ADVERTISEMENT

ADVERTISEMENT

യുവാക്കളെ വെട്ടി പരിക്കേൽപ്പിച്ച കേസിലെ പ്രതി അറസ്റ്റിൽ

തിരുവനന്തപുരം: മെഡിക്കൽ കോളജ് പോലീസ് സ്റ്റേഷൻ പരിധിയിലെ ഗവ. ദന്തൽ കോളജിന് സമീപത്തുവച്ച് സ്ഥലത്തെ ജോലിക്കാരനെ വെട്ടി പരിക്കേൽപ്പിച്ച കേസിലെ പ്രതി അറസ്റ്റിൽ.
പാർക്കിംഗ് ഏരിയയിൽ ഓട്ടോറിക്ഷകൾ പാർക്കു ചെയ്യുന്ന സ്ഥലത്ത് കഴിഞ്ഞദിവസം രാത്രി മോട്ടോർസൈക്കിൾ പാർക്ക് ചെയ്തത് ചോദ‍്യം ചെയ്തതാണ് പ്രശ്നങ്ങൾക്കു കാരണം.

സംഭവത്തിൽ മെഡിക്കൽ കോളജ് കിഴങ്ങുവിള സ്വദേശി സുരേഷ് (47) എന്നയാളെ പോലീസ് അറസ്റ്റ് ചെയ്തു. ആക്രമണത്തിൽ രണ്ടുപോർക്ക് പരിക്കേറ്റു. പാർക്കിംഗ് സ്ഥലത്തെ ജീവനക്കാരനും അദ്ദേഹത്തിന്‍റെ സുഹൃത്തിനുമാണ് വെട്ടേറ്റത്. അറസ്റ്റ് ചെയ്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ADVERTISEMENT

ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥൻ വീട്ടിൽ തൂങ്ങിമരിച്ച നിലയിൽ

കഴക്കൂട്ടം: സ്പെഷൽ ഡ്യൂട്ടിക്കുള്ള പരിശീലനത്തിന് പോയ ടെലികമ്യൂണിക്കേഷൻ സിറ്റി ഓഫീസിലെ സർക്കിൾ ഇൻസ്പെക്ടറെ വീട്ടിൽ തൂങ്ങി മരിച്ച നിലയിൽ കണ്ടെത്തി. ചേങ്കോട്ടുകോണം തുണ്ടത്തിൽ കീരിക്കുഴി ബഥേൽ ഹൗസിൽ ജയ്സൻ അലക്സ് (48) ആണ് മരിച്ചത്. കഴിഞ്ഞ രണ്ടു വർഷമായി ഇവിടെ താമസിച്ചുവരികയായിരുന്നു. വ്യാഴാഴ്ച രാത്രി 11.30ന് ഡ്യൂട്ടി കഴിഞ്ഞ് വന്നശേഷം വിഐപി സന്ദർശനത്തിന്‍റെ ഭാഗമായ സ്പെഷൽ ഡ്യൂട്ടിക്ക് പുലർച്ചെ അഞ്ചിന് ഉച്ചഭക്ഷണവും എടുത്ത് ബൈക്കിൽ പോവുകയായിരുന്നു. എന്നാൽ രാവിലെ പത്ത് മണിയോടെ തിരിച്ചെത്തിയതായി അയൽ വീട്ടുകാർ പറഞ്ഞു. ഈ സമയം വീട്ടിൽ ഭാര്യയും മക്കളും ഇല്ലായിരുന്നു. പോലീസും ഫോറൻസിക് വിദഗ്ധരും ഉന്നത ഉദ്യോഗസ്ഥരുമെത്തി പരിശോധന നടത്തിയ ശേഷം മൃതദേഹം പോസ്റ്റുമോർട്ടത്തിനായി മെഡിക്കൽ കോളജ് ആശുപത്രിയിലേക്ക് മാറ്റി. ഭാര്യ സോമി പുതുക്കുറിച്ചി 'ഔവർ ലേഡി ഓഫ് മേഴ്സി' സ്കൂളിലെ അധ്യാപികയാണ്. മക്കൾ: ആൻമി ജയ്സൺ, ആൻസി ജയ്സൺ. ഇരുവരും മേരി നിലയം വിദ്യാലയത്തിലെ വിദ്യാർഥികളാണ്. സഹോദരങ്ങൾ: ജിൽജ അലക്സ്, ജീജാ അലക്സ്, ജൂണാ അലക്സ്. മാനസിക സമ്മർദമാണ് ആത്മഹത്യയ്ക്ക് പ്രേരിപ്പിച്ചതെന്ന് മാതാവും ബന്ധുക്കളും പറയുന്നു. പോസ്റ്റ്മോർട്ടത്തിനുശേഷം മൃതദേഹം കുണ്ടറ കാഞ്ഞിരക്കോട് പള്ളി സെമിത്തേരിയിൽ നടക്കും. കൊല്ലം കുണ്ടറ കാഞ്ഞിരക്കോട് തെങ്ങുവിള വീട്ടിൽ പരേതനായ അലക്സാണ്ടറുടേയും പട്ടത്താനം വിമലഹൃദയ സ്കൂളിലെ കായിക അധ്യാപികയായി വിരമിച്ച ജമ്മയുടേയും മകനാണ്.

യുവാവ് സുഹൃത്തിന്‍റെ വീട്ടിൽ തൂങ്ങിമരിച്ച നിലയിൽ

വെഞ്ഞാറമൂട് : യുവാവിനെ സുഹൃത്തിന്‍റെ വീട്ടിൽ തൂങ്ങിമരിച്ച നിലയിൽ കണ്ടെത്തിയതിൽ ദുരൂഹതയെന്ന് ബന്ധുക്കൾ. കാരേറ്റ് മേലാറ്റുമുഴി ഗായത്രി മന്ദിരത്തിൽ രാധാകൃഷ്ണൻ നായരുടെയും ബേബിയുടെയും മകൻ അനന്ദു കൃഷ്ണൻ (24) നെയാണ് ബുധനാഴ്ച നാലുമണിയോടെ സുഹൃത്തിന്‍റെ വീട്ടിലെ കിടപ്പുമുറിയിൽ തൂങ്ങി മരിച്ച നിലയിൽ കണ്ടെത്തിയത്. ഉച്ചയോടെയാണ് അനന്ദു സുഹൃത്തിന്‍റെ വീട്ടിൽ എത്തിയത്. അനന്ദു ഒഴികെ അവിടെ ഉണ്ടായിരുന്നവർ പുറത്തുപോയിരുന്നു. ഇവർ തിരിച്ചെത്തി നോക്കുമ്പോഴാണ് അനന്ദു തൂങ്ങി മരിച്ച നിലയിൽ കണ്ടത്തിയത്. കാല് നിലത്ത് മുട്ടിയ നിലയിലായിരുന്നുവെന്നും മരണത്തിൽ ദുരൂഹതയുണ്ടെന്നുമാണ് ബന്ധുക്കൾ പോലീസിൽ മൊഴി നൽകിയിരിക്കുന്നത്. പരാതിയുടെ അടിസ്ഥാനത്തിൽ ഫോറൻസിക്, വിരലടയാള വിദഗ്ധർ ഉൾപ്പടെയുള്ളവർ സ്ഥലത്തെത്തി പരിശോധന നടത്തി. പോസ്റ്റ്മോർട്ടത്തിന് ശേഷം മോർച്ചറിയിൽ സൂക്ഷിച്ചിരിക്കുന്ന മൃതദേഹം ഇന്നലെ വീട്ടുവളപ്പിൽ സംസ്കരിച്ചു. എന്നാൽ വീട് അകത്ത് നിന്ന് പൂട്ടിയ ശേഷമാണ് അനന്ദു ആത്മഹത്യ ചെയ്തതെന്നും പ്രാഥമിക പരിശോധനയിൽ ദുരൂഹതയില്ലെന്നും വെഞ്ഞാറമൂട് എസ്എച്ച്ഒ ആസാദ് അബ്ദുൾ കലാം അറിയിച്ചു. ഗോകുലം മെഡിക്കൽ കോളജിലെ ജീവനക്കാരനാണ് മരിച്ച അനന്ദു കൃഷ്ണൻ.

യുവാവ് തൂങ്ങിമരിച്ച നിലയിൽ

തിരുവനന്തപുരം: മന്ത്രി വി. അബ്ദുറഹ്മാന്‍റെ പഴ്സണൽ സ്റ്റാഫംഗം മാനന്തവാടി തൃശ്ശിലേരി ചേക്കോട്ട്കുന്ന് ഉന്നതിയിൽ സി. വി. ബിജു (25)വിനെ തിരുവനന്തപുരം നന്തൻകോടുള്ള ക്വാർട്ടേഴ്സിൽ തൂങ്ങി മരിച്ച നിലയിൽ കണ്ടെത്തി. എസ്എഫ്ഐ മുൻ സംസ്ഥാന കമ്മിറ്റിയംഗമാണ് മരിച്ച ബിജു. പിതാവ്: വിജയൻ, അമ്മ: ബിന്ദു. ഭാര്യ: ശ്യാമിലി. സഹോദരങ്ങൾ: ബിബിൻകുമാർ, ഹരി, വിനോദ്, ദിവ്യ.

പോസ്റ്റ്‌ ഓഫീസ് മാർച്ചും ധർണയും

നെടുമങ്ങാട്: ബിജെപി സർക്കാരിന്‍റെ തൊഴിലാളി വിരുദ്ധ കർഷകദ്രോഹ നയങ്ങൾക്കെതിരെ സംയുക്ത ട്രേഡ് യൂണിയൻ ആഹ്വാനം ചെയ്ത ദേശീയ പണിമുടക്കുമായി ബന്ധപ്പെട്ട് സംഘടിപ്പിച്ച നെടുമങ്ങാട് പോസ്റ്റ്‌ ഓഫീസ് മാർച്ചും ധർണയും സിപിഎം ജില്ലാ സെക്രട്ടേറിയേറ്റ് അംഗം ബി. സത്യൻ ഉദ്ഘാടനം ചെയ്തു. മന്നൂർക്കോണം രാജേന്ദ്രൻ അധ്യക്ഷത വഹിച്ചു. കെ.പി. പ്രമോഷ്, ചെറ്റച്ചൽ സഹദേവൻ, എസ്.എസ്.ബിജു, ഹരികേശൻ നായർ, എസ്.ആർ. ഷൈൻലാൽ, കെ. റഹീം, കെ.എ.അസീസ്, സി. സാബു, ശ്രീകേശ്, ആർ. മധു എന്നിവർ സംസാരിച്ചു.

അമ്പൂരി ദ്രവ്യപ്പാറയിലെ ഗുഹാക്ഷേത്രം പ്രകൃതിരമണീയം

വെള്ളറട: പ്രകൃതിരമണീയമായ പച്ചപ്പുനിറഞ്ഞ കുന്നുകളും ജലാശയങ്ങളും വെള്ളച്ചാട്ടവും കടത്തുവള്ള സഞ്ചാരവും ഉള്‍പ്പെടുന്ന അമ്പൂരി പഞ്ചായത്തിലെ ടൂറിസം പദ്ധതികള്‍ യാഥാര്‍ഥ്യമാവുന്നു. ഇവിടത്തെ വിവിധ ടൂറിസം പദ്ധതികള്‍ക്കായി സര്‍ക്കാര്‍ ഏഴുകോടി രൂപ അനുവദിച്ചു. ആറു കിലോമീറ്റര്‍ ചുറ്റളവില്‍ സ്ഥിതിചെയ്യുന്ന ഇവിടത്തെ പ്രധാന ടൂറിസം സ്‌പോട്ടുകളെ ബന്ധിപ്പിച്ചുള്ള പദ്ധതികളാണ് നടപ്പിലാക്കാന്‍ പോകുന്നത്. നിലവില്‍ നെയ്യാറിന്‍റെ തീരത്ത് ചെറുതും വലുതുമായി റിസോര്‍ട്ടുകള്‍ ഉയര്‍ന്നു തുടങ്ങിയിട്ടുണ്ട്. ഇവിടെ അവധി ദിവസങ്ങളില്‍ സഞ്ചാരികളും എത്തുന്നുണ്ട്. അമ്പൂരി പഞ്ചായത്തിലെ ദ്രവ്യപ്പാറ, കുമ്പിച്ചല്‍ക്കടവ്, കൂനിച്ചിമല, ഏണിപ്പാറ, ആനക്കുള വെള്ളച്ചാട്ടം, കരമാങ്കുളം, വെള്ളറട പഞ്ചായത്തിലെ പ്ലാങ്കുടിക്കാവ്, കള്ളിക്കാട് പഞ്ചായത്തിലെ നെയ്യാര്‍ഡാം എന്നിവ ബന്ധിപ്പിച്ചുള്ള വിനോദസഞ്ചാര പദ്ധതിയാണ് നടപ്പിലാക്കാന്‍ ലക്ഷ്യമിടുന്നത്. കരിമാങ്കുളം തീരവും ഇരപ്പന്‍കുഴിയും നെയ്യാറിന്‍റെ ആഴമില്ലാത്ത തീരങ്ങളില്‍ ഒന്നാണ് കരിമാങ്കുളം തീരം. അമ്പൂരി പഞ്ചായത്തിലെ മായം വാര്‍ഡിലാണ് ഈ കടവ്. നാലുവശത്തെയും മനോഹരങ്ങളായ കാഴ്ചകള്‍ കാണാനും ഫോട്ടോ ഷൂട്ടിനും അനുയോജ്യമായ തീരമാണിത്. നെയ്യാറിന്‍റെ വനത്തില്‍നിന്നുള്ള ഉത്ഭവ കൈവഴി ആറുകളില്‍ ഒന്നാണ് ഇരപ്പാന്‍കുഴി. നിരവധി കൈത്തോടുകള്‍ ഒന്നിച്ച് ഇവിടെയെത്തുന്നു. ശാന്തസുന്ദരവും വിജനവുമായ സ്ഥലമാണിത്. തെളിഞ്ഞ വെള്ളംനിറഞ്ഞ ഈ ജലാശയത്തിലെ കുളിയും തീരത്തെ വിശ്രമവും സഞ്ചാരികളെ ഏറെ ആകര്‍ഷിക്കുന്നുണ്ട്. അമ്പൂരി തൊടുമല വാര്‍ഡിലുള്ള ആനക്കുളം വെള്ളച്ചാട്ടത്തില്‍ മഴയെത്തിയാല്‍ നീരൊഴുക്കും കൂടും. പാറയിടുക്കുകളിലൂടെ ഒഴുകിയെത്തുന്ന ശുദ്ധമായ തണുത്ത വെള്ളത്തിലുള്ള കുളി സഞ്ചാരികള്‍ക്ക് ഏറെ പ്രിയമാണ്. അവധിദിനങ്ങള്‍ ഉള്‍പ്പെടെ മിക്കവാറും ദിവസങ്ങളിലും യുവാക്കള്‍ ഉള്‍പ്പെടെയുള്ള സംഘങ്ങള്‍ എത്തുന്നുണ്ട്. ഡിപിആര്‍ പരിശോധിച്ച് പദ്ധതി നടപ്പിലാക്കും. ജില്ലാ ടൂറിസം പ്രമോഷന്‍ കൗണ്‍സിലിന്‍റെ നേതൃത്വത്തില്‍ പദ്ധതിയുടെ ഡിപിആര്‍ തയാറാക്കും. അവരുടെ റിപ്പോര്‍ട്ട് പരിശോധിച്ചശേഷം അനുയോജ്യമായ പ്രദേശങ്ങളെ ഫണ്ടിന് അനുസൃതമായി ഉന്നതനിലവാരത്തിലുള്ള വിനോദസഞ്ചാരകേന്ദ്രങ്ങളാക്കാനുള്ള നടപടികള്‍ ബന്ധപ്പെട്ട ജനപ്രതിനിധികളുടെയും ഗ്രാമപഞ്ചായത്തുകളുടെയും സഹകരണത്തോടെ നടപ്പിലാക്കുമെന്നു ജില്ലാ കളക്ടര്‍ അനുകുമാരി അവലോകന യോഗത്തില്‍ പറഞ്ഞു. അമ്പൂരിയില്‍ നടന്നയോഗം സി.കെ. ഹരീന്ദ്രന്‍ എംഎല്‍എ ഉദ്ഘാടനം ചെയ്തു. അമ്പൂരി പഞ്ചായത്ത് പ്രസിഡന്‍റ് വത്സലാ രാജു, വൈസ് പ്രസിഡന്‍റ് തോമസ് മംഗലശേരി, വനം, ടൂറിസം, റവന്യു, പഞ്ചായത്ത് ഉദ്യോഗസ്ഥര്‍, വിവിധ സംഘടന പ്രതിനിധികള്‍ തുടങ്ങിയവര്‍ പങ്കെടുത്തു. കുമ്പിച്ചല്‍ക്കടവ് മലയോരമേഖലയിലെ ഏറ്റവും വലിയ പാലമാണ് കുമ്പിച്ചല്‍ക്കടവില്‍ നിര്‍മിച്ചുവരുന്നത്. നെയ്യാര്‍ സംഭരണിയുടെ കുറുകേ ആദിവാസിമേഖലകള്‍ ഉള്‍പ്പെട്ട തൊടുമല വാര്‍ഡിനെ ബന്ധിപ്പിക്കുന്ന ഈ പാലത്തിന്‍റെ പണികള്‍ ഏറക്കുറെ പൂര്‍ത്തിയായിക്കഴിഞ്ഞു. പാലത്തിന്‍റെ വശങ്ങളില്‍ നിന്നാല്‍ നെയ്യാറിന്‍റെ ഇരുവശത്തെയും മനോഹരങ്ങളായ കാഴ്ചകളും ചുറ്റുമുള്ള മലകളും കാണാവുന്നതാണ്. ഈ പാലത്തിലൂടെ സഞ്ചരിച്ച് അക്കരെയുള്ള വനഭംഗിയും ദര്‍ശിക്കാം.

