ADVERTISEMENT

ADVERTISEMENT

വായോളി മുഹമ്മദിനു സ്വീകരണം നൽകി

കൊടുവള്ളി: സംസ്ഥാന മിനറൽ ഡവലപ്മെന്‍റ് കോർപറേഷൻ ചെയർമാനായി തെരഞ്ഞെടുക്കപ്പെട്ട വായോളി മുഹമ്മദിന് എൽഡിഎഫ് കൊടുവള്ളി മുനിസിപ്പൽ കമ്മിറ്റിയുടെ നേതൃത്വത്തിൽ സ്വീകരണം നൽകി. കൊടുവള്ളി സഹകരണ ബാങ്ക് ഓഡിറ്റോറിയത്തിൽ നടന്ന പരിപാടി മുൻ എംഎൽഎ എ. പ്രദീപ്കുമാർ ഉദ്ഘാടനം ചെയ്തു. ഒ.പി.ഐ. കോയ അധ്യക്ഷത വഹിച്ചു.

ആർ.പി. ഭാസ്ക്കരൻ, കെ. ബാബു, സി. പോക്കർ, പി.ടി.സി. ഗഫൂർ, റസിയ ഇബ്രാഹിം, പി.ടി. അസയിൻകുട്ടി, കെ. അസയിൻ, സി.പി. അബ്ദുള്ളകോയ തങ്ങൾ, എം.പി. മൊയ്തീൻ, പി.സി. വേലായുധൻ, കെ.ടി. സുനി, ഒ.പി. റഷീദ്, മാതോലത്ത് അബ്ദുള്ള, അഡ്വ. പി. അബ്ദുറഹിമാൻ എന്നിവർ പ്രസംഗിച്ചു. വായോളി മുഹമ്മദ് മറുപടി പ്രസംഗം നടത്തി.

ADVERTISEMENT

എൽഐസി ഓഫീസുകൾക്ക് മുന്നിൽ പ്രകടനവും ‌ പൊതുയോഗവും നടത്തി

കോഴിക്കോട് : ദേശീയ പണിമുടക്കിന് മുന്നോടിയായി ഇൻഷ്വറൻസ് ജീവനക്കാരും ഏജന്‍റുമാരും പെൻഷനർമാരും ജില്ലയിലെ എൽഐസി ഓഫീസുകൾക്ക് മുന്നിൽ പ്രകടനവും പൊതുയോഗവും നടത്തി. എൽഐസി എംപ്ലോയീസ് യൂണിയൻ, എൽഐസി ഏജൻസ് ഓർഗനൈസേഷൻ ഓഫ് ഇന്ത്യ, സെക്യൂരിറ്റി ആൻഡ് ലേബർ കോൺട്രാക്ട് വർക്കേഴ്സ് യൂണിയൻ, എൽഐസി പെൻഷനേഴ്സ് അസോസിയേഷൻ എന്നിവരുടെ സംയുക്താഭിമുഖ്യത്തിലാണ് പൊതുയോഗം സംഘടിപ്പിച്ചത്. കോഴിക്കോട് മാനാഞ്ചിറ എൽഐസി. ഡിവിഷണൽ ഓഫീസ് പരിസരത്ത് നടന്ന പ്രകടനത്തിന് ഐ.കെ. ബിജു , ആർ. അർജുൻ, ഗോവിന്ദ് മേനോൻ, ടി.സി. ബസന്ത് എന്നിവർ നേതൃത്വം നൽകി.

ചർച്ച പരാജയം; വടകരയിൽ ഇന്ന് സ്വകാര്യ ബസ് സമരം

വടകര: റോഡുകളുടെ ശോച്യാവസ്ഥക്കെതിരേ ബസ് തൊഴിലാളി സംയുക്ത സമിതി പ്രഖ്യാപിച്ച സൂചനാ സമരം ഇന്ന് നടക്കും. സമരം കണക്കിലെടുത്ത് ആര്‍ഡിഒ അന്‍വര്‍ സാദത്ത് വിളിച്ച അനുരഞ്ജന യോഗം പരാജയപ്പെട്ട സാഹചര്യത്തില്‍ സമരവുമായി മുന്നോട്ട് പോകാന്‍ സമരസമിതി തീരുമാനിച്ചു. രാവിലെ ആറു മുതല്‍ വൈകുന്നേരം ആറു വരെയാണ് സമരം. വടകര കേന്ദ്രമായി സര്‍വീസ് നടത്തുന്ന മുഴുവന്‍ ബസുകളും സമരത്തില്‍ പങ്കെടുക്കും. ദേശീയപാതയിലെ ദീര്‍ഘദൂര ബസുകള്‍ മൂരാടും അഴിയൂരും യാത്ര അവസാനിപ്പിക്കും. ദേശീയപാതയുടെയും സംസ്ഥാന പാതകളുടെയും ദുരവസ്ഥ പരിഹരിക്കാത്തതില്‍ പ്രതിഷേധിച്ചാണ് സംയുക്ത സമിതി സമരം പ്രഖ്യാപിച്ചത്. ഒരാഴ്ച കൊണ്ട് ക്വാറി വേസ്റ്റിട്ട് പ്രശ്‌നം പരിഹരിക്കാമെന്ന കരാര്‍ കമ്പനിയുടെ പ്രതിനിധി നിര്‍ദേശിച്ചത് സ്വീകാര്യമല്ലെന്ന് സംയുക്ത യൂണിയന്‍ യോഗത്തില്‍ വ്യക്തമാക്കി. ഫലപ്രദമായ നടപടി വേണമെന്ന് ഇവര്‍ ആവശ്യപ്പെട്ടു. ആര്‍ടിഒ, തഹസില്‍ദാര്‍, എന്‍എച്ച് അഥോറിറ്റി പ്രതിനിധി എന്നിവര്‍ക്കു പുറമെ തൊഴിലാളി യൂണിയന്‍ നേതാക്കളായ എ. സതീശന്‍, എം. ബാലകൃഷ്ണന്‍, ഇ. നാരായണന്‍ നായര്‍, വിനോദ് ചെറിയത്ത്, മടപ്പള്ളി മോഹനന്‍, സജീവ് കുമാര്‍, പ്രദീപന്‍ തുടങ്ങിയവര്‍ പങ്കെടുത്തു.

റോഡ് തകർന്നിട്ട് മാസങ്ങൾ : നന്നാക്കാൻ നടപടിയില്ല നാട്ടുകാർ പ്രക്ഷോഭത്തിലേക്ക്

മുക്കം: മുക്കം നഗരസഭയിലെ 26-ാം ഡിവിഷനിലെ മണാശേരി- മുതുകുറ്റിമലയിൽ റോഡ് പൊട്ടി പൊളിഞ്ഞ് കാൽനട യാത്ര പോലും സാധ്യമല്ലാത്ത നിലയിൽ. റോഡ് പൊട്ടി പൊളിഞ്ഞു ഗർത്തങ്ങൾ രൂപപ്പെട്ടു കല്ലുകൾ ഇളകി കിടക്കുന്ന അവസ്ഥയിലാണ്. റോഡിന്‍റെ ശോചനീയാവസ്ഥ കാരണം ഇവിടേയ്ക്ക് ഓട്ടോറിക്ഷ പോലുള്ള വാഹനം വിളിച്ചാൽ പോലും വരാറില്ല. റോഡുപണി കരാറെടുത്ത കരാറുകാരന്‍റെ ഉത്തരവാദിത്വ കുറവാണ് റോഡിന്‍റെ ശോചനീയാവസ്ഥക്ക് കാരണമെന്നാണ് നാട്ടുകാർ പറയുന്നത്. നിരവധി കുടുംബങ്ങൾ താമസിക്കുന്ന പ്രദേശത്തേക്കുള്ള റോഡിന്‍റെ ഈ അവസ്ഥക്ക് പരിഹാരം കാണണമെന്ന് ആവശ്യപ്പെട്ട് പ്രദേശത്തുകാർ അധികൃതരെ സമീപിച്ചെങ്കിലും ഇതുവരെ നടപടികളൊന്നുമുണ്ടായിട്ടില്ല. മറ്റൊരു കൗൺസിലറെ ഈ ഡിവിഷന്‍റെ കാര്യങ്ങൾ നോക്കാൻ ചുമതലപ്പെടുത്തിയിട്ടുണ്ടെന്നാണ് അറിയാൻ കഴിഞ്ഞതെങ്കിലും അങ്ങിനെയൊരു വ്യക്തി പ്രദേശത്തേക്ക് എത്തിനോക്കിയതായി തങ്ങൾക്കറിയില്ലെന്നാണ് നാട്ടുകാർ പറയുന്നത്. റോഡ് എത്രയും പെട്ടെന്ന് അറ്റകുറ്റ പ്രവൃത്തി നടത്തി നവീകരിക്കാൻ നടപടിയുണ്ടായില്ലെങ്കിൽ നഗരസഭയിലേക്കു പ്രതിഷേധ മാർച്ച് ഉൾപ്പെടെയുള്ള സമരപരിപാടികൾക്കൊരുങ്ങുകയാണ് നാട്ടുകാർ.

വനമഹോത്സവം: പരിസ്ഥിതി ബോധവത്കരണ ക്ലാസ് സംഘടിപ്പിച്ചു

കോഴിക്കോട്: വനമഹോത്സവത്തിന്‍റെ ഭാഗമായി ഭിന്നശേഷിക്കാര്‍ക്കായി പരിസ്ഥിതി ബോധവത്കരണ ക്ലാസും തൈനടീല്‍ പ്രവൃത്തിയും സംഘടിപ്പിച്ചു. എരഞ്ഞിപ്പാലം നായനാര്‍ ബാലികാസദനത്തില്‍ നടന്ന പരിപാടി ജില്ലാ പഞ്ചായത്ത് വൈസ് പ്രസിഡന്‍റ് പി. ഗവാസ് ഉദ്ഘാടനം ചെയ്തു. സാമൂഹ്യ വനവല്‍ക്കരണ വിഭാഗം ഉത്തരമേഖല കണ്‍സര്‍വേറ്റര്‍ ഓഫ് ഫോറസ്റ്റ് ആര്‍.കീര്‍ത്തി മുഖ്യാതിഥിയായി. അസിസ്റ്റന്‍റ് കണ്‍സര്‍വേറ്റര്‍ ഓഫ് ഫോറസ്റ്റ് എം.പി. ഇംതിയാസ് അധ്യക്ഷനായി.കാലിക്കട്ട് പ്രസ് ക്ലബ് പ്രസിഡന്‍റ് ഇ.പി. മുഹമ്മദ്, യുഎല്‍സിസിഎസ് ഫൗണ്ടേഷന്‍ മാനേജര്‍ എ. അഭിലാഷ് ശങ്കര്‍, യുഎല്‍ കെയര്‍ പ്രോജക്ട് ഡെവലപ്‌മെന്‍റ് ഓഫീസര്‍ എം. മന്‍സൂര്‍, കേരള ബയോഡൈവേഴ്‌സിറ്റി ബോര്‍ഡ് അംഗം ഡോ. മഞ്ജു ധനീഷ്, പ്രൊവിഡന്‍സ് കോളജ് എന്‍എസ്എസ് പ്രോഗ്രാം ഓഫീസര്‍ ഡോ. സംഗീത ജി. കൈമള്‍, യുഎല്‍ കെയര്‍ നായനാര്‍ സദനം പ്രിന്‍സിപ്പല്‍ പി. തങ്കമണി എന്നിവർ പ്രസംഗിച്ചു. റിട്ട. ഡെപ്യൂട്ടി റേഞ്ച് ഫോറസ്റ്റ് ഓഫീസര്‍ ടി. സുരേഷ് ബോധവത്കരണ ക്ലാസുകള്‍ക്ക് നേതൃത്വം നല്‍കി.

ഹോട്ടലിൽ നിന്നു വീണ് യുവാവ് മരിച്ച സംഭവത്തിൽ ‌സമഗ്രാന്വേഷണം വേണം: സിപിഎം

ചക്കിട്ടപാറ: ജൂൺ 22 ന് നിലമ്പൂരിലെ സ്വകാര്യ ഹോട്ടലിൽ നാലാം നിലയിൽ നിന്നും വീണു യുവാവ് മരിച്ച സംഭവത്തിൽ സമഗ്ര അന്വേഷണം നടത്തി യഥാർഥ വസ്തുതകൾ പുറത്തു കൊണ്ടു വരണമെന്നു സിപിഎം ചക്കിട്ടപാറ ലോക്കൽ കമ്മിറ്റി അധികൃതരോട് ആവശ്യപ്പെട്ടു. ചക്കിട്ടപാറ പിള്ള പെരുവണ്ണ സ്വദേശി വലിയ വളപ്പിൽ അജയ്കുമാർ (22) ആണ് മരിച്ചത്. ഹിമവൽ ഭദ്രാനന്ദ എന്ന തോക്കു സ്വാമിയുടെ റൂമിൽ നിന്നാണ് യുവാവ് അപകടത്തിൽ പെട്ടത്. മൈസൂരിൽ ബിരുദ വിദ്യാർഥിയായ അജയ്കുമാർ എങ്ങനെ നിലമ്പൂരിൽ എത്തിയെന്നും ലഹരി മാഫിയക്ക് ഈ മരണത്തിൽ എന്തെങ്കിലും തരത്തിലുള്ള ബന്ധമുണ്ടോയെന്നും വ്യക്തമാവേണ്ടതുണ്ട്. സിപിഎം ചക്കിട്ടപാറ ലോക്കൽ കമ്മിറ്റി സെക്രട്ടറി എ.ജി. ഭാസ്കരൻ അധ്യക്ഷത വഹിച്ചു.

ദേശീയപാതയിലെ ഗതാഗതകുരുക്ക്: യാത്രക്കാര്‍ തമ്മിലുള്ള കശപിശ പതിവാകുന്നു

പയ്യോളി: ദേശീയപാതയുടെ ശോചനീയാവസ്ഥയെ തുടര്‍ന്നുള്ള ഗതാഗതക്കുരുക്കില്‍പെട്ട വാഹന യാത്രക്കാര്‍ തമ്മിലുള്ള കശപിശ യാത്രക്കാര്‍ക്ക് കൂടുതല്‍ ദുരിതം തീര്‍ക്കുന്നു. മഴ കനത്തത്തോടെ രൂപപ്പെട്ട കുഴിയില്‍ വീണ് സമീപത്തുകൂടെ പോകുന്ന യാത്രക്കാരുടെ ദേഹത്ത് ചെളി തെറിക്കുന്നതാണ് മിക്ക പ്രശ്‌നങ്ങള്‍ക്കും കാരണം. ഇന്നലെ രാവിലെ എട്ടുമണിയോടെ നന്തി ടൗണിന് സമീപം കാര്‍ യാത്രക്കാരും ബസ് ജീവനക്കാരും തമ്മിലുള്ള തര്‍ക്കത്തില്‍ ഏറെ നേരം ഗതാഗതം സ്തംഭിച്ചു. ബുധനാഴ്ച രാവിലെ വടകരയിലേക്കും തലശേരിയിലേക്കും പോകുന്ന രണ്ട് ബസ് ജീവനക്കാരുടെ തര്‍ക്കത്തില്‍പ്പെട്ട യാത്രക്കാരെ പയ്യോളി സ്റ്റാന്‍ഡില്‍ ഇറക്കി വിട്ടാണ് ജീവനക്കാര്‍ വാശി തീര്‍ത്തത്. യാത്രക്കാരുമായി ബസ് പോകാന്‍ പോലീസ് ആവശ്യപ്പെട്ടിട്ടും ഡ്രൈവര്‍ അനുസരിക്കാന്‍ തയാറായില്ല. സമയക്രമത്തെ ചൊല്ലി പല ബസുകളും ട്രിപ്പ് ക്യാന്‍സല്‍ ചെയ്യുന്ന അവസരത്തിലാണ് ജീവനക്കാര്‍ തമ്മിലുള്ള പ്രശ്‌നങ്ങളെ തുടര്‍ന്ന് ബസുകള്‍ വഴിയില്‍ യാത്രക്കാരെ ഇറക്കിവിട്ട് ട്രിപ്പ് അവസാനിപ്പിക്കുന്നത്. റോഡിലെ വലിയ കുഴികള്‍ രൂപപ്പെടുന്നത് ഭാരം കയറ്റിയ വാഹനങ്ങളുടെ യാത്രയ്ക്ക് വലിയ പ്രയാസം സൃഷ്ടിക്കുന്നുണ്ട്. ഇന്നലെ രാവിലെ തിക്കോടി മുതല്‍ മുതല്‍ പയ്യോളി വരെയുള്ള ഭാഗത്ത് കനത്ത ഗതാഗത കുരുക്കാണ് അനുഭവപ്പെട്ടത്.

