ADVERTISEMENT

ADVERTISEMENT

ലഹരിക്കെതിരേ ഇരുചക്ര വാഹനറാലി നടത്തി

താമരശേരി: കോവിലകം റോഡ് റെസിഡന്‍റ്സ് അസോസിയേഷന്‍റെ അഭിമുഖ്യത്തിൽ ലഹരിക്കും മയക്കുമരുന്നിനും എതിരേ "ലഹരി മുക്ത നാട് എന്‍റെ സ്വപ്നം' എന്ന ആപ്ത വാക്യം ഉയർത്തി ഇരുചക്ര വാഹനറാലി നടത്തി. താമരശേരി പഞ്ചായത്ത് പ്രഡിഡന്‍റ് എ. അരവിന്ദൻ ഫ്ലാഗ് ഓഫ് ചെയ്തു.

അസോസിയേഷൻ പ്രസിഡന്‍റ് സണ്ണി കൂഴാംപാല, പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ജോസഫ് മാത്യു, മെഡിക്കൽ കോളജ് മുൻ പ്രഫസർ ജീൻ മാളിയേക്കൽ, കോർഡിനേഷൻ കമ്മിറ്റി വൈസ് പ്രസിഡന്‍റ് സേതു ചന്ദ്രൻ, അസോസിയേഷൻ മുൻ പ്രസിഡന്‍റ് പി. സുകുമാരൻ, സെക്രട്ടറി ഷംസീർ എന്നിവർ നേതൃത്വം നൽകി.

ADVERTISEMENT

എം.എം. സ്കറിയ അനുസ്മരണം സംഘടിപ്പിച്ചു

കൂരാച്ചുണ്ട്: മുതിർന്ന സിപിഎം നേതാവും മുൻ കൂരാച്ചുണ്ട് പഞ്ചായത്ത്‌ പ്രസിഡന്‍റുമായിരുന്ന എം. എം. സ്‌കറിയയുടെ രണ്ടാം ചരമ വാർഷികത്തിന്‍റെ ഭാഗമായി അനുസ്മരണ യോഗം സംഘടിപ്പിച്ചു. സിപിഎം ജില്ലാ സെക്രട്ടറിയേറ്റ് അംഗം പി.കെ. മുകുന്ദൻ ഉദ്ഘാടനം ചെയ്തു. വി.ജെ. സണ്ണി അധ്യക്ഷത വഹിച്ചു. ജില്ലാ കമ്മിറ്റി അംഗങ്ങളായ കെ.എം. സച്ചിൻദേവ് എംഎൽഎ, ഏരിയ സെക്രട്ടറി ടി.കെ. സുമേഷ്, ലോക്കൽ സെക്രട്ടറി കെ.ജി. അരുൺ, ഷാജി സ്‌കറിയ എന്നിവർ പ്രസംഗിച്ചു. വൈകുന്നേരം കൂരാച്ചുണ്ട് അങ്ങാടിയിൽ നടന്ന റെഡ് വോളണ്ടിയർ മാർച്ചും പ്രകടനവും പൊതുയോഗവും എസ്എഫ്ഐ അഖിലേന്ത്യാ ജോയിന്‍റ് സെക്രട്ടറി പി.എം. ആർഷോ ഉദ്ഘാടനം ചെയ്തു. വി.ജെ. സണ്ണി അധ്യക്ഷത വഹിച്ചു. ടി.കെ സുമേഷ്, കെ.ജി അരുൺ, ജോസ് ചെരിയൻ, കാർത്തിക വിജയൻ എന്നിവർ പ്രസംഗിച്ചു.

തെരുവുനായ ശല്യം: എബിസി പദ്ധതി നിർത്തണമെന്ന്

തിരുവമ്പാടി: കേരളത്തിൽ ഒരു മാസത്തിനിടെ മൂന്ന് കുട്ടികൾ നായ്ക്കളുടെ കടിയേറ്റ് വാക്സിനെടുത്തിട്ടും പേ വിഷബാധയേറ്റ് മരിച്ചു. ഈ സാഹചര്യത്തിൽ ആനിമൽ ബർത്ത് കൺട്രോൾ പദ്ധതി നിർത്തണമെന്ന് കേരള കോൺഗ്രസ് -എം തിരുവമ്പാടി മണ്ഡലം സായാഹ്ന സദസ് കേന്ദ്ര- സംസ്ഥാന സർക്കാരുകളോട് ആവശ്യപ്പെട്ടു. തെരുവുനായ ശല്യം പരിഹരിക്കുവാൻ വന്ധ്യംകരണമാണ് പരിഹാരമെന്ന് പറഞ്ഞ് നടപ്പിലാക്കിയ എബിസി പദ്ധതിയിലൂടെ പാഴാക്കിയത് കാൽ നൂറ്റാണ്ടാണ്. പരിഷ്കൃത രാജ്യങ്ങൾ ചെയ്യുന്നതുപോലെ തെരുവുനായ്ക്കളെ കൊന്നൊടുക്കണമെന്നും സായാഹ്ന സദസ് ആവശ്യപ്പെട്ടു. ജില്ലാ പ്രസിഡന്‍റ് ടി.എം. ജോസഫ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോയി മ്ലാക്കുഴി അധ്യക്ഷത വഹിച്ചു. ജോസഫ് പൈമ്പിള്ളി, വിൽസൺ താഴത്ത് പറമ്പിൽ, സിജോ വടക്കേൻതോട്ടം, ദിനീഷ് കൊച്ചുപറമ്പിൽ, സണ്ണി പുതുപറമ്പിൽ എന്നിവർ പ്രസംഗിച്ചു.

കക്കൂസ് മാലിന്യം ജലസ്രോതസിൽ തള്ളിയ പ്രതികളെ നാട്ടുകാർ പിടികൂടി

കോടഞ്ചേരി: കോടഞ്ചേരി പഞ്ചായത്തിലെ ഒന്നാം വാർഡ് ചിപ്പിലിത്തോട് പ്രദേശത്ത് റോഡ് സൈഡിലും നീർച്ചാലിലുമായി മാലിന്യം തള്ളിയ വാഹനവും ഡ്രൈവറെയും രണ്ടു സഹായികളെയും നാട്ടുകാരുടെ സഹായത്തോടെ പിടികൂടി. കഴിഞ്ഞ ദിവസം രാത്രി 12.30ന് അസ്വാഭാവികമായി ടാങ്കർ ലോറി ചിപ്പിലിത്തോട് തുഷാരഗിരി റൂട്ടിൽ കൂടി ചുറ്റിക്കറങ്ങുന്നത് ശ്രദ്ധയിൽപ്പെട്ടതിനെ തുടർന്ന് പ്രദേശവാസികൾ ഈ വാഹനം തടഞ്ഞുവച്ചു. പ്രദേശവാസികൾ അറിയിച്ചതിനെ തുടർന്ന് സ്ഥലത്തെത്തിയ പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരിയുടെ നേതൃത്വത്തിൽ മാലിന്യം തള്ളിയ വാഹനവും ഡ്രൈവറെയും സഹായികളായ രണ്ടുപേരെയും പോലീസിന് കൈമാറി. വാഹനം ഓടിച്ചിരുന്ന അബ്ദുൽ നജീബ്, മറ്റു പ്രതികളായ പ്രവീൺ നായർ, മുഹമ്മദ് ജാസിഫ് എന്നിവരുടെ അറസ്റ്റ് രേഖപ്പെടുത്തി.

കല്ലേറിൽ കാട്ടുതേനീച്ചക്കൂട് ഇളകി; പെരുവണ്ണാമൂഴിയിൽ തേനീച്ചയുടെ ആക്രമണത്തിൽ നിരവധി പേർക്ക് പരിക്ക്

പെരുവണ്ണാമൂഴി: കഴിഞ്ഞ ദിവസം പെരുവണ്ണാമൂഴി ടൂറിസ്റ്റ് കേന്ദ്രം വൃഷ്ടി പ്രദേശത്ത് കാട്ടുതേനീച്ച കൂട് ഇളകിയതിനെ തുടർന്ന് നിരവധി പേർക്ക്‌ കുത്തേറ്റു. കുറ്റ്യാടിപ്പുഴക്ക് കുറുകെയുള്ള പെരുവണ്ണാമൂഴി പാലത്തിലാണ് കാട്ടുതേനീച്ചക്കൂടുകൾ ഉണ്ടായിരുന്നത്. സാമൂഹ്യ ദ്രോഹികളായ രണ്ടുപേർ ഇതിനു കല്ലെറിഞ്ഞു. പറന്നുയുർന്ന ഈച്ചകൾ പരിസരത്തുണ്ടായിരുന്ന ആളുകളെ അക്രമിച്ചു. കല്ലെറിഞ്ഞവരിൽ ഒരാൾക്കും കുത്ത് കിട്ടി. പാലത്തിലൂടെ സഞ്ചരിക്കുകയായിരുന്ന അമ്മയ്ക്കും മക്കൾക്കും തേനീച്ചകളുടെ ആക്രമണത്തിൽ സാരമായ പരിക്കേറ്റു. ഷീന തോണക്കര (32) മക്കളായ അന്ന മരിയ (13), അനക്സ മരിയ (8) എന്നിവർ മൊടക്കല്ലൂർ മലബാർ മെഡിക്കൽ കോളജിൽ ചികിത്സയിലാണ്. കാട്ടുതേനീച്ചക്കൂടുകൾ ഇപ്പോഴും പാലത്തിനടിയിലുണ്ട്. ഇതിൽ കല്ലെറിഞ്ഞവരെ പിടികൂടാൻ നടപടി സ്വീകരിക്കണമെന്നും പരിക്കേറ്റവർക്ക് ധനസഹായം അനുവദിക്കണമെന്നും പ്രദേശവാസിയും കോൺഗ്രസ് നേതാവുമായ ജെയിംസ് മാത്യൂ ആവശ്യപ്പെട്ടു.

വില തകർച്ച; കോഴി കർഷകർ പ്രതിസന്ധിയിൽ : നഷ്ടം താങ്ങാനാകാതെ പലരും കൃഷി ഉപേക്ഷിക്കുന്നു

തിരുവമ്പാടി: ഉത്പാദന ചെലവുപോലും കിട്ടാതെ കോഴി കർഷകർ കൃഷി ഉപേക്ഷിക്കുന്നു. ബ്രോയിലർ കോഴികളുടെ വില്പനയിൽ കർഷകന് കിട്ടുന്ന കൂടിയ വില 80-90 രൂപയാണ്. ചെലവ് 98 രൂപയോളം വരും. സീസണായിട്ടും ഉണ്ടായ വില തകർച്ചയിൽ ഞെട്ടിയിരിക്കുകയാണ് കർഷകർ. കോഴിക്കുഞ്ഞിനെ 40 രൂപ വിലകൊടുത്തു വാങ്ങി തീറ്റയും മറ്റു പരിചരണങ്ങളും നൽകി 36 മുതൽ 40 ദിവസംവരെ വളർത്തുമ്പോൾ 98 രൂപ ചെലവുവരുമെന്ന് കർഷകർ പറയുന്നു. നിലവിൽ 110 രൂപയെങ്കിലും ഒരു കിലോയ്ക്ക് ലഭിച്ചാലേ കൃഷി മുന്നോട്ടു കൊണ്ടുപോകാൻ കഴിയുകയുള്ളൂ എന്നാണ് കർഷകർ വ്യക്തമാക്കുന്നത്. തമിഴ്നാട്ടിൽ കോഴിവില കുറവാണെന്ന് ചൂണ്ടിക്കാട്ടിയാണ് സംസ്ഥാനത്തുള്ള കർഷകരിൽ നിന്ന് വിലകുറച്ച് ഇടനിലക്കാർ കോഴി വാങ്ങുന്നത്. ഒരു കിലോ ബ്രോയിലർ കോഴി തീറ്റയ്ക്ക് 43 രൂപയാണ് വില. അതിനു പുറമേ വാക്സിനും തൊഴിൽ കൂലിയും, കോഴി ഷെഡിൽ വിരിക്കാനുള്ള അറക്കപ്പൊടി, വൈദ്യുതി തുടങ്ങിയവ എല്ലാം ചേർത്ത് കണക്കാക്കുമ്പോൾ വലിയ ചെലവാണ് കോഴി കർഷകർ നേരിടുന്നത്. ഈ ചെലവിന് കണക്കാക്കിയുള്ള വില കോഴിക്ക് ലഭിക്കുന്നില്ല. കഴിഞ്ഞ ഒമ്പതുമാസമായി കോഴി കർഷകർ വിലയിടിവ് സഹിക്കുകയാണ്. ഇതോടെ പലരും കൃഷി നിർത്തിക്കഴിഞ്ഞു. നഷ്ടം നേരിടുമ്പോഴും സർക്കാർ നികുതികളും കർഷകർക്ക് തിരിച്ചടിയാകുന്നുണ്ട്. കോഴിഷെഡുകൾക്ക് ആഡംബര വീടിനുള്ള നികുതിയാണ് കണക്കാക്കുന്നത്. നികുതി ഒഴിവാക്കിയിട്ടുണ്ടെന്ന് സർക്കാർ പറയുന്നുണ്ടെങ്കിലും പ്രാവർത്തികമായിട്ടില്ല. സ്വന്തം ഉപയോഗത്തിനാണെങ്കിൽ മാത്രമേ നികുതിയിളവ് കിട്ടൂ. കോഴിഫാമും മറ്റും നിർമിക്കുന്നത് സ്വന്തം ഉപയോഗത്തിന് അല്ലാത്തതു കൊണ്ട് ഭീമമായ നികുതി അടയ്ക്കാൻ തദ്ദേശ സ്ഥാപനങ്ങളിൽ നിന്ന് നോട്ടീസ് വരുന്നു. ഇതിനു പുറമേ ഒരു ശതമാനം ലേബർ സെസും ചുമത്തുന്നു. പോയവർഷം നഷ്ടം കൂടാതെ കൃഷി മുന്നോട്ടു പോയിരുന്നതായും കർഷകർ പറയുന്നു. ഈ വർഷം ഇതുവരെ കർഷകന് ലഭിച്ച കൂടിയ വില 105 രൂപയും കുറഞ്ഞവില 60 രൂപയുമായിരുന്നു. 105 രൂപ കർഷകന് ലഭിച്ചപ്പോൾ വിപണിയിൽ വില 180 കടന്നിരുന്നു.

സിബിഎസ്ഇ പ്ലസ് ‌ടു പരീക്ഷയിൽ മിന്നുന്ന വിജയം; 500 ൽ 499 മാർക്ക് നേടി നന്ദന

കോഴിക്കോട്: സിബിഎസ്ഇ പ്ലസ് ടു പരീക്ഷയിൽ കോഴിക്കോട് ദേവഗിരി സിഎംഐ പബ്ലിക് സ്കൂളിലെ വിദ്യാര്‍ഥിക്ക് 500 ല്‍ 499 മാര്‍ക്ക്. നന്ദന രഞ്ജിഷ് എന്ന മിടുക്കിയാണ് മികച്ച വിജയം നേടിയത്. 99.8 ശതമാനം മാര്‍ക്കാണ് നന്ദന നേടിയത്. ഡോക്ടര്‍മാരായ രഞ്ജിഷിന്‍റെയും ഷംനയുടേയും മകളാണ്. ഗണിതം, ഭൗതികശാസ്ത്രം, രസതന്ത്രം, കമ്പ്യൂട്ടർ സയൻസ് എന്നീ വിഷയങ്ങളില്‍ നന്ദന മുഴുവന്‍ മാര്‍ക്കും നേടി. ഇംഗ്ലീഷിലാണ് ഒരു മാര്‍ക്ക് നഷ്ടപ്പെട്ടത്.

‘വിലങ്ങാട് ദുരിതബാധിതരുടെ പുനരധിവാസം മികച്ച രീതിയില്‍ പൂര്‍ത്തിയാക്കും’

കോഴിക്കോട് കനാല്‍ സിറ്റി പദ്ധതി നിര്‍മാണം അടുത്തവര്‍ഷം കോഴിക്കോട്: കോഴിക്കോട് കനാല്‍ സിറ്റി പദ്ധതി നിര്‍മാണം അടുത്ത വര്‍ഷം ആരംഭിക്കുമെന്ന് മുഖ്യമന്ത്രി പിണറായി വിജയന്‍. സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് നടന്ന ജില്ലാതല യോഗത്തില്‍ ചോദ്യങ്ങള്‍ക്ക് മറുപടി നല്‍കുകയായിരുന്നു മുഖ്യമന്ത്രി. 14 മീറ്റര്‍ വീതിയില്‍ നിര്‍മിക്കുന്ന കനാല്‍ സിറ്റിക്കായി പത്തേക്കര്‍ ഭൂമി ഏറ്റെടുക്കും. 1,118 കോടി ചെലവഴിച്ച് നടപ്പാക്കുന്ന പദ്ധതി മൂന്ന് വര്‍ഷം കൊണ്ട് പൂര്‍ത്തീകരിക്കുമെന്നും മുഖ്യമന്ത്രി പറഞ്ഞു. ബേപ്പൂര്‍ തുറമുഖത്തിന്‍റെ വികസനവും സര്‍ക്കാരിന്‍റെ പരിഗണനയിലുണ്ട്. വലിയ കപ്പല്‍ അടുപ്പിക്കുന്നതിനുള്ള ആഴംകൂട്ടല്‍ സൗകര്യങ്ങള്‍ ഉള്‍പ്പടെ ഒരുക്കുന്നതിനായി സാഗര്‍മാല പദ്ധതിയില്‍ ഉള്‍പ്പെടുത്തിയിട്ടുണ്ട്. പത്ത് മീറ്റര്‍ ആഴം കൂട്ടുന്ന പ്രവൃത്തികളുടെ പാരിസ്ഥിതിക ആഘാത പഠനം നടത്താന്‍ നാഷണല്‍ ഇന്‍സ്റ്റിറ്റ്യൂട്ട് ഓഫ് സയന്‍സ് ആന്‍ഡ് ടെക്‌നോളജിയെ ചുമതലപ്പെടുത്തിയിട്ടുണ്ടെന്നും മഴക്കാല പഠനം ഉള്‍പ്പെടെ നടത്തി ഒക്ടോബറില്‍ പൂര്‍ത്തിയാക്കുമെന്നും അദ്ദേഹം പറഞ്ഞു. വിലങ്ങാട് ദുരിതബാധിതരുടെ പുനരധിവാസം മികച്ച രീതിയില്‍ പൂര്‍ത്തിയാക്കും. വീട് പൂര്‍ണമായി നഷ്ടപ്പെട്ട കുടുംബങ്ങള്‍ക്ക് 15 ലക്ഷം രൂപ വീതവും മരണപ്പെട്ടവരുടെ ആശ്രിതര്‍ക്ക് 6 ലക്ഷം രൂപ വീതവും 488 കുടുംബങ്ങള്‍ക്ക് അടിയന്തര ധനസഹായമായി 10,000 രൂപയും ജീവനോപാധി നഷ്ടപ്പെട്ട 77 കുടുംബങ്ങള്‍ക്ക് ദിവസം 300 രൂപ വീതവും സര്‍ക്കാര്‍ ധനസഹായം നല്‍കിയിട്ടുണ്ട്. വയനാട് തുരങ്കപാതക്കായി വലിയ ഇടപെടലാണ് സര്‍ക്കാര്‍ നടത്തിയത്. തടസങ്ങളൊന്നുമില്ല. ഭൂമി ഏറ്റെടുക്കല്‍ പൂര്‍ത്തീകരിക്കുകയും ഇപിസി ടെന്‍ഡര്‍ നല്‍കുകയും ചെയ്തിട്ടുണ്ട്. ദേശീയപാത വികസനത്തിന്‍റെ പ്രവൃത്തി വേഗത്തിലാക്കുന്നതുമായി ബന്ധപ്പെട്ട് അവലോകന യോഗങ്ങള്‍ ഉള്‍പ്പെടെ നടക്കുന്നു. വെങ്ങളം-രാമനാട്ടുകര റീച്ചില്‍ 95 ശതമാനവും അഴിയൂര്‍- വെങ്ങളം റീച്ചില്‍ 65 ശതമാനം പ്രവൃത്തി പൂര്‍ത്തീകരിച്ചു. കോഴിക്കോട്ട് അവയവമാറ്റ ആശുപത്രി സ്ഥാപിക്കാന്‍ നടപടി സ്വീകരിക്കുകയും 558.68 കോടിയുടെ ഭരണാനുമതി ലഭ്യമാക്കുകയും ചെയ്തിട്ടുണ്ട്. ചേവായൂരിലെ ത്വക്ക്രോഗ ആശുപത്രി കാമ്പസില്‍ കെട്ടിടത്തിന്‍റെ പ്രവൃത്തി പൂര്‍ത്തിയാകുന്നതിന് കാത്തുനില്‍ക്കാതെ മെഡിക്കല്‍ കോളജിന്‍റെ സൗകര്യം ഉപയോഗിച്ച് പ്രവര്‍ത്തനം ആരംഭിക്കാന്‍ ഉദ്ദേശിക്കുന്നു. കേരളത്തില്‍ എയിംസ് കൊണ്ടുവരുന്നതിനുള്ള എല്ലാ ശ്രമങ്ങളും സര്‍ക്കാര്‍ നടത്തുന്നുണ്ട്. അത് ലഭിക്കുമെന്നാണ് പ്രതീക്ഷ. പരിശ്രമങ്ങള്‍ തുടരുമെന്നും മുഖ്യമന്ത്രി പറഞ്ഞു. അതിദാരിദ്ര്യ നിര്‍മാര്‍ജനം പദ്ധതിയുടെ ഭാഗമായി ജില്ലയില്‍ 5,381 കുടുംബങ്ങളെ അതിദാരിദ്ര്യത്തില്‍നിന്ന് മോചിതരാക്കാന്‍ സാധിച്ചു. മാലിന്യമുക്ത കേരളം, സമഗ്ര ഗുണമേന്മ വിദ്യാഭ്യാസം, വന്യമൃഗ ശല്യം, ബീച്ച് ടൂറിസം പദ്ധതി, ലഹരി വിമുക്ത കാമ്പയിന്‍ തുടങ്ങിയ വിഷയങ്ങളില്‍ സര്‍ക്കാരിന്‍റെ നയവും ലക്ഷ്യങ്ങളും ചോദ്യങ്ങള്‍ക്ക് മറുപടിയായി മുഖ്യമന്ത്രി വിശദീകരിച്ചു.