ബിജെപി പ്രതിഷേധിച്ചു

വെഞ്ഞാറമൂട്: സംസ്ഥാനത്തെ ആരോഗ്യമേഖലയിലെ ശോച്യാവസ്ഥയിൽ പ്രതിഷേധിച്ച്, ബിജെപി കല്ലറ പഞ്ചായത്ത് കമ്മിറ്റിയുടെ ആഭിമുഖ്യത്തിൽ കല്ലറ തറട്ട ഗവ. ആശുപത്രിയിലേക്ക് നടത്തിയ ധർണ, നോർത്ത് ജില്ലാ അധ്യക്ഷൻ എസ്.ആർ. രജികുമാർ ഉദ്ഘാടനം ചെയ്തു. കല്ലറ പഞ്ചായത്ത് കമ്മിറ്റി പ്രസിഡന്‍റ് രമേശ് അധ്യക്ഷത വഹിച്ചു. ബിജെപി വാമനപുരം മണ്ഡലം പ്രസിഡന്‍റ് പി.ടി. രാജേഷ്, കല്ലറ പഞ്ചായത്ത്‌ കമ്മിറ്റി ജനറൽ സെക്രട്ടറി രമേശൻ, പഞ്ചായത്ത്‌ കമ്മിറ്റി വൈസ് പ്രസിഡന്‍റ് സുദേവൻ മറ്റു മണ്ഡലം പഞ്ചായത്ത് നേതാക്കന്മാർ തുടങ്ങിയവർ പങ്കെടുത്തു.

അരുവിക്കര പോസ്റ്റ് ഓഫീസിനു മുന്നിൽ പ്രതിഷേധ ധർണ

നെടുമങ്ങാട്: സംയുക്ത ട്രേഡ് യൂണിയൻ പൊതുപണി മുടക്കിന്‍റെ ഭാഗമായി അരുവിക്കര പോസ്റ്റ് ഓഫീസിനു മുന്നിൽ നടത്തിയ പ്രതിഷേധ ധർണ സിഐടിയു സംസ്ഥാന സെക്രട്ടറി കെ.എസ്. സുനിൽകുമാർ ഉദ്ഘാടനം ചെയ്തു. എഐടിയുസി നേതാവ് അഡ്വ. എസ്.എ. റഹീം അധ്യക്ഷത വഹിച്ചു. വിവിധ ട്രേഡ് യൂണിയൻ നേതാക്കളായ അരുവിക്കര വിജയൻ നായർ, വെള്ളനാട് ഹരിഹരൻ, എ. ആന്‍റണി, കെ. സുകുമാരൻ, മുണ്ടേല പ്രവീൺ, വെള്ളനാട് ശോഭനൻ, ബിനു കുമാർ, കളത്തുകാർ രാധാകൃഷ്ണൻ, ഇരുമ്പ അനിൽ, ഇ.എം. റഹീം, പ്രഭു, സിഡിഎസ് ചെയർപേഴ്സൺ പ്രീത, മോഹനൻ, അങ്കണവാടി യൂണിയൻ നേതാവ് ശൈലജ, ജനപ്രതിനിധികളായ ഷജിത, ഗീതാ ഹരികുമാർ, മറിയക്കുട്ടി തുടങ്ങിയവർ പ്രസംഗിച്ചു. സഹകരണ യൂണിയനും ട്രാൻസ്പോർട്ട് യൂണിയനും പ്രകടനം നടത്തി.

ലൈഫ് ഭവന പദ്ധതി സിപിഎമ്മിന്‍റെ തട്ടിപ്പ്: എം. വിൻസന്‍റ് എംഎൽഎ

വെഞ്ഞാറമൂട്: ലൈഫ് ഭവന പദ്ധതി സിപിഎമ്മിന്‍റെ തട്ടിപ്പു പദ്ധതിയാണെന്ന് എം. വിൻസന്‍റ് എംഎൽഎ. പനവൂർ മണ്ഡലം കോൺഗ്രസ് കമ്മിറ്റി സംഘടിപ്പിച്ച ഏകദിന പഞ്ചായത്ത് ഓഫീസ് സത്യാഗ്രഹം ഉദ്ഘാടനം ചെയ്യുകയായിരുന്നു അദ്ദേഹം . 540 ലൈഫ് ഭവന പദ്ധതി ഉപഭോക്തർ ലിസ്റ്റ് പ്രസിദ്ധീകരിച്ചിട്ടും നാളിതുവരെയായി പനവൂർ പഞ്ചായത്തിൽ ഒരാളിനു പോലും വീടിനുള്ള പണം നൽകിയിട്ടില്ലല്ലെന്നും അദ്ദേഹം കുറ്റപ്പെടുത്തി. പനവൂർ മണ്ഡലം കോൺഗ്രസ് കമ്മിറ്റി പ്രസിഡന്‍റ് കുന്നിൽ ശശി അധ്യക്ഷത വഹിച്ചു. ആനാട് ജയൻ, ആനക്കുഴി ഷാനവാസ്, ബിനു എസ്. നായർ, അഡ്വ. മുജീബ്, പുരുഷോത്തമൻ നായർ, രഘുനാഥൻ നായർ, വി.എസ്. പ്രവീൺ, എസ്എൻ പുരം ജലാൽ, തോട്ടുമുക്ക് റഷീദ്, ലാൽ, വാഴോടു ഹുസൈൻ, പനവൂർ രാജശേഖരൻ നായർ, സരസ്വതി അമ്മ, എസ് എൻ പുരം ഷൈല, ശോഭ, ജലീൻ, ദാദുഷ എന്നിവർ പങ്കെടുത്തു.

‘ഒരു തൈ നടാം’ ജനകീയ വൃക്ഷവത്കരണ കാമ്പയിൻ

തിരുവനന്തപുരം: നെറ്റ് സീറോ എമിഷൻ കേരളത്തിനു മാതൃകയാണു നിംസ് മെഡിസിറ്റിയെന്ന് ഹരിത കേരള മിഷൻ ചെയർപേഴ്സൺ ഡോ. ടി.എൻ. സീമ. ഹരിതകേരളം മിഷന്‍റെ ഒരുകോടി വൃക്ഷത്തൈകള്‍ നട്ടുപിടിപ്പിക്കുന്ന ‘ഒരു തൈ നടാം’ ജനകീയ വൃക്ഷവത്കരണ കാന്പയിൻ ഉദ്ഘാടനം ചെയ്യുകയായിരുന്നു അവർ. നിംസ് മെഡിസിറ്റി എംഡി ഫൈസൽ ഖാൻ ആമുഖ അവതരണം നിർവഹിച്ചു. അഡ്വ. മഞ്ചവിളാകം ജയൻ, ഹരിത കേരള മിഷൻ സംസ്ഥാന അസിസ്റ്റന്‍റ് കോ-ഓർഡിനേറ്റർ ടി.പി. സുധാകരൻ, സംസ്ഥാന പ്രോഗ്രാം ഓഫീസർ ഹരി പ്രിയ, ജില്ലാ കോ-ഓർഡിനേറ്റർ അശോക്, ജെയിംസ്, സൂര്യ, ഐശ്വര്യ, നിംസ് അഡ്മിനിസ്ട്രേറ്റീവ് കോ-ഓർഡിനേറ്റർ ശിവകുമാർ രാജ്, നിംസ് കോളജ് ഓഫ് നഴ്സിംഗ് പ്രിൻസിപ്പൽ ജോസഫൈൻ വിനിത, നിംസ് കോളജ് ഓഫ് ദന്തൽ സയൻസ് പ്രിൻസിപ്പൽ ഡോ. മഞ്ചുഷ തുടങ്ങിയവർ പ്രസംഗിച്ചു. ഓലത്താന്നി വിക്ടറി വൊക്കേഷണൽ ഹയർ സെക്കൻഡറി സ്കൂളിലെയും, ആറാലുംമൂട് വിവേകാനന്ദ സ്കൂളിലെയും വിദ്യാർഥികളും കാന്പയിന്‍റെ ഭാഗമായി പങ്കെടുത്തു.

ബോധരഹിതനായി കിടന്നയാളുടെ വസ്തുവകകൾ മോഷ്ടിച്ചു; പ്രതിക്കായി ലുക്ക് ഔട്ട് നോട്ടീസ്

പേരൂർക്കട: വഴിയോരത്ത് ബോധരഹിതനായി കിടന്നയാളുടെ വസ്തുവകകൾ കവർന്നതുമായി ബന്ധപ്പെട്ടു പ്രതിയെന്നു സംശയിക്കുന്ന ആൾക്കെതിരേ പോലീസ് ലുക്ക് ഔട്ട് നോട്ടീസ് പുറപ്പെടുവിച്ചു. ഒരാഴ്ച മുമ്പ് അട്ടക്കുളങ്ങരയ്ക്കു സമീപം റോഡു ക്കിൽ ബോധരഹിതനായി കിടന്ന വയോധികന്‍റെ കൈവശം ഉണ്ടായിരുന്ന സ്വർണമാല, വാച്ച്, മൊബൈൽ ഫോൺ എന്നിവയാണ് കവർച്ച ചെയ്യപ്പെട്ടത്. ഉണർന്നെണീറ്റപ്പോഴാണു മൊബൈലും മറ്റു സാധനങ്ങളും നഷ്ടപ്പെട്ടതായി ഇയാൾ അറിയുന്നത്. തുടർന്ന് ഫോർട്ട് സ്റ്റേഷനിൽ പരാതി നൽകുകയായിരുന്നു. പോലീസ് നടത്തിയ പരിശോധനയെ തുടർന്നു കവർച്ച നടത്തിയ ആൾ എന്നു സംശയിക്കുന്ന യുവാവ് ഒരു ഓട്ടോറിക്ഷയ്ക്ക് സമീപത്തുകൂടി ഫോണിൽ സംസാരിച്ചുകൊണ്ടു പോകുന്ന ദൃശ്യം ലഭിച്ചു. ഇതിന്‍റെ സഹായത്തോടുകൂടിയാണ് ലുക്ക്ഔട്ട് നോട്ടീസ് പുറപ്പെടുവിച്ചിരിക്കുന്നത്. ഇയാളെക്കുറിച്ച് എന്തെങ്കിലും വിവരം ലഭിക്കുന്നവർ ഫോർട്ട് സ്റ്റേഷനുമായി ബന്ധപ്പെടണം. ഫോൺ: 0471 2461105, 94979 87010.

മൂഴിനട-ചെല്ലാംകോട്-പൂവത്തൂർ ഏലാ റോഡ് ചെളിക്കുളമായി

നെടുമങ്ങാട്: നഗരസഭയിലെ പേരയത്തുകോണം, ഇരിഞ്ചയം വാർഡുകളുടെ അതിർത്തിയിലൂടെ കടന്നുപോകുന്ന മൂഴിനട-ചെല്ലാംകോട്-പൂവത്തൂർ ഏലാ റോഡ് ചെളിക്കളമായി. മഴയിൽ കോലാംകുടി നട മുതൽ മണ്ണാറപറമ്പ് കൈതറ വരെ റോഡിലൂടെ യാത്ര ദുർഘടമാണ്. കുഴികളിൽ വെള്ളം കെട്ടിനിന്നു കാൽനട പോലും ദുരിതപൂർണമായി. ഒട്ടുമിക്ക ഭാഗത്തും ടാറിന്‍റെ അംശം പോലും കാണാനില്ല. ഓട്ടോകൾ ഇതുവഴിയുള്ള ഓട്ടം അവസാനിപ്പിച്ചു. ഇരുചക്ര വാഹനയാത്രക്കാർ ചെളിയിൽ പുതഞ്ഞു അപകടത്തിൽപ്പെടുന്നത് പതിവായി. ഇരുനൂറോളം കുടുംബങ്ങൾ റോഡിന്‍റെ ഇരുവശത്തുമായി താമസിക്കുന്നുണ്ട്. ഒന്നര പതിറ്റാണ്ടു മുമ്പാണ് ഏറ്റവും ഒടുവിൽ ടാറിംഗ് നടത്തിയതെന്നു നാട്ടുകാർ പറഞ്ഞു. നാട്ടുകാരുടെ നേതൃത്വത്തിൽ മന്ത്രിക്കും നഗരസഭാധികൃതർക്കും പരാതി നൽകിയിട്ടുണ്ട്.

