കൽപ്പറ്റ: ലോക്സഭാ തെരഞ്ഞെടുപ്പിൽ അർഹരായ മുഴുവൻ പേരും വോട്ട് രേഖപ്പെടുത്തണമെന്ന് ജില്ലാ കളക്ടർ ഡോ.രേണുരാജ്. ആസൂത്രണഭവൻ എ.പി.ജെ ഹാളിൽ പോസ്റ്റൽ ബാലറ്റ് നോഡൽ ഓഫീസർമാർക്കുള്ള പരിശീലനം ഉദ്ഘാടനം ചെയ്യുകയായിരുന്നു അവർ. പോളിംഗ് ബൂത്തിലെത്തി വോട്ടുചെയ്യാൻ കഴിയാത്ത വിവിധ വിഭാഗങ്ങളിലുള്ള ആളുകൾക്ക് പോസ്റ്റൽ ബാലറ്റിനു അവസരമുണ്ട്.
85 വയസ് കഴിഞ്ഞവർ, തെരഞ്ഞെടുപ്പ് ഡ്യൂട്ടിയിലുള്ളവർ, കരുതൽ തടങ്കലിലുള്ളവർ, സായുധസേന, പാരാമിലിട്ടറി, ഇന്ത്യൻ റയിൽവേ, പ്രസ് ഇൻഫർമേഷൻ ബ്യൂറോ, എയർപോർട്ട് അഥോറിറ്റി ഓഫ് ഇന്ത്യ, ഫുഡ് കോർപറേഷൻ ഓഫ് ഇന്ത്യ, ദൂരദർശൻ, ഓൾ ഇന്ത്യ റേഡിയോ, ഇലക്ട്രിസിറ്റി വകുപ്പ്, ഹെൽത്ത് ആൻഡ് ഫാമിലി വെൽഫെയർ, സ്റ്റേറ്റ് ട്രാൻസ്പോർട്ട് കോർപറേഷൻ, ഫുഡ് ആൻഡ് സിവിൽ സപ്ലൈസ്, ബിഎസ്എൻഎൽ, ഫയർ ആൻഡ് റസ്ക്യൂ, തെരഞ്ഞെടുപ്പ് ദിവസം മീഡിയ കവറേജിന് തെരഞ്ഞെടുപ്പ് കമ്മീഷന്റെ അനുമതി ലഭിച്ച മാധ്യമ പ്രവർത്തർ എന്നിവർക്കും പോസ്റ്റൽ വോട്ട് ചെയ്യാൻ അവസരം ഉണ്ട്.
നിശ്ചിത മാതൃകയിലുള്ള അപേക്ഷ നൽകി സമയബന്ധിതമായി നിയമാനുസൃത നടപടികൾ പൂർത്തിയാക്കിയാൽ മാത്രമേ തപാൽ വോട്ട് ചെയ്യാൻ സാധിക്കൂ. പോസ്റ്റൽ ബാലറ്റിന്റെ നടപടിക്രമങ്ങൾ പൂർത്തിയാക്കിവർക്ക് പിന്നീട് ബൂത്തിലെത്തി വോട്ട് ചെയ്യാൻ സാധിക്കില്ലെന്നും കളക്ടർ പറഞ്ഞു. ഡെപ്യൂട്ടി പ്ലാനിംഗ് ഓഫീസർ വി.ആർ. രത്നേഷ്, അസിസ്റ്റന്റ് പ്ലാനിംഗ് ഓഫീസർ സി.പി. സുധീഷ്, നോഡൽ ഓഫീസർമാർ എന്നിവർ പങ്കെടുത്തു. തെരഞ്ഞെടുപ്പ് മാസ്റ്റർ ട്രെയിനർ ഉമർ അലി പാറച്ചോടൻ പരിശീലനത്തിന് നേതൃത്വം നൽകി.
വിവരങ്ങളറിയാം വോട്ടർ ഹെൽപ് ലൈനിലൂടെ
കൽപ്പറ്റ: വോട്ടർമാർക്ക് തെരഞ്ഞെടുപ്പ് സംബന്ധിച്ച സേവനങ്ങളും വിവരങ്ങളും വോട്ടർ ഹെൽപ് ലൈൻ ആപ്ലിക്കേഷനിലൂടെ അറിയാം. തെരഞ്ഞെടുപ്പ് കമ്മീഷന്റെ ഡൈനാമിക് പോർട്ടലിൽനിന്നു തത്സമയ ഡാറ്റ ഈ ആപ്പ് വഴി ലഭിക്കും. വോട്ടർമാരെ പ്രചോദിപ്പിക്കുകയും ബോധവത്കരിക്കുകയുമാണ് ഈ ആപ്ലിക്കേഷന്റെ പ്രധാന ലക്ഷ്യം. വോട്ടർ പട്ടികയിൽ പേര് തിരയാൽ, വോട്ടർ രജിസ്ട്രേഷൻ, ഫോമുകൾ സമർപ്പിക്കൽ, ഡിജിറ്റൽ ഫോട്ടോ, വോട്ടർ സ്ലിപ്പുകൾ ഡൗണ്ലോഡ് ചെയ്യൽ, പരാതികൾ നൽകൽ തുടങ്ങി വിവിധ സേവനങ്ങൾക്കുള്ള സമഗ്ര ആപ്ലിക്കേഷനാണിത്.
സ്ഥാനാർഥികളുടെ വിവരം അറിയുന്നതിനും വോട്ടർമാർക്കുള്ള മറ്റ് അത്യാവശ്യ സേവനങ്ങളും ഈ ആപ്പിൽ ലഭ്യമാണ്. ഗൂഗിൾ പ്ലേ സ്റ്റോർ, ആപ്പിൾ ആപ്പ് സ്റ്റോർ എന്നിവിടങ്ങളിൽനിന്നു വോട്ടർ ഹെൽപ് ലൈൻ ആപ്പ് ഡൗണ്ലോഡ് ചെയ്ത് ഫോണിൽവരുന്ന ഒടിപി രജിസ്ട്രഷൻ ഉപയോഗിച്ച് ലോഗിൻ ചെയ്യാം. തുടർന്ന് വ്യക്തിഗത വിവരം, ഫോണ് നന്പർ, ഇ മെയിൽ ഐഡി, ജനന തീയതി, വിലാസം, പാസ്പോർട്ട് സൈസ് ഫോട്ടോ തുടങ്ങിയവ അപ് ലോഡ് ചെയ്ത് വോട്ടറായി പേര് രജിസ്റ്റർ ചെയ്യാം.