അനസ് എടത്തൊടിക വിരമിച്ചു
Sunday, November 3, 2024 1:35 AM IST
മഞ്ചേരി: ഇന്ത്യൻ മുൻ ഫുട്ബോളർ അനസ് എടത്തൊടിക വിരമിച്ചു. സൂപ്പർ ലീഗ് കേരളയിൽ മലപ്പുറം എഫ്സിക്കുവേണ്ടിയാണ് മലപ്പുറം സ്വദേശിയായ അനസ് അവസാനമായി ബൂട്ടണിഞ്ഞത്. സൂപ്പർ ലീഗ് കേരളയിൽ മലപ്പുറം സെമി ഫൈനലിൽ ഇടംപിടിക്കാതിരുന്നതിന്‍റെ പിന്നാലെയാണ് അനസിന്‍റെ വിരമിക്കൽ പ്രഖ്യാപനം.
സ്വന്തം നാട്ടിലെ ക്ലബ്ബായ മലപ്പുറം എഫ്സിക്കുവേണ്ടി കളിച്ച് പ്രഫഷണൽ ഫുട്ബോളിനോടു വിടപറയാൻ സാധിച്ചതിൽ സന്തുഷ്ടനാണെന്ന് അനസ് പറഞ്ഞു.
സെന്‍റർ ബാക്ക് കളിക്കാരനായ അനസ്, 2017-19 കാലഘട്ടത്തിൽ ഇന്ത്യക്കുവേണ്ടി 21 മത്സരങ്ങളിൽ ബൂട്ടണിഞ്ഞു.
കംബോഡിയയ്ക്കെതിരേയായിരുന്നു രാജ്യാന്തര അരങ്ങേറ്റം. 17 വർഷം നീണ്ട സീനിയർ പ്രഫഷണൽ കരിയറിനാണ് അനസ് വിരാമമിട്ടത്. മുപ്പത്തേഴുകാരനായ അനസ്, ക്ലബ് തലത്തിൽ 172 മത്സരങ്ങളിൽ ഇറങ്ങി. 2007ൽ മുംബൈ എഫ്സിക്കുവേണ്ടി കളിച്ചാണ് സീനിയർ കരിയറിലേക്കു കടന്നത്.
തുടർന്ന് പൂന, ഡൽഹി ഡൈനാമോസ്, മോഹൻ ബഗാൻ, ജംഷഡ്പുർ, കേരള ബ്ലാസ്റ്റേഴ്സ്, എടികെ, ഗോകുലം കേരള തുടങ്ങിയ ക്ലബ്ബുകൾക്കുവേണ്ടിയും കളിച്ചു.