സ്കൂൾ ഹെഡ്മാസ്റ്റർ പി.പി. മുഹമ്മദ്‌ ഇസ്മായിൽ അധ്യക്ഷത വഹിച്ചു. കിഴക്കോത്ത് പഞ്ചായത്ത് പ്രസിഡന്‍റ് സാജിദത്ത് മുഖ്യാതിഥിയായിരുന്നു. ജനശക്തി കോൺഗ്രസ് കോഴിക്കോട് ടൗൺ കമ്മിറ്റി നടക്കാവ് വണ്ടിപ്പേട്ടയിൽ വൃക്ഷ തൈ നടൽ സംഘടിപ്പിച്ചു. ഒപ്പം വൃക്ഷ തൈ വിതരണവും നടത്തി. നവജനശക്തി ദേശീയ പ്രസിഡന്‍റ് മനോജ് ശങ്കരനെല്ലൂർ ഉദ്ഘാടനം ചെയ്തു. ഗണേഷ് ബാബു പാലത്ത് അധ്യക്ഷത വഹിച്ചു. ലൂക്കോ ജോസഫ്, രവീന്ദ്രൻ കാരപറമ്പ്, ബാലകുറുപ്പ് നടക്കാവ്, നബിൽ അഹമ്മദ്, ഇർഷാദ് മീഞ്ചന്ത, യാസിൻ നടക്കാവ് തുടങ്ങിയവർ പങ്കെടുത്തു. കോഴിക്കോട് സില്‍വര്‍ ഹില്‍സ് പബ്ലിക് സ്‌കൂളില്‍ ലോക പരിസ്ഥിതിദിനം വിപുലമായ പരിപാടികളോടെ ആഘോഷിച്ചു. കോഴിക്കോട് അസി. ഫോറസ്റ്റ് കണ്‍സര്‍വേറ്ററും നോവലിസ്റ്റുമായ ജോഷില്‍ എം മുഖ്യാതിഥിയായിരുന്നു. സില്‍വര്‍ ഹില്‍സ് സ്ഥാപനങ്ങളുടെ മാനേജര്‍ റവ. ഫാ. അഗസ്റ്റിന്‍ കെ മാത്യു അധ്യക്ഷത വഹിച്ചു. സ്‌കൂള്‍ പ്രിന്‍സിപ്പല്‍ റവ. ഫാ. മാത്യു കളപ്പുരയില്‍ പരിസ്ഥിദിന സന്ദേശം നല്‍കി. കത്തോലിക്ക കോൺഗ്രസ് മുക്കം യൂണിറ്റ് വിവിധ പരിപാടികളോടെ ആഘോഷിച്ചു. മുക്കം സേക്രഡ് ഹാർട്ട് പള്ളി വികാരി ഫാ. ജോൺ ഒറവുങ്കര വൃക്ഷ തൈ നട്ട് ഉദ്ഘാടനം നിർവഹിച്ചു. വിവിധയിനം വൃക്ഷ തൈകൾ വിതരണം ചെയ്തു. കത്തോലിക്ക കോൺഗ്രസ് പ്രസിഡന്‍റ് അഡ്വ. വർഗീസ് പാലക്കീൽ, സെക്രട്ടറി രാജൻ ചൂരപൊയ്കയിൽ, ട്രഷറർ ലോവൽ പള്ളി താഴത്ത് എന്നിവർ നേതൃത്വം നൽകി. കേരള മഹിളാ സംഘം കോഴിക്കോട് ജില്ലാ കമ്മിറ്റിയുടെ നേതൃത്വത്തിൽ പി. ലീലയുടെ വീട്ടിൽ ഓർമ്മ മരം നട്ടു. കേരള മഹിളാസംഘം സംസ്ഥാന പ്രസിഡന്‍റ് അഡ്വ. പി. വസന്തത്തിന് ജില്ലാ സെക്രട്ടറി ടി. ഭാരതി വൃക്ഷ തൈ നൽകി. ആശാ ശശാങ്കൻ, എലിസബത്ത്, ഹസീന വിജയൻ എന്നിവരും വീട്ടുകാരും ചടങ്ങിൽ പങ്കെടുത്തു. വേനപ്പാറ വൈഎംസിഎയുടെ ആഭിമുഖ്യത്തിൽ വേനപ്പാറ ടൗണിൽ പ്രസിഡന്‍റ് ഡോ. സഖറിയാസ് കോക്കാപ്പിള്ളിൽ വൃക്ഷത്തൈ നട്ടു. സംരക്ഷണത്തിനായി വ്യാപാരി വ്യവസായി സംഘടനയെ ചുമതലപ്പെടുത്തുകയും ചെയ്തു. ബേബി മുട്ടത്ത്, ഷാജി കല്ലിടുക്കിൽ, ജോർജ് കുട്ടി കല്ലിടുക്കിൽ എന്നിവർ പ്രസംഗിച്ചു. ഈങ്ങാപ്പുഴ: മാർ ബസേലിയോസ് ഇംഗ്ലീഷ് മീഡിയം സ്കൂളിൽ പരിസ്ഥിതി ദിനാചരണം ഇക്കോ ക്ലബിന്‍റെ ആഭിമുഖ്യത്തിൽ സംഘടിപ്പിച്ചു. പ്രിൻസിപ്പൽ ഫാ. സിജോ പന്തപ്പള്ളിൽ വൃക്ഷത്തൈ നട്ട് ദിനാഘോഷം ഉദ്‌ഘാടനം ചെയ്തു. രാവിലെ നടത്തിയ പ്രത്യേക അസംബ്ലിയിൽ സിഇഒ ഫാ. തോമസ് മണ്ണിത്തോട്ടവും പ്രിൻസിപ്പൽ ഇൻചാർജ് സിസ്റ്റർ ജോസിറ്റ തെരേസ ഡിഎം പരിസ്ഥിതി ദിന സന്ദേശം നൽകി. ആനക്കാംപൊയിൽ: ആനക്കാംപൊയിലിൽ സെന്‍റ് മേരീസ് യുപി സ്കൂളിൽ അലയൻസ് ക്ലബ് തിരുവമ്പാടിയുടെ ആഭിമുഖ്യത്തിൽ വിപുലമായി ആചരിച്ചു. ക്ലബ് പ്രസിഡന്‍റ് അമൽ ടി. ജെയിംസ് പരിപാടികൾ ഉദ്ഘാടനം ചെയ്തു. സ്കൂൾ മാനേജർ ഫാ. അഗസ്റ്റിൻ പാട്ടാനിയിൽ അധ്യക്ഷനായിരുന്നു. മുഖ്യാതിഥി ജോജോ കാഞ്ഞിരക്കാടൻ പരിസ്ഥിതിദിന ക്ലാസ് നയിച്ചു. ഹെഡ്മാസ്റ്റർ റോയി ജോസ്, എബി ദേവസ്യ, റീനു സ്കറിയ, ദീപ എൻ. ജെ. എന്നിവർ പരിപാടികൾക്ക് നേതൃത്വം നൽകി. കോടഞ്ചേരി: സീനിയർ ചെമ്പർ ഇന്‍റർ നാഷണൽ വെസ്റ്റ് കോടഞ്ചേരി ലീജിയൻ തുഷാരഗിരിയിൽ വൃക്ഷതൈ നട്ടു. പ്രസിഡന്‍റ് ജോയ് മോളത്ത്, സെക്രട്ടറി ഫ്രാൻസിസ് മുണ്ടാട്ടിൽ, ഷിബി ആന്‍റണി നെല്ലിക്കുന്നേൽ, ഷിജി ഷാജു ചുരുളിയിൽ എന്നിവർ പങ്കെടുത്തു. മുക്കം: കൊടിയത്തൂർ പഞ്ചായത്ത് ജൈവ വൈവിധ്യ പരിപാലന സമിതിയും പന്നിക്കോട് എയുപി സ്കൂളും സംയുക്തമായി സംഘടിപ്പിച്ച പരിസ്ഥിതി ദിനാചരണം പഞ്ചായത്ത് പ്രസിഡന്‍റ് ദിവ്യ ഷിബു ഉദ്ഘാടനം ചെയ്തു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ബാബു പൊലുകുന്ന് അധ്യക്ഷത വഹിച്ചു. ദേശീയ ഹരിതസേന ജില്ല കോ- ഓർഡിനേറ്റർ കെ.പി.യു അലി മുഖ്യ പ്രഭാഷണം നടത്തി. പഞ്ചായത്തംഗങ്ങളായ മറിയം കുട്ടി ഹസൻ, യു.പി മമ്മദ്, ജൈവവൈവിധ്യ പരിപാലന സമിതി അംഗം സി. ഫസൽ ബാബു, സ്കൂൾ മാനേജർ സി. കേശവൻ നമ്പൂതിരി, പ്രധാനാധ്യാപിക സജ്നി, പിടിഎ പ്രസിഡന്‍റ് ബഷീർ പാലാട്ട്, പി.കെ ഹഖീം കളൻതോട് തുടങ്ങിയവർ പ്രസംഗിച്ചു. തോട്ടുമുക്കം ഗവ. യുപി സ്കൂളിൽ പരിസ്ഥിതി ദിനം ലിന്‍റോ ജോസഫ് എംഎൽഎ തൈ നട്ട് ഉദ്ഘാടനം ചെയ്തു. പിടിഎ പ്രസിഡന്‍റ് അബ്ദുൽ ജബ്ബാർ അധ്യക്ഷനായ ചടങ്ങിൽ പ്രധാനാധ്യാപിക ബി. ഷെറീന, എസ്എംസി ചെയർമാൻ സോജൻ മാത്യു, എംപിടിഎ പ്രസിഡന്‍റ് ലിസ്ന സാബിക് എന്നിവർ സംബന്ധിച്ചു. കൂരാച്ചുണ്ട്: പരിസ്ഥിതി ദിനാഘോഷം കൂരാച്ചുണ്ട് സെന്‍റ് തോമസ്‌ യുപി സ്കൂൾ ഗ്രൗണ്ട്‌ പരിസരത്ത്‌ ഫലവൃക്ഷ തൈ നട്ടുകൊണ്ട് പഞ്ചായത്ത് പ്രസിഡന്‍റ് ഒ.കെ. അമ്മദ് ഉദ്ഘാടനം ചെയ്തു. പഞ്ചായത്ത്‌ വൈസ്‌ പ്രസിഡന്‍റ് വിൻസി തോമസ്‌, കക്കയം ഫോറസ്റ്റ്‌ ഡെപ്യുട്ടി റേഞ്ച്‌ ഓഫീസർ സി. വിജിത്ത്‌, സെക്ഷൻ ഫോറസ്റ്റ്‌ ഓഫീസർ ഗണേശ്‌, ഫോറസ്റ്റ് ഉദ്യോഗസ്ഥരായ രഞ്ജിത്ത്‌, ഒ.ആർ. റീജ, എൻ.കെ. ദിനൂപ്‌ കുമാർ, കൃഷി ഓഫീസർ പി.പി.രാജി, കൃഷി അസിസ്റ്റന്‍റ് എം. ദൃശ്യ, എന്നിവർ പ്രസംഗിച്ചു.

ദുഷ്പ്രചരണങ്ങൾ ചെറുക്കും: കോൺഗ്രസ്

താമരശേരി: കണ്ണപ്പൻകുണ്ട് - മൈലള്ളാംപാറ വനാതിർത്തിയോട് ചേർന്ന് കിടക്കുന്ന സ്വകാര്യ വ്യക്തിയുടെ പറമ്പിൽ തുടങ്ങുന്ന സംരംഭത്തിന് പഞ്ചായത്ത് അനുമതി വേണ്ടെന്നിരിക്കെ പഞ്ചായത്ത് ഓഫീസിനു മുൻപിൽ സിപിഎം നടത്തിയ സമരം പ്രഹസനമാണെന്ന് മണ്ഡലം കോൺഗ്രസ് കമ്മിറ്റി കുറ്റപ്പെടുത്തി. പഞ്ചായത്ത് ഓഫീസിനു മുൻപിൽ അല്ല വ്യവസായ ഓഫീസിനു മുൻപിലാണ് സിപിഎം സമര പ്രഹസനം നടത്തേണ്ടിയിരുന്നതെന്നും വികസന പ്രവർത്തനങ്ങൾക്ക് കോൺഗ്രസ് ഒരിക്കലും എതിരല്ലെന്നും വാർഡ് കോൺഗ്രസ് കമ്മിറ്റി കണ്ണപ്പൻകുണ്ട് അങ്ങാടിയിൽ സംഘടിപ്പിച്ച പ്രതിഷേധ വിശദീകരണ യോഗം ഉദ്ഘാടനം ചെയ്ത മണ്ഡലം കോൺഗ്രസ് പ്രസിഡന്‍റ് രാജേഷ് ജോസ് പറഞ്ഞു. വാർഡ് കോൺഗ്രസ് പ്രസിഡന്‍റ് വി.ടി. മൊയ്തീൻ അധ്യക്ഷത വഹിച്ചു. ഡിസിസി ജനറൽ സെക്രട്ടറി അയിഷക്കുട്ടി സുൽത്താൻ, പഞ്ചായത്ത് വൈസ് പ്രസിഡന്‍റ് ഷിജു ഐസക്, ജില്ല പഞ്ചായത്ത് അംഗം അംബിക മംഗലത്ത്, പഞ്ചായത്ത് അംഗം ബീന തങ്കച്ചൻ, യൂത്ത് കോൺഗ്രസ് മണ്ഡലം പ്രസിഡന്‍റ് വി.എസ്. നൗഷാദ്, കോൺഗ്രസ് മണ്ഡലം ഭാരവാഹികളായ ഐ.പി. രാജൻ, ജോഷി ചന്ദ്രൻകുന്നേൽ, രാജൻ നെല്ലിമൂട്ടിൽ തുടങ്ങിയവർ പ്രസംഗിച്ചു.

