ബാർ കോഴ വിവാദം; തിരുവഞ്ചൂര് രാധാകൃഷ്ണന്റെ മകന് ക്രൈംബ്രാഞ്ച് നോട്ടീസ്
Tuesday, June 11, 2024 10:32 AM IST
തിരുവനന്തപുരം: എൽഡിഎഫ് സർക്കാരിനെതിരായ ബാർ കോഴ ആരോപണത്തിൽ കോണ്ഗ്രസ് നേതാവ് തിരുവഞ്ചൂര് രാധാകൃഷ്ണന്റെ മകൻ അര്ജുന് രാധാകൃഷ്ണന് ക്രൈംബ്രാഞ്ച് നോട്ടീസ്. വെള്ളിയാഴ്ച ക്രൈംബ്രാഞ്ചിന്റെ ജവഹര് നഗര് ഓഫീസില് ചോദ്യം ചെയ്യലിന് ഹാജരാകാനാണ് നിർദേശം.
വിവാദ ശബ്ദരേഖ പുറത്തുവന്ന ബാറുടമകളുടെ വാട്സ്ആപ്പ് ഗ്രൂപ്പിന്റെ അഡ്മിനായിരുന്നു അര്ജുന് രാധാകൃഷ്ണനെന്ന് അന്വേഷണ സംഘം പറയുന്നു. പിന്നീട് അഡ്മിന് സ്ഥാനത്തു നിന്നും അര്ജുന് മാറിയെങ്കിലും ഗ്രൂപ്പ് അംഗമായി തുടരുന്നുണ്ട്. ഈ സാഹചര്യത്തില് വിവരങ്ങള് ചോദിച്ചറിയാനാണ് അര്ജുനെ വിളിച്ചതെന്ന് അന്വേഷണ സംഘം പറയുന്നു.
അര്ജുന് രാധാകൃഷ്ണന് നേരിട്ട് നോട്ടീസ് നല്കാനാണ് തിങ്കളാഴ്ച ക്രൈംബ്രാഞ്ച് ശ്രമിച്ചത്. എന്നാല് തനിക്ക് ബാര് ബിസിനസ് ഇല്ലെന്ന് പറഞ്ഞ് അര്ജുന് നോട്ടീസ് കൈപ്പറ്റാന് വിസമ്മതിച്ചിരുന്നു. ഇതേത്തുടര്ന്ന് ഇ-മെയിലാണ് ക്രൈംബ്രാഞ്ച് നോട്ടീസ് നല്കിയത്.
മദ്യനയത്തിലെ ഇളവുകൾക്ക് പണം നല്കാന് നിര്ദേശിച്ചുകൊണ്ടുള്ള ബാറുടമകളുടെ സംഘടനയുടെ ഇടുക്കി ജില്ലാ മുന് പ്രസിഡന്റ് അനിമോന്റെ ശബ്ദസന്ദേശം പുറത്തുവന്നതാണ് വിവാദമായത്.ഡ്രൈഡേ ഒഴിവാക്കാനും പ്രവര്ത്തന സമയം കൂട്ടാനുമായി പണം നല്കണമെന്നായിരുന്നു ഓഡിയോയിൽ പറഞ്ഞിരുന്നത്.