വടകരോത്സവത്തിന് ഓര്‍ക്കാട്ടേരി ഒരുങ്ങുന്നു; മൂന്ന് ദിവസം നൂറിലേറെ പ്രതിഭകളുടെ കലാവിരുന്ന്

വടകര: രാജീവ്ഗാന്ധി കള്‍ച്ചറല്‍ ഫോറവും സൗത്ത് ഏഷ്യന്‍ ഫ്രറ്റേണിറ്റി ന്യൂഡല്‍ഹിയും സംയുക്തമായി സംഘടിപ്പിക്കുന്ന വടകരോത്സവം-2025 സീസണ്‍ ഒന്നിന് ഓര്‍ക്കാട്ടേരി ഒരുങ്ങുന്നു. പികെ മെമ്മോറിയല്‍ സ്‌കൂള്‍ ഗ്രൗണ്ടില്‍ 16,17,18 തീയതികളില്‍ നടക്കുന്ന കലാവിരുന്ന് വിവിധ സംസ്ഥാനങ്ങളിലെ കലാപ്രതിഭകളുടെ സംഗമ കേന്ദ്രമാകുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. സാംസ്‌കാരിക വൈവിധ്യങ്ങളുടെ ഏകോപനം ലക്ഷ്യമിട്ടാണ് പരിപാടി നടത്തുന്നത്. ഇന്ത്യയിലെ വിവിധ സംസ്ഥാനങ്ങളില്‍ നിന്നും ദക്ഷിണേഷ്യന്‍ രാജ്യങ്ങളില്‍ നിന്നുമുള്ള നൂറിലേറെ കലാ പ്രതിഭകള്‍ വ്യത്യസ്തങ്ങളായ കലാരൂപങ്ങള്‍ അവതരിപ്പിക്കും. പരിപാടിയുടെ ഭാഗമായി 16ന് വൈകുന്നേരം മൂന്നിന് ദക്ഷിണേഷ്യയിലെ കലാകാരന്മാരും കേരളത്തിന്‍റെ തനതായ കലാരൂപങ്ങളും ഉള്‍ക്കൊള്ളുന്ന സാംസ്‌കാരിക ഏകതായാത്ര ഓര്‍ക്കാട്ടേരിയില്‍ നടക്കും. തുടര്‍ന്ന് വടകരോത്സവത്തിന്‍റെ ഉദ്ഘാടനം ഷാഫി പറമ്പില്‍ എംപി നിര്‍വഹിക്കും. വാര്‍ത്താ സമ്മേളനത്തില്‍ പാറക്കല്‍ അബ്ദുള്ള, ടി.പി. മിനിക, രാജന്‍ ചെറുവാട്ട്, കോട്ടയില്‍ രാധാകൃഷ്ണന്‍, മൊയ്തു താഴത്ത്, സതീശന്‍ കുരിയാടി, പറമ്പത്ത് പ്രഭാകരന്‍, ജഗദീഷ് പാലയാട്, വി.കെ. പ്രേമന്‍ എന്നിവര്‍ പങ്കെടുത്തു.

കുറ്റകൃത്യങ്ങള്‍ക്ക് കുറവില്ലാതെ കോഴിക്കോട്

കോഴിക്കോട്: ലഹരി വ്യാപനത്തിന് പിന്നാലെ കോഴിക്കോട് കേന്ദ്രീകരിച്ച് കൊലപാതകങ്ങളും കൊലപാതക ശ്രമങ്ങളും തുടര്‍ക്കഥയാകുന്നു. ക്രൈം റെക്കോര്‍ഡ്‌സ് ബ്യൂറോയുടെ ഏറ്റവും അവസാനത്തെ കണക്ക് പ്രകാരം ജില്ലയില്‍ നാലു കൊലപാതകങ്ങളും 15 കൊലപാതക ശ്രമങ്ങളുമാണ് ഉണ്ടായത്. കൂടാതെ തട്ടിക്കൊണ്ടു പോകല്‍, മോഷണം, വഞ്ചന, ലൈംഗിക അതിക്രമം തുടങ്ങി ഈ വർഷം ഏപ്രില്‍ വരെ ജില്ലയില്‍ 8,549 ക്രൈം കേസുകളും റിപ്പോര്‍ട്ട് ചെയ്തിട്ടുണ്ട്. സിറ്റി പരിധിയെ അപേക്ഷിച്ച് റൂറല്‍ പരിധിയിലാണ് കൊലപാതക ശ്രമങ്ങള്‍ ഉള്‍പ്പെടെ കുറ്റകൃത്യങ്ങളുടെ എണ്ണത്തില്‍ വലിയ വര്‍ധനവ് ഉണ്ടായിട്ടുള്ളത്. കഴിഞ്ഞ ദിവസം രാത്രിയാണ് കണ്ണഞ്ചേരി റെയില്‍വെ ട്രാക്കിലൂടെ നടന്ന രണ്ടു പേരെ യാതൊരു പ്രകോപനവുമില്ലാതെ കല്ലായി സ്വദേശി പുതിയാപ്പില്‍ പറമ്പ്‌വീട്ടില്‍ ഇക്കലാസ് (29) കരിങ്കല്ലുകൊണ്ട് ഇടിച്ച് പരിക്കേല്‍പ്പിച്ച സംഭവം ഉണ്ടായത്. റെയില്‍വേ ട്രാക്കിന് സമീപം ഇരിക്കുകയായിരുന്ന പ്രതി പരാതിക്കാരെ തന്‍റെ അരികിലേയ്ക്ക് വിളിക്കുകയായിരുന്നു. പ്രതിയെ പരിചയമില്ലാത്തതിനാല്‍ അങ്ങോട്ട് പോകാതിരുന്ന പരാതിക്കാരനെയും സുഹൃത്തിനെയും യാതൊരു പ്രകോപനവും കൂടാതെ പ്രതി തടഞ്ഞുവച്ച് കരിങ്കല്ല് കൊണ്ട് അക്രമിക്കുകയായിരുന്നു. പ്രതിക്കെതിരേ കോഴിക്കോട് ടൗണ്‍, പന്നിയങ്കര, ചെമ്മങ്ങാട്, മാറാട് തുടങ്ങിയ സ്റ്റേഷനുകളിലായി മോഷണത്തിനും മയക്കുമരുന്ന് ഉപയോഗിച്ചതിനും അടിപിടി നടത്തിയതിനും പൊതുസ്ഥലത്ത് മദ്യം ഉപയോഗിച്ചതിനും മറ്റുമായി നിരവധി കേസുകള്‍ നിലവിലുണ്ട്. കൂടാതെ മാര്‍ച്ചില്‍ പത്താം ക്ലാസ് വിദ്യാര്‍ഥികള്‍ തമ്മിലുണ്ടായ സംഘര്‍ഷത്തിലാണ് താമരശേരി സ്വദേശി ഷഹബാസ് എന്ന വിദ്യാര്‍ഥി കൊല്ലപ്പെട്ടത്. താമരശേരി ഈങ്ങാപ്പുഴ മേഖലയിലാണ് ലഹരിക്ക് അടിമയായ മകന്‍ ഉമ്മയെ വെട്ടികൊന്നതും ഭര്‍ത്താവ് ഭാര്യയെ കുത്തികൊന്നതും. മെഡിക്കല്‍ കോളജിന് സമീപം ആള്‍കൂട്ട മര്‍ദനത്തിനിടെ യുവാവ് മരിച്ചതും അടുത്ത ദിവസങ്ങളിലാണ്. ഇത്തരത്തില്‍ ജില്ലയ്ക്കുള്ളില്‍ കഴിഞ്ഞ കുറച്ചു മാസങ്ങളായി നടന്ന അക്രമ പരമ്പരകള്‍ ഞെട്ടിക്കുന്നതാണ്. ഈ വര്‍ഷം മാത്രമല്ല, കഴിഞ്ഞ അഞ്ച് വര്‍ഷമായി സംസ്ഥാന വ്യാപകമായി ഉയര്‍ന്ന അക്രമകേസുകളില്‍ ജില്ല മുന്‍പന്തിയിലുണ്ട്. 2024ല്‍ റിപ്പോര്‍ട്ട് ചെയ്തത് 25 കൊലപാതകങ്ങളും 125 കൊലപാതക ശ്രമങ്ങളുമാണ്. 2023ല്‍ 14 കൊലപാതകങ്ങളും 50 കൊലപാതകശ്രമങ്ങളും, 2022ല്‍ 19 കൊലപാതകങ്ങളും 42 കൊലപാതകശ്രമങ്ങളും, 2021ല്‍ 17 കൊലപാതകങ്ങളും 30 കൊലപാതകശ്രമങ്ങളുമാണ് ജില്ലാ ക്രൈം ബ്യൂറോ കണക്ക് അനുസരിച്ച് റിപ്പോര്‍ട്ട് ചെയ്തിട്ടുള്ളത്.

സരസ് മേളയിൽ സിഡിഎസ് രജിസ്ട്രേഷനില്ലാത്ത സംരംഭകർക്ക് സ്റ്റാൾ അനുവദിച്ചതായി ആക്ഷേപം

കോഴിക്കോട്: ബീച്ചിൽ നടക്കുന്ന ദേശീയ സരസ് മേളയിൽ സിഡിഎസ് രജിസ്ട്രേഷനില്ലാത്ത സംരംഭകർക്ക് സ്റ്റാൾ അനുവദിച്ചതായി പരാതി. എട്ടാം നമ്പർ നവജ്യോതി സ്റ്റാളിനാണ് രജിസ്ട്രേഷൻ ഇല്ലെന്ന ആരോപണം ഉർന്നത്. സിഡിഎസിൽ രജിസ്റ്റർ ചെയ്ത് പ്രവർത്തിക്കുന്നവർക്ക് മാത്രമേ സരസ് മേളയിൽ സ്റ്റാൾ അനുവദിക്കാവൂ എന്നാണ് ചട്ടം. ഇത് ലംഘിച്ചാണ് എട്ടാം നമ്പർ സ്റ്റാൾ അനുവദിച്ചതെന്നാണ് പരാതി. എന്നാൽ നവജ്യോതി സംഘത്തിന് രജിസ്ട്രേഷൻ ഉണ്ടായിരുന്നുവെന്നും ഇക്കഴിഞ്ഞ മാർച്ച് 31ന് രജിസ്ട്രേഷൻ കലാവധി അവസാനിച്ചതാണ് പ്രശ്നമെന്നുമാണ് കുടുംബശ്രീ ജില്ലാ മിഷന്‍റെ വിശദീകരണം. സരസ് മേളയിൽ പങ്കെടുത്തുകൊണ്ടിരിക്കുന്ന സംഘത്തിന് സ്ക്രീനിംഗ് ഉണ്ടായിരുന്നില്ല. അതിനാൽ തന്നെ രജിസ്ട്രേഷൻ കാലാവധി കഴിഞ്ഞത് ശ്രദ്ധയിൽപ്പെട്ടിരുന്നില്ല. മേള തുടങ്ങ‍ുന്നതിന് തലേ ദിവസം ഉച്ചയ്ക്കാണ് സംഘം രജിസ്ട്രേഷൻ പുതുക്കിയിട്ടില്ലെന്ന വിവരം സിഡിഎസ് ചെയർപേഴ്സൺ അറിക്കുന്നത്. സംഘത്തോട് മേളയിൽ പങ്കെടുക്കരുതെന്ന് ആവശ്യപ്പെട്ടിരുന്നു. എന്നാൽ മേളയിൽ പങ്കെടുക്കുന്നതിനായി മൂന്ന് ലക്ഷം രൂപയുടെ സാധനങ്ങൾ വാങ്ങിയതായും പങ്കെടുത്തില്ലെങ്കിൽ തങ്ങൾക്ക് വലിയ സാമ്പത്തിക ബാധ്യത വരുമെന്നും സംഘം അറിയിച്ചതിനെത്തുടർന്ന് അവർക്ക് അവസരം നൽകുകയായിരുന്നു. മേളക്കു ശേഷം സംഘത്തിന്‍റെ രജിസ്ട്രേഷന് പുതുക്കുന്ന നടപടി കൈക്കൊള്ളാനാണ് തീരുമാനമെന്നും ജില്ലാ മിഷൻ കോ ഓർഡിനേറ്റർ അറിയിച്ചു.

അഖില കേരള സെവൻസ് ഫുട്ബോൾ ടൂർണമെന്‍റിന് ഇന്നു തുടക്കം

കൂരാച്ചുണ്ട്: സാന്തോം ഫുട്ബോൾ അക്കാഡമി കൂരാച്ചുണ്ട് സംഘടിപ്പിക്കുന്ന ഒന്നാമത് അഖില കേരള സെവൻസ് ഫുട്ബോൾ ടൂർണമെന്‍റ് ഇന്ന് വൈകുന്നേരം അഞ്ചിന് കല്ലാനോട് ജൂബിലി സ്റ്റേഡിയത്തിൽ ആരംഭിക്കും. കൂരാച്ചുണ്ട് പഞ്ചായത്ത് പ്രസിഡന്‍റ് ഒ.കെ. അമ്മത് ടൂർണമെന്‍റ് ഉദ്ഘാടനം ചെയ്യുമെന്ന് ടൂർണമെന്‍റ് ഭാരവാഹികളായ റഫീഖ് മുഖംവീട്ടിൽ, പി.കെ. ഹസീന, ജെയ്സൺ എമ്പ്രയിൽ, തോമസ് എരപ്പാൻതോട് എന്നിവർ അറിയിച്ചു. 20 വരെ നടക്കുന്ന ടൂർണമെന്‍റിൽ കോയിൻസ് കൂരാച്ചുണ്ട്, ഗോൾ ഡിഗെർസ് പൂവത്തുംചോല, സാന്തോം കൂരാച്ചുണ്ട്, സാന്‍റോസ് കക്കയം, എവർട്ടെൻ കരിയാത്തുംപാറ, അൽഷബാബ് ചങ്ങരോത്ത്, എഫ്സി തലയാട്, ഈവനിംഗ് പ്ലേയേഴ്സ് തിരുവോട്, സോക്കർ തലയാട്, എൻഎസ് ബഹ്റൈൻ, വികെ റൂംസ് താമരശേരി, ടൗൺ ടീം പന്തലിക്കര തുടങ്ങിയ ടീമുകളാണ് മത്സരിക്കുന്നത്. ഇന്ന് നടക്കുന്ന ആദ്യ മത്സരത്തിൽ സാന്‍റോസ് കക്കയവും എഫ്സി തലയാടും ഏറ്റുമുട്ടും.

പതങ്കയത്ത് സുരക്ഷാ സംവിധാനങ്ങൾ ഒരുക്കി

കോടഞ്ചേരി: തുടർച്ചയായി മുങ്ങി മരണങ്ങൾ റിപ്പോർട്ട് ചെയ്ത പതങ്കയത്ത് പഞ്ചായത്തിന്‍റെ നേതൃത്വത്തിൽ സുരക്ഷാസംവിധാനങ്ങൾ ഒരുക്കി. മരണങ്ങൾ സംഭവിക്കുന്ന കയങ്ങളിലേക്കുള്ള പ്രവേശനം പൂർണമായും നിരോധിച്ചു. പ്രദേശത്തെക്കുറിച്ച് അറിവില്ലാതെ വരുന്ന ടൂറിസ്റ്റുകൾക്ക് നിർദേശങ്ങൾ നൽകുവാൻ ലൈഫ് ഗാർഡനെയും നിയോഗിച്ചു. പ്രവേശനസമയം രാവിലെ ഒന്പത് മുതൽ അഞ്ച് വരെയായി നിജപ്പെടുത്തി. സുരക്ഷാ സംവിധാനങ്ങൾ ഒരുക്കുന്നതിന് പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, സ്റ്റാൻഡിംഗ് കമ്മിറ്റി ചെയർപേഴ്സൺമാരായ സൂസൻ വർഗീസ്, സിബി ചിരണ്ടായത്ത്, ലീലാമ്മ കണ്ടത്തിൽ, കോടഞ്ചേരി പോലീസ് സ്റ്റേഷൻ സബ് ഇൻസ്പെക്ടർ ജിതേഷ്, പതങ്കയം സംരക്ഷണ സമിതി അംഗങ്ങളായ ബിജു ഓത്തിക്കൽ, വിൽസൺ തറപ്പേൽ, ജിനേഷ് കുര്യൻ, മത്തായി പുളിക്കൽ, ബിബിൻ പുതുപറമ്പിൽ, ജിനിഷ് മൈലയ്ക്കൽ എന്നിവർ നേതൃത്വം നൽകി.

‘കേന്ദ്ര-കേരള സർക്കാരുകൾ ജനവിരുദ്ധ സമീപനങ്ങൾ സ്വീകരിക്കുന്നതിൽ മത്സരിക്കുന്നു’

പേരാമ്പ്ര: പിണറായി സർക്കാർ ബിജെപിയുടെ ബീ ടീമാണെന്നും കേന്ദ്ര-കേരള സർക്കാരുകൾ ജനവിരുദ്ധ സമീപനങ്ങൾ സ്വീകരിക്കുന്ന കാര്യത്തിൽ മത്സരിക്കുകയാണെന്നും മുസ്‌ലിം ലീഗ് സംസ്ഥാന സെക്രട്ടറി പാറക്കൽ അബ്ദുള്ള പറഞ്ഞു. പേരാമ്പ്ര പഞ്ചായത്ത് ഭരണ സമിതിയുടെ ഭരണ സ്തംഭനത്തിനും അഴിമതിക്കും ധൂർത്തിനുമെതിരേ പേരാമ്പ്ര പഞ്ചായത്ത് യുഡിഎഫ് കമ്മിറ്റി നടത്തിയ വാഹന പ്രചാരണ ജാഥയുടെ സമാപന സമ്മേളനം പേരാമ്പ്രയിൽ ഉദ്ഘാടനം ചെയ്യുകയായിരുന്നു അദ്ദേഹം. ആർ.കെ. മുഹമ്മദ് അധ്യക്ഷത വഹിച്ചു. സത്യൻ കടിയങ്ങാട്, രാജൻ മരുതേരി, പി.കെ. രാഗേഷ്, കെ.പി. റസാഖ്, കെ.സി. രവീന്ദ്രൻ, പി.എസ്. സുനിൽകുമാർ, ബാബു തത്തക്കാടൻ, അർജുൻ കറ്റയാട്ട്, പുതുക്കുടി അബ്ദുറഹിമാൻ, മൂസ കോത്തമ്പ്ര, വാസു വേങ്ങേരി, വി.പി. സുരേഷ് എന്നിവർ പ്രസംഗിച്ചു.

