റബര്‍ കര്‍ഷക കണ്ണീര്‍ജ്വാല ഇന്ന് കോട്ടയത്ത്
Friday, November 1, 2024 2:20 AM IST
കോട്ടയം : റബര്‍ വിലയിടിവില്‍ സര്‍ക്കാര്‍- കോര്‍പറേറ്റ്- റബര്‍ ബോര്‍ഡ് ഒത്തുകളിക്കെതിരേ കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ ആഭിമുഖ്യത്തില്‍ ആരംഭിക്കുന്ന സമരപരിപാടികളുടെ തുടക്കമായി കേരളപ്പിറവി ദിനമായ ഇന്ന് കോട്ടയത്ത് ‘റബര്‍ കര്‍ഷക കണ്ണീര്‍ ജ്വാല’ സംഘടിപ്പിക്കും.
തെരഞ്ഞെടുപ്പുസമയത്ത് വില ഉയര്‍ത്തി പിന്നീട് വിലയിടിച്ച് കര്‍ഷകരെ വഞ്ചിക്കുന്ന നടപടികള്‍ക്കെതിരേ കത്തോലിക്ക കോണ്‍ഗ്രസ് ആരംഭിക്കുന്ന സമരങ്ങളുടെ ഉദ്ഘാടനമാണ് ഇന്നത്തേത്.
കളക്ടറേറ്റ് പടിക്കല്‍നിന്ന് ആരംഭിക്കുന്ന റാലി റബര്‍ ബോര്‍ഡ് പടിക്കല്‍ എത്തിച്ചേരും. തുടര്‍ന്ന് പ്രതിഷേധ സമരം. കത്തോലിക്ക കോണ്‍ഗ്രസ് പ്രസിഡന്‍റ് രാജീവ് കൊച്ചുപറമ്പില്‍, ഡയറക്‌ടര്‍ റവ. ഡോ ഫിലിപ്പ് കവിയില്‍, ജനറല്‍ സെക്രട്ടറി ഡോ. ജോസ്‌കുട്ടി ഒഴുകയില്‍, അഡ്വ. ടോണി പുഞ്ചക്കുന്നേല്‍, ഡോ. കെ.എം. ഫ്രാന്‍സിസ്, രാജേഷ് ജോണ്‍, രൂപത ഡയറക്ടര്‍മാരായ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, റവ.ഡോ. സെബാസ്റ്റ്യന്‍ ചാമക്കാല, റവ.ഡോ മാത്യു പാലക്കുടി എന്നിവര്‍ നേതൃത്വം നല്‍കും.