കിടപ്പു രോഗികൾക്ക് ആശ്വാസവുമായി കൊടിയത്തൂർ പഞ്ചായത്ത്

മുക്കം: കിടപ്പിലായ രോഗികൾക്ക് വീട്ടിലെത്തി സൗജന്യ ചികിത്സ നൽകുന്ന, മാതൃക പദ്ധതിക്ക് തുടക്കമിട്ട് കൊടിയത്തൂർ പഞ്ചായത്ത്. ഫാമിലി മെഡിസിൻ, ഫിസിയോതെറാപ്പി, ദന്തപരിചരണം, ജീവിത ശൈലി രോഗം തുടങ്ങിയവക്ക് ഡോക്ടർമാരുടെ ഉൾപ്പെടെ സേവനം സൗജന്യമായി ലഭ്യമാക്കുകയാണ് പദ്ധതിയുടെ ലക്ഷ്യം. കിടപ്പു രോഗികൾ ഉള്ള കുടുംബങ്ങളിൽ പലപ്പോഴും യഥാസമയം ചികിത്സ ലഭിക്കാത്തത് ശ്രദ്ധയിൽ പെട്ടതിനെ തുടർന്നാണ് പദ്ധതിക്ക് തുടക്കമിട്ടതെന്ന് പഞ്ചായത്ത് പ്രസിഡന്‍റ് ദിവ്യ ഷിബു പറഞ്ഞു. കൊടിയത്തൂർ പഞ്ചായത്ത് കുടുംബാരോഗ്യ കേന്ദ്രവും കെഎംസിടി ഫിസിക്കൽ മെഡിസിൻ ആൻഡ് റീഹാബിലിറ്റേഷൻ വിഭാഗവും സംയുക്തമായാണ് പദ്ധതി നടപ്പാക്കുന്നത്. പദ്ധതിയുടെ ഉദ്ഘാടനം കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബു നിർവഹിച്ചു. വികസന സ്റ്റാൻഡിംഗ് കമ്മിറ്റി ചെയർപേഴ്സൺ ആയിഷ ചേലപ്പുറത്ത്, പഞ്ചായത്തംഗങ്ങളായ വി. ഷംലൂലത്ത്, എം.ടി റിയാസ്, മെഡിക്കൽ ഓഫീസർമാരായ ഡോ. ആരതി, ഡോ. മായ, കെഎംസിടി ഗ്രൂപ്പ് ഓഫ് ഇൻസ്റ്റിറ്റ്യൂഷൻ അസിസ്റ്റന്‍റ് ഡയറക്ടർ ഷാഹിൽ മൊയ്തു, ഡോ. ജേക്കബ് ജോർജ്, ഡോ. അബ്ദുള്ള, കൊടിയത്തൂർ പാലിയേറ്റീവ് ചെയർമാൻ എം. അബ്ദുറഹിമാൻ, പി.എം നാസർ, സി.ടി. സലീജ തുടങ്ങിയവർ പ്രസംഗിച്ചു

വന്യമൃഗ ശല്യം: സർക്കാരിന് നിസംഗതയെന്ന് കർഷക കോൺഗ്രസ്

താമരശേരി: വന്യമൃഗശല്യം പരിഹരിക്കുന്നതിൽ സർക്കാരിനും വനംവകുപ്പിനും ഗുരുതരമായ നിസംഗതയാണെന്നും പുലി, കാട്ടുപന്നി, ആന, കുരങ്ങ് എന്നിവ എല്ലാം കൂടി മലയോര ജനതയുടെ ജീവിതം ദുരിത പൂർണമാക്കിയിരിക്കുകയാണെന്ന് കർഷക കോൺഗ്രസ് ജില്ലാ പ്രസിഡന്‍റ് അഡ്വ. ബിജു കണ്ണന്തറ. ഇരകൾക്ക്‌ നഷ്ടപരിഹാരം പ്രഖ്യാപിച്ചു കഴിഞ്ഞാൽ തങ്ങളുടെ ഉത്തരവാദിത്വം തീർന്നു എന്നതാണ് അധികാരികളുടെ മനോഭാവം. എന്നിട്ടും ജനരോഷം അടങ്ങുന്നില്ലെന്ന് കണ്ടാൽ മീറ്റിങ്ങുകൾ വിളിച്ചുകൂട്ടി ഒരിക്കലും നടക്കാത്ത തീരുമാനങ്ങൾ പ്രഖ്യാപിക്കും. അതോടെ ജനങ്ങൾ ശാന്തരാകും. ഒരു നടപടിയും ഉണ്ടാവില്ല. പിന്നീട് കൃഷി നാശം സംഭവിക്കുന്നത് വരെയും, അടുത്ത ആളെ വന്യമൃഗം അക്രമിക്കുന്നത് വരെയും മാധ്യമങ്ങളും ഇക്കാര്യം മറക്കും. ജനങ്ങളുടെ ജീവനും സ്വത്തിനും സംരക്ഷണം നൽകേണ്ട ഉത്തരവാദിത്വത്തിൽ നിന്ന് സംസ്ഥാന സർക്കാരിന് ഒഴിഞ്ഞുമാറാനാകില്ല. വന്യജീവികളെ വനത്തിനുള്ളിൽ നിലനിർത്തുന്നതിനും മറ്റുമായി കോടിക്കണക്കിന് രൂപ വനം വകുപ്പ് ചെലവഴിക്കുന്നുണ്ടെങ്കിലും ഒന്നും ഫലത്തിൽ എത്തുന്നില്ല. വനത്തിന് പുറത്തിറങ്ങി നാശം വിതയ്ക്കുന്ന വന്യ ജീവികളെ പ്രതിരോധിക്കാൻ വന്യജീവി സംരക്ഷണ നിയമത്തിലെ 11 (2) വകുപ്പ് ഫലപ്രദമായി ഉപയോഗിക്കാൻ സംസ്ഥാന സർക്കാർ ഇനിയെങ്കിലും തയാറാകണം.‌ വന്യജീവി ആക്രമണം മൂലം കാർഷിക മേഖല ഇത്രയും പ്രതിസന്ധി നേരിട്ട മറ്റൊരു കാലം ഉണ്ടായിട്ടില്ല. ഒരുകാലത്ത് വന്യജീവി സംരക്ഷണം അനിവാര്യമായിരുന്നു. ആ ഘട്ടത്തിൽ തയാറാക്കിയ നിയമത്തിന് ഇന്നും യാതൊരു മാറ്റവും വരുത്തിയിട്ടില്ല. വന്യജീവികളുടെ എണ്ണം പെരുകി ഒപ്പം വന്യജീവി ആക്രമണങ്ങളും കൃഷിനാശവും വർധിച്ചു. ഇനിയും ജനങ്ങളുടെ ക്ഷമ പരീക്ഷിക്കാതെ സർക്കാർ അടിയന്തര നടപടി എടുത്തണമെന്നും അദ്ദേഹം പ്രസ്താവനയിലൂടെ ആവശ്യപ്പെട്ടു.

പത്രക്കെട്ടുകളും മാസികകളും മോഷണം പോയി

മരഞ്ചാട്ടി: മരഞ്ചാട്ടിയിൽ ഇന്നലെ രാവിലെ വിതരണം ചെയ്യാനായി കൊണ്ടുവന്ന പത്രങ്ങളും മാസികകളും മോഷ്ടിച്ചു. ഏജന്‍റ് ഓരോ ഭാഗത്തേക്ക് വേണ്ടിയുള്ള പത്രങ്ങളും മാസികകളും അടുക്കിവെച്ച് ഒരു ഭാഗത്ത് പോയി തിരിച്ചു വന്നതിനു ശേഷം അടുത്ത ഭാഗത്തേക്കുള്ള പത്രക്കെട്ട് എടുക്കുന്ന സമയമാണ് മോഷണം നടന്നതായി അറിയുന്നത്. ഉടൻ തന്നെ സിസിടിവി പരിശോധിച്ചു. പരിശോധനയിൽ ഒരു വ്യക്തി പത്രങ്ങൾ എടുത്തുകൊണ്ടു പോകുന്നതായി കാണുന്നുണ്ട്. ആരാണ് മോഷ്ടിച്ചതെന്ന് കണ്ടെത്തിയിട്ടില്ല. പലപ്രാവശ്യമായി ഇത്തരത്തിലുള്ള സംഭവങ്ങൾ ആവർത്തിക്കപ്പെടുന്നതായി ഏജന്‍റ് പറഞ്ഞു.

കൃഷി സങ്കൽപ്പ് ക്യാമ്പയിൻ സംഘടിപ്പിച്ചു

പേരാമ്പ്ര: സമഗ്രവും സുസ്ഥിരവുമായ വളർച്ചക്കായി കർഷക നേതൃത്വത്തിലുള്ള നവീകരണങ്ങളെ പ്രോത്സാഹിപ്പിക്കാനും വികസിപ്പിക്കാനും ലക്ഷ്യമിടുന്ന വികസിത കൃഷി സങ്കൽപ്പ് ക്യാമ്പയിൻ പേരാമ്പ്ര ബ്ലോക്കിലെ ചങ്ങരോത്ത്, പേരാമ്പ്ര, ചക്കിട്ടപാറ പഞ്ചായത്ത് കേന്ദ്രങ്ങളിൽ അതാത് കൃഷി ഭവനുകളുടെ ആഭിമുഖ്യത്തിൽ നടത്തി. കോഴിക്കോട് ജില്ലയിൽ ഭാരതീയ സുഗന്ധവിള ഗവേഷണ സ്ഥാപനവും കൃഷി വിജ്ഞാൻ കേന്ദ്രവും സംയുക്തമായാണ് പരിപാടി സംഘടിപ്പിച്ചത്. ചങ്ങരോത്ത് പ്രസിഡന്‍റ് ഉണ്ണി വേങ്ങേരി ഉദ്ഘാടനം ചെയ്‌തു. ടി.കെ. നസീർ അധ്യക്ഷത വഹിച്ചു. കൃഷി ഓഫീസർമാരായ അഞ്ജു തോമസ്, അമൽ എന്നിവർ പ്രസംഗിച്ചു. പേരാമ്പ്രയിൽ പ്രസിഡന്‍റ് വി.കെ. പ്രമോദ് ഉദ്ഘാടനം ചെയ്തു. വൈസ് പ്രസിഡന്‍റ് കെ.എം. റീന അധ്യക്ഷത വഹിച്ചു. കൃഷി ഓഫീസർമാരായ ജീജോ ജോസഫ്, നിസാം അലി എന്നിവർ പ്രസംഗിച്ചു. ചക്കിട്ടപാറയിൽ വൈസ് പ്രസിഡന്‍റ് ചിപ്പി മനോജ് ഉദ്ഘാടനം ചെയ്തു. ബ്ലോക്ക് പഞ്ചായത്ത് മെമ്പർ ഗിരിജ ശശി അധ്യക്ഷത വഹിച്ചു. കൃഷി ഓഫീസർമാരായ ഷെറിൻ റിഹാദ്, രശ്മനായർ എന്നിവർ പ്രസംഗിച്ചു. വിവിധ വിഷയങ്ങളിൽ വിദഗ്ധരും ശാസ്ത്രജ്ഞൻമാരുമായ ഡോ.അബ്ദുൾ ഹാരീസ്, ഡോ. കേശവ് കുമാർ, ഡോ.മുരുകദാസ്, ഡോ.കെ.വി.അഖിലേഷ്, ഡോ.പി.എസ്.മനോജ് എന്നിവർ ക്ലാസുകളെടുത്ത് സംശയങ്ങൾക്ക് നിവാരണവും നൽകി.

കോവൂരിൽ മാലിന്യനിർമാർജനം ഉറപ്പു വരുത്തണമെന്ന്

കോഴിക്കോട്: കോവൂർ പാലാഴി എംഎൽഎ റോഡിലേക്ക് മാലിന്യം ഒഴുകിയെത്തുന്നത് തടയാൻ ശക്തമായ നടപടികൾ സ്വീകരിക്കണമെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ്. ജനങ്ങൾക്ക് ശുദ്ധവായു ശ്വസിക്കുന്നതിനും സ്വസ്ഥതയോടെ ജീവിക്കുന്നതിനുമുള്ള സാഹചര്യം ഒരുക്കണമെന്നും കമ്മീഷൻ കോർപറേഷൻ സെക്രട്ടറിക്ക് കമ്മീഷൻ നിർദ്ദേശം നൽകി. സ്ഥലത്ത് മത്സ്യമാർക്കറ്റും അറവുശാലകളും ഉള്ളതിനാൽ ഇക്കാര്യം പരിശോധിക്കാൻ നഗരസഭ ഹെൽത്ത് വിഭാഗത്തിന് നിർദ്ദേശം നൽകിയിട്ടുണ്ടെന്ന് കോർപറേഷൻ സെക്രട്ടറി കമ്മീഷനെ അറിയിച്ചു. മെഡിക്കൽ കോളജ് ആശുപത്രി മാലിന്യവും കോവൂരിലെ അറവുശാലാ മാലിന്യവും ഒഴുകിയെത്തി ജനജീവിതം ദുരിതത്തിലായെന്ന് പരാതിപ്പെട്ട് പൊതുപ്രവർത്തകരായ പ്രമോദ് കുമാർ, വി.സി. ദിനേഷ് എന്നിവർ സമർപ്പിച്ച പരാതിയിലാണ് നടപടി.

ഇന്ന് പരിസ്ഥിതി ദിനം : പതിവ് തെറ്റിക്കാതെ തൈകൾ നൽകി അബ്ദുറഹ്മാൻ

മുക്കം: ഇന്ന് പരിസ്ഥിതി ദിനത്തിൽ നടാനുള്ള വിവിധ തൈകൾ കഴിഞ്ഞ പത്ത് വർഷമായി സൗജന്യമായി നൽകി വരികയാണ് കാരശേരി സ്വദേശി പൊയിലിൽ അബ്ദുറഹ്മാൻ എന്ന കർഷകൻ. വിവിധ സംഘടനകൾക്കും സ്‌കൂളുകളിലേക്കുമെല്ലാം അബ്ദു തൈകൾ നൽകുന്നുണ്ട്. മാത്രമല്ലതൈകൾ വാങ്ങാൻ വരുന്നവർക്ക് സൗജന്യമായി ബഡിംഗ് കൃഷി രീതിയും പഠിപ്പിച്ചാണ് മടക്കി അയക്കുക. നേരത്തെ ഒരുമാവിൽ 80 ലധികം ശ്രദ്ധേയനായ കർഷകൻ കൂടിയാണ് പൊയിലിൽ അബ്ദുറഹ്മാൻ. സ്കൂളുകൾ, പള്ളികൾ വിവിധ സംഘടനകൾ തുടങ്ങി ആർക്കും അബ്ദു തൈകൾ സൗജന്യമായി നൽകും. തൈകൾ കൊണ്ടുപോകുന്നവർ അത് കൃത്യമായി പരിപാലിക്കണമെന്ന നിർബന്ധം അദ്ദേഹത്തിനുണ്ട്. ഓരോ വർഷവും തൈകൾ കൊണ്ടുപോകുന്നവരുടെ പേരും സ്ഥലവും ഫോൺ നമ്പറുമെല്ലാം അബ്ദു വാങ്ങിവയ്ക്കും. കൊണ്ടുപോയ തൈകൾ എല്ലാം പരിപാലിക്കുന്നുണ്ടോ എന്ന കാര്യം ഇടക്ക് പരിശോധിക്കുകയും ചെയ്യും. എല്ലാവർഷവും ജൂൺ നാലിന് തൈകൾ വിതരണം ചെയ്യുന്ന അബ്ദുറഹ്മാൻ ഇത്തവണയും പതിവ് തെറ്റിച്ചില്ല. തണൽ മരങ്ങളും ഫലവൃക്ഷ തൈകളുമായ ചാമ്പ, റംബൂട്ടാൻ, മാവ് തുടങ്ങിയവയുടെ തൈകളാണ് വിതരണം ചെയ്തത്. വിവിധ കൃഷികളെ കുറിച്ചുള്ള വിദഗ്ധരുടെ ക്ലാസുകളും ബഡിംഗ് പരിശീലനവും തൈ വിതരണവും എല്ലാം ഇത്തവണയും വിപുലമായി നടത്തി. മലപ്പുറം, കോഴിക്കോട് ജില്ലകളിൽ നിന്നായി നിരവധി പേർ ക്ലാസിൽ പങ്കെടുത്തു. മുതിർന്ന കർഷകരെയും ടുറിസം വകുപ്പിന്‍റെ കയാക്കിംഗ് മാധ്യമ പുരസ്കാരത്തിൽ മികച്ച കാമറാമാൻ പുരസ്‌കാരം ലഭിച്ച റഫീഖ് തോട്ടുമുക്കം എന്നിവരെ ചടങ്ങിൽ ആദരിച്ചു. എംവിആർ കാൻസർ സെന്‍ററിലെ ഡോ. നാരായണൻ കുട്ടി വാര്യർ പരിപാടി ഉദ്ഘാടനം ചെയ്തു. മാവ് കൃഷിയിൽ വിദഗ്ധനായ എം.എസ്. കോട്ടയിൽ ക്ലാസ് എടുത്തു.