അമ്പൂരി-നെയ്യാര്‍ കനാൽ : സമാന്തര റോഡിലെ ബണ്ട് ഇടിഞ്ഞ് അപകടാവസ്ഥയില്‍

വെള്ളറട: അമ്പൂരി- നെയ്യാര്‍ഡാം റോഡിലെ ബണ്ട് ഇടിയുന്ന ഭാഗത്ത് പാര്‍ശ്വഭിത്തിയോ ഇരുമ്പുവേലിയോ സ്ഥാപിക്കാന്‍ വൈകുന്നത് അപകടങ്ങള്‍ക്കിടയാക്കുന്നു. ഇവിടെ മണ്ണ് ഇടിയുന്നതിലൂടെ രൂപപ്പെട്ട കുഴിവരുന്നഭാഗം "എഫ്.ആര്‍.പി. ഡിവൈഡര്‍' ഉപയോഗിച്ച് പോലീസ് വേര്‍തിരിച്ചതിനു സമീപമാണ് റോഡ് അപകടാവസ്ഥയിലായത്. രണ്ടുവര്‍ഷത്തിലേറെയായി ഇവിടെ കനാല്‍ ബണ്ട് ഇടിഞ്ഞുവീണിട്ട്. മഴക്കാലത്താണ് നെയ്യാര്‍ഡാം വലതുകര കനാലിനോടു ചേര്‍ന്നുവരുന്ന ഈഭാഗത്തെ മണ്ണിടിയുന്നത്. തുടര്‍ച്ചയായി മണ്ണിടിഞ്ഞു കനാല്‍വരുന്ന ഭാഗമാകെ വലിയ കുഴിയായിട്ടുണ്ട്. കഷ്ടിച്ച് രണ്ട് വാഹനങ്ങള്‍ക്ക് കടന്നുപോകാവുന്ന റോഡില്‍ മണ്ണിടിയുന്ന ഭാഗം വേര്‍തിരിച്ചു മാറ്റിയതോടെ റോഡിന്‍റെ വീതി വീണ്ടും കുറഞ്ഞു. വേര്‍തിരിച്ചഭാഗത്തിനു മുമ്പ് വളവായതിനാല്‍ വേഗത്തില്‍വരുന്ന വാഹനങ്ങള്‍ക്ക് ഇവിടെയെത്തുമ്പോള്‍ മാത്രമേ റോഡിന്‍റെ സ്ഥിതി അറിയാനാകൂ. ഇതാണ് അപകടങ്ങള്‍ക്ക് കാരണമാകുന്നത്. ജില്ലയിലെ പ്രധാന വിനോദസഞ്ചാര കേന്ദ്രത്തിലേക്കുള്ള പാത എന്നതിനുപുറമേ പന്ത, അമ്പൂരി, മായം എന്നിവിടങ്ങളിലേക്കു പോകാനുള്ള നൂറുകണക്കിനു വാഹനങ്ങളും കടന്നുപോകുന്നത് ഈ വഴിയാണ്. വലിയ വാഹനങ്ങള്‍ വളരെ ബുദ്ധിമുട്ടിയാണ് ഇതുവഴി കടന്നുപോകുന്നത്. മണ്ണിടിയുന്നത് ഒഴിവാക്കാന്‍ ഇവിടെ സംരക്ഷണ ഭിത്തി കെട്ടാനും ഇരുമ്പ് കൈവരി സ്ഥാപിക്കാനും ജലസേചനവകുപ്പ് 45 ലക്ഷം രൂപയുടെ അടങ്കല്‍ തയാറാക്കി നല്‍കിയതല്ലാതെ അനുമതിക്കായി ശ്രമിക്കുന്നില്ലെന്നും പരാതിയുണ്ട്.

"ഒരു പാഥേയം കൂടി': ഉച്ചഭക്ഷണ വിതരണം നടത്തി

നെടുമങ്ങാട്: കേരള സ്റ്റേറ്റ് എക് സൈസ് സ്റ്റാഫ് അസോസിയേഷന്‍റെ 45 -ാം സംസ്ഥാന സമ്മേളനത്തിന്‍റെ പ്രചാരണാർഥം "ഒരു പാഥേയം കൂടി 'എന്ന പേരിൽ ഉച്ചഭക്ഷണ വിതരണം നടത്തി. തിരുവനന്തപുരം ജില്ലയിലെ താലൂക്ക് ആശുപത്രികളിലും വിവിധ അനാഥാലയങ്ങളിലുമാണ് ഉച്ചഭക്ഷണം വിതരണം ചെയ്തത്. ജീവനക്കാരിൽ നിന്നും സമാഹരിച്ച പൊതിച്ചോറും സംഘടനാംഗങ്ങൾ പാചകം ചെയ്തു തയാറാക്കിയ ഭക്ഷണവുമാണു വിവിധ കേന്ദ്രങ്ങളിൽ വിതരണം ചെയ്തത്. അസോസിയേഷൻ ജില്ലാ കമ്മിറ്റിയുടെ ആഭിമുഖ്യത്തിലാണ് പരിപാടി സംഘടിപ്പിച്ചത്. നെടുമങ്ങാട് ജില്ലാ ആശുപത്രിയിൽ നടത്തിയ ഉച്ചഭക്ഷണ വിതരണം അസിസ്റ്റന്‍റ് എക്സൈസ് കമ്മീഷണർ ബി.എൽ. ഷിബു ഉദ്ഘാടനം ചെയ്തു. സംഘടനയുടെ സംസ്ഥാന സെക്രട്ടറി പി.ഡി. പ്രസാദ്, ജില്ലാ വൈസ് പ്രസിഡന്‍റ് എ. നാസറുദീൻ, ജില്ലാ കമ്മിറ്റി അംഗം നജുമുദ്ദീൻ അസിസ്റ്റന്‍റ് എക്സൈസ് ഇൻസ്പെക്ടർ വി. അനിൽകുമാർ തുടങ്ങിയവർ പരിപാടിക്ക് നേതൃത്വം നൽകി. നെടുമങ്ങാട്, ആര്യനാട്, വാമനപുരം എന്നീ എക്സൈസ് ഓഫീസുകളിലെ ജീവനക്കാരുടേയും ഉദ്യോഗസ്ഥരുടേയും സഹകരണത്തോടെയാ ണ് ജില്ലാ ആശുപത്രിയിലും നഗരിക്കുന്ന് തൃപ്പാദം വയോജനകേന്ദ്രത്തിലും ഉച്ചഭക്ഷണം ലഭ്യമാക്കിയത്. ലഹരി വിപത്തിനെതിരെയുള്ള സന്ദേശം കൂടി പൊതുജനങ്ങളിലെത്തിക്കുവാനും ലക്ഷ്യമിടുന്നു.

പൗർണമിക്കാവിൽ ദർശനത്തിനെത്തി ഗവർണർ

വിഴിഞ്ഞം: വെങ്ങാനൂർ പൗർണമിക്കാവ് ശ്രീ ബാല ത്രിപുര സുന്ദരി ദേവീ ക്ഷേത്രത്തിൽ ഗവർണർ രാജേന്ദ്ര വിശ്വനാഥ് ആർലേക്കർ ദർശനം നടത്തി. ഇന്നലെ വൈകുന്നേരം അഞ്ചരയോടെ ക്ഷേത്ര സന്നിധിയിൽ എത്തിയ ഗവർണർ വിവിധ ചടങ്ങുകളിൽ പങ്കെടുത്ത ശേഷമാണ് മടങ്ങിയത്. വ്യാസ പൗർണമിയോടനുബന്ധിച്ചു ഉഗ്ര രക്തചാമുണ്ഡി ദേവിയുടെ ശ്രീകോവിൽ സമർപ്പണവും അദ്ദേഹം നിർവഹിച്ചു. സമർപ്പണ ചടങ്ങിൽ ജില്ലാ കളക്ടർ അനുകുമാരി, കേരള യൂണിവേഴ്സിറ്റി വൈസ് ചാൻസിലർ ഡോ. മോഹനൻ കുന്നുമ്മൽ, എറണാകുളം സിബിഐ ജഡ്ജ് ശേഷാദ്രി, പോക്സോ കോടതി ജഡ്ജ് ഷിബു, ശ്രീപത്മനാഭ ടെമ്പിൾ അഡ്മിനിസ്ട്രേറ്റീവ് മെമ്പറും ജില്ലാ ജഡ്ജിയുമായ അനിൽ, ഐ എസ് ആർ ഒ മുൻ ചെയർമാൻ ഡോ സോമനാഥ് തുടങ്ങിയവർ ഭദ്രദീപം തെളിയിച്ചു. വിവിധ കലാപരിപാടികളും തുടർന്ന് അരങ്ങേറി.

കെടിയു ബി.ടെക് ഫലം: എൽബിഎസ് വനിതാ കോളജ് ഒന്നാം സ്ഥാനത്ത്

തിരുവനന്തപുരം: എപിജെ അബ്ദുൾ കലാം സാങ്കേതിക സർവകലാശാലയുടെ ഈ വർഷത്തെ ബി.ടെക് ഫലത്തിൽ പൂജപ്പുര എൽബിഎസ് വനിതാ എൻജിനിയറിംഗ് കോളജിന് മികച്ച വിജയം. 87.46 ശതമാനം വിജയത്തോടെ സർവകലാശാലയിൽ അഫിലിയേറ്റ് ചെയ്ത 130 കോളജുകളിൽ ഒന്നാമതെത്തി. 83.44 ശതമാനം വിജയത്തോടെ മുത്തൂറ്റ് എൻജിനിയറിംഗ് കോളജ് രണ്ടാമതും, 83. 42 ശതമാനം വിജയത്തോടെ തിരുവനന്തപുരം സിഇടി മൂന്നാം സ്ഥാനത്തുമാണ്. പാപ്പനംകോട് ശ്രീചിത്തിര തിരുനാൾ എൻജിനിയറിംഗ് കോളജ് 73.82 ശതമാനത്തോടെ 12 ആം സ്ഥാനത്തും തിരുവനന്തപുരത്തെ ബട്ടൺ ഹിൽ എൻജിനിയറിംഗ് കോളജ് 72. 78 ശതമാനം വിജയത്തോടെ പതിനാറാം സ്ഥാനത്തുമാണ്. ഒൻപതു സർക്കാർ എൻജിനിയറിംഗ് കോളജുകളും മൂന്ന് എയ്ഡഡ് കോളജുകളും 23 സർക്കാർ നിയന്ത്രിത എൻജിനിയറിംഗ് കോളജുകളും സർവകലാശാലയുടെ കീഴിൽ ഉണ്ട്.

സെക്രട്ടേറിയറ്റ് അസോസിയേഷൻ: എം.എസ് ഇർഷാദ് പ്രസിഡന്‍റ്, കെ.പി പുരുഷോത്തമൻ ജന. സെക്രട്ടറി

തിരുവനന്തപുരം: കേരള സെക്രട്ടേറിയറ്റ് അസോസിയേഷൻ പ്രസിഡന്‍റായി എം. എസ്.ഇർഷാദിനെയും ജനറൽ സെക്രട്ടറിയായി കെ.പി പുരുഷോത്തമനെയും വീണ്ടും തെരഞ്ഞെടുത്തു. ട്രഷററായി കെ.എം. അനിൽകുമാറിനെയും വൈസ് പ്രസിഡന്‍റുമാരായി എ. സുധീർ, ആർ. രഞ് ജിഷ് കുമാർ എന്നിവരെയും സെക്രട്ടറിമാരായി ജി.ആർ. ഗോവിന്ദ്, സജീവ് പരിശവിള, റൈസ്റ്റണ്‍ പ്രകാശ് സിസി എന്നിവരെയും തെരഞ്ഞെടുത്തു. അജിത് സാം ജോണ്‍സ്, എം.എസ്. അരുണ്‍, എസ്. അനിൽകുമാർ, ടി.ആർ. അലക്സ്, എം.എം. ജസീർ, ജയകുമാർ, ബി. സതീഷ്, സുശീൽകുമാരി, എസ്. തുഷാർ എന്നിവരാണ് നിർവാഹക സമിതി അംഗങ്ങൾ. സെക്രട്ടേറിയറ്റ് അസോ. വജ്രജൂബിലി സമ്മേളനത്തിന്‍റെ ഭാഗമായി ജൂണ്‍ 26ന് നടന്ന അസോ. സമ്മേളനത്തിനു പിന്നാലെയാണ് തെരഞ്ഞെടുപ്പ്.

മെറ്റലില്‍ സ്കൂട്ടർ തെന്നിവീണ് അപകടം : യാത്രക്കാരിക്ക് 22,500 രൂപ നഷ്ടപരിഹാരം നല്‍കാൻ മനുഷ്യാവകാശ കമ്മീഷന്‍

തിരുവനന്തപുരം: പൊതുമരാമത്ത് റോഡില്‍ അലക്ഷ്യമായി ഇറക്കിയിട്ടിരുന്ന മെറ്റലില്‍ സ്‌കൂട്ടര്‍ തെന്നിവീണ് യാത്രക്കാരിക്കു പരിക്കേറ്റ സംഭവത്തില്‍ തൊളിക്കോട് പഞ്ചായത്ത് 22,500 രൂപ നഷ്ടപരിഹാരം നല്‍കണമെന്നു മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസ് ഉത്തരവിട്ടു. രണ്ടുമാസത്തിനുള്ളില്‍ നഷ്ടപരിഹാര തുകയായ 22,500 രൂപ നല്‍കിയില്ലെങ്കില്‍ എട്ടുശതമാനം പലിശ നല്‍കേണ്ടി വരുമെന്നും ഉത്തരവില്‍ പറഞ്ഞു. തുക നല്‍കിയ ശേഷം തൊളിക്കോട് പഞ്ചായത്ത് സെക്രട്ടറി നടപടി റിപ്പോര്‍ട്ട് സമര്‍പ്പിക്കണം. നഷ്ടപരിഹാരം പഞ്ചായത്തു നല്‍കിയ ശേഷം ഉത്തരവാദികളില്‍ നിന്നും നിയമാനുസരണം ഈടാക്കാന്‍ തൊളിക്കോട് പഞ്ചായത്തിന് സ്വാതന്ത്ര്യമുണ്ടായിരിക്കുമെന്നും ഉത്തരവില്‍ പറഞ്ഞു. 2023 മേയ് ഒന്‍പതിനാണ് അപകടമുണ്ടായത്. മൈലാമൂട് ട്രാന്‍സ്‌ഫോര്‍മറിനു സമീപം റോഡിലുണ്ടായിരുന്ന മെറ്റലിലാണ് നെടുമങ്ങാട് സ്വദേശിനി സ്മിതാ ഭാസ്‌കറിന്‍റെ സ്‌കൂട്ടര്‍ തെന്നി മറിഞ്ഞത്. ഹര്‍ജിക്കാരിക്കുസാരമായി പരിക്കറ്റിരുന്നു. തുടര്‍ന്നു കൊച്ചിയില്‍ നേവി ഉദ്യോഗസ്ഥനായ ഭര്‍ത്താവിന് അവധിയെടുത്തുവന്നു ഭാര്യയെ ശുശ്രൂഷിക്കേണ്ടതായും വന്നു. ഒന്നര ലക്ഷം രൂപ നഷ്ടപരിഹാരം ആവശ്യപ്പെട്ടാണു പരാതിക്കാരി കമ്മീഷനെ സമീപിച്ചത്.

എസ്എഫ്ഐ മാർച്ചിൽ സംഘർഷം

തിരുവനന്തപുരം: ഗവർണർ രാജേന്ദ്ര വിശ്വനാഥ് അർലേക്കർ രാജ്ഭവനെ കാവിവത്കരിക്കുന്നൂവെന്നാരോപിച്ചു എസ്എഫ്ഐ രാജ്ഭവനിലേയ്ക്കു നടത്തിയ മാർച്ചിൽ സംഘർഷം. ഇന്നലെ ഉച്ചയ്ക്കു പന്ത്രണ്ടു മണിയോടെ രാജ്ഭവനിലേയ് ക്കു മാർച്ചു നടത്തിയ പ്രവർത്തകരെ പോലീസ് ബാരിക്കേഡ് ഉപയോഗിച്ചു തടഞ്ഞു. എസ്എഫ്ഐ പ്രവർത്തകർ ബാരിക്കേഡ് തള്ളിയിടാൻ ശ്രമിച്ചതോടെ പ്രവർത്തകർക്കെതിരെ ജലപീരങ്കി പ്രയോഗിച്ചു. എന്നാൽ പോലീസ് ജലപീരങ്കി പ്രയോഗിച്ചിട്ടും പിരിഞ്ഞുപോകാൻ തയാറാകാത്ത പ്രവർത്തകർ ബാരിക്കേഡിനു മുകളിൽ കയറിനിന്നു പ്രതിഷേധം തുടർന്നു. ഉന്നത പോലീസ് ഉദ്യോഗസ്ഥരുടെ നേതൃത്വത്തിൽ വലിയ സുക്ഷയാണു രാജ്ഭവനു മുന്നിൽ പോലീസ് ഇന്നലെ ഒരുക്കിയത്.