കളഞ്ഞുകിട്ടിയ സ്വർണാഭരണം ഉടമയെ ഏൽപ്പിച്ച് യുവാക്കൾ മാതൃകയായി

ബാലുശേരി: പനായിയിൽ റോഡിൽ നിന്നും കളഞ്ഞുകിട്ടിയ നാലെ മുക്കാൽ പവന്‍റെ സ്വർണാഭരണം ഉടമയെ ഏൽപ്പിച്ച് യുവാക്കൾ മാതൃകയായി. വള്ളിയോത്ത് കണ്ണോറക്കണ്ടി അഷ്ബാൻ, തോരക്കാട്ടിൽ ഷുഹൈബ് എന്നിവർക്കാണ് സ്വർണാഭരണം കളഞ്ഞുകിട്ടിയത്. ഇവർ സഞ്ചരിച്ച കാർ റോഡരികിൽ നിർത്തി ഡോർ തുറന്ന് പുറത്തിറങ്ങിയ അവസരത്തിൽ റോഡരികിൽ കുട്ടികളുടെ സോക്സിനു മുകളിലായി സ്വർണാഭരണം കണ്ടെത്തുകയായിരുന്നു. കഴിഞ്ഞ തിങ്കളാഴ്ചയായിരുന്നു സംഭവം. ഉടൻ തന്നെ സ്വർണം ബാലുശേരി പോലീസിൽ ഏൽപ്പിക്കുകയായിരുന്നു. അതിനിടെ തന്‍റെ സ്വർണാഭരണം നഷ്ടപ്പെട്ടു എന്ന പരാതിയുമായി പനായി സ്വദേശിനിയായ യുവതി ഇന്നലെ ബാലുശേരി പോലീസ് സ്റ്റേഷനിൽ എത്തുകയും ആഭരണങ്ങൾ തിരിച്ചറിയുകയുമായിരുന്നു. തുടർന്ന് സ്റ്റേഷനിൽ സ്വർണം ഏൽപ്പിച്ച യുവാക്കളെ വിളിച്ചു വരുത്തി പോലീസ് സാന്നിധ്യത്തിൽ ഉടമസ്ഥക്ക് കൈമാറി.

കൂരാച്ചുണ്ട് ലൈബ്രറി പുസ്തക ചർച്ച നടത്തി

കൂരാച്ചുണ്ട്: കൂരാച്ചുണ്ട് ജവഹർ മെമ്മോറിയൽ ലൈബ്രറിയിൽ വായന പക്ഷാചരണത്തിന്‍റെ ഭാഗമായി പുസ്തക ചർച്ച നടത്തി. അനിൽ പി.ഐ. ധർമ്മജൻ എഴുതിയ റാം കെയർ ഓഫ് ആനന്ദി എന്ന നോവലിനെ ആസ്പദമാക്കിയായിരുന്നു പുസ്തക ചർച്ച. പഞ്ചായത്ത് വൈസ് പ്രസിഡന്‍റ് വിൻസി തോമസ് ഉദ്ഘാടനം ചെയ്തു. ടോമി മഠത്തിനാൽ അധ്യക്ഷത വഹിച്ചു. ജോൺസൺ തേനംമാക്കൽ, ജോർജ് ചിരട്ടവയലിൽ, ജോസ് കാരക്കട എന്നിവർ പ്രസംഗിച്ചു. യുവ എഴുത്തുകാരനായ ഇ.ടി. നിധിൻ എഴുതിയ പുസ്തകങ്ങൾ ലൈബ്രറി ഭാരവാഹികൾക്ക് കൈമാറി.

തെയ്യത്തും കടവ് മാതൃക അങ്കണവാടിയിൽ ക്രഷ് പ്രവർത്തനമാരംഭിച്ചു

മുക്കം: കൊടിയത്തൂർ തെയ്യത്തും കടവ് മാതൃക അങ്കണവാടിയിൽ ക്രഷ് പ്രവർത്തനമാരംഭിച്ചു. ആറു മാസം മുതൽ ആറ് വയസ് വരെ പ്രായമുള്ള കുഞ്ഞുങ്ങളെ രാവിലെ ഏഴ് മുതൽ വൈകുന്നേരം ഏഴ് വരെ വർക്കറുടെയും ഹെൽപറുടെയും സംരക്ഷണത്തിൽ സൗജന്യമായി പരിചരിക്കലാണ് പദ്ധതി കൊണ്ട് ഉദ്ദേശിക്കുന്നത്. പുതുതായി ആരംഭിച്ച ക്രഷിന്‍റെ ഉദ്ഘാടനം കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബു നിർവഹിച്ചു. തൊഴിലിനും മറ്റുമായി പോകുന്ന മാതാപിതാക്കൾക്ക് ഇത് ഏറെ പ്രയോജനകരമായിരിക്കുമെന്ന് ദിവ്യ ഷിബു പറഞ്ഞു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ബാബു പൊലുകുന്നത്ത് അധ്യക്ഷത വഹിച്ചു. ഗ്രാമപഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ, ജില്ലാ വനിത ശിശു വികസന ഓഫീസർ സബീന ബീഗം എന്നിവർ മുഖ്യാതിഥികളായി. ബ്ലോക്ക് പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ എം.കെ. നദീറ, പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺമാരായ ആയിശ ചേലപ്പുറത്ത്, മറിയം കുട്ടി ഹസൻ, പഞ്ചായത്ത് മുൻ പ്രസിഡന്‍റ് വി. ഷംലൂലത്ത്, പഞ്ചായത്തംഗങ്ങളായ ടി.കെ. അബൂബക്കർ, എം.ടി. റിയാസ്, ഫാത്തിമാനാസർ എന്നിവർ പ്രസംഗിച്ചു.

ചക്കിട്ടപാറ ഇടവകയിൽ സെന്‍റ് തോമസ് ഡേ ആഘോഷിച്ചു

ചക്കിട്ടപാറ: ചക്കിട്ടപാറ സെന്‍റ് ആന്‍റണീസ് ഇടവകയിൽ സെന്‍റ് തോമസ് ഡേ ആഘോഷിച്ചു. സൺഡെ സ്കൂൾ, മിഷൻ ലീഗ് വാർഷിക ആഘോഷ ചടങ്ങ് വികാരി ഫാ. പ്രിയേഷ് തേവടിയിൽ ഉദ്ഘാടനം ചെയ്‌തു. സൺഡേ സ്കൂൾ പിടിഎ പ്രസിഡന്‍റ് ബിജു എഴുത്താണിക്കുന്നേൽ അധ്യക്ഷത വഹിച്ചു. മത ബോധന രംഗത്ത് 25 വർഷം പൂർത്തിയാക്കിയ പ്രധാനാധ്യാപകൻ ഷിബു മാത്യുവിനെ ഫാ. പ്രിയേഷ്‌ തേവടിയിൽ ഉപഹാരം നൽകി ആദരിച്ചു. ഇടവകയിൽ വിവിധ കാര്യങ്ങളിൽ മികവു പുലർത്തിയ കുട്ടികൾക്കും മുതിർന്നവർക്കും പാരിതോഷികങ്ങളും നൽകി. സ്റ്റാഫ് സെക്രട്ടറി ഷാജി സ്റ്റീഫൻ റിപ്പോർട്ട് അവതരിപ്പിച്ചു. പ്രധാനാധ്യാപകൻ ഷിബു എടാട്ട്, ജോയൽ കൊക്കപ്പുഴ, നോയൽ ചുണ്ടയിൽ, അലൻ തടത്തിൽ എന്നിവർ പ്രസംഗിച്ചു. മേധ ഷൈജൻ കൊട്ടാരം കുന്നേൽ മിഷൻ ലീഗ് റിപ്പോർട്ട് അവതരിപ്പിച്ചു. ആഘോഷത്തിനു മുന്നോടിയായി മിഷൻ ലീഗ് ശാഖാ പ്രസിഡന്‍റ് ആൻ ജോൺ പുലിക്കോട്ടിൽ പതാക ഉയർത്തി. കുട്ടികൾ റാലിയും നടത്തി.

ഞാറ്റുവേല ചന്ത ആരംഭിച്ചു

ചക്കിട്ടപാറ: ചക്കിട്ടപാറ പഞ്ചായത്ത് ഞാറ്റുവേല ചന്ത ആരംഭിച്ചു. പ്രസിഡന്‍റ് കെ. സുനിൽ കർഷകൻ കാപ്പുകാട്ടിൽ ബേബിക്ക് തെങ്ങിൻ തൈ നൽകി ഉദ്ഘാടനം ചെയ്തു. വൈസ് പ്രസിഡന്‍റ് ചിപ്പി മനോജ് അധ്യക്ഷത വഹിച്ചു. വികസന കാര്യ സ്റ്റാൻഡിംഗ് കമ്മിറ്റി ചെയർമാൻ സി.കെ. ശശി, ബ്ലോക്ക് പഞ്ചായത്തംഗം ഗിരിജ ശശി, പഞ്ചായത്തംഗങ്ങളായ വിനീത മനോജ്, ആലീസ് പുതിയേടത്ത്, കൃഷി ഓഫീസർ രേശ്മ സജിത്ത്, ചക്കിട്ടപാറ സഹകരണ ബാങ്ക് പ്രസിഡന്‍റ് പി.പി. രഘുനാഥ്, ബേബി കാപ്പുകാട്ടിൽ, പി.പി. വിശ്വൻ, ബോബി ഓസ്റ്റിൻ, എ.ജി. ഭാസ്ക്കരൻ, കെ.സി. രവീന്ദ്രൻ, സിഡിഎസ് ചെയർപേഴ്സൺ ശോഭ പട്ടാണിക്കുന്നേൽ എന്നിവർ പ്രസംഗിച്ചു.

കൂരാച്ചുണ്ട് ടൗണിൽ തെരുവുനായകൾ യാത്രക്കാർക്ക് ഭീഷണിയാവുന്നു

കൂരാച്ചുണ്ട്: കൂരാച്ചുണ്ട് ടൗണിലും പരിസര പ്രദേശങ്ങളിലും തെരുവുനായകളുടെ ശല്യം രൂക്ഷമാകുന്നതായി പരാതി. സ്കൂൾ പരിസരങ്ങളിലും ഇവ അലഞ്ഞു തിരിഞ്ഞു നടക്കുകയാണ്. കൂരാച്ചുണ്ട് ടൗണിൽ വിവിധ ആവശ്യങ്ങൾക്കായി എത്തുന്ന യാത്രക്കാർ ഏറെ ഭയത്തോടെയാണ് ടൗണിലൂടെ കടന്നുപോകുന്നത്. സ്കൂൾ വിടുന്ന സമയങ്ങളിൽ ഇവ റോഡിലൂടെ കൂട്ടമായി വിലസുന്നത് വിദ്യാർഥികളിൽ ഭീതി ജനിപ്പിക്കുകയാണ്. മാത്രമല്ല യാത്രക്കാരായ പലരും ആക്രമണത്തിനു ഇരയായതായും പറയുന്നുണ്ട്. ബസ് സ്റ്റാൻഡിലും സർക്കാർ സ്ഥാപനങ്ങളുടെ പരിസരങ്ങളിലും മറ്റുമാണ് തെരുവുനായകൾ തമ്പടിക്കുന്നത്. കൂരാച്ചുണ്ട് ടൗണിൽ നിന്നും അടുത്തകാലത്തായി ഒട്ടേറെ പേരെ തെരുവുനായ ആക്രമിച്ചു പരിക്കേൽപ്പിച്ച സംഭവങ്ങളുമുണ്ടായിട്ടുണ്ട്. തെരുവുനായ ശല്യം പരിഹരിക്കുന്നതിനായി കഴിഞ്ഞ വർഷം കൂരാച്ചുണ്ട് ഗ്രാമപഞ്ചായത്ത് സർവകക്ഷി യോഗം ചേരുകയും ഇതിനായി പ്രത്യേക പരിപാടികൾ ആസൂത്രണം ചെയ്യാൻ തീരുമാനമെടുക്കുകയും ചെയ്തിരുന്നുവെങ്കിലും കാര്യക്ഷമമായ ഒരു നടപടികളും സ്വീകരിച്ചിട്ടില്ലെന്നാണ് ആക്ഷേപം. യാത്രക്കാർക്ക് സുരക്ഷ ഉറപ്പാക്കാനായി അടിയന്തര നടപടി സ്വീകരിക്കണമെന്നാണ് ആവശ്യം ഉയരുന്നത്.

റേഷന്‍കടകള്‍ വഴിയുളള മണ്ണെണ്ണ വിതരണം പ്രതിസന്ധിയില്‍

കോഴിക്കോട്: കേന്ദ്രസര്‍ക്കാര്‍ റേഷന്‍കാര്‍ഡുടമകള്‍ക്ക് വീണ്ടും മണ്ണെണ്ണ അനുവദിച്ചുവെങ്കിലും ജില്ലയില്‍ മൊത്തവിതരണ കേന്ദ്രങ്ങളില്ലാത്തതിനാല്‍ വിതരണം പ്രതിസന്ധി നേരിടുന്നു. 957 റേഷന്‍ കടകളുള്ള ജില്ലയില്‍ സിറ്റി റേഷനിങ് ഓഫീസിന്‍റെ പരിധിയിലുള്ള പത്ത് കടകളില്‍ മാത്രമാണ് മണ്ണെണ്ണ വിതരണം ആരംഭിച്ചത്. വടകര, കൊയിലാണ്ടി, താമരശേരി താലൂക്കുകളില്‍ വിതരണം ഇനിയും തുടങ്ങിയിട്ടില്ല. മൊത്തവിതരണ കേന്ദ്രങ്ങളും വാതില്‍പടി സേവനവും ഇല്ലാത്തതാണ് പ്രതിസന്ധിക്ക് കാരണം. കോഴിക്കോട് താലൂക്കില്‍ ചെറൂട്ടി റോഡ്, ബീച്ച് എന്നിവിടങ്ങളില്‍ മാത്രമാണ് മൊത്തവിതരണ കേന്ദ്രമുള്ളത്. ഇവിടെ നിന്നുവേണം മറ്റുള്ള റേഷന്‍ കടകള്‍ക്ക് സ്റ്റോക്ക് എടുക്കാന്‍. ദൂരക്കൂടുതലും ആവശ്യത്തിന് വാഹനങ്ങളുമില്ലാത്തതും റേഷന്‍ വ്യാപാരികള്‍ക്ക് സ്റ്റോക്കെടുക്കാന്‍ സാധിക്കാത്ത അവസ്ഥ സൃഷ്ടിക്കുകയാണ്. ഈ കേന്ദ്രങ്ങളില്‍ താലൂക്കുകളിലെ മുഴുവന്‍ റേഷന്‍ കടകള്‍ക്കും വിതരണം ചെയ്യാനുള്ള മണ്ണെണ്ണയും സ്റ്റോക്കില്ലെന്നാണ് പറയുന്നത്. നേരത്തേയുണ്ടായിരുന്ന അളവിലാണ് ഇവിടെ സ്റ്റോക്ക് എത്തിച്ചിരുന്നത് അത് തീര്‍ന്നു ഇനി പുതിയ സ്റ്റോക്ക് എത്തിയാല്‍ മാത്രമാണ് വിതരണം നടക്കുകയുള്ളൂ. അതേ സമയം, ദൂരക്കൂടുതല്‍ കാരണം മറ്റു താലൂക്കുകളില്‍ പോയി മണ്ണെണ്ണ ഏറ്റെടുക്കാനാകില്ലെന്നാണ് റേഷന്‍ കടക്കാര്‍ പറയുന്നത്. ജില്ലയ്ക്കാവശ്യമായ മണ്ണെണ്ണ ലഭ്യമാക്കാന്‍ സിവില്‍ സപ്ലൈസ് അധികൃതര്‍ക്ക് കഴിഞ്ഞില്ലെന്നും വ്യാപാരികള്‍ കുറ്റപ്പെടുത്തുന്നു.ഏപ്രില്‍ മുതല്‍ ജൂണ്‍ വരെയുള്ള മാസങ്ങളിലെ വിഹിതമാണ് കേന്ദ്രം അനുവദിച്ചിരുന്നത്. നിശ്ചിത തിയതിക്കകം വിതരണം ചെയ്തില്ലെങ്കില്‍ വിഹിതം നഷ്ടമാകും എന്നാല്‍ കേരളത്തില്‍ മണ്ണെണ്ണ വിതരണം വൈകി ആരംഭിച്ചതിനാല്‍ സമയം നീട്ടി നല്‍കണമെന്ന് സംസ്ഥാന സര്‍ക്കാര്‍ കേന്ദ്രത്തിനോട് ആവശ്യപ്പെട്ടിട്ടുണ്ട്. ഓരോ റേഷന്‍ കടകള്‍ക്കും മിനിമം 200 ലിറ്റര്‍ മണ്ണെണ്ണയാണ് വിതരണം ചെയ്യുന്നത്. മൊത്തവിതരണ കേന്ദ്രങ്ങളുടെ കുറവും വാതില്‍പ്പടി സേവനം ഇല്ലാത്തതുമാണ്പ്രശ്‌നം രൂക്ഷമാക്കുന്നത്. പലയിടത്തും മൊത്ത വ്യാപാരികള്‍ക്ക് റേഷന്‍കടകളില്‍ മണ്ണെണ്ണ എത്തിക്കാന്‍ സംവിധാനമില്ല. നീല, വെള്ള, റോസ് കാര്‍ഡ് ഉടമകള്‍ക്ക് മൂന്ന് മാസത്തില്‍ ഒരിക്കല്‍ അര ലീറ്റര്‍ വീതവും എഎവൈ കാര്‍ഡ് (മഞ്ഞ) ഉടമകള്‍ക്ക് ഒരു ലിറ്റര്‍ വീതവുമാണു മണ്ണെണ്ണ ലഭിക്കുന്നത്. റേഷന്‍ കടകളില്‍ വാതില്‍പ്പടി സേവനം വഴി മണ്ണെണ്ണ എത്തിക്കാനുള്ള നടപടി സ്വീകരിച്ചു വരികയണെന്ന് ജില്ലാ സപ്ലൈ ഓഫീസര്‍ കെ.കെ. മനോജ് കുമാര്‍ അറിയിച്ചു.

