ADVERTISEMENT

ADVERTISEMENT

വിവാഹപൂര്‍വ കൗണ്‍സലിംഗ് ക്ലാസ്

ചെങ്ങന്നൂർ: എസ്എന്‍ഡിപി യോഗം ചെങ്ങന്നൂര്‍ യൂണിയന്‍ എറണാകുളം മുക്തിഭവന്‍ കൗണ്‍സലിംഗ് സെന്‍ററിന്‍റെ സഹകരണത്തോടെ നടത്തുന്ന 68-ാമത് വിവാഹപൂര്‍വ കൗണ്‍സലിംഗ് ക്ലാസുകൾ എസ്എന്‍ഡിപി യോഗം ചെങ്ങന്നൂര്‍ യൂണിയന്‍ അഡ്മിനിസ്‌ട്രേറ്റര്‍ സുരേഷ് പരമേശ്വരന്‍ ഉദ്ഘാടനം ചെയ്തു. യൂണിയന്‍ അഡ്മിനിസ്‌ട്രേറ്റീവ് കമ്മിറ്റി അംഗം പി.ഡി. ഷാജി അധ്യക്ഷനായി. യൂണിയന്‍ വനിതാസംഘം ചെയര്‍പേഴ്‌സണ്‍ ഉഷമോഹന്‍, യൂണിയന്‍ വൈദികയോഗം പ്രസിഡന്‍റ് സൈജു പി. സോമന്‍ യൂണിയന്‍ സൈബര്‍ ചെയര്‍മാന്‍ രാജേഷ് പി. എന്നിവര്‍ യൂണിയന്‍ അഡ്മിനിസ്‌ട്രേറ്റീവ് കമ്മിറ്റി അംഗം രാജേഷ് സദാനന്ദന്‍,ശ്രീനാരായണ പെന്‍ഷനേഴ്‌സ് കൗണ്‍സില്‍ കണ്‍വീനര്‍ സി.കെ. രാജേന്ദ്രന്‍ എന്നിവർ പങ്കെടുത്തു.

ഇന്നു നടക്കുന്ന ക്ലാസുകളില്‍ മുക്തിഭവന്‍ കൗണ്‍സിലിംഗ് സെന്‍റര്‍ ഡയറക്ടര്‍ രാജേഷ് പൊന്മല, ഫാമിലി കൗണ്‍സിലര്‍ ഡോ. സുരേഷ് കൊടുവഴങ്ങ ബാലകൃഷ്ണന്‍ എന്നിവര്‍ ക്ലാസുകള്‍ നയിക്കും.