വട്ടച്ചിറ കുരിശുപള്ളിയിൽ തിരുനാൾ കൊടിയേറി

കൂരാച്ചുണ്ട്: സെന്‍റ് തോമസ് ഫൊറോന ഇടവകയുടെ കീഴിലുള്ള വട്ടച്ചിറ കുരിശുപള്ളിയിൽ വിശുദ്ധ സെബസ്ത്യാനോസിന്‍റെ തിരുനാളിന് സെന്‍റ് തോമസ് ഫൊറോന വികാരി ഫാ. വിൻസെന്‍റ് കണ്ടത്തിൽ കൊടിയേറ്റി. തുടർന്ന് തിരുസ്വരൂപ പ്രതിഷ്ഠ, ആഘോഷമായ വിശുദ്ധ കുർബാന, സന്ദേശം, നൊവേന എന്നീ ശുശ്രൂഷകൾക്ക് വികാരി ഫാ. വിൻസെന്‍റ് കണ്ടത്തിൽ, അസിസ്റ്റന്‍റ് വികാരി ഫാ. മൈക്കിൾ നീലംപറമ്പിൽ, ഡീക്കൻ ജോൺ കോനുക്കുന്നേൽ സഹകാർമികരായി. ഇന്ന് വൈകുന്നേരം 4.30 ന് ജപമാല, അഞ്ചിന് പ്രസുദേന്തി വാഴ്ച, ആഘോഷമായ തിരുനാൾ കുർബാന, സന്ദേശം, നൊവേന, സിഒഡി ഡയറക്ടർ ഫാ. തോമസ് പാറൻകുളങ്ങര കാർമികത്വം വഹിക്കും. തുടർന്ന് ലദീഞ്ഞ്, പ്രദക്ഷിണം, 7.30ന് സമാപന ആശീർവാദം, ആകാശ വിസ്മയം, സ്നേഹവിരുന്ന്, എന്നിവയോടെ സമാപിക്കും.

പീഡന കേസിലെ പ്രതി അറസ്റ്റിൽ

കോഴിക്കോട്: പീഡന കേസിലെ പ്രതി പിടിയിൽ. കുന്നമംഗലം ചാത്തൻകാവ് സ്വദേശി ഇയ്യപടിമ്മേൽവീട്ടിൽ അനിൽ കുമാറി(49) നെയാണ് കുന്നമംഗലം പോലീസ് പിടികൂടിയത്. മേയ് ആറിന് കുന്നമംഗലം സ്വദേശിനിയായ യുവതിയുടെ വീട്ടിലേക്ക് അതിക്രമിച്ചു കയറിയ പ്രതി യുവതിയെ ലൈംഗിക ഉദ്ദേശത്തോടു കൂടി ശരീരത്തിൽ കയറി പിടിക്കുകയും ലൈംഗിക അതിക്രമം നടത്തുകയുമായിരുന്നു. കുന്നമംഗലം പോലീസ് കേസ് രജിസ്റ്റർ ചെയ്ത് അന്വേഷണം നടത്തി വരവേ പ്രതിയെ കസ്റ്റഡിയിലെടുക്കുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മലയോര ഹൈവേ: ചെമ്പ്ര-28-ാം മൈൽ റോഡിന്‍റെ ടെൻഡർ നടപടി പൂർത്തിയായി

കൂരാച്ചുണ്ട്: കേരള സർക്കാരിന്‍റെ സ്വപ്ന പദ്ധതിയായ നിർദിഷ്ട മലയോര ഹൈവേയുടെ ചെമ്പ്ര മുതൽ ഇരുപത്തെട്ടാംമൈൽ വരെയുള്ള 9.45 കിലോമീറ്റർ റോഡിന്‍റെ കൂരാച്ചുണ്ട് അങ്ങാടിയിലെ കള്ളുഷാപ്പു മുതൽ മേലെ അങ്ങാടി ടെലിഫോൺ എക്സ്ചേഞ്ച് വരെയുള്ള 800 മീറ്റർ ദൂരം ഒഴിവാക്കിക്കൊണ്ടുള്ള പ്രവൃത്തിക്ക് 51.45 കോടി രൂപയുടെ ടെൻഡർ നടപടികൾ കഴിഞ്ഞ ദിവസം പൂർത്തിയായതായി കെ.എം സച്ചിൻ ദേവ് എംഎൽഎ അറിയിച്ചു. ഇതിന്‍റെ പ്രവൃത്തി ഊരാളുങ്കൽ ലേബർ കോൺട്രാക്ട് കോഓപറേറ്റീവ് സൊസൈറ്റിയാണ് ഏറ്റെടുത്തിട്ടുള്ളത്. മലയോര ഹൈവേയുടെ നിലവാരത്തിൽ 12 മീറ്റർ വീതിയിലാണ് റോഡ് വികസിപ്പിക്കുന്നത്. ഏഴ് മീറ്റർ ക്യാരിയേജ് വേയും ഇരു ഭാഗങ്ങളിലും ഷോൾഡറും ഉൾപ്പെടെ ഒമ്പത് മീറ്ററാണ് റോഡിന്‍റെ ടാറിംഗ്. ആവശ്യമുള്ള ഭാഗങ്ങളിൽ സംരക്ഷണ ഭിത്തികളും ഓവുചാൽ സംവിധാനങ്ങളും ഉൾപ്പെടുത്തിക്കൊണ്ടാണ് പ്രവൃത്തി നടത്തുന്നത്. അങ്ങാടികളിൽ ഇരുഭാഗത്തും നടപ്പാതകൾ, റോഡ് സേഫ്റ്റി സംവിധാനങ്ങൾ ഉൾപ്പെടെ പ്രവൃത്തിയിൽ ഉൾക്കൊള്ളിച്ചിട്ടുണ്ട്‌. റോഡിന്‍റെ തലയാട് പടിയ്ക്കൽവയൽ മുതൽ ഇരുപത്തെട്ടാംമൈൽ വരെയുള്ള 6.7 കിലോമീറ്റർ ദൂരത്തിലുള്ള പ്രവൃത്തി പുരോഗമിച്ചു വരികയാണ്. ഇതിന് 41.25 കോടി രൂപയാണ് അനുവദിച്ചിട്ടുള്ളത്. പെരുവണ്ണാമൂഴി മുതൽ ചെമ്പ്ര വരെയുള്ള 5.5 കിലോമീറ്റർ ദൂരത്തിന്‍റെ പ്രവൃത്തിയും നടന്നുവരികയാണ്. ഇതിന് 31.46 കോടി രൂപയാണ് അനുവദിച്ചിട്ടുള്ളത്. കൂരാച്ചുണ്ട് ടൗണിലെ 800 മീറ്റർ ദൂരത്തിന് ആവശ്യമായ വീതിയും കെട്ടിടങ്ങൾ പൊളിച്ചു നീക്കുന്നത് അടക്കമുള്ളതിന്‍റെ സർവേ നടപടികൾ കെആർഎഫ്ബി എൻജിനിയറിംഗ് വിഭാഗം ഉദ്യോഗസ്ഥർ പൂർത്തിയാക്കിയെങ്കിലും ഇതിന്‍റെ എസ്റ്റിമേറ്റ് നടപടികൾ പൂർത്തിയാക്കി സമർപ്പിക്കേണ്ടതുണ്ട്.

സര്‍ക്കാര്‍ വാര്‍ഷികദിനം കരിദിനമായി ആചരിക്കാന്‍ യുഡിഎഫ്

കോഴിക്കോട്: ധൂര്‍ത്ത് നടത്തി ജനവിരുദ്ധ നടപടിയുമായി മുന്നോട്ട് പോകുന്ന പിണറായി സര്‍ക്കാരിന്‍റെ വാര്‍ഷികദിനം കരിദിനമായി ആചരിക്കാന്‍ യുഡിഎഫ് ജില്ലാ നേതൃയോഗം തീരുമാനിച്ചു. 20ന് ജില്ലയിലെ എല്ലാ പഞ്ചായത്ത്, മുനിസിപ്പല്‍, കോര്‍പറേഷന്‍ പ്രദേശങ്ങളിലും യുഡിഎഫ് പ്രവര്‍ത്തകര്‍ കരിങ്കൊടിയേന്തി പ്രകടനവും പൊതുസമ്മേളനവും നടത്തും. 12ന് നിയോജകമണ്ഡലം യോഗങ്ങളും 15ന് പഞ്ചായത്ത്-മേഖലാ യോഗങ്ങളും നടക്കും. യുഡിഎഫ് കീഴ്ഘടങ്ങളുടെ പുനഃസംഘടന ഉടന്‍ പൂര്‍ത്തിയാക്കാനും യോഗം തീരുമാനിച്ചു. ജില്ലാ യുഡിഎഫ് ചെയര്‍മാന്‍ കെ. ബാലനാരായണന്‍ അധ്യക്ഷത വഹിച്ചു. ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ ഉദ്ഘാടനം ചെയ്തു. കണ്‍വീനര്‍ അഹമ്മദ് പുന്നക്കല്‍ റിപ്പോര്‍ട്ട് അവതരിപ്പിച്ചു. കെപിസിസി ജനറല്‍ സെക്രട്ടറി അഡ്വ. പി.എം. നിയാസ്, മുസ്‌ലിംലീഗ് ജില്ലാ ജനറല്‍ സെക്രട്ടറി ടി.ടി. ഇസ്മയില്‍, കെ.സി. അബു തുടങ്ങിയവര്‍ പ്രസംഗിച്ചു.

സാങ്കേതികവിദ്യയുടെ സാധ്യതകള്‍ തുറന്ന് സ്റ്റാര്‍ട്ടപ്പ് മിഷന്‍ സ്റ്റാള്‍

കോഴിക്കോട്: നിര്‍മിതബുദ്ധി, റോബോട്ടിക്‌സ്, ഓഗ്‌മെന്‍റഡ് റിയാലിറ്റി, വെര്‍ച്വല്‍ റിയാലിറ്റി, ഡ്രോണുകള്‍, ഐഒടി തുടങ്ങിയ സാങ്കേതികവിദ്യകള്‍ പൊതുജനങ്ങള്‍ക്ക് പരിചയപ്പെടുത്തി സ്റ്റാര്‍ട്ടപ്പ് മിഷന്‍റെ പവലിയന്‍. "എന്‍റെ കേരളം' പ്രദര്‍ശന- വിപണന മേളയില്‍ ഭാവിയുടെ നേര്‍ക്കാഴ്ചയാണ് ഈ സ്റ്റാളില്‍ ഒരുക്കിയിരിക്കുന്നത്. എആര്‍വിആര്‍ കണ്ണടകള്‍, ഗെയിമുകള്‍, ഐറിസ് എന്ന റോബോട്ട്, കൃഷി, ഉദ്യാനപാലനം എന്നിവ സാധ്യമാക്കുന്ന ഐഒടി സംവിധാനം, എഐ കാരിക്കേച്ചര്‍ തുടങ്ങി ഭാവിയില്‍ പൊതുജനം നേരിട്ടറിയാന്‍ പോകുന്ന സാങ്കേതികവിദ്യകള്‍ ഇവിടെയത്തിയാല്‍ അടുത്തറിയാം. കൂടാതെ സ്റ്റാര്‍ട്ടപ്പ് രജിസ്‌ട്രേഷന് ആവശ്യമായ സഹായങ്ങള്‍, കുട്ടികള്‍ക്ക് ഡ്രോണ്‍ പറത്താനുള്ള സൗകര്യം എന്നിവയും ഒരുക്കിയിട്ടുണ്ട്.

മാളിക്കടവ് ഇരട്ട അടിപ്പാത ഈ മാസം അവസാനത്തോടെ തുറക്കും

കോഴിക്കോട്: രാമനാട്ടുകര-വെങ്ങളം ദേശീയപാതയിൽ മാളിക്കടവ് ഇരട്ട അടിപ്പാത ഈ മാസം അവസാനത്തോടെ തുറക്കും.അടിപ്പാത തുറക്കാത്തതിനാല്‍ കുണ്ടൂപ്പറമ്പ്, മാളിക്കടവ്, മൊകവൂർ പ്രദേശത്തുകാരാണ് നഗരത്തിൽ എത്താൻ ദുരിതം അനുഭവിക്കുന്നത്. ദേശീയപാത ഈ ഭാഗത്തു നിർമാണം പൂർത്തിയായി ഗതാഗതത്തിനു തുറന്നതോടെ സർവീസ് റോഡിൽ നിന്നു ദേശീയപാതയിലേക്കു കയറാനുള്ള വഴി അധികൃതർ അടയ്ക്കുകയായിരുന്നു. മാളിക്കടവ് ജംഗ്ഷനോടുചേർന്ന് കുണ്ടൂപ്പറമ്പ്-മാളിക്കടവ് റോഡിനെയും ദേശീയപാത സർവീസ് റോഡിനെയും ബന്ധിപ്പിക്കുന്ന ഭാഗത്താണ് ഇരട്ട അടിപ്പാത.ഒരു മാസം മുന്പാണ് ഇതിന്‍റെ നിർമാണം പൂർത്തിയാക്കി മുകളിൽ ദേശീയപാത തുറന്നത്. അടിപ്പാതയിലൂടെ ഗതാഗത സൗകര്യം പൂർത്തീകരിച്ചില്ല. അടിപ്പാതയിൽ നിലവിലുള്ള റോഡിനു സമാന്തരമായി ടാറിംഗ് നടത്തി ഗതാഗതത്തിനു തുറന്നാൽ മാളിക്കടവ്, കക്കോടി, മോരിക്കര, മക്കട ഭാഗത്തുള്ളവർക്ക് പെട്ടെന്നു കുണ്ടൂപ്പറമ്പിലും പുതിയങ്ങാടി, വെസ്റ്റ്ഹിൽ ഭാഗത്തേക്കും നഗരത്തിലേക്കും യാത്ര ചെയ്യാം.

ഹംസ തയ്യില്‍ പുരസ്‌കാരം ജഗത്മയന്‍ ചന്ദ്രപുരിക്ക്

കോഴിക്കോട്: മികച്ച സംഘാടകനും നെഹ്റു യുവകേന്ദ്ര സോണല്‍ ഡയറക്ടറും ആയിരുന്ന ഹംസ തയ്യിലിന്‍റെ പേരിലുള്ള പ്രഥമ സംസ്ഥാന പുരസ്‌കാരത്തിന് ജഗത്മയന്‍ ചന്ദ്രപുരി അര്‍ഹനായി. പതിനായിരത്തൊന്ന് രൂപയും ഫലകവും പ്രശസ്തി പത്രവും അടങ്ങുന്നതാണ് പുരസ്‌കാരം. മികച്ച സംഘാടനത്തിനും കലാ-സാംസ്‌കാരിക രംഗത്തെ പ്രവര്‍ത്തന മികവിനുമാണ് പുരസ്‌കാരം. ആലങ്കോട് ലീലാകൃഷ്ണന്‍, മുന്‍ എംപി യും ഗാന്ധിയനുമായ സി. ഹരിദാസ്, അഡ്വ. ജിസന്‍ പി.ജോസ് എന്നിവരടങ്ങുന്ന ജഡ്ജിംഗ് കമ്മിറ്റിയാണ് പുരസ്‌കാര ജേതാവിനെ തെരെഞ്ഞെടുത്തത്. 18 ന് എടപ്പാളില്‍ പ്രിയദര്‍ശിനി ഗ്രന്ഥശാലയുടെ വാര്‍ഷികാഘോഷത്തില്‍ നടക്കുന്ന ചടങ്ങില്‍ പുരസ്‌കാരം സമ്മാനിക്കും.

കോൺക്രീറ്റ് പ്രവൃത്തിക്കിടെ കൂറ്റൻ മരം വീണു; നാല് തൊഴിലാളികൾക്ക് പരിക്ക്

മുക്കം: മുക്കം കടവ് - കുമാരനെല്ലൂർ റോഡിലേക്ക് കൂറ്റൻ മരം കടപുഴകി വീണു. ഇന്നലെ ഉച്ചയ്ക്ക് മൂന്നോടെയാണ് സംഭവം. മുളങ്കാടിന് സമീപം റോഡിൽ കോൺക്രീറ്റ് പ്രവൃത്തി നടന്നു കൊണ്ടിരിക്കെ തൊഴിലാളികൾക്കിടയിലേക്കാണ് മരം വീണത്. ജോലി സ്ഥലത്തുണ്ടായിരുന്ന ബംഗാൾ സ്വദേശികളായ തൊഴിലാളികൾ മുഹമ്മദ് നൂറുൽ ആലം (42), ബാബു (27), ജമാൽ (20), ലുഖ്മാൻ എന്നിവർ നിസാര പരിക്കുകളോടെ രക്ഷപ്പെട്ടു. എച്ച്ടി വൈദ്യുത ലൈനും തകരാറിലായി. ഭിന്നശേഷിക്കാരനായ യൂസഫ് നടത്തുന്ന പെട്ടിക്കടക്കു തൊട്ടടുത്തായാണ് മരം പതിച്ചത്. മുക്കത്തുനിന്നും സ്റ്റേഷൻ ഓഫീസർ അബ്ദുൽ ഗഫൂറിന്‍റെ നേതൃത്വ ത്തിൽ എത്തിയ അഗ്നിരക്ഷാ സേനാംഗങ്ങൾ ചെയിൻസോ ഉപയോഗിച്ച് മരംമുറിച്ച് ഗതാഗതം പുനഃസ്ഥാപിച്ചു. അസി. സ്റ്റേഷൻ ഓഫീസർ ജോയ് ഏബ്രഹാം, ഗ്രേഡ് അസി. സ്റ്റേഷൻ ഓഫീസർ അബ്ദുൽ ഷുക്കൂർ, ഫയർ ഓഫീസർമാരായ സനീഷ് പി. ചെറിയാൻ, വൈ.പി. ഷറഫുദ്ദീൻ,സി. വിനോദ്, എം.കെ. അജിൻ, ഹോം ഗാർഡായ ചാക്കോ ജോസഫ് തുടങ്ങിയവരും കെഎസ്ഇബി ഉദ്യോഗസ്ഥരും നാട്ടുകാരും രക്ഷാപ്രവർത്തനത്തിൽ പങ്കാളികളായി.

