അപചയങ്ങളിൽ വേദനയോടെ... ശതാഭിഷേകനിറവിലും മനസിലും ചിന്തയിലും വാക്കിലും എല്ലാം സ്പോർട്സ് ആയിരുന്നു കൈമൾ സാറിന്. ഒളിന്പിക്സ് തുടങ്ങുന്നതിനു ദിവസങ്ങൾക്കുമുൻപ് ദീപികയ്ക്കായി നടത്തിയ അഭിമുഖത്തിൽ ഇന്ത്യൻ ഒളിന്പിക്സ് രംഗത്തെ അപചയത്തെക്കുറിച്ച് അദ്ദേഹം വേദനയോടെ പങ്കുവച്ചു.
1948ലെ ലണ്ടൻ ഒളിന്പിക്സിൽ ട്രിപ്പിൾ ജംപ് മത്സരത്തിൽ ഹെൻറി റെബല്ലോയ്ക്കു മെഡൽ നഷ്ടമായതിനെച്ചൊല്ലിപ്പോലും അദ്ദേഹം വാചാലനായി. ഇന്ത്യയെ കോളനിയാക്കിയ ഇംഗ്ലണ്ടിന്‍റെ ആസൂത്രിതമായ ചതിയായിരുന്നു അതെന്ന് ഇന്നും താൻ സംശയിക്കുന്നുവെന്നാണ് അദ്ദേഹം പറഞ്ഞത്.
ട്രാക് സ്യൂട്ട് അഴിച്ചുകഴിഞ്ഞ് അതിശൈത്യവും കാറ്റുമുള്ള അന്തരീക്ഷത്തിൽ നിന്നാൽ മസിലുകൾ വലിഞ്ഞുമുറുകുമെന്നു പരിശീലനരംഗത്തുള്ള ആർക്കാണ് അറിയാത്തതെന്നു ക്ഷുഭിതനായാണ് കൈമൾ ചോദിച്ചത്.
കൗമാരം വിട്ടുമാറാത്ത ആ പത്തൊന്പതുകാരനെ അതു പറഞ്ഞുകൊടുത്ത് ട്രാക്സ്യൂട്ട് ധരിപ്പിക്കാനും വാം അപ്പ് ചെയ്യിപ്പിക്കാനും ഇന്ത്യൻ ഒഫീഷലുകൾ തയാറാവാത്തതിനാൽ ഇന്ത്യക്കു നഷ്ടമായത് വലിയൊരു ഒളിന്പിക്സ് മെഡൽ ആണെന്നും അദ്ദേഹം വേദനയോടെ പറഞ്ഞു.
2004ലെ ഏഥൻസ് ഒളിന്പിക്സിൽ അഞ്ജു ബോബി ജോർജ് ആദ്യചാട്ടത്തിൽത്തന്നെ 6.83 മീറ്റർ ചാടി. തന്‍റെ ബെസ്റ്റ് പെർഫോമൻസിനെക്കാൾ ഒന്പത് സെന്‍റിമീറ്ററധികം ചാടിയിട്ടും ബാക്കിയുള്ള അഞ്ചു ചാട്ടങ്ങളിൽ ‘ഡു ഓർ ഡൈ’എന്ന ഉത്കൃഷ്ടമത്സരതന്ത്രം പയറ്റാമെന്നുള്ള വൈകാരിക അനുകൂലാവസ്ഥയിൽ അതു സാധ്യമാകാഞ്ഞതിനുപിന്നിലെ കാരണം പഠനഗവേഷണ വിഷയമാക്കണമെന്നും ഡോ. കൈമൾ അഭിപ്രായപ്പെട്ടിരുന്നു.
ദുഃഖകരവും കുറ്റകരവുമായ ഉദാസീനതയെ ഭേദിക്കാൻ കേന്ദ്രമന്ത്രാലയം മുന്നോട്ടുവന്നാലേ ഇന്ത്യൻ കായികരംഗം, പ്രത്യേകിച്ച് അത്ലറ്റിക്സ് രക്ഷപ്പെടൂ എന്നു വികാരാധീനനായ കായികഗുരുവാണ് യാത്രയായത്.