ചെമ്പഴന്തിയിൽ മൂന്നുപേർക്കു തെരുവു നായയുടെ കടിയേറ്റു

പോത്തൻകോട്: ചെന്പഴന്തിയിൽ വീണ്ടും മൂന്നുപേർക്കു തെരുവു നായയുടെ കടിയേറ്റു. ആനന്ദേശ്വരം സ്വദേശികളായ ഗീത (60), അനിൽകുമാർ (70), മുരളീധരൻ നായർ ( 55 )എന്നിവർക്കാണ് കടിയേറ്റത്. രണ്ടുപേർ പാങ്ങപ്പാറ ഹെൽത്ത് സെന്‍ററിലും ഒരാൾ മെഡിക്കൽ കോളേജിലും ചികിത്സ തേടി. രാവിലെ ആനന്ദേശ്വരത്ത് കടയിൽ പോയ ഗീതയുടെ കാലിലും സമീപത്തുണ്ടായിരുന്ന അനിൽകുമാറിന്‍റെ കാലിലും നായ കടിക്കുകയായിരുന്നു. തുടർന്നു സമീപപ്രദേശങ്ങളിലെ തെരുവുനായ്ക്കളെയും വളർത്തു മൃഗങ്ങളെയും ആക്രമിച്ചു. തുടർന്ന് കൗൺസിലർ ആശാ ബാബുവിനന്‍റെ നേതൃത്വത്തിൽ നഗരസഭയിലെ ജീവനക്കാരത്തി നായയെ പിടികൂടി ഷെൽട്ടറിൽ നിരീക്ഷണത്തിൽ പാർപ്പിച്ചു.

പത്മനാഭസ്വാമി ക്ഷേത്രത്തിലെ കാമറവിവാദം : ആധുനിക സംവിധാനങ്ങളില്ല; പരിശോധന ശക്തമാക്കാൻ പോലീസ്

പേരൂർക്കട: ഇതര സംസ്ഥാനക്കാരനായ വ്യക്തി പത്മനാഭസ്വാമി ക്ഷേത്രത്തിൽ രഹസ്യ കാമറയുമായി ഉള്ളിൽ കടന്ന വിഷയം ഗൗരവമായി കാണുന്നുവെന്നും പരിശോധന കൂടുതൽ ശക്തമാക്കുമെന്നും ഫോർട്ട് പോലീസ്. ഗുജറാത്ത് അഹമ്മദാബാദ് സ്വദേശി സുരേന്ദ്രഷാ (66) യാണു കഴിഞ്ഞദിവസം ഒളികാമറയുമായി ക്ഷേത്ര കവാടത്തിനുമുന്നിൽ എത്തിയത്. കണ്ണടയുടെ കാലുകളിൽ രണ്ടു കാമറകളാണ് ഉണ്ടായിരുന്നത്. വെയിൽ വെളിച്ചം കാമറയിൽ വീഴുകയും അതു കണ്ണിൽ അടിക്കുകയും ചെയ്തതു ശ്രദ്ധയിൽപ്പെട്ട ഒരു പോലീസുകാരനാണു വിഷയം ഉന്നതരെ അറിയിച്ചത്. തുടർന്നാണ് സുരേന്ദ്രഷാ പിടിയിലായത്. കൗതുകത്തിനു വേണ്ടിയാണു കാമറയുമായി ക്ഷേത്രത്തിനുള്ളിൽ കടന്നുവന്നതെന്നു സുരേന്ദ്രഷാ പറയുന്നുണ്ടെങ്കിലും ഗുരുതര സുരക്ഷാവീഴ്ചയിലേക്കാണ് ഇതു വിരൽ ചൂണ്ടുന്നത്. നിലവിൽ ഭക്തരെ പരിശോധിക്കുന്നതിന് വേണ്ടി മെറ്റൽ ഡിറ്റക്ടർ സംവിധാനം മാത്രമാണ് പത്മനാഭസ്വാമി ക്ഷേത്ര പരിസരത്തുള്ളത്. ക്ഷേത്രത്തിന്‍റെ നാലു നടകൾ വഴി ഉള്ളിലേക്ക് പ്രവേശിക്കാനാകും. ഈ ഭാഗത്തെല്ലാം പോലീസിന്‍റെ പരിശോധനയുണ്ട്. എന്നാൽ ലോഹഭാഗം അല്ലാത്തതൊന്നും മെറ്റൽ ഡിറ്റക്ടർ ഉപയോഗിച്ചു കണ്ടെത്താൻ സാധിക്കില്ല എന്നുള്ളത് ഒരു പ്രശ്നം തന്നെയാണ്. മുമ്പും ഇതേ രീതിയിൽ രഹസ്യ കാമറ കൈവശം വച്ചു ക്ഷേത്രത്തിനുള്ളിലേക്ക് ആരെങ്കിലും കടന്നിട്ടുണ്ടോ എന്നുള്ളതും വ്യക്തമല്ല. വീഡിയോ കാമറകളും മൊബൈൽ കാമറകളും ക്ഷേത്ര പരിസരത്തും ഉള്ളിലും കർശനമായി നിരോധിച്ചിട്ടുണ്ടെന്ന് അറിയിപ്പ് ബോർഡുകൾ ഇവിടെ സ്ഥാപിച്ചിട്ടുണ്ട്. ഇതിനിടെയാണ് കാമറയുമായി ക്ഷേത്രത്തിനുള്ളിൽ കടന്നയാളെ യാദൃശ്ചികമായി മാത്രം പോലീസ് പിടികൂടുന്നത്. മെറ്റൽ ഡിറ്റക്ടർ എന്ന ഉപകരണം അല്ലാതെ ആധുനിക സംവിധാനങ്ങൾ ക്ഷേത്ര പരിസരത്ത് ഉപയോഗിച്ചാൽ മാത്രമേ സുരക്ഷ കൂടുതൽ ശക്തമാക്കാൻ സാധിക്കുകയുള്ളൂ.

ബൈക്ക് അപകടത്തിൽ യുവാവ് മരിച്ചു

നേമം : കരമന-കളിയിക്കാവിള പാതയില്‍ പാപ്പനംകോട് തുലവിളയ്ക്ക് സമീപമുണ്ടായ അപകടത്തില്‍ ബൈക്ക് യാത്രികനായ യുവാവ് മരിച്ചു. നെയ്യാറ്റിന്‍കര കവലകുളം സായിഭവനില്‍ സായികുമാറിന്‍റെ മകന്‍ എസ്. കെ. ഉണ്ണിക്കണ്ണന്‍ (33) മരിച്ചത്. ബുധനാഴ്ച രാത്രി ഒന്‍പതരായോടെയാണ് അപകടം. ഉണ്ണിക്കണ്ണന്‍ ഓടിച്ചിരുന്ന ബൈക്ക് നിയന്ത്രണം വിട്ട് ഡിവൈഡറില്‍ ഇടിക്കുകയായിരുന്നു. ഗുരുതരമായി പരിക്കേറ്റ ഉണ്ണിക്കണ്ണനെ മെഡിക്കല്‍കോളജ് ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കനായില്ല. സ്വകാര്യ ആശുപത്രിയിലെ ജീവനക്കാരാനാണ്. ഭാര്യ: വൈഷ്ണവി. മകൻ: അദ്രിത്.

ബൈക്കിൽനിന്നു വീണ് പരിക്കേറ്റയാൾ മരിച്ചു

മാറനല്ലൂർ: ബൈക്കിൽനിന്നു വീണ് പരിക്കേറ്റയാൾ മരിച്ചു. മൂലക്കോണം ചെക്കിട്ടവിളാകം പുത്തൻവീട്ടിൽ മനോഹരൻ (59) ആണ് മരിച്ചത്. ജൂലൈ ഒന്നിന് രാത്രി 8.30ഓടെയാണ് അപകടം നടന്നത്. ബാലരാമപുരം-കാട്ടാക്കട റോഡിൽ ചെക്കിട്ടവിളാകത്തെ പാതയോരത്തെ വീട്ടിൽനിന്ന് മനോഹരൻ ബൈക്കിൽ റോഡിലേക്ക് ഇറങ്ങവേ കാട്ടാക്കട ഭാഗത്തുനിന്ന് ഊരൂട്ടമ്പലം ഭാഗത്തേക്കു പോവുകയായിരുന്ന സ്കൂട്ടറിൽ ഇടിക്കാതിരിക്കാൻ ബൈക്ക് പെട്ടെന്ന് നിർത്താൻ ശ്രമിച്ചപ്പോൾ റോഡിലേക്കു മറിഞ്ഞുവീഴുകയായിരുന്നു. തലയ്ക്കു പരിക്കേറ്റതിനെത്തുടർന്ന് മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരുന്നു. അടിയന്തര ശസ്ത്രക്രിയയ്ക്കുശേഷം തീവ്രപരിചരണ വിഭാഗത്തിൽ ചികിത്സയിൽ കഴിയവേ ഉച്ചയോടുകൂടി മരിച്ചു. ഭാര്യ: അജിത. മക്കൾ: മഞ്ജുനാഥ്, മണിനാഥ്.

"തിളക്കം 2025' സംഘടിപ്പിച്ചു

കോവളം: എം. അലിയാർ ചാരിറ്റബിൾ സൊസൈറ്റി സംഘടിപ്പിച്ച തിളക്കം 2025 സ്പീക്കർ എ.എൻ. ഷംസീർ ഉദ്ഘാടനം ചെയ്തു. ആതുര ശുശ്രൂഷാ രംഗത്തെ സേവനങ്ങൾക്ക് ശ്രീചിത്തിരതിരുനാൾ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലെ ന്യൂറോ സർജൻ ഡോ. ഈശ്വറിനെ സ്പീക്കർ ആദരിച്ചു. കൂടുതൽ വിദ്യാർഥികൾ പരീക്ഷ എഴുതി നൂറുശതമാനം വിജയം നേടിയ കാഞ്ഞിരംകുളം പികെഎസ് ഹയർ സെക്കൻഡറി സ്കൂളിന് ഇഎംഎസ് പുരസ്കാരവും വെങ്ങാനൂർ ഹയർ സെക്കൻഡറി സ്കൂൾ ഫോർ ഗേൾസ് സ്കൂളിന് ജോസഫ് മുണ്ടശേരി പുരസ്കാരവും സമ്മാനിച്ചു. തുടർന്നു കോവളം ഏരിയയിൽ വിവിധ മേഖലകളിൽ കഴിവ് തെളിയിച്ച പ്രതിഭകളെയും സ്എസ്എൽസിയ്ക്കും പ്ലസ് ടുവിനും തിളക്കമാർന്ന വിജയം നേടിയ മുഴുവൻ വിദ്യാർഥികളേയും ആദരിച്ചു. ചാരിറ്റബിൾ സൊസൈറ്റി പ്രസിഡന്‍റ് പി. എസ്. ഹരികുമാർ അധ്യക്ഷനായി. വിഴിഞ്ഞം അർച്ചന ഓഡിറ്റോറിയത്തിൽ നടന്ന പരിപാടിയിൽ ചാരിറ്റബിൾ സൊസൈറ്റി സെക്രട്ടറി എസ്. അജിത്ത് സ്വാഗതം പറഞ്ഞു.

കോവളം എൻ. നാഗപ്പന്‍റെ 27-ാമത് അനുസ്മരണ സമ്മേളനം

കോവളം : ശ്രീനാരായണ പ്രസ്ഥാനങ്ങളെ തിരുവനന്തപുരം ജില്ലയിൽ അരക്കിട്ട് ഉറപ്പിച്ച നേതാവായിരുന്നു കോവളം എൻ. നാഗപ്പനെന്ന് മന്ത്രി വി. ശിവൻകുട്ടി. സാമൂഹ്യ പ്രവർത്തകനും എസ്എൻ ട്രസ്റ്റ് ബോർഡ് മെമ്പറും എസ്എൻഡിപി യോഗം നെയ്യാറ്റിൻകര യൂണിയനിൽ ദീർഘകാലം പ്രസിഡന്‍റുമായിരുന്ന കോവളം എൻ. നാഗപ്പന്‍റെ 27-ാമത് അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. അസി. സെക്രട്ടറി കെ.എ. ബാഹുലേയൻ, അധ്യക്ഷത വഹിച്ചു. രാജധാനി ഗ്രൂപ്പ് എംഡി ഡോ. ബിജു രമേശ്, കെപിസിസി മുൻ വൈസ് പ്രസിഡന്‍റ് ടി. ശരത്ചന്ദ്ര പ്രസാദ്, നെയ്യാറ്റിൻകര സനൽ, സിപിഎം ജില്ലാ കമ്മിറ്റി അംഗം പി.എസ്. ഹരികുമാർ, കോവളം ഏരിയാ സെക്രട്ടറി കരുംകുളം അജിത്ത്, അമ്പലത്തറ ചന്ദ്രബാബു, ആർജെഡി ജില്ലാ പ്രസിഡന്‍റ് മലയിൻകീഴ് ചന്ദ്രൻ നായർ, എസ്എൻഡിപി യോഗം കോവളം യൂണിയൻ പ്രസിഡന്‍റ് കോവളം ടി.എൻ. സുരേഷ്, സെക്രട്ടറി തോട്ടം പി. കാർത്തികേയൻ, ജില്ലാ പഞ്ചായത്തംഗം ഭഗത് റൂഫസ്, നഗരസഭ കൗൺസിലർമാരായ നിസാമുദീൻ, പനത്തുറ ബൈജു, അഡ്വ എസ്.പി. ദീപക്, യൂണിയൻ വൈസ് പ്രസിഡന്‍റ് പെരിങ്ങമ്മല എസ്. സുശീലൻ തുടങ്ങിയവർ പങ്കെടുത്തു.

ഡിവൈഎഫ്ഐ പഠനോത്സവം സംഘടിപ്പിച്ചു

നെടുമങ്ങാട്: ഡിവൈഎഫ്ഐ ഉളിയൂർ, കന്യാകോട് യൂണിറ്റുകൾ സംയുക്തമായി പഠനോത്സവം സംഘടിപ്പിച്ചു. സിപിഎം ജില്ലാ സെക്രട്ടറിയേറ്റംഗം ബി. സത്യൻ ഉദ്ഘാടനം ചെയ്തു. കേരളാ സർവകലാശാലയിൽ നിന്നും സുവോളജിയിൽ റാങ്ക് നേടിയ ജെ.എസ്. അനുപമ, പ്ലസ് ടു, എസ്എസ്എൽസി പരീക്ഷകളിൽ ഉന്നത വിദയം നേടിയ വിദ്യാർഥികൾ എന്നിവർക്ക് സ്നേഹോപഹാരം സമ്മാനിച്ചു. ഡിവൈഎഫ്ഐ കന്യാകോട് യൂണിറ്റ് പ്രസിഡന്‍റ് അഭിനവ് അധ്യക്ഷനായി. എസ്.എസ്. ബിജു, സി. സാബു, ബി. സതീശൻ, ഡോ. ബി. ബാലചന്ദ്രൻ, എം.പി. സജിത, എസ്.ആർ. രതീഷ്, എസ്. വിഷ്ണു, നിഖിൽ പരിയാരം എന്നിവർ പ്രസംഗിച്ചു. ശ്രീജിത്ത് സ്വാഗതവും, ആർ.വി. ബിജു നന്ദിയും പറഞ്ഞു.

