കോട്ടയം: സംസ്ഥാന പരിവര്‍ത്തിത ക്രൈസ്തവ ശിപാര്‍ശിത വിഭാഗ വികസന കോര്‍പറേഷന്‍ നടപ്പാക്കുന്ന വിവിധ പദ്ധതികളുടെ ഉദ്ഘാടനം ഇന്ന് ഉച്ചകഴിഞ്ഞു മൂന്നിനു നടക്കും. കോര്‍പറേഷന്‍ നടപ്പിലാക്കിയ തൊഴിലധിഷ്ഠിത പരിശീലന പദ്ധതിയില്‍ പരിശീലനം പൂര്‍ത്തിയാക്കിയ വിദ്യാര്‍ഥികള്‍ക്കുള്ള സര്‍ട്ടിഫിക്കറ്റ്-സ്റ്റൈഫന്‍റ് വിതരണം, കോര്‍പറേഷന്‍റെ ലക്ഷ്യ വിഭാഗത്തില്‍പ്പെട്ട വിദ്യാര്‍ഥികള്‍ക്കുള്ള വിദ്യാഭ്യാസ പ്രോത്സാഹന സമ്മാനം അപേക്ഷ സ്വീകരിക്കല്‍, പുതിയ പദ്ധതികളായ നവജീവന്‍, ജീവാമൃതം എന്നിവയുടെ സംസ്ഥാനതല പ്രഖ്യാപനവും ഉദ്ഘാടനവുമാണ് കോട്ടയം ദര്‍ശന കള്‍ച്ചറല്‍ സെന്‍റര്‍ ഓഡിറ്റോറിയത്തില്‍ നടക്കുന്നത്.
മന്ത്രി ഒ.ആര്‍. കേളു ഉദ്ഘാടനം ചെയ്യും. മന്ത്രി വി.എന്‍. വാസവന്‍ അധ്യക്ഷതവഹിക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ, കെ. ഫ്രാന്‍സിസ് ജോര്‍ജ് എംപി എന്നിവര്‍ മുഖ്യാതിഥികളാകും. ചെയര്‍മാന്‍ ഡോ. ജാസി ഗിഫ്റ്റ്, എംഡി ബി. ബാബു രാജ്, ജില്ലാ പഞ്ചായത്ത് പ്രസിഡന്‍റ് കെ.വി. ബിന്ദു, പിന്നാക്ക വിഭാഗ വികസന വകുപ്പ് ഡയറക്ടര്‍ ജെറോമിക് ജോര്‍ജ്, ജില്ലാ കളക്ടര്‍ ജോണ്‍ വി. സാമുവല്‍, കോട്ടയം നഗരസഭാധ്യക്ഷ ബിന്‍സി സെബാസ്റ്റ്യന്‍, കൗണ്‍സിലര്‍ സിന്‍സി പാറയില്‍, എസ്. ലത, എസ്. സുരേഷ് കുമാര്‍, ഡോ. എം.കെ. സുരേഷ്, സിജു സെബാസ്റ്റ്യന്‍, പി.ജെ. വര്‍ഗീസ്, പി.ടി. ജോണ്‍, രാജേഷ് പാലങ്ങാട്ട്, ഫാ. എമില്‍ പുള്ളിക്കാട്ടില്‍, പി.ജെ. അനൂപ് എന്നിവര്‍ പ്രസംഗിക്കും.