ചായ കെറ്റിലിൽ പുഴുക്കളെ കണ്ടെത്തി; കോട്ടപ്പറമ്പ് ആശുപത്രിയുടെ കാന്‍റിൻ അടച്ചുപൂട്ടി

കോഴിക്കോട്: പുഴുക്കളെ കണ്ടെത്തിയതിനെ തുടർന്ന് കോഴിക്കോട് കോട്ടപ്പറമ്പ് അമ്മയും കുഞ്ഞും ആശുപത്രിയുടെ കാന്‍റിൻ കോർപറേഷൻ ആരോഗ്യവിഭാഗം പൂട്ടിച്ചു. ജീവനക്കാർ ഒരു പരിപാടിയിലേക്ക് വാങ്ങിയ ചായയുടെ കെറ്റിലിൽ ആണ് പുഴുക്കളെ കണ്ടത്. തുടർന്ന് കോർപറേഷൻ ആരോഗ്യവിഭാഗത്തെ വിവരമറിയിക്കുകയായിരുന്നു. ഇന്നലെ വൈകുന്നേരമായിരുന്നു സംഭവം. ഉദ്യോഗസ്ഥര്‍ സ്ഥലത്തെത്തി വിശദമായ പരിശോധന നടത്തി.

പരിസ്ഥിതി സംരക്ഷണത്തിന് വേറിട്ട ഇടപെടലുമായി താമരശേരി രൂപത

താമരശേരി: താമരശേരി രൂപത സ്ഥാപിതമായതിന്‍റെ നാൽപതാം വാർഷികാഘോഷത്തിന്‍റെ ഭാഗമായി കോഴിക്കോട്, മലപ്പുറം ജില്ലകളിലുള്ള രൂപതയിലെ വീടുകളിൽ വൃക്ഷത്തൈകൾ വിതരണം ചെയ്യുന്ന പദ്ധതിയുടെ ഉദ്ഘാടനം ബിഷപ് മാർ റെമീജിയോസ് ഇഞ്ചനാനിയിൽ കല്ലുരുട്ടി പള്ളിയിൽവച്ച് നിർവഹിച്ചു. പരിസ്ഥിതി സംരക്ഷണം ജീവിതത്തിന്‍റെ ഭാഗമാക്കണമെന്നും പ്രകൃതിയോടും വൃക്ഷങ്ങളോടുമുള്ള സ്നേഹം ദൈവ സ്നേഹത്തിന്‍റെ ഭാഗമാണെന്നും ബിഷപ് ഓർമിപ്പിച്ചു. ഇൻഫാമിന്‍റെ നേതൃത്വത്തിൽ സൗജന്യമായാണ് പന്ത്രണ്ടായിരത്തിലധികം വൃക്ഷത്തൈകൾ വിതരണം ചെയ്യുന്നത്. റൂബി ജൂബിലിയുടെ ഭാഗമായി ജൂൺ മാസത്തിൽ ബിഷപിന്‍റെ നേതൃത്വത്തിൽ വയനാട് ചുരം ശുചിയാക്കുകയും എല്ലാ ദേവാലയങ്ങളിലും സ്ഥാപനങ്ങളിലും മാലിന്യങ്ങൾ വേർതിരിച്ച് സംസ്കരിക്കാനായി ബാസ്കറ്റുകൾ സ്ഥാപിക്കുകയും ചെയ്തിരുന്നു. ഇൻഫാം റീജണൽ ഡയറക്ടർ ഫാ. ജോസ് പെണ്ണാപറമ്പിൽ, ഫാ. ജിൽസൻ തയ്യിൽ, ഇൻഫാം പ്രോഗ്രാം കോ ഓർഡിനേറ്റർ ഫാ. സായി പാറൻകുളങ്ങര, ഫാ. ജോസഫ് കിളിയംപറമ്പിൽ തുടങ്ങിയവർ നേതൃത്വം നൽകി.

വാണിമേലിലും കുറുവന്തേരിയിലും നായയുടെ പരാക്രമം; അഞ്ചുപേർക്ക് കടിയേറ്റു

നാദാപുരം: വാണിമേലിലും ,കുറുവന്തേരിയിലും തെരുവുനായയുടെ പരാക്രമത്തില്‍ അഞ്ചുപേർക്ക് കടിയേറ്റു. വാണിമേലിൽ രണ്ടര വയസുകാരൻ, ക്രസന്‍റ് ഹൈസ്കൂൾ എട്ടാം ക്ലാസ് വിദ്യാര്‍ഥി ഉൾപ്പെടെ നാല് പേരെയും കുറുവന്തേരിയിൽ ഒരാളെയുമാണ് തെരുവ് പട്ടി കടിച്ച് പരിക്കേൽപ്പിച്ചത്. ഭൂമിവാതുക്കൽ മുളിവയൽ റോഡിലാണ് സംഭവം. രാവിലയും ഉച്ചയ്ക്കും വ്യത്യസ്ത സമയങ്ങളിലാണ് പരാക്രമം. മാതാവിനൊപ്പം റോഡിലെത്തിയപ്പോഴാണ് രണ്ടര വയസുകാരനെ നായ അക്രമിച്ചത്. വയറിനാണ് കടിയേറ്റത്. ഇതിന് പിന്നാലെ വീടിന്‍റെ മുറ്റത്ത് നിൽക്കുമ്പോഴാണ് 40 കാരനെ പിന്നിൽ നിന്നെത്തി കടിച്ചത്. ഓടി പോയ നായയെ നാട്ടുകാർ തല്ലി കൊന്നു. ചെക്യാട് കുറുവന്തേരിയിൽ 65 കാരനെയാണ് കുറുവന്തേരി യുപി സ്കൂൾ പരിസരത്ത് റോഡിൽ നായ കടിച്ചത്. രണ്ട് ദിവസം മുമ്പ് വാണിമേലിൽ നായ പിന്നാലെ ഓടി പേടിച്ചോടിയ കുട്ടിയെ പിന്തുടർന്ന് നായ കടിച്ച് പരിക്കേൽപ്പിച്ചിരുന്നു.

മാഹി കനാല്‍: കോട്ടപ്പള്ളിയില്‍ പുതിയ പാലം നിര്‍മാണത്തിന് കരാര്‍

17.65 കോടി ചെലവിടും കോഴിക്കോട്: കോവളം-ബേക്കല്‍ പശ്ചിമതീര ജലപാതയുടെ പ്രധാന ഭാഗമായ വടകര-മാഹി കനാല്‍ വികസനം പൂര്‍ത്തിയാക്കുന്നതിനായി കനാലിന് കുറുകെയുള്ള പ്രധാന പാലമായ കോട്ടപ്പള്ളി പാലം പുനര്‍നിര്‍മാണത്തിന് കരാര്‍ പ്രാബല്യത്തില്‍. ഊരാളുങ്കല്‍ ലേബര്‍ കോണ്‍ട്രാക്ട് കോഓപറേറ്റീവ് സൊസൈറ്റിക്കാണ് കരാര്‍ ലഭിച്ചത്. 17.65 കോടി ചെലവിട്ടുള്ള പുതിയ പാലത്തിന്‍റെ പ്രവൃത്തി ഉടന്‍ ആരംഭിക്കും. വടകരയില്‍നിന്ന് കുറ്റ്യാടിയിലേക്കുള്ള പ്രധാന റോഡുകളില്‍ ഒന്നായ കാവില്‍-തീക്കുനി-കുറ്റ്യാടി റോഡിലെ കോട്ടപ്പള്ളിയിലാണ് പഴയ പാലം പൊളിച്ച് ആധുനിക രീതിയില്‍ പുതിയ ആര്‍ച്ച് പാലം നിര്‍മിക്കുക. നിലവില്‍ 11 മീറ്റര്‍ മാത്രമാണ് പാലത്തിനടിയില്‍ കനാലിന്‍റെ വീതി. കനാലിന് 32 മീറ്റര്‍ വീതി ആവശ്യമായതിനാല്‍ പുതിയപാലം പണിതാല്‍ മാത്രമേ ജലഗതാഗതം സാധ്യമാകൂ. ദേശീയ ജലപാതാ മാനദണ്ഡങ്ങള്‍ക്ക് വിധേയമായാണ് പാലം നിര്‍മിക്കുക. കനാല്‍ നവീകരിക്കുമ്പോള്‍ നീളംകുറഞ്ഞ സ്പാനിലുള്ള പാലം ജലഗതാഗതത്തിന് തടസമാകുമെന്നതിനാലാണ് പുതിയ പാലം നിര്‍മിക്കാന്‍ ഉള്‍നാടന്‍ ജലഗതാഗതവകുപ്പ് ശിപാര്‍ശ നല്‍കിയത്. പ്രവൃത്തി പൂര്‍ത്തിയാകുന്നതുവരെ താത്കാലിക പാലവും റോഡും നിര്‍മിക്കും. ഉള്‍നാടന്‍ ജലഗതാഗത വകുപ്പിനാണ് നിര്‍വഹണ ചുമതല. സംസ്ഥാന സര്‍ക്കാരിന്‍റെ പ്രധാന പദ്ധതികളിലൊന്നാണ് വടകര-മാഹി കനാല്‍ ദേശീയ ജലപാത നിലവാരത്തിലേക്ക് ഉയര്‍ത്തല്‍. 17.61 കിലോമീറ്റര്‍ ദൈര്‍ഘ്യമുള്ള മാഹി കനാലില്‍ കല്ലേരി, പറമ്പില്‍, വേങ്ങോളി എന്നിവിടങ്ങളില്‍ പുതിയ പാലം നിര്‍മിച്ചിട്ടുണ്ട്. എടച്ചേരി കളിയാംവെള്ളി പാലത്തിന് ഭരണാനുമതിയും ലഭ്യമായി. തിരുവള്ളൂരിലെ കന്നിനട പാലമാണ് പുതുക്കിപ്പണിയാനുള്ള മറ്റൊരു പാലം.

ആരോഗ്യമന്ത്രിക്ക് മൈനസ് മാര്‍ക്കെന്ന് പി.കെ.ഫിറോസ് : യൂത്ത് ലീഗ് മാര്‍ച്ചില്‍ സംഘര്‍ഷം

കോഴിക്കോട്: കേരളത്തിന്‍റെ ആരോഗ്യ മേഖലയെ കുളം തോണ്ടിയ ആരോഗ്യ മന്ത്രി വീണാ ജോർജിനെ മന്ത്രി സ്ഥാനത്തുനിന്നും മാറ്റണമെന്നാവശ്യപ്പെട്ട് യൂത്ത് ലീഗ് ഡിഎംഒ ഓഫീസ് മാര്‍ച്ച് നടത്തി.മുൻ ആരോഗ്യമന്ത്രി ശൈലജ ടീച്ചറെ ഒതുക്കിവന്ന വീണാ ജോർജ് ആരോഗ്യ വകുപ്പിനെ പൂർണമായും ഒതുക്കിയെന്ന് മാര്‍ച്ച് ഉദ്ഘാടനം ചെയ്ത മുസ്‌ലിം യൂത്ത് ലീഗ് സംസ്ഥാന ജനറൽ സെക്രട്ടറി പി.കെ. ഫിറോസ് പറഞ്ഞു. സർജറിക്ക് വേണ്ട പഞ്ഞിയും നൂലും ഇല്ലാത്ത സർക്കാർ ആശുപത്രികളാണ് ഇന്ന് കേരളത്തിലുള്ളത്. കേരളത്തിലെ മന്ത്രിമാരുടെ പ്രവർത്തനങ്ങൾ വിലയിരുത്തി മാർക്കിട്ടാൽ അധികപേർക്കും പൂജ്യം മാർക്കാകുമെങ്കിലും ആരോഗ്യ മന്ത്രി വീണാ ജോർജിന് മൈനസ് മാർക്കായിരിക്കുമെന്നും അദ്ദേഹം പരിഹസിച്ചു. പ്രതിഷേധ പ്രകടനം എരഞ്ഞിപ്പാലത്ത് നിന്നും ആരംഭിച്ചു. സിവിൽ സ്റ്റേഷൻ കവാടത്തിൽ പോലീസ് ബാരിക്കേഡ് വെച്ച് പ്രകടനക്കാരെ തടഞ്ഞു. തുടര്‍ന്ന് സംഘര്‍ഷമുണ്ടായി. തുടർന്ന് പ്രകടനക്കാർക്ക് നേരെ പോലീസ് നാല് തവണ ജലപീരങ്കി പ്രയോഗിച്ചു. ജല പീരങ്കിയിൽ പ്രവർത്തകർക്ക് പരിക്കേറ്റു. ജില്ലാ പ്രസിഡന്‍റ് മിസ്ഹബ് കീഴരിയൂർ അധ്യക്ഷത വഹിച്ചു. വൈകുന്നേരം മാവൂര്‍ റോഡിലെ കെഎസ്ആര്‍ടിസി ടെര്‍മിനലിന് മുന്നിലും യൂത്ത് ലീഗ് പ്രവര്‍ത്തകര്‍ റോഡ് ഉപരോധിച്ചു. കോട്ടയം മെഡിക്കല്‍ കോളജിലെ കെട്ടിടം തകര്‍ന്ന് വീണ് സ്ത്രീ മരിച്ച സംഭവത്തില്‍ ആരോഗ്യമന്ത്രിയുടെ രാജി ആവശ്യപ്പെട്ടായിരുന്നു സമരം.പ്രവര്‍ത്തകരെ പോലീസ് അറസ്റ്റ് ചെയ്ത് നീക്കി.

ദീപിക നമ്മുടെ ഭാഷ പദ്ധതി

കട്ടിപ്പാറ നസ്രത്ത് യുപി സ്കൂൾ കട്ടിപ്പാറ: ദീപിക നമ്മുടെ ഭാഷ പദ്ധതിക്ക് കട്ടിപ്പാറ നസ്രത്ത് യുപി സ്കൂളിൽ തുടക്കമായി. പദ്ധതിയുടെ ഉദ്ഘാടനം ദീപിക ഫ്രണ്ട്സ് ക്ലബ് താമരശേരി ഫൊറോന പ്രസിഡന്‍റ് ജോസ് തുരുത്തിമറ്റം സ്കൂൾ ലീഡർ ഫെലിക്സിന് ദീപിക പത്രം നൽകി നിർവഹിച്ചു. ദീപിക ഫ്രണ്ട്സ് ക്ലബ് കട്ടിപ്പാറ യൂണിറ്റാണ് പത്രം സ്പോൺസർ ചെയ്തിരിക്കുന്നത്. യോഗത്തിൽ സ്കൂൾ മാനേജർ ഫാ. മിൽട്ടൺ മുളങ്ങാശേരി, സ്കൂൾ ഹെഡ്മിസ്ട്രസ് സിസ്റ്റർ ബ്ലെസി, ഡിഎഫ്സി സെക്രട്ടറി ജോസ് കൊച്ചോലിക്കൽ, ജെയിംസ് വയ്പ്പു കാട്ടിൽ, ആപ്പി ചിറ്റ ക്കാട്ടുകുഴി, ദീപിക ഏരിയാ മാനേജർ ഷാജി ജോസ്, ദീപിക ഏജന്‍റ് കുഞ്ഞുമുഹമ്മദ് കട്ടിപ്പാറ, സ്റ്റാഫ് സെക്രട്ടറി കെ.ജി. ഷിബു എന്നിവർ പ്രസംഗിച്ചു.

പുതിയ ബസ് സ്റ്റാൻഡ് തീപിടിത്തമുണ്ടായിട്ട് ഒന്നരമാസം : കടകളില്‍ ഇപ്പോഴും ജനറേറ്റര്‍ തന്നെ ശരണം; വാടക ഒഴിവാക്കി നല്‍കണമെന്ന് വ്യാപാരികള്‍

കോഴിക്കോട്: കോഴിക്കോട് മൊഫ്യൂസിൽ ബസ് സ്റ്റാൻഡിലെ കെട്ടിടത്തിൽ തീപിടിത്തമുണ്ടായി ഒന്നരമാസം കഴിഞ്ഞിട്ടും കെട്ടിടത്തിലെ കടകളില്‍ വൈദ്യുതി എത്തിക്കാന്‍ കഴിയാത്തതിനെതിരേ വ്യാപാരികള്‍. വൈദ്യുതി കണക്‌ഷൻ ലഭിക്കാത്തതിനാൽ കടയുടമകൾ‍ ‌ ജനറേറ്ററുകൾ വാടകയ്ക്ക് എടുത്ത് പ്രവർത്തിപ്പിക്കുകയാണ്. രാവിലെ ഒമ്പതുമുതല്‍ രാത്രി ഒമ്പതുവരെയാണ് ഇതിൽനിന്നു വൈദ്യുതി ലഭിക്കുക. ഉപയോഗം അനുസരിച്ച് പല കടകൾക്കും പല നിരക്കിലാണ് വാടക നൽകേണ്ടി വരുന്നത്. കൂടുതൽ ഫ്രീസറും ജ്യൂസറും ഉപയോഗിക്കുന്ന കൂൾബാറുകളിൽ പലർക്കും ദിവസം 2800 രൂപ വരെ വാടക നൽകേണ്ടി വരുന്നു. കടവാടകയും ജനറേറ്റർ വാടകയും കൂട്ടിയാൽ കച്ചവടം മുന്നോട്ടു കൊണ്ടുപോകാൻ പലരും ബുദ്ധിമുട്ടുകയാണ്. കച്ചവടം പകുതിയായി കുറഞ്ഞു. വിവിധ വകുപ്പുകൾ അന്വേഷിച്ച് റിപ്പോർട്ടുകൾ സമർപ്പിച്ചെങ്കിലും നടപടികൾ എങ്ങുമെത്തിയില്ല. ഈ പ്രതിസന്ധിയില്‍ രണ്ട് മാസത്തെയെങ്കിലും വാടക ഒഴിവാക്കി നല്‍കാന്‍ കോര്‍പറേഷന്‍ അധികൃതര്‍ തയാറാകണമെന്നാണ് വ്യാപാരികള്‍ ആവശ്യപ്പെടുന്നത്‌. 15 ദിവസം എന്ന് പറഞ്ഞ് തുടങ്ങിയ പ്രവൃത്തികളാണ് അനന്തമായി നീളുന്നത്. മേയ് 18ന് വൈകുന്നേരം അഞ്ചിനാണ് മൊഫ്യൂസിൽ ബസ്‌സ്റ്റാൻഡ് കോംപ്ലക്സിന്‍റെ പടിഞ്ഞാറുവശത്തെ കെട്ടിടത്തിന്‍റെ മുകൾനിലകളിൽ തീപടർന്നത്. നിമിഷനേരം കൊണ്ട് തീ പടർന്നു പിടിച്ചു. 12 മണിക്കൂർ നീണ്ട ശ്രമങ്ങൾക്കൊടുവിൽ 19ന് രാവിലെ അഞ്ചരയോടെയാണ് തീയണച്ചത്. കോർപറേഷന്‍റെ ഉടമസ്ഥതയിലുള്ള കെട്ടിടത്തിലുണ്ടായ തീപിടിത്തം നിയന്ത്രിക്കാൻ അനധികൃത നിർമാണങ്ങൾ തടസ്സമായെന്ന ആരോപണം ഉയർന്നിരുന്നു. അഗ്നിരക്ഷാസേന, കെഎസ്ഇബി, പോലീസ് തുടങ്ങിയവരുടെ അന്വേഷണ റിപ്പോർട്ടുകൾ‍ ചീഫ് സെക്രട്ടറിക്കു കൈമാറുകയും ചെയ്തു. പിന്നീടാണ് കടകൾ തുറന്നുപ്രവർത്തിക്കാൻ അനുമതി കൊടുത്തത്. തീപിടിത്തമുണ്ടായശേഷം കെട്ടിടത്തില്‍ പ്രവര്‍ത്തിക്കുന്ന മറ്റ് കടകളില്‍ കച്ചവടം കുറഞ്ഞതായും വ്യാപാരികള്‍ ചുണ്ടിക്കാട്ടുന്നു.

