റാന്നി: വന്യമൃഗങ്ങൾ നാട്ടിൽ ഇറങ്ങി മനുഷ്യനും കൃഷിക്കും ഭീഷണിയാകുന്ന പ്രശ്ന പരിഹാരത്തിനു ദീർഘകാലാടിസ്ഥാനത്തിൽ മാസ്റ്റർ പ്ലാൻ തയാറാക്കണമെന്നും മലയോര കര്‍ഷന് ഉപാധിരഹിത പട്ടയം നല്‍കണമെന്നും കിസാന്‍സഭ ജില്ലാ സമ്മേളനത്തോടനുബന്ധിച്ച സെമിനാർ ആവശ്യപ്പെട്ടു.
വനമേഖലയോടു ചേർന്നുകിടക്കുന്ന കൃഷിയിടങ്ങളില്‍ ആന, കടുവ, പുലി ഉൾപ്പെടെയുള്ള മൃഗങ്ങളുടെ ശല്യമാണ് നേരിടുന്നതെങ്കില്‍ ജനവാസമേഖലകളില്‍ പന്നിയും കുരങ്ങും മയിലുമാണ് എത്തുന്നത്. കര്‍ഷകന്‍ വിളവിറക്കുന്ന കാര്‍ഷികവിളകള്‍ വന്യമൃഗങ്ങളുടെ ആക്രമണത്തില്‍ ഇല്ലാതാകുകയാണ്.
റാന്നി നിയോജകമണ്ഡലത്തിലെ വടശേരിക്കര, പെരുനാട്, നാറാണംമൂഴി, വെച്ചൂച്ചിറ പഞ്ചായത്ത് അതിർത്തികളിലാണ് കാട്ടു മൃഗങ്ങളുടെ ആക്രമണം രൂക്ഷമായുള്ളത്. കാർഷിക വിളകൾ നശിപ്പിക്കുക മാത്രമല്ല മനുഷ്യജീവനുതന്നെ ഇവ ഭീഷണിയാവുകയാണ്.
സർക്കാരും ത്രിതല പഞ്ചായത്തുകളും യോജിച്ച് വനാതിർത്തിയിൽനിന്ന് കാട്ടുമൃഗങ്ങൾ നാട്ടിലേക്ക് ഇറങ്ങുന്നതു തടയാനുള്ള സോളാർ വേലി ഉൾപ്പെടെയുള്ളവ നിർമിച്ചാലേ ശാശ്വത പരിഹാരം ഉണ്ടാക്കുവാന്‍ കഴിയൂ.
കര്‍ഷകരുടെ ന്യായമായ ആവശ്യത്തിനു കാലതാമസം വരുന്നതില്‍ സെമിനാര്‍ ആശങ്ക രേഖപ്പെടുത്തി. കര്‍ഷകന്‍ കൈവശഭൂമിയിൽ നട്ടുവളർത്തിയ മരങ്ങൾ മുറിക്കാൻ അനുവാദം നൽകാത്തത് ദ്രോഹമാണെന്നും അതിനായി നിയമനിർമാണം നടത്തണമെന്നും കർഷകർക്ക് തങ്ങളുടെ ഭൂമിയിലെ മരങ്ങൾ മുറിക്കുന്നതു സംബന്ധിച്ച് നിലനിൽക്കുന്ന പ്രതിസന്ധി പരിഹരിക്കുന്നതിന് റവന്യു, വനം വകുപ്പുകള്‍ സംയുക്ത തീരുമാനം എടുക്കുന്നതിന് അടിയന്തര നടപടി സ്വീകരിക്കണമെന്നും സെമിനാറില്‍ ആവശ്യമുയര്‍ന്നു.
സെമിനാര്‍ കിസാന്‍സഭ സംസ്ഥാന പ്രസിഡന്‍റ് ജെ. വേണുഗാപാലന്‍ നായര്‍ ഉദ്ഘാടനം ചെയ്തു. സംസ്ഥാന സെക്രട്ടറി എ.പി. ജയന്‍ അധ്യക്ഷത വഹിച്ചു. പട്ടയപ്രശ്നവും വന്യജീവി ആക്രമണവും എന്ന വിഷയത്തില്‍ നടന്ന സെമിനാറില്‍ കിസാന്‍സഭ സംസ്ഥാന വൈസ് പ്രസിഡന്‍റ് മാത്യു വര്‍ഗീസ് വിഷയാവതരണം നടത്തി. കെ.യു. ജനീഷ് കുമാര്‍ എംഎൽഎ, ജില്ലാ പഞ്ചായത്ത് പ്രസിഡന്‍റ് രാജി പി.രാജപ്പന്‍,
ഡിസിസി വൈസ് പ്രസിഡന്‍റ് ടി.കെ. സാജു, സിപിഐ സംസ്ഥാന കൗണ്‍സിലംഗം പി.ആര്‍. ഗോപിനാഥന്‍, കിസാന്‍ സഭ ജില്ലാ പ്രസിഡന്‍റ് ആര്‍. രാജേന്ദ്രന്‍ പിള്ള, സെക്രട്ടറി ടി. മുരുകേഷ്, ജോജോ കോവൂര്‍, സന്തോഷ് കെ. ചാണ്ടി, എന്‍.ജെ. പ്രസന്നന്‍ എന്നിവര്‍ പ്രസംഗിച്ചു. സെമിനാറിന്‍റെ ഭാഗമായി കാര്‍ഷിക മേഖലയില്‍ മികവു തെളിയിച്ച കര്‍ഷകരെ ആദരിച്ചു.
ഇന്നു പ്രതിനിധി സമ്മേളനം സംസ്ഥാന ജനറല്‍ സെക്രട്ടറി വി. ചാമുണ്ണി ഉദ്ഘാടനം ചെയ്യും. സിപിഐ ജില്ലാ സെക്രട്ടറി സി.കെ. ശശിധരന്‍, കിസാന്‍ സഭ സംസ്ഥാന സെക്രട്ടറി എ.പി. ജയന്‍, സിപിഐ സംസ്ഥാന കൗണ്‍സിലംഗങ്ങളായ മുണ്ടപ്പള്ളി തോമസ്, ഡി. സജി,ജില്ലാ അസി. സെക്രട്ടറി കെ.ജി. രതീഷ് കുമാര്‍ തുടങ്ങിയവർ പ്രസംഗിക്കും.