സർക്കാർ മാറിയാൽ ജനാധിപത്യത്തെ നശിപ്പിക്കുന്നവർക്കെതിരെ കർശന നടപടി: രാഹുൽ ഗാന്ധി
Friday, March 29, 2024 7:24 PM IST
ന്യൂഡൽഹി: സർക്കാർ മാറിയാൽ ജനാധിപത്യത്തെ നശിപ്പിക്കുന്നവർക്കെതിരെ കർശന നടപടിയുണ്ടാകുമെന്ന് രാഹുൽ ഗാന്ധി. പ്രതിപക്ഷ രാഷ്ട്രീയ പാര്ട്ടികൾക്കെതിരായ ആദായ നികുതി വകുപ്പിന്റെ നടപടികൾക്കെതിരെയാണ് രാഹുലിന്റെ പ്രതികരണം.
ഇനി ഇത്തരം പ്രവൃത്തികൾ ചെയ്യാൻ ആരും ധൈര്യപ്പെടാത്ത നടപടിയായിരിക്കും സ്വീകരിക്കുക. ഇത് തന്റെ ഗ്യാരന്റിയാണെന്നും രാഹുൽ വ്യക്തമാക്കി.
കേജരിവാളിന്റെ അറസ്റ്റിനു പിന്നാലെയാണ് ആദായനികുതി വകുപ്പ് പ്രതിപക്ഷ പാർട്ടികൾക്കെതിരെ നടപടികൾ ആരംഭിച്ചത്. കോൺഗ്രസ്, സിപിഎം. തൃണമൂൽ കോൺഗ്രസ്, സിപിഐ അടക്കമുള്ള പാർട്ടികൾക്കെതിരെ ആദായനികുതിവകുപ്പ് നോട്ടീസ് അയച്ചിട്ടുണ്ട്.
1700 കോടി രൂപ അടയ്ക്കണമെന്നാണ് കോൺഗ്രസിന് ലഭിച്ച പുതിയ നോട്ടീസ്. 11 കോടി അടക്കണമെന്ന് സിപിഐക്കും 15 കോടി നൽകണമെന്ന് സിപിഎമ്മിനും നൽകിയ നോട്ടീസിൽ പറയുന്നു. സിപിഎമ്മിനെതിരെയുള്ള നടപടിയുടെ കാരണം നോട്ടീസിൽ വ്യക്തമാക്കിയിട്ടില്ല.