ഉന്നത വിജയികളെ ആദരിച്ചു

തിരുവമ്പാടി: ഓയിസ്ക തിരുവമ്പാടി ചാപ്റ്ററിന്‍റെ ആഭിമുഖ്യത്തിൽ എസ്എസ്എൽസി പരീക്ഷയിൽ ഉന്നത വിജയം കരസ്ഥമാക്കിയ പുന്നക്കൽ ഒളിക്കൽ ഉന്നതിയിലെ നാലു വിദ്യാർഥികളെയും അവരുടെ ട്യൂഷൻ ടീച്ചറെയും ആദരിച്ചു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ പരിപാടി ഉദ്ഘാടനം ചെയ്തു. ഓയിസ്ക തിരുവമ്പാടി ചാപ്റ്റർ പ്രസിഡന്‍റ് റോബർട്ട് നെല്ലിക്ക തെരുവിൽ അധ്യക്ഷത വഹിച്ചു. സണ്ണി തോമസ്, പഞ്ചായത്ത് മെമ്പർമാരായ ഷൈനി ബെന്നി, ലിസി സണ്ണി, ട്യൂഷന് വേണ്ട സാമ്പത്തിക സഹായം ചെയ്ത സൗപർണിക ക്ലബ് ഭാരവാഹി സജി, ഓയിസ്ക മെമ്പർ ലിബീഷ് പുരിയിടം എന്നിവർ പ്രസംഗിച്ചു.

പോക്സോ കേസിൽ പിടിയിൽ

കോഴിക്കോട് : വിദ്യാര്‍ഥിനിക്കെതിരേ ലൈംഗിക പ്രദർശനം നടത്തിയ 19 കാരൻ പിടിയിൽ.ഒളവണ്ണ മാത്തറ സ്വദേശി പുൽപറമ്പിൽ വീട്ടിൽ അബിൻ ചന്ദ് കൃഷ്ണനെയാണ് പന്തീരാങ്കാവ് പോലീസ് പോക്സോ നിയമപ്രകാരം അറസ്റ്റ് ചെയ്തത്. മെയ് 28 ന് 11 വയസ് പ്രായമുള്ള വിദ്യാര്‍ഥിയുടെ വീട്ടിലേക്ക് പ്രതി അതിക്രമിച്ച് കയറി ലൈംഗിക പ്രദർശനം നടത്തുകയായിരുന്നു. അറസ്റ്റ് രേഖപ്പെടുത്തിയ ശേഷം കോടതിയിൽ ഹാജരാക്കി.

കർഷക സഭയും ഞാറ്റുവേല ചന്തയും പച്ചക്കറിത്തൈ വിതരണവും

താമരശേരി: ഓമശേരി പഞ്ചായത്തിന്‍റെ നേതൃത്വത്തിൽ ഓമശ്ശേരിയിൽ കർഷക സഭയും ഞാറ്റുവേല ചന്തയും സംഘടിപ്പിച്ചു. കാർഷിക വികസന സമിതി അംഗങ്ങളുൾപ്പടെ നൂറിലധികം കർഷകർ പഞ്ചായത്തിലെ വിവിധ വാർഡുകളിൽ നിന്നായി കർഷക സഭയിൽ പങ്കെടുത്തു. കർഷക സഭാംഗങ്ങൾക്ക്‌ ഞാറ്റു വേല ചന്തയുടെ ഭാഗമായി അഞ്ചിനം ഗുണമേന്മയുള്ള പച്ചക്കറിത്തൈകൾ സൗജന്യമായി വിതരണവും ചെയ്തു. മുളക്‌,വഴുതന,തക്കാളി,വെണ്ട,പയർ തുടങ്ങിയവയുടെ തൈകളാണ്‌ കർഷകർക്ക്‌ നൽകിയത്‌.പഞ്ചായത്ത്‌ പ്രസിഡന്‍റ് കെ.കരുണാകരൻ ഉദ്ഘാടനം ചെയ്തു.വൈസ്‌ പ്രസിഡന്‍റ് ഫാത്വിമ അബു അദ്ധ്യക്ഷത വഹിച്ചു..

പൂപ്പൊലി 2025 ഉദ്ഘാടനം ചെയ്തു

ആനക്കാംപൊയിൽ: ആനക്കാംപൊയിൽ സെന്‍റ് മേരീസ് യുപി സ്കൂളിൽ പൂപ്പൊലി 2025 ചെണ്ടുമല്ലി കൃഷി സ്കൂൾ അങ്കണത്തിൽ മാനേജർ ഫാ. അഗസ്റ്റിൻ പാട്ടാനിയിൽ ഉദ്ഘാടനം ചെയ്തു. പിടിഎ പ്രസിഡന്‍റ് വി.ജെ. ഫ്രിജിൽ അധ്യക്ഷനായി. തിരുവമ്പാടി റോട്ടറി ക്ലബ്ബിന്‍റെ സഹായത്തോടെയാണ് ചെണ്ടുമല്ലി കൃഷി നടത്തുന്നത്. ചടങ്ങിൽ ഹെഡ്മാസ്റ്റർ റോയി ജോസ്, റോട്ടറി ക്ലബ് ഭാരവാഹികളായ ഡോ. ബെസ്റ്റി ജോസ്, ഡോ. സന്തോഷ് സ്കറിയ, പി.ഹാരിസ് , എൽദോസ് ബേസിൽ, തങ്കച്ചൻ ചേന്നമ്പള്ളി അധ്യാപകരായ എബി ദേവസ്യ, ആലീസ് വി തോമസ്, എൻ.ജെ. ദീപ , ശിവനന്ദ ബിബിൻ, ഹവ്വ സൈനബ് എന്നിവർ പ്രസംഗിച്ചു.

വായന മനുഷ്യനെ നന്മയിലേക്ക് നയിക്കണം: എം.എൻ. കാരശേരി

മുക്കം: വായന മനുഷ്യനെ നന്മയിലേക്ക് നയിക്കണമെന്നും എല്ലാം വായിക്കുന്നതിനു പകരം തെരഞ്ഞെടുത്ത് വായിക്കുന്നതാണ് ഗുണകരമാവുകയെന്ന് എഴുത്തുകാരൻ എം.എൻ. കാരശേരി പറഞ്ഞു. സമൂഹ തിന്മക്കെതിരേ പ്രതികരിക്കുന്നവരാവണം എഴുത്തുകാർ. ഒഴുക്കിനെതിരേ നീന്താനാണ് സമൂഹം ആവശ്യപ്പെടുന്നത്. തിന്മ വർധിക്കുമ്പോൾ നന്മയെ കണ്ടെത്താനും അവ പ്രചരിപ്പിക്കാനും എഴുത്തുകാർ സമയം കണ്ടെത്തണമെന്നും അദ്ദേഹം അഭിപ്രായപ്പെട്ടു. കാരശേരിയുടെ എഴുപത്തിയഞ്ചാം ജന്മദിനത്തോടനുബന്ധിച്ച് കാരശേരി ബാങ്ക് സംഘടിപ്പിച്ച ആദരം ചടങ്ങിൽ പ്രസംഗിക്കുകയായിരുന്നു അദ്ദേഹം. ബാങ്ക് ഡയറക്ടർ ഗസീബ് ചാലൂളി അധ്യക്ഷത വഹിച്ചു. കാഞ്ചനമാല മുഖ്യ പ്രഭാഷണം നടത്തി. സി.കെ. കാസിം, സിറാജുദ്ദീൻ, എ.വി. സുധാകരൻ, മുക്കം വിജയൻ, മുക്കം ബാലകൃഷ്ണൻ, റീനപ്രകാശ്, ഡെന്നി ആന്‍റണി, കണ്ടൻ പട്ടർച്ചോല, കാരശേരി ബാങ്ക് ഡയറക്ടർമാരായ വിനോദ് പുത്രശേരി, കാരാട്ട് കൃഷ്ണൻകുട്ടി, റോസമ്മ ബാബു, അലവിക്കുട്ടി പറമ്പാടൻ എന്നിവർ പ്രസംഗിച്ചു.

ഐഐഎസ്ആര്‍ ഗോള്‍ഡന്‍ ജൂബിലി ആഘോഷങ്ങള്‍ക്ക് സമാപനം

കോഴിക്കോട്: സുഗന്ധവ്യഞ്ജന ഗവേഷണ മേഖലയില്‍ അമ്പതുവര്‍ഷം പൂര്‍ത്തീകരിച്ച് ഐസിഎആര്‍ ഭാരതീയ സുഗന്ധവിള ഗവേഷണ സ്ഥാപനം.ഒരുവര്‍ഷം നീണ്ട സുവര്‍ണജൂബിലി ആഘോഷങ്ങള്‍ക്ക് ഐഐഎസ്ആറിലെ മുന്‍ ജീവനക്കാരെ ആദരിച്ചുകൊണ്ടായിരുന്നു സമാപനം.കേരള കാര്‍ഷിക സര്‍വകലാശാല വൈസ് ചാന്‍സലര്‍ ഡോ. ബി. അശോക് മുഖ്യാതിഥയായിരുന്നു. ഡെപ്യൂട്ടി ഡയറക്ടര്‍ ജനറല്‍ ഡോ. സഞ്ജയ് കുമാര്‍ സിംഗ് അധ്യക്ഷത വഹിച്ചു. കാലിക്കറ്റ് സര്‍വകലാശാല വൈസ് ചാന്‍സലര്‍ പ്രഫ. പി.രവീന്ദ്രന്‍, ഐസിഎആര്‍ അസിസ്റ്റന്റ് ഡയറക്ടര്‍ ജനറല്‍ ഡോ. സുധാകര്‍ പാണ്ഡെ എന്നിവര്‍ വിശിഷ്ടാതിഥികളായി. പുതിയതായി സ്ഥാപിച്ച അഡ്വാന്‍സ്ഡ് ബയോകണ്‍ട്രോള്‍ ലബോറട്ടറിയുടെ ഉദ്ഘാടനം, സുവര്‍ണ ജൂബിലി ഹാളിന്റെ ശിലാസ്ഥാപനം എന്നിവ ഡോ. അശോക് നിര്‍വഹിച്ചു. ഐഐഎസ്ആര്‍ ഡയറക്ടര്‍ ഡോ. ആര്‍ ദിനേശ്, ഡോ. ബാലചന്ദ്ര ഹെബ്ബാര്‍ , ഡോ. ജി. ബൈജു,ഡോ. ഹോമി ചേറിയാന്‍, ഡോ. മനോജ് പി. സാമുവല്‍, രാംകുമാര്‍ മേനോന്‍ , ഡോ. വി.എ. പാര്‍ത്തസാരഥി, ഡോ. കെ. നിര്‍മല്‍ ബാബു എന്നിവര്‍ പ്രസംഗിച്ചു.

കൊടിയത്തൂരിൽ ഞാറ്റുവേല ചന്തയും കർഷക സഭയും ആരംഭിച്ചു

മുക്കം: തിരുവാതിര ഞാറ്റുവേലയോടനുബന്ധിച്ച് കൊടിയത്തൂരിൽ ഞാറ്റുവേല ചന്തയും കർഷക സഭയും ആരംഭിച്ചു. കൃഷിഭവന്‍റെ ആഭിമുഖ്യത്തിലാണ് ചന്തയാരംഭിച്ചത്. കാർഷിക വിളകൾ നടുന്നതിനും വിത്ത് പാകുന്നതിനും തിരുവാതിര ഞാറ്റുവേല കാലയളവ് വളരെ ഉത്തമമാണെന്ന് കരുതപ്പെടുന്നു. ഈ സമയത്ത് കർഷകർക്ക് നടീൽ വസ്ത്തുക്കൾ ലഭ്യമാക്കുക എന്ന ലക്ഷ്യത്തോടെയാണ് ഞാറ്റുവേല ചന്തകൾ സംഘടിപ്പിക്കുന്നത്. മികച്ചയിനം ഫലവൃക്ഷ തൈകൾ, നടീൽ വസ്തുക്കൾ, തെങ്ങിൻ തൈകൾ, പച്ചക്കറിതൈകൾ എന്നിവ മിതമായ നിരക്കിൽ ചന്തയിൽ ലഭിക്കും. ഞാറ്റുവേല ചന്ത പഞ്ചായത്ത്‌ പ്രസിഡന്‍റ് ദിവ്യ ഷിബു ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർമാൻമാരായ ബാബു പൊലുകുന്ന്, ആയിഷ ചേലപ്പുറത്ത്, മറിയം കുട്ടി ഹസൻ, പഞ്ചായത്ത് അംഗങ്ങളായ വി. ഷംലൂലത്ത്, ഫാത്തിമ നാസർ, കൃഷി അസിസ്റ്റന്‍റുമാരായ കെ. നിഷ, എം.എസ്. നഷിദ, എ.പി. ബീന, എഡിസി അംഗങ്ങൾ തുടങ്ങിയവർ പങ്കെടുത്തു.

കക്കയം ഡാം റോഡിൽ മരം വീണ് ഗതാഗതം തടസപ്പെട്ടു

കൂരാച്ചുണ്ട്: കക്കയം ഡാം സൈറ്റ് റോഡിൽ ശക്തമായ കാറ്റിലും മഴയിലും മരം വീണ് ഗതാഗതം തടസപ്പെട്ടു. ഇന്നലെ രാവിലെ പതിനൊന്നോടുകൂടി കക്കയം ഒന്നാം പാലത്തിന് സമീപമാണ് മരം വീണത്. ഇതേ തുടർന്ന് രണ്ട് മണിക്കൂറോളം ഗതാഗതം തടസപ്പെട്ടു. ഡാം സൈറ്റിലുള്ള കെഎസ്ഇബി ഉദ്യോഗസ്ഥർ, വനം വകുപ്പ് ഉദ്യോഗസ്ഥർ, പ്രദേശവാസികൾ എന്നിവരുടെയും വിനോദ സഞ്ചാരികളുടെയും വാഹനങ്ങൾ കുടുങ്ങി. തുടർന്ന് കക്കയം ഫോറസ്റ്റ് ഡെപ്യൂട്ടി റേഞ്ച് ഓഫീസർ സി. വിജിത്തിന്‍റെ നേതൃത്വത്തിൽ വനംവകുപ്പിന്‍റെ റാപ്പിഡ് റെസ്പോൺസ് ടീം അംഗങ്ങളും നാട്ടുകാരും സ്ഥലത്തെത്തി മരം മുറിച്ചു നീക്കി ഗതാഗതം പുനസ്ഥാപിച്ചു. ഡാം സൈറ്റ് റോഡ് അരികിൽ ഇത്തരത്തിൽ നിലം പതിക്കാറായി നിൽക്കുന്ന നിരവധി മരങ്ങളുണ്ട്. ഇവയെല്ലാം യാത്രക്കാർക്ക് ഭീഷണിയായി തീർന്നിട്ടുണ്ട്.

