ഇക്കഴിഞ്ഞതു തുലാപ്പത്ത്. ഇനി ഇടവപ്പാതി വരെ വടക്കൻ കേരളത്തിൽ തെയ്യക്കാലം. കോഴിക്കോടു മുതൽ കാസർഗോഡ് വരെ ചെണ്ടയുടെയും ചിലമ്പിന്‍റെയും മേളപ്പെരുക്കം. മൺമറഞ്ഞുപോയ പടനായകന്മാരുടെയും ഗ്രാമദേവതകളുടെയും നായാട്ടു വീരന്മാരുടെയും ഒാർമകളുയർത്തി തെയ്യക്കോലങ്ങൾ ഉറഞ്ഞുതുള്ളും!
കണ്ണൂർ മാടായി സ്വദേശി രജിൻലാൽ പണിക്കർക്ക് സ്ഥിരം ചെയ്തുകൊണ്ടിരിക്കുന്ന ജോലിക്ക് തെയ്യക്കാലമെത്തിയാൽ രണ്ടാം സ്ഥാനമേയുള്ളൂ. മുതിർന്ന തെയ്യം കലാകാരനായിരുന്ന പിതാവ് മനോഹരൻ പണിക്കർ മാടായി 2008ൽ യാത്രയായി. അതുവരെ രണ്ടോ മൂന്നോ തെയ്യങ്ങൾ കെട്ടിയുള്ള പരിചയം മാത്രമുണ്ടായിരുന്ന മകനെ സ്ഥാനം ഏല്പിച്ച ശേഷമായിരുന്നു മരണം.
"കാവുകളിൽ തിരി തെളിഞ്ഞാൽ പിന്നെ, തെയ്യം കഴിഞ്ഞേ മറ്റെന്തുമുള്ളൂ," തീച്ചാമുണ്ഡിക്കോലം ഉൾപ്പെടെ 160-ലേറെ തവണ കനലാട്ടം നടത്തിയ യുവ കോലധാരി രജിൻലാൽ പറയുന്നു.
തീച്ചാമുണ്ഡി കെട്ടി, പദവി ലഭിച്ചു
കണ്ണൂർ മാടായി ഇട്ടമ്മൽ പുതിയ ഭഗവതിക്കാവിൽ തീച്ചാമുണ്ഡി കെട്ടിയ ശേഷമാണ് പണിക്കർ പദവി ലഭിച്ചത്. തുടർന്നു നിരവധി കോലങ്ങൾ. പൊട്ടൻ, ഗുളികൻ, വിഷ്ണുമൂർത്തി, ഉച്ചിട്ട, നാരദൻ, ഭൈരവൻ, തീച്ചാമുണ്ഡി, മടയിൽ ചാമുണ്ഡി, രക്ത ചാമുണ്ഡി... ഇനിയുമുണ്ട് ഞാൻ ധരിച്ച കോലങ്ങൾ! മൊത്തത്തിൽ അഞ്ഞൂറോളം തെയ്യങ്ങളുണ്ട്. എല്ലാ തെയ്യക്കോലങ്ങളും ധരിച്ച ഒരു കലാകാരൻ പോലും ഉണ്ടാവില്ല! ആകർഷകമാണ് തെയ്യത്തിന്‍റെ മുഖത്തെഴുത്ത്. പളപളപ്പുള്ള കുരുത്തോലയും പൂക്കളും ചേർത്തുണ്ടാക്കിയ ആടയാഭരണങ്ങൾ. ചെണ്ട, ചേങ്ങില, തകിൽ, ഇലത്താളം, കുറുംകുഴൽ മുതലായ വാദ്യോപകരണങ്ങൾ അകമ്പടി. തെയ്യത്തിനു വാദ്യമേളം അനിവാര്യം. നിരന്തര പരിശീലനമാണ് തെയ്യം കലാകാരനെ സൃഷ്ടിക്കുന്നത്.
