ആറ്റിങ്ങൽ നഗരസഭയിൽ രണ്ട് ബിജെപി അംഗങ്ങൾ രാജിവച്ചു
Thursday, February 29, 2024 6:13 PM IST
തിരുവനന്തപുരം: ആറ്റിങ്ങൽ നഗരസഭയിൽ രണ്ട് ബിജെപി കൗൺസിലർമാർ രാജിവച്ചു. വാർഡ് 22 ചെറുവള്ളിമുക്ക് കൗൺസിലർ സംഗീതാറാണി, വാർഡ് 28 തോട്ടവാരം കൗൺസിലർ ഷീല എ.എസ് എന്നിവരാണ് രാജിവച്ചത്.
ഇരുവരും നഗരസഭാ സെക്രട്ടറിക്ക് രാജി നൽകിയതായാണ് വിവരം. രാജിവയ്ക്കാനുള്ള കാരണം വ്യക്തമല്ല. നിലവിൽ സിപിഎം ഭരണത്തിലാണ് ആറ്റിങ്ങൽ നഗരസഭ.
31 വാർഡുകളിൽ ബിജെപിക്ക് ഏഴും കോൺഗ്രസിന് ആറും സീറ്റുകളാണുള്ളത്. രണ്ട് കൗൺസിലർമാർ കൂടി കൊഴിഞ്ഞുപോകുന്നതോടെ ബിജെപിക്ക് മുഖ്യ പ്രതിപക്ഷ കക്ഷി എന്ന സ്ഥാനം നഷ്ടമാകും.