വെള്ളായണി കാർഷിക കോളജിൽ ടെഡ് എക്സ് ടോക് ഷോ നടത്തി

നേമം: വെള്ളായണി കാർഷിക കോളജ് ലോകപ്രശസ്തമായ ടെഡ്എക്സ് ടോക് ഷോയുടെ വേദിയായി. പൊതുപരിപാലനം, പ്രതിരോധം, ആരോഗ്യപരിചരണം, സംരംഭകത്വം, സാമൂഹിക ഇടപെടൽ എന്നീ മേഖലകളിൽനിന്നും പ്രശസ്തരായ അമൽ മനോജ്, ഡോ. സഞ്ജയ് ബെഹാരി, ലെഫ്. കേണൽ ഋഷി രാജലക്ഷ്മി, സഞ്ജന ജോർജ്, ഡോ. അരുൺ എസ്. നായർ, ബാബു രാമചന്ദ്രൻ എന്നിവർ പ്രസംഗിച്ചു. കേരള കാർഷിക സർവകലാശാല വൈസ് ചാൻസലർ ഡോ. ബി. അശോക് ഉദ്ഘാടനം ചെയ്ത പരിപാടിയിൽ വെള്ളായണി കാർഷിക കോളജ് ഡീൻ ഡോ. റോയ് സ്റ്റീഫൻ, കാർഷിക വിജ്ഞാന വ്യാപന വിദ്യാഭ്യാസ വിഭാഗം മേധാവി ഡോ. അലൻ തോമസ്, പ്രോഗ്രാം കോ-ഓർഡിനേറ്ററായ ഡോ. അർച്ചന ആർ. സത്യൻ, വിദ്യാർഥി പ്രതിനിധി ജി. മാളവിക എന്നിവർ പ്രസംഗിച്ചു. 2025-ൽ ടെഡ്എക്‌സ് ലൈസൻസ് ലഭിച്ച കേരളത്തിലെ മൂന്ന് വിദ്യാഭ്യാസ സ്ഥാപനങ്ങളിൽ ഒന്നാണ് കാർഷിക സർവകലാശാല. സർവകലാശാലയ്ക്ക് കീഴിൽ ടെഡ്എക്‌സ് വേദിയാകുന്ന ആദ്യ സ്ഥാപനമാണ് വെള്ളായണി കാർഷിക കോളേജ്.

പോക്‌സോ കേസ് പ്രതി ലഹരിമരുന്നുസഹിതം പിടിയില്‍

പേരൂര്‍ക്കട: പോക്‌സോ കേസിലെ പ്രതിയെ ലഹരിമരുന്നുമായി ഫോര്‍ട്ട് പോലീസും ഡാന്‍സാഫ് ടീമും ചേര്‍ന്നു പിടികൂടി. മുട്ടത്ത പൊന്നറ നഗര്‍ സ്വദേശി ഗോപകുമാര്‍ (24) ആണ് പിടിയിലായത്. ബംഗലൂരുവിൽനിന്ന് ബസ് മാർഗം തിരുവനന്തപുരത്ത് എംഡിഎംഎ എത്തിക്കുകയായിരുന്നു ഇയാള്‍. ചില്ലറ വില്‍പ്പനയ്ക്ക് എത്തിച്ച 32 ഗ്രാം എംഡിഎംഎയുമായാണ് ചൊവ്വാഴ്ച ഇയാള്‍ പൊന്നറയില്‍നിന്ന് പിടിയിലായത്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

കുടിവെള്ള വിതരണത്തില്‍ തടസം; വലഞ്ഞ് ഉപഭോക്താക്കള്‍

നെയ്യാറ്റിന്‍കര : നെയ്യാറ്റിന്‍കരയില്‍ കുടിവെള്ള വിതരണം മുടങ്ങി. പൈപ്പ് പൊട്ടല്‍ മുതല്‍ പ്ലാന്‍റ് ശുദ്ധീകരണം വരെയുള്ള കാരണങ്ങള്‍ നിരത്തി ഉപഭോക്താക്കളെ അധികൃതര്‍ വലയ്ക്കുന്നുവെന്ന് ഉപഭോക്താക്കള്‍. വാട്ടര്‍ അഥോറിറ്റിയുടെ അനാസ്ഥയെന്നാണു പരക്കെ ആരോപണം. നെയ്യാറ്റിൻകര കോടതി റോഡിലെ പൈപ്പ് പൊട്ടൽ കാരണം കഴിഞ്ഞ ദിവസങ്ങളിലൊന്നും നഗരപ്രദേശത്ത് കുടിവെള്ളം ലഭിച്ചില്ല. വെള്ളം കിട്ടാത്തതിനാല്‍ ആ പ്രദേശത്തെ ഹോട്ടലുകളും വ്യാപാര സ്ഥാപനങ്ങളും പോലും പ്രവര്‍ത്തിക്കാന്‍ ഏറെ ബുദ്ധിമുട്ടുന്നതായി നഗരസഭ കൗണ്‍സിലര്‍ മഞ്ചത്തല സുരേഷ് പറഞ്ഞു. ഇന്നും നാളെയും കാളിപ്പാറ പ്ലാന്‍റ് ശുദ്ധീകരിക്കുമെന്ന് നേരത്തെ അറിയിച്ചിട്ടുണ്ട്. സ്വാഭാവികമായി കുടിവെള്ള വിതരണത്തില്‍ തടസം നേരിടും. കഴിഞ്ഞ ദിവസങ്ങളിലുണ്ടായ കുടിവെള്ള വിതരണത്തിലെ പ്രതികൂല സാഹചര്യം കണക്കിലെടുത്ത് പ്ലാന്‍റ് ശുദ്ധീകരണം മറ്റൊരു ദിവസത്തേയ്ക്ക് മാറ്റിവയ്ക്കണമെന്ന് മഞ്ചത്തല സുരേഷ് ആവശ്യപ്പെട്ടു.

ആറുപേര്‍ക്ക് പുതുജീവിതം നല്‍കി അരുണ്‍ യാത്രയായി

മെഡിക്കല്‍കോളജ്: മസ്തിഷ്‌കരണം സംഭവിച്ച യുവാവ് ആറുപേര്‍ക്കു പുതുജീവന്‍ നല്‍കി ഒടുവില്‍ യാത്രയായി. തലച്ചോറിലുണ്ടായ രക്തസ്രാവത്തെ തുടര്‍ന്നാണ് കോട്ടയം തിരുവഞ്ചൂര്‍ മണര്‍കാട് പുത്തേട്ടില്‍ രോഹിണിയില്‍ പി.ആര്‍. ജനാര്‍ദനന്‍ നായര്‍-എം. രാധാമണിയമ്മ ദമ്പതികളുടെ മകന്‍ ജെ. അരുണ്‍ (44) മരണപ്പെട്ടത്. അരുണിന്‍റെ രണ്ടു വൃക്കകള്‍, കരള്‍, ഹൃദയവാല്‍വ്, രണ്ടു നേത്ര പടലങ്ങള്‍ എന്നിവയാണു കേരളത്തിലെ വിവിധ ആശുപത്രികളില്‍ ചികിത്സയിലുള്ളവര്‍ക്ക് ദാനം ചെയ്തത്. അവയവദാനത്തിന് അരുണിന്‍റെ കുടുംബം തയാറാകുകയായിരുന്നു. യെസ് ബാങ്ക് തിരുവനന്തപുരം വഴുതക്കാട് ബ്രാഞ്ചിലെ മാനേജരായിരുന്നു അരുണ്‍. ജൂണ്‍ 26-നാണ് തലച്ചോറിലെ രക്തസ്രാവത്തെ തുടര്‍ന്ന് അദ്ദേഹത്തെ തിരുവനന്തപുരത്തെ ഒരു സ്വകാര്യ ആശുപത്രിയില്‍ പ്രവേശിപ്പിച്ചത്. ജൂലൈ എട്ടിന് മസ്തിഷ്‌ക മരണം സ്ഥിരീകരിക്കുകയായിരുന്നു. അരുണിന്‍റെ കുടുംബത്തിന്‍റെ ദുഃഖത്തില്‍ പങ്കുചേരുന്നതായി ആരോഗ്യമന്ത്രി വീണ ജോര്‍ജ് അറിയിച്ചു. കേരള സ്റ്റേറ്റ് ഓര്‍ഗന്‍ ആന്‍ഡ് ടിഷ്യു ട്രാന്‍സ്പ്ലാന്‍റ് ഓര്‍ഗനൈസേഷന്‍റെ (കെ-സോട്ടോ) നേതൃത്വത്തിലാണ് അവയവ കൈമാറ്റ നടപടിക്രമങ്ങള്‍ പൂര്‍ത്തിയാക്കിയത്. അരുണിന്‍റെ സംസ്‌കാരം ഇന്ന് ഉച്ചയ്ക്ക് രണ്ടിനു കോട്ടയം മണര്‍കാട്ടെ വീട്ടുവളപ്പില്‍ നടത്തും. എസ്. ദേവിപ്രസാദ് ആണ് ഭാര്യ. ആദിത്യ നായര്‍, നിതാര നായര്‍ എന്നിവര്‍ മക്കളാണ്.

പാച്ചല്ലൂരിൽ കാറും ഒമിനി വാനും കൂട്ടിയിടിച്ചു

തിരുവല്ലം: പാച്ചല്ലൂര്‍ പാറവിളയ്ക്കു സമീപം അമിത വേഗത്തിലെത്തിയ മാരുതി ബൊലേനോ കാറും മാരുതി ഒമിനി വാനും കൂട്ടിയിടിച്ച് ഒമിനി വാന്‍ ഓടിച്ചിരുന്ന ചാക്ക സ്വദേശി പവി (25) ക്ക് കാലിനു ഗുരതരമായി പരിക്കേറ്റു. ഇയാളെ നാട്ടുകാരുടെ നേതൃത്വത്തില്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇന്നലെ പുലര്‍ച്ചെ 2.30 ഓടുകൂടി പാറവിളയ്ക്കു സമീപം സൂര്യ സാമില്ലിനു മുന്നിലായിരുന്നു അപകടം. ഒമിനി വാന്‍ കോവളം ഭാഗത്തുനിന്നും തിരുവനന്തപുരത്തേയ്ക്ക് പോകുകയായിരുന്നു. തിരുവല്ലം ഭാഗത്തുനിന്നും കോവളത്തേയ്ക്ക് പോകുകയായിരുന്ന കോവളം സ്വദേശിയുടെ ബൊലേനോ കാറാണ് ഒമിനി വാനുമായി കൂട്ടിയിടിച്ചത്. അപകടത്തില്‍ ഒമിനി വാന്‍ റോഡിനു വശത്തായി തലകീഴായി മറിയുകയായിരുന്നു. വലിയ ശബ്ദം കേട്ട് സമീപവാസികള്‍ ഓടിയെത്തി വാനില്‍ കുടുങ്ങികിടന്ന പവിയെ ഏറെ പണിപ്പെട്ട് പുറത്തെടുക്കുകയായിരുന്നു. ഒമിനി വാനിന് സാരമായി കേടുപാടുകള്‍ സംഭവിച്ചു. ബൊലേനോ കാറിന്‍റെ മുന്‍ ഭാഗം പൂര്‍ണമായും തകര്‍ന്നിട്ടുണ്ട്. ഇരുവാഹനങ്ങളുടെയും അമിത വേഗതയാണ് അപകടത്തിനിടയാക്കിയതെന്നു തിരിവല്ലം പൊലീസ് പറഞ്ഞു.

വില്ലേജ് ഓഫീസ് വളപ്പിൽ തെരുവുനായ ശല്യവും മദ്യപരുടെ വിളയാട്ടവും

ഊരൂട്ടമ്പലം: നാലുവർഷം മുൻപ്‌ പൊളിച്ചുമാറ്റിയ ഊരൂട്ടമ്പലത്തെ മാറനല്ലൂർ വില്ലേജ് ഓഫീസിന്‍റെ മതിൽ പഞ്ചായത്ത് പുനർനിർമിക്കുന്നില്ലെന്ന് ആക്ഷേപം. പുതിയ കെട്ടിടത്തിൽ സ്മാർട് വില്ലേജ് ഓഫീസ് പ്രവർത്തനം ആരംഭിച്ച് മൂന്നുമാസം കഴിഞ്ഞപ്പോഴാണ് സ്ത്രീസൗഹൃദ ബസ് കാത്തിരിപ്പുകേന്ദ്രം നിർമിക്കുന്നതിനുവേണ്ടി വില്ലേജ് ഓഫീസിന്‍റെ മുൻവശത്തെ മതിൽ പൊളിച്ചുമാറ്റിയത്. മതിൽ പൊളിക്കുന്നതിനെ ജീവനക്കാർ എതിർത്തപ്പോൾ കാത്തിരിപ്പുകേന്ദ്രം മറ്റൊരിടത്തേക്കു മാറ്റാൻ തീരുമാനമായി. എന്നാൽ പൊളിച്ചുമാറ്റിയ മതിൽ പുനർനിർമിക്കാനോ, ബസ് കാത്തിരിപ്പുകേന്ദ്രം സ്ഥാപിക്കാനോ പഞ്ചായത്ത് അധികൃതർ തയാറായിട്ടില്ല. മതിൽ ഇല്ലാത്തതുകാരണം വില്ലേജ് ഓഫീസ് വളപ്പിൽ സദാസമയം തെരുവുനായകളുടെ ശല്യമാണ്. പലപ്പോഴും വിവിധ ആവശ്യങ്ങൾക്കായി വില്ലേജ് ഓഫീസിലെത്തുന്നവർ തെരുവുനായകളെ ഭയന്നാണ് അകത്തേക്കു കടക്കുന്നത്. രാത്രികാലങ്ങളിൽ വില്ലേജ് ഓഫീസ് പരിസരത്ത് മദ്യപാനസദസും നടക്കുന്നുണ്ട്. രാത്രികളിൽ ഇവർ ഉപേക്ഷിക്കുന്ന ഭക്ഷണാവശിഷ്ടങ്ങളാണ് തെരുവുനായകളെ ആകർഷിക്കുന്നത്. പ്രദേശത്തെ ചില സംഘടനകളും, നാട്ടുകാരും പലപ്പോഴും പരാതിപ്പെടുന്നെങ്കിലും പോലീസെത്തി വല്ലപ്പോഴും പരിശോധന നടത്തുന്നതല്ലാത മറ്റു നടപടികളൊന്നും ഉണ്ടാകുന്നില്ല. ജീവനക്കാർക്കും വില്ലേജ് ഓഫീസിലെത്തുന്നവർക്കും വേണ്ടി ഉപയോഗിക്കുന്നതിനു ശൗചാലയം വില്ലേജ് ഓഫീസ് വളപ്പിൽ നിർമിച്ചിട്ടുണ്ടെങ്കിലും ഇപ്പോൾ അതു പൊതുശൗചാലയമായി മാറിയനിലയിലാണ്.

പോക്സോ കേസിലെ പ്രതിക്ക് 23 വർഷം തടവും 10,000 രൂപ പിഴയും

കാട്ടാക്കട: പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിൽ പ്രതിക്ക് 23 വർഷം തടവും 10,000 രൂപ പിഴയും ശിക്ഷ വിധിച്ച് കോടതി. കാട്ടാക്കട മാറനല്ലൂർ അരുവിക്കര കുളത്തിൻകര സ്വദേശി രാജേഷ് കുമാറി (38)നെയാണ് കാട്ടാക്കട അതിവേഗ പോക്സോ കോടതി ജഡ്ജി എസ്. രമേഷ്കുമാർ ശിക്ഷിച്ചത്. പിഴത്തുക അതിജീവിതയ്ക്ക് നൽകണമെന്നും അല്ലാത്ത പക്ഷം ഏഴ് മാസം അധിക കഠിനതടവ് കൂടി അനുഭവവിക്കണമെന്നും വിധിയിൽ പറയുന്നു. 2022 ഓഗസ്റ്റിലായിരുന്നു കേസിനാസ്പദമായ സംഭവം. മൊബൈൽഫോൺ വഴി പരിചയപ്പെട്ട പെൺകുട്ടിയെ ഇയാൾ തന്‍റെ അരുവിക്കരയിലെ വീട്ടിലേക്കു ക്ഷണിച്ചു വരുത്തി ലൈംഗികമായി പീഡിപ്പിക്കുകയായിരുന്നു. വീട്ടിൽ കുട്ടിയെ കാണാതായ മാതാപിതാക്കൾ മാറനല്ലൂർ പോലീസിൽ പരാതിപ്പെടുകയും തുടർന്ന് നടത്തിയ അന്വേഷണത്തിൽ പ്രതിയുടെ വീടിനടുത്തു നിന്നും കുട്ടിയെ കണ്ടെത്തുകയുമായിരുന്നു. വൈദ്യപരിശോധനയിൽ പെൺകുട്ടി ലൈംഗിക പീഡനത്തിന് ഇരയായിട്ടുണ്ടെന്ന് കണ്ടെത്തി. കുട്ടിയും ഇക്കാര്യം സമ്മതിച്ചതോടെയാണ് കേസ് രജിസ്റ്റർ ചെയ്തത്. പ്രോസിക്യൂഷനുവേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ ഡി.ആർ പ്രമോദ് കോടതിയിൽ ഹാജരായി. 42 രേഖകൾ ഹാജരാക്കുകയും 27 സാക്ഷികളെ വിസ്തരിക്കുകയും എട്ട് തൊണ്ടിമുതലുകൾ കോടതിയിൽ ഹാജരാക്കുകയും ചെയ്തു.