കോഴിക്കോട് സെന്‍ട്രല്‍ ഫിഷ്മാര്‍ക്കറ്റ്: പഴയ കെട്ടിടം പൊളിക്കല്‍ ടെന്‍ഡര്‍ നടപടികളിലേക്ക്

കോഴിക്കോട്: കോഴിക്കോട് സെന്‍ട്രല്‍ മാര്‍ക്കറ്റില്‍ മത്സ്യകച്ചവടത്തിനായി നിര്‍മിക്കുന്ന ആധുനിക ഷോപ്പിങ് മാളിന്‍റെ പ്രവൃത്തി ഉടന്‍ ആരംഭിക്കും. പഴയ കെട്ടിടം പൊളിച്ചുമാറ്റാന്‍ ടെന്‍ഡര്‍ നടപടികളിലേക്ക് കടക്കാന്‍ ജില്ലാ കളക്ടര്‍ സ്‌നേഹില്‍ കുമാര്‍ സിങ്ങിന്‍റെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. കോഴിക്കോട് സെന്‍ട്രല്‍ ഫിഷ് മാര്‍ക്കറ്റ് നിര്‍മാണം, ചാലിയം ഫിഷിംഗ് വില്ലേജ് എന്നീ പദ്ധതികളുമായി ബന്ധപ്പെട്ടാണ് യോഗം ചേര്‍ന്നത്. 55.17 കോടി ചെലവിട്ടാണ് മാര്‍ക്കറ്റ് നിര്‍മിക്കുക. കോര്‍പറേഷന്‍ വാടകക്കെടുത്ത സ്ഥലത്തേക്ക് മത്സ്യകച്ചവടക്കാരെ പുനരധിവസിപ്പിച്ചുവരികയാണെന്നും കോര്‍പറേഷന്‍ കണ്ടെത്തി നല്‍കിയ സ്ഥലത്ത് താല്‍ക്കാലിക സംവിധാനം ഒരുക്കല്‍ നടപടികള്‍ പൂര്‍ത്തിയാകുന്നതായും അധികൃതര്‍ അറിയിച്ചു. 2.50 കോടി ചെലവില്‍ നിര്‍മിക്കുന്ന ഫിഷറീസ് ട്രെയിനിങ് സെന്‍റര്‍ കം റീഹാബിലിറ്റേഷന്‍ സെന്ററിനായി കടലുണ്ടി ഗ്രാമപഞ്ചായത്തില്‍ കണ്ടെത്തിയ 26 സെന്‍റ് ഭൂമിയുടെ കൈമാറ്റ നടപടികള്‍ പുരോഗമിക്കുകയാണ്. ചാലിയം ഫിഷ്‌ലാന്‍ഡിങ് സെന്‍റര്‍ സ്ഥാപിക്കുന്ന ഭൂമിക്ക് വനംവകുപ്പിന്‍റെ അനുമതി ലഭ്യമാക്കാന്‍ അപേക്ഷ സമര്‍പ്പിച്ചിട്ടുണ്ട്. നടപടികള്‍ വേഗത്തിലാക്കുമെന്ന് വനം വകുപ്പ് അധികൃതര്‍ യോഗത്തെ അറിയിച്ചു. 84 ലക്ഷം രൂപ ചെലവില്‍ നടപ്പാക്കുന്ന ഫിഷ് വെന്‍റിങ് കം ഫുഡ് ട്രക്ക് പദ്ധതി ഉടന്‍ യാഥാര്‍ഥ്യമാകും. മത്സ്യത്തൊഴിലാളികള്‍ക്ക് ഗുണമേന്മയുള്ള മത്സ്യം ഇടനിലക്കാരില്ലാതെ വിപണിയില്‍ എത്തിക്കാന്‍ ഇതിലൂടെ സാധിക്കും.

വുഷു ചാമ്പ്യന്മാര്‍ക്ക് പുതിയ കരുത്ത്

കോഴിക്കോട്: ഇടിക്കൂട്ടില്‍ പുതിയ പോരാളികളെ വാര്‍ത്തെടുക്കാന്‍ പുതിയ വുഷു പ്ലാറ്റ്‌ഫോം ഒരുക്കി കുന്നമംഗലം ആര്‍ട്‌സ് ആന്‍ഡ് സയന്‍സ് കോളേജ്. അന്താരാഷ്ട്ര നിലവാരത്തില്‍ കേരളത്തിലെ തന്നെ ഏറ്റവും മികച്ച പ്ലാറ്റ്‌ഫോമാണ് ഇവിടെ ഒരുക്കിയിരിക്കുന്നത്. പരമ്പരാഗതമായ ചൈനീസ് ആയോധന കലയായ വുഷുവില്‍ നിലവില്‍ കാലിക്കറ്റ് യൂണിവേഴ്‌സിറ്റി ചാമ്പ്യന്മാരാണ് കുന്നമംഗലം കോളേജ്. മികച്ച നിലവാരത്തിലുള്ള വുഷു പ്ലാറ്റ്‌ഫോം ഒരുങ്ങിയതിലൂടെ ഈ രംഗത്ത് ജില്ലയ്ക്ക് കൂടുതല്‍ നേട്ടങ്ങള്‍ കൊയ്യാന്‍ സാധിക്കുമെന്നാണ് പ്രതീക്ഷ. പരിമിതമായ സൗകര്യങ്ങളില്‍ നിന്നുകൊണ്ട് സാധാരണ വുഷു മാറ്റ് ഉപയോഗിച്ചാണ് ഇതുവരെ കോളേജില്‍ പരിശീലനം നല്‍കിവന്നത്. ഇതില്‍ 20 പേര്‍ ദേശീയതല മത്സരങ്ങളില്‍ പങ്കെടുക്കുകയും അഞ്ച് പേര്‍ മെഡലുകള്‍ നേടുകയും ചെയ്തിട്ടുണ്ട്. മൂന്ന് യുജി കോഴ്‌സും ഒരു പിജി കോഴ്‌സും മാത്രമായി 2014 ല്‍ ആരംഭിച്ച കോളജ് 2020 മുതല്‍ തുടര്‍ച്ചയായി മൂന്ന് വര്‍ഷം വൂഷുവില്‍ യൂണിവേഴ്‌സിറ്റി ചാമ്പ്യന്മാരുമായിരുന്നു.

ഹൗസ് സര്‍ജന്‍മാരെ കാത്ത് കോഴിക്കോട് ഗവ. മെഡിക്കല്‍ കോളജ്

മെഡിക്കല്‍ കോളജില്‍ ഹൗസ് സര്‍ജന്‍മാരുടെ കുറവ് പ്രതിസന്ധിയാവുന്നു കോഴിക്കോട്: കോഴിക്കോട് ഗവ. മെഡിക്കല്‍ കോളജില്‍ ഹൗസ് സര്‍ജന്‍മാരുടെ കുറവ് പ്രതിസന്ധി സൃഷ്ടിക്കുന്നു.ഹൗസ് സർജൻമാർ പ്രധാനമായും ഡ്യൂട്ടി ചെയ്യുന്ന അത്യാഹിത വിഭാഗത്തിലാണ് പ്രതിസന്ധി രൂക്ഷം. ഹൗസ് സർജൻസി പൂർത്തിയാക്കിയ 242 ഡോക്ടർമാരാണ് കഴിഞ്ഞ ആഴ്ച സേവന കാലയളവ് പൂര്‍ത്തിയാക്കി ഇറങ്ങിയത്. അത്യാഹിത വിഭാഗത്തിൽ ഒരേസമയം പതിനഞ്ചോളം ഡോക്ടർമാർ കുറഞ്ഞതോടെ രോഗികളാണ് ദുരിതത്തിലായത്. രോഗികളിൽ നിന്നു വിവരം തിരക്കിയശേഷം എല്ലുരോഗ, സർജറി, മെഡിസിൻ തുടങ്ങി ആവശ്യമായ വിഭാഗങ്ങളിലേക്ക് വിടുന്നത് നഴ്‌സുമാരാണ്. മുൻപ് ഡോക്ടർമാർ രോഗനിർണയം നടത്തിയാണ് ഇതു ചെയ്തിരുന്നത്. അടുത്ത ബാച്ചിലെ ജയിച്ചു വരുന്നവരുടെ എണ്ണത്തിന് അനുസരിച്ചാണ് ഹൗസ് സർജൻസി കഴിഞ്ഞ ഡോക്ടർമാരെ മൂന്ന് മാസത്തേക്ക് പ്രതിമാസം 45,000 രൂപ നൽകി സർക്കാർ നിയമിക്കുന്നത്. 125 പേരെ വരെ നിയമിക്കാനാണ് സർക്കാർ അനുവാദം നൽകിയത്. ഇവർക്ക് മാസം നൽകുന്ന തുക വർധിപ്പിക്കണമെന്ന ആവശ്യവും ശക്തമാണ്. അടുത്ത ബാച്ച് വരാന്‍ മൂന്നുമാസം കഴിയും. പ്രവേശന പരീക്ഷയിലെ കാലതാമസം, കോഴ്‌സ് തുടങ്ങാൻ വൈകിയത്, എംബിബിഎസ് പരീക്ഷ വൈകിയത്, ഫലം വരാൻ വൈകിയത് തുടങ്ങിയവ പ്രതിസന്ധി സൃഷ്ടിക്കുന്നുണ്ട്. അടുത്ത ബാച്ച് ഡ്യൂട്ടിയിൽ പ്രവേശിക്കാൻമൂന്നുമാസംവരെ താമസിക്കുന്ന സ്ഥിതിയാണ്. ആ കാലത്തേക്ക് സാധാരണ ഹൗസ് സർജൻസി കഴിഞ്ഞവരെയാണ് നിയോഗിക്കുന്നത്.എന്നാൽ ഈ സേവനം നിർബന്ധം അല്ലാത്തതിനാൽ ആളെ കിട്ടാൻ പ്രയാസമാണ്. ഇത്തവണ ഇതുവരെ 28 പേരാണ് റജിസ്റ്റർ ചെയ്തത്. ജോലിയുടെ സേവന താൽപര്യം കൂടി കണക്കിലെടുത്ത് കൂടുതൽ പേർ തയാറാകുമെന്ന പ്രതീക്ഷയാണ് ആശുപത്രി അധികൃതര്‍ പങ്കുവയ്ക്കുന്നത്.

നിവേദനം നല്‍കി

കോഴിക്കോട്: കോഴിക്കോട് ബീച്ച് ഫയർ സ്റ്റേഷൻ പണിതീരുന്നത് വരെ താത്കാലിക സ്റ്റേഷൻ ആരംഭിക്കണമെന്നും റോഡപകടങ്ങളും വാഹന തീപിടിത്തങ്ങളും ദേശീയ പാത 66 - ൽ വർധിച്ച സാഹചര്യത്തില്‍ അടിയന്തര രക്ഷാപ്രവർത്തനങ്ങൾക്ക് അണ്ടർപാസിലെ സ്ഥാലസൗകര്യം ഉപയോഗപ്പെടുത്തണമെന്നും മലബാർ ഡവലപ്മെന്‍റ് കൗൺസിൽ, കൺസ്യൂമർ ഗുഡ്സ് ഡിസ്ട്രിബ്യൂട്ടേഴ്സ് അസോസിയേഷൻ സംഘടനാ ഭാരവാഹികള്‍ ആവശ്യപ്പെട്ടു. നിശ്ചിത അകലം പാലിച്ച് ഫയർ യൂണിറ്റുകൾ സ്ഥാപിക്കുക, ഉയരം കൂടിയ കെട്ടിടങ്ങളിലെ തീ അണക്കുന്നതിന് പ്രധാന നഗരങ്ങളിൽ അഗ്നിശമന സേനയ്ക്ക് സ്കൈ ലിഫ്റ്റ് നൽകുക, തുടങ്ങിയ ആവശ്യങ്ങളും ഉന്നയിച്ചു. ആവശ്യങ്ങൾ ഉൾപെടുത്തി തയാറാക്കിയ നിവേദനം ഫയർ ആന്‍ഡ് റസ്‌ക്യൂ ഡയറക്ടർ യോഗേഷ് ഗുപ്തയ്ക്ക് കൈമാറി.

കപ്പൽച്ചാൽ : ബേപ്പൂർ തുറമുഖത്തെ ആഴംകൂട്ടൽ ഫെബ്രുവരിയിൽ തീരും

കോഴിക്കോട്: തുറമുഖത്തെ കപ്പൽച്ചാൽ ആഴം കൂട്ടുന്ന പ്രവൃത്തി 2026 ഫെബ്രുവരിയോടെ പൂർത്തിയാക്കാൻ ധാരണ. മുഖ്യമന്ത്രി പിണറായി വിജയന്‍റെ അധ്യക്ഷതയിൽ കണ്ണൂരിൽ ചേർന്ന മേഖലാതല അവലോകന യോഗത്തിലാണു തീരുമാനം. കപ്പൽച്ചാൽ ഡ്രഡ്ജിംഗ് നടത്തുന്നതിനു നേരത്തേ 11.80 കോടി രൂപയുടെ ഭരണാനുമതി ലഭിക്കുകയും സർക്കാർ ഫണ്ട് അനുവദിക്കുകയും ചെയ്തിരുന്നു. എന്നാൽ പ്രവൃത്തി ആരംഭിച്ചപ്പോൾ അടിത്തട്ടിൽ പാറയുടെ സാന്നിധ്യം കാരണം ഡ്രഡ്ജിംഗ് പൂർത്തിയാക്കാനായില്ല. മാരിടൈം ബോർഡ് നടത്തിയ പഠന റിപ്പോർട്ട് പ്രകാരം ചെങ്കൽ പാറകൾ നീക്കി കപ്പൽച്ചാൽ ആഴം കൂട്ടാൻ ഹാർബർ എന്‍ജിനിയറിംഗ് വകുപ്പ് 82.80 കോടിയുടെ എസ്റ്റിമേറ്റ് തയാറാക്കി ധനവകുപ്പിന് സമർപ്പിച്ചിട്ടുണ്ട്. സാഗർമാല പദ്ധതിയിൽ ഉൾപ്പെടുത്തുന്നതിനു ശുപാർശയും സമർപ്പിച്ചതായി തുറമുഖ വകുപ്പ് അധികൃതർ അറിയിച്ചു.ഇതോടൊപ്പം കോഴിക്കോട് ഭട്ട് റോഡ് ബീച്ചില്‍ പുലിമുട്ടുകള്‍ നിര്‍മിക്കാന്‍ ഏഴ് കോടിയുടെ പുതുക്കിയ എസ്റ്റിമേറ്റ് സമര്‍പ്പിച്ചു. ഫണ്ട് ലഭ്യമായാലുടന്‍ പ്രവൃത്തി തുടങ്ങുമെന്ന് ജലവിഭവ വകുപ്പ് അറിയിച്ചു. പദ്ധതിക്ക് മൂന്ന് കോടിയുടെ ഭരണാനുമതി ലഭിച്ചിരുന്നു.

ഓൺലൈൻ തട്ടിപ്പ്: റിട്ട. അധ്യാപകന് നഷ്ടമായത് 7.14 ലക്ഷം

നാദാപുരം: ഇരട്ടിയിലധികം പണംലാഭം തരാമെന്ന് വിശ്വസിപ്പിച്ച് റിട്ട. അധ്യാപകന്‍റെ ഏഴ് ലക്ഷത്തിൽ പരം രൂപ തട്ടി എടുത്തതായി പരാതി വളയം പോലീസ് കേസെടുത്തു. റിട്ട. അധ്യാപകൻ ചെക്യാട് വിപഞ്ചിക വീട്ടിൽ കെ. ശശിധരനാണ് പരാതിക്കാരൻ. 2025 ജനുവരി 24 മുതൽ ജൂൺ ആറ് വരെയുള്ള കാലയളവിൽ 714036 രൂപ എ.എസ്. സഞ്ജന എന്നയാൾ തട്ടിയെടുത്തതായാണ് പരാതി. ടാറ്റ പ്രോപ്പർട്ടി ഹൗസിംഗ് സൈറ്റ് പ്രോജക്ട് എന്ന സൈറ്റിൽ ലാഭം തരാമെന്ന് വിശ്വസിപ്പിച്ച് പണം നിക്ഷേപിപ്പിച്ച് മുതലും ലാഭവും തരാതെ വഞ്ചിച്ചെന്ന് പരാതിയിൽ പറയുന്നു.

സ്കൂട്ടറിൽനിന്ന് തെറിച്ച് വീണത് ജീപ്പിന് അടിയിലേക്ക് : യുവാവ് അദ്ഭുതകരമായി രക്ഷപ്പെട്ടു

നാദാപുരം: നിയന്ത്രണംവിട്ട സ്കൂട്ടർ മറ്റൊരു സ്കൂട്ടറിലിടിച്ച് മറിഞ്ഞു യാത്രക്കാരൻ തെറിച്ച്‌ വീണത് ഓടിക്കൊണ്ടിരുന്ന ഥാർ ജീപ്പിനടിയിൽ. യുവാവ് അദ്ഭുതകരമായി രക്ഷപ്പെട്ടു. കല്ലാച്ചി സ്വദേശി മബ്രൂക്ക് (20) ആണ് ഥാർ ജീപ്പിന്‍റെ ടയറിനുള്ളിൽനിന്ന് അദ്ഭുതകരമായി രക്ഷപ്പെട്ടത്. മുട്ടുങ്ങൽ നാദാപുരം സംസ്ഥാന പാതയിൽ എടച്ചേരി ടൗണിൽ ബുധനാഴ്ച്ച രാവിലെയാണ് അപകടം. വടകര ഭാഗത്തേക്ക് സഞ്ചരിക്കുന്നതിനിടയിൽ സ്കൂട്ടർ നിയന്ത്രണം വിട്ട് മറ്റൊരു സ്കൂട്ടറിൽ ഇടിക്കുകയും എതിർ ദിശയിൽ വരികയായിരുന്ന ഥാർ ജീപ്പിന്‍റെ ടയറിനുള്ളിലേക്ക് അകപ്പെടുകയുമായിരുന്നു. ജീപ്പ് ഡ്രൈവർ പെട്ടെന്ന് ബ്രെയ്ക്ക് ചെയ്തതിനാൽ യുവാവ് ഗുരുതര പരിക്കേൽക്കാതെ രക്ഷപ്പെട്ടു. ഓടിക്കൂടിയ നാട്ടുകാർ ഏറെ ശ്രമിച്ചാണ് ടയറിന് ഉള്ളിൽ നിന്ന് ഇയാളെ പുറത്തെടുത്തത്. യുവാവ് വടകരയിലെ സ്വകാര്യ ആശുപത്രിയിൽ ചികിത്സ തേടി.