ADVERTISEMENT

ഖാദി നെയ്ത്തുതറ കാടുപിടിച്ചു; പ്രവർത്തനം നിലച്ചിട്ട് 20 വർഷം

പൂച്ചാക്കൽ: പള്ളിപ്പുറത്ത് കളത്തിൽ കലുങ്കിനു സമീപത്തെ ഖാദി ആൻഡ് വില്ലേജ് ഇൻഡസ്ട്രീസ് ബോർഡിന്‍റെ സഹകരണ സംഘത്തിൽ കുറേ വർഷങ്ങളായി വിളയുന്നത് കശുവണ്ടിയും മുന്തിയ ഇനം വിഷമുള്ള പാമ്പും. പ്രവർത്തനം നിലച്ചിട്ട് 20 വർഷം കഴിയുന്നു. സ്ഥാപനത്തിന്‍റെ മേൽക്കൂരയും നിലംപൊത്തി. ഇനി അവശേഷിക്കുന്ന കെട്ടിടത്തിന്‍റെ ചുവരുകൾ മാത്രം. 1982ൽ തൈക്കാട്ടുശേരി ബ്ലോക്ക് പഞ്ചായത്ത് പരിധിയിൽ പള്ളിപ്പുറത്ത് 110 അംഗങ്ങൾ ചേർന്ന് 25 സെന്‍റ് സ്ഥലം വാങ്ങി ഖാദി ആൻഡ് വില്ലേജ് ഇൻഡസ്ട്രിസ് ബോർഡിൽ അഫിലിയേറ്റ് ചെയ്യുകയും വായ്പ എടുത്ത് കെട്ടിടം നിർമിച്ച് തറിയും മുസ്‌ലിൻ ചർക്ക ഉൾപ്പെടെയുള്ള ഉപകരണങ്ങൾ വാങ്ങി പ്രവർത്തനം ആരംഭിച്ചു. മാറ്റം വരുത്തിയില്ല ബോർഡിൽനിന്നു പഞ്ഞി വാങ്ങി നൂലുണ്ടാക്കി വസ്ത്രം നെയ്തെടുക്കുന്ന പ്രവർത്തനമാണ് ഇവിടെ നടന്നിരുന്നത്. രാഘവേന്ദ്ര കമ്മത്ത് മാനേജരായും കമലാക്ഷൻ പിള്ള, സി.കെ. സദാശിവൻ തുടങ്ങിയവരുടെ നേതൃത്വത്തിലാണ് ആദ്യകാല പ്രവർത്തനം മുന്നോട്ടുപോയിരുന്നത്. നൂറുകണക്കിന് തൊഴിലാളികൾക്ക് തൊഴിൽ നൽകി പ്രവർത്തിച്ചുവന്ന സംഘത്തിന്‍റെ പ്രവർത്തനം കൂടുതൽ വിപുലമാക്കാൻ വേണ്ടി പാണാവള്ളി ഓടമ്പള്ളിയിൽ 10 സെന്‍റ് സ്ഥലം വാങ്ങി. എന്നാൽ, കാലാനുസൃതമായ മാറ്റം വരുത്താനോ പുരോഗമന ആശയങ്ങൾ നടപ്പിലാക്കാൻ ഖാദി ബോർഡ് തയാറാകാതെ വന്നതോടെ ഉത്പന്നങ്ങൾക്ക് വിപണി കൈയടക്കാൻ പറ്റാതെവന്നു. അതൊടെ ലക്ഷങ്ങളുടെ നഷ്ടങ്ങൾ ഉണ്ടായി. അതോടെ 20 വർഷങ്ങൾക്ക് മുമ്പ് സംഘത്തിന്‍റെ പ്രവർത്തനം പൂർണമായുംനിന്നു. ഖാദി ബോർഡ് ചേർത്തല താലൂക്കിൽ സമാനമായി പ്രവർത്തിച്ചുവന്ന തുറവൂരിലെയും ചേർത്തല സൗത്തിലെയും സംഘങ്ങൾ അടച്ചുപൂട്ടി. പള്ളിപ്പുറത്തെ സംഘത്തിന് ഖാദി ബോർഡിൽനിന്നെടുത്ത 10 ലക്ഷം രൂപയുടെ വായ്പ കുടിശിക നിലനിൽക്കുന്നുണ്ട്. എന്നാൽ, സംഘത്തിന് എഴുപത് ലക്ഷത്തിൽ മേൽവിലയുള്ള ഭൂമി സ്വന്തമായിട്ടുണ്ട്. സഘം ഖാദി ബോർഡ് ഏറ്റെടുത്ത് പ്രവർത്തനം ആരംഭിക്കണമെന്നാണ് നിലവിലെ അംഗങ്ങളുടെ ആവശ്യം. പരമ്പരാഗതമായ രീതിയിൽ പൂർണമായും മനുഷ്യ അധ്വാനം കൊണ്ടു മാത്രമാണ് ഖാദി സംഘങ്ങളിൽ ഉത്പാദനം നടക്കുന്നത്. എന്നാൽ, ഇത് ഉത്പാദനച്ചെലവ് കൂടുകയും ഉത്പന്നങ്ങൾക്ക് മറ്റു കമ്പനികളുമായി വിലയിൽ മത്സരിക്കാൻ കഴിയാതാവുകയും ചെയ്തു. തൊഴിലാളികൾക്ക് മെച്ചപ്പെട്ട കൂലികൊടുക്കാൻ പറ്റാതെവന്നതോടെ തൊഴിലാളികൾ മറ്റു തൊഴിൽ തേടിപ്പോയതോടെ സംഘം തകർച്ചയ്ക്കു കാരണമായി.