എസ്എസ്എൽസി; ജില്ലയിൽ 99.67 ശതമാനം വിജയം

കോഴിക്കോട്: എസ്എസ്എൽസി പരീക്ഷയിൽ ജില്ലയിൽ 99.67 ശതമാനം വിജയം. സംസ്ഥാനത്ത് നാലാം സ്ഥാനവുമായാണ് മിന്നുംവിജയം നേടിയത്. പരീക്ഷ എഴുതിയ 43,841 വിദ്യാർഥികളിൽ 43,697 പേർ ഉപരിപഠനത്തിന് യോഗ്യത നേടി. 22,167 ആൺകുട്ടികളിൽ 22,059 പേർ ഉപരിപഠനത്തിന് അർഹരായപ്പോൾ പെൺകുട്ടികളിൽ പരീക്ഷ എഴുതിയ 21,674 ൽ 21,638 പേരും വിജയിച്ചു. 7,410 വിദ്യാർഥികളാണ് എല്ലാവിഷയത്തിലും എപ്ലസ് നേടിയത്. ഇതിൽ 2,439 ആൺകുട്ടികളും 4,971 പെൺകുട്ടികളുമാണ്. 33 സർക്കാർ സ്‌കൂളുകളും 38 എയ്ഡഡ് സ്‌കൂളുകളും 20 അൺഎയ്ഡഡ് സ്‌കൂളുകളും നൂറുമേനി വിജയം നേടി. വടകര വിദ്യാഭ്യാസ ജില്ലയിലാണ് കൂടുതൽ വിജയശതമാനം -99.86. കോഴിക്കോട് 99.27 ശതമാനവും താമരശേരി വിദ്യാഭ്യാസ ജില്ലയിൽ 99.8 ശതമാനവുമാണ് വിജയം. ജില്ലയുടെ വിജയശതമാനത്തിൽ ഇത്തവണ നേരിയ കുറവുണ്ടായിട്ടുണ്ട്. കഴിഞ്ഞ വർഷ വിജയശതമാനം 99.82 ആയിരുന്നു. എല്ലാവിഷയത്തിലും എപ്ലസ് നേടിയവരിൽ പെൺകുട്ടികളാണ് ഇത്തവണയും മുന്നിൽ. എല്ലാവിഷയത്തിലും എപ്ലസ് നേടിയവരുടെ എണ്ണത്തിലും കഴിഞ്ഞവർഷത്തേതിനേക്കാൾ കുറവുണ്ടായി. കഴിഞ്ഞ വർഷം 8,563 പേർക്കായിരുന്നു എല്ലാവിഷയത്തിലും എപ്ലസ് ലഭിച്ചത്. വടകര വിദ്യാഭ്യാസ ഉപജില്ലയിലാണ് ഏറ്റവും കൂടുതൽപേർ എപ്ലസ് കരസ്ഥമാക്കിയത്. 2,863 വിദ്യാർഥികൾ എല്ലാ വിഷയങ്ങളിലും എപ്ലസ് നേടി. ഇതിൽ 987 ആൺകുട്ടികളും 1,876 പെൺകുട്ടികളുമാണ്. താമരശേരി വിദ്യാഭ്യാസ ഉപജില്ലയിൽ 2,727 പേരിൽ 944 ആൺകുട്ടികൾക്കും 1,783 പെൺകുട്ടികൾക്കുമാണ് എല്ലാവിഷയത്തിലും എപ്ലസ് ലഭിച്ചത്. കോഴിക്കോട് ഉപജില്ലയിൽ 1,820 വിദ്യാർഥികളിൽ 508 ആൺകുട്ടികളും 1,312 പെൺകുട്ടികളുമാണ്. നൂറുമേനിയുമായി സർക്കാർ സ്‌കൂളുകൾ കോഴിക്കോട്: ജില്ലയിൽ നൂറുമേനി നേട്ടവുമായി സർക്കാർ സ്‌കൂളുകൾ. 51 സ്‌കൂളുകളിലാണ് പരീക്ഷ എഴുതിയ മുഴുവൻ വിദ്യാർഥികളും വിജയിച്ചത്. മടപ്പള്ളി ജിവിഎച്ച്എസ്എസിൽ നിന്നാണ് ഏറ്റവും കൂടുതൽ വിദ്യാർഥികൾ വിജയിച്ചത്. 542 പേരാണ് പരീക്ഷ എഴുതിയത്. പറയഞ്ചേരി ഗവ. ഗേൾസ് എച്ച്എസിൽ നിന്നാണ് ഏറ്റവും കുറവ് കുട്ടികൾ വിജയിച്ചത്. ആറ് പേരാണ് ഇവിടെ പരീക്ഷ എഴുതിയത്. വിജയം നേടിയ സ്‌കൂളുകൾ: (പരീക്ഷ എഴുതിയ കുട്ടികളുടെ എണ്ണം ബ്രാക്കറ്റിൽ) : സംസ്‌കൃത എച്ച്എസ്എസ് വടകര (58), ഗവ. എച്ച്എസ്എസ് പുത്തൂർ (118), ജിഎച്ച്എസ്എസ് ചോറോട് (108), ജെഎൻഎം ഗവ. എച്ച്എസ്എസ് പുതുപ്പണം (254), ജിവിഎച്ച്എസ്എസ് മടപ്പള്ളി (542), ജിഎച്ച്എസ്എസ് അഴിയൂർ (68), ജിഎച്ച്എസ് ആവളക്കുട്ടോത്ത് (101), കെകെഎം ജിവിഎച്ച്എസ്എസ് ഓർക്കാട്ടേരി (216), ജിഎച്ച്എസ്എസ് കല്ലാച്ചി (143), ജിആർഎഫ്ടിഎച്ച്എസ് കൊയിലാണ്ടി (20), ജിവിഎച്ച്എസ്എസ് കൊയിലാണ്ടി (535), ജിഎച്ച്എസ്എസ് പന്തലായനി കൊയിലാണ്ടി (394), ജിഎംവിഎച്ച്എസ്എസ് കൊയിലാണ്ടി (110), മണിയൂർ പഞ്ചായത്ത് എച്ച്എസ്എസ് (228), ജിഎച്ച്എസ്എസ് വെള്ളിയോട് (113), ഗവ. ഹൈസ്‌കൂൾ വൻമുഖം (72), ഗവ. ഹൈസ്‌കൂൾ കാവിലുംപാറ (94), ഗവ. ഹൈസ്‌കൂൾ ചെറുവണ്ണൂർ (72), ഗവ. ഗണപത് ബിഎച്ച്എസ് ചാലപ്പുറം (235), ജിജിഎച്ച്എസ്എസ്. കല്ലായ് (13), ജിവിഎച്ച്എസ്എസ് ഫോർ ഗേൾസ് നടക്കാവ് (433), ജിഎച്ച്എസ്എസ് കാരപറമ്പ് (66), ഗവ. വിഎച്ച്എസ്എസ് കുറ്റിച്ചിറ (32), ഗവ. ഗേൾസ് എച്ച്എസ് ഫോർ ബോയ്‌സ് പറയഞ്ചേരി (7), ഗവ. ഗേൾസ് എച്ച്എസ് ഫോർ ഗേൾസ് പറയഞ്ചേരി (6), ജിആർഎഫ്ടിഎച്ച്എസ് ആൻഡ് വിഎച്ച്എസ്എസ് ബേപ്പൂർ (13), ജിഎഫ്എച്ച്എസ്എസ് പുതിയാപ്പ (14), ജിഎച്ച്എസ്എസ് മെഡിക്കൽ കോളജ് കാന്പസ് (508), ജിഎച്ച്എസ്എസ് പെരിങ്ങൊളം (78), ജിഎച്ച്എസ് കക്കോടി (38), ജിവിഎച്ച്എസ്എസ്. ചെറുവണ്ണൂർ (202), ജിഎച്ച്എസ് കുണ്ടുപറമ്പ് (9)ഗവ. ഹൈസ്‌കൂൾ നല്ലളം (241). നൂറുശതമാനം വിജയം നേടിയ എയ്ഡഡ് സ്‌കൂളുകൾ (പരീക്ഷ എഴുതിയ വിദ്യാർഥികളുടെ എണ്ണം ബ്രാക്കറ്റിൽ) സെന്‍റ് ആന്‍റണീസ് ജിഎച്ച്എസ് വടകര (217), എംയുഎംവിഎച്ചഎസ്എസ് വടകര(297), കടത്തനാട് രാജാസ് എച്ച്എസ് പുറമേരി(190), ടിഐഎംജിഎച്ച്എസ്എസ് നാദാപുരം(297), എംഐഎംഎച്ച്എസ്എസ് പാറോട് (428), കെപിഎംഎസ്എംഎച്ച്എസ് അരിക്കുളം(174), സെന്‍റ് ജോർജ് എച്ച്എസ് വിലങ്ങാട് (84), എസ്‌വിഎജിഎച്ച്എസ് നടുവത്തൂർ(66), പൊയിൽകാവ് എച്ച്എസ്(285), എസ്എൻഎച്ച്എസ്എസ് തിരുവള്ളൂർ(315), റഹ്മാനിയ എച്ച്എസ് ആയഞ്ചേരി(142), കെപിഇഎസ് ഹൈസ്‌കൂൾ കായക്കൊടി(160), സാൻസ്‌ക്രിറ്റ് എച്ച്എസ് വട്ടോളി(366), ആർഎൻഎംഎച്ച്എസ് നരിപ്പറ്റ(216), സെന്‍റ് മേരീസ് എച്ച്എസ് മരുതോങ്കര(101), ഹോളി ഫാമിലി എച്ച്എസ് പടത്തുകടവ്(55), പി.ടി ചാക്കോ മെമ്മോറിയൽ എച്ച്എസ് കുണ്ടൂത്തോട് (78), വടക്കുംമ്പാട് എച്ച്എസ് (323), സികെജി മെമ്മോറിയൽ എച്ച്എസ് ചിങ്ങപുരം(325),വേളം എച്ച്എസ് ചേരാപുരം(216), ബിടിഎംഎച്ച്എസ് തുറയൂർ(160), എജെ ജോൺ മെമ്മോറിയൽ എച്ച്എസ്( 162), കെഎംഎച്ച്എസ് കോട്ടക്കൽ(182), ക്രസന്‍റ് എച്ച്എസ് വാണിമേൽ (478), പന്തീരാങ്കാവ് എച്ച്എസ്(41), പ്രൊവിഡൻസ് ഗേൾസ് എച്ച്എസ്എസ് (293), സെന്‍റ് വിൻസെന്‍റ് കോളനി ജിഎച്ച്എസ് കോഴിക്കോട് (212), സെന്‍റ് മൈക്കിൾ എച്ച്എസ്എസ് വെസ്റ്റ്ഹിൽ(274), ബിഇഎംജിഎച്ച്എസ്എസ് കോഴിക്കോട്(392), സെന്‍റ് ജോസഫ് ബോയ്‌സ് എച്ച്എസ്എസ് കോഴിക്കോട്(301), സെന്‍റ് ജോസഫ് ആംഗ്ലോ ഇന്ത്യൻ ഗേൾസ്(184), സാവിയോ എച്ച്എസ്എസ് ദേവഗിരി(250), സിഎംസി ബോയ്‌സ് എച്ച്എസ് എലത്തൂർ(99),സിഎംസി ഗേൾസ് എച്ച്എസ് എലത്തൂർ(116), എകെകെആർ ബോയ്‌സ് എച്ച്എസ് ചേളന്നൂർ(56), എകെകെആർ ഗേൾസ് എച്ച്എസ്എസ് ചേളന്നൂർ(86), സേവാമന്ദിർപോസ്റ്റ് ബേസിക് സ്‌കൂൾ രാമനാട്ടുകര(479), കാലിക്കട്ട് ഗേൾസ് എച്ച്എസ് കുണ്ടുങ്ങൽ(352). അൺഎയ്ഡഡ് സ്‌കൂളുകൾ ശ്രീനാരായണ എച്ച്എസ്എസ് വടകര (81), ഇലാഹിയ എച്ച്എസ്എസ് കാപ്പാട് (69), ഇസ്‌ലാമിക് അക്കാദമി ഇഎച്ച്എസ് കോട്ടക്കൽ (18), ഐസിഎസ് സെക്കൻഡറി സ്‌കൂൾ കൊയിലാണ്ടി (97), എൻഎസ്എസ്എച്ച്എസ്എസ് മീഞ്ചന്ത (9), ഗുജറാത്തി വിദ്യാലയ എച്ച്എസ്എസ് (13), കാലിക്കട്ട് ഇസ്‌ലാമിക് റസിഡൻഷ്യൽ സ്‌കൂൾ എച്ച്എസ് മാത്തറ (21), ഡോ. അയ്യത്താൻ ഗോപാലൻ മെമ്മോറിയൽ ഇഎംഎച്ച്എസ് കോഴിക്കോട് (33), ചിൻമയ ഇഎംഎച്ച്എസ് (81), സിൽവർ ഹിൽസ് എച്ച്എച്ച്എസ്, കോഴിക്കോട് (133), പ്രസന്‍റേഷൻ എച്ച്എച്ച്എസ് (161), വെനേറിനി ഇഎംഎച്ച്എസ് കരിങ്കല്ലായ് (106), ജെഡിടി ഇസ്‌ലാം ഇഖ്‌റ ഇംഗ്ലീഷ് മീഡിയം സ്‌കൂൾ (49), ക്രസന്‍റ് പബ്ലിക് സ്‌കൂൾ മാവൂർ (46), ഖാദിസിയ ഇംഗ്ലീഷ് സ്‌കൂൾ (36), സരസ്വതി വിദ്യാമന്ദിരം ഇഎംഎച്ച്എസ് കോട്ടൂളി (40), നിവേദിത വിദ്യാ പീഠം ഇംഗ്ലീഷ് മീഡിയം സ്‌കൂൾ രാമനാട്ടുകര (21), സരസ്വതി വിദ്യാ നികേതൻ ഇംഗ്ലീഷ് മീഡിയം ഹൈസ്‌കൂൾ പന്തീരങ്കാവ് (28), മർക്കസ് ഇന്‍റർനാഷണൽ സ്‌കൂൾ (84), ഒലീവ് ഇംഗ്ലീഷ് മീഡിയം ഹൈസ്‌കൂൾ (88). മലയോര മേഖലയിലെ സ്‌കൂളുകള്‍ക്ക് മിന്നും വിജയം എസ്എസ്എൽസി പരീക്ഷയിൽ മലയോര മേഖലയിലെ സ്കൂളുകൾ ഇത്തവണയും നൂറിൽ നൂറ് ശതമാനം വിജയം കൈവരിച്ചു. കല്ലാനോട് സെന്‍റ് മേരീസ് ഹൈസ്കൂൾ തുടർച്ചയായി 21-ാം തവണയാണ് നൂറിൽ നൂറ് ശതമാനം വിജയം കൈവരിച്ചത്. ആകെ 107 വിദ്യാര്‍ഥികള്‍ പരീക്ഷ എഴുതിയവരിൽ 24 വിദ്യാര്‍ഥികള്‍ എല്ലാ വിഷയങ്ങൾക്കും എ പ്ലസ് കരസ്ഥമാക്കി. കുളത്തുവയൽ സെന്‍റ് ജോർജ് ഹൈസ്കൂൾ തുടർച്ചയായി ഏഴാം തവണയും നൂറ് ശതമാനം വിജയം കൈവരിച്ചു. ആകെ 152 വിദ്യാര്‍ഥികള്‍ പരീക്ഷ എഴുതിയവരിൽ 29 വിദ്യാര്‍ഥികള്‍ എല്ലാ വിഷയങ്ങൾക്കും എ പ്ലസ് കരസ്ഥമാക്കി. കൂരാച്ചുണ്ട് സെന്‍റ് തോമസ് ഹൈസ്കൂളും ഇത്തവണയും നൂറിൽ നൂറ് ശതമാനം വിജയം കൈവരിച്ചു. ആകെ 154 വിദ്യാര്‍ഥികള്‍ പരീക്ഷയെഴുതിയവരിൽ 44 വിദ്യാർഥികൾ എല്ലാ വിഷയങ്ങൾക്കും എ പ്ലസ് കരസ്ഥമാക്കിക്കൊണ്ടാണ് മലയോര മേഖലയ്ക്ക് അഭിമാനമായി തീർന്നത്. പുല്ലൂരാംപാറ സെന്‍റ് ജോസഫ് ഹൈസ്കൂളിൽ 183 കുട്ടികൾ എഴുതിയതിൽ മുഴുവൻ കുട്ടികളും ഉപരിപഠനത്തിന് അർഹത നേടി. 47 കുട്ടികൾ എല്ലാ വിഷയങ്ങൾക്കും എ പ്ലസ് കരസ്ഥമാക്കി.കൂമ്പാറ ഫാത്തിമബി മെമ്മോറിയൽ ഹയർസെക്കൻഡറി സ്കൂളിൽ 142 കുട്ടികളിൽ 14 കുട്ടികൾക്കും കക്കാടംപൊയിൽ സെന്‍റ് മേരിസ് ഹൈസ്കൂളിൽ 27 കുട്ടികളിൽ രണ്ട് കുട്ടികൾക്കും മുക്കം ഹൈസ്കൂളിൽ 71 കുട്ടികളിൽ രണ്ട് കുട്ടികൾക്കും ആനയാംകുന്ന് ഹൈസ്കൂളിൽ 143 കുട്ടികളിൽ 22 കുട്ടികൾക്കും മുഴുവൻ വിഷയങ്ങൾക്ക് എപ്ലസ് ലഭിച്ചു. താമരശേരി കോർപറേറ്റ് എഡ്യൂക്കേഷണൽ ഏജൻസിയിലെ സ്കൂളുകൾക്ക് നൂറ് ശതമാനം വിജയം താമരശേരി: താമരശേരി രൂപതയുടെ കീഴിൽ പ്രവർത്തിക്കുന്ന കോർപറേറ്റ് എഡ്യുക്കേഷണൽ ഏജൻസിയിലെ സ്കൂളുകൾ വിജയത്തിളക്കത്തിൽ. ആകെയുള്ള 20 ഹൈസ്കൂളുകളിൽ 20നും നൂറു ശതമാനം വിജയം നേടാനായി. 2429 പേരാണ് പരീക്ഷ എഴുതിയത്. മുഴുവൻ പേരും വിജയികളായി. 471 പേർ എല്ലാ വിഷയത്തിനും എ പ്ലസ് നേടി. താമരശേരി ബിഷപ് മാർ റെമീജിയോസ് ഇഞ്ചനാനിയിൽ വിജയികളെയും പ്രോത്സാഹനങ്ങളുമായി പിന്നിൽ പ്രവർത്തിച്ച അധ്യാപകരെയും അനധ്യാപകരെയും പിടിഎയെയും അഭിനന്ദിച്ചു. അധ്യാപകരുമായി ചേർന്ന് നന്നായി പ്രയത്നിച്ച വിദ്യാര്‍ഥികളുടെ സ്ഥിരോത്സാഹവും അധ്യാപകരുടെയും പിടിഎയുടെയും ജാഗ്രതയുമാണ് തിളക്കമാർന്ന വിജയത്തിന്നു പിന്നിലെന്ന് കോർപറേറ്റ് മാനേജർ ഫാ. ജോസഫ് വർഗീസ് പറഞ്ഞു. ഹോളിഫാമിലി എച്ച്എസ് കട്ടിപ്പാറ, സെന്‍റ് ആന്‍റണീസ് എച്ച്എസ് കണ്ണോത്ത്, സെന്‍റ് മേരീസ് എച്ച്എസ് കല്ലാനോട്, സെന്‍റ് ജോസഫ് എച്ച്എസ് ചെമ്പനോട, സെന്‍റ് മേരീസ് എച്ച്എസ് കക്കാടംപൊയിൽ, സെന്‍റ് ജോസഫ് എച്ച്എസ് കോടഞ്ചേരി, സെന്‍റ് സെബാസ്റ്റ്യൻസ് എച്ച്എസ് കൂടരഞ്ഞി, സെന്‍റ് തോമസ് എച്ച്എസ് കൂരാച്ചുണ്ട്, സെന്‍റ് ജോർജസ് എച്ച്എസ്എസ് കുളത്തുവയൽ, പിടിസിഎംഎച്ച്എസ് കുണ്ടുതോട്, മേരി ഗിരി എച്ച് എസ് മരംഞ്ചാട്ടി, സെന്‍റ് മേരീസ് എച്ച്എസ് മരുതോംകര, സെന്‍റ് ജോൺസ് എച്ച്എസ് നെല്ലിപ്പൊയിൽ, ഹോളി ഫാമിലി എച്ച്എസ് പടത്തുകടവ്‌, സെന്‍റ് സെബാസ്റ്റ്യൻസ് എച്ച്എസ് പുന്നയ്ക്കൽ, സെന്‍റ് ജോസഫ്സ് എച്ച്എസ് പുല്ലൂരാംപാറ, സേക്രട്ട് ഹാർട്ട് എച്ച്എസ് തിരുവമ്പാടി, ഹോളി ഫാമിലി എച്ച് എസ് വേനപ്പാറ, സെന്‍റ് ജോർജസ് എച്ച്എസ് വിലങ്ങാട്, സെന്‍റ് തോമസ് എച്ച്എസ് തോട്ടുമുക്കം എന്നീ സ്കൂളുകളാണ് നൂറുശതമാനത്തോടെ മികച്ച നേട്ടം കൈവരിച്ചത്.