എട്ടിന് സ്വകാര്യ ബസുകള്‍ സര്‍വിസ് നിര്‍ത്തിവയ്ക്കുന്നു

കോഴിക്കോട്: വിവിധ ആവശ്യങ്ങള്‍ ഉന്നയിച്ച് കോഴിക്കോട് ജില്ലയിലെ സ്വകാര്യ ബസുകള്‍ എട്ടിന് സര്‍വീസ് നിര്‍ത്തിവയ്ക്കും.സം‌സ്ഥാന വ്യാപക സമരത്തിന്‍റെ ഭാഗമാണ് പണിമുടക്ക്. ജൂലൈ 22 മുതല്‍ അനിശ്ചിത കാലത്തേക്കു സ്വകാര്യ ബസുകളുടെ സര്‍വീസ് നിര്‍ത്തിവയ്ക്കാനും ബസുടമ സംഘടനകളുടെ കൂട്ടാഴ്മയായ ബസുടമ സംയുക്ത സമിതി തീരുമാനിച്ചിട്ടുണ്ട്. ദീര്‍ഘകാലമായി സര്‍വീസ് നടത്തിക്കൊണ്ടിരിക്കുന്ന ലിമിറ്റഡ് സ്റ്റോപ്പ് ബസുകളുടെയും ദീര്‍ഘ ദൂര ബസുകളുടെയും പെര്‍മിറ്റുകള്‍ അതേപടി യഥാസമയം പുതുക്കി നല്‍കുക, അര്‍ഹതപ്പെട്ട വിദ്യാര്‍ഥികള്‍ക്ക് മാത്രം കണ്‍സഷന്‍ ലഭ്യമാക്കുക, വിദ്യാര്‍ഥികളുടെ യാത്ര നിരക്ക് കാലോ ചിതമായി വര്‍ധിപ്പിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് സമരം. സമരം വിജയിപ്പിക്കാന്‍ ബസുടമകളുടെ യോഗം തീരുമാനിച്ചു. ജില്ലാ ജനറല്‍ സെക്രട്ടറി ടി.കെ.ബീരാന്‍കോയ, ചെയര്‍മാന്‍ കെ.ടി.വാസുദേവന്‍, രാധാകൃഷ്ണന്‍, ഇ.റിനിഷ്, എം.എസ്.സാജു,സി കെ.അബ്ദുറഹിമാന്‍,എന്‍.വി.അബ്ദുല്‍ സത്താര്‍,എം. തുളസീദാസ് തുടങ്ങിയവര്‍ പ്രസംഗിച്ചു.

അച്ഛനു സമര്‍പ്പണവുമായി ഗോപിനാഥ് മുതുകാട്; കോഴിക്കോട്ട് വീണ്ടും കോട്ടണിയുന്നു

കോഴിക്കോട്: ഇന്ദ്രജാല രംഗത്ത് അച്ഛന്‍റെ പ്രചോദനത്തിനു സ്‌നേഹാര്‍ദ്ര സമര്‍പ്പണവുമായി മാജിക്ക് ഷോ അവതരിപ്പിക്കാന്‍ മജീഷ്യന്‍ ഗോപിനാഥ് മുതുകാട്. അച്ഛന്‍റെ സ്മരണകളുണര്‍ത്തി ഓഗസ്റ്റ് ഒമ്പതിനു കോഴിക്കോട്ട് ‘ഇല്യൂഷന്‍ ടു ഇന്‍സ്പിരേഷന്‍' എന്ന പരിപാടിയുമായാണ് മുതുകാട് എത്തുന്നത്. ദീര്‍ഘകാലത്തെ ഇടവേളയ്ക്കുശേഷമാണ് അദ്ദേഹം മജീഷ്യന്‍റെ വേഷമണിയുന്നത്. മുതുകാടിനു കോഴിക്കോടുമായി ആത്മബന്ധമാണള്ളത്. അദ്ദേഹത്തിന്‍റെ അച്ഛന്‍ മരിച്ചത് കോഴിക്കോട്ടുവച്ചാണ്. മാജിക് ട്രൂപ്പ് ഉണ്ടാക്കിയപ്പോള്‍ 1987 ഫെബ്രുവരി 20ന് കോഴിക്കോട് ടാഗോര്‍ ഹാളിലാണ് ആദ്യ പരിപാടി അവതരിച്ചിച്ചത്. കടലുകാണാന്‍ മുതുകാടിനെ അച്ഛന്‍ കൂട്ടിക്കൊണ്ടുവന്നതും കോഴിക്കോട്ടേക്കാണ്. പത്താം വയസില്‍ ജാലവിദ്യയില്‍ േകന്ദ്രീകരിച്ച മുതുകാട് നിയമം പഠിക്കാനായി ബംഗളൂരുവില്‍ ചേര്‍ന്നെങ്കിലും മാജിക്കിനോടുള്ള അഭിനിവേശം കാരണം പഠനം പാതിവഴയില്‍ ഉപേക്ഷിക്കുകയായിരുന്നു. മകന്‍റെ താത്പര്യം മനസിലാക്കിയ പിതാവ്, ഏറ്റെടുത്ത കര്‍മപാതയില്‍നിന്ന് പിന്തിരിയരുതെന്ന് ഉപദേശിച്ച് മാജിക്കിന് പൂര്‍ണ പിന്തുണ നല്‍കിയിരുന്നു. ഈ പ്രോത്സാഹനം മുതുകാടിന്‍റെ 56 വര്‍ഷത്തെ മാജിക് ജീവിതത്തിനു വഴിയൊരുക്കി. അച്ഛനോടുള്ള കടപ്പാട് വെളിപ്പെടുത്തുന്നതായിരിക്കും മാജിക് ഷോയെന്ന് മുതുകാട് വാര്‍ത്താസമ്മേളനത്തില്‍ പറഞ്ഞു. പ്രൊവിഡന്‍സ് കോളജ് ഓഡിറ്റോറിയത്തില്‍ വൈകുന്നേരം അഞ്ചരയ്ക്കാണ് ഷോ. മുപ്പത് ആര്‍ട്ടിസ്റ്റുകള്‍ അണിനിരക്കും. ഇന്ത്യന്‍ മാന്ത്രിക ലോകത്തെ അതികായന്‍ പി.സി. സര്‍ക്കാര്‍ ഉദ്ഘാടനം നിര്‍വഹിക്കും.ഐവൈഎ, മലബാര്‍ ചേംബര്‍ ഓഫ് കൊേമഴ്‌സ്, മുതുകാട് നേതൃത്വം നല്‍കുന്ന ഡിഫറന്‍റ് ആര്‍ട്‌സ് സെന്‍റര്‍ എന്നിവ സംയുക്തമായാണ് പരിപാടി സംഘടിപ്പിക്കുന്നത്. പ്രവേശനം സൗജന്യമാണ്. ഭിന്നശേഷി വിഭാഗത്തിന്‍റെ സമഗ്ര വികസനത്തിനുവേണ്ടിയാണ് താനിപ്പോള്‍ പ്രവര്‍ത്തിക്കുന്നതെന്ന് മുതുകാട് പറഞ്ഞു. കാസര്‍കോട്ട് ഇന്‍റര്‍നാഷണല്‍ ഇന്‍സ്റ്റിട്യൂട്ട് ഫോര്‍ പീപ്പിള്‍ വിത്ത് ഡിസബിലിറ്റീസ് എന്ന ബൃഹദ് പദ്ധതിയുമായി മൂന്നോട്ടുപോകുകയാണ്. 30 ഏക്കര്‍ സ്ഥലത്താണ് പദ്ധതി വരുന്നത്. ഐവൈഎ പ്രസിഡന്‍റ് ടി.ഡി. ഫ്രാന്‍സിസ്, ഒയിസ്‌ക ഇന്‍റര്‍നാഷണല്‍ െസക്രട്ടറി ജനറല്‍ അരവിന്ദ്ബാബു, സൗത്ത് ഇന്ത്യന്‍ ചാപ്റ്റര്‍ പ്രസിഡന്‍റ് ഫിലിപ്പ് മാത്യു, മലബാര്‍ ചേംബര്‍ പ്രസിഡന്‍റ് നിത്യാനന്ദ കമ്മത്ത് എന്നിവരും വാര്‍ത്താസമ്മേളനത്തില്‍ സംബന്ധിച്ചു.

തീപിടിത്തം: മെഡിക്കല്‍ കോളജിലെ അത്യാഹിത വിഭാഗം പ്രവര്‍ത്തന സജ്ജമായില്ല

കോഴിക്കോട്: തീപിടിത്തത്തിന് ശേഷം ശേഷം അടച്ചിട്ട കോഴിക്കോട് മെഡിക്കൽ കോളജ് ആശുപത്രിയിലെ അത്യാഹിത വിഭാഗം ഇതുവരെ പ്രവർത്തനസജ്ജമായില്ല. മൂന്ന് ദിവസംകൊണ്ട് ശരിയാക്കുമെന്ന് ആരോഗ്യവകുപ്പ് മന്ത്രി ഉറപ്പ് നൽകിയ കാഷ്വാലിറ്റി ബ്ലോക്ക് ആണ് രണ്ടുമാസമായി അടഞ്ഞുകിടക്കുന്നത്. മേയ് രണ്ടിനുണ്ടായ തീപിടിത്തത്തെ തുടർന്ന് ഇലക്ട്രിക് ഇൻസ്പെക്ടറേറ്റ് വിഭാഗം പരിശോധന നടത്തി റിപ്പോർട്ട് ആരോഗ്യവകുപ്പിന് കൈമാറിയിരുന്നു.കെട്ടിടത്തിലെ മുഴുവൻ ബ്ലോക്കിലെയും വയറിങ്ങുകൾ പരിശോധിക്കുകയും ആവശ്യമുള്ളവ റിപ്പയർ ചെയ്ത് ശരിയാകുകയും വേണം. അതിനുശേഷം പിഡബ്ല്യുഡിയുടെ പരിശോധനകൾ നടക്കണം. പണി പൂർത്തിയായാൽ ഇലക്ട്രിക് ഇൻസ്പെക്ടറേറ്റ് വിഭാഗം പരിശോധന നടത്തണം. ഫയർ ഓഡിറ്റിംഗ് കഴിഞ്ഞ് ഇനിയൊരു പ്രശ്നവും ഉണ്ടാവില്ലെന്ന് ബോധ്യപ്പെട്ടാൽ മാത്രമേ കെട്ടിടത്തിന് വീണ്ടും എൻഒസി ലഭിക്കുകയുള്ളൂ. 195 കോടിയിൽ പിഎംഎസ്എസ് വൈ വഴി ബ്ലോക്കിന്‍റെ നിർമ്മാണം പൂർത്തിയാക്കിയ എച്ച്എൽഎൽ ഹെറ്റ്സ് എന്ന ഏജൻസി തന്നെയാണ് അറ്റകുറ്റപ്പണികൾ നടത്തുന്നത്. എന്നാൽ, അറ്റകുറ്റപ്പണികൾ പൂർത്തിയാക്കുന്നതിൽ മെല്ലെപ്പോക്ക് തുടരുകയാണ്. ഇതിന്‍റെ ദുരിതം അനുഭവിക്കുന്നതാവട്ടെ രോഗികളും. താത്കാലികമായി ഒരുക്കിയ കാഷ്വാലിറ്റിയിൽ അസൗകര്യങ്ങളിൽ വീർപ്പുമുട്ടി കഴിയേണ്ട അവസ്ഥയിലാണ് രോഗികളും കൂട്ടിരിപ്പുകാരും.

നാലുവര്‍ഷമായിട്ടും കരിങ്കൽ ഭിത്തി നിർമിച്ചില്ല : പുഴയോരം ഇടിഞ്ഞ് കൃഷിയിടങ്ങള്‍ നശിക്കുന്നു; കര്‍ഷക കണ്ണീര്‍ കാണാതെ അധികൃതര്‍

ജോൺസൺ പൂകമല കൂരാച്ചുണ്ട്: ശക്തമായ മഴയെ തുടർന്നുണ്ടാകുന്ന പ്രളയങ്ങളിലും മറ്റും പുഴയോരം ഇടിയുന്നതിനെ തുടർന്ന് കൃഷിയിടങ്ങൾ തകരുന്ന കൂരാച്ചുണ്ട് ഓഞ്ഞിൽ പുഴയോരത്തെ സംരക്ഷിക്കാനുള്ള നടപടികള്‍ കടലാസില്‍. കരിങ്കൽ ഭിത്തി നിർമിച്ച് സംരക്ഷിക്കാനായി ചെറുകിട ജലസേചന വകുപ്പ് എസ്റ്റിമേറ്റ് തയ്യാറാക്കി നൽകിയിട്ട് നാലുവര്‍ഷമായിട്ടും ഒന്നും നടപ്പിലായില്ല. പുഴയുടെ മൂന്നാംമുക്ക് മുതൽ മുളവട്ടംകടവ് വരെയുള്ള ഒരു കിലോമീറ്റർ ദൂരത്തിലുള്ള പുഴയോരം ഭാഗം കരിങ്കൽ ഭിത്തി കെട്ടി സംരക്ഷിക്കുന്നതിനായി ചെറുകിട ജലസേചന വകുപ്പ് ഉദ്യോഗസ്ഥർ 2021 സെപ്റ്റംബറിൽ സ്ഥലത്തെത്തി എസ്റ്റിമേറ്റ് തയാറാക്കി സർക്കാരിന് നൽകിയിരുന്നു. പ്രാഥമിക ഘട്ടത്തിൽ ഒരു കോടിയുടെ എസ്റ്റിമേറ്റാണ് തയാറാക്കി നൽകിയിട്ടുള്ളത്. എന്നാൽ തുടർനടപടികളൊന്നുമുണ്ടായില്ല. പ്രളയത്തത്തുടർന്ന് കാലങ്ങളായി പുഴയോരം ഇടിഞ്ഞ് ഏക്കറുകളോളം കൃഷിയിടങ്ങളാണ് നശിച്ചത്. മാത്രമല്ല പുഴ കരകവിഞ്ഞത് തീരങ്ങളില്‍ താമസിക്കുന്നവരുടെ വീടുകൾക്കും ഭീഷണിയാണ്. ഇതേ തുടർന്ന് രാഷ്ട്രീയ പാർട്ടി പ്രതിനിധികൾ ജലവിഭവ വകുപ്പ് മന്ത്രിക്ക് നിവേദനം നൽകി. അതിന്‍റെ അടിസ്ഥാനത്തിലായിരുന്നു ഉദ്യേഗസ്ഥർ എസ്റ്റിമേറ്റ് സമർപ്പിച്ചത്. എന്നാൽ സർക്കാർ തലത്തിൽ ഒരു നടപടിയുമാകാത്തത് കർഷകരെ പ്രതിസന്ധിയിലാക്കിയിരിക്കുകയാണ്. ഈ പ്രദേശങ്ങളിലെ ഒട്ടനവധി കൃഷിയിടങ്ങളാണ് വർഷങ്ങളായി കാലവർഷത്തെ തുടർന്നുള്ള പ്രളയങ്ങളിൽ ഇടിഞ്ഞ് നശിച്ചു കൊണ്ടിരിക്കുന്നത്. കൂരാച്ചുണ്ട് പഞ്ചായത്തിലെ ഒന്ന്, രണ്ട് വാർഡുകൾ ഉൾപ്പെടുന്ന മൂന്നാംമുക്ക് , പുളിവയൽ, ഓഞ്ഞിൽ തുടങ്ങി ചെറുപുഴയോട് ചേർന്നു കിടക്കുന്ന കൃഷിയിടങ്ങളിലെ തെങ്ങ്, കമുക്, റബ്ബർ, കൊക്കോ തുടങ്ങിയ കാർഷിക വിളകൾക്കാണ് നാശം സംഭവിച്ചുകൊണ്ടിരിക്കുന്നത്. ചില ഭാഗങ്ങളിൽ പുഴ ഗതിമാറി ഒഴുകിയതും വൻതോതിൽ കൃഷിയിടങ്ങൾ തകർന്നടിയുന്നതിന് ഇടയാക്കുന്നു. കൂടാതെ പുഴയൊഴുകുന്ന പതിമൂന്നാം വാർഡിലെ മുളവട്ടംകടവ് മുതൽ കരിമ്പനക്കുഴി താഴെ വരെയുള്ള ഭാഗങ്ങളിലും പുഴയോരം ഇടിഞ്ഞു കൃഷിയിടങ്ങൾ നശിച്ചിട്ടുണ്ട്. കൃഷിയിടങ്ങൾക്ക് സുരക്ഷിതത്വവും പുഴയോരം കെട്ടി സംരക്ഷിക്കുന്നതിനും ചെറുകിട ജലസേചന വകുപ്പ് സർക്കാരിന് സമർപ്പിച്ചിട്ടുള്ള എസ്റ്റിമേറ്റ് സംബന്ധിച്ചുള്ള തുടർനടപടികൾ സ്വീകരിച്ച് പദ്ധതി എത്രയും വേഗത്തിൽ നടപ്പാക്കാൻ നടപടികൾ വേണമെന്നാണ് പ്രദേശവാസികളായ കർഷക സമൂഹം ആവശ്യപ്പെടുന്നത്. സംരക്ഷണ ഭിത്തി നിർമാണം ഫലം കണ്ടില്ല തുടർച്ചയായി മഴക്കാലങ്ങളിലുണ്ടാകുന്ന പ്രളയങ്ങളിൽ വർഷങ്ങളായി ഇടിഞ്ഞു കൊണ്ടിരിക്കുന്ന ഓഞ്ഞിൽ പുഴയോരത്തെ കാർഷിക വിളകൾക്കും കൃഷിയിടങ്ങൾക്കും കനത്ത നഷ്ടങ്ങളാണ് വരുത്തിക്കൊണ്ടിരിക്കുന്നത്. പുഴയോരത്ത് കരിങ്കൽ ഭിത്തി കെട്ടി സംരക്ഷിക്കാനായി സർക്കാർ കൈക്കൊണ്ട നടപടികളുടെ ഭാഗമായി നടത്തിയ കാര്യങ്ങൾ വർഷങ്ങൾ കഴിഞ്ഞും കടലാസിൽ ഒതുങ്ങിയതല്ലാതെ നാളിന്നേവരെ യാതൊരു ഫലവും കണ്ടിട്ടില്ല. സത്വര നടപടികൾ വേണം ഓഞ്ഞിൽ പുഴയോരങ്ങളിലായി ഒട്ടനവധി കർഷക കുടുംബങ്ങൾ കൃഷി ചെയ്ത് താമസിച്ചുവരുന്നുണ്ട്. ഓഞ്ഞിൽ, പുളിവയൽ, മൂന്നാം മുക്ക് മേഖലകളിലെ ഏക്കറുകളോളം കൃഷിയിടങ്ങളാണ് കഴിഞ്ഞ കാലങ്ങളിലായി വെള്ളപ്പൊക്കത്തെ തുടർന്നും മറ്റും നശിച്ചുകൊണ്ടിരിക്കുന്നത്. ഇതിനു ശാശ്വത പരിഹാരം കാണണമെന്ന് ആവശ്യപ്പെട്ടതിനെത്തുടർന്നാണ് പുഴയ്ക്ക് സംരക്ഷണഭിത്തി നിർമിക്കാനുള്ള പ്രാരംഭ നടപടികൾ ചെറുകിട ജലസേചന വകുപ്പ് ആരംഭിച്ചത്. എന്നാൽ നാലു വർഷം കഴിഞ്ഞും തുടർ നടപടിയില്ലാത്തത് കർഷകരെ സംബന്ധിച്ച് ഖേദകരമായ കാര്യമാണ്.