കക്കയം ഡാം റോഡിൽ മരം വീണ് ഗതാഗതം തടസപ്പെട്ടു

കൂരാച്ചുണ്ട്: ശക്തമായ മഴയും കാറ്റിനെയും തുടർന്ന് കക്കയം ഡാം റോഡിൽ മരം വീണ് ഗതാഗതം തടസപ്പെട്ടു. ഇതേ തുടർന്ന് ഡാം മേഖലയിൽ ഉണ്ടായിരുന്ന നിരവധി ജീവനക്കാർ ഇതുവഴി കടന്നു പോകാൻ കഴിയാതെയായി. പിന്നീട് കക്കയം ഹൈഡൽ ടൂറിസം ജീവനക്കാർ, വനം വകുപ്പ് ജീവനക്കാർ, കൺസ്ട്രക്ഷൻ കമ്പനി ജീവനക്കാർ തുടങ്ങിയവർ ചേർന്ന് മരം മുറിച്ചുനീക്കിയാണ് ഗതാഗതം പുനഃസ്ഥാപിച്ചത്.

വ്യാപക കൃഷി നാശം : വിലങ്ങാട് പന്നിയേരിയിൽ ഒറ്റയാനിറങ്ങി

നാദാപുരം: കണ്ണൂർ, കോഴിക്കോട്, വയനാട് ജില്ല അതിർത്തി പന്നിയേരിയിൽ ഒറ്റയാനിറങ്ങി വീണ്ടും വ്യാപകമായി കൃഷി നാശം. മേഖലയിലെ താമസക്കാരുടെ പറമ്പുകളിലെ തെങ്ങ്, വാഴ, കുരുമുളക് എന്നിവ വ്യാപകമായി ആന നശിപ്പിച്ചു. കോളനിയോട് ചേർന്ന ജനവാസ കേന്ദ്രത്തിലാണ് ഒറ്റയാൻ ഇറങ്ങിയത്. മൂന്ന് ദിവസമായി ആന വനത്തിൽ നിന്ന് കൃഷിഭൂമിയിൽ ഇറങ്ങി വിഹരിക്കുകയാണെന്ന് കോളനി വാസികൾ പറഞ്ഞു. വിലങ്ങാട് സെക്ഷൻ ഫോറസ്റ്റ് സ്ഥലവും ആർആർടിയും പടക്കം പൊട്ടിച്ച് ആനയെ നിരവധി തവണ പേര്യ മേഖലയിലേക്ക് ഓടിച്ച് വിട്ടെങ്കിലും ആന വീണ്ടും ജനവാസ മേഖലയിലെ കൃഷി ഭൂമിയിലിൽ ഇറങ്ങി കൃഷി നശിപ്പിക്കുകയായിരുന്നു. വന ഭൂമിയോട് ചേർന്ന് കിടക്കുന്ന കൃഷി ഭൂമിയിൽ മാങ്ങ, ചക്ക തുടങ്ങിയ ഫലങ്ങളുടെ സീസൺ ആയതാണ് ആന വന മേഖലയിലേക്ക് കടക്കാൻ മടി കാണിക്കുന്നതെന്ന് അധികൃതർ പറഞ്ഞു. ചൊവ്വാഴ്ച്ച രാത്രി കാട് കയറ്റി വിട്ട ആന ബുധനാഴ്ച്ച രാവിലെ വീണ്ടും കാടിറങ്ങിയതോടെ വനം വകുപ്പ് അധികൃതർ വീണ്ടുമെത്തി ആനയെ വനത്തിനുള്ളിലേക്ക് ഓടിച്ചു. രാത്രി വീണ്ടും കാടിറങ്ങിയേക്കാമെന്ന സൂചനകളെ തുടർന്ന് ആർആർടി, വിലങ്ങാട് വനം വകുപ്പ് അധികൃതരും വന മേഖലയിൽ രാത്രികാല പെട്രോളിംഗ് നടത്തുന്നുണ്ട്. ഇതിനിടെ കണ്ണവം വനമേഖലയോട് ചേർന്ന് കിടക്കുന്ന കുറ്റല്ലൂർ കോളനി പരിസരങ്ങളിൽ തകരാറിലായ ഫെൻസിംഗ് ലൈനുകളുടെ അറ്റകുറ്റ പ്രവൃത്തി അധികൃതർ പുനഃരാരംഭിച്ചു. ഈ മേഖലയിൽ രണ്ടര കിലോമീറ്റർ ദൂരത്തിലാണ് ഫെൻസിംഗ് ലൈനുകൾ ഉള്ളത്. ഇതിൽ ഒരു കിലോ മീറ്റർ ദൂരത്തിൽ റിപ്പയറിംഗ് നടത്തി ലൈനുകൾ പ്രവർത്തന ക്ഷമമാക്കിയതായി വനം വകുപ്പ് അധികൃതർ പറഞ്ഞു.

വേള്‍ഡ് മാസ്റ്റേഴ്സ് ഹാന്‍ഡ്ബാള്‍: വെങ്കല മെഡല്‍ നേടി കോടഞ്ചേരി സ്വദേശികള്‍

കോടഞ്ചേരി: ചൈനയില്‍ നടന്ന വേള്‍ഡ് മാസ്റ്റേഴ്സ് ഹാന്‍ഡ്ബാള്‍ ചാമ്പ്യന്‍ഷിപ്പില്‍ 35 പ്ലസ്, 45 പ്ലസ് എന്നീ വിഭാഗങ്ങളില്‍ ഇന്ത്യക്ക് വെങ്കലമെഡല്‍ നേടിക്കൊടുത്ത് മൂന്ന് കോടഞ്ചേരി സ്വദേശികള്‍. മൂന്നു വിഭാഗങ്ങളിലായി നടന്ന മത്സരത്തില്‍ മെല്‍വി മാത്യു (45 പ്ലസ് കാറ്റഗറി) മത്സരിച്ച ടീമിനും 35 പ്ലസ് കാറ്റഗറിയില്‍ ലിഷോ അഗസ്റ്റിന്‍, സന്തോഷ് സെബാസ്റ്റ്യന്‍ എന്നിവര്‍ മത്സരിച്ച ടീമിനും വെങ്കല മെഡല്‍ ലഭിച്ചു. ജോര്‍ജ് ബി. വര്‍ഗീസ്, മാനേജര്‍ റോബര്‍ട്ട് അറയ്ക്കല്‍ എന്നിവരായിരുന്നു പരിശീലകര്‍.

വനിതകള്‍ക്കായി പിങ്ക് ഫിറ്റ്നസ് സെന്‍ററുകള്‍

കോഴിക്കോട്: വനിതകളെ ശാരീരികമായും മാനസികമായും കൂടുതല്‍ കരുത്തരാക്കാന്‍ അത്യാധുനിക വനിതാ-പിങ്ക് ഫിറ്റ്നസ് സെന്‍ററുകളുമായി ചേളന്നൂര്‍ ബ്ലോക്ക് പഞ്ചായത്ത്. വ്യായാമം ചെയ്യാന്‍ ആഗ്രഹിക്കുന്ന വനിതകള്‍ക്ക് കുറഞ്ഞ ചെലവില്‍ അവസരം ഒരുക്കുകയാണ് ലക്ഷ്യം. കോഴിക്കോട് ജില്ലയില്‍ ആദ്യമായാണ് ഒരു ബ്ലോക്കില്‍ ഇത്തരമൊരു പദ്ധതി നടപ്പാക്കുന്നത്. ചേളന്നൂര്‍ ബ്ലോക്ക് പഞ്ചായത്ത് വാര്‍ഷിക പദ്ധതിയിലെ വനിതാ ഘടക പദ്ധതിയില്‍ ഉള്‍പ്പെടുത്തിയാണ് യെസ് അയാം വനിത-പിങ്ക് ഫിറ്റ്നസ് സെന്‍ററുകള്‍ ആരംഭിച്ചത്. നിലവില്‍ ബ്ലോക്ക് പരിധിയിലെ നരിക്കുനി, കക്കോടി, കാക്കൂര്‍ പഞ്ചായത്തുകളില്‍ സെന്‍റര്‍ പ്രവര്‍ത്തിക്കുന്നുണ്ട്. നന്മണ്ടയില്‍ ഉടന്‍ ആരംഭിക്കും. സ്ത്രീകള്‍ക്ക് ജീവിതശൈലി രോഗങ്ങളെ പ്രതിരോധിക്കുന്നതിനും മികച്ച ആരോഗ്യം നിലനിര്‍ത്തുന്നതിനും സഹായകരമാവുക എന്ന ലക്ഷ്യത്തോടെയാണ് പദ്ധതിക്ക് രൂപം നല്‍കിയത്. പുന്നശ്ശേരിയില്‍ ആരംഭിച്ച ഫിറ്റ്നസ് സെന്‍റര്‍ ജില്ലാ പഞ്ചായത്ത് പ്രസിഡന്‍റ് ഷീജ ശശി ഉദ്ഘാടനം ചെയ്തു.

പ്രവേശനോത്സവം ആഘോഷിച്ചു

പുല്ലൂരാംപാറ: സര്‍ക്കാരിന്‍റെ പൊതുവിദ്യാഭ്യാസ സംരക്ഷണ യജ്ഞത്തിന് ആവേശം പകര്‍ന്ന് തിരുവമ്പാടി പഞ്ചായത്ത് തല പ്രവേശനോത്സവം പുല്ലൂരാംപാറ സെന്‍റ് ജോസഫ് സ്‌കൂളില്‍ നടന്നു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോണ്‍സണ്‍ ഉദ്ഘാടനം ചെയ്തു.എല്ലാ കുട്ടികള്‍ക്കും ലോകത്തിന് മുഴുവന്‍ പ്രകാശം പരത്താന്‍ കഴിയട്ടെ സ്‌കൂള്‍ മാനേജര്‍ ഫാ. കുര്യാക്കോസ് മുഖാല ആശംസിച്ചു. സ്‌കൂള്‍ ഹെഡ്മാസ്റ്റര്‍ ജോളി ഉണ്ണിയേപ്പിള്ളില്‍, വാര്‍ഡ് മെമ്പര്‍ മേഴ്‌സി പുളിക്കാട്ട്, പിടിഎ പ്രസിഡന്‍റ് വില്‍സണ്‍ താഴത്തുപറമ്പില്‍, സ്റ്റാഫ് പ്രതിനിധി ബിജു വി.ഫ്രാന്‍സിസ്, വിദ്യാര്‍ഥി പ്രതിനിധി ദാന നാസര്‍, റെജി സെബാസ്റ്റ്യന്‍ എന്നിവര്‍ പ്രസംഗിച്ചു. കൂടത്തായി: ഓമശേരി പഞ്ചായത്ത് തല സ്‌കൂള്‍ പ്രവേശനോത്സവം കൂടത്തായി സെന്‍റ് മേരീസ് ഹയര്‍ സെക്കന്‍ഡറി സ്‌കൂളില്‍ പഞ്ചായത്ത് പ്രസിഡന്‍റ് കെ. കരുണാകരന്‍ ഉദ്ഘാടനം ചെയ്തു. വാര്‍ഡ് അംഗം ഷീജ ബാബു അധ്യക്ഷത വഹിച്ചു. സീനത്ത് തട്ടാഞ്ചേരി, മാനേജര്‍ ഫാ. ബിബിന്‍ ജോസ്, പ്രിന്‍സിപ്പല്‍ ഫാ. സിബി പൊന്‍പാറ, പിടിഎ പ്രസിഡന്‍റ് കെ.കെ.മുജീബ്, ബിആര്‍സി. ഓമശ്ശേരി പഞ്ചായത്ത് തല കോഓര്‍ഡിനേറ്റര്‍ നൗഷാദ്, ഹെഡ്മാസ്റ്റര്‍ തോമസ് അഗസ്റ്റിന്‍, സ്റ്റാഫ് സെക്രട്ടറി സോജി തോമസ് എന്നിവര്‍ പ്രസംഗിച്ചു. സഞ്ജു കൃഷ്ണന്‍റെ വയലിന്‍ വാദനവും വേദ ലക്ഷ്മിയുടെ ഗാനാലാപനവും ഉണ്ടായിരുന്നു. മുക്കം: മുക്കം നഗരസഭ തല അങ്കണവാടി പ്രവേശനോത്സവം സംഘടിപ്പിച്ചു. കണക്കുപറമ്പ് ഡിവിഷനിലെ ആറ്റുപുറം അങ്കണവാടിയില്‍ നടന്ന പ്രവേശനോത്സവം നഗരസഭ ചെയര്‍മാന്‍ പി.ടി. ബാബു ഉദ്ഘാടനം ചെയ്തു. ഡിവിഷന്‍ കൗണ്‍സിലര്‍ സാറാ കൂടാരം അധ്യക്ഷത വഹിച്ചു. ഐസിഡിഎസ് സൂപ്പര്‍വൈസര്‍ റീജ, മുന്‍ കൗണ്‍സിലര്‍ അനില്‍, സുജിത, സാലിഹ് കൊടപ്പന, അങ്കണവാടി ടീച്ചര്‍ സുബൈദ എന്നിവര്‍ പ്രസംഗിച്ചു.