പട്ടും വളയും
ചിറക്കൽ കോവിലകത്തു 45 വർഷങ്ങൾക്കു ശേഷം നടന്ന പെരുംകളിയാട്ടത്തിൽ തീച്ചാമുണ്ഡി കെട്ടി കനലാട്ടം നടത്തിയതിലെ അവതരണ മികവ് വിലയിരുത്തി മികച്ച കോലധാരിക്കുള്ള പട്ടും വളയും തേടിയെത്തി. അച്ഛൻ ഏൽപിച്ചുപോയ ആ നിയോഗം പരമാവധി നന്നായി നിറവേറ്റുന്നു.
ദൈവമാണ് തെയ്യമായത്
സംസ്ഥാന സാംസ്കാരിക വകുപ്പിന്‍റെ അംഗീകാരമുള്ള 27 അനുഷ്ഠാന കലകളിൽ ഏറ്റവും പ്രശസ്തമായ അവതരണമാണ് ഉത്തര കേരള സംസ്കൃതിയായ തെയ്യാട്ടം അല്ലെങ്കിൽ കളിയാട്ടം. ദൈവമെന്ന പദത്തിന്‍റെ ചെന്തമിഴ് വായ്മൊഴിയാണ് "തെയ്യം'. എങ്കിലും ദേവതകൾക്കൊപ്പം മൺമറഞ്ഞ വീരപുരുഷന്മാരുടെയും ആദരണീയരായ പൂർവികരുടെയും സങ്കല്പങ്ങൾ കോലങ്ങളായി ആവിഷ്കരിക്കപ്പെടുന്നു. ഇന്നത്തെ കണ്ണൂർ-കാസർഗോഡ് ജില്ലകൾ ചേർന്ന പഴയ കോലത്തു നാടാണ് തെയ്യ സംസ്കൃതിയുടെ സിരാകേന്ദ്രം. എന്നാൽ, പ്രാചീനമായ ദ്രാവിഡപ്പഴമയാണ് തെയ്യങ്ങളുടെ രൂപഭാവങ്ങൾ! ഇന്നു കാണുന്ന കേരളം പ്രാചീന തമിഴ് സാമ്രാജ്യങ്ങളുടെ ഭാഗവുമായിരുന്നല്ലോ.
കഥയുള്ള കഥാപാത്രങ്ങൾ
ഓരോ കഥാപാത്രത്തിനു പിറകിലും ഒരു കഥയുണ്ട്. ആ കഥകൾ ഉൾക്കൊണ്ടാൽ മാത്രമേ അവയുടെ തനതായ സ്വരൂപം കോലത്തിൽ കൊണ്ടുവരാനാകൂ. തോറ്റം (സ്തോത്രം) പാട്ടുകളുടെ ലയത്തിൽ തെയ്യം ചെയ്യുന്ന നൃത്തമാണ് തെയ്യാട്ടം; വേഷം തെയ്യക്കോലവും. ചില തെയ്യങ്ങളുടെ ചമയങ്ങൾ തമ്മിൽ സാദൃശ്യമുണ്ടാകാം, പക്ഷേ, മുഖത്തെഴുത്ത് വ്യത്യസ്തവും. വേഷം ഏതായാലും കോലധാരി കാവുനടയിലെത്തി ആ ക്ഷേത്രത്തിലെ ഉപാസനാമൂർത്തിയായി സ്വയം മാറുന്നതോടെയാണ് അനുഷ്ഠാനത്തിന്‍റെ പ്രധാനഘട്ടം തുടങ്ങുന്നത്. വ്രതശുദ്ധി എടുക്കേണ്ട കാലദൈർഘ്യത്തിന് അണിയുന്ന തെയ്യക്കോലത്തിനനുസരിച്ചു വ്യത്യാസമുണ്ട്.
ചുവപ്പും മഞ്ഞയും തെയ്യവർണങ്ങൾ
തെയ്യത്തിന്‍റെ പ്രാഥമിക നിറങ്ങൾ ജ്വലിക്കുന്ന ചുവപ്പും ദൈവികഭാവം നൽകുന്ന കാവിമഞ്ഞയുമാണ്. കറുപ്പും വെളുപ്പും കലർത്തിയാണ് കണ്ണുകളിലെ തീക്ഷ്ണഭാവം വെളിപ്പെടുത്തേണ്ടത്. കുരുത്തോലച്ചാർത്തണിഞ്ഞ മാരിത്തെയ്യം പോലെയുള്ളവ മഞ്ഞ-പച്ച നിറങ്ങളുടെ സംയോജനമെങ്കിൽ, കുട്ടിച്ചാത്തൻ പോലെയുള്ളവയിൽ കറുപ്പാണ് മുന്തിനിൽക്കുന്ന നിറം.