റോഡ് നിർമാണവും കുഴിയും ചലനമറ്റ് ദേശീയപാത

അന്പലപ്പുഴ: റോഡ് നിർമാണവും റോഡിലെ കുഴിയും ദേശീയപാതയിൽ മണിക്കൂറുകളോളം ഗതാഗതക്കുരുക്ക്. നിയന്ത്രിക്കാൻ ആരുമില്ല. ആലപ്പുഴ മെഡിക്കൽ കോളജാശുപത്രി ജംഗ്ഷനു തെക്കു ഭാഗത്തായി പുതിയ കുടിവെള്ള പൈപ്പ് ലൈൻ സ്ഥാപിക്കുന്നതിനായി റോഡ് പൊളിച്ചതോടെയാണ് ദേശീയ പാതയിൽ മണിക്കൂറുകളോളം വാഹനങ്ങൾ കുടുങ്ങിയത്. കഴിഞ്ഞ ദിവസം രാത്രിയിൽ പെയ്ത കനത്ത മഴയിൽ ഈ ഭാഗത്തെ റോഡ് പൂർണമായും കുഴികളായി മാറി. ഇതിനു പിന്നാലെയാണ് റോഡിൽ നിർമാണപ്രവർത്തനവും നടക്കുന്നത്. ആലപ്പുഴ മെഡിക്കൽ കോളജാശുപത്രിയിലേക്കു പോകേണ്ട ആംബുലൻസുകളും രോഗികളെ കൊണ്ടുപോകുന്ന മറ്റു വാഹനങ്ങളും കെഎസ്ആർടിസിയുടെ നിരവധി ദീർഘദൂര വാഹനങ്ങളും ഉൾപ്പെടെ നൂറുകണക്കിനു വാഹനങ്ങളാണ് മണിക്കൂറുകളായി ഈ ഗതാഗതക്കുരുക്കിൽപ്പെട്ട് കിടന്നത്. ദേശീയപാത മണിക്കൂറുകളായി സ്തംഭിച്ചിട്ടും ഗതാഗതം നിയന്ത്രിക്കാൻ ഒരു ഹോം ഗാർഡ് മാത്രമാണ് ഉണ്ടായിരുന്നത്. ഇരട്ടക്കുളങ്ങരയിലേക്കു പോയ നിരവധി സ്വകാര്യബസുകൾ മെഡിക്കൽ കോളജ് ആശുപത്രിക്കുള്ളിൽ സർവീസ് അവസാനിപ്പിച്ച് മടങ്ങുകയായിരുന്നു. തിരക്കേറിയ ഇവിടെ നിയന്ത്രിക്കാൻ ദേശീയപാതാ അധികൃതരോ മറ്റ് ഉദ്യോഗസ്ഥരോ ആരുമുണ്ടായിരുന്നില്ല. അധികൃതരുടെ അലംഭാവമാണ് ഈ ഗതാഗതക്കുരുക്കിന് കാരണമായതെന്ന് നാട്ടുകാർ പറയുന്നു.