കനാലില്‍ കോഴി മാലിന്യം തള്ളി

പേരാമ്പ്ര: ചങ്ങരോത്ത് പഞ്ചായത്ത് മേഖലയില്‍ കുറ്റ്യാടി ജലസേചന പദ്ധതിയുടെ വലതുകര കനാല്‍ കടന്നു പോകുന്ന ഭാഗങ്ങളില്‍ കോഴി അറവു മാലിന്യം നിക്ഷേപിച്ചതില്‍ വ്യാപക പ്രതിഷേധം. പഞ്ചായത്ത് പ്രസിഡന്‍റ് ഉണ്ണി വേങ്ങേരിയുടെ നേതൃത്വത്തില്‍ സ്ഥലം സന്ദര്‍ശിച്ചു. കുറ്റ്യാടിപ്പുഴയോരത്തും ചാക്കു കണക്കിനു മാലിന്യം തട്ടിയതായി നാട്ടുകാര്‍ പറയുന്നു. ദുര്‍ഗന്ധം വമിക്കുന്ന നിലയിലാണ് മാലിന്യ ശേഖരം. ഇതിനു പിന്നില്‍ പ്രവര്‍ത്തിച്ചവരെ നാട്ടുകാരുടെയും നിയമപാലകരുടെയും സഹായത്തോടെ കണ്ടെത്തുമെന്ന് പ്രസിഡന്‍റ് പറഞ്ഞു. രാത്രികാല പട്രോളിംഗ് ശക്തമാക്കാന്‍ പോലീസിനോട് അഭ്യര്‍ത്ഥിച്ചിട്ടുണ്ട്. കോഴി അറവു മാലിന്യം സംഭരിച്ചു കൊണ്ടു പോവുന്ന ഏജന്‍സി പ്രവര്‍ത്തനം നിര്‍ത്തിയതോടെ കോഴി സ്റ്റാള്‍ ഉടമകള്‍ മാലിന്യം ഒഴിവാക്കാന്‍ ബുദ്ധിമുട്ടുന്നുണ്ട്. കനാലിലെ കോഴി മാലിന്യ ജലം കിണറുകളില്‍ എത്തുമെന്ന ആശങ്കയിലാണ് നാട്ടുകാര്‍.

കൂരാച്ചുണ്ട്- കൂട്ടാലിട റോഡ് ടാറിംഗ് പൊളിഞ്ഞു തുടങ്ങി

കൂരാച്ചുണ്ട്: നവീകരണ പ്രവര്‍ത്തി നടക്കുന്ന കൂരാച്ചുണ്ട് - എരപ്പാന്‍തോട് - കൂട്ടാലിട റോഡിന്‍റെ ടാറിംഗ് പൊളിഞ്ഞുതുടങ്ങി. രണ്ടാഴ്ച മുമ്പ് ഒന്നാംഘട്ട ടാറിംഗ് പ്രവര്‍ത്തി നടത്തിയ റോഡിന്‍റെ എരപ്പാന്‍തോടിന് സമീപവും ആനപ്പാറ മേഖലയിലുമാണ് പലയിടങ്ങളിലായി ടാറിംഗ് പൊളിഞ്ഞത്. പൊതുമരാമത്ത് വകുപ്പ് 1.42 കോടി രൂപ ചെലവഴിച്ചുകൊണ്ട് 1.4 കിലോമീറ്റര്‍ ദൂരത്തിലാണ് ടാറിംഗ് നടക്കുന്നത്. നവീകരണം മാസങ്ങള്‍ക്ക് മുമ്പ് ആരംഭിച്ചുവെങ്കിലും ടാറിംഗ് വൈകിയതിനെതിരെ പരാതി ഉയര്‍ന്നിരുന്നു. മഴക്കാലമായതോടെയാണ് ടാറിംഗ് പ്രവര്‍ത്തി നടത്തിയതെന്നാണ് നാട്ടുകാരുടെ ആക്ഷേപം. ഈ മേഖലയില്‍ ഓവുചാല്‍ ഇല്ലാത്തതിനാല്‍ വെള്ളം റോഡിലൂടെ ഒഴുകുന്നതും ടാറിംഗ് തകരാന്‍ കാരണമാകുന്നുണ്ട്. റോഡ് നിര്‍മ്മാണത്തെക്കുറിച്ച് അന്വേഷിക്കണമെന്നാണ് നാട്ടുകാരുടെ ആവശ്യം.

ആംബുലന്‍സുകള്‍ ചെളിയില്‍ കുടുങ്ങി

പെരുവണ്ണാമൂഴി: പെരുവണ്ണാമൂഴി ആശുപത്രി ഭാഗത്ത് മലയോര ഹൈവേയുടെ നിര്‍മ്മാണം നടക്കുന്ന സ്ഥലത്ത് 108 ആംബുലന്‍സുകള്‍ ചെളിയില്‍ കുടുങ്ങി. ആദ്യം കുടുങ്ങിയത് രോഗിയെ കൊണ്ടു പോകാന്‍ പെരുവണ്ണാമൂഴി കുടുംബാരോഗ്യകേന്ദ്രത്തില്‍ എത്തിയ ആംബുലന്‍സാണ്. പിന്നാലെ പെരുവണ്ണാമൂഴി ആശുപത്രിയിലെ ആംബുലന്‍സും ചെളിയില്‍ പൂണ്ടു. ജെസിബിയുടെ സഹായത്തോടെയാണ് ആംബുലന്‍സുകള്‍ കരക്കു കയറ്റിയത്. ക്വാറി വേസ്റ്റിട്ടാല്‍ ചെളി ഒഴിവാക്കാവുന്ന പ്രശ്‌നമേയുള്ളുവെന്ന് നാട്ടുകാര്‍ ചൂണ്ടിക്കാട്ടുന്നു. തദേശസ്വയം ഭരണ സ്ഥാപനങ്ങള്‍ നടപടി സ്വീകരിക്കാത്തതില്‍ നാട്ടുകാര്‍ക്ക് പ്രതിഷേധമുണ്ട്. ടി.പി. രാമകൃഷ്ണന്‍ എംഎല്‍എ വിഷയത്തില്‍ ഇടപെടണമെന്ന ആവശ്യവും ഉയരുന്നുണ്ട് .

റെയിൽവേ സ്റ്റേഷൻ വികസനം: പൈലിംഗ് ജോലികൾ അന്തിമഘട്ടത്തിലേക്ക്

കോഴിക്കോട്: കോഴിക്കോട്∙ റെയിൽവേ സ്റ്റേഷൻ വികസനത്തിന്‍റെ ഭാഗമായുള്ള പുതിയ കെട്ടിടങ്ങളുടെ പൈലിംഗ് ജോലികൾ അന്തിമഘട്ടത്തിലേക്ക്. കിഴക്ക്, പടിഞ്ഞാറ് ഭാഗങ്ങളിലാണു പൈലിങ് പുരോഗമിക്കുന്നത്. കിഴക്കു ഭാഗത്തെ സ്റ്റേഷൻ കെട്ടിടം ഏതാണ്ട് പൂർണമായി പൊളിച്ചു നീക്കിയാണു പുതിയ കെട്ടിടം പണിയുന്നത്. ഇവിടെ, പഴയ കെട്ടിടം പൊളിക്കൽ പൂർത്തിയായി. അതേസമയം, പടിഞ്ഞാറു ഭാഗത്തെ നാലാം പ്ലാറ്റ്ഫോമിനോടു ചേർന്നുള്ള കെട്ടിടം തൽക്കാലം പൊളിക്കാതെയാണു പുതിയ കെട്ടിടം ഉണ്ടാക്കുന്നത്.2027 ജൂണിൽ നിർമാണം പൂർത്തിയാക്കാൻ ലക്ഷ്യമിട്ടാണു ജോലികൾ പുരോഗമിക്കുന്നത്. കോഴിക്കോട് റെയിൽവേ സ്റ്റേഷൻ ഡയറക്ടറായിരിക്കെ, പി.അബ്ദുൽ അസീസിന്‍റെ നേതൃത്വത്തിലാണു റെയിൽവേ സ്റ്റേഷന്റെ വികസന പദ്ധതി വിഭാവനം ചെയ്തത്.

വിദ്യാലയങ്ങളുടെ ചുറ്റുവട്ടം പുകയിലരഹിതമാവും : വിദ്യാല‍യങ്ങള്‌ക്ക് ചുറ്റും പുകയില വിരുദ്ധ അതിരുകള്‍ സ്ഥാപിക്കും

കോഴിക്കോട്: പുകയില വിരുദ്ധ കാമ്പയിനുമായി ബന്ധപ്പെട്ട് വിദ്യാലയങ്ങൾക്ക്ചുറ്റും പുകയില വിരുദ്ധ അതിരുകൾ സ്ഥാപിക്കും. യെല്ലോ ലൈന്‍ ക്യാമ്പയിന്‍ എന്ന പേരില്‍ വിദ്യാലയങ്ങളുടെ 100 വാര ചുറ്റളവില്‍ അധ്യാപകരെയും വിദ്യാര്‍ഥികളെയും അണിനിരത്തി മഞ്ഞവര കൊണ്ട് അതിരുകള്‍ രേഖപ്പെടുത്തും. ഈ ചുറ്റളവില്‍ ലഹരിവസ്തുക്കളുടെ ഉപയോഗം ഇല്ലെന്ന് ഉറപ്പുവരുത്തുകയാണ് ക്യാമ്പയിനിലൂടെ ലക്ഷ്യമിടുന്നത്. ഓരോ വിദ്യാലയങ്ങളിലും ജാഗ്രത സമിതികള്‍ രൂപീകരിക്കുക, വിദ്യാലയങ്ങളില്‍ നിയമപ്രകാരമുള്ള പുകവലിരഹിത ബോര്‍ഡുകള്‍ സ്ഥാപിക്കുക, പുകവലിവിരുദ്ധ പ്രതിജ്ഞെയടുക്കുക, അധ്യാപകര്‍ക്ക് പുകയിലക്കെതിരെ പരിശീലന ക്ലാസ് നല്‍കുക, എല്ലാ സ്‌കൂളിലും അതത് ഭാഗത്തെ നിയോഗിക്കപ്പെട്ട ഹെല്‍ത്ത് ഇന്‍സ്പെക്ടര്‍മാര്‍ സന്ദര്‍ശനം നടത്തി ബോധവത്കരണ ക്ലാസുകള്‍ നല്‍കുക തുടങ്ങിയ പ്രവര്‍ത്തനങ്ങള്‍ നടത്തും. ഈ മാസം 30നകം ജില്ലയിലെ എല്ലാ വിദ്യാലയങ്ങളും പുകയിലരഹിതമായി പ്രഖ്യാപിക്കും. ലോക പുകയിലവിരുദ്ധ ദിനാചരണത്തോടനുബന്ധിച്ചുള്ള ക്യാമ്പയിനുമായി ബന്ധപ്പെട്ട ബോധവത്കരണ പ്രവര്‍ത്തനങ്ങള്‍, ആരോഗ്യം ആനന്ദം രണ്ടാംഘട്ട കാന്‍സര്‍ സ്‌ക്രീനിംഗ പദ്ധതി ബോധവത്കരണ പ്രവര്‍ത്തനങ്ങള്‍ എന്നിവ സംബന്ധിച്ച് എഡിഎമ്മിന്‍റെ ചേംബറില്‍ ചേര്‍ന്ന വിവിധ വകുപ്പുകളുടെ ജില്ലാതല യോഗത്തിലാണ് തീരുമാനം. പുകയിലക്കെതിരെ വിദ്യാഭ്യാസ സ്ഥാപനങ്ങള്‍, പരമ്പരാഗത തൊഴിലിടങ്ങള്‍ എന്നിവ കേന്ദ്രീകരിച്ച് ബോധവത്കരണ ക്യാമ്പയിനുകള്‍ സംഘടിപ്പിക്കും. പൊതുസ്ഥലങ്ങളിലെ പുകവലി നിരോധനം, പരസ്യത്തിലൂടെയും പ്രദര്‍ശനത്തിലൂടെയുമുള്ള പുകയില ഉല്‍പന്നങ്ങളുടെ വിപണനം നിരോധിക്കല്‍, 18 വയസ്സില്‍ താഴെയുള്ള കുട്ടികള്‍ക്ക് പുകയില ഉല്‍പന്നങ്ങള്‍ വില്‍ക്കുന്നത് തടയല്‍, വിദ്യാലയങ്ങള്‍ക്ക് സമീപം പുകയില ഉല്‍പന്നങ്ങള്‍ വില്‍ക്കുന്നില്ലെന്ന് ഉറപ്പാക്കല്‍ തുടങ്ങിയവ ക്യാമ്പയിനിന്‍റെ ഭാഗമായി നടത്തും. പുകയിലക്കെതിരായ പ്രവര്‍ത്തനങ്ങള്‍ക്കായി പോലീസ്, എക്സൈസ്, വിദ്യാഭ്യാസം, തദ്ദേശസ്വയംഭരണം, വനിത-ശിശു വികസനം, തൊഴില്‍, പിഡബ്ല്യുഡി, പിആര്‍ഡി തുടങ്ങിയ വകുപ്പുകളുടെയും എന്‍എസ്എസ്, എന്‍സിസി, സിബിഎസ്ഇ ഐസിഎസ്സി ജില്ലാ കോര്‍ഡിനേറ്റര്‍മാര്‍, ആരോഗ്യരംഗത്ത് പ്രവര്‍ത്തിക്കുന്ന സന്നദ്ധ സംഘടനകള്‍, ഡി അഡിക്ഷന്‍ സെന്‍ററുകള്‍, സര്‍ക്കാര്‍ മെഡിക്കല്‍ കോളേജ്, കമ്യൂണിറ്റി മെഡിസിന്‍ വകുപ്പ് തുടങ്ങിയവയുടെ പ്രവര്‍ത്തനം ഏകോപിപ്പിക്കാനും തീരുമാനിച്ചു. യോഗത്തില്‍ എഡിഎം ഇന്‍ചാര്‍ജ് പി.എന്‍.പുരുഷോത്തമന്‍ അധ്യക്ഷത വഹിച്ചു.

