കണമല: പത്തനംതിട്ട, കോട്ടയം ജില്ലകളിലെ മികച്ച അധ്യാപകർക്കുള്ള പമ്പാവാലി കിസുമം ഗവൺമെന്റ് ഹയർ സെക്കൻഡറി സ്കൂളിലെ പൂവ് സർഗവേദിയുടെ ഇത്തവണത്തെ ഗുരുരത്ന പുരസ്കാരം താഴത്തുവടകര ഗവൺമെന്റ് എച്ച്എച്ച്എസിലെ കെമിസ്ട്രി അധ്യാപകൻ ആർ. പ്രദീപ് കുമാർ അർഹനായി. തങ്ങളുടെ പ്രിയപ്പെട്ട അധ്യാപകരെക്കുറിച്ച് കുട്ടികൾ നൽകുന്ന അപേക്ഷകൾ പരിഗണിച്ചാണ് ഗുരുരത്ന പുരസ്കാരം പ്രഖ്യാപിക്കുന്നത്.
2005ൽ കോട്ടയം ജില്ലയിലെ താഴത്തുവടകര സ്കൂളിൽ കെമിസ്ട്രി അധ്യാപകനായി ചാര്ജ് എടുക്കുമ്പോഴുള്ള അവസ്ഥയിൽ നിന്നു 2009 ആയപ്പോഴേക്കും ജില്ലയിലെ ഏറ്റവും മികച്ച സർക്കാർ സ്കൂളുകളിൽ ഒന്നായി താഴത്തുവടകര മാറിയതിൽ പ്രദീപ് കുമാറിന്റെ പങ്ക് നിർണായകമായിരുന്നുവെന്ന് സമിതി വിലയിരുത്തി. മലകുന്നം ഇത്തിത്താനം ഹയർസെക്കൻഡറി സ്കൂളിലെ മലയാളം അധ്യാപിക അനില പി. നായർ ആണ് ഭാര്യ. ഖരക്പ്പൂരിൽ ബിഎസ്സി എക്കണോമിക്സ് വിദ്യാർഥിയായ ആനന്ദ് പ്രദീപ്, പത്താം ക്ലാസ് വിദ്യാർഥിനിയായ നീരജ പ്രദീപ് എന്നിവർ മക്കളാണ്. ലോക അധ്യാപകദിനമായ ഒക്ടോബർ അഞ്ചിന് മുൻ പുരസ്കാര ജേതാക്കൾ ഗുരുരത്ന പുരസ്കാരം സമ്മാനിക്കും.