പത്തനംതിട്ട: വന്യജീവി വാരാഘോഷത്തിന്‍റെ ഭാഗമായി ഒക്ടോബർ രണ്ടു മുതൽ എട്ടുവരെ വനം, വന്യജീവി വകുപ്പ് വിവിധ മത്സരങ്ങൾ സംസ്ഥാന, ജില്ലാതലങ്ങളിൽ സ്കൂൾ, കോളജ് വിദ്യാർഥികൾക്കായി സംഘടിപ്പിക്കും.
പത്തനംതിട്ട ജില്ലാതല മത്സരങ്ങൾ ഒക്ടോബർ രണ്ട്, മൂന്ന് തീയതികളിൽ കോന്നി റിപ്പബ്ലിക്കൻ വിഎച്ച്എസ്എസിൽ നടക്കും. എൽപി, യുപി, എച്ച്എസ്, എച്ച്എസ്എസ്, കോളജ് വിഭാഗത്തിൽപെട്ട വിദ്യാർഥികൾക്കായി പെൻസിൽ ഡ്രോയിംഗ്, വാട്ടർ കളർ പെയിന്‍റിംഗ് മത്സരങ്ങളും എച്ച്എസ്, എച്ച്എസ്എസ്,
കോളജ് വിദ്യാർഥികൾക്കായി ഉപന്യാസ രചനാ മത്സരങ്ങളും ഒക്ടോബർ രണ്ടിനും ഹൈസ്കൂൾ, ഹയർ സെക്കൻഡറി , കോളജ് വിദ്യാർഥികളുടെ ക്വിസ്, പ്രസംഗ മത്സരങ്ങൾ ഒക്ടോബർ മൂന്നിനും രാവിലെ ഒന്പതു മുതൽ നടത്തും.
ഓരോ വിഭാഗത്തിലും ഓരോ ഇനത്തിലും ഒരു സ്ഥാപനത്തിൽ നിന്നു പരമാവധി രണ്ട് വിദ്യാർഥികളെ പങ്കെടുപ്പിക്കാം. ക്വിസ് മത്സരത്തിൽ ഒരു സ്ഥാപനത്തിൽ നിന്നു രണ്ട് വിദ്യാർഥികൾ അടങ്ങിയ ടീമിനോ ഒരു വിദ്യാർഥിക്കു മാത്രമായോ പങ്കെടുക്കാം. മത്സരത്തിൽ പങ്കെടുക്കാൻ താത്പര്യമുള്ള കുട്ടികൾ പ്രധാനാധ്യാപകന്‍റെ സാക്ഷ്യപത്രം സഹിതം പേര് രജ‌ിസ്റ്റർ ചെയ്യണം.
മത്സര വിജയികൾക്ക് കാഷ് പ്രൈസും സർട്ടിഫിക്കറ്റും നൽകും. വിവിധ ഇനങ്ങളിൽ ഒന്നാം സ്ഥാനം നേടുന്നവരെ സംസ്ഥാനതല മത്സരങ്ങളിലേക്ക് തെരഞ്ഞെടുക്കും. സംസ്ഥാനതല മത്സരങ്ങൾ ഒക്ടോബർ എട്ടിനു നടക്കും. കൂടുതൽ വിവരങ്ങൾ 0468 2243452, 8547604707, 8547603708 നന്പരുകളിൽ ലഭ്യമാണ്.