പ്രതിഷേധത്തിനൊടുവില്‍ അപകടക്കുഴി മണ്ണിട്ടുമൂടി

തിരുവമ്പാടി: തറിമറ്റത്ത് ജല്‍ജീവന്‍ മിഷന്‍ പദ്ധതിയുടെ പൈപ്പിടുന്നതിന് വേണ്ടി കുഴിച്ച കുഴി പ്രതിഷേധത്തിനൊടുവില്‍ അധികൃതര്‍ മണ്ണിട്ടുമൂടി. കുഴി അപകടഭീഷണി സൃഷ്ടിച്ചിരുന്നു. കുഴി മണ്ണിട്ടുമുടണം എന്ന് നാട്ടുകാര്‍ ആവശ്യപ്പെട്ടിരുന്നു. സ്‌കൂളുകള്‍ തുറന്ന സാഹചര്യത്തില്‍ കുഴി മണ്ണിട്ട് മൂടാന്‍ നാട്ടുകാരും വിവിധ രാഷ്ട്രീയപാര്‍ട്ടികളും തീരുമാനിച്ചിരുന്നു. അതിനിടെയാണ് എട്ടു മാസം മുന്‍പ് എടുത്ത കുഴി ഇന്നലെ മൂടിയത്. തിരുവമ്പാടി പഞ്ചായത്തില്‍ വിവിധ വാര്‍ഡുകളില്‍ ജല്‍ ജീവന്‍ മിഷന്‍ പദ്ധതിയുടെ ഭാഗമായി എടുത്ത കുഴികളെല്ലാം മൂടണമെന്ന് പുന്നക്കല്‍ എഴാം വാര്‍ഡ് കോണ്‍ഗ്രസ് കമ്മറ്റി അവശ്യപ്പെട്ടു. പ്രസിഡന്‍റ് ബെന്നി അറയ്ക്കല്‍ അധ്യക്ഷത വഹിച്ചു. ജില്ലാ പഞ്ചായത്ത് അംഗം ബോസ് ജേക്കബ് ഉദ്ഘാടനം ചെയ്തു. ബിന്ദു ജോണ്‍സണ്‍, ജിതിന്‍ പല്ലാട്ട്, ഷിജു ചെമ്പനാനി, ഹനീഫ ആച്ചപ്പറമ്പില്‍, കെ.ജെ ജോര്‍ജ് കൊച്ചുകൈപ്പേല്‍, ഷൈനി ബെന്നി, ലിസി സണ്ണി, ജിജി എടത്തനാകുന്നേല്‍, അരുണ്‍ നാരംവേലില്‍ എന്നിവര്‍ പ്രസംഗിച്ചു.

തൊഴിലാളികള്‍ക്ക് സൗജന്യ റേഷന്‍ : ട്രോളിംഗ് നിരോധനം: മത്സ്യബന്ധനത്തിന് കര്‍ശന നിയന്ത്രണം

കോഴിക്കോട്: ഒമ്പതിന് അര്‍ധരാത്രി 12 മുതല്‍ ജൂലൈ 31 വരെ പ്രഖ്യാപിച്ച ട്രോളിംഗ് നിരോധന കാലയളവില്‍ ജില്ലയില്‍ മത്സ്യബന്ധനത്തിന് കര്‍ശന നിയന്ത്രണം. മത്സ്യസമ്പത്ത് സംരക്ഷിക്കുന്നതിനായി മത്സ്യപ്രജനന കാലത്ത് നടത്തുന്ന നിയന്ത്രണത്തിന് മുഴുവന്‍ മത്സ്യത്തൊഴിലാളികളുടെയും സഹകരണം ഉണ്ടാകണമെന്ന് ഇതുമായി ബന്ധപ്പെട്ട് കളക്ടറേറ്റില്‍ വിളിച്ചുചേര്‍ത്ത യോഗത്തില്‍ ജില്ലാ കളക്ടര്‍ സ്നേഹില്‍ കുമാര്‍ സിംഗ് അഭ്യര്‍ഥിച്ചു. സാധാരണ വള്ളങ്ങളും ഇന്‍ബോര്‍ഡ് വള്ളങ്ങളും ഉപയോഗിച്ചുള്ള പരമ്പരാഗത മത്സ്യബന്ധനം നടത്താം. എന്നാല്‍, ഇന്‍ബോര്‍ഡ് വള്ളങ്ങള്‍ ഒരു കാരിയര്‍ വള്ളം മാത്രം ഉപയോഗിക്കണം. രണ്ടു ചെറുവള്ളങ്ങള്‍ ഉപയോഗിച്ചുള്ള പെയര്‍ ട്രോളിങ്ങും നിയമവിരുദ്ധമായ മറ്റു മത്സ്യബന്ധന രീതികളും സ്വീകരിക്കരുത്. അത്തരം നിയമലംഘനങ്ങള്‍ക്കെതിരെ കര്‍ശന നടപടിയെടുക്കും. യന്ത്രവത്കൃതബോട്ടുകള്‍ കടലില്‍ പോകാനോ മത്സ്യബന്ധനം നടത്താനോ പാടില്ല. ജൂണ്‍ ഒമ്പത് അര്‍ധരാത്രി 12ന് മുമ്പ് എല്ലാ ട്രോളിങ് ബോട്ടുകളും ഹാര്‍ബറില്‍ പ്രവേശിക്കണം. നിരോധനം അവസാനിക്കുന്ന ജൂലൈ 31 അര്‍ധരാത്രി 12ന് ശേഷം മാത്രമേ മത്സ്യബന്ധനത്തിന് പുറപ്പെടാവൂ. മത്സ്യബന്ധനം നടത്തുന്ന ഇതരസംസ്ഥാന ബോട്ടുകള്‍ ജൂണ്‍ ഒമ്പതിന് മുമ്പ് തീരം വിടണം. ട്രോളിംഗ് നിരോധനം സംബന്ധിച്ച അറിയിപ്പ് കടലോരപ്രദേശങ്ങളില്‍ മൈക്ക് അനൗണ്‍സ്മെന്‍റായും പോസ്റ്റര്‍, നോട്ടീസ് എന്നിവയിലൂടെയും അറിയിക്കും. രക്ഷാദൗത്യങ്ങള്‍ക്കായി ഫിഷറീസ്, പോര്‍ട്ട്, നേവി, കോസ്റ്റ് ഗാര്‍ഡ് എന്നിവയുടെ സംയുക്ത സംഘങ്ങള്‍ സജ്ജമായിരിക്കും. ട്രോളിംഗ് നിരോധന കാലത്ത് ബോട്ടുകള്‍ക്ക് ഡീസല്‍ നല്‍കുന്നതും വിലക്കിയിട്ടുണ്ട്. ട്രോളിങ് നിരോധനം മൂലം തൊഴില്‍ നഷ്ടമാകുന്ന മത്സ്യത്തൊഴിലാളികള്‍ക്ക് സൗജന്യ റേഷന്‍ അനുവദിക്കുന്നതിന് ഫിഷറീസ് വകുപ്പില്‍നിന്ന് പട്ടിക കിട്ടുന്ന മുറയ്ക്ക് സിവില്‍ സപ്ലൈസ് നടപടിയെടുക്കുമെന്നും കളക്ടര്‍ അറിയിച്ചു. നിയമലംഘനം തടയാനും നിരോധനം നടപ്പാക്കാനും കൂടുതല്‍ പോലീസ് സേനയെ ആവശ്യമെങ്കില്‍ വിന്യസിക്കും. ജില്ലയില്‍ 552 യന്ത്രവത്കൃത മത്സ്യബന്ധന ബോട്ടുകളും 173 ഇന്‍ബോര്‍ഡ് എന്‍ജിന്‍ ഘടിപ്പിച്ച വള്ളങ്ങളും 5,098 ഔട്ട് ബോര്‍ഡ് എന്‍ജിന്‍ ഘടിപ്പിച്ച വള്ളങ്ങളും 410 എന്‍ജിന്‍ ഘടിപ്പിക്കാത്ത വള്ളങ്ങളും അടക്കം 6,233 യാനങ്ങളാണ് രജിസ്റ്റര്‍ ചെയ്തിട്ടുള്ളത്. കൂടാതെ ഇതര ജില്ലകളില്‍നിന്ന് 119ഓളം ബോട്ടുകള്‍ ജില്ലയിലെ തീരക്കടലില്‍ പ്രവര്‍ത്തിക്കുന്നു. കടല്‍ പട്രോളിങ്ങിനും കടല്‍ സുരക്ഷാ പ്രവര്‍ത്തനങ്ങള്‍ക്കുമായി 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം ബേപ്പൂര്‍ ഫിഷറീസ് സ്റ്റേഷന്‍ കേന്ദ്രീകരിച്ച് ആരംഭിച്ചിട്ടുണ്ട് (നമ്പര്‍: 04952 414074, 04952992194, 9496007052). ബേപ്പൂര്‍ ഹാര്‍ബറില്‍ ബോട്ടുകള്‍ കെട്ടിയിടാനുള്ള സൗകര്യം ഒരുക്കണമെന്നും ട്രോളിങ് സമയത്ത് ഹാര്‍ബറില്‍ കരക്കടുപ്പിച്ച ബോട്ടുകളില്‍നിന്ന് സാധനങ്ങള്‍ മോഷണം പോകുന്നത് തടയാന്‍ കാവല്‍ ഏര്‍പ്പെടുത്തണമെന്നും മത്സ്യത്തൊഴിലാളി പ്രതിനിധികള്‍ ആവശ്യപ്പെട്ടു. ഹാര്‍ബറിലെ കുടിവെള്ള പ്രശ്നം, മാലിന്യപ്രശ്നം എന്നിവ പരിഹരിക്കണമെന്നും ഹാര്‍ബറുകളില്‍ വിശ്രമ മുറി, ശുചിമുറി എന്നിവ ഒരുക്കണമെന്നും അനധികൃതമായി പാര്‍ക്ക് ചെയ്ത വാഹനങ്ങള്‍ക്കെതിരെ നടപടിയെടുക്കണമെന്നും യോഗത്തില്‍ ആവശ്യമുയര്‍ന്നു. സബ് കളക്ടര്‍ ഹര്‍ഷില്‍ ആര്‍. മീണ, ഫിഷറീസ് ഡെപ്യൂട്ടി ഡയറക്ടര്‍ പി. അനീഷ്, കൗണ്‍സിലര്‍ എം. ഗിരിജ തുടങ്ങിയവര്‍ സംബന്ധിച്ചു.

വിദേശത്തേക്ക് കടന്ന മോഷണക്കേസ് പ്രതി 12 വര്‍ഷത്തിനുശേഷം പിടിയില്‍

കോഴിക്കോട്: മോഷണം നടത്തി വിദേശത്തേക്കു കടന്ന പ്രതി 12 വര്‍ഷത്തിനുശേഷം പോലീസിന്‍റെ പിടിയില്‍. മാവൂര്‍ റോഡില്‍നിന്ന് ബുള്ളറ്റ് മോഷണം നടത്തി വിദേശത്തേക്ക് കടന്ന പ്രതി മലപ്പുറം തിരുന്നാവായ സ്വദേശി ചീരംകുളങ്ങര വീട്ടില്‍ മുഹമ്മദ് ജംഷീറി(39)നെയാണ് നടക്കാവ് പോലീസ് പിടികൂടിയത്. 2014 ഫെബ്രുവരിയിലാണ് മോഷണം നടത്തിയത്. മാവൂര്‍ റോഡിലുള്ള ആര്‍പി മാളിന്‍റെ പാര്‍ക്കിംഗ് ഗ്രൗണ്ടില്‍ നിര്‍ത്തിയിട്ടിരുന്ന ചേവായൂര്‍ സ്വദേശിയുടെ ബുള്ളറ്റ് മോഷ്ടിച്ചതുമായി ബന്ധപ്പെട്ട് നടക്കാവ് പോലീസ് പ്രതിയെ അറസ്റ്റ് ചെയ്തിരുന്നു. കോടതി റിമാന്‍ഡ് ചെയ്ത പ്രതി പിന്നീട് ജാമ്യത്തിലിറങ്ങി വിദേശത്തേയ്ക്ക് കടന്നുകളയുകയായിരുന്നു. ഇയാള്‍ക്കെതിരേ നടക്കാവ് പോലീസ് ലുക്കൗട്ട് നോട്ടീസ് പുറപ്പെടുവിച്ചിരുന്നു. നെടുമ്പാശേരി എയര്‍പോര്‍ട്ടില്‍ വന്നിറങ്ങിയ പ്രതിയെ എമിഗ്രേഷന്‍ വിഭാഗം തടഞ്ഞുവച്ച് പോലീസില്‍ വിവരം അറിയിക്കുകയായിരുന്നു.

കാപ്പ നിയമം ലംഘിച്ച പ്രതിയെ അറസ്റ്റ് ചെയ്ത് ജയിലിലടച്ചു

കോഴിക്കോട്: കാപ്പ നിയമം ലംഘിച്ചതിനെ തുടര്‍ന്ന് കോഴിക്കോട് മുഖദാര്‍ സ്വദേശി അറക്കല്‍തൊടുക വീട്ടില്‍ അജ്മല്‍ ബിലാലി(24)നെ ചെമ്മങ്ങാട് പോലീസ് അറസ്റ്റു ചെയ്ത് ജയിലിലടച്ചു. കാപ്പ നിയമം പ്രകാരം അജ്മല്‍ ബിലാലിനെ നാടുകടത്തിയിരുന്നു. നിയമം ലംഘിച്ച് കോഴിക്കോട് ജില്ലയില്‍ തിരിച്ചെത്തിയതിനാണ് പോലീസ് അറസ്റ്റു ചെയ്തത്. ചെമ്മങ്ങാട് പോലീസ് സ്റ്റേഷന്‍ പരിധിയിലെ അറിയപ്പെടുന്ന റൗഡിയാണ് പ്രതിയെന്ന് പോലീസ് പറഞ്ഞു. ഇയാളുടെ പേരില്‍ കോഴിക്കോട് ജില്ലയിലെ ചെമ്മങ്ങാട്, ടൗണ്‍, മെഡിക്കല്‍ കോളജ്, ചേവായൂര്‍, പന്നിയങ്കര, കസബ, നടക്കാവ് പോലീസ് സ്റ്റേഷനുകളിലായി നിരവധി മോഷണക്കേസുകളുണ്ട്. വീട്ടില്‍ കയറി സ്ത്രീകള്‍ക്കെതിരെ അതിക്രമം കാണിച്ചതിനും പൊതുസ്ഥലത്തുവച്ച് മയക്കുമരുന്ന് ഉപയോഗിച്ചതിനും മാരകായുധം കാണിച്ച് ഭീഷണിപ്പെടുത്തി പണവും മൊബൈല്‍ഫോണും അപഹരിച്ചതിനും മറ്റുമായി നിരവധി കേസുകളുള്ള സാഹചര്യത്തില്‍ ഒരു വര്‍ഷത്തേയ്ക്ക് ജില്ലയില്‍ പ്രവേശിക്കുവാനോ മറ്റു കേസുകളില്‍ ഉള്‍പ്പെടുവാനോ പാടില്ല എന്ന നിബന്ധനയോടുകൂടി കാപ്പ നിയമപ്രകാരം നാടു കടത്തിയിരുന്നു. എന്നാല്‍ പ്രതി നിയമം ലംഘിച്ച് ജില്ലയില്‍ പ്രവേശിക്കുകയായിരുന്നു. പ്രതിയെ ചക്കുംകടവിലുള്ള ഇയാളുടെ വീട്ടില്‍നിന്നും കസ്റ്റഡിയിലെടുക്കുകയായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

മാനന്തവാടിയിൽ തെരുവുനായ ആക്രമണത്തിൽ വയോധികന് പരിക്ക്

മാനന്തവാടി: തെരുവുനായ ആക്രമണത്തിൽ വയോധികനു പരിക്കേറ്റു. താഴെയങ്ങാടി സ്വദേശി ഏബ്രഹാമിനെയാണ് (83) ഇന്നലെ ഉച്ചകഴിഞ്ഞ് മൂന്നരയോടെ തെരുവുനായ ആക്രമിച്ചത്. കാലിൽ കടിയേറ്റ ഇദ്ദേഹത്തെ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം ടൗണിലെ ലോട്ടറിക്കച്ചവടക്കാരന് തെരുവുനായ ആക്രമണത്തിൽ പരിക്കേറ്റിരുന്നു. അക്രമകാരികളായ തെരുവുനായകളിൽനിന്നു ജനങ്ങളുടെ സുരക്ഷ ഉറപ്പുവരുത്തുമെന്ന് നഗരസഭാ വൈസ് ചെയർമാൻ ജേക്കബ് സെബാസ്റ്റ്യൻ പറഞ്ഞു.