ചെങ്ങന്നൂരിൽ സർക്കാർ ആയുർവേദ ഉപകേന്ദ്രവും നവീകരിച്ച വായനശാലയും നാളെ നാടിന് സമർപ്പിക്കും

ചെങ്ങന്നൂർ: ചെറിയനാട് പഞ്ചായത്തിലെ ജനങ്ങൾക്ക് ആശ്വാസമായി ഒരു പുതിയ സർക്കാർ ആയുർവേദ ആശുപത്രി ഉപകേന്ദ്രവും നവീകരിച്ച വായനശാലയും നാളെ നാടിനു സമർപ്പിക്കും. വൈകിട്ട് അഞ്ചിന് തുരുത്തിമേൽ സാംസ്കാരിക നിലയത്തിൽ നടക്കുന്ന ചടങ്ങിൽ ഫിഷറീസ്, സാംസ്കാരിക വകുപ്പ് മന്ത്രി സജി ചെറിയാൻ ഉദ്ഘാടനം ചെയ്യും. പഞ്ചായത്ത് പ്രസിഡന്‍റ് പ്രസന്ന രമേശൻ അധ്യക്ഷയാകും. ഡിഎംഒ ഡോ. പി. ജിജി ജോൺ റിപ്പോർട്ട് അവതരിപ്പിക്കും. കൊടിക്കുന്നിൽ സുരേഷ് എംപി മുഖ്യാതിഥിയായും ഔഷധി ചെയർപേഴ്സൺ ശോഭന ജോർജ്, ചെങ്ങന്നൂർ ബ്ലോക്ക് പഞ്ചായത്ത് പ്രസിഡന്‍റ് കെ.എം. സലിം എന്നിവർ വിശിഷ്ടാതിഥികളായും പങ്കെടുക്കും. ഉദ്ഘാടനത്തോടനുബന്ധിച്ച് കുടുംബശ്രീ അംഗങ്ങളുടെ കലാപരിപാടികളും വിവിധ മേഖലകളിൽ കഴിവ് തെളിയിച്ച പ്രതിഭകളെ ആദരിക്കലും നടക്കുമെന്ന് സംഘാടക സമിതി കൺവീനർ ജി. വിവേക് പറഞ്ഞു. ചെറിയനാട് പഞ്ചായത്തിലെ ഏഴാം വാർഡിൽ ചെറുവല്ലൂരിലാണ് നിലവിൽ ആയുർവേദ ആശുപത്രി പ്രവർത്തിക്കുന്നത്. പഞ്ചായത്തിൻ്റെ വടക്ക് ഭാഗത്തുള്ള ഏഴ് വാർഡുകളിലെ ജനങ്ങളുടെ യാത്രാസൗകര്യം കണക്കിലെടുത്താണ് മൂന്നാം വാർഡിൽ പുതിയ ഉപകേന്ദ്രം ആരംഭിക്കുന്നത്. എല്ലാ ബുധനാഴ്ചകളിലും ഉപകേന്ദ്രത്തിൽ ഡോക്ടറുടെ സേവനം ലഭ്യമാകും. മറ്റ് ദിവസങ്ങളിൽ മരുന്ന് വിതരണവും ഉണ്ടാകും.

