മുഹമ്മ: നിര്ധന വിദ്യാര്ഥികളായ സഹോദരങ്ങള്ക്കു വിദേശ മലയാളികളുടെ കൂട്ടായ്മ നിര്മിച്ച് നല്കുന്ന വീടിന്റെ തറക്കല്ലിടല് ചടങ്ങ് പി.പി. ചിത്തരഞ്ജന് എംഎല്എ നിര്വഹിച്ചു. മണ്ണഞ്ചേരി ഹൈസ്കൂള് വിദ്യാര്ഥിനി മഞ്ചിമക്കും സഹോദരന് മഞ്ചിത്തിനുമാണ് അപ്രതീക്ഷിത സ്വപ്നസാഹല്യംപോലെ വീട് സ്വന്തമാകുന്നത്. മണ്ണഞ്ചേരി പഞ്ചായത്ത് 21 -ാം വാര്ഡില് വാത്തിക്കാട്ട് മേഘരാജിന്റെയും പ്രമീളയുടെയും മക്കളാണിവര്.
ഈ കുടുംബത്തിന്റെ സ്വപ്നസാക്ഷാത്കാരത്തിന് മുന്കൈയെടുത്ത നന്മനിറഞ്ഞവര് സമൂഹത്തിന് മാതൃകയാണെന്ന് ചിത്തരഞ്ജന് പറഞ്ഞു. അമേരിക്കയിലെ നവകേരള മലയാളി അസോസിയേഷനാണ് ഏഴു ലക്ഷം രൂപ ചെലവില് വീട് നിര്മിച്ചു നല്കുന്നത്. ക്ഷേമ പ്രവര്ത്തനങ്ങളുടെ ഭാഗമായാണ് വീട് നല്കുന്നതെന്ന് അസോസിയേഷൻ പ്രസിഡന്റ് സുശീല് നാലകത്ത് പറഞ്ഞു. മഞ്ജിമയുടെ വീടിന്റെ തറക്കല്ലിടല് ചടങ്ങ് അഭിമാന നിമിഷമായി കാണുന്നുവെന്നു മഞ്ജിമയുടെ ജീവിത സാഹചര്യം നവകേരളാ മലയാളി അസോസിയേഷന്റെ ശ്രദ്ധയില്പ്പെടുത്തിയ അധ്യാപിക വിധു നഹാര് പറഞ്ഞു.
മണ്ണഞ്ചേരി സ്കൂളില്നിന്ന് എസ്എസ്എല്സിക്ക് എല്ലാ വിഷയങ്ങള്ക്കും എ പ്ലസ് നേടിയ വിദ്യാര്ഥികളെ അനുമോദിക്കാന് അധ്യാപകരും പിടിഎ ഭാരവാഹികളും കുട്ടികളുടെ വീടുകള് സന്ദര്ശിച്ചിരുന്നു. വീട്ടില് ചെന്നപ്പോഴാണ് ഇവരുടെ ദുരിതജീവിതം ശ്രദ്ധയില്പ്പെട്ടത്. ഷീറ്റ് മേഞ്ഞ ചെറിയ വീട്ടിലാണ് നാലാംഗ കുടുംബം കഴിയുന്നത്. ഇവരുടെ ദുഃഖം എങ്ങനെ പരിഹരിക്കാം എന്ന ചിന്തയോടെയാണ് അധ്യാപകര് വീടുവിട്ടിറങ്ങിയത്.
ക്ലാസ് ടീച്ചറായ വിധു നഹാറിന്റെ ഇടപെടലാണ് വീടെന്ന സ്വപ്നത്തിന് സാക്ഷാത്കാരമേകിയത്. ഈ അധ്യാപിക അമേരിക്കയിലെ സൗത്ത് ഫ്ളോറിഡയിലെ നവകേരള മലയാളി അസോസിയേഷനുമായി ബന്ധപ്പെട്ട് കുടുംബത്തിന്റെ അവസ്ഥ ബോധ്യപ്പെടുത്തി. തുടര്ന്ന് ഇവര് ഈ കുടുംബത്തിന് വീടുവച്ചുനല്കാന് തീരുമാനിക്കുകയായിരുന്നു. ഏഴു ലക്ഷം രൂപ വിനിയോഗിച്ചാണ് വീട് നിര്മിക്കുന്നതെന്ന് അസോസിയേഷന് പ്രസിഡന്റ് സുശീല്കുമാര് നാലകത്ത്, സെക്രട്ടറി ലിജോ പണിക്കര്, ട്രഷറര് സൈമണ് പാറത്താഴം എന്നിവര് പറഞ്ഞു.
മൂന്നു പതിറ്റാണ്ടായി സാമൂഹ്യക്ഷേമ പ്രവര്ത്തനങ്ങളിലൂടെ അമേരിക്കയിലെ മലയാളി മനസുകളില് ഇടംനേടിയ സംഘടനയാണിത്.
പഞ്ചായത്ത് പ്രസിഡന്റ് ടി.വി. അജിത്കുമാര്, ജില്ലാ പഞ്ചായത്തംഗം ആര്. റിയാസ്, പഞ്ചായത്ത് വൈസ് പ്രസിഡന്റ് പി.എ. ജുമൈലത്ത്, പഞ്ചായത്തംഗം കെ.എസ്. ഹരിദാസ്, പിടിഎ പ്രസിഡന്റ് സി.എച്ച്. റഷീദ്, എസ്എംസി ചെയര്മാന് മുഹമ്മദ് മുസ്തഫ, എന്ജിനിയര് അനില് കുമാര് ജിത്തുസ്, ഹെഡ്മിസ്ട്രസ് എം.കെ. ജ്യോതിഷ്കുമാരി, മുന് ഹെഡ്മിസ്ട്രസ് സുജാതകുമാരി, ക്ലാസ് ടീച്ചര് വിധു നഹാര്, സീനിയര് അസിസ്റ്റന്റ് ഡി. ദിലീപ് കുമാര്, അധ്യാപകരായ ബീന, പ്രമീള, സുമാദേവി, അനിലാ മന്മഥന്, സിന്ധു, മുഹമ്മദ് സാബീര്, റീനാ ബീഗം, സാബിറ, അനില മന്മഥന്, സുനിത, സിന്ധു, റോഷ്ന എന്നിവര്പ്രസംഗിച്ചു.