വടകര ഹെഡ് പോസ്‌റ്റോഫീസിന്‍റെ ചുറ്റുമതില്‍ തകര്‍ന്നു

വടകര: കനത്ത മഴയില്‍ വടകര ഹെഡ് പോസ്റ്റ് ഓഫീസ് കെട്ടിടത്തിന്‍റെ ചുറ്റുമതിലും പാര്‍ക്കിംഗ് ഏരിയയും തകര്‍ന്നു. സമീപത്തെ കെട്ടിടത്തിന്‍റെ പാരപ്പെറ്റിനും നാശമുണ്ടായി. 40 വര്‍ഷം പഴക്കമുള്ള കെട്ടിടത്തിന്‍റെ ചുറ്റുമതിലാണ് തുടര്‍ന്ന് തകര്‍ന്നു വീണത്. തകര്‍ന്ന മതിലിന് സമീപത്തായുള്ള ശുചി മുറി ഏത് നിമിഷവും നിലംപൊത്തുമെന്ന അവസ്ഥയിലാണ്. രണ്ടു നില കെട്ടിടത്തില്‍ പ്രവര്‍ത്തിക്കുന്ന പോസ്റ്റ് ഓഫീസ് പൂര്‍ണമായും അപകടാവസ്ഥയിലായിരിക്കുകയാണ്. കെട്ടിടത്തിന്‍റെ ചുമരുകള്‍ക്കെല്ലാം വിള്ളല്‍ വീണിട്ടുണ്ട്. കെട്ടിടത്തിന്‍റെ അപകടാവസ്ഥ തപാല്‍ ജീവനക്കാരെ ആശങ്കയിലാഴ്ത്തിയിരിക്കുകയാണ്. ഭയത്തോടെയാണ് ജീവനക്കാര്‍ ജോലി ചെയ്യുന്നത്.

വൈദികർക്കെതിരായ അതിക്രമങ്ങളെ അപലപിച്ചു

കോഴിക്കോട്: രാജ്യത്തിന്‍റെ വിവിധ ഭാഗങ്ങളിൽ വൈദികർക്കെതിരേ നടക്കുന്ന അതിക്രമങ്ങളെ കഐൽസിഎ കോഴിക്കോട് അതിരൂപത സമിതി അപലപിച്ചു. ഉത്തരേന്ത്യൻ സംസ്ഥാനങ്ങളിൽ ക്രൈസ്തവ സ്ഥാപനങ്ങളും മിഷനറിമാരും നിരന്തരം ആക്രമണത്തിന് വിധേയമാകുന്നത് ആശങ്കജനകവും ഭയപ്പെടുത്തുന്നതുമാണെന്ന് സമിതി വിലയിരുത്തി. ഒഡീഷയിലെ സന്പൽപൂരിൽ 90 വയസുള്ളയാൾ ഉൾപ്പെടെ രണ്ട് വൈദികരെ അതിക്രൂരമായി ഉപദ്രവിച്ചവർക്കെതിരേ കർശന നടപടിക്ക് കേന്ദ്ര, സംസ്ഥാന സർക്കാരുകൾ തയാറാകണമെന്ന് ആവശ്യപ്പെട്ടു. ഡയറക്ടർ മോണ്‍.ഡോ. വിൻസന്‍റ് അറയ്ക്കൽ ഉദ്ഘാടനം ചെയ്തു. പ്രസിഡന്‍റ് ബിനു എഡ്വേർഡ് അധ്യക്ഷത വഹിച്ചു. ഫാ.പോൾ ആൻഡ്രൂസ്, നൈജു അറക്കൽ, കെ.വൈ. ജോർജ്, പ്രകാശ് പീറ്റർ, മേജോ കുരുത്തോലയിൽ, എ.ജെ. സണ്ണി, ഫ്ളോറ മെൻഡോൻസ. തോമസ് ചെമ്മനം, ടി.ടി. ജോണി, ലത മെൻഡോൻസ എന്നിവർ പ്രസംഗിച്ചു.

സംസ്ഥാന ബോക്സിംഗ് ചാന്പ്യൻഷിപ്പ്: വയനാട്ടിൽ വിവാദം

കൽപ്പറ്റ: സംസ്ഥാന ജൂണിയർ ബോക്സിംഗ് ചാന്പ്യൻഷിപ്പ് ഒന്പത്, 10 തീയതികളിൽ തിരുവനന്തപുരം ആറ്റിങ്ങലിൽ നടക്കാനിരിക്കേ വയനാട്ടിൽ വിവാദം. ചാന്പ്യൻഷിപ്പിന് വൈത്തിരിയിൽ സെലക്‌ഷൻ ട്രയൽസ് നടത്തുന്നതായി പ്രദേശവാസിയായ പരിശീലകൻ ഗ്രിഗറി വൈത്തിരി മാധ്യമങ്ങളിലൂടെ അറിയിപ്പ് നൽകിയതിനെതിരേ കേരള സ്റ്റേറ്റ് അമേച്വർ ബോക്സിംഗ് അസോസിയേഷൻ രംഗത്തുവന്നതാണ് വിവാദത്തിന് ആധാരം. വൈത്തിരിയിൽ നടത്തുമെന്ന് മാധ്യമങ്ങളിലൂടെ അറിയിച്ച സെലക്‌ഷൻ ട്രയൽസ് അനധികൃതമാണെന്ന് അസോസിയേഷൻ സംസ്ഥാന സെക്രട്ടറി ഇൻ ചാർജ് കെ. ഉസ്മാൻ, ജില്ലാ സെക്രട്ടറി വി.സി. ദീപേഷ്, വൈസ് പ്രസിഡന്‍റ് എൻ.എ. ഹരിദാസ് എന്നിവർ ആരോപിച്ചു. അസോസിയേഷന്‍റെ നലനിലയിലുള്ള പ്രവർത്തനം അട്ടിമറിക്കാൻ തത്പര കക്ഷികൾ നീക്കം നടത്തുന്നതായി അവർ കുറ്റപ്പെടുത്തി. സംസ്ഥാന സ്പോർട്സ് കൗണ്‍സിൽ ടെക്നിക്കൽ കമ്മിറ്റിയുടെ ആഭിമുഖ്യത്തിലാണ് ചാന്പ്യൻഷിപ്പ് നടക്കുന്നത്. ഇതിൽ ജില്ലാ അസോസിയേഷനുകൾക്കു കീഴിൽ പ്രവർത്തിക്കുന്ന ബോക്സിംഗ് ക്ലബുകളിലെ കായികതാരങ്ങൾക്ക് സെലക്‌ഷൻ ഇല്ലാതെ പങ്കെടുക്കാം. 2009ലും 2010ലും ജനിച്ച ബോക്സർമാർക്കാണ് സംസ്ഥാന ചാന്പ്യൻഷിപ്പിൽ മാറ്റുരയ്ക്കാൻ അവസരം. ട്രയൽസിനു തീയതി തീരുമാനിച്ച് താരങ്ങളെയും രക്ഷിതാക്കളെയും തെറ്റിദ്ധരിപ്പിക്കുകയാണ് വൈത്തിരി സ്വദേശി ചെയ്തത്. ഇതിനെ നിയമപരമായും സംഘടനാപരമായും നേരിടാനാണ് അസോസിയേഷൻ തീരുമാനമെന്നും സംസ്ഥാന സെക്രട്ടറി ഇൻ ചാർജ് പറഞ്ഞു. അതിനിടെ സംസ്ഥാന ജൂണിയർ ബോക്സിംഗ് ചാന്പ്യൻഷിപ്പുമായി ബന്ധപ്പെട്ട് സെലക്‌ഷൻ ട്രയൽസ് നടത്തിയിട്ടില്ലെന്ന് പരിശീലകൻ ഗ്രിഗറി വൈത്തിരി പറഞ്ഞു. ചാന്പ്യൻഷിപ്പിൽ ജില്ലയിൽനിന്നു പങ്കെടുക്കുന്നവർക്ക് ബോധവത്കരണം നൽകുന്നതിനാണ് വൈത്തിരിയിൽ പരിപാടി തീരുമാനിച്ചത്. മാധ്യമങ്ങൾക്ക് പ്രസിദ്ധീകരണത്തിന് നൽകിയ അറിയിപ്പിൽ ‘സെലക്‌ഷൻ’ എന്ന് അബദ്ധവശാൽ കടന്നുകൂടുകയായിരുന്നു. ബോധവത്കരണം നൽകുന്നതിന് ആരിൽനിന്നും ഫീസ് വാങ്ങിയിട്ടില്ല. ചാന്പ്യൻഷിപ്പിൽ പങ്കെടുക്കുന്നതിനുള്ള ഒരുക്കം സംബന്ധിച്ച് മുൻ വർഷങ്ങളിലും ബോധവത്കരണം നൽകിയിട്ടുണ്ട്. ഇത് താരങ്ങൾ അവസര നിഷേധം നേരിടുന്നത് ഒഴിവാകുന്നതിന് സഹായകമായിട്ടുണ്ട്. വൈത്തിരിയിൽ നിശ്ചയിച്ച പരിപാടിയുമായി ബന്ധപ്പെട്ട് തനിക്കേതിരേ ആക്ഷേപം ഉന്നയിക്കാൻ കേരള സ്റ്റേറ്റ് അമേച്വർ ബോക്സിംഗ് അസോസിയേഷനു അധികാരം ഇല്ലെന്നും ഗ്രിഗറി വൈത്തിരി പറഞ്ഞു.

കുത്തിയൊലിച്ചൊഴുകുന്ന ചാലിയാർ പുഴ കടന്ന് അക്ഷരമുറ്റത്തെത്താൻ ആദിവാസി വിദ്യാർഥികളുടെ സാഹസിക യാത്ര

ഷിബു എടക്കര എടക്കര: കുത്തിയൊലിച്ചൊഴുകുന്ന ചാലിയാർ പുഴ കടന്ന് അക്ഷരമുറ്റത്തേക്ക് എത്താൻ ആദിവാസി വിദ്യാർഥികളുടെ സാഹസിക യാത്ര. പോത്തുകൽ പഞ്ചായത്തിലെ മുണ്ടേരി ഉൾവനത്തിലെ ഉൗരുകളിൽ നിന്നുള്ള വിദ്യാർഥികളാണ് ജീവൻ പണയംവച്ച് ചാലിയാർ കടക്കുന്നത്. ഇവർക്ക് തുണയായി വാണിയംപുഴ വനം സ്റ്റേഷനിലെ ജീവനക്കാരെത്തി. ഇരുട്ടുകുത്തി, തരിപ്പപ്പൊട്ടി, വാണിയംപുഴ, കുന്പളപ്പാറ എന്നീ നാല് ഉൗരുകളിൽ നിന്നായി നാൽപതോളം വിദ്യാർഥികളാണ് മുണ്ടേരി ഗവണ്‍മെന്‍റ് ട്രൈബൽ ഹൈസ്കൂൾ, ഞെട്ടിക്കുളം എയുപി എന്നിവിടങ്ങളിൽ പഠനം നടത്തുന്നത്. സ്കൂൾ തുറന്ന ദിവസം ഉൗരുകളിൽ നിന്നുള്ള വിദ്യാർഥികളാരും സ്കൂളിൽ പോയിരുന്നില്ല. എന്നാൽ ഇന്നലെ പത്തോളം വിദ്യാർഥികൾ പുത്തനുടുപ്പും പുതിയ ബാഗും ധരിച്ച്് കുടയുമായി ആവേശത്തോടെ സ്കൂളിൽ പോകാൻ ചാലിയാറിന്‍റെ ഇരുട്ടുകുത്തി കടവിലെത്തിയിരുന്നു. ഇതേത്തുടർന്ന് തൊട്ടടുത്തുള്ള വാണിയംപുഴ വനം സ്റ്റേഷനിലെ ജീവനക്കാർ കുട്ടികളെ ചാലിയാർ പുഴ കടത്താൻ ചങ്ങാടം പുഴയിലിറക്കി. സുരക്ഷിതരായി കുട്ടികളെ മറുകര എത്തിക്കുകയും ചെയ്തു. വനം സ്റ്റേഷനിലെ വിജയൻ, കുട്ടൻ, വെള്ളൻ എന്നീ താത്കാലിക വാച്ചർക്കാർക്കണ് കുട്ടികളെ പുഴ കടത്തുന്നതിന്‍റെ ചുമതല നൽകിയിട്ടുള്ളത്. രാവിലെ സ്കൂളിലേക്കും വൈകുന്നേരം ഉൗരുകളിലേക്കും വിദ്യാർഥികളെ ഇവർ പുഴ കടത്തും. എന്നാൽ ചാലിയാറിൽ ശക്തമായ കുത്തൊഴുക്കുളള സമയങ്ങളിൽ പുഴയിൽ ചങ്ങാടം ഇറക്കാൻ കഴിയില്ല. ഈ അവസരങ്ങളിൽ വിദ്യാർഥികളുടെ പഠനം മുടങ്ങും. ഞെട്ടിക്കുളം സ്കൂളിലെ ട്രൈബൽ ഹോസ്റ്റൽ തുറന്നാൽ കുറച്ച് വിദ്യാർഥികൾ അവിടെ താമസിച്ച് പഠനം നടത്തും. എന്നാൽ ഭൂരിഭാഗം വിദ്യാർഥികളും വീടുകളിൽ നിന്നാണ് സ്കൂളിൽ പോകുന്നത്. വാണിയംപുഴ ഡെപ്യൂട്ടി റേഞ്ച് ഓഫീസർ അജികുമാർ, ബീറ്റ് ഫോറസ്റ്റ് ഓഫീസർ ജെയ്കുമാർ എന്നിവരുടെ മേൽനോട്ടത്തിലാണ് വിദ്യാർഥികളെ ചാലിയാർ കടത്തുന്നത്. ഇരുട്ടുകുത്തി കടവിൽ ഒരു വർഷം മുന്പ് പാലം നിർമാണം ആരംഭിച്ചുവെങ്കിലും പ്രവൃത്തി സ്പാനുകളിൽ ഒതുങ്ങി നിൽക്കുകയാണ്. പാലം നിർമാണം പൂർത്തിയായാൽ മാത്രമേ വിദ്യാർഥികളടക്കമുള്ള ആദിവാസികളുടെ കാലങ്ങളായുള്ള യാത്രാദുരിതത്തിന് അറുതിയാകുകയുള്ളൂ. നിലന്പൂർ നിയോജക മണ്ഡലത്തിൽപ്പെടുന്ന പ്രദേശമാണിത്. മണ്ഡലത്തിൽ ഉപതെരഞ്ഞെടുപ്പ് നടക്കുന്പോൾ തങ്ങളുടെ പ്രശ്നങ്ങൾക്ക് പരിഹാരമാകുമെന്ന പ്രതീക്ഷയിലാണ് പ്രദേശവാസികൾ.