കോലം തുള്ളൽ
കോലധാരിയുടെ അനുഷ്ഠാനം തുടങ്ങുന്നത് വ്രതശുദ്ധി എടുക്കുന്നതോടെയാണ്. തെയ്യം നടത്താൻ ഉത്തമമായ തീയതി കണ്ടു ജന്മാധികാരിക്കു (കാരണവർ സ്ഥാനത്തുള്ള മുൻ കോലധാരി) ദക്ഷിണ വച്ച് അടയാളം നൽകുന്നു. പൊട്ടൻ (പൊലപ്പൊട്ടൻ) തെയ്യമാണ് കെട്ടുന്നതെങ്കിൽ അഞ്ചു ദിവസത്തെ വ്രതം. കളിയാട്ട ദിവസം അതിരാവിലെ തറവാട്ടു ക്ഷേത്രത്തിൽ പോയി ശിവനു പ്രിയമുള്ള ജലധാര കഴിച്ച്, കലശം കുളിച്ച്, നേരേ കളിയാട്ടം അരങ്ങേറുന്ന കാവുനടയിലേക്കു പുറപ്പെടും. ദീർഘമായ തോറ്റം പട്ട് ഉൾപ്പെടെയുള്ള നിരവധി ചടങ്ങുകൾക്കൊടുവിൽ പുലർച്ച മൂന്നോടെ അണിയറയിലെത്തി ആടയാഭരണങ്ങളും തലയിൽ കുരുത്തോല മുടിയും അരയിൽ വെള്ളക്കുരുത്തോലയും ദേഹത്തു അരിച്ചാന്തും പൂശി, പൊട്ടൻ ദൈവത്തെ വരവിളിക്കും. തുടർന്നു പൂജിച്ച മുഖമെടുത്തു കോലധാരി അണിയും.
ഉറഞ്ഞു തുള്ളി മാടിക്കോലും കൊക്കര കത്തിയും കൈയിൽ പിടിച്ച്, കത്തിച്ചുപിടിച്ച ചൂട്ടുകൾ തട്ടിത്തെറിപ്പിച്ച് തീപ്പൊരിയിൽ ഉറഞ്ഞാടി, മന്ത്രോച്ചാരണംകൊണ്ടു പൊട്ടൻ ദൈവത്തെ (പരമശിവനെ) ആവാഹിക്കുന്നു. ഇനി കനലാട്ടം! ഉറഞ്ഞ് എണീറ്റു നേരേ തീപാറുന്ന കനലുകൾ കൂട്ടിവെച്ച മേലേരിയിൽ പോയി കിടന്നും ഇരുന്നും കളിച്ചും... ശക്തിപൂജ കഴിച്ചു വരുന്നവരുടെ സങ്കടങ്ങളെ കേട്ടു പരിഹാരവും ഭസ്മവും കൊടുത്തു കണ്ണുനീരൊപ്പുന്നു. കത്തിച്ച ചൂട്ടു വാങ്ങി പൂർവാധികം ശക്തിയിൽ ഉറഞ്ഞു തുള്ളി ബാക്കിയുള്ളവർക്കും അനുഗ്രഹം കൊടുക്കുന്നു. നേരം വെളുക്കാറായി! മെല്ലെമെല്ലെ ചെണ്ടയും തകിലും കൊട്ടി കലാശിക്കുന്നു. ഒടുവിൽ മുഖാവരണം എടുത്തുമാറ്റുന്നതോടെ കോലധാരി വീണ്ടും പച്ചയായ മനുഷ്യനായിത്തീരുന്നു!
