ബിഹാറിലെ സീറ്റ് തര്ക്കം; കേന്ദ്രമന്ത്രി പശുപതി പാരസ് രാജിവച്ചു
Tuesday, March 19, 2024 12:34 PM IST
ന്യൂഡല്ഹി: ആര്എല്ജെപി നേതാവ് പശുപതി കുമാര് പാരസ് കേന്ദ്രമന്ത്രിസ്ഥാനം രാജിവച്ചു. കേന്ദ്ര ഭക്ഷ്യ-പൊതുവിതരണ മന്ത്രിയായിരുന്നു അദ്ദേഹം. ബിഹാറിലെ സീറ്റ് വിഭജനത്തിലുള്ള അതൃപ്തിയെ തുടര്ന്നാണ് അപ്രതീക്ഷിത രാജി.
കഴിഞ്ഞ ദിവസമാണ് ബിഹാറില് എന്ഡിഎയുടെ സീറ്റ് വിഭജനം പൂര്ത്തിയായത്. സംസ്ഥാനത്തെ 40 ലോക്സഭാ മണ്ഡലങ്ങളില് ബിജെപി -17, ജനതാദള് (യു)- 16, ലോക് ജനശക്തി പാര്ട്ടി (റാംവിലാസ്)- അഞ്ച്, ഹിന്ദുസ്ഥാനി അവാം മോര്ച്ച - ഒന്ന് , രാഷ്ട്രീയ ലോക് മഞ്ച്- ഒന്ന് എന്നിങ്ങനെയാണ് സീറ്റ് വിഭജനം.
സംസ്ഥാനത്ത് നിലവില് അഞ്ച് എംപിമാരുള്ള ആര്എല്ജെപിക്ക് ഒരു സീറ്റ് പോലും നല്കാന് ബിജെപി തയാറായില്ല. തന്റെ പാര്ട്ടിക്ക് സീറ്റ് നല്കാതെ, ചിരാഗ് പാസ്വാന്റെ പാര്ട്ടിയായ എല്ജെപിക്ക് കൂടുതല് സീറ്റ് നല്കിയതാണ് പശുപതിയെ ചൊടുപ്പിച്ചത്. ആര്എല്ജെപി ഇന്ത്യാ മുന്നണിയില് ചേര്ന്നേക്കും എന്നാണ് സൂചന.