കിള്ളിപ്പാലത്ത് ആക്രിക്കടയ്ക്കു തീപിടിച്ചു

പേരൂര്‍ക്കട: കിള്ളിപ്പാലം ബണ്ടു റോഡില്‍ ആക്രിക്കടയ്ക്കു തീപിടിച്ചത് ഫയര്‍ഫോഴ്‌സ് എത്തി സമയോചിതമായി കെടുത്തി. മുഹമ്മദ് ഹുസൈന്‍റെ ഉടമസ്ഥതയിലുള്ള ഹന-സന ട്രേഡ് ലിംഗ്‌സ് എന്ന കടയ്ക്കാണ് തീ പിടിച്ചത്. ബുധനാഴ്ച വൈകുന്നേരം ആറോടെയാണ് കടയ്ക്കുള്ളില്‍നിന്നു പുക ഉയരുന്നത് ജീവനക്കാര്‍ കണ്ടത്. ഏകദേശം 10 ജീവനക്കാരാണ് ഈ സമയം ഇവിടെയുണ്ടായിരുന്നു. തിരുവനന്തപുരം ഫയര്‍‌സ്റ്റേഷനില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സുധീഷ്ചന്ദ്രനും സംഘവുമാണ് തീ കൂടുതല്‍ സ്ഥലത്തേക്ക് വ്യാപിക്കാതെ കെടുത്തിയത്. ഏകദേശം 12 ലോഡ് ആക്രി സാധനങ്ങള്‍ കടയ്ക്കുള്ളിലുണ്ടായിരുന്നു. സമീപത്ത് നിരവധി വീടുകളും സ്ഥാപനങ്ങളും ഉണ്ടായിരുന്നത് ആശങ്ക വര്‍ധിപ്പിച്ചു. വന്‍ അഗ്നിബാധയുണ്ടാകാത്തത് നാശനഷ്ടത്തോത് കുറയ്ക്കുകയായിരുന്നു.

അനധികൃത മത്സ്യബന്ധനം: വള്ളങ്ങൾക്കെതിരേ നടപടി

വിഴിഞ്ഞം: നിരോധിത ലൈറ്റ് ഉപ യോഗിച്ച് അനധികൃത മത്സ്യബന്ധനം നടത്തുന്ന വള്ളങ്ങൾക്കെതിരെ അധികൃതരുടെ നടപടി. എട്ട് വള്ളങ്ങളും ലൈറ്റുകളും പിടികൂടി. അടിമലത്തുറ, കരിംകുളം, പുല്ലുവിള, പൂന്തുറ, മര്യനാട് എന്നിവിടങ്ങളിൽ നിന്നുള്ള വള്ളങ്ങളാണ് കസ്റ്റഡിയിൽ എടുത്തത്. വിഴിഞ്ഞം ഫിഷറീസ് അസിസ്റ്റന്‍റ് ഡയറക്ടർ എസ്. രാജേഷിന്‍റെ നിർദേശപ്രകാരം മറൈൻ എൻഫോഴ്‌സ്‌മെന്‍റ് സീനിയർ സിവിൽ പോലീസ് ഓഫീസർ സുഗതൻ, ഗ്രേഡ് എസ്ഐ ഹരിലാൽ, സിവിൽ പോലീസ് ഓഫീസമാരായ അജീഷ് കുമാർ, രഞ്ജിത്ത്, എസ്. രാകേഷ്, എസ്എ രാകേഷ്, ലൈഫ് ഗാർഡുമാരായ എം. പനിയടിമ, പി. ഇമാമുദ്ധീൻ, കൃഷ്ണൻ, മാർട്ടിൻ, റോബർട്ട്, ബിനു എന്നിവരടങ്ങിയ സംഘംവിഴിഞ്ഞം ഹാർബറിൽ നടത്തിയ പരിശോധനയിൽ ആഴക്കടലിൽ കൃത്രിമ വെളിച്ചം സൃഷ്ടിച്ചു മത്സ്യ ബന്ധനം നടത്തുന്നതിനായി ഉപകരണങ്ങൾ സൂക്ഷിച്ച വള്ളങ്ങൾ കസ്റ്റഡിയിൽ എടുത്തത്. അനധികൃതവും അശാസ്ത്രീയവുമായ മത്സ്യബന്ധനം തടയുന്നതിന്‍റെ ഭാഗമായിട്ടായിരുന്നു മിന്നൽ പരിശോധന. പിടികൂടിയ വള്ളത്തിന്‍റെ ഉടമയ്ക്കെതിരെ കേരള മത്സ്യബന്ധന നിയന്ത്രണ നിയമപ്രകാരം നടപടി സ്വീകരിക്കുമെന്നും കടലിൽ മത്സ്യസമ്പത്ത് കുറയാൻ കാരണമാകുന്ന നിയമവിരുദ്ധ പ്രവർത്തനങ്ങൾ നടത്തുന്ന ബോട്ടുകൾക്കെതിരെ നടപടി കർശനമാക്കുമെന്നും ഫിഷറീസ് അധികൃതർ അറിയിച്ചു.

"ബാക്ക് ടുഗെദര്‍' സംഗമം സംഘടിപ്പിച്ച് കിംസ് ഹെൽത്ത്

തിരുവനന്തപുരം: സ്‌കോളിയോസിസ് കറക്‌ഷന്‍ സര്‍ജറിക്കുശേഷം സാധാരണ ജീവിതത്തിലേക്ക് മടങ്ങിയെത്തിയവരുടെ സംഗമം സംഘടിപ്പിച്ച് തിരുവനന്തപുരം കിംസ്ഹെല്‍ത്ത്. "ബാക്ക് ടുഗെദര്‍' എന്ന ഈ സംഗമത്തില്‍ ശസ്ത്രക്രിയ കഴിഞ്ഞ ഏകദേശം 50-ഓളം പേര്‍ പങ്കെടുത്തു. തങ്ങളുടെ രോഗാവസ്ഥ, അതിനെ നേരിട്ട രീതി, ചികിത്സാ അനുഭവങ്ങള്‍, അതിജീവിച്ച പ്രതിസന്ധികള്‍, രോഗമുക്തിയിലേക്കുള്ള യാത്ര എന്നിവ അവര്‍ പങ്കുവെച്ചു. കിംസ്‌ഹെല്‍ത്ത് ചെയര്‍മാനും മാനേജിംഗ് ഡയറക്ടറുമായ ഡോ. എം.ഐ. സഹദുള്ള സംഗമം ഉദ്ഘാടനം ചെയ്തു. ഓര്‍ത്തോപീഡിക്സ് ആൻഡ് ട്രോമ വിഭാഗം സീനിയര്‍ കണ്‍സള്‍ട്ടന്‍റും ഗ്രൂപ്പ് കോ-ഓര്‍ഡിനേറ്ററുമായ ഡോ. മുഹമ്മദ് നസീര്‍, ഫിസിക്കൽ മെഡിക്കേഷൻ ആൻഡ് റീഹാബിലിറ്റേഷൻ വിഭാഗം സീനിയർ കൺസൾട്ടന്‍റ് ഡോ. എസ്. ഹരിഹരൻ എന്നിവർ പ്രസംഗിച്ചു. സംഗമത്തില്‍ പങ്കെടുത്ത സ്‌കോളിയോസിസ് രോഗബാധിതകരുടെ സങ്കീര്‍ണ്ണമായ രോഗാവസ്ഥകളെക്കുറിച്ചും, അവലംബിച്ച ചികിത്സാരീതികള്‍, അവരുടെ രോഗമുക്തി എന്നിവയെക്കുറിച്ചും ഡോ. രഞ്ജിത് വിശദീകരിച്ചു. പരിപാടിയുടെ ഭാഗമായി സംഘടിപ്പിച്ച സംഗീതസദസ്സും ചടങ്ങിന് മാറ്റുകൂട്ടി. കണ്‍സള്‍ട്ടന്‍റ് ഓര്‍ത്തോപീഡിക് സ്പൈന്‍ സര്‍ജന്‍ ഡോ. രഞ്ജിത് ഉണ്ണിക്കൃഷ്ണന്‍ സ്വാഗതവും സ്‌പെഷലിസ്റ്റ് ഓര്‍ത്തോപീഡിക് സ്‌പൈന്‍ സര്‍ജന്‍ ഡോ. സി. അശ്വിന്‍ നന്ദയും പറഞ്ഞു. നട്ടെല്ലിനുണ്ടാകുന്ന അസ്വാഭാവികമായ വളവിനെയാണ് സ്‌കോളിയോസിസ് എന്ന് പറയുന്നത്. ലോകജനസംഖ്യയുടെ ഏകദേശം ഒരു ശതമാനം ഈ അവസ്ഥയിലുള്ളവരാണ്.

മൂന്നു മാസം കൊണ്ട് 220 മെഗാവാട്ട് ശേഷിയുള്ള 45500 പുരപ്പുറ സോളാര്‍

തിരുവനന്തപുരം: 2025-26 സാമ്പത്തിക വര്‍ഷത്തിന്‍റെ ആദ്യ പാദത്തില്‍ റെക്കോര്‍ഡ് നേട്ടം കൈവരിച്ച് ടാറ്റ പവര്‍ റിന്യൂവബിള്‍ എനര്‍ജി ലിമിറ്റഡ്. 45,589 പുരപ്പുറ സോളാര്‍ ഇന്‍സ്റ്റലേഷനുകളാണ് 2026 സാമ്പത്തിക വര്‍ഷത്തിന്‍റെ ആദ്യപാദത്തില്‍ കമ്പനി നേടിയത്. 2025 സാമ്പത്തിക വര്‍ഷം ആദ്യപാദത്തില്‍ കൈവരിച്ച 8838 ഇന്‍സ്റ്റലേഷനുകളെ അപേക്ഷിച്ച് 416 ശതമാനം വര്‍ധനയാണ് ഇത്. ടാറ്റ പവര്‍ കമ്നി ലിമിറ്റഡിന്‍റെ ഉപസ്ഥാപനമാണ് ടാറ്റ പവര്‍ റിന്യൂവബിള്‍ എനര്‍ജി ലിമിറ്റഡ്. 2026 സാമ്പത്തിക വര്‍ഷത്തിലെ ആദ്യ പാദത്തിലെ ഇന്‍സ്റ്റലേഷനുകള്‍ ടാറ്റ പവര്‍ റിന്യൂവബിള്‍ എനര്‍ജിയെ ആകെ 204, 443 പുരപ്പുറ സോളാര്‍ ഇന്‍സ്റ്റലേഷനുകളിലേക്ക് എത്തിച്ചു. 1.8 ലക്ഷത്തിലധികം വരുന്ന ഗാര്‍ഹിക മേഖലയില്‍ നിന്നുള്ള ഉപഭോക്താക്കള്‍ ഉള്‍പ്പെടെ, രണ്ടു ലക്ഷത്തിലധികം ഉപഭോക്താക്കളുണ്ട് കമ്പനിക്ക്.

ഹോട്ടൽ ഉടമയുടെ കൊലപാതകം: രണ്ടു പ്രതികൾ പിടിയിൽ

തിരുവനന്തപുരം: വഴുതക്കാട്ട് ഹോട്ടൽ ഉടമയെ കൊലപ്പെടുത്തിയ സംഭവത്തി ജീവനക്കാരായ രണ്ടു പ്രതികളെ പോലീസ് അറസ്റ്റ് ചെയ്തു. വഴുതക്കാട്ടെ കേരള കഫെ ഹോട്ടൽ ഉടമ ഇഴപ്പഴിഞ്ഞി ശ്രീലെയിനിൽ കീർത്തനത്തിൽ ജസ്റ്റിൻ രാജാണ് (60) കൊലപ്പെട്ടത്. ചൊവ്വാഴ്ച രാത്രിയാണു ജസ്റ്റിനെ കൊല്ലപ്പെട്ട നിലയിൽ കണ്ടെത്തിയത്. സംഭവത്തിൽ ഹോട്ടൽ ജീവനക്കാരായിരുന്ന ഡൽഹി സ്വദേശി ഡേവിഡ് ഡിൽകുമാർ(31), വിഴിഞ്ഞം അടിമലത്തുറ സ്വദേശി രാജേഷ് (39) എന്നിവരെയാണു മ്യൂസിയം പോലീസ് അറസ്റ്റ് ചെയ്തത്. ചൊവ്വാഴ്ച രാത്രി ഒമ്പതോടെയാണ് അടിമലത്തുറയിലെ രാജേഷിന്‍റെ വീടിനു സമീപത്തുനിന്നു പ്രതികളെ പിടികൂടിയത്. അറസ്റ്റ് ചെയ്യാനെത്തിയ പോലീസ് സംഘത്തേയും പ്രതികൾ ആക്രമിച്ചു. ആക്രമണത്തിൽ വിഴിഞ്ഞം എസ്‌ഐ പ്രശാന്ത്, സിപിഒ വിനയൻ, ഹോംഗാർഡ് സുനിൽ എന്നിവർക്കു നിസ്സാര പരുക്കേറ്റു. തുടർന്നു ഷാഡോ സംഘം അടക്കം കൂടുതൽ പോലീസെത്തിയാണ് ബലപ്രയോഗത്തിലൂടെ പ്രതികലെ കീഴടക്കിയത്. ജസ്റ്റിനെ കഴുത്തിൽ തുണിമുറുക്കി കൊലപ്പെടുത്തുകയായിരുന്നുവെന്നാണ് പോലീസ് പറയുന്നത്. ഹോട്ടൽ ജീവനക്കാർക്കു താമസിക്കാൻ ഉടമകൾ എടുത്തു നൽകിയ വീട്ടിൽ വച്ചാണ് കൊലപാതകം നടന്നത്. വഴക്കുപറഞ്ഞിന്‍റെ വൈരാഗ്യത്തിലാണ് ജസ്റ്റിനെ ആക്രമിച്ചതെന്നാണു പ്രതികൾ പോലീസിനോടു പറഞ്ഞത്. മൃതദേഹം മെഡിക്കൽ കോളജ് മോർച്ചറിയിൽ സൂക്ഷിച്ചിരിക്കുകയാണ്. ഭാര്യ: അജിത (റിട്ട. എക്‌സിക്യുട്ടീവ് എൻജിനീയർ, ഇറിഗേഷൻ വകുപ്പ്). മകൻ: ഡോ. കിരൺ (ദുബായ്). മരുമകൾ: സോഫിയ (ദുബായ്). മുൻ ജയിൽ സൂപ്രണ്ട് പരേതനായ സെൽവരാജ് പിതാവും സിപിഎം മുൻ ജില്ലാ സെക്രട്ടറി എം. സത്യനേശൻ ഭാര്യാപിതാവുമാണ്.