ശലഭോദ്യാനം ഉദ്ഘാടനം ചെയ്തു

പുല്ലൂരാംപാറ: പുല്ലൂരാംപാറ സെന്‍റ് ജോസഫ്സ് യുപി സ്കൂളിൽ ഒരുക്കിയ ശലഭോദ്യാനം ഉദ്ഘാടനം ചെയ്തു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ ഉദ്ഘാടനകർമ്മം നിർവഹിച്ചു. ഹെഡ്മാസ്റ്റർ സിബി കുര്യാക്കോസ്, പിടിഎ പ്രസിഡന്‍റ് സിജോയ് മാളോല, എംപിടിഎ പ്രസിഡന്‍റ് ജിൻസ് മാത്യു തുടങ്ങിയവരും അധ്യാപകരും വിദ്യാർഥികളും ചടങ്ങിൽ പങ്കെടുത്തു.

കടിയങ്ങാട് ബസ് അപകടം; ഡ്രൈവറുടെ ലൈസന്‍സ് സസ്പെൻഡ് ചെയ്തു

പേരാമ്പ്ര: കഴിഞ്ഞ ദിവസം കടിയങ്ങാട് പെട്രോൾ പമ്പിന് സമീപം സ്വകാര്യ ബസ് ടിപ്പറിന് പിന്നിൽ ഇടിച്ച് അപകടമുണ്ടാക്കിയ ഡ്രൈവറുടെ ലൈസൻസ് സസ്പെൻഡ് ചെയ്തു. ഞായറാഴ്ച രാവിലെയാണ് കുറ്റ്യാടി പേരാമ്പ്ര സംസ്ഥാന പാതയില്‍ കടിയങ്ങാട് വച്ച് ടിപ്പറിന് പുറകില്‍ ബസ് ഇടിച്ച് അപകടം ഉണ്ടായത്. അപകടം വരുത്തിയ കെ എൽ 56 എം 8199 എസാർ ബസിന്‍റെ ഡ്രൈവര്‍ മരുതോങ്കര സ്വദേശി കുനിയിൽ കെ. വിപിന്‍റെ ഡ്രൈവിംഗ് ലൈസന്‍സാണ് ആറുമാസത്തേക്ക് സസ്പെൻഡ് ചെയ്തത്. എടപ്പാൾ ഐആർഡിഎയിൽ അഞ്ച് ദിവസത്തെ പരിശീലനത്തിനും ജോയിന്‍റ് ആര്‍ടിഒ ടി.കെ പ്രഗീഷ് ഉത്തരവ് നല്‍കി. ഡ്രൈവര്‍ വിപിന്‍ കുറ്റസമ്മതം നടത്തി. എംവിഐയുടെ അന്വേഷണ റിപ്പോര്‍ട്ടില്‍ വാഹനം അശ്രദ്ധമായും അമിത വേഗത്തിലുമാണ് ഓടിച്ചിരുന്നതെന്ന് കണ്ടെത്തിയതിന്‍റെ അടിസ്ഥാനത്തിലാണ് നടപടി. ഈ റൂട്ടിലെ സ്വകാര്യ ബസുകളുടെ അമിത വേഗത നിയന്ത്രിക്കാൻ കർശന നടപടികൾ തുടരുമെന്ന് മോട്ടോർ വാഹന വകുപ്പ് അധികൃതർ അറിയിച്ചു.

മേപ്പയൂരിൽ വിറകുപുരയ്ക്ക് തീ പിടിച്ചു

പേരാമ്പ്ര: വീടിനോടനുബന്ധിച്ചുള്ള വിറകുപുരയ്ക്ക് തീ പിടിച്ചു. മേപ്പയ്യൂർ പഞ്ചായത്ത് വാർഡ് പത്തിൽ ചാവട്ടു പള്ളി താഴെ എം.കെ. ഹൗസിൽ അബ്ദുറഹിമാന്‍റെ വീടിനോടനുബന്ധിച്ചുള്ള വിറകുപുരയ്ക്കാണ് തീ പിടിച്ചത്. അടുപ്പിൽ നിന്ന് പടർന്നാണ് തീ പിടിച്ചത്. കെട്ടിടത്തിന്‍റെ മേൽ കൂരയും അതിനകത്തുണ്ടായിരുന്ന വിറകും ഭാഗികമായി കത്തി നശിച്ചു. ഇന്നലെ രാവിലെ പത്തരയോടെയാണ് സംഭവം. പേരാമ്പ്ര അഗ്നി രക്ഷാനിലയത്തിലെ അസി. സ്റ്റേഷൻ ഓഫീസർ പ്രദീപന്‍റെ നേതൃത്വത്തിലുള്ള രണ്ടു യൂണിറ്റ് സ്ഥലത്തെത്തി തീയണച്ചു. ഫയർഫോഴ്സ് അംഗങ്ങളായ ബൈജു, നിഗേഷ്കുമാർ, ശ്രീകാന്ത്, ധീര ജ്‌ലാൽ, സനൽ രാജ്, ബബീഷ്, ജിനേഷ്, ഹൃദിൻ, രജീഷ്, ആരാധ്കുമാർ, രാജീവൻ, മുരളീധരൻ എന്നിവരും രക്ഷാ പ്രവർത്തനത്തിൽ പങ്കാളികളായി.

കാട്ടാന ശല്യം രൂക്ഷം രൂക്ഷം ; കൃഷി നശിപ്പിച്ചു

കോഴിക്കോട്: ജില്ലയിലെ മൈലള്ളംപാറ പ്രദേശത്ത് കാട്ടാനശല്യം രൂക്ഷം. ഒരാഴ്ചയായി 11 ന്നോളംകാട്ടാനകൾ ഉൾപ്പെടുന്നകൂട്ടം പ്രദേശത്ത് നിലയുറപ്പിച്ചിരിക്കുകയാണ്. മാത്യു തെക്കേക്കര, ജോസഫ് കൊണ്ടോടി, ബിനോയ്‌, ആനിയമ്മ, കുഞ്ഞികണാരൻ, ടോമിച്ചൻ, ജമീല, ബെന്നിമാത്യു,അരുൻതോമസ് തുടങ്ങി പതിനഞ്ചോളാം കർഷകരുടെ കൃഷികളാണ് ആനക്കൂട്ടം നശിപ്പിച്ചിരിക്കുന്നത്. അധികൃതരുടെ ഭാഗത്തുനിന്നും ഇവയെ തുരത്താനുള്ള കൃത്യമായ നടപടികൾ ഉണ്ടാകുന്നില്ല. ആർആർടി അംഗങ്ങൾ പടക്കം പൊട്ടിക്കുന്നുണ്ടെങ്കിലും കാട്ടാനകൾ കാടുകയറുന്നില്ല. വർഷങ്ങൾക്കുമുമ്പുള്ള ഫെൻസിംഗ് റിപ്പയർ ചെയ്യാത്തതിനാൽ ഉപയോഗശൂന്യമാണ്. ഇതിനെതിരേ ശക്തമായ നടപടി ഉണ്ടാകണമെന്ന് കിഫ മൈലളളാംപാറ യൂണിറ്റ് ആവശ്യപ്പെട്ടു. അല്ലാത്തപക്ഷം ശക്തമായ ജനകീയ പ്രക്ഷോഭം തുടങ്ങാനാണ് പ്രദേശവാസികളുടെ തീരുമാനം. കക്കയത്ത് കൃഷി നശിപ്പിച്ചു കൂരാച്ചുണ്ട്: കക്കയം ജനവാസ കേന്ദ്രത്തിൽ കാട്ടാനയിറങ്ങി കൃഷി നശിപ്പിച്ചു. പഞ്ചായത്ത് നാലാം വാർഡ് കക്കയം പഞ്ചവടി ഇല്ലി തോട്ടത്തിന് സമീപം താമസിക്കുന്ന കർഷകൻ പാറക്കൽ കുട്ടിയാലിയുടെ കൃഷിയിടത്തിലാണ് കാട്ടാന വാഴകൃഷി നശിപ്പിച്ചത്. കഴിഞ്ഞ ദിവസം രാത്രിയിലാണ് സംഭവം. ഈ മേഖലയിൽ സ്ഥാപിച്ചിട്ടുള്ള സോളാർ ഫെൻസിംഗ് തകർത്തശേഷമാണ് കാട്ടാന കൃഷിയിടത്തിലേക്ക് പ്രവേശിച്ചത്. കക്കയം മേഖലയുടെ വിവിധ ഭാഗങ്ങളിൽ വന്യമൃഗ ശല്യം രൂക്ഷമാണ്. വന്യമൃഗങ്ങളെ വനത്തിൽ തടയാൻ ശാശ്വതമായ പരിഹാരം കാണാൻ വനം വകുപ്പ് തയാറാകണമെന്നാണ് നാട്ടുകാർ ആവശ്യപ്പെടുന്നത്. കാട്ടുപോത്തുകളും നാട്ടുകാർക്ക് ഭീഷണിയായി മാറിയിട്ടുണ്ട്. കാട്ടാന അടക്കമുള്ള വന്യമൃഗങ്ങളെ ഏറെ ഭയപ്പെട്ടാണ് പ്രദേശവാസികൾ ഇപ്പോൾ കഴിഞ്ഞുകൂടുന്നത്. കൃഷി നാശത്തിന് തക്കതായ നഷ്ടപരിഹാരം നൽകണമെന്നുമാണ് ആവശ്യം ഉയരുന്നത്. വന്യമൃഗ ശല്യത്തിനെതിരേ കത്തോലിക്ക കോൺഗ്രസ് കൂരാച്ചുണ്ട്: മലയോര മേഖലയായ ചക്കിട്ടപാറ, പെരുവണ്ണാമുഴി, ചെമ്പനോട, മുതുകാട്, കക്കയം, കൂരാച്ചുണ്ട് എന്നിവിടങ്ങളിൽ നിരന്തരമായി വന്യമൃഗശല്യം രൂക്ഷമായിട്ടും വനം വകുപ്പ് നടപടി സ്വീകരിക്കാത്തതിൽ കത്തോലിക്കാ കോൺഗ്രസ് കൂരാച്ചുണ്ട് ഫൊറോന കമ്മിറ്റി യോഗം പ്രതിഷേധിച്ചു. ഇതിനെതിരേ ശക്തമായ നടപടി സ്വീകരിക്കാത്ത പക്ഷം അടുത്ത മാസം ആദ്യവാരത്തിൽ പെരുവണ്ണാമൂഴി ഫോറസ്റ്റ് റെയിഞ്ച് ഓഫീസിലേക്ക് കത്തോലിക്ക കോൺഗ്രസ് കൂരാച്ചുണ്ട്, മരുതോങ്കര ഫൊറോന കമ്മിറ്റികളുടെ നേതൃത്വത്തിൽ മാർച്ച് നടത്താൻ യോഗം തീരുമാനിച്ചു. ഫൊറോന ഡയറക്ടർ ഫാ. വിൻസെന്‍റ് കണ്ടത്തിൽ ഉദ്ഘാടനം ചെയ്തു. ഫൊറോന പ്രസിഡന്‍റ് ജോസ് ചെറുവള്ളിൽ അധ്യക്ഷത വഹിച്ചു. ഭാരവാഹികളായ ജോൺസൺ കക്കയം, ദാസ് കാനാട്ട്, ബോബൻ പുത്തൂർ, നിമ്മി പൊതയിട്ടേൽ, സണ്ണി എമ്പ്രയിൽ എന്നിവർ പ്രസംഗിച്ചു.

മുസ്ലീം ലീഗിൽ വിഭാഗീയത പുകയുന്നു

തിരുവമ്പാടി: മുസ്ലീം ലീഗ് നേതൃത്വത്തെ വെല്ലുവിളിച്ച് കെഎംസിസി കുടുംബ സംഗമം നടത്തിയതുൾപ്പെടെ തിരുവമ്പാടി മുസ്ലീം ലീഗിൽ നിലനിൽക്കുന്ന വിഭാഗീയത കൂടുതൽ രൂക്ഷമാവുന്നു. കഴിഞ്ഞ ദിവസം മുസ്ലിം ലീഗ് നിയോജക മണ്ഡലം നേതൃത്വത്തിനെതിരേ ഗുരുതരമായ ആരോപണങ്ങളുമായി വിമതപക്ഷം രംഗത്തെത്തിയിരുന്നു. ഇതിന് പിന്നാലെയാണ് മറുപടിയുമായി പഞ്ചായത്ത് ലീഗ് ഭാരവാഹികൾ രംഗത്തെത്തിയത്. സംസ്ഥാന സെക്രട്ടറിയും കഴിഞ്ഞ തവണ യുഡിഎഫ് സ്ഥാനാർഥിയുമായ സി.പി. ചെറിയ മുഹമ്മദിനെ പരാജയപ്പെടുത്തിയത് നിലവിലെ മണ്ഡലം പ്രസിഡന്‍റും സെക്രട്ടറിയുമാണന്നായിരുന്നു പ്രധാന ആരോപണം. എന്നാൽ പരാജയം പഠിക്കാനായി സംസ്ഥാന കമ്മിറ്റി നിയോഗിച്ച അന്വേഷണ കമ്മീഷനായ അഡ്വ. എൻ. ശംസുദ്ധീൻ, പി.എം സാദിഖലി എന്നിവർ പോലും കണ്ടെത്താത്ത ആരോപണമുന്നയിച്ച സാഹചര്യത്തിൽ സംസ്ഥാന സെക്രട്ടറി സി.പി. ചെറിയ മുഹമ്മദ് മറുപടി പറയണമെന്ന് തിരുവമ്പാടി പഞ്ചായത്ത് മുസ്ലീം ലീഗ് ജനറൽ സെക്രട്ടറി ഷൗക്കത്തലി കൊല്ലളത്ത് പറഞ്ഞു. കഴിഞ്ഞ ലോക്സഭാ തെരഞ്ഞെടുപ്പിൽ പ്രിയങ്ക ഗാന്ധി മത്സര രംഗത്തുണ്ടായിട്ടും തെരഞ്ഞെടുപ്പ് പ്രചരണ രംഗത്ത് നിന്ന് വിട്ടു നിന്നവരാണ് ഇപ്പോൾ ആരോപണവുമായി രംഗത്ത് വന്നിരിക്കുന്നത്. പാർട്ടിയിൽ നിന്ന് പുറത്താക്കിയവരുടെ രാജി പ്രഖ്യാപനം അപഹാസ്യമാണന്നും അദ്ദേഹം പറഞ്ഞു. അൽപ്പമെങ്കിലും ധാർമ്മികതയുണ്ടങ്കിൽ കെ.എ അബ്ദുറഹിമാൻ തിരുവമ്പാടി പഞ്ചായത്ത് വൈസ് പ്രസിഡന്‍റ് സ്ഥാനം രാജിവെക്കണമെന്നും ഷൗക്കത്തലി ആവശ്യപ്പെട്ടു.