കർശന നിയന്ത്രണങ്ങളുമായി കോടഞ്ചേരി പഞ്ചായത്ത്

കോടഞ്ചേരി: കോടഞ്ചേരി പഞ്ചായത്തിന്‍റെ പരിധിയിലുള്ള പതങ്കയം ടൂറിസ്റ്റ് ഡെസ്റ്റിനേഷനിൽ തുടർച്ചയായി ഉണ്ടാകുന്ന അപകട മരണങ്ങൾ ഇല്ലാതാക്കുവാനും സുരക്ഷ ഉറപ്പുവരുത്താനും കർശനം നിയന്ത്രണങ്ങൾ ഏർപ്പെടുത്തുവാൻ പഞ്ചായത്തിന്‍റെ നേതൃത്വത്തിൽ ചേർന്ന ഉന്നതതല യോഗത്തിൽ തീരുമാനമായി. പതങ്കയം സംരക്ഷണ സമിതിയിൽ പ്രാദേശിക കുടുംബങ്ങളെ ഉൾപ്പെടുത്തി റൊട്ടേഷൻ വ്യവസ്ഥയിൽ വോളണ്ടറിമാരെ നിയമിക്കുവാനും അവർക്ക് ആവശ്യമുള്ള ലൈഫ് ജാക്കറ്റ് യൂണിഫോം, ഐഡന്‍റിറ്റി കാർഡ് ഉൾപ്പെടെയുള്ളവ നൽകി പോലീസ്, ഫയർഫോഴ്സ് ഉദ്യോഗസ്ഥരുടെ നേതൃത്വത്തിൽ കൃത്യമായി പരിശീലനം നൽകുവാൻ യോഗത്തിൽ തീരുമാനമായി. പതങ്കയം ടൂറിസ്റ്റ് ഡെസ്റ്റിനേഷനിൽ എത്തുന്ന സന്ദർശകരിൽ നിന്നും 10 രൂപ നിരക്കിൽ ഫീസിടാക്കുന്നതിനും സന്ദർശക സമയം ഒന്പത് മുതൽ 5 വരെയാക്കി നിജപ്പെടുത്തുവാനും തീരുമാനിച്ചു. പഞ്ചായത്ത്‌ പ്രസിഡന്‍റ് അലക്സ്‌ തോമസ് ചെമ്പകശേരി അധ്യക്ഷത വഹിച്ചു. യോഗത്തിൽ പഞ്ചായത്ത് വൈസ് പ്രസിഡന്‍റ് ജമീലാ ആസീസ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സൂസൻ വർഗീസ്, പഞ്ചായത്ത് മെമ്പർമാരായ ഏലിയാമ്മ സെബാസ്റ്റ്യൻ, ബിന്ദു ജോർജ്, റോസമ്മ തോമസ്, ചിന്നാ അശോകൻ, കോടഞ്ചേരി പോലീസ് സ്റ്റേഷൻ ഇൻസ്പെക്ടർ കെ.ഒ. പ്രദീപ്, സെക്രട്ടറി കെ. സീനത്ത്, നെല്ലിപ്പൊയിൽ വില്ലേജ് ഓഫീസർ എൻ.പി. മിനി, ജിനേഷ് കുര്യൻ, ബെനിറ്റോ ചാക്കോ, തുടങ്ങിയവർ പ്രസംഗിച്ചു.

മദ്യം പിടികൂടി

ചക്കിട്ടപാറ: ചക്കിട്ടപാറ ടൗണിൽ നരിനട റോഡിലെ കെട്ടിടത്തിലെ മുറിയിൽ നിന്നു പെരുവണ്ണാമൂഴി പോലീസ് മദ്യം പിടികൂടി. മദ്യം കഴിച്ചെന്നു സംശയിക്കുന്ന പരിസരത്തുണ്ടായിരുന്ന ചിലരുടെ പേരിൽ കേസ് എടുക്കുമെന്ന് പരിശോധനക്ക് നേതൃത്വം നൽകിയ സബ് ഇൻസ്പെക്ടർ പി.എം. അമ്മദ് പറഞ്ഞു. മദ്യം പിടികൂടിയ മുറിയിൽ ധാരാളം ഒഴിഞ്ഞ മദ്യക്കുപ്പികൾ കണ്ടെത്തിയിട്ടുണ്ട്.രഹസ്യവിവരത്തിന്‍റെ അടിസ്ഥാനത്തിലാണ് പോലീസ് മിന്നൽ പരിശോധനക്കെത്തിയത്. ഇതിനിടെ ചിലർ പോലീസ് നടപടിക്കെതിരേ വാക്കേറ്റം നടത്തുകയുമുണ്ടായി.

കുളമ്പുരോഗ പ്രതിരോധ കുത്തിവെപ്പ്

മുക്കം: സംസ്ഥാന സർക്കാർ, മൃഗസംരക്ഷണ വകുപ്പ് വഴി നടപ്പാക്കുന്ന ദേശീയ ജന്തുരോഗ നിയന്ത്രണ പദ്ധതിയുടെ ഭാഗമായി കുളമ്പുരോഗ പ്രതിരോധ കുത്തിവെപ്പ് ആറാം ഘട്ടത്തിന് കൊടിയത്തൂർ പഞ്ചായത്തിൽ തുടക്കമായി. പഞ്ചായത്ത്തല ഉദ്ഘാടനം പ്രസിഡന്‍റ് ദിവ്യ ഷിബു നിർവഹിച്ചു. വികസന സ്റ്റാൻഡിംഗ് കമ്മിറ്റി ചെയർപേഴ്സൻ ആയിഷ ചേലപ്പുറം, തോട്ടുമുക്കം വെറ്ററിനറി സർജൻ ഡോ. കെ. ഇന്ദു, മുണ്ടോട്ടുകുളങ്ങര വെറ്ററിനറി സർജൻ ഡോ. കെ. സുഭാഷ് രാജ്, ലൈവ്സ്റ്റോക് ഇൻസ്‌പെക്ടർമാരായ കെ.എസ്. സുനിമോൾ, വി.എ. ബാബുമോൻ തുടങ്ങിയവർ ചടങ്ങിൽ പങ്കെടുത്തു.

ആരോഗ്യ സേനാംഗങ്ങൾക്ക് പരിശീലനം

കൂരാച്ചുണ്ട്: മഴക്കാല രോഗ പ്രതിരോധ പ്രവർത്തനങ്ങളുടെ ഭാഗമായി കൂരാച്ചുണ്ട് പഞ്ചായത്തിലെ ആരോഗ്യ സേനാംഗങ്ങൾക്കായി പരിശീലനം നൽകി. പഞ്ചായത്ത് പ്രസിഡന്‍റ് ഒ.കെ. അമ്മദ് ഉദ്ഘാടനം ചെയ്തു. വൈസ് പ്രസിഡന്‍റ് വിൻസി തോമസ് അധ്യക്ഷത വഹിച്ചു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ സിമിലി ബിജു, പഞ്ചായത്തംഗം ആൻസമ്മ ജോസഫ്, സിഡിഎസ് ചെയർപേഴ്സൺ കാർത്തിക വിജയൻ, പഞ്ചായത്ത് സെക്രട്ടറി ഇ. ഷാനവാസ്‌ എന്നിവർ പ്രസംഗിച്ചു. ഹെൽത്ത് ഇൻസ്‌പെക്ടർ എ.സി. അരവിന്ദൻ ആരോഗ്യ ബോധവത്കരണ ക്ലാസ് നയിച്ചു.

സിപിഎം ഭരിക്കുന്ന തദ്ദേശ സ്ഥാപനങ്ങള്‍ അഴിമതിയുടെ കേന്ദ്രങ്ങള്‍: എന്‍. സുബ്രഹ്മണ്യന്‍

പേരാമ്പ്ര: സിപിഎം ഭരിക്കുന്ന തദ്ദേശ സ്ഥാപനങ്ങള്‍ അഴിമതിയുടെ കേന്ദ്രങ്ങളായി മാറിയെന്ന് കെപിസിസി രാഷ്ട്രീയ കാര്യ സമിതി അംഗം എന്‍. സുബ്രഹ്മണ്യന്‍. സിപിഎമ്മിന്‍റെ പ്രാദേശിക നേതാക്കള്‍ പണമുണ്ടാക്കാന്‍ തദ്ദേശ സ്ഥാപനങ്ങളെ ഉപയോഗിക്കുകയാണെന്നും അദ്ദേഹം പറഞ്ഞു. പേരാമ്പ്ര പഞ്ചായത്തിലെ ഭരണ സ്തംഭനത്തിനും ധൂര്‍ത്തിനുമെതിരേ പഞ്ചായത്ത് യുഡിഎഫ് കമ്മിറ്റി സംഘടിപ്പിച്ച വാഹന പ്രചാരണ ജാഥ പേരാമ്പ്ര ഹൈസ്‌കൂളിന് സമീപം ഉദ്ഘാടനം ചെയ്യുകയായിരുന്നു അദ്ദേഹം. ഫണ്ട് വെട്ടിക്കുറച്ച് തദ്ദേശ സ്ഥാപനങ്ങളെ സംസ്ഥാന സര്‍ക്കാര്‍ ഞെക്കിക്കൊല്ലുകയാണ്. ധൂര്‍ത്തും അഴിമതിയും മറച്ചുവയ്ക്കാന്‍ പേരാമ്പ്ര പഞ്ചായത്ത് ഭരണ നേതൃത്വം ഗിമ്മിക്ക് കാണിക്കുകയാണെന്നും ഇത് ജനം തിരിച്ചറിയുമെന്നും അദ്ദേഹം പറഞ്ഞു. കക്കിനകണ്ടി മൊയ്തു അധ്യക്ഷത വഹിച്ചു. ജാഥാ ക്യാപ്റ്റന്‍ കെ.പി. റസാഖ്, പൈലറ്റ് കെ.സി. രവീന്ദ്രന്‍, സത്യന്‍ കടിയങ്ങാട്, സി.പി.എ അസീസ്, രാജന്‍ മരുതേരി, പി.കെ രാഗേഷ്, പി.എസ് സുനില്‍കുമാര്‍, വി.ടി സൂരജ്, അര്‍ജുന്‍ കറ്റയാട്ട്, പുതുക്കുടി അബ്ദുറഹിമാൻ എന്നിവർ പ്രസംഗിച്ചു.

തിരുവമ്പാടി ഹൈസ്കൂൾ മൈതാനം; പ്രശ്ന പരിഹാരത്തിന് സർവകക്ഷി യോഗത്തിൽ തീരുമാനം

തിരുവമ്പാടി: തിരുവമ്പാടി ഹൈസ്കുൾ മൈതാനവുമായി ബന്ധപ്പെട്ട് കഴിഞ്ഞ ദിവസമുണ്ടായ പ്രശ്നങ്ങൾ രമ്യമായി പരിഹരിക്കാൻ സർവകക്ഷി യോഗത്തിൽ തീരുമാനം. ലിന്‍റോ ജോസഫ് എംഎൽഎയുടെ അധ്യക്ഷതയിൽ തിരുവമ്പാടി പഞ്ചായത്ത് ഓഡിറ്റോറിയത്തിൽ ചേർന്ന സർവകക്ഷി യോഗത്തിലാണ് തീരുമാനം. ഹൈസ്കൂൾ മൈതാനിയിൽ ഫുട്ബോൾ കളിക്കാനെത്തിയവർ സ്ഥാപിച്ച താൽക്കാലിക ഗോൾ പോസ്റ്റ് കഴിഞ്ഞ ദിവസം എടുത്ത് മാറ്റിയിരുന്നു. ഇതിനെ തുടർന്നുണ്ടായ പ്രശ്‌നങ്ങൾ ഒഴിവാക്കാനായിരുന്നു സർവകക്ഷി യോഗം വിളിച്ചത്. മൈതാനത്ത് 15നകം ഗോൾ പോസ്റ്റ് സ്ഥാപിക്കും. രാത്രി 7.30വരെ മൈതാനം പൊതുജനങ്ങൾക്ക് ഉപയോഗിക്കാം. ഇതുസംബന്ധിച്ച് തിരുവമ്പാടി സേക്രഡ് ഹാർട്ട് ഹയർ സെക്കൻഡറി സ്കൂൾ മാനേജ്‌മെന്‍റ് പ്രതിനിധികൾ സർവകക്ഷി യോഗത്തിൽ ഉറപ്പ് നൽകി. അഞ്ച് വർഷമായി അടച്ചിട്ടിരുന്ന മൈതാനം തുറക്കാൻ ഏഴു മാസം മുമ്പാണ് വിദ്യാഭ്യാസ ഉപഡയറക്ടർ ഉത്തരവിട്ടത്. തുടർന്ന്, മാനേജ്‌മെന്‍റ് ഹൈസ്കൂൾ മൈതാനം തുറന്ന് കൊടുക്കുകയായിരുന്നു. ഫുട്ബോൾ പരിശീലനം ഉൾപ്പെടെ മൈതാനം വീണ്ടും സജീവമാകവെയാണ് കഴിഞ്ഞ ദിവസം വീണ്ടും പ്രശ്നങ്ങളുണ്ടായത്. സർവകക്ഷി യോഗത്തിൽ പഞ്ചായത്ത് പ്രസിഡന്‍റ് ബിന്ദു ജോൺസൺ, വൈസ് പ്രസിഡന്‍റ് കെ.എ. അബ്ദുറഹ്മാൻ, ബാബു പൈക്കാട്ടിൽ, സി. ഗണേഷ് ബാബു, ഷൗക്കത്തലി കൊല്ലളത്തിൽ, സജീവ് മഠത്തിൽ, തോമസ് വലിയപറമ്പൻ, തിരുവമ്പാടി സബ് ഇൻസ്പെക്ടർ ഇ.കെ. രമ്യ, റോബർട്ട് നെല്ലിക്കതെരുവിൽ, ഗണേശ്ബാബു തുങ്ങിയവർ ചടങ്ങിൽ പങ്കെടുത്തു.

കേരള ടീമിന്‍റെ ജേഴ്സി പ്രകാശനം ചെയ്തു

താമരശേരി: സോഫ്റ്റ്ബേസ്ബോൾ ഫെഡറേഷൻ കപ്പ് നാഷണൽ കിരീടത്തിനായി മഹാരാഷ്ട്രയിലേക്ക് പുറപ്പെടുന്ന കേരള ടീമിന്‍റെ ജേഴ്സി സോഫ്റ്റ്ബേസ്ബോൾ അസോസിയേഷൻ സംസ്ഥാന ജനറൽ സെക്രട്ടറി പി.എം. എഡ്വേർഡ് പ്രകാശനം ചെയ്തു. ചടങ്ങിൽ സോഫ്റ്റ്ബേസ്ബോൾ അസോസിയേഷൻ സംസ്ഥാന ട്രഷറർ ഷിജോ സ്കറിയ, ജില്ലാ സെക്രട്ടറി വിപിൻ സോജൻ, ഏഷ്യൻ ഗെയിംസ് സ്വർണ ജേതാവ് എസ്. ശ്രേയ, കോച്ച്മാരായ കെ. അക്ഷയ്, വിപിൽ വി. ഗോപാൽ എന്നിവർ പ്രസംഗിച്ചു. നിലവിൽ കേരള പുരുഷ വനിതാ ടീമുകൾ ചാമ്പ്യൻമാരാണ്.

കുറുക്കൻകുന്നിൽ കുടിവെള്ളമില്ല: മനുഷ്യാവകാശ കമ്മീഷന്‍ കേസെടുത്തു

കോഴിക്കോട്: തലക്കുളത്തൂർ പഞ്ചായത്തിലെ കുറുക്കൻ കുന്നിൽ താമസിക്കുന്ന 18 കുടുംബങ്ങൾക്ക് കുടിവെള്ളം കിട്ടുന്നില്ലെന്ന പരാതിയിൽ മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് കേസെടുത്ത് പഞ്ചായത്ത് സെക്രട്ടറിക്ക് നോട്ടീസയച്ചു. 15 ദിവസത്തിനകം റിപ്പോർട്ട് സമർപ്പിക്കണം. ജൂൺ 25 ന് കോഴിക്കോട് ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. പത്രവാർത്തയുടെ അടിസ്ഥാനത്തിൽ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് നടപടി. 10 വർഷങ്ങൾക്ക് മുമ്പ് കിണർ ഇടിഞ്ഞത് കാരണമാണ് കുടിവെള്ളം ഇല്ലാതായത്. പൈപ്പുണ്ടെങ്കിലും വെള്ളം കിട്ടാറില്ലെന്നും നാട്ടുകാർ പറയുന്നു.

അമരാട് മലയിലെ അനധികൃത നിർമാണം നിർത്തിവയ്ക്കണമെന്ന്

താമരശേരി: അമരാട് മലയിൽ സ്വകാര്യ ഗ്രൂപ്പിന്‍റെ ഉടമസ്ഥതയിലുള്ള സ്ഥലത്തെ നിർമാണങ്ങളെ സംബന്ധിച്ച് ആശങ്ക ഉയർന്ന സാഹചര്യത്തിൽ സിപിഎം നേതാക്കൾ പ്രദേശം സന്ദർശിച്ചു. പ്രാദേശത്ത് കൂടെ ഒഴുകുന്ന തോടിന്‍റെ സ്വാഭാവിക നീരൊഴുക്ക് തടസപ്പെടുത്തി ഭീമമായ തോതിൽ വെള്ളം കെട്ടിനിർത്തി താഴ്‌വാരത്ത് താമസിക്കുന്ന ആളുകൾക്ക് ഭീഷണിയാവുന്ന തരത്തിൽ നിർമിച്ച തടയണയും അശാസ്ത്രീയമായ രൂപത്തിൽ തോടിന് കുറുകെ നിർമിച്ച പാലവും അടിയന്തരമായി പൊളിച്ചുനീക്കണമെന്ന് സിപിഎം കട്ടിപ്പാറ ലോക്കൽ കമ്മിറ്റി കട്ടിപ്പാറ പഞ്ചായത്ത്‌ സെക്രട്ടറിയോട് ആവശ്യപ്പെട്ടു. ഇക്കോ ടൂറിസം, ഫാം ടൂറിസം ഉൾപ്പെടെയുള്ള നൂതന വിനോദ സഞ്ചാര സാധ്യതകൾ പരമാവധി പ്രയോജനപ്പെടുത്തിക്കൊണ്ട് ജനങ്ങളുടെ ജീവന് ഭീഷണിയാവാത്ത തരത്തിൽ ടൂറിസ്റ്റ് സംരംഭങ്ങൾ ഉയർന്ന് വരണമെന്നും സിപിഎം ആവശ്യപ്പെട്ടു. നിധീഷ് കല്ലുള്ളതോട്, സി.പി. നിസാർ, ലത്തീഫ്, അഖിൽ മലയിൽ, സി.എം. അബ്ദുൽ അസീസ്, സി.കെ. മുജീബ് എന്നിവർ സ്ഥലം സന്ദർശിച്ചു.

ചെമ്പനോട റോഡിൽ കുടിവെള്ള പൈപ്പ് പൊട്ടി വെള്ളം പാഴാകുന്നു

പെരുവണ്ണാമുഴി: ചെമ്പനോട റൂട്ടിൽ മൂത്താട്ട് പുഴ പാലത്തിന് സമീപം റോഡിന്‍റെ മധ്യഭാഗത്തായി വാട്ടർ അഥോററ്റിയുടെ പൈപ്പ് പൊട്ടി വെള്ളം പാഴാകുന്നു. റോഡിൽ വെള്ളം തളം കെട്ടി നിൽക്കുന്നത് വാഹന യാത്രക്കാർക്ക്‌ വളരെയധികം ബുദ്ധിമുട്ട് സൃഷ്ടിക്കുന്നുണ്ട്. അധികൃതരോട് പ്രശ്നം പല തവണ അവതരിപ്പിച്ചെങ്കിലും യാതൊരു നടപടികളും സ്വീകരിക്കുന്നില്ലെന്നാണ് നാട്ടുകാരുടെ പരാതി. പേരാമ്പ്ര വാട്ടർ അഥോറിറ്റിയുടെ പരിധിയിൽ പെടുന്ന ഭാഗമാണിത്. പ്രശ്നം ഉടൻ പരിഹരിക്കണമെന്ന് സാമൂഹ്യ പ്രവർത്തകൻ ഷാരോൺ പൂഴിത്തോട് ആവശ്യപ്പെട്ടു.