പാറശാലയില്‍ പണിമുടക്ക് പൂര്‍ണം; സമാധാനപരം

പാറശ്ശാല: കേന്ദ്രസര്‍ക്കാരിന്റെ തെറ്റായ ജനദ്രോഹനടപടികള്‍ക്കെതിരെ സംയുക്ത ട്രേഡ് യൂണിയന്റെ ആഭിമുഖ്യത്തില്‍ നടത്തിയ ദേശീയ പണിമുടക്കിന്റെഭാഗമായി പാറശാലയില്‍ നടത്തിയ പണിമുടക്ക് പൂര്‍ണവും സമാധാനപരവും ആയിരുന്നു കടകമ്പോളങ്ങള്‍അടഞ്ഞുകിടന്നു. കെ.എസ്.ആര്‍.ടി.സി. നിരത്തിലിറങ്ങിയില്ല അവശ്യസര്‍വീസുകള്‍ മാത്രമാണ് സര്‍വീസ് നടത്തിയത്. കേന്ദ്രസര്‍ക്കാരിന്റെ തെറ്റായ ജനദ്രോഹനടപടിക്കെതിരെയുള്ള ശക്തമായ താക്കീതായിമാറി പണിമുടക്കിനുള്ള ജനപിന്തുണ. പണിമുടക്കിനോടനുബന്ധിച്ച് പാറശാലയില്‍ പ്രകടനവും യോഗവും സംഘടിപ്പിച്ചു. സി.ഐ.ടി.യു. സംസ്ഥാനകമ്മിറ്റിഅംഗം പി. രാജേന്ദ്രകുമാര്‍ യോഗം ഉദ്ഘാടനം ചെയ്തു. എ. ഐ. റ്റി. യു. സി. മണ്ഡലം പ്രസിഡന്റ് പുത്തന്‍കടവിജയന്‍ അധ്യക്ഷനായി. സിപിഐ മണ്ഡലം സെക്രട്ടറി ആനാവൂര്‍ മണികണ്ഠന്‍, ജില്ലാ കൗണ്‍സില്‍ അംഗം സി സുന്ദരേശന്‍ നായര്‍, സി.പി.ഐ. എം. ഏരിയസെക്രട്ടറി എസ്. അജയകുമാര്‍, സി.ഐ.ടി.യു. ജില്ലാകമ്മിറ്റി അംഗം വി. എസ് .ബിനു, എ .ഐ. റ്റി .യു. സി. മണ്ഡലം സെക്രട്ടറി ഗിരീഷ് സിംഗ്, ബാബുരാജ്, അനീഷ് പി. മണി , ഡോ.എന്‍. എസ് .നവനീത്കുമാര്‍, വൈ. കെ. ഷാജി, എസ് .മധു, ബി .മുരളീധരന്‍, ജെ .ജയദാസ്, കൊറ്റാമം രാജന്‍, ഡി .സജി, ജി .തങ്കാഭായി,ബി .ആര്‍. സജീഷ്ബാബു,അനില്‍കുമാര്‍, തുടങ്ങിയവര്‍ സംസാരിച്ചു.

വെള്ളറടയില്‍ റോഡ് കൈയേറി കസേരകള്‍ സ്ഥാപിച്ചതിനെതിരെ പ്രതിഷേധം

വെള്ളറട: ദേശീയ വാഹന പണിമുടക്കിനോടനുബന്ധിച്ച് വെള്ളറട ജംഗ്ഷനില്‍ റോഡ് കൈയേറി കസേരകള്‍ നിര്‍ത്തിയതിനെതിരേ പ്രതിഷേധം ശക്തം. നാമ മാത്രമായിട്ടുള്ള ആള്‍ക്കാരാണ് പ്രതിഷേധ പരിപാടികളില്‍ പങ്കെടുത്തത്. എന്നാല്‍ റോഡില്‍ കസേര നിര്‍ത്തിയത് ഇരു ചക്ര വാഹനങ്ങള്‍ക്കടക്കം തടസം സൃഷ്ടിച്ചു. സര്‍ക്കാരിന്‍റെ പല പരിപാടികളിലും ഇതുപോലെ റോഡ് കൈയേറിയുള്ള സ്റ്റേജ് നിര്‍മാണം നടത്തിയതിനെതിരേ കോടതിയും, പോലീസും കേസുകള്‍ എടുത്തിട്ടുണ്ട്. അതുപോലെ ഇന്നലെ വെള്ളറടയില്‍ റോഡില്‍ കസേര നിരത്തി മാര്‍ഗതടസം സൃഷ്ടിച്ച സമരാനുകൂലികള്‍ക്കെതിരെ പോലീസും, സര്‍ക്കാരും നടപടി സ്വീകരിക്കണമെന്നു പാറശാല മുന്‍ എംഎല്‍എ എ.ടി. ജോര്‍ജും കെപിസിസി സെക്രട്ടറി ഡോ. ആര്‍. വത്സലനും ആവശ്യപ്പെട്ടു.

അരുവിക്കര ഹയർ സെക്കൻഡറി സ്കൂളിലും ഗവ. എൽപിഎസിലും അധ്യാപകരെ പൂട്ടിയിട്ടു

നെടുമങ്ങാട്: പൊതുപണി മുടക്കു ദിവസം അരുവിക്കര ഗവ. എൽപിഎസിലും ഹയർ സെക്കൻഡറി സ്കൂളിലും ജോലിക്കെത്തിയ അധ്യാപകരെ പണിമുടക്ക് അനുകൂലികൾ പൂട്ടിയിട്ടു. എൽപിഎസിൽ ജോലിക്കെത്തിയ അഞ്ചു പേരെയാണ് പൂട്ടിയിട്ടത്. രാവിലെ ജോലിക്കെത്തിയവരെ അകത്താക്കി സമരക്കാർ ഗേറ്റ് പൂട്ടുകയായിരുന്നു. സ്കൂൾ പിടിഐ പ്രസിഡന്‍റും സംഘവുമാണ് അധ്യാപകരെ പൂട്ടിയിട്ടത്. തുടർന്ന് സ്കൂൾ സമയമായിട്ടും തുറക്കാൻ തയാറായില്ല. സമരം തീരുന്നതു വരെ തുറക്കില്ലന്നു പറയുകയായിരുന്നു. 3:45 ഓടെ അരുവിക്കര സിഐ മുരളീകൃഷ്ണവും സംഘവും സ്ഥലത്തെത്തി ഗേറ്റിന്‍റെ പൂട്ടു തകർത്ത് അധ്യാപകരെ പുറത്തെത്തിക്കുകയായിരിന്നു. ഹയർ സെക്കൻഡറി സ്കൂളിലെ 15ഓളം അധ്യാപകരെയാണ് പൂട്ടിയിട്ടത്. രാവിലെ എത്തി ഒപ്പിട്ടശേഷം മുങ്ങാൻ ശ്രമിച്ചു എന്നാരോപിച്ചാണ് സമരക്കാർ പൂട്ടിയിട്ടത്. 4:15 ഓടെ ഇവർ പുറത്തിറങ്ങാൻ ശ്രമിക്കുന്നതിനിടെ പ്രവർത്തകർ പ്രതിഷേധവുമായി രംഗത്തെത്തി. തുടർന്നു മുതിർന്ന പാർട്ടി നേതാക്കളും പോലീസും സ്ഥലത്തെത്തി സമരക്കാരെ പിരിച്ചുവിട്ടു.

നെയ്യാറ്റിന്‍കരയില്‍ പണിമുടക്ക് സമാധാനപരം

നെയ്യാറ്റിന്‍കര: നെയ്യാറ്റിന്‍കരയില്‍ ദേശീയ പണിമുടക്ക് സമാധാനപരം. നെയ്യാറ്റിന്‍കര കെഎസ്ആര്‍ടിസി ഡിപ്പോയില്‍നിന്നും മുപ്പതിലേറെ ബസുകള്‍ സര്‍വീസ് നടത്തി. ചില ബസുകള്‍ തന്പാനൂര്‍ ബസ് ഡിപ്പോയില്‍ തടഞ്ഞു. പണിമുടക്കനുകൂലികള്‍ രാവിലെ നെയ്യാറ്റിന്‍കരയില്‍ സര്‍വീസുകള്‍ തടയാനെത്തിയെങ്കിലും പോലീസിന്‍റെ നിര്‍ദേശം അനുസരിച്ച് തിരികെ പോയി. നെയ്യാറ്റിന്‍കര താലൂക്ക് ഓഫീസില്‍ ആകെയുള്ള 203 ജീവനക്കാരില്‍ 18 പേര്‍ ജോലിക്ക് ഹാജരായി. ഓഫീസ് പ്രവര്‍ത്തനം തടയാനുള്ള ശ്രമമൊന്നും പണിമുടക്ക് അനുകൂലികളില്‍നിന്നും ഉണ്ടായില്ലെന്നു തഹസില്‍ദാര്‍ അറിയിച്ചു. കടകന്പോളങ്ങള്‍ പലയിടത്തും അടഞ്ഞുകിടന്നു. നെയ്യാറ്റിന്‍കര ആലുംമൂട് ജംഗ്ഷന്‍ മുതല്‍ ആശുപത്രി ജംഗ്ഷന്‍ വരെയുള്ള വഴിയോര തട്ടുകളും തുറന്നില്ല. ബാലരാമപുരം -നെയ്യാറ്റിന്‍കര പാതയില്‍ അങ്ങിങ്ങ് ചില തട്ടുകടകള്‍ പ്രവര്‍ത്തിച്ചു. കരിക്ക് കച്ചവടവും കാര്യമായി നടന്നു. അതേ സമയം, വഴിമുക്കിനു സമീപം ചിലയിടത്ത് കെട്ടിടങ്ങള്‍ പൊളിച്ചുനീക്കല്‍ പ്രവൃത്തികള്‍ പുരോഗമിച്ചു. വാഹന ഗതാഗതം പൊതുവേ കുറവായിരുന്നു. സ്വകാര്യ വാഹനങ്ങള്‍ സജീവമായി നിരത്തിലിറങ്ങി.

കാട്ടാക്കടയിൽ കണ്ടക്ടർക്ക് മർദനം; പ്ലാവൂരിൽ സ്‌കൂളിൽ സംഘർഷം

കാട്ടാക്കട: പണിമുടക്കിൽ കാട്ടാക്കടയിൽ രണ്ടിടത്ത് നേരിയ പ്രശ്‌നങ്ങൾ ഉണ്ടായി. കാട്ടാക്കട കെഎസ്ആർടിസി ഡിപ്പോയ്ക്ക് മുന്നിൽനിന്നും കാട്ടാക്കട വഴി പൊന്മുടിയിലേക്കു പോവുകയായിരുന്ന ബസ് തടഞ്ഞത്. രാവിലെ 7.30 ആയിരുന്നു സംഭവം. ഇവിടെ കെഎസ്ആർടിസി ഡ്രൈവറും കണ്ടക്ടറും സമരക്കാരുമായി വാക്കു തർക്കം ഉണ്ടായി. തുടർന്ന് സമരക്കാരിൽ കണ്ടാൽ അറിയാവുന്നവർ കണ്ടക്ടറെ മർദിച്ചുവെന്നു കാട്ടാക്കട പോലീസിൽ പരാതി നൽകി. അതേ സമയം സമരക്കാർക്കിടയിലേക്ക് ബസ് ഇടിച്ചു കയറ്റാൻ ശ്രമിച്ചുവെന്നു സമരക്കാരും കാട്ടാക്കട പോലീസ് സ്റ്റേഷനിൽ പരാതി നൽകിയിരിക്കുകയാണ്. കാട്ടാക്കട ആമച്ചൽ പ്ലാവൂർ സ്‌കൂളിൽ 27 ഓളം അധ്യാപകർ ഇന്നലെ ഡ്യൂട്ടിക്ക് എത്തിയതും പ്രശ്‌നമായി. പ്രദേശത്തെ സമരാനുകൂലികൾ സ്‌കൂളിനുള്ളിലേക്ക് കയറി അധ്യാപകരുമായി തർക്കത്തിൽ ഏർപ്പെട്ടു. രാവിലെ എത്തിയ അധ്യാപകർ വൈകുന്നേരം അഞ്ചുമണിക്കുശേഷം പോയാൽ മതിയെന്നും സമരക്കാർ ശഠിച്ചു. പ്ലാവൂരിൽ സ്‌കൂളിൽ സമരാനുകൂലികൾ നടത്തിയ പ്രതിഷേധത്തിൽ സ്‌കൂളിലെ സ്റ്റോറും വാതിലും തകർത്തപ്പോൾ ഇതുതെറിച്ച് അധ്യാപകരുടെ ശരീരത്തിൽ പതിച്ച് പരിക്കേറ്റെന്നാരോപിച്ച് കാട്ടാക്കട പോലീസിൽ അധ്യാപകർ പരാതി നൽകി. സ്‌കൂളിൽ അതിക്രമിച്ചു കയറി പൊതുമുതൽ നശിപ്പിക്കുകയും അധ്യാപകരെ കൈയേറ്റം ചെയ്യുകയും ചെയ്തുവെന്നാരോപിച്ച് അധ്യാപകർക്കനുകൂലമായി കോൺഗ്രസും ബിജെപിയും പ്രകടനം നടത്തി. കാട്ടാക്കട കെഎസ് ആർടിസി സ്റ്റാൻഡിൽ മുന്നിൽ സമരാനുവരികൾ നെയ്യാറ്റിൻകരയിൽനിന്നും പൊന്മുടിയിലേക്ക് പോകുകയായിരുന്ന ബസ് തടഞ്ഞ ഡ്രൈവറെ മർദിച്ച സംഭവത്തിൽ കേസെടുത്തു.

പണിമുടക്കിൽ സ്്തംഭിച്ചു തലസ്ഥാനം

തിരുവനന്തപുരം: പ്രതിപക്ഷ തൊഴിലാളി സംഘടനകൾ ആഹ്വാനം ചെയ്ത 24 മണിക്കൂർ ദേശീയ പണിമുടക്കിൽ തലസ്ഥാന ജില്ല സ്്തംഭിച്ചു. കടകൾ അടച്ചും സ്വകാര്യവാഹനങ്ങൾ കൂടുതലായി നിരത്തിലിറക്കാതെയും ജനങ്ങളും സഹകരിച്ചതോടെ ജില്ലയിൽ പണിമുടക്ക് പൂർണമായിരുന്നു. ജില്ലയിലെ ചില ഭാഗങ്ങളിൽ ചെറിയ തോതിൽ സംഘർഷവുമുണ്ടായി. ആളുകളെയും കയറ്റി സഞ്ചരിച്ച ഓട്ടോറിക്ഷകളെ സമരാനുകൂലികൾ തടഞ്ഞു. വെള്ളയന്പലത്തും സ്റ്റാ ച്യുവിലും മണക്കാടും ആട്ടോറിക്ഷക്കാരും സമരാനുകൂലികളും തമ്മിൽ ഉന്തും തള്ളുമുണ്ടായി. യഥാസമയം പോലീസ് എത്തിയതിനാൽ സംഘർഷം വലുതായില്ല. ജില്ലയിലെ പ്രധാന വ്യാപാര കേന്ദ്രങ്ങളായ ചാല, പാളയം മാർക്കറ്റുകൾ പൂർണമായും അടഞ്ഞുകിടന്നു. ഹോട്ടലുകളും തുറന്നില്ല. കെ എസ്ആർടിസി സർവീസ് നടത്താത്തതു മറ്റു സ്ഥലങ്ങളിൽ നിന്നും ജില്ലയിൽ വിവിധ ആവശ്യങ്ങൾക്കായി എത്തിയവർക്കു വലിയ ബുദ്ധിമുട്ടായി. മെഡിക്കൽ കോളജ് ആശുപത്രിയിലും ജില്ലാ ജനറൽ ആശുപത്രിയിലും ചികിത്സയ്ക്കെത്തിയവർ പണിമുടക്കിൽ ആകെ ബുദ്ധിമുട്ടി. ഹോട്ടലുകൾ പണിമുടക്കിൽ സജീവമായതു ആഹാരം കിട്ടാതെ രോഗികളെയും കൂട്ടിരിപ്പുകാരെയും ബുദ്ധിമുട്ടിലാക്കി. മെഡിക്കൽ കോളജ് ആശുപത്രിയിൽ ഡിവൈഎഫ്ഐ നൽകിവരുന്ന പൊതിച്ചോറായിരുന്നു ഇവർക്കൊക്കെ ആശ്രയമായത്. ഇതിനിടെ കുപ്പിവെള്ളം 40 ഉം 50 ഉം രൂപയ്ക്കു വിറ്റചിലരെ പോലീസ് ആശുപത്രി വളപ്പിൽ നിന്നും പുറത്താക്കി. സമരാനുകൂലികൾ ജില്ലയിലെ വിവിധ ഭാഗങ്ങളിൽ മാർച്ചു നടത്തി. ഇടതുപക്ഷ തൊഴിലാളി സംഘടനകൾ രാജ്ഭവനിലേയ്ക്കു മാർച്ച് നടത്തി. രാവിലെ മ്യൂസിയം ജംഗ്ഷനിൽ നിന്നാണു മാർച്ച് ആരംഭിച്ചത്. തുടർന്നു രാജ്ഭവനു മുന്നിൽ നടന്ന പൊതുയോഗം സിഐടിയു സംസ്ഥാന ജനറൽ സെക്രട്ടറി എളമരംകരീം ഉദ്ഘാടനം ചെയ്തു. സിപിഐ സംസ്ഥാന സെക്രട്ടറി ബിനോയ് വിശ്വം പങ്കെടുത്തു. ഐഎൻടിയുസി നേതൃത്വത്തിലുള്ള യുഡിറ്റിഎഫ് ജിപിഒയ്ക്കു മിന്നിൽ മാർച്ച് നടത്തി. ഐഎൻടിയുസി സംസ്ഥാന പ്രസിഡന്‍റ് ആർ. ചന്ദ്രശേഖരൻ ഉദ്ഘാടനം ചെയ്തു.

