ഐഎസ്എല്‍ പ്രതിസന്ധി: ചെന്നൈയിനും മതിയാക്കി
Wednesday, August 6, 2025 11:50 PM IST
ചെന്നൈ: 2025-26 സീസണ്‍ ഐഎസ്എല്‍ (ഇന്ത്യന്‍ സൂപ്പര്‍ ലീഗ്) നടക്കില്ലെന്ന ആശങ്കകള്‍ക്ക് ആക്കംകൂട്ടി ഒഡീഷ എഫ്‌സി, ബംഗളൂരു എഫ്‌സി തുടങ്ങിയ ടീമുകള്‍ക്കു പിന്നാലെ ചെന്നൈയിന്‍ എഫ്‌സിയും പ്രവര്‍ത്തനം നിര്‍ത്തിവച്ചു. ഫസ്റ്റ് ടീമിന്‍റെയും സ്റ്റാഫുകളുടെയും പ്രവര്‍ത്തനമാണ് ചെന്നൈയിന്‍ എഫ്‌സി നിര്‍ത്തിവച്ചത്.
രാജ്യത്തെ ഏറ്റവും മികച്ച താരമായ സുനില്‍ ഛേത്രിയുടെ ക്ലബ്ബായ ബംഗളൂരു എഫ്‌സി, ഫസ്റ്റ് ടീമിന്‍റെയും സ്റ്റാഫുകളുടെയും സാലറി മരവിപ്പിച്ചതിന്‍റെ പിറ്റേദിനമാണ് ചെന്നൈയിന്‍ പ്രവര്‍ത്തനം നിര്‍ത്തിവച്ചതെന്നതും ശ്രദ്ധേയം.
അഭിഷേക് ബച്ചന്‍റെ ഉടമസ്ഥതയിലുള്ള ചെന്നൈയിന്‍ എഫ്‌സി, ഫസ്റ്റ് ടീമിനുള്ള സാലറി ജൂണില്‍ നല്‍കിയിരുന്നു. എന്നാല്‍, ജൂലൈയിലെ പ്രതിഫലം ഇതുവരെ നല്‍കിയിട്ടില്ലെന്നാണ് റിപ്പോര്‍ട്ട്. യൂത്ത് ടീമിന്‍റെ പ്രവര്‍ത്തനം ചെന്നൈയിന്‍ നേരത്തേതന്നെ നിര്‍ത്തിവച്ചിരുന്നു.