കായിക വകുപ്പിന്‍റെ ലഹരി വിരുദ്ധ സന്ദേശ യാത്രയ്ക്ക് സമാപനം

കോഴിക്കോട്: കായിക വകുപ്പ് സംഘടിപ്പിച്ച ലഹരി വിരുദ്ധ സന്ദേശയാത്ര കിക്ക് ഡ്രഗ്സ്- സേ യെസ് ടു സ്പോർട്സിനെ കോഴിക്കോട്ടുകാർ നെഞ്ചേറ്റി. കായിക മന്ത്രി വി. അബ്ദുറഹ്മാൻ നയിക്കുന്ന ലഹരിവിരുദ്ധ സന്ദേശ യാത്ര കാസർക്കോട്, കണ്ണൂർ, വയനാട് ജില്ലകൾ പിന്നിട്ടാണ് നാലാം ദിനമാണ് കോഴിക്കോടെത്തിയത്. മലബാർ ക്രിസ്ത്യൻ കോളജ് മൈതാനത്ത് നിന്നാരംഭിച്ച വാക്കത്തോൺ വ്യത്യസ്തമായ ഫ്ളോട്ടുകളാൽ വർണ്ണാഭമായി. കരാട്ടെയും കളരിയും സ്കേറ്റിംഗും സൈക്ലിംഗുമൊക്കെയായി കുട്ടികളും മുതിർന്നവരും മാനാഞ്ചിറ മൈതാനിയിലെ ബാസ്ക്കറ്റ് ബോൾ കോർണറിലെത്തി. സൂംബ നൃത്തത്തോടെ സമാപന സമ്മേളനത്തിന് തുടക്കമായി. മാതാ പേരാമ്പ്രയുടെ സംഗീത ശിൽപ്പമായ ജ്യോതിർഗമയയെ നിറഞ്ഞ കയ്യടികളോടെയാണ് ജനങ്ങൾ സ്വീകരിച്ചത്. മാനാഞ്ചിറ മൈതാനത്ത് നടന്ന സമാപന സമ്മേളനം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു. കളിയിടങ്ങൾ കുറയുന്നതാണ് പുതിയ തലമുറ നേരിടുന്ന പ്രതിസന്ധിയെന്ന് മന്ത്രി പറഞ്ഞു. കളിക്കളങ്ങൾ സജീവമാക്കി അവരെ കൂടെ കൂട്ടണം. അല്ലാതെ കുറ്റം പറയുന്നതിൽ കാര്യമില്ലെന്നും മന്ത്രി പറഞ്ഞു. ലഹരി വിരുദ്ധ സന്ദേശയാത്ര ജനങ്ങൾ ഏറ്റെടുത്തു കഴിഞ്ഞെന്ന് കായിക മന്ത്രി വി. അബ്ദുറഹ്മാൻ പറഞ്ഞു. കോഴിക്കോട് മേയർ ബീന ഫിലിപ്പ് അധ്യക്ഷത വഹിച്ചു. വനംവകുപ്പ് മന്ത്രി എ.കെ ശശീന്ദ്രൻ മുഖ്യാതിഥിയായിരുന്നു.

കട്ടിപ്പാറ പൗരാവലി കർഷകനെ ആദരിച്ചു

താമരശേരി: കട്ടിപ്പാറ സംയുക്ത കർഷക കൂട്ടായ്മയുടെ നേതൃത്വത്തിൽ കട്ടിപ്പാറ പൗരാവലി, നീണ്ട 25 വർഷക്കാലം കട്ടിപ്പാറ റബർ ഉത്പാദക സംഘം പ്രസിഡന്‍റായിരുന്ന ഏറത്ത് സെബാസ്റ്റ്യനെ ഉപഹാരം നൽകി ആദരിച്ചു. കട്ടിപ്പാറ പഞ്ചായത്ത് പ്രസിഡന്‍റ് പ്രേംജി ജയിംസ് യോഗം ഉദ്ഘാടനം ചെയ്തു. സംയുക്ത കർഷക കൂട്ടായ്മ ചെയർമാൻ കെ.വി. സെബാസ്റ്റ്യൻ അധ്യക്ഷത വഹിച്ചു. കൊടുവള്ളി ബ്ലോക്ക് പഞ്ചായത്ത് മെമ്പർ നിധീഷ് കല്ലുള്ളതോട് മുഖ്യപ്രഭാഷണം നടത്തി. ഷാൻ കട്ടിപ്പാറ, ബാബു കുരിശിങ്കൽ, രാജു തുരുത്തിപള്ളി, സി.കെ.സി അസൈനാർ, സലിം പുല്ലടി, ബാബു, വി.പി. ദേവസ്യ മഞ്ഞാനയിൽ, പി.എ. ലത്തീഫ്, അസീസ് വെട്ടി ഒഴിഞ്ഞതോട്ടം, എ.കെ. ലോഹിതാക്ഷൻ, എ.കെ. അശോകൻ എന്നിവർ പ്രസംഗിച്ചു.

എം. ഷിബുവിന് യാത്രയയപ്പ് നല്‍കി

കോഴിക്കോട്: ഗസറ്റഡ് തസ്തികയിലേക്ക് പ്രമോഷന്‍ ലഭിച്ച എന്‍ജിഒ അസോസിയേഷന്‍ സംസ്ഥാന സെക്രട്ടറിയേറ്റ് അംഗവും സെറ്റോ ജില്ലാ ചെയര്‍മാനുമായ എം.ഷിബുവിന് എന്‍ജിഒ അസോസിയേഷന്‍ ജില്ലാ കമ്മിറ്റി യാത്രയപ്പു നല്‍കി.കെപിസിസി ജനറല്‍ സെക്രട്ടറി അഡ്വ. പി.എം. നിയാസ് ഉദ്ഘാടനം ചെയ്തു. അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശ്ശേരി അധ്യക്ഷനായി. സംസ്ഥാന സെക്രട്ടറിയേറ്റ് അംഗം സിജു കെ. നായര്‍, സെറ്റോ ജില്ലാ കണ്‍വീനര്‍ പി.കെ. രാധാകൃഷ്ണന്‍, എന്‍.ടി.ജിതേഷ്, ടി.അജിത് കുമാര്‍, മധു രാമനാട്ടുകര, കെ.പി. സുജിത , കെ.വി. രവീന്ദ്രന്‍, വി.വിപീഷ് , പി. പ്രദീപ് കുമാര്‍, കെ.ഫവാസ് , എലിസബത്ത് ടി. ജേക്കബ് , രഞ്ജിത്ത് ചേമ്പാല എന്നിവര്‍ സംസാരിച്ചു.എം. ഷിബു മറുപടി പ്രസംഗം നടത്തി.

ബേപ്പൂര്‍ ഗോഡൗണില്‍നിന്ന് റേഷന്‍ സാധനങ്ങള്‍ എടുക്കില്ലെന്ന്

കോഴിക്കോട് : സിറ്റി റേഷനിങ് ഓഫീസ് സൗത്ത് ബേപ്പൂര്‍ എന്‍എഫ്എസ്എ ഗോഡൗണിലെ തൊഴില്‍ തര്‍ക്കം ശാശ്വതമായി തീരാത്ത സാഹചര്യത്തില്‍ ബേപ്പൂര്‍ ഗോഡൗണില്‍ നിന്നു റേഷന്‍ എടുക്കുന്നത് നിര്‍ത്തിവെയ്ക്കാന്‍ ആള്‍കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ തീരുമാനിച്ചു. അസോസിയേഷന്‍ സൗത്ത് ഏരിയ കമ്മിറ്റിയുടേയാണ് തീരുമാനം. സംസ്ഥാന ജനറല്‍ സെക്രട്ടറി ടി. മുഹമ്മദലി, ഇ.ശ്രീജന്‍, കെ.പി.അഷ്‌റഫ്, ടി.ജയപ്രകാശന്‍,കെ.അജയകുമാര്‍,ടി.കെ. അരുണ്‍കുമാര്‍, ഫഹദ്,വി.വി.നാരായണന്‍ തുടങ്ങിയവര്‍ പ്രസംഗിച്ചു.

സ്ത്രീകളുടെ ഡിജിറ്റല്‍ ശാക്തീകരണം; വഴിതുറന്ന് കുടുംബശ്രീ സെമിനാര്‍

കോഴിക്കോട്: സ്ത്രീകളുടെ ഡിജിറ്റല്‍ ശാക്തീകരണത്തിലേക്ക് വഴിതുറന്നും സൈബറിടങ്ങളിലെ കുറ്റകൃത്യങ്ങളെ കുറിച്ച് മുന്നറിയിപ്പുമായി കുടുംബശ്രീ സെമിനാര്‍. "എന്‍റെ കേരളം' പ്രദര്‍ശന-വിപണന മേളയുടെ ഭാഗമായാണ് "കുടുംബശ്രീയും സ്ത്രീകളുടെ ഡിജിറ്റല്‍ ശാക്തീകരണവും' വിഷയത്തില്‍ സെമിനാര്‍ സംഘടിപ്പിച്ചത്. കുടുംബശ്രീ സംരംഭങ്ങളുടെ ഉല്‍പന്നങ്ങള്‍ പുത്തന്‍ സാങ്കേതിക വിദ്യയുടെ സാധ്യതകള്‍ കൂടി പ്രയോജനപ്പെടുത്തി ലോകത്തിന് മുമ്പില്‍ അവതരിപ്പിക്കാന്‍ സാധിക്കണമെന്ന് ഉദ്ഘാടനം നിര്‍വഹിച്ച ലിന്‍റോ ജോസഫ് എംഎല്‍എ അഭിപ്രായപ്പെട്ടു. കാലാനുസൃതമായ മാറ്റം കുടുംബശ്രീയുടെ പല മേഖലകളിലും ഉണ്ടായിട്ടുണ്ടെന്നും ഏറെ കരുതലോടെയാണ് കുടുംബശ്രീയെ സര്‍ക്കാര്‍ ചേര്‍ത്തുവെക്കുന്നതെന്നും അദ്ദേഹം കൂട്ടിച്ചേര്‍ത്തു. ഡിജി കേരളം, ഡിജിറ്റല്‍ സാക്ഷരത, ഡിജിറ്റല്‍ രംഗത്തെ തൊഴില്‍സാധ്യത, നിര്‍മിതബുദ്ധി, ഡിജിറ്റല്‍ പ്ലാറ്റ്‌ഫോമുകളിലൂടെയുള്ള ഉല്‍പന്നങ്ങളുടെയും സേവനങ്ങളുടെയും വിപണനം തുടങ്ങിയ വിഷയങ്ങള്‍ സെമിനാറില്‍ ചര്‍ച്ച ചെയ്തു. കാലിക്കട്ട് സര്‍വകലാശാല സിന്‍ഡിക്കേറ്റ് അംഗം അഡ്വ. എല്‍.ജി. ലിജീഷ് അധ്യക്ഷത വഹിച്ചു. എല്‍എസ്ജിഡി അസി. ഡയറക്ടര്‍ സജിന സത്താര്‍ മോഡറേറ്ററായി. കുടുംബശ്രീ ഗവേണിംഗ് എക്‌സിക്യൂട്ടീവ് അംഗം കെ.കെ. ലതിക, ജില്ലാ മിഷന്‍ കോഓഡിനേറ്റര്‍ പി.സി. കവിത, ടെക്‌നോളജി കോളമിസ്റ്റ് സെയ്ദ് ഷിയാസ് മിര്‍സ, സൈബര്‍ ലീഗല്‍ കണ്‍സല്‍ട്ടന്‍റ് അഡ്വ. ഇര്‍ഫാന്‍ ഇബ്രാഹിം സേട്ട്, ഓക്‌സിലറി സംസ്ഥാന റിസോഴ്‌സ് പേഴ്‌സണ്‍ എസ്. ജ്യോതി തുടങ്ങിയവര്‍ പങ്കെടുത്തു. അഴകിന്‍റെയും കരുത്തിന്‍റയും പ്രദർശനമായി ബോഡി ബിൽഡിംഗ് കോഴിക്കോട്: ശരീര സൗന്ദര്യത്തിന്‍റെ അഴകും കരുത്തും കാണിച്ച് ബോഡി ബിൽഡിംഗ് പ്രദർശനം. സംസ്ഥാന സർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി ബീച്ചിൽ നടക്കുന്ന എന്‍റെ കേരളം പ്രദർശന വിപണന മേളയിലെ കായിക പ്രദർശനങ്ങളുടെ ഭാഗമായാണ് ബോഡി ബിൽഡിംഗ് പ്രദർശനം അരങ്ങേറിയത്. കഴിഞ്ഞ വർഷത്തെ മിസ്റ്റർ കേരള സാബിത്ത്, ജൂനിയർ വിഭാഗത്തിൽ സംസ്ഥാന ചാമ്പ്യനായ സിമിൽ രാജൻ, സ്പോർട്സ് ഫിസിക്കിൽ മിസ്റ്റർ സൗത്ത് ഏഷ്യ ചാമ്പ്യൻഷിപ്പ് കരസ്ഥമാക്കിയ സചിൻ, രാജ്യാന്തര താരം കവിത എന്നിവർ പ്രദർശനത്തിനെത്തി. കായികമാണ് ലഹരി എന്ന സന്ദേശവുമായി സംഘടിപ്പിച്ച ബോഡി ബിൽഡിംഗ് പ്രദർശനം ജില്ലാ സ്‌പോര്‍ട്‌സ് കൗണ്‍സില്‍ വൈസ് പ്രസിഡന്‍റ് ഡോ. റോയ് വി. ജോൺ ഉദ്ഘാടനം ചെയ്തു. ജില്ലാ അസിസ്റ്റന്‍റ് ഇൻഫർമേഷൻ ഓഫീസർ എ.പി നൗഷാദ്, ജില്ലാ ബോഡി ബിൽഡിംഗ് അസോസിയേഷന്‍ പ്രസിഡന്‍റ് ഗിരീഷ്, സെക്രട്ടറി ബാബു ഹനാൻ, വി.കെ. സാബിറ, ഗിരീഷ് എന്നിവർ പ്രസംഗിച്ചു. photo : കുടുംബശ്രീ ദേശീയ സരസ് മേള ടൂറിസം പൊതുമരാമത്ത് വകുപ്പ് മന്ത്രി പി. എ. മുഹമ്മദ്‌ റിയാസ് സന്ദർശിക്കുന്നു.

അപകടത്തിൽ സ്‌കൂട്ടര്‍ യാത്രക്കാരന്‍ മരിച്ചു

പന്തീരാങ്കാവ്: പെരുമണ്ണ - പുത്തൂര്‍മഠം റോഡില്‍ പുത്തൂര്‍ മഠം ജംഗ്ഷന് സമീപം സ്‌കൂട്ടര്‍ പിക്കപ്പ് വാനിലിടിച്ച് സ്‌കൂട്ടര്‍ യാത്രക്കാരന്‍ മരിച്ചു. കടലുണ്ടി വലിയോട്ടില്‍ഹൗസില്‍ അനീഷ് (40) ആണ് മരിച്ചത്. ഇന്നലെ രാവിലെ 6.30-നായിരുന്നു അപകടം. ഗുരുതരപരിക്കേറ്റ അനീഷിനെ ഉടന്‍ മെഡിക്കല്‍ കോളജില്‍ എത്തിക്കാന്‍ ശ്രമിച്ചെങ്കിലും അപ്പോഴേക്കും മരിച്ചു. പന്തിരാങ്കാവ് പോലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു.

ഇല്ലിപ്പിലായി - മണിച്ചേരി- വയലട റോഡിന്‍റെ പുതിയ അലൈൻമെന്‍റ് തയാറാക്കുന്നു

കൂരാച്ചുണ്ട്: പഞ്ചായത്തിലെ ഇല്ലിപ്പിലായി - മണിച്ചേരി- വയലട പിഡബ്ല്യൂഡി റോഡ് നിർമാണത്തിന്‍റെ ഭാഗമായി റോഡിന്‍റെ പുതിയ അലൈൻമെന്‍റ് തയാറാക്കുന്നതിനായി പിഡബ്ല്യൂഡി ഉദ്യോഗസ്ഥരും റോഡ് ആക്ഷൻ കമ്മിറ്റിയംഗങ്ങളും ഇന്നലെ മേഖല സന്ദർശിച്ചു. 2013 ൽ പൊതുമരാമത്ത് വകുപ്പ് റോഡ് ഏറ്റെടുക്കുകയും 2016-ൽ കിഫ്ബിയിൽ ഉൾപ്പെടുത്തി റോഡ് നിർമാണം നടത്താൻ തീരുമാനിക്കുകയും ചെയ്തിരുന്നു. എന്നാൽ കിഫ്ബിയുടെ സാങ്കേതിക വിദഗ്ധർ അടങ്ങുന്ന സംഘം റോഡ് സന്ദർശിക്കുകയും നിലവിലുള്ള റോഡിന്‍റെ അലൈൻമെന്‍റ് പ്രകാരം നിർമാണം സാധ്യമല്ലെന്ന് അറിയിച്ചതിനെ തുടർന്ന് കിഫ്ബി ധനസഹായം ലഭിക്കാതെയായിരുന്നു. കഴിഞ്ഞ കാലങ്ങളിലെ പ്രളയത്തിലും മറ്റും റോഡ് പാടെ തകർന്ന നിലയിലാണ്. ഒട്ടനവധി കുടുംബങ്ങളും കൂടാതെ മണിച്ചേരി ഉന്നതിയിലെ പത്ത് കുടുംബങ്ങളും താമസിക്കുന്ന പ്രദേശമാണിത്. കൊയിലാണ്ടി റോഡ്സ് സബ് ഡിവിഷൻ അസിസ്റ്റന്‍റ് എക്സിക്യൂട്ടീവ് എൻജിനീയർ കെ. മിഥുൻ, ബാലുശേരി പിഡബ്ല്യൂഡി അസിസ്റ്റന്‍റ് എൻജിനീയർ കെ. ഷമേജ്,ഓവർസീയർ ടി.ടി ആൻസി, റോഡ് ആക്ഷൻ കമ്മിറ്റിയംഗങ്ങളായ തോമസ് വെട്ടിക്കുഴി,എൻ.കെ. കുഞ്ഞമ്മദ്, ജോയി വെട്ടിക്കുഴി, എ.സി. ഗോപി, ഇ.എം. അവറാച്ചൻ, മാത്യൂ പാറപ്പുറംഎന്നിവരും സംഘത്തോടൊപ്പം ഉണ്ടായിരുന്നു. റോഡിന്‍റെ സർവേ നടത്തി ഒരാഴ്ചക്കകം എസ്റ്റിമേറ്റ് തയാറാക്കി ചീഫ് എൻജിനീയർക്ക് സമർപ്പിക്കുമെന്നും അധികൃതർ അറിയിച്ചു. ഇല്ലിപ്പാലായി മുതൽ മണിച്ചേരി വരെയാണ് ഇന്നലെ ഉദ്യേഗസ്ഥ സംഘം സന്ദർശിച്ചത്.

