കായികതാരമാകാതെ പോയതില്‍ വിഷമം തോന്നുന്നു: മമ്മൂട്ടി
Tuesday, November 5, 2024 1:41 AM IST
കൊച്ചി: ഒരു കായികതാരമാകാതെ പോയതില്‍ ഇപ്പോള്‍ വിഷമം തോന്നുന്നുവെന്ന് നടന്‍ മമ്മൂട്ടി. പ്രഥമ കേരള സ്‌കൂള്‍ കായികമേളയുടെ ഉദ്ഘാടനവേദിയില്‍ പ്രസംഗിക്കവെയാണ് മമ്മൂട്ടി തന്‍റെ കുട്ടിക്കാലത്തെ ഓര്‍മകള്‍ പങ്കുവച്ചത്.
ഓട്ടവും ചാട്ടവും ഉള്‍പ്പെടെ സ്‌പോര്‍ട്‌സ് ഇനങ്ങളില്‍ ഒട്ടും താത്പര്യമില്ലാത്ത കുട്ടിക്കാലമായിരുന്നു തനിക്ക്. നാടകത്തിലും മിമിക്രിയിലുമൊക്കെയായിരുന്നു തനിക്കു താത്പര്യം. എന്നാല്‍ ഈ വേദിയില്‍ നില്‍ക്കുമ്പോള്‍ താനൊരു കായികതാരമായിരുന്നുവെങ്കില്‍ എന്നാഗ്രഹിച്ചുപോകുകയാണ്. അങ്ങനെയാകാതെ പോയതില്‍ തനിക്കു വിഷമം തോന്നുന്നുവെന്നും മമ്മൂട്ടി പറഞ്ഞു.
എല്ലായ്പ്പോഴും അവസരങ്ങള്‍ ലഭിക്കണമെന്നില്ല. കിട്ടുന്ന അവസരങ്ങളെ അര്‍പ്പണബോധത്തോടെ ആത്മാര്‍ഥമായി വിനയോഗിക്കുമ്പോഴാണു ജീവിതത്തില്‍ വിജയം കൈവരിക്കാനാകുക.
കൂടെ മത്സരിക്കാന്‍ ആളുകള്‍ ഉള്ളതുകൊണ്ടാണ് ഒരാള്‍ വിജയിയാകുന്നത്. തനിക്കൊപ്പം മത്സരിക്കുന്നവരെ ശത്രുവായി കാണാതെ തന്‍റെ കഴിവിനെ അളക്കാനുള്ള സഹ മത്സരാര്‍ഥിയായാണു കാണേണ്ടതെന്നും മമ്മൂട്ടി പറഞ്ഞു.