നഷ്ടപരിഹാരവിതരണം പുനരാരംഭിച്ചില്ല : ഗ്രീന്‍ഫീല്‍ഡ് ഹൈവേയ്ക്കായി സ്ഥലവും വീടും വിട്ടുകൊടുത്തവര്‍ ഈ മഴക്കാലത്തും ദുരിതത്തില്‍

കോഴിക്കോട്: ഗ്രീന്‍ഫീല്‍ഡ് ഹൈവേയ്ക്കായി സ്ഥലവും വീടും വിട്ടുകൊടുത്തവര്‍ ഈ മഴക്കാലത്ത് ദുരിതത്തില്‍. നഷ്ടപരിഹാരവിതരണം അനന്തമായി നീണ്ടതോടെ പലവും വാടക വീടുകള്‍ ദുരിതസമാനമായ സാഹചര്യത്തിലാണ് ജീവിക്കുന്നത്. രണ്ടുവര്‍ഷത്തോളമായി പാതകടന്നുപോകുന്ന കോഴിക്കോട് പെരുമണ്ണ പഞ്ചായത്ത് നിവാസികള്‍ക്ക് നഷ്ടപരിഹാരം ലഭിച്ചിട്ടില്ല.മലപ്പുറത്ത് വിതരണം ചെയ്ത നഷ്ടപരിഹാരതുകയേക്കാള്‍ കുടുതല്‍ തുക കോഴിക്കോട് ആദ്യഘട്ടത്തില്‍ വിതരണം ചെയ്തു എന്നതിനാലാണ് തുക വിതരണം പൂര്‍ണമായി നിര്‍ത്തിവച്ചത്. പലരും കോടതിയെ സമീപിച്ചതോടെ എന്ന് തുക വിതരണം പുനരാരംഭിക്കുമെന്ന അനിശ്ചിതത്വം തുടരുകയാണ്. പലതവണ സമരമുഖത്തെത്തിയിട്ടും എം.കെ. രാഘവന്‍ എംപി ഉള്‍പ്പെടെ പ്രശ്‌നപരിഹാരത്തിന് ശ്രമിച്ചിട്ടും തുടര്‍ നിര്‍ദേശം ലഭിക്കാത്തതിനാല്‍ തുക വിതരണം പുനരാരംഭിച്ചിട്ടില്ല. പാത കടന്നുപോകുന്ന പാലക്കാടും മലപ്പുറത്തും സ്ഥലം ഏറ്റെടുക്കല്‍ എതാണ്ട് 90 ശതമാനം പുര്‍ത്തിയായി കഴിഞ്ഞിട്ടും കോഴിക്കോട്ട് പകുതിപോലും പൂര്‍ത്തിയായിട്ടില്ല. നഷ്ടപരിഹാരം ഉടനെ ലഭിക്കുമെന്ന് കണ്ട് പലരും അടുത്തുള്ള സ്ഥലങ്ങള്‍ക്കും വീടുകള്‍ക്കും അഡ്വാന്‍സ് നല്‍കിയിരുന്നു. പണയത്തിലുള്ള ആധാരം ഉള്‍പ്പെടെ എടുത്ത് അധികൃതര്‍ക്ക് കൈമാറിയവരുമുണ്ട്.ആകെയുള്ള നാലും അഞ്ചും സെന്‍റ് ഭൂമി വരെ വിട്ടുകൊടുത്തവരുണ്ട് കോഴിക്കോട് പെരുമണ്ണ, ഒളവണ്ണ പഞ്ചായത്തുകളില്‍. പുരയിടത്തിനുള്ള നഷ്ടപരിഹാരത്തുക മാത്രമാണ് ഇവരില്‍ പലര്‍ക്കും കിട്ടിയത്. വീടിനുള്ള തുക അനുവദിക്കുന്നതിനെക്കുറിച്ച് ഒരു അറിയിപ്പുമില്ല. കോഴിക്കോട് ജില്ലയില്‍ ഗ്രീന്‍ഫീല്‍ഡ് ഹൈവേ കടന്നുപോകുമ്പോള്‍ വീടും പുരയിടവും നഷ്ടപ്പെടുന്നവര്‍ അഞ്ഞൂറിലധികം പേരാണ്. പെരുമണ്ണയില്‍ എണ്‍പതോളം കച്ചവടസ്ഥാപനങ്ങളും പൊളിക്കപ്പെടും. ദേശീയപാത 66-ൽ കോഴിക്കോട് പന്തീരാങ്കാവിൽനിന്ന് തുടങ്ങി ദേശീയപാത 544-ൽ പാലക്കാട് മരുതറോഡുവരെ 121 കിലോമീറ്ററാണ് ഗ്രീന്‍ഫീല്‍ഡ് പാത വിഭാവനം ചെയ്തിരിക്കുന്നത്. 7,937 കോടി ചെലവിൽ അതിവേഗ ഇടനാഴിയായാണ് റോഡ് വികസിപ്പിക്കുക. പണി പൂർത്തിയായാൽ കോഴിക്കോട്-പാലക്കാട് യാത്ര ഒന്നരമണിക്കൂറുകൊണ്ട് സാധ്യമാകും.

എംവിആർ കാൻകോൺ രാജ്യാന്തര സമ്മേളനം ഇന്നുമുതൽ

കോഴിക്കോട്: എംവിആർ കാൻസർ സെന്‍ററിൽ പെരിറ്റോണിയൽ മാലിഗ്നൻസി അപ്‌ഡേറ്റ് ‘എംവിആർ കാൻകോൺ' രാജ്യാന്തര സമ്മേളനത്തിന് ഇന്ന് തുടക്കം. രാവിലെ 8.30ന് കാൻസർ സെന്‍ററിൽ വയറിലെ അറയ്ക്കുള്ളിലെ ദൃശ്യമായ മുഴകൾ നീക്കം ചെയ്യുന്ന ശസ്ത്രക്രിയയായ സൈറ്റോറെഡക്ടീവിനെ കുറിച്ചുള്ള വീഡിയോ ശില്പശാലയോടെയാണ് സമ്മേളനത്തിന് തുടക്കമാകുന്നത്. നാളെയും ആറ്, ഏഴ് തിയതികളിലായും ഹോട്ടൽ ടിയാരയിൽ വിവിധ വിഷയങ്ങളിൽ കോൺഫറൻസ് നടക്കും. ദിവസവും വൈകുന്നേരം 6.30 വരെയാണ് സമ്മേളനം. ആധുനിക ശസ്ത്രക്രിയാ സാങ്കേതിക വിദ്യകളെക്കുറിച്ചും ചികിത്സകളെക്കുറിച്ചും സമ്മേളനം ചർച്ച ചെയ്യും. കാൻസർ പരിചരണം , ഗവേഷണ മേഖലകൾ എന്നിവയെക്കുറിച്ച് വിവിധ സെഷനുകളിൽ ചർച്ചകളുണ്ടാകുമെന്ന് സംഘാടക സമിതി ചെയർമാൻ ഡോ. നാരായണൻകുട്ടി വാര്യർ, സെക്രട്ടറി ഡോ.ദീപക് ദാമോദരൻ, എംവിആർ കാൻസർ സെന്‍റർ സി.ഇ.ഒ ഡോ.എൻ.കെ മുഹമ്മദ് ബഷീർ വാർത്താസമ്മേളനത്തിൽ അറിയിച്ചു.

തുരങ്കപാത: കളക്ടറേറ്റ് പടിക്കൽ പരിസ്ഥിതി പ്രവർത്തകരുടെ ധർണ നാളെ

കൽപ്പറ്റ: ആനക്കാംപൊയിൽ-കള്ളാടി തുരങ്കപാത പദ്ധതി ഉപേക്ഷിക്കണമെന്ന് ആവശ്യപ്പെട്ട് പശ്ചിമഘട്ട സംരക്ഷണ സമിതിയുടെ നേതൃത്വത്തിൽ പരിസ്ഥിതി പ്രവർത്തകർ നാളെ കളക്ടറേറ്റ് പടിക്കൽ ധർണ നടത്തും. രാവിലെ 11ന് വയനാട് പ്രകൃതി സംരക്ഷണ സമിതി പ്രസിഡന്‍റ് എൻ. ബാദുഷ ഉദ്ഘാടനം ചെയ്യും. പശ്ചിമഘട്ട സംരക്ഷണ സമിതി പ്രസിഡന്‍റ് വർഗീസ് വട്ടേക്കാട്ടിൽ മുഖ്യപ്രഭാഷണം നടത്തും. താമരശേരി ചുരത്തിൽ ആവർത്തിക്കുന്ന ഗതാഗതക്കുരുക്കിന് ശ്വാശ്വത പരിഹാരം കാണാൻ സർക്കാർ അടിയന്തരമായി ഇടപെടണമെന്നതും സമരാവശ്യമാണെന്ന് സംഘാടകർ അറിയിച്ചു.

പുറമേരിയില്‍ 18 പവന്‍ സ്വര്‍ണാഭരണം കവര്‍ന്നു : വീട്ടമ്മയുടെ കാലിലെ പാദസരം മുറിച്ചെടുത്തു

നാദാപുരം: പുറമേരിയില്‍ വീട്ടുകാര്‍ ഉറങ്ങിക്കിടക്കെ വീട്ടില്‍ നിന്ന് 18 പവന്‍ സ്വര്‍ണം മോഷ്ടിച്ചു. വീട്ടില്‍ ഉറങ്ങിക്കിടക്കുകയായിരുന്ന വീട്ടമ്മയുടെ കാലിലെ പാദസരം മുറിച്ചെടുക്കുകയും ചെയ്തു. പുറമേരി ടൗണില്‍ ഹോമിയോമുക്ക് പരിസരത്തെ കുന്നുമ്മല്‍ അബ്ദുള്ളയുടെ വീട്ടിലാണ് ഇന്നലെ പുലര്‍ച്ചെ മോഷണം നടന്നത്. വീടിന്‍റെ മുന്‍ ഭാഗത്തുള്ള സിസിടിവി കാമറ തുണി കൊണ്ട് മറച്ച ശേഷമാണ് മോഷണം നടത്തിയത്. ഈ ദൃശ്യങ്ങള്‍ പുറത്ത് വന്നിട്ടുണ്ട്. ഉയരം കുറഞ്ഞ ഒരാള്‍ കാമറയില്‍ തുണി എറിയുന്നതാണ് ദൃശ്യങ്ങളിലുള്ളത്. വീടിന്‍റെ മുന്‍വശത്തെ ജനല്‍ വാതില്‍ ഏതോ ആയുധം ഉപയോഗിച്ച് കുത്തിത്തുറന്ന് ജനല്‍ വാതില്‍ പടിയില്‍ അകത്ത് വച്ചിരുന്ന വീടിന്‍റെ മുന്‍വാതിലിന്‍റെ താക്കോല്‍ കൈവശപ്പെടുത്തിയാണ് കള്ളന്‍ അകത്തു കടന്നത്. കിടപ്പുമുറിയിലെ മേശയില്‍ സൂക്ഷിച്ച 15 പവന്‍ സ്വര്‍ണാഭരണങ്ങള്‍ കൈക്കലാക്കിയ മോഷ്ടാവ് അബ്ദുള്ളയുടെ ഭാര്യയുടെ ഇരു കാലുകളിലും ഉണ്ടായിരുന്ന മൂന്ന് പവന്‍ തൂക്കം വരുന്ന സ്വര്‍ണ പാദസരങ്ങള്‍ മുറിച്ചെടുക്കുകയുമായിരുന്നു. മോഷണത്തിനുശേഷം താക്കോല്‍ എടുത്ത സ്ഥലത്ത് തന്നെ തിരികെ വയ്ക്കുകയും ചെയ്തു. പാദസരത്തിന്‍റെ ഒരു ഭാഗം കിടക്കയില്‍ നിന്ന് പിന്നീട് കണ്ടെത്തി. അബ്ദുള്ളയുടെ ഇളയ മകന്‍ രാത്രി പത്തരയോടെ പുറത്ത് പോയിരുന്നു. ചൊവ്വാഴ്ച പുലര്‍ച്ചെ രണ്ടര മണിയോടെ വീട്ടില്‍ മടങ്ങി എത്തിയ ഇളയമകനാണ് വീട്ടില്‍ മോഷണം നടന്നതായി മനസിലാക്കിയത്. വീടിന്‍റെ മുന്‍ ഭാഗത്തുള്ള സി.സിടിവി കാമറ തുണി കൊണ്ട് മറച്ചു വച്ച നിലയിലായിരുന്നു. സംശയം തോന്നിയ യുവാവ് വീട്ടുകാരെ വിളിച്ചുണര്‍ത്തുകയായിരുന്നു. രാത്രിയില്‍ തന്നെ പോലീസ് വീട്ടിലെത്തി പരിശോധന നടത്തി. വീടിന്‍റെ പിന്‍വശത്ത് ഉപേക്ഷിക്കപ്പെട്ട നിലയില്‍ ഒഴിഞ്ഞ പഴ്‌സ് പോലീസ് കണ്ടെത്തി. നാദാപുരം സബ് ഡിവിഷണല്‍ ഡിവൈഎസ്പി എ.പി. ചന്ദ്രന്‍, ഇന്‍സ്‌പെക്ടര്‍ ശ്യാംരാജ് ജെ. നായര്‍, എസ്‌ഐ എം.പി. വിഷ്ണു എന്നിവരുടെ നേതൃത്വത്തില്‍ പോലീസ് സ്ഥലത്തെത്തി വിശദമായ പരിശോധന നടത്തി. 12 ലക്ഷത്തിലധികം രൂപയുടെ നഷ്ടമുണ്ടായതായി വീട്ടുകാര്‍ പോലീസിന് മൊഴി നല്‍കി. പേരാമ്പ്രയില്‍ നിന്നുള്ള കെ.9 സ്‌ക്വാഡിലെ സ്‌നിഫര്‍ ഡോഗും,വിരലടയാള വിദഗ്ധരും വീട്ടില്‍ പരിശോധന നടത്തി. വീടിനെക്കുറിച്ച് വ്യക്തമായി അറിയുന്ന ആള്‍ ആണ് മോഷണത്തിന് പിന്നിലെന്ന് പോലീസ് പറഞ്ഞു. മോഷണത്തില്‍ അടിമുടി ദുരൂഹത നാദാപുരം: പുറമേരി ടൗണിനടുത്ത് കുന്നുമ്മല്‍ അബ്ദുള്ളയുടെ വീട്ടില്‍ നടന്ന മോഷണത്തിന്‍റെ ഞെട്ടലിലും അമ്പരപ്പിലുമാണ് നാട്ടുകാര്‍. മോഷണത്തില്‍ ഏറെ ദുരൂഹതയുണ്ടെന്ന സംസാരവും നാട്ടിലുയര്‍ന്നിട്ടുണ്ട്. വീട് പൂട്ടിയ ശേഷം താക്കോല്‍ എവിടെയാണ് സൂക്ഷിക്കുന്നതെന്ന് കൃത്യമായി അറിയുന്ന ആളാണ് മോഷ്ടാവ് എന്നാണ് പോലീസിന്‍റെ നിഗമനം. വീട്ടുകാര്‍ക്കല്ലാതെ ഈ കാര്യം പുറത്താര്‍ക്കും അറിയില്ലെന്നും അബ്ദുള്ളയുടെ മക്കള്‍ ഉറപ്പിച്ചു പറയുന്നുണ്ട്. വീടിന്‍റെ മുന്‍വശത്തെ ജനലിന്‍റെ മരം കൊണ്ടുള്ള പാളിയില്‍ നന്നായി ബലപ്രയോഗം നടത്താതെ തുറക്കാന്‍ കഴിയില്ലെന്നിരിക്കെ ജനല്‍ തുറക്കാന്‍ കഴിഞ്ഞതും ദുരൂഹതയുണര്‍ത്തുന്നു. ബലപ്രയോഗത്തില്‍ ചെറിയ പോറലുകള്‍ മരത്തില്‍ ഉണ്ടെങ്കിലും പാളിയുടെ ലോക്ക് കേടുപാടില്ലാതെ നിലത്ത് കിടക്കുന്ന നിലയിലാണ് ഉണ്ടായിരുന്നത്. പരിശോധനക്കായി സ്ഥലത്തെത്തിച്ച സ്‌നിഫര്‍ ഡോഗ് മോഷണം നടന്ന വീടിന്‍റെ വരാന്തയിലും അകത്തെ മുറികളിലും ഓടിക്കയറിയതല്ലാതെ മുറ്റത്തിന് പുറത്തെവിടെയും പോകാത്തതും ദുരൂഹതയുടെ ആഴം വര്‍ധിപ്പിച്ചിട്ടുണ്ട്. പറമ്പിലോ വീടിന് പുറത്തേക്കോ പോകാതെ മുറ്റത്ത് കാര്‍ പോര്‍ച്ചില്‍ സ്‌കൂട്ടറുകള്‍ക്കിടയിലാണ് സ്‌നിഫര്‍ ഡോഗ് നിലയുറപ്പിച്ചത്. പുറമേരിയെ ഞെട്ടിച്ച മോഷണത്തില്‍ മോഷ്ടാവിന് മറ്റാരുടെയെങ്കിലും സഹായം ലഭിച്ചിട്ടുണ്ടോ എന്നതും പോലീസിന്‍റെ അന്വേഷണ പരിധിയിലുണ്ട്. വീടിന്‍റെ മുന്‍ ഭാഗത്തുള്ള സിസിടിവി കാമറ തുണി കൊണ്ട് മറച്ച ശേഷമാണ് മോഷണം നടത്തിയത്. ഈ ദൃശ്യങ്ങള്‍ പുറത്ത് വന്നിട്ടുണ്ട്. ഉയരം കുറഞ്ഞ ഒരാള്‍ കാമറയില്‍ തുണി എറിയുന്നതാണ് ദൃശ്യങ്ങളിലുള്ളത്. കിടപ്പുമുറിയിലെ മേശയില്‍ സൂക്ഷിച്ച 15 പവന്‍ സ്വര്‍ണാഭരണങ്ങള്‍ കൈക്കലാക്കിയ മോഷ്ടാവ് അബ്ദുള്ളയുടെ ഭാര്യയുടെ ഇരു കാലുകളിലും ഉണ്ടായിരുന്ന മൂന്ന് പവന്‍ തൂക്കം വരുന്ന സ്വര്‍ണ പാദസരങ്ങള്‍ മുറിച്ചെടുക്കുകയുമായിരുന്നു. മോഷണത്തിനുശേഷം താക്കോല്‍ എടുത്ത സ്ഥലത്ത് തന്നെ തിരികെ വയ്ക്കുകയും ചെയ്തു. അബ്ദുള്ളയുടെ ഇളയ മകന്‍ രാത്രി പത്തരയോടെ പുറത്ത് പോയിരുന്നു. ചൊവ്വാഴ്ച പുലര്‍ച്ചെ രണ്ടര മണിയോടെ വീട്ടില്‍ മടങ്ങി എത്തിയ ഇളയമകനാണ് വീട്ടില്‍ മോഷണം നടന്നതായി മനസിലാക്കിയത്.

