കഴിഞ്ഞ പത്തു വർഷം നടന്നത് ട്രെയ്‌ലർ, വരാനിരിക്കുന്നത് വൻ വികസനം : Deepika.com National News |

Click here for detailed news of all items

കഴിഞ്ഞ പത്തു വർഷം നടന്നത് ട്രെയ്‌ലർ, വരാനിരിക്കുന്നത് വൻ വികസനം

Saturday, June 8, 2024 2:20 AM IST

ന്യൂഡൽഹി: കഴിഞ്ഞ പത്തു വർഷം നടന്നത് ട്രെയ്‌ലർ മാത്രമാണെന്നും വൻ വികസനപദ്ധതികൾ വരും വർഷങ്ങളിൽ നടക്കുമെന്നും നിയുക്ത പ്രധാനമന്ത്രി നരേന്ദ്ര മോദി. എൻഡിഎ എന്ന വാക്കിന് ന്യൂ ഇന്ത്യ (പുതിയ ഇന്ത്യ), ഡെവലപ്മെന്‍റ് ഇന്ത്യ (വികസിത ഇന്ത്യ), ആസ്പിരേഷണൽ ഇന്ത്യ (പ്രതീക്ഷയുടെ ഇന്ത്യ) എന്നാണ് അർഥമെന്നും മോദി പറഞ്ഞു.

ഇന്നലെ പഴയ പാർലമെന്‍റ് മന്ദിരത്തിലെ സെൻട്രൽ ഹാളിൽ നടന്ന എൻഡിഎ യോഗത്തിൽ പ്രസംഗിക്കുകയായിരുന്നു അദ്ദേഹം. ഭരണഘടനാമൂല്യങ്ങൾ ഉയർത്തിപ്പിടിക്കും. ഭാരതത്തിന്‍റെ ആത്മാവിൽ അധിഷ്ഠിതമാണ് എൻഡിഎ സഖ്യമെന്നും ഈസഖ്യം ശക്തമാണെന്നും മോദി പറഞ്ഞു.

പ്രാദേശിക-ദേശീയ പ്രത്യാശയിലാണ് സഖ്യം നിലനിൽക്കുന്നത്. ഇന്ത്യ മുന്നണി വികസനത്തിന് എതിരാണ്. തെരഞ്ഞെടുപ്പിനുമുന്പ് വോട്ടിംഗ് മെഷീനെതിരേ പരാതിയായിരുന്നു. എന്നാൽ, തെരഞ്ഞെടുപ്പുശേഷം ഇതു കാണുന്നില്ല. പുതിയ സർക്കാരിലെ മന്ത്രിമാരെക്കുറിച്ച് മാധ്യമങ്ങളിൽ അഭ്യൂഹങ്ങൾ വരുന്നുണ്ടെന്നും അദ്ദേഹം കൂട്ടിച്ചേർത്തു.

നരേന്ദ്ര മോദിയുടെ ഭരണത്തിൻ കീഴിൽ ഇന്ത്യ പത്തുവർഷം വൻ നേട്ടം കൈവരിച്ചതായി ടിഡിപി നേതാവ് ചന്ദ്രബാബു നായിഡു പറഞ്ഞു. എന്തു വന്നാലും എൻഡിഎ സഖ്യത്തിന്‍റെ കൂടെ തന്നെയുണ്ടാകുമെന്ന് ജെഡി-യു അധ്യക്ഷൻ നിതീഷ് കുമാർ വ്യക്തമാക്കി. എൻഡിഎ സഖ്യത്തിന് പൂർണ പിന്തുണ നൽകുന്നതായി എൽജെപിആർവി നേതാവ് ചിരാംഗ് പസ്വാൻ അറിയിച്ചു.

എൻഡിഎയിലെ ബാക്കി കക്ഷിനേതാക്കളും പുതിയ സഖ്യസർക്കാരിന് പിന്തുണ അറിയിച്ചു. യോഗത്തിനുശേഷം എല്ലാ എംപിമാരും മോദിയുടെ അടുത്തെത്തി അദ്ദേഹത്തെ അഭിനന്ദിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.