തെയ്യങ്ങളുടെ മതേതര സ്വഭാവം
ഹിന്ദുമത വിശ്വാസം നിലവിൽ വരുന്നതിന് മുമ്പു തന്നെ തെയ്യം എന്ന നാട്ടുസംസ്കൃതി നിലനിന്നിരുന്നുവെന്നാണ് ചരിത്രം. എന്നാൽ, തെയ്യങ്ങളുടെ വികസന വഴികളിൽ പല ഘട്ടങ്ങളിലായി ഹൈന്ദവ ആചാരങ്ങൾ തെയ്യത്തിൽ വേർതിരിക്കാനാവാത്ത വിധം ലയിച്ചുപോയെന്നു രേഖകളിൽ കാണുന്നു. വിഖ്യാതമായ തെയ്യങ്ങളിൽ മാപ്പിളത്തെയ്യങ്ങളുടെ സ്ഥാനവും ഒട്ടും പിറകിലല്ല. മുക്രി പോക്കർ തെയ്യവും ആലിത്തെയ്യവും ഉമ്മച്ചിത്തെയ്യവും ബീവിത്തെയ്യവും ബപ്പൂരിയൻ രൂപങ്ങളും ഉൾപ്പെടെ മാപ്പിളത്തെയ്യങ്ങൾ നിരവധി. എല്ലാം സർക്കാർ അംഗീകാരമുള്ള അനുഷ്ഠാന കലകൾതന്നെ.
മനംകവരും തെയ്യക്കോലങ്ങൾ
മുച്ചിലോട്ടമ്മയാണ് തെയ്യക്കോലങ്ങളിലെ സൗന്ദര്യത്തികവ്. ഭഗവതിയുടെ ഗാംഭീര്യം അവതരിപ്പിക്കുമ്പോൾ മനോഹാരിത ചോരാതെ മുഖമെഴുത്തുകാർ അങ്ങേയറ്റം ശ്രദ്ധിക്കണം. ചന്തത്തിലും ആകാരസൗഷ്ഠവത്തിലും കേളൻകുളങ്ങര ഭഗവതിയും ചോന്നമ്മ ഭഗവതിയും ഒട്ടും പിറകിലല്ല. ആദരണീയനായ മുത്തപ്പനും കതിവന്നൂർ വീരനും പുലിമറഞ്ഞ തൊണ്ടച്ചനും തച്ചോളി ഒതേനനും പയ്യമ്പള്ളി ചന്തുവും ചേരമാൻ കെട്ടിൽ പടനായരും ഏറെ മുന്തിയ തെയ്യങ്ങളാണ്.
വടക്കൻപാട്ടുകൾ പലതും ചലച്ചിത്രമാക്കിയതിനാൽ, മൺമറഞ്ഞുപോയ സാഹസികരിൽ ഒതേനനും ചന്തുവും ആരെന്ന് എല്ലാവരുമറിഞ്ഞു. അതുപോലെ ഇന്നലെകളിലെ വീരസ്വഭാവമുള്ളവരാണ് ഇന്നു തെയ്യരൂപം ലഭിക്കുന്ന ബാക്കിയുള്ളവരുമെന്നു കരുതാം. തെയ്യം കലാകാരനായ കണ്ണന്‍റെ കഥ പറയുന്ന "കളിയാട്ടം' സുരേഷ് ഗോപിക്ക് 1997ലെ മികച്ച നടനുള്ള ദേശീയ-സംസ്ഥാന ചലച്ചിത്ര പുരസ്കാരങ്ങൾ നേടിക്കൊടുക്കുക മാത്രമല്ല ചെയ്തത്, തെയ്യമെന്തെന്ന് എല്ലാവർക്കും പരിചയപ്പെടുത്തുകയുമായിരുന്നു!
കുടുംബ പശ്ചാത്തലം
കണ്ണൂർ ജില്ലയിലെ മാടായി ഗ്രാമപഞ്ചായത്തിൽ ജനിച്ചു വളർന്നു. അമ്മ ജയകുമാരി, പത്നി ശ്രുതി, മകൾ റിതിക (എൽകെജി വിദ്യാർഥിനി).
വിജയ് സിയെച്ച്