കാലവര്‍ഷം വിനയായി; കല്ലായി പുഴയുടെ ചളി നീക്കല്‍ പ്രവൃത്തികള്‍ നീണ്ടുപോകും

കോഴിക്കോട്: കാലവര്‍ഷം നേരത്തെ എത്തുകയും പുഴകളില്‍ വെള്ളം നിറയുകയും ചെയ്തതോടെ കല്ലായി പുഴയുടെ ചളി നീക്കല്‍ പ്രവര്‍ത്തികള്‍ നീണ്ടുപോകും.ഇനി സെപ്റ്റംബർ 15 നു ശേഷമേ പ്രവൃത്തി പുനരാരംഭിക്കുകയുള്ളൂ. നേരത്തേ പ്രഖ്യാപിച്ചിരുന്നതു പോലെ കരാർ ഒപ്പിട്ട് ഒരു വർഷത്തിനകം പ്രവൃത്തി പൂർത്തിയാക്കാനാകാത്ത അവസ്ഥയിലാണ്.കാലവർഷം കാരണം മേയ് 15 മുതൽ സെപ്റ്റംബർ 15 വരെ ഇത്തരത്തിലുള്ള പ്രവൃത്തികൾ എടുക്കുന്നത് നിരോധിച്ചതാണ്. എന്നാൽ ഇതു വകവയ്ക്കാതെ മേയ് 15 നു ശേഷവും പ്രവൃത്തി തുടർന്നിരുന്നെങ്കിലും മഴ ശക്തമായതോടെയാണ് പ്രവൃത്തി നിർത്തിവച്ച് ബാർജ് ബേപ്പൂർ തുറമുഖത്തേക്ക് മാറ്റിയത്.അതേസമയം പ്രവൃത്തി ഇഴഞ്ഞു നീങ്ങുകയായിരുന്നെന്ന് കല്ലായ് പുഴ സംരക്ഷണ സമിതി കുറ്റപ്പെടുത്തി. പ്രവൃത്തി തുടങ്ങി 3 മാസം പിന്നിട്ടിട്ടും 200 മീറ്റർ പോലും ചെളിയും മാലിന്യങ്ങളും നീക്കം ചെയ്യാൻ കരാറുകാരനു സാധിച്ചിട്ടില്ല. തുടക്കം മുതലേ കല്ലായി പുഴ ആഴം കൂട്ടലുമായി ബന്ധപ്പെട്ട് തടസങ്ങള്‍ ഏറെയായിരുന്നു.ഒന്നര മാസത്തിനകം സർവേ പൂർത്തിയാക്കാനായിരുന്നു ഉദ്ദേശിച്ചതെങ്കിലും ചെളി കെട്ടിക്കിടക്കുന്ന പുഴയിൽ സർവേ നടത്തുകയെന്നത് ഏറെ ശ്രമകരമായിരുന്നു. ഏതാണ്ട് രണ്ടര മാസമെടുത്താണ് സർവേ പൂർത്തിയായത്. എസ്റ്റിമേറ്റ് പ്രകാരം 3.29 ലക്ഷം ക്യുബിക് മീറ്റർ ചെളിയാണ് നീക്കേണ്ടത്. രണ്ട് പ്രളയങ്ങൾക്കു മുൻപുള്ള കണക്കായതിനാലാണ് വീണ്ടും ഇറിഗേഷന്റെ നേതൃത്വത്തിൽ സർവേ നടത്തിയത്. അതിനേക്കാൾ കൂടുതൽ ചെളി മാറ്റാനുണ്ടാകുമെന്നാണ് കരുതുന്നത്. ചെളി നീക്കി മൂന്നര മുതൽ 5 കിലോമീറ്റർ വരെ അകലെ കടലിൽ തള്ളാനായിരുന്നു തീരുമാനം. സ്വന്തം ലേഖകന്‍

യുവാവിനെ തട്ടിക്കൊണ്ടുപോയ കേസ് രണ്ടുപേർ കൂടി അറസ്റ്റില്‍

കോഴിക്കോട്: കൊടുവള്ളിയില്‍നിന്ന് അന്നൂസ് റോഷന്‍ എന്ന യുവാവിനെ തട്ടിക്കൊണ്ടുപോയി മൂന്ന് ദിവസത്തിനുശേഷം കാറില്‍ ഇറക്കിവിട്ട കേസില്‍ സംഘത്തിലെ രണ്ടുപേര്‍ പിടിയില്‍. യുവാവിനെ തട്ടിക്കൊണ്ടുപോകാനായി വീട്ടില്‍ ബൈക്കിലെത്തെിയ രണ്ടുപേരില്‍ ഒരാളായ കൊണ്ടോട്ടി സ്വദേശി മുഹമ്മദ് നിയാസ്, പ്രതികള്‍ക്ക് ഒളിവില്‍ കഴിയാന്‍ സൗകര്യമൊരുക്കിയ നിയാസിന്‍റെ സഹോദരി ഭര്‍ത്താവ് ഷഫീഖ് എന്നിവരാണ് പിടിയിലായത്. ഇതോടെകേസില്‍ അറസ്റ്റിലായവരുടെ എണ്ണം അഞ്ചായി.കര്‍ണാടകയില്‍നിന്ന് കോഴിക്കോട്ടേക്ക് വരുന്ന വഴി കല്‍പറ്റയില്‍ നിന്നുമാണ് മുഹമ്മദ് നിയാസിനെ പോലീസ് പിടികൂടിയത്. കൊടുവള്ളി ഇന്‍സ്പെക്ടര്‍ അഭിലാഷിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.ഇയാളില്‍ നിന്നും ലഭിച്ച വിവരത്തിന്‍റെ അടിസ്ഥാനത്തിലാണ് ഷഫീഖ് പിടിയിലായത്. ജ്യേഷ്ഠന്‍റെ വിദേശത്തെ സാമ്പത്തിക ഇടപാടിന്‍റെ പേരിലുള്ള തര്‍ക്കത്തെത്തുടര്‍ന്നാണ് കൊടുവള്ളിക്കടുത്ത് കിഴക്കോത്ത് പരപ്പാറ ആയിക്കോട്ടില്‍ അബ്ദുല്‍ റഷീദിന്‍റെ മകന്‍ അന്നൂസ് റോഷനെ (21) അഞ്ചുദിവസം ബന്ദിയാക്കിയത്. തട്ടിക്കൊണ്ടുപോയ അന്നൂസിനെ ആദ്യം കൊണ്ടോട്ടിയിലെത്തിക്കുകയും പിന്നീട് രണ്ടാംദിവസം മൈസൂരുവിലെ ഉള്‍പ്രദേശത്തെ ഒരു കെട്ടിടമുറിയില്‍ തടങ്കലിലാക്കുകയുമായിരുന്നു.പിന്നീട് അന്നൂസിനെ മുറിയില്‍നിന്ന് പുറത്തിറക്കി മൈസൂരുവില്‍നിന്ന് പെരിന്തല്‍മണ്ണയിലേക്ക് ടാക്‌സിയില്‍ കൊണ്ടുന്നു.രണ്ടുപേര്‍ കാറില്‍ ഒപ്പമുണ്ടായിരുന്നു. കോയമ്പത്തൂര്‍ കഴിഞ്ഞ് കേരള അതിര്‍ത്തിയെത്തുന്നതിനു മുന്‍പേ ഇവർ ഇരുവരും കാറില്‍നിന്നിറങ്ങി. കാര്‍ കോയമ്പത്തൂരിലെത്തിയപ്പോഴേക്കും സൂചന ലഭിച്ച പ്രത്യേക അന്വേഷണസംഘം കൊണ്ടോട്ടിക്കും മോങ്ങത്തിനുമിടയില്‍വെച്ച് കാര്‍ തടഞ്ഞ് അന്നൂസിനെ കണ്ടെത്തുകയായിരുന്നു. കാറോടിച്ച കര്‍ണാടക സ്വദേശിക്ക് സംഭവത്തില്‍ പങ്കില്ലെന്നുകണ്ടതോടെ ചോദ്യംചെയ്തശേഷം വിട്ടയച്ചിരുന്നു.

വൻമരം കടപുഴകി വാഹനത്തിന് മുകളിലേക്ക് വീണു

കൊയിലാണ്ടി: ദേശീയ പാതയിൽ അരങ്ങാടത്ത് വൻമരം കടപുഴകി കാറിനും സ്‌കൂട്ടറിനും മുകളിലേക്ക് വീണു. യാത്രക്കാര്‍ സാരമായി പരിക്കേല്‍ക്കാതെ രക്ഷപ്പെട്ടു. ഇന്നലെ രാവിലെ 7.30 ഓടെ ആന്തട്ട സ്കൂളിനു സമീപമായിരുന്നു സംഭവം. രാവിലെ മരം അൽപം ചരിഞ്ഞ് നിൽക്കുന്നത് നാട്ടുകാരുടെശ്രദ്ധയിൽപ്പെട്ടിരുന്നു. തുടർന്ന് പെട്ടെന്നാണ് കൊമ്പ് പൊട്ടിവീണത്. അത് വഴി മറ്റ് വാഹനങ്ങൾ ഇല്ലാത്തതിനാൽ വൻ അപകടം ഒഴിവായി. മരത്തിനടിയിൽപ്പെട്ട കാറിലെ യാത്രകാരനെ നാട്ടുകാരാണ് യാതൊരു പരിക്കുമില്ലാതെ പുറത്തെടുത്തത്. പരിക്കേറ്റ സ്കൂട്ടർ യാത്രകാരൻ വിയ്യൂർ സ്വദേശി പ്രബീഷിനെ താലുക്ക് ആശുപത്രിയിൽ പ്രവേശിപ്പിച്ചു. ദേശീയ പാതയിലെ ഗതാഗതം ബൈപാസിലൂടെ തിരിച്ചു വിട്ടു. നാട്ടുകാരും അഗ്നി രക്ഷാ സേന യും ചേർന്ന് 10 മണിയോടെ. മരം മുറിച്ചു നീക്കി. പോലീസും സ്ഥലത്തുണ്ടായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]