ഡ്യൂട്ടിക്കെത്തിയ ഡോക്ടർ കുഴഞ്ഞുവീണ് മരിച്ചു

കഴക്കൂട്ടം: എജെ ആശുപത്രിയിലെ മെഡിക്കൽ അഡ്മിനിസ്ട്രേറ്റീവ് ഡോക്ടറും പത്തനംതിട്ട സ്വദേശിയുമായ പെരുനാട് റാന്നിയിൽ കൃഷ്ണ ഭവനിലെ ഡോ. ജി. ഗോപാലകൃഷ്ണൻ (76) കുഴഞ്ഞുവീണ് മരിച്ചു. കഴിഞ്ഞദിവസം രാവിലെ എട്ടിന് ആശുപത്രിയിൽ ഡ്യൂട്ടിക്ക് എത്തി കാറിൽ നിന്ന് ഇറങ്ങുന്നതിനിടെ കുഴഞ്ഞു വീഴുകയായിരുന്നു. തുടർന്ന് തീവ്രപരിചരണ വിഭാഗത്തിൽ മാറ്റിയെങ്കിലും ജീവൻ രക്ഷിക്കാനായില്ല. ഹൃദയസംബന്ധമായ അസുഖത്തിന് ചികിത്സയിലായിരുന്നു അദ്ദേഹം. ഏറെ നാളായി കഴക്കൂട്ടത്ത് മകന്‍റെ വീട്ടിലാണ് താമസം. തിരുവനന്തപുരം ജൂബിലി ഹോസ്പിറ്റൽ, പത്തനംതിട്ട മുത്തൂറ്റ് മെഡിക്കൽ കെയർ, കോന്നി ബിലിവേഴ്സ് മെഡിക്കൽ സെന്‍റർ, കൊല്ലം അസീസിയ മെഡിക്കൽ കോളജ്, നെയ്യാറ്റിൻകര നിംസ് ഹോസ്പിറ്റൽ തുടങ്ങിയ ആശുപത്രികളിൽ അദ്ദേഹം പ്രവർത്തിച്ചു. കഴിഞ്ഞ ഏഴുമാസകാലമായി കഴക്കൂട്ടം എജെ ആശുപത്രിയിലെ മെഡിക്കൽ അഡ്മിനിസ്ട്രേറ്റാണ്. സംസ്കാരം റാന്നിയിലെ വസതിയിൽ നടന്നു.

വയോധികൻ വീടിനുള്ളിൽ തൂങ്ങി മരിച്ച നിലയിൽ

വിഴിഞ്ഞം : വയോധികനെ വീടിനുള്ളിൽ തൂങ്ങിമരിച്ചനിലയിൽ കണ്ടെത്തി. വിഴിഞ്ഞം മുക്കോല വിരാലിവിള വീട്ടിൽ കാർലോസ് (62) ആണ് മിരിച്ചത്. കഴിഞ്ഞദിവസം വൈകുന്നേരം നാലോടെ വീട്ടിലെ ഹാളിൽ ബെഡ് ഷീറ്റിൽ തൂങ്ങി നിൽക്കുന്നത് കണ്ട വീട്ടുകാർ അഴിച്ചിറക്കി വിഴിഞ്ഞം സർക്കാർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യ നിർമലയുടെ മൊഴിയുടെ അടിസ്ഥാനത്തിൽ വിഴിഞ്ഞം പോലീസ് കേസ് രജിസ്റ്റർ ചെയ്ത് മേൽ നടപടി സ്വീകരിച്ചു.

ലഹരി വിമുക്ത പദയാത്ര നടത്തി

പാറശാല: 'നമുക്ക് ലഹരിയില്‍ നിന്നും മുക്തരാകാം എന്ന സന്ദേശവുമായി വിവിധ സംഘടനകളുടെ നേതൃത്വത്തില്‍ നെയ്യാറ്റിന്‍കര മുതല്‍ പാറശാല വരെ ലഹരി വിമുക്ത പദയാത്ര സംഘടിപ്പിച്ചു. നെയ്യാറ്റിന്‍കരയില്‍ ആരംഭിച്ച പദയാത്ര തിരുവനന്തപുരം എക്‌സൈസ് ഡെപ്യൂട്ടി കമ്മീഷണര്‍ പി. ഷിബു ഉദ്ഘാടനം ചെയ്തു. നെയ്യാറ്റിന്‍കര എക്‌സൈസ് റെയിഞ്ച് ഇന്‍സ്‌പെക്ടര്‍ പ്രശാന്തും പി. ഷിബുവും ചേർന്ന് ഉദിയന്‍കുളങ്ങര മേജര്‍ രവി ട്രെയിനിംഗ് അക്കാദമി ഡയറക്ടര്‍ രതീഷ് കുമാറിനു ദീപശിഖ കൈമാറി. യാത്രയുടെ ക്യാപ്റ്റന്മാരായി പാറശാല മുന്‍ എംഎല്‍എ ടി. ജോര്‍ജ്, കേരള നാടാര്‍ മഹാജന സംഘം സംസ്ഥാന പ്രസിഡന്‍റ് ഡോ. ജെ. ലോറന്‍സ്, ശ്രീനാരായണ ഗുരുദേവ ചാരിറ്റബിള്‍ ട്രസ്റ്റ് സെക്രട്ടറി പിരാകോട് കെ. രാമചന്ദ്രന്‍, ബിജെപി സംസ്ഥാന കൗണ്‍സില്‍ അംഗം മഞ്ചവിളകാം കാര്‍ത്തികേയന്‍, കാരോട് പഞ്ചായത്ത് പ്രസിഡന്‍റ് സി.എ. ജോസ്, ചെങ്കല്‍ പഞ്ചായത്ത് വൈസ് പ്രസിഡന്‍റ് കെ. അജിത് കുമാര്‍, ചെങ്കവിള ഹെല്‍ത്ത് ഹെയര്‍ ഹോസ്പിറ്റല്‍ ഡോക്ടര്‍ അജന്ത എസ്.റ്റൈറ്റസ്, ഗാന്ധി മിത്ര മണ്ഡലം ചെയര്‍മാന്‍ അഡ്വ. ബി. ജയചന്ദ്രന്‍ നായര്‍ എന്നിവര്‍ നേതൃത്വം നല്‍കി.

മയിലിനെ ചത്ത നിലയിൽ കണ്ടെത്തി

മാറനല്ലൂർ: അരുവിക്കരയിൽ പൂവൻ വിള വയലിൽ മയിലിനെ ചത്തനിലയിൽ കണ്ടെത്തി. ആൺമയിലിന്‍റെ മാംസം മുഴുവൻ ഭക്ഷിച്ച നിലയിലും ശരീരഭാഗമെല്ലാം വേർപെട്ട നിലയിലുമാണ്. രാവിലെ ദിനപത്രമിടാൻ പോയ പ്രദേശവാസിയായ ഏജന്‍റ് സുനിലാണ് മൈലിനെ ചത്ത നിലയിൽ കണ്ടെത്തിയത്. തുടർന്നു പോലീസിനെയും വനം വകുപ്പിനെയും പഞ്ചായത്ത് പ്രസിഡന്‍റ് സുരേഷ് കുമാർ, കരിങ്ങൾ വാർഡ് അംഗം എന്നിവരെയും സുനിൽ തന്നെ വിളിച്ചുവരുത്തി. ചത്ത മയിലിനെ മാറനല്ലൂർ പോലീസ് സ്റ്റേഷനിൽ എത്തിച്ചിരിക്കുകയാണ്. വനം വകുപ്പ് ഇവിടെ എത്തി ഇതിനെ ഏറ്റുവാങ്ങി. വൈദ്യുതി ആഘാതത്തിൽ നിലത്തുവീണശേഷം പിന്നീട് ഏതെങ്കിലും മൃഗങ്ങൾ ഭക്ഷിച്ചതോ അല്ലെങ്കിൽ മൃഗങ്ങൾ പിടിച്ചതോ ആകാമെന്ന നിഗമനത്തിലാണ് വനം വകുപ്പ്. ശരീരഭാഗങ്ങൾ ഭൂരിഭാഗവും അജ്ഞാത ജീവി ഭക്ഷിച്ചതിനാൽ പോസ്റ്റ്മോർട്ടം ചെയ്ത് കാരണം കണ്ടുപിടിക്കുകയും പ്രയാസമാകും.

മദ്യപിച്ചതിന് അറസ്റ്റിലായ യുവാവ് സ്റ്റേഷനിൽനിന്നു പോലീസുകാരന്‍റെ മൊബൈൽ മോഷ്ടിച്ചു കടന്നു..!

വിഴിഞ്ഞം: മദ്യപിച്ച് ബഹളമുണ്ടാക്കിയതിന് പിടികൂടിയ യുവാവ് വൈരാഗ്യം തീർക്കാൻ പോലീസുകാരന്‍റെ മൊബൈൽ ഫോൺ അടിച്ച് മാറ്റി മുങ്ങി. മണിക്കുറുകൾക്കു ശേഷം തമ്പാനൂരിൽനിന്നു പിടിയിലായി. ബാലരാമപുരം പള്ളിവിളാകം സ്വദേശി സജു പി. ജോൺ (46) ആണ് മോഷണക്കുറ്റത്തിന് അറസ്റ്റിലായത്. കഴിഞ്ഞ ദിവസം ഉച്ചയോടെ മദ്യപിച്ചു ബഹളമുണ്ടാക്കിയ സജുവിനെ മുക്കോലയിൽനിന്നാണ് വിഴിഞ്ഞം പോലീസ് പിടികൂടിയത്. ജീപ്പിൽ സ്റ്റേഷനിൽ എത്തിച്ച ശേഷം ജാമ്യത്തിൽ വിടുകയും ചെയ്തു. പുറത്തിറങ്ങുന്നതിനിടയിൽ സ്റ്റേഷൻ മുറ്റത്ത് ജീപ്പിന്‍റെ സീറ്റിൽ വച്ചിരുന്ന സിപിഒ ഷിജിന്‍റെ മൊബൈൽ ഫോൺ ഇയാളുടെ ശ്രദ്ധയിൽപ്പെട്ടു. ഫോൺ കൈക്കലാക്കിയ സജു ആരും കാണാതെ അവിടെനിന്നു മുങ്ങി. ഇയാളാണ് ഫോൺ മോഷ്ടിച്ചെന്ന കാര്യം പോലീസും അറിഞ്ഞില്ല. നഷ്ടമായ ഫോണിനായി പോലീസുകാർ എല്ലായിടവും മണിക്കൂറുകളോളം തെരഞ്ഞെങ്കിലും കണ്ടെത്താനായില്ല. ഇതിനിടയിൽ സ്വിച്ച് ഓഫാക്കിയതും അന്വേഷണത്തിനു തടസമായി. ഇതിനിടയിൽ മോഷ്ടിച്ച മൊബൈലുമായി സജു വീട്ടിൽനിന്നു യാത്ര തിരിച്ചു. രാത്രിയിൽ തമ്പാനൂർ റയിൽവേ സ്റ്റേഷനിൽനിന്ന ഇയാളെ സംശയത്തിന്‍റെ പേരിൽ റെയിൽവേ പോലീസ് പിടികൂടി. ഒന്നിൽ കൂടുതൽ ഫോൺ കൈയിലുള്ളതായി കണ്ട പോലീസ് കാര്യങ്ങൾ തിരക്കിയെങ്കിലും പരസ്പര വിരുദ്ധമായി നൽകിയ മറുപടി സംശയത്തിനിടയാക്കി. കൂടുതൽ ചോദ്യം ചെയ്തതോടെ മോഷണ വിവരം വെളിവാക്കി. റെയിൽവേ പോലീസ് വിവരമറിയിച്ചപ്പോഴാണ് സജുവാണ് കള്ളനെന്ന കാര്യം വിഴിഞ്ഞം പോലീസ് അറിയുന്നത്. പ്രതിയെ മോഷണക്കുറ്റം ചുമത്തി കോടതിയിൽ ഹാജരാക്കി റിമാൻഡ് ചെയ്തു.

തിരുവനന്തപുരം എന്‍ജിനീയറിംഗ് കോളജില്‍ പച്ചക്കറിത്തോട്ടം

മെഡിക്കല്‍കോളജ്: ഭക്ഷ്യഭദ്രത ലക്ഷ്യമിട്ടുകൊണ്ട് തിരുവനന്തപുരം എന്‍ജിനീയറിംഗ് കോളജില്‍ പച്ചക്കറിത്തോട്ടം ഒരുങ്ങുന്നു. ഉള്ളൂര്‍ കൃഷിഭവന്‍റെ നേതൃത്വത്തില്‍ മൂന്നേക്കര്‍ സ്ഥലത്തു പൂപ്പാടവും പച്ചക്കറിത്തോട്ടവും ഒരുക്കുന്ന പരിപാടിയുടെ ഉദ്ഘാടനം വി.കെ. പ്രശാന്ത് എംഎല്‍.എ ജെണ്ടുമല്ലിയുടെ തൈകള്‍ നട്ടുകൊണ്ട് നിര്‍വ്വഹിച്ചു. കോളജ് പ്രിന്‍സിപ്പല്‍ ഡോ. കെ. സുരേഷ് അധ്യക്ഷത വഹിച്ചു. വിവിധ വര്‍ണങ്ങളിലുള്ള ജെണ്ടുമല്ലിയും വാടാമല്ലിയും കൂടാതെ പച്ചക്കറി തൈകളായ വെണ്ട, ചീര, തക്കാളി, മുളക്, വഴുതിന, വെള്ളരി, പയര്‍ എന്നിവയും കൃഷിസ്ഥലത്തു നട്ടുപിടിപ്പിച്ചു. വരുന്ന ഓണത്തിന് എട്ടു മെട്രിക് ടണ്‍ പച്ചക്കി എന്‍ജിനീയറിംഗ് കോളജിലെ കൃഷിഭൂമിയില്‍ നിന്നു വിളയിച്ചെടുക്കാനാകുമെന്നാണു പ്രതീക്ഷ. നടീല്‍ ഉത്സവം ആഘോഷമാക്കിക്കൊണ്ട് വിദ്യാര്‍ഥികളും രംഗത്തുണ്ടായിരുന്നു. കൃഷി ഓഫീസര്‍ സി. സൊപ്‌ന, കൃഷി ഉദ്യോഗസ്ഥര്‍, എന്‍ജിനീറിംഗ് കോളജ് അദ്ധ്യാപകര്‍ തുടങ്ങിയവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]