എല്‍ഡിഎഫ് സര്‍ക്കാരിനെ ജനം കടലില്‍ താഴ്ത്തും: ഷാഫി പറമ്പില്‍

കോഴിക്കോട്: എല്‍ഡിഎഫ് സര്‍ക്കാരിനെ ജനം അറബി കടലില്‍ താഴ്ത്തുമെന്നും സര്‍ക്കാരിന്‍റെ എക്സിറ്റ് ഓഡര്‍ ജനങ്ങള്‍ ഒപ്പിട്ടു കഴിഞ്ഞുവെന്നും കെപിസിസി വര്‍ക്കിംഗ് പ്രസിഡന്‍റ് ഷാഫി പറമ്പില്‍ എംപി പറഞ്ഞു. ശസ്ത്രക്രിയ ഉപകരണങ്ങളുടെയും മരുന്നിന്‍റെയും ക്ഷാമം മൂലം ഗവ. മെഡിക്കല്‍ കോളജ് നേരിടുന്ന ദുരവസ്ഥക്കെതിരേ കോളജിന് മുന്നില്‍ ജില്ല കോണ്‍ഗ്രസ് കമ്മിറ്റി സംഘടിപ്പിച്ച ധര്‍ണ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കേരളത്തിലെ ആരോഗ്യ മന്ത്രി അനാരോഗ്യമന്ത്രിയായി മാറിയെന്നും കേരളത്തിലെ ആരോഗ്യവകുപ്പിനെ പിടികൂടിയിരിക്കുന്ന ഗുരുതരമായ രോഗമാണ് പിആര്‍ അഡിക്ഷനെന്നും ഷാഫി പറമ്പില്‍ വിമര്‍ശിച്ചു. ഡോ. ഹാരിസിന്‍റെ ഫേസ്ബുക്ക് പോസ്റ്റ്, ഭരണത്തെക്കുറിച്ചുള്ള കറകളഞ്ഞ സഖാവിന്‍റെ വിലയിരുത്തലാണ്. പോരാളി ഷാജി തോറ്റുപോകുംവിധം നിലമ്പൂര്‍ ഉപതെരഞ്ഞെടുപ്പിലെ പരാജയത്തെ ന്യായീകരിച്ചയാളാണ് ആശുപത്രിയിലെ ദുരിതം കാണിച്ച് പോസ്റ്റ് ഇട്ടത്. മെഡിക്കല്‍ കോളജിലെ കാഷ്വാലിറ്റി വിഷയത്തില്‍ കോണ്‍ഗ്രസ് പ്രതിഷേധവുമായി രംഗത്തുണ്ടാകുമെന്നും ഷാഫി പറമ്പില്‍ പറഞ്ഞു. ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ അധ്യക്ഷത വഹിച്ചു. കെപിസിസി ജനറല്‍ സെക്രട്ടറിമാരായ അഡ്വ. കെ. ജയന്ത്, അഡ്വ. പി.എം നിയാസ്, മുന്‍ ഡിസിസി പ്രസിഡന്‍റ് കെ.സി അബു, യുഡിഎഫ് ജില്ലാ ചെയര്‍മാന്‍ കെ. ബാലനാരായണന്‍, ഡികെടിഎഫ് സംസ്ഥാന പ്രസിഡന്‍റ് യു.വി ദിനേശ് മണി എന്നിവര്‍ പ്രസംഗിച്ചു.

പുസ്തക നിറവ് ഉദ്ഘാടനം ചെയ്തു

പാറോപ്പടി: സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് കോഴിക്കോട് ജില്ലയില്‍ സംഘടിപ്പിച്ച പുസ്തകപ്രദര്‍ശനവും വിപണനവും "പുസ്തകനിറവ് 2025' ന്‍റെ ജില്ലാതല ഉദ്ഘാടനം സില്‍വര്‍ ഹില്‍സ് ഹയര്‍ സെക്കൻഡറി സകൂളില്‍ നടന്നു. മഹിതമലയാളത്തിന്‍റെ പ്രാധാന്യം വിദ്യാർഥികളില്‍ എത്തിക്കുന്നതിനും വായനാശീലം പ്രോത്സാഹിപ്പിക്കുന്നതിനുമായി സംസ്ഥാന ബാല സാഹിത്യ ഇന്‍സ്റ്റിറ്റ്യൂട്ട് സംഘടിപ്പിച്ച പരിപാടിയുടെ ഉദ്ഘാടനം പ്രശസ്ത എഴുത്തുകാരൻ എം.എന്‍. കാരശേരി നിര്‍വഹിച്ചു. കുട്ടികള്‍ സംസ്‌കാര സമ്പന്നരും മൂല്യബോധമുള്ളവരുമായി വളരുവാന്‍ വായന അനിവാര്യമാണെന്ന് അദ്ദേഹം ഓര്‍മ്മപ്പെടുത്തി. "എഴുത്തും സംസ്‌കാരവും' എന്ന വിഷയത്തില്‍ കുട്ടികളുമായി അദ്ദേഹം സംവദിക്കുകയും ചെയ്തു. സ്‌കൂളുമായി ബന്ധപ്പെട്ട് സാമൂഹിക സാംസ്‌കാരിക രംഗത്ത് ശ്രദ്ധേയമായ സംഭാവന നല്‍കിയ മുന്‍ മലയാളം അധ്യാപിക വി. ശശികലയെ ചടങ്ങില്‍ ആദരിച്ചു. സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് ഡയറക്ടര്‍ പള്ളിയറ ശ്രീധരന്‍ അധ്യക്ഷത വഹിച്ചു. ബാലസാഹിത്യ ഇന്‍സ്റ്റിറ്റ്യൂട്ട് എഡിറ്റര്‍ രാധികാനായര്‍ ആമുഖ പ്രഭാഷണം നടത്തി. ബാല സാഹിത്യ ഇന്‍സ്റ്റിറ്റ്യൂട്ട് ഭരണസമിതി അംഗം ജാനമ്മ കുഞ്ഞുണ്ണി, സ്‌കൂള്‍ പ്രിന്‍സിപ്പല്‍ ഫാ. ജോണ്‍ മണ്ണാറത്തറ, മലയാളം അധ്യാപകന്‍ വി.പി. മനോജ് എന്നിവർ‌ പ്രസംഗിച്ചു.

കക്കയത്തെ ടൂറിസം വികസനം മുരടിപ്പിലെന്ന് ആരോപണം

കൂരാച്ചുണ്ട്: നിത്യേന നൂറു കണക്കിന് വിനോദസഞ്ചാരികൾ വന്നുപോകുന്ന കക്കയം ടൂറിസം പദ്ധതിയിൽ നിന്നും പ്രതിമാസം ലക്ഷങ്ങൾ വരുമാനം ലഭിക്കുന്നുണ്ടെങ്കിലും കക്കയം ടൂറിസം പദ്ധതി മുരടിപ്പിന്‍റെ പടുകുഴിയിലാണെന്ന് കക്കയം ടൂറിസം വികസന സമിതി. ടൂറിസം പദ്ധതിയുടെ ആരംഭകാലത്തുണ്ടായിരുന്ന സൗകര്യങ്ങൾ ഓരോന്നായി നശിച്ചതോടെ സന്ദർശകരുടെ ആസ്വാദനത്തിനും മങ്ങലേറ്റു. വനംവകുപ്പിന്‍റെ അധീനതയിലുള്ള ഉരക്കുഴി ഇക്കോ ടൂറിസം കേന്ദ്രത്തിൽ സന്ദർശകർക്കായി ഒരുക്കിയിരുന്ന തൂക്കുപാലം തകർന്നിട്ട് വർഷങ്ങൾ പിന്നിട്ടെങ്കിലും പുനർനിർമ്മാണം നടത്തിയിട്ടില്ല. ഇവിടുത്തെ നടപ്പാത പൊട്ടിപ്പൊളിഞ്ഞു. മേഖലയിൽ ഇരിപ്പടങ്ങളില്ല, പൂന്തോട്ടങ്ങൾ നശിച്ചു, കൂടാതെ ഡാമിൽ നടത്തിയിരുന്ന ബോട്ടിംഗ് സർവീസും ഇപ്പോൾ കട്ടപ്പുറത്താണുള്ളത്. വനംവകുപ്പിന്‍റെയും, കെഎസ്ഇബിയുടെയും കീഴിലുള്ള രണ്ട് പദ്ധതികളും നാശത്തിന്‍റെ വക്കിലാണ്. രണ്ടു പദ്ധതികളിലായി ഏകദേശം മുപ്പതോളം ഗൈഡുമാരുടെ ജീവിതം ദുരിതപൂർണമാണ്. വൈദ്യുതി ബോർഡിന്‍റെ പുതിയ പ്രഖ്യാപന പ്രകാരം പഴയ കെട്ടിടങ്ങൾ അറ്റകുറ്റപ്പണികൾ നടത്തി ടൂറിസ്റ്റുകൾക്ക് നൽകാൻ തയാറാകണം. അതിനായി നിരവധി കെട്ടിടങ്ങൾ നിലവിലുണ്ട്. കക്കയത്തും കക്കയം ഡാം മേഖലയിലും ആവശ്യമായ സുരക്ഷാ സംവിധാനങ്ങൾ ഏർപ്പെടുത്തണമെന്നും വികസന സമിതി ആവശ്യപ്പെട്ടു. കെഎസ്ആർടിസി വയനാട്ടിലും മറ്റും നടപ്പാക്കിയ പോലെ ആവശ്യമായ സുരക്ഷാ സംവിധാനം ഒരുക്കിക്കൊണ്ട് ബസുകളിൽ താമസം ഏർപ്പെടുത്താൻ കഴിയും. ഇവയെല്ലാം പരിഗണിച്ച് കക്കയത്ത് ടൂറിസ്റ്റ് വികസനത്തിന് ആവശ്യമായ ശ്രദ്ധ ചൊലുത്തുവാൻ ബന്ധപ്പെട്ട വകുപ്പുകൾ ഉടൻ തയാറാകണമെന്നും ടൂറിസം വികസന സമിതി ആവശ്യപ്പെട്ടു. പ്രസിഡന്‍റ ആൻഡ്രൂസ് കട്ടിക്കാന അധ്യക്ഷത വഹിച്ചു. വാർഡ് മെമ്പർ ഡാർലി ഏബ്രഹാം, സലോമി തോമസ്, ഷമീർ പിച്ചൻ, ചാക്കോ വല്ലയിൽ, ഷൈജ കാരിവേലി എന്നിവർ പ്രസംഗിച്ചു.

റോഡിൽ സീബ്രാ ലൈനില്ല,നിയന്ത്രിക്കാൻ പോലീസുമില്ല

കൂരാച്ചുണ്ടിൽ യാത്രാ ദുരിതം ; വിദ്യാർഥികൾ വലയുന്നു കൂരാച്ചുണ്ട്: കൂരാച്ചുണ്ട് മേലെ അങ്ങാടിയിലെ റോഡിൽ സീബ്രാ ലൈനില്ലാത്തത് യാത്രക്കാ‌ർക്ക് പ്രതിസന്ധിയാവുന്നു. മേലെ അങ്ങാടിയിൽ റോഡ് മുറിച്ച് കടക്കുന്ന ഭാഗത്ത് സീബ്രാ ലൈൻ ഉണ്ടായിരുന്നു. ഇപ്പോൾ പൂർണമായും മാഞ്ഞ് അപ്രത്യക്ഷമായതോടെയാണ് വിദ്യാർഥികൾ ഉൾപ്പടെ പ്രയാസത്തിലായി. നേരത്തെ ഇവിടെ സ്കൂൾ വിടുന്ന സമയങ്ങളിൽ വാഹനങ്ങളെ നിയന്ത്രിക്കാന്‍ പോലീസിനെ ഡ്യൂട്ടിക്ക് ഇടുന്ന സംവിധാനവുമുണ്ടായിരുന്നു. എന്നാൽ ഇപ്പോൾ പോലീസും ഇവിടെ ഇല്ലാതായതോടെ ചെറിയ കുട്ടികൾ അടക്കമുള്ള വിദ്യാർഥികൾ ഭയത്തോടെയും ബുദ്ധിമുട്ടിയുമാണ് റോഡ് മുറിച്ച് കടക്കുന്നത്. വാഹനങ്ങളെല്ലാം വേഗതയിൽ കടന്നു പോകുന്നത് ഭീഷണിയായി മാറിയിട്ടുണ്ട്. സീബ്രാ ലൈൻ മാഞ്ഞുപോയത് വീണ്ടും പുനസ്ഥാപിക്കാൻ ബാലുശേരി പിഡബ്ല്യൂഡി അധികൃതർക്ക് സിപിഐ കൂരാച്ചുണ്ട് ബ്രാഞ്ച് കമ്മിറ്റി പരാതി നൽകിയിരുന്നെങ്കിലും ഇതുവരെയും നടപടി ഉണ്ടായിട്ടില്ല. വിദ്യാർഥികളും യാത്രക്കാരും റോഡ് മുറിച്ച് കടക്കുന്ന ഭാഗങ്ങളിൽ സീബ്രാ ലൈൻ സ്ഥാപിക്കാനും സ്ഥിരമായി പോലീസ് സംവിധാനം ഏർപ്പെടുത്താനും നടപടി സ്വീകരിക്കണമെന്ന് സിപിഐ കൂരാച്ചുണ്ട് ബ്രാഞ്ച് കമ്മിറ്റി അധികൃതരോട് ആവശ്യപ്പെട്ടു. ടി.കെ. ശിവദാസൻ അധ്യക്ഷത വഹിച്ചു. എ.കെ. പ്രേമൻ, കെ.എം. പീറ്റർ, വിനു മ്ലാക്കുഴിയിൽ,പി.ടി. തോമസ്, ഗോപിനാഥൻ, പ്രവീൺ എന്നിവർ പ്രസംഗിച്ചു.

മാനാഞ്ചിറ സ്‌ക്വയറിലെ വെള്ളക്കെട്ട്പരിഹരിക്കാനുള്ള നടപടി തുടങ്ങി

ഓവുചാലിന്‍റെ ആഴം കൂട്ടും കോഴിക്കോട്: നഗരത്തിലെ പ്രധാന േകന്ദ്രമായ മാനാഞ്ചിറ സ്‌ക്വയറിലെ വെള്ളക്കെട്ടിനു പരിഹാരമാകുന്നു.പ്രശ്‌നം പരിഹരിക്കുന്നതിനു നടപടി തുടങ്ങി. മാനാഞ്ചിറ സെന്‍ട്രല്‍ ലൈബ്രറിക്ക് മുന്നിലും എസ്‌കെ പ്രതിമയ്ക്കു സമീപവുമാണ് ദുരിതം വിതച്ച് വെള്ളക്കെട്ട് ഉള്ളത്. നിരവധി യാത്രികര്‍ക്ക് അപകടം ഉണ്ടായതിന് ശേഷമണ് അറ്റകുറ്റപ്പണി ആരംഭിച്ചത്. കോര്‍പറേഷന്‍ 50 ലക്ഷം വ കയിരുത്തിയാണ് റോഡ് ഉയര്‍ത്തിയും ഓവുചാല്‍ ആഴം കൂട്ടിയും വെള്ളക്കെട്ടിന് പരിഹാരം കാണാന്‍ ശ്രമിക്കുന്നത്. സ്ലാബിന് മുകളില്‍ ടൈല്‍ പാകിയ ഓവുചാലില്‍ ചളിയും മാ ലിന്യങ്ങളും അടിഞ്ഞുകൂടി ഒഴുക്ക് നഷ്ടപ്പെട്ടതും ഓവുചാലിനെ ക്കാള്‍ താഴ്ന്നുള്ള റോഡിന്‍റെ കിടപ്പുമാണ് വെള്ളക്കെട്ടിന് കാരണ മായത്.ഇതിനു പരിഹാരമായാണ് സ്റ്റാബുകള്‍ നീക്കി ഓവുചാലിന്‍റെ ആഴം കൂട്ടുന്നത്. ഇതിനുശേഷം ഓവുചാലിന്‍റെ നിരപ്പിന് സമാനമാ യി റോഡ് ഉയര്‍ത്തി ഇന്‍റര്‍ലോക്ക് പാകും. മൊയ്തീന്‍ പള്ളിമുതല്‍ സ്‌പോട്‌സ് കൗണ്‍സല്‍ ഓഫീസിന്‍റെ ഭാഗംവരെയാണ് അറ്റകുറ്റപ്പണികള്‍ നടത്തുക. നിലവില്‍ ഓവുചാലിലെ വെള്ളം ഒരുഭാഗം കമീഷണര്‍ ഓഫിസിന് സമീപത്തുകൂടെ പാളയം ഭാഗത്തേക്കും ഒരു ഭാഗം മാനാഞ്ചിറ ഗ്രൗണ്ടിന് നടുവിലൂടെ ബിഇഎം സ്‌കൂള്‍ ഭാഗത്തുകൂടെ ബീച്ചിലേക്കുമാണ് ഒഴുകുന്നത്. നവീകരണത്തിന് മൂന്നാഴ്ചയോളം വേണ്ടി വരുമെന്നാണ് പ്രതീക്ഷിക്കുന്നത്. റോഡ് പണി ആരംഭിച്ചാല്‍ കണ്ണൂര്‍ റോഡിലേക്കുള്ള ഗതാഗതം നി യന്ത്രിക്കും. റോഡ് ഉയര്‍ത്തുന്നതിനാണ് തുക വകയിരുത്തിയ തെങ്കിലും ഓവുചാലിന്‍റെ അറ്റ കുറ്റപ്പണികള്‍ക്കുള്ള തുകയും വ കയിരുത്തുമെന്ന് കോര്‍പറേഷന്‍ കൗണ്‍സിലര്‍ എസ്.കെ. അബൂബക്കര്‍ പറഞ്ഞു.

പത്രവിതരണക്കാരനെ വാഹനം ഇടിച്ചു തെറിപ്പിച്ചു

പേരാമ്പ്ര: കുറ്റ്യാടി- പേരാമ്പ്ര സംസ്ഥാനപാതയില്‍ പത്ര വിതരണക്കാരനെ ഇടിച്ച് തെറിപ്പിച്ച് വാഹനം നിര്‍ത്താതെ പോയി. പാറക്കടവ് സ്വദേശിയായ തയ്യില്‍ കുഞ്ഞികൃഷ്ണനെ (65) യാണ് ഇടിച്ച് തെറിപ്പിച്ചു വാഹനം നിര്‍ത്താതെ പോയത്. പാലേരി പാറക്കടവ് അരിയന്താരി ക്ഷേത്ര ബസ് സ്റ്റോപ്പിന് സമീപത്താണ് സംഭവം. ഇന്നലെ പുലര്‍ച്ചെ അഞ്ചിന് പത്ര വിതരണത്തിനായി പോവുന്നതിനിടയിലാണ് വാഹനം ഇടിച്ചത്. ഗുരുതരമായി പരിക്കേറ്റ ഇയാളെ കോഴിക്കോട് മെഡിക്കല്‍ കോളജ് ആശുപത്രിയിൽ പ്രവേശി പ്പിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]