അസീം വെളിമണ്ണയ്ക്ക് സ്വീകരണം നൽകി

കോഴിക്കോട്: പാരീസിൽ വച്ച് നടന്ന പാര സിമ്മിംഗ് വേൾഡ് സീരീസ് ചാമ്പ്യൻഷിപ്പിൽ എസ്എസ് ടു കാറ്റഗറിയിൽ ക്വാളിഫൈ ചെയ്തു മികച്ച പ്രകടനം കാഴ്ചവച്ച് തിരിച്ചെത്തിയ ആസീം വെളിമണ്ണയ്ക്ക് കോഴിക്കോട് എയർപോർട്ടിൽ ഫൂട്ട് വോളി അസോസിയേഷന്‍റെ നേതൃത്വത്തിൽ സ്വീകരണം നൽകി. ദേശീയ സെക്രട്ടറി എ.കെ. മുഹമ്മദ് അഷ്റഫ് ബൊക്കെ കൊടുത്ത് സ്വീകരിച്ചു. ചടങ്ങിൽ ജില്ലാ ഫൂട്ട് വോളി അസോസിയേഷൻ സെക്രട്ടറി കെ.വി. റാഷിദ് അധ്യക്ഷത വഹിച്ചു.

തിരുവമ്പാടിയിൽ അധ്യാപക പരിശീലന ശില്പശാലയ്ക്ക് തുടക്കമായി

തിരുവമ്പാടി: ലയൺസ് ക്ലബ് ഓഫ് തിരുവമ്പാടിയുടെ നേതൃത്വത്തിൽ തിരുവമ്പാടി അൽഫോൻസാ കോളജിൽ സ്കൂൾ അധ്യാപകർക്കായി ലയൺസ് ഇന്‍റർനാഷണലിന്‍റെയും താമരശേരി വിദ്യാഭ്യാസ ഏജൻസിയുടെയും സഹകരണത്തോടെ ദ്വിദിന പരിശീലന ശില്പശാല ആരംഭിച്ചു. പരിപാടി അൽഫോൻസാ കോളജ് പ്രിൻസിപ്പൽ ഡോ. ഷൈജു ഏലിയാസ് ഉദ്ഘാടനം ചെയ്തു. പരിശീലനത്തിൽ 45 ഓളം അധ്യാപകർ പങ്കെടുത്തു. ഇന്ന് വൈകുന്നേരം നാലിന് പരിപാടി സമാപിക്കും. താമരശേരി രൂപതയുടെ കീഴിലുള്ള സ്കൂളുകളിൽ അഞ്ച് മുതൽ ഒന്പത് വരെ ക്ലാസുകൾ പഠിക്കുന്ന വിദ്യാർഥികൾക്ക് നൈപുണ്യ വികസന ക്ലാസുകളും ലഹരിവിരുദ്ധ ബോധവത്കരണ ക്ലാസുകളും നൽകുക എന്നതാണ് പദ്ധതിയുടെ പ്രധാന ഉദ്ദേശം. ലയൺസ് ക്ലബ് പ്രസിഡന്‍റ് അഡ്വ. ജിമ്മി ജോർജ് അധ്യക്ഷനായി. ലയൺസ് ക്വസ്റ്റ് ഇന്‍റർനാഷണൽ ട്രെയിനർമാരായ കവിത ശാസ്ത്രി, പ്രഫ. വർഗീസ് വൈദ്യൻ, ക്ലബ് സെക്രട്ടറി അഡ്വ. സിബിൻ വി. ജോസ്, പി.എ. മത്തായി, ഇ.കെ. സെബാസ്റ്റ്യൻ, കെ.സി. ജോൺ, ജയേഷ് സ്രാമ്പിക്കൽ, മില്ലി മോഹനൻ, ഡോ. ആധി ലക്ഷ്മി, സിന്ദു ദിൻരാജ് എന്നിവർ പ്രസംഗിച്ചു.

കുളമ്പുരോഗ നിവാരണ പദ്ധതി: വാക്സിൻ വിതരണം ചെയ്തു

കൂരാച്ചുണ്ട്: കേരള സർക്കാർ മൃഗസംരക്ഷണ വകുപ്പ് ഏർപ്പെടുത്തിയ കുളമ്പുരോഗ നിയന്ത്രണ പദ്ധതിയുടെ ആറാം ഘട്ട വാക്സിനേഷൻ വിതരണം കൂരാച്ചുണ്ട് പഞ്ചായത്തിൽ നടത്തി. 4 മാസവും അതിനു മുകളിലും പ്രായമുള്ള എരുമ, പശുവർഗത്തിലുള്ള എല്ലാ ഉരുക്കളെയും കുളമ്പ് രോഗത്തിൽ നിന്നും സംരക്ഷിക്കുന്നതിനുള്ള പ്രതിരോധ മരുന്ന് കുത്തിവയ്ക്കുന്നതാണ് പദ്ധതി. ഉരുക്കൾക്കുള്ള ഇൻഷ്വറൻസ് പരിരക്ഷ ലഭിക്കണമെങ്കിൽ ഈ കുത്തിവെപ്പ് അനിവാര്യമാണ്. പഞ്ചായത്ത് പ്രസിഡന്‍റ് ഒ.കെ. അമ്മദ് വാക്സിനേഷൻ പദ്ധതി ഉദ്ഘാടനം നിർവഹിച്ചു. വൈസ് പ്രസിഡന്‍റ് വിൻസി തോമസ്, മെമ്പർ അരുൺ ജോസ്, വെറ്ററിനറി സർജൻ ഡോ. കാർത്തിക, എൽഐമാരായ മോഹനൻ, ശശി തുടങ്ങിയവർ പങ്കെടുത്തു.

കൈതപ്പൊയിൽ കുടിവെള്ള പദ്ധതി നാടിന് സമർപ്പിച്ചു

മുക്കം: കൊടിയത്തുർ പഞ്ചായത്തിലെ നിരവധി കുടുംബങ്ങൾക്കാശ്വാസമായി നിർമിച്ച കൈതപ്പൊയിൽ കുടിവെള്ള പദ്ധതി നാടിന് സമർപ്പിച്ചു. 2024- 25 വാർഷിക പദ്ധതിയിൽ ഉൾപ്പെടുത്തി കൊടിയത്തൂർ പഞ്ചായത്തും കുന്നമംഗലം ബ്ലോക്ക് പഞ്ചായത്തും സംയുക്തമായി 21 ലക്ഷം രൂപ ചെലവഴിച്ചാണ് പ്രവൃത്തി പൂർത്തീകരിച്ചത്. വയറിംഗ് ഉൾപ്പെടെയുള്ള പ്രവൃത്തിക്കായി പഞ്ചായത്ത് രണ്ടര ലക്ഷം രൂപയും വകയിരുത്തിയിരുന്നു. ശിവദാസൻ വടക്കം പുറത്ത്, സുഭാഷ് കിളിഞ്ഞിലിക്കാട്ട് എന്നിവർ സൗജന്യമായി വിട്ടു നൽകിയ സ്ഥലത്താണ് ഇരുപതിലധികം കുടുംബങ്ങൾക്കാശ്വാസമായ പദ്ധതി യഥാർത്ഥ്യമാക്കിയത്. മഴക്കാലത്ത് പോലും കുടിവെള്ള ക്ഷാമം അനുഭവിക്കുന്ന പ്രദേശമാണിത്. പഞ്ചായത്ത് പ്രസിഡന്‍റ് ദിവ്യ ഷിബു പദ്ധതിയുടെ ഉദ്ഘാടനം നിർവഹിച്ചു. ബ്ലോക്ക് പഞ്ചായത്തംഗം കെ.പി സൂഫിയാൻ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ മുഖ്യാതിഥിയായി. സ്റ്റാൻഡിംഗ് കമ്മിറ്റി ചെയർമാൻമാരായ ബാബു പൊലുകുന്നത്ത്, ആയിഷ ചേലപ്പുറം, മറിയംകുട്ടി ഹസൻ, പഞ്ചായത്തംഗം ഫാത്തിമ നാസർ, ഷിജിമോൻ കിളിഞ്ഞിക്കാട്ട്, സുജടോം, അബ്ദു തിരുനിലത്ത്, പോൾ ആന്‍റണി, അബൂട്ടി വളപ്പിൽ തുടങ്ങിയവർ പ്രസംഗിച്ചു. പദ്ധതിക്കായി സ്ഥലം സൗജന്യമായി വിട്ടു നൽകിയ ശിവദാസൻ വടക്കം പുറത്ത്, സുഭാഷ് കിളിഞ്ഞിലിക്കാട്ട് എന്നിവരെയും പദ്ധതി ഏറ്റെടുത്ത് നടത്തിയ കോൺട്രാക്ടർ വി.കെ അനീഷിനെയും ചടങ്ങിൽ ആദരിച്ചു.

കാരശേരിയിൽ സ്നേഹതീരം വയോജന പാർക്ക് നാടിന് സമർപ്പിച്ചു

മുക്കം: വൈകുന്നേരങ്ങളിൽ ഒരു ചായയൊക്കെ കുടിച്ച് അൽപ്പം സൊറ പറഞ്ഞിരിക്കുന്നത് മലയാളികളുടെ ഒരു ശീലമാണ്. എന്നാൽ ജാതിമത രാഷ്ട്രീയ ഭേദമന്യെ അങ്ങിനെ ഇരിക്കാനുള്ള പൊതു ഇടങ്ങൾ ഇന്ന് നാട്ടിലില്ലാത്ത അവസ്ഥയുമാണ്. ഈയൊരു സാഹചര്യത്തിലാണ് കാരശേരി പഞ്ചായത്ത് 2024- 25 വാർഷിക പദ്ധതിയിൽ ഉൾപ്പെടുത്തി കാരശേരി അങ്ങാടിയിൽസ്നേഹതീരം എന്ന പേരിൽ വയോജന പാർക്ക് നിർമിച്ചത്. കാരശേരി അങ്ങാടിയുടെ ഹൃദയഭാഗത്ത് ബസ് സ്റ്റോപ്പിനോട് ചേർന്നാണ് മുതിർന്നവർക്കും നാട്ടുകാർക്കും ഒരുമിച്ചിരിക്കാനും സല്ലപിക്കാനുമായി പാർക്ക് ഒരുക്കിയത്. പാർക്കിന്‍റെ ഉദ്ഘാടനം കാരശേരി പഞ്ചായത്ത് പ്രസിഡന്‍റ് സുനിതാ രാജൻ നിർവഹിച്ചു. വാർഡ് മെമ്പർ റുക്കിയ റഹീം അധ്യക്ഷത വഹിച്ചു. വൈസ് പ്രസിഡന്‍റ് ജംഷീദ് ഒളകര, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ സത്യൻ മുണ്ടയിൽ, വികസന സ്റ്റാൻഡിംഗ് കമ്മിറ്റി ചെയർപേഴ്സൺ ശാന്ത ദേവി മൂത്തേടത്ത്, പഞ്ചായത്ത് അംഗങ്ങളായ ആമിന എടത്തിൽ, കെ. കൃഷ്ണദാസ്, ആസൂത്രണ സമിതി ഉപാധ്യക്ഷൻ എം.ടി. സൈദ് ഫസൽ, സി. അബ്ദുറഹിമാൻ, നടുക്കണ്ടി അബൂബക്കർ തുടങ്ങി‍യവർ പ്രസംഗിച്ചു.

കോര്‍പറേഷന്‍ ഓഫീസിലെ സൈറണ്‍ പ്രവര്‍ത്തിച്ചില്ല : യുദ്ധസമാനമായ അന്തരീക്ഷം സൃഷ്ടിച്ച് മോക്ഡ്രില്‍

കോഴിക്കോട്: കേന്ദ്ര ആഭ്യന്തര മന്ത്രാലയത്തിന്‍റെ നിര്‍ദേശപ്രകാരം കോഴിക്കോട് ജില്ലയില്‍ സിവില്‍ ഡിഫന്‍സ് മോക്ക് ഡ്രില്‍ നടത്തിയത് നിരവധി സ്ഥലങ്ങളില്‍. മറ്റിടങ്ങളിലെല്ലാം മോക്ഡ്രില്‍ മുന്‍കൂട്ടി തീരുമാനിച്ചതുപോലെ പാകപ്പിഴകളില്ലാതെ നടത്താന്‍ കഴിഞ്ഞപ്പോള്‍ കോഴിക്കോട് കോര്‍പറേഷന്‍ ഓഫീസില്‍ ആദ്യത്തെ അപായ സൈറണ്‍ മുഴങ്ങാത്തത് കല്ലുകടിയായി. വൈകുന്നേരം നാലിനാണ് മോക് ഡ്രില്‍ ആരംഭിക്കേണ്ടിയിരുന്നത്. കോര്‍പറേഷന്‍ ഓഫീസില്‍ ആദ്യത്തെ അപായ സൈറണ്‍ മുഴങ്ങാത്തതിനാല്‍ ജീവനക്കാരും ഉദ്യോഗസ്ഥരും ആശയക്കുഴപ്പത്തിലായി. നാലുമണി മുതല്‍ 30 സെക്കന്‍ഡ് അലേര്‍ട്ട് സൈറണ്‍ മൂന്നു വട്ടം നീട്ടി ശബ്ദിക്കുമെന്നാണ് അറിയിച്ചിരുന്നത്. സൈറണ്‍ കേള്‍ക്കുന്ന ഇടങ്ങളിലും കേള്‍ക്കാത്ത ഇടങ്ങളിലും 4.02നും 4.29നും ഇടയില്‍ ആണ് മോക്ക്ഡ്രില്‍ നടത്തേണ്ടതെന്ന് കേന്ദ്രസര്‍ക്കാര്‍ അറിയിച്ചിരുന്നു. 4.28 മുതല്‍ സുരക്ഷിതം എന്ന സൈറണ്‍ 30 സെക്കന്‍ഡ് മുഴങ്ങുന്നതോടെയാണ് മോക്ഡ്രില്‍ അവസാനിപ്പിക്കേണ്ടത്. സൈറന്‍റെ അഭാവത്തില്‍ കോര്‍പറേഷന്‍ ഓഫീസില്‍ മോക്ഡ്രില്‍ ആരംഭിക്കാനായില്ല. ജീവനക്കാരും ഫയര്‍ ഫോഴ്സ്, പോലീസ് ഉദ്യോഗസ്ഥരും സൈറണ്‍ കേട്ടില്ല. എന്നാല്‍ സൈറണ്‍ മുഴങ്ങിയെന്നായിരുന്നു കോര്‍പറേഷന്‍ അധികൃതരുടെ വാദം. ഒടുവില്‍ നാലരക്ക് അവസാന സൈറണ്‍ മുഴങ്ങിയതോടെ ജീവനക്കാരും വിവിധ സേനാംഗങ്ങളും പിരിഞ്ഞുപോയി. മോക്ഡ്രില്‍ വീക്ഷിക്കാന്‍ ധാരാളം ആളുകള്‍ കോര്‍പറേഷന്‍ പരിസരത്ത് എത്തിയിരുന്നു. ബേപ്പൂര്‍ ജിഎച്ച്എസ്എസ്, ഏലത്തൂര്‍ പുതിയാപ്പ ജിഎഫ്എച്ച്എസ്എസ്, പയ്യോളി ജിഎച്ചഎസ്എസ്, കോഴിക്കോട് ഗവ. എന്‍ജിനീയറിംഗ് കോളജ്, പന്നിയങ്കര ജിയുപിഎസ്, കൊയിലാണ്ടി പിഡബ്ല്യൂഡി റസ്റ്റ് ഹൗസ്, തിരുവംഗൂര്‍ കമ്മ്യൂണിറ്റി ഹെല്‍ത്ത്‌സെന്‍റര്‍ എന്നിവിടങ്ങളിലും മോക്ഡ്രില്ലിന്‍റെ ഭാഗമായി അപായ സൈറണ്‍ മുഴക്കി. ജില്ലയിലെ മറ്റു പൊതു ഇടങ്ങളിലും മോക്ഡ്രില്‍ നടന്നു. ആരാധനാലയങ്ങളിലെ അനൗണ്‍്‌സ്‌മെന്‍റ് സംവിധാനങ്ങള്‍ ഉപയോഗിച്ചാണ് ഗ്രാമപ്രദേശങ്ങളില്‍ പൊതുജനങ്ങള്‍ക്ക് ജാഗ്രതാ നിര്‍ദേശം നല്‍കിയത്.ബോംബ്, മിസൈല്‍ ആക്രമണം, തീപിടുത്തം, ആക്രമണ സൂചന ലഭിച്ചാലുള്ള മുന്നൊരുക്കം തുടങ്ങിയ വിഭാഗങ്ങളായി തിരിച്ചായിരുന്നു മോക്ഡ്രില്‍. സമാനമായ സാഹചര്യങ്ങള്‍ യഥാര്‍ത്ഥത്തില്‍ ഉണ്ടായാല്‍ സ്വീകരിക്കേണ്ട നടപടികളും ഒരുക്കങ്ങളുമാണ് മോക്ഡ്രില്ലിലൂടെ ഉദ്യോഗസ്ഥര്‍ക്കും പൊതുജനങ്ങള്‍ക്കും പരിചയപ്പെടുത്തിയത്. സിവില്‍ ഡിഫന്‍സ് വളണ്ടിയര്‍മാര്‍, എന്‍സിസി കേഡറ്റുകള്‍, അഗ്‌നിരക്ഷാ, പോലീസ് സേനാംഗങ്ങള്‍, സര്‍ക്കാര്‍ ഉദ്യോഗസ്ഥര്‍ തുടങ്ങിയവര്‍ മോക്ഡ്രില്ലില്‍ പങ്കാളികളായി. മുക്കം: കേന്ദ്ര ആഭ്യന്തര മന്ത്രാലയത്തിന്‍റെ നിർദേശ പ്രകാരം കൊടിയത്തൂർ പഞ്ചായത്തിലും മോക് ഡ്രിൽ സംഘടിപ്പിച്ചു. യുദ്ധമുണ്ടാവുമ്പോൾ ഓരോരുത്തരും സുരക്ഷിത സ്ഥാനങ്ങളിലേക്ക് മാറേണ്ടത് എങ്ങിനെയെന്ന് മനസിലാക്കുന്ന രീതിയിലായിരുന്നു സിവിൽ ഡിഫൻസ് മോക്ഡ്രിൽ സംഘടിപ്പിച്ചത്. പന്നിക്കോട് എയുപി സ്കൂളിൽ നടന്ന ചടങ്ങിൽ പഞ്ചായത്ത് ക്ഷേമ കാര്യ സ്റ്റാൻഡിംഗ് കമ്മിറ്റി ചെയർമാൻ ബാബു പൊലുകുന്ന് അധ്യക്ഷനായി. പി. ഹരിദാസൻ, പി. അബ്ദു, അങ്കണവാടി ടീച്ചർ രഹ്നാസ്, ആശാ വർക്കർ രമണി, പി.ബിന്ദു, റസിയ, അനിത തുടങ്ങിയവർ പ്രസംഗിച്ചു. പേരാമ്പ്ര: പെരുവണ്ണാമൂഴിയിൽ ഇന്നലെ വൈകുന്നേരം നാലായപ്പോൾ ജനം കാത് കൂർപ്പിച്ചു, സൈറൺ മുഴങ്ങുന്നതും കാത്ത്. പക്ഷെ സൈറൺ മുഴങ്ങിയില്ല. തെരഞ്ഞെടുക്കപ്പെട്ട പ്രധാന സ്ഥലങ്ങളിൽ മോക്ഡ്രിൽ അരങ്ങേറുമെന്ന് പൊതു അറിയിപ്പുണ്ടായിരുന്നു. അതിലൊന്ന് കുറ്റ്യാടി ജലസേചന പദ്ധതിയും ടൂറിസ്റ്റു കേന്ദ്രവും ജപ്പാൻ കുടിവെള്ള പദ്ധതിയും ചെറുകിട ജല വൈദ്യുതി ഉൽപ്പാദന കേന്ദ്രവും ഉൾപ്പെടുന്ന പെരുവണ്ണാമൂഴിയായിരുന്നു. സമയം കഴിഞ്ഞിട്ടും ആരെയും കാണാനില്ലായിരുന്നു. ഒടുവിൽ പെരുവണ്ണാമൂഴി അണക്കെട്ടിനു സമീപം ആൾക്കൂട്ടം കണ്ടു. ജലസേചന പദ്ധതി ജീവനക്കാരും അണക്കെട്ട് കാണാനെത്തിയവരും ഏതാനും പോലീസ്‌ ഉദ്യോഗസ്ഥരുമാണ് അവിടെ ഉണ്ടായിരുന്നത്. അടിയന്തര സന്ദർഭത്തെ എങ്ങനെ നേരിടണമെന്ന ബോധവത്കരണം പെരുവണ്ണാമൂഴി പോലീസ്‌ സബ് ഇൻസ്‌പെക്‌ടർ എസ്. ഗൗതം ആൾക്കൂട്ടത്തിനു നൽകി. ജലസേചന വകപ്പ് അസി. എക്സി.എൻജിനീയർ പി.കെ. ബിജു, സിവിൽ പോലീസ് ഓഫീസർ ടി. സമീർ എന്നിവർ സന്നിഹിതരായിരുന്നു.

