അരുന്ധതി റോയിക്ക് പെൻ പിന്‍റർ പ്രൈസ് പുരസ്കാരം : Deepika.com National News |

ന്യൂഡൽഹി: എഴുത്തുകാരി അരുന്ധതി റോയിക്ക് പെൻ പിന്‍റർ പ്രൈസ് പുരസ്കാരം. പാരിസ്ഥിതിതകർച്ച മുതൽ മനുഷ്യാവകാശ ലംഘനങ്ങൾ വരെയുള്ള വിഷയങ്ങളിൽ അരുന്ധതി റോയി നടത്തിയ വ്യാഖ്യാനങ്ങളെ പ്രശംസിച്ചുകൊണ്ടാണ് പുരസ്കാര നിർണയസമിതി അവാർഡ് പ്രഖ്യാപിച്ചത്.

“ലോകം സ്വീകരിക്കുന്ന അഗ്രാഹ്യമായ വഴിത്തിരിവിനെക്കുറിച്ച് എഴുതാൻ ഹരോൾഡ് പിന്‍റർ ഇന്ന് നമ്മളോടൊപ്പം ഉണ്ടായിരുന്നെങ്കിൽ എന്ന് ഞാൻ ആഗ്രഹിക്കുന്നു. അദ്ദേഹത്തിന്‍റെ അഭാവം എഴുത്തുകളിലൂടെ നികത്താൻ നമ്മളിൽ ചിലരെങ്കിലും കഴിവിന്‍റെ പരമാവധി ശ്രമിക്കണം” - അരുന്ധതി റോയി പറഞ്ഞു.

അരുന്ധതി റോയിയെ അവാർഡിന് ഐകകണ്ഠ്യേനയാണു തെരഞ്ഞെടുത്തതെന്നും ഇത് സാഹിത്യത്തിനുള്ള അവരുടെ സമാനതകളില്ലാത്ത സംഭാവനകളുടെ തെളിവാണെന്നും ജൂറി അംഗവും എഴുത്തുകാരനും സംഗീതജ്ഞനുമായ റോജർ റോബിൻസണ്‍ പറഞ്ഞു.

നാടകകൃത്തും നൊബേൽ ജേതാവുമായ ഹാരോൾഡ് പിന്‍ററിന്‍റെ സ്മരണാർഥം ഏർപ്പെടുത്തിയതാണ് പെൻ പിന്‍റർ പുരസ്കാരം. ഇംഗ്ലീഷ് പെൻ അധ്യക്ഷൻ റൂത്ത് ബോർത്‌‌വിക്, നടൻ ഖാലിദ് അബ്ദല്ല എന്നിവരാ‍യിരുന്നു മറ്റ് പുരസ്കാര നിർണയസമിതി അംഗങ്ങൾ. ഒക്ടോബർ 10ന് ബ്രിട്ടീഷ് ലൈബ്രറിയുടെ ആഭിമുഖ്യത്തിൽ നടക്കുന്ന ചടങ്ങിൽ അരുന്ധതി റോയിക്ക് പുരസ്കാരം സമ്മാനിക്കും.