മോർ ഗീവർഗീസ് സഹദായുടെ ഓർമ്മ പെരുന്നാൾ ഇന്ന് സമാപിക്കും

കോടഞ്ചേരി: മോർ ഗീവർഗീസ് സഹദായുടെ ഓർമ്മ പെരുന്നാൾ ഇന്ന് സമാപിക്കും. ഓർമ്മ പെരുന്നാളിന് പ്രധാന കാർമ്മികത്വം വഹിക്കുന്നതിന് എത്തിച്ചേർന്ന മൈലാപ്പൂർ, ബാംഗ്ലൂർ, യുകെ ഭദ്രാസനങ്ങളുടെ മെത്രാപ്പോലീത്ത ഐസക് മോർ ഒസ്താത്തിയോസിനെ വട്ടൽ കുരിശ് പള്ളി അങ്കണത്തിൽവച്ച് സ്വീകരിച്ചു. വെളിമുണ്ട കുരിശിങ്കൽ നിന്നുള്ള പ്രദക്ഷിണം മൈക്കാവ് പള്ളിയിലെ മഞ്ഞനിക്കര ബാവായുടെ കബറിടത്തിലെ പ്രാർഥനയ്ക്ക്‌ ശേഷം വട്ടൽ കുരിശ് പള്ളിയിൽ എത്തിച്ചേർന്നു. വികാരി ഫാ. ബേസിൽ തമ്പി പടിഞ്ഞാറേക്കര, വന്ദ്യ ഏലിയാസ് കോർ എപ്പിസ്കോപ്പ തൊണ്ടലിൽ, ഫാ. അനീഷ് കവുങ്ങുംപ്പിള്ളിൽ, ഫാ. ബേസിൽ തൊണ്ടലിൽ, ഫാ. റെജി കോലാനിക്കൽ, ഫാ. ജോൺസൺ മനയിൽ, സഭാ വർക്കിംഗ് കമ്മിറ്റിയംഗം ബേബി ജേക്കബ് പീടിയേക്കൽ, ട്രസ്റ്റി തമ്പി വായിക്കാട്ട്, രാജു പറകണ്ടത്തിൽ, റോബിൻ പറകണ്ടത്തിൽ, സെക്രട്ടറി മോൻസി കാരപറമ്പിൽ എന്നിവർ നേതൃത്വം നൽകി. സന്ധ്യാ പ്രാർഥനക്ക് ശേഷം മെത്രാപ്പോലീത്ത ഐസക്ക് മോർ ഒസ്താത്തിയോസ് പ്രസംഗിച്ചു. ഇന്ന് രാവിലെ 8.30 ന് മെത്രാപ്പോലീത്ത ഐസക് മോർ ഒസ്താത്തിയോസിന്‍റെ പ്രധാന കാർമ്മികത്വത്തിൽ വിശുദ്ധ കുർബാന അർപ്പിക്കും. 11 ന് ആശീർവാദത്തോടെ പെരുന്നാൾ ശുശ്രൂഷകൾ സമാപിക്കും.

വട്ടച്ചിറ കുരിശുപള്ളിയിൽ തിരുനാൾ നാളെ കൊടിയേറും

കൂരാച്ചുണ്ട്: സെന്‍റ് തോമസ് ഫൊറോന ഇടവകയുടെ കീഴിലുള്ള വട്ടച്ചിറ കുരിശുപള്ളിയിൽ വിശുദ്ധ സെബസ്ത്യാനോസിന്‍റെ തിരുനാൾ നാളെ വൈകിട്ട് അഞ്ചിന് സെന്‍റ് തോമസ് ഫൊറോന വികാരി ഫാ. വിൻസെന്‍റ് കണ്ടത്തിൽ കൊടിയേറ്റും. തുടർന്ന് 5.10 ന് തിരുസ്വരൂപ പ്രതിഷ്ഠ, 5.15 ന് ആഘോഷമായ വിശുദ്ധ കുർബാന, സന്ദേശം, നൊവേന, പത്തിന് വൈകിട്ട് 4.30ന് ജപമാല അഞ്ചിന് പ്രസുദേന്തി വാഴ്ച, ആഘോഷമായ തിരുനാൾ കുർബാന, സന്ദേശം, നൊവേന, സിഒഡി ഡയറക്ടർ ഫാ. തോമസ് പാറൻകുളങ്ങര കാർമികത്വം വഹിക്കും. തുടർന്ന് ലദീഞ്ഞ്, പ്രദക്ഷിണം, 7.30ന് സമാപന ആശീർവാദം, ആകാശ വിസ്മയം, സ്നേഹവിരുന്ന് എന്നിവയോടെ സമാപിക്കും.

ചൂരല്‍മല ദുരന്തത്തിലെ രക്ഷാപ്രവര്‍ത്തനം പുനരാവിഷ്‌കരിച്ച് അഗ്‌നിരക്ഷ സേന

വിജ്ഞാനവും വിനോദവുമായി എന്‍റെ കേരളം പ്രദര്‍ശന-വിപണന മേള കോഴിക്കോട്: ചൂരല്‍മല ദുരന്തത്തില്‍ മുണ്ടക്കൈയില്‍ അകപ്പെട്ട കൈകുഞ്ഞിനെ കയറിലൂടെ സുരക്ഷിത സ്ഥാനത്തേക്ക് മാറ്റുന്ന അഗ്‌നിരക്ഷ സേനയുടെ ചിത്രം ആരുടെയും മനസില്‍നിന്ന് മാഞ്ഞിട്ടുണ്ടാവില്ല. ദുരന്തത്തില്‍ അഗ്‌നിരക്ഷാ സേന നടത്തിയ രക്ഷാപ്രവര്‍ത്തനത്തിന്‍റെ വര്‍ക്കിംഗ് മോഡല്‍ ഒരുക്കി ഒരിക്കല്‍കൂടി അന്നത്തെ ഓര്‍മകളിലേക്ക് കൂട്ടിക്കൊണ്ടുപോകുകയാണ് എന്‍റെ കേരളം പ്രദര്‍ശന-വിപണന മേളയിലെ അഗ്‌നിരക്ഷാ സേനയുടെ സ്റ്റാള്‍. വെള്ളാര്‍മലയും മുണ്ടക്കൈയും സെന്‍റിനെന്‍റല്‍ റോക്കും ടീ ഫാക്ടറിയും അടയാളപ്പെടുത്തിയ മോഡല്‍ രക്ഷാദൗത്യത്തില്‍ പങ്കെടുത്ത ഫയര്‍ഫോഴ്‌സ് അംഗങ്ങള്‍ തന്നെ അക്കാര്യം വിശദീകരിക്കുമ്പോള്‍ ഒരേസമയം ആകാംക്ഷയും ഭീതിയും വന്നുനിറയും. അഗ്‌നിരക്ഷാ സേനയുടെ മറ്റു പ്രധാന രക്ഷാദൗത്യങ്ങളായ ആമഴിയഞ്ചാം തോടും ബ്രഹ്‌മപുരവും പ്രളയ കാലത്തെ പ്രവര്‍ത്തനങ്ങളും സ്റ്റാളില്‍ പ്രദര്‍ശിപ്പിച്ചിട്ടുണ്ട്. സ്‌കൂബ ഡൈവിംഗ്, തീയില്‍നിന്ന് രക്ഷ നേടുന്നതിനുള്ള പ്രത്യേക വസ്ത്രം, റിമോട്ട് കൊണ്ട് നിയന്ത്രിക്കുന്ന വെള്ളത്തിനടിയില്‍ പോകുന്ന പ്രത്യേക വാഹനം എന്നിവയെല്ലാം പ്രദര്‍ശിപ്പിച്ചിട്ടുണ്ട്. തൂക്കുമരവും ലോക്കപ്പും ഒരുക്കി ജയില്‍ വകുപ്പ് ജയിലിലെ ലോക്കപ്പും തൂക്കുമരവും സിനിമകളില്‍ മാത്രം കണ്ടവര്‍ക്ക് നേരിട്ട് കാണാനുള്ള അവസരമാണ് എന്‍റെ കേരളം പ്രദര്‍ശന മേളയില്‍ ജയില്‍ വകുപ്പ് ഒരുക്കിയിരിക്കുന്നത്. മുഖ്യമന്ത്രി പിണറായി വിജയന്‍റെയടക്കം പ്രമുഖരുടെ ജയില്‍ രേഖകളും സന്ദര്‍ശക രജിസ്റ്ററിലെ വിവരങ്ങളും പ്രദര്‍ശിപ്പിച്ചിട്ടുണ്ട്. ആനയെ വരെ പിടിക്കാം കാടിറങ്ങി വരുന്ന ആനയെ തടയാനുള്ള ഹാങ്ങിംഗ് ഫെന്‍സിംഗ് സംവിധാനവും പാമ്പ്, കുരങ്ങന്‍, മുള്ളന്‍പന്നി തുടങ്ങിയ ജീവികളെ പിടിക്കാനുള്ള ഉപകരണങ്ങളുമെല്ലാം ഒരുക്കിയിട്ടുണ്ട് വനം വകുപ്പിന്‍റെ സ്റ്റാളില്‍. സോളാര്‍ സെന്‍സറിംഗ് കാമറകളും സുരക്ഷ കവചവും ഇവിടെയുണ്ട്. വേങ്ങ, തേക്ക്, രക്തചന്ദനം തുടങ്ങിയ വൃക്ഷങ്ങളും പൊതുജനങ്ങള്‍ക്ക് പരിചയപ്പെടുത്തുന്നുണ്ടിവിടെ. ലഹരിക്കെതിരേ പ്രതിരോധം മാതൃത്വം, ലഹരിക്കെണി, ഡിപ്രഷന്‍, കിരാതം, ജീവിതമാണ് ലഹരി എന്നിവയെ അടിസ്ഥാനമാക്കിയ കലാ സൃഷ്ടികളാണ് എക്‌സൈസ് വകുപ്പിന്‍റെ പ്രദര്‍ശന സ്റ്റാളില്‍ ഉള്ളത്. വിമുക്തി ലഹരിവിരുദ്ധ ക്വിസ്, ലഹരിക്കെതിരേ കൈയൊപ്പ് ശേഖരണം എന്നിവയുമുണ്ട്. റോഡ് സുരക്ഷ മാര്‍ഗങ്ങളുടെ ബോധവത്കരണ വീഡിയോയും ഇ ചലാന്‍ വഴി പിഴയടക്കാനുള്ള സംവിധാനങ്ങളുമായാണ് മോട്ടോര്‍ വാഹന വകുപ്പ് പ്രദര്‍ശന മേളയില്‍ തയാറാക്കിയിരിക്കുന്നത്. കുട്ടികള്‍ക്കുള്ള ആയുര്‍വേദ ചികിത്സ കുട്ടികള്‍ക്കുള്ള ആയുര്‍വേദ ചികിത്സാ പദ്ധതികള്‍ പരിചയപ്പെടുത്തി 'എന്‍റെ കേരളം' പ്രദര്‍ശന-വിപണന മേളയിലെ സെമിനാര്‍. "കുട്ടികളുടെ ആയുര്‍വേദം' എന്ന വിഷയത്തില്‍ ആയുഷ് വകുപ്പാണ് സെമിനാര്‍ സംഘടിപ്പിച്ചത്. കുട്ടികളുടെ അസുഖങ്ങള്‍ക്കുള്ള ചികിത്സകള്‍ ആയുര്‍വേദത്തില്‍ ഉണ്ടെങ്കിലും അത് മനസിലാക്കാന്‍ നമുക്ക് സാധിക്കാതെ പോകുന്നുവെന്ന് സെമിനാര്‍ ഉദ്ഘാടനം ചെയ്ത് തോട്ടത്തില്‍ രവീന്ദ്രന്‍ എംഎല്‍എ പറഞ്ഞു. ജില്ലാ ആയുര്‍വേദ ആശുപത്രി സിഎംഒ യദു നന്ദന്‍ അധ്യക്ഷത വഹിച്ചു. ഡോ. ദയ വിഷയാവതരണം നടത്തി. സീനിയര്‍ മെഡിക്കല്‍ ഓഫീസര്‍ ഡോ. ഷൈജു ഒല്ലാങ്കോട് മോഡറേറ്ററായി. മേള കാണാം, കൈ നിറയെ സാധനങ്ങളുമായി മടങ്ങാം എന്‍റെ കേരളം പ്രദര്‍ശന-വിപണന മേള കാണാന്‍ എത്തുന്നവര്‍ക്ക് കൈ നിറയെ സാധനങ്ങളുമായി മടങ്ങാം. സര്‍ക്കാരിന്‍റെ നാലാം വാര്‍ഷികാഘോഷങ്ങളുടെ ഭാഗമായ മേളയില്‍നിന്ന് ഗുണമേന്മയുള്ള ഉല്‍പന്നങ്ങള്‍ വിലക്കുറവില്‍ വാങ്ങാനാകും. ഖാദി, മില്‍മ, ഫിഷറീസ്, മത്സ്യഫെഡ്, ആത്മ കോഴിക്കോട്, കയര്‍ഫെഡ്, കൃഷി വകുപ്പ്, ചാത്തമംഗലം പൗള്‍ട്രി ഫാം തുടങ്ങിയവയുടെ സ്റ്റാളുകളില്‍ നിന്നാണ് ഉത്പന്നങ്ങള്‍ വാങ്ങാന്‍ അവസരം. ഖാദിയുടെ സ്റ്റാളില്‍ എത്തുന്നവര്‍ക്ക് കൈത്തറി വസ്തുക്കള്‍ നിര്‍മിക്കുന്നത് നേരിട്ട് കാണാനും അവസരമുണ്ട്. ഖാദി ഉല്‍പന്നങ്ങള്‍ 30 ശതമാനം റിബേറ്റിലാണ് നല്‍കുന്നത്. അഞ്ച് ദിവസം കൊണ്ട് ലക്ഷം രൂപയുടെ വരുമാനമാണ് ഈ സ്റ്റാളില്‍നിന്ന് ലഭിച്ചത്. അച്ചാറുകള്‍, മസാലപ്പൊടികള്‍, ധാന്യങ്ങള്‍, പാലുല്‍പന്നങ്ങള്‍, മൂല്യവര്‍ധിത ഉല്‍പന്നങ്ങള്‍, ചെടികള്‍ തുടങ്ങിയവ സ്റ്റാളുകളില്‍നിന്ന് വാങ്ങാം. സപ്ലൈക്കോ, കണ്‍സ്യൂമര്‍ഫെഡ് തുടങ്ങിയവയുടെ സ്റ്റാളുകളിലും സാധനങ്ങള്‍ വാങ്ങാന്‍ ആളുകളുടെ തിരക്കാണ്. കീബോഡിലും തബലയിലും വിസ്മയിപ്പിച്ച് ഹരിനന്ദും റമിന്‍ റഷീദും എന്‍റെ കേരളം പ്രദര്‍ശന-വിപണന മേളയില്‍ സംഗീതോപകരണങ്ങള്‍കൊണ്ട് വിസ്മയിപ്പിച്ച് പി. ഹരിനന്ദും റമിന്‍ റഷീദും. മേളയിലെ ക്രിയേറ്റീവ് കോര്‍ണറിലാണ് കീബോഡും തബലയും കൊണ്ട് ഏഴാം ക്ലാസുകാര്‍ കാണികളെ കൈയിലെടുത്തത്. വില്യംസ് സിന്‍ഡ്രോം രോഗത്തെ വെല്ലുവിളിച്ചാണ് ഈ കൊച്ചുമിടുക്കന്മാര്‍ മേളയിലെ താരങ്ങളായത്. സമഗ്ര ശിക്ഷാ കോഴിക്കോടിന്‍റെ "മല്‍ഹാര്‍ പാട്ട്കൂട്ടം' ട്രൂപ്പിലെ അംഗങ്ങളായ ഇവര്‍ സ്‌പെഷ്യല്‍ സ്‌കൂള്‍ കലോത്സവത്തില്‍ ജില്ലയെ പ്രതിനിധീകരിച്ച് തിളക്കമാര്‍ന്ന വിജയം കൈവരിച്ചവരാണ്. തബല, കീബോഡ് എന്നിവക്കൊപ്പം ലളിതഗാനത്തിലും മികവറിയിച്ചിട്ടുണ്ട്. ഹരിനന്ദ് മുതുവന എയുപി സ്‌കൂളിലെയും റമിന്‍ റഷീദ് മണിയൂര്‍ യു പി സ്‌കൂളിലെയും വിദ്യാര്‍ഥികളാണ്.

വോളണ്ടിയർ പരിശീലനം സംഘടിപ്പിച്ചു

മുക്കം: കാരശേരി ആശ്വാസ് പാലിയേറ്റീവിന്‍റെ ശാക്തീകരണത്തിന്‍റെ ഭാഗമായി വോളണ്ടിയർ പരിശീലനം സംഘടിപ്പിച്ചു. പഞ്ചായത്തിലെ കിടപ്പ് രോഗികൾക്ക് സമാശ്വാസമേകാൻ കൂടുതൽ പരിചരണങ്ങൾ നൽകുന്നതിന് വേണ്ടി വളണ്ടിയർമാരെ സജ്ജമാക്കുന്നതിനാണ് പരിശീലനം സംഘടിപ്പിച്ചത്. പരിശീലന പരിപാടി പഞ്ചായത്ത് വൈസ് പ്രസിഡന്‍റ് ജംഷിദ് ഒളകര ഉദ്ഘാടനം ചെയ്തു. ജനറൽ കൺവീനർ എം.ടി. സെയ്ത് ഫസൽ അധ്യക്ഷത വഹിച്ചു. ട്രഷറർ ജി. അബ്ദുൽ അക്ബർ, കോ ഓർഡിനേറ്റർ നടുക്കണ്ടി അബുബക്കർ, സംസ്ഥാന ട്രെയിനർ പി.കെ അബ്ദുൽ ഖാദർ, സലീം വലിയ പറമ്പ്, കെ.സി അബ്ദുസമദ് എന്നിവർ പ്രസംഗിച്ചു.

കേരള ടീമിന്‍റെ ജേഴ്സി പ്രകാശനം ചെയ്തു

കോടഞ്ചേരി: സോഫ്റ്റ് ബേസ്ബോൾ ഫെഡറേഷൻ കപ്പ് നാഷണൽ കിരീടത്തിനായി മഹാരാഷ്ട്രയിലേക്ക് പുറപ്പെടുന്ന കേരള ടീമിന്‍റെ ജേഴ്സി സോഫ്റ്റ് ബേസ്ബോൾ അസോസിയേഷൻ സംസ്ഥാന ജനറൽ സെക്രട്ടറി പി.എം. എഡ്വേർഡ് പ്രകാശനം ചെയ്തു. ചടങ്ങിൽ സോഫ്റ്റ് ബേസ്ബോൾ അസോസിയേഷൻ സംസ്ഥാന ട്രഷറർ ഷിജോ സ്കറിയ, ജില്ലാ സെക്രട്ടറി വിപിൻ സോജൻ, ഏഷ്യൻ ഗെയിംസ് സ്വർണ ജേതാവ് എസ്. ശ്രേയ, കോച്ചുമാരായ കെ. അക്ഷയ്, വിപിൽ വി. ഗോപാൽ എന്നിവർ പ്രസംഗിച്ചു. നിലവിൽ കേരള പുരുഷ-വനിതാ ടീമുകൾ ചാമ്പ്യൻമാരാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]