വാഹനങ്ങള്‍ക്ക് ഇന്ധനത്തിനു പണമില്ല; എന്‍ഫോഴ്‌സ്‌മെന്‍റ് ഡ്രൈവ് വഴിയിലാകും

ആലപ്പുഴ: കഴിഞ്ഞ മാസങ്ങളില്‍ നടത്തിയ സ്‌പെഷല്‍ ഡ്രൈവുകളായ എക്‌സൈസിന്‍റെ ഓപ്പറേഷന്‍ ക്ലീന്‍ സ്ലേറ്റ്, പോലീസ് നര്‍കോട്ടിക്‌സ് സെല്ലിന്‍റെ ഓപ്പറേഷന്‍ ഡി ഹണ്ട് എന്നിവ വന്‍ വിജയമായിരുന്നു. എന്നാൽ, ഓണക്കാലത്തോടനുബന്ധിച്ച് എന്‍ഫോഴ്‌സ്‌മെന്‍റ് ഡ്രൈവ് നടത്താന്‍ എക്‌സൈസ് വകുപ്പ് തയാറെടുക്കുമ്പോള്‍ വാഹനങ്ങള്‍ക്ക് ആവശ്യത്തിന് ഇന്ധനമില്ല. ഒട്ടേറെ ലഹരിക്കേസുകള്‍ പിടിക്കുകയും പരിശോധനയും നിരീക്ഷണവും ശക്തമാക്കുകയും ചെയ്തതോടെ സംസ്ഥാനത്തേക്കുള്ള ലഹരിക്കടത്തും കുറഞ്ഞിരുന്നു. ഓണക്കാലത്തു പൊതുവേ വ്യാജമദ്യത്തിന്‍റെയും ലഹരിവസ്തുക്കളുടെയും ഉപയോഗം കൂടാറുണ്ട്. ജില്ലയില്‍ മൂന്നു മാസത്തിലധികമായി എക്‌സൈസ് വാഹനങ്ങള്‍ ഇന്ധനം നിറച്ചതിന്‍റെ ബില്‍ മാറി നല്‍കിയിട്ടില്ല. 26 ലക്ഷം രൂപ വരെയാണു കുടിശികയുള്ളത്. എക്‌സൈസുമായി കരാറുള്ള നിശ്ചിത തുക കടന്നതോടെ പലയിടത്തും ഇന്ധന പമ്പുകള്‍ കടം കൊടുക്കുന്നതു നിര്‍ത്തി. പരിശോധനയും വിവരശേഖരണവും നടത്തേണ്ട ഉദ്യോഗസ്ഥര്‍ ഇതോടെ ജോലിസമയം മുഴുവന്‍ ഓഫീസില്‍ ഇരിക്കേണ്ട സ്ഥിതിയാണ്. അത്യാവശ്യ യാത്രകള്‍ക്കും പരിശോധനകള്‍ക്കുമായി ഉദ്യോഗസ്ഥര്‍ സ്വന്തം കീശയില്‍നിന്നു പണം നല്‍കിയാണു വാഹനങ്ങള്‍ക്ക് ഇന്ധനം നിറയ്ക്കുന്നത്. ഇതിനു ബില്‍ നല്‍കി പിന്നീടു പണം വാങ്ങുകയാണു ചെയ്യുന്നത്. മറ്റു സംസ്ഥാനങ്ങളില്‍നിന്നു വരുന്നവരുടെ എണ്ണവും കൂടുന്നതിനാല്‍ പരിശോധന കൂട്ടണം എന്നിരിക്കെയാണു പരിശോധനയ്ക്കു പോകാന്‍ വാഹനങ്ങള്‍ക്ക് ഇന്ധനമില്ലാത്തത്. ഇപ്പോള്‍ പരിശോധന കുറഞ്ഞാല്‍ വീണ്ടും ലഹരിസംഘങ്ങള്‍ സംസ്ഥാനത്തു ശക്തമാകുമെന്ന് ഉദ്യോഗസ്ഥര്‍തന്നെ പറയുന്നു. വാഹനങ്ങളുടെ ഇന്ധന ബില്‍ സംബന്ധിച്ചു പരിശോധിച്ചുവരികയാണെന്നാണു വകുപ്പ് ആസ്ഥാനത്തുനിന്നു ലഭിച്ച മറുപടി. ഈ മാസം ഇന്ധന ബില്‍ മാറി ലഭിച്ചില്ലെങ്കില്‍ സ്ഥിതി ഗുരുതരമാകും. വാഹനങ്ങള്‍ അറ്റകുറ്റപ്പണി നടത്തിയതിന്‍റെ തുകയും ചിലയിടത്തു കുടിശികയാണ്.

അധ്യാപകരുടെ കാൽ കഴുകിപ്പിച്ച സംഭവം: പുരോഗമനകേരളത്തിന് അപമാനം: കൊടിക്കുന്നിൽ സുരേഷ് എംപി

മാവേലിക്കര: ഭാരതീയ വിദ്യാനികേതൻ നടത്തുന്ന വിവിധ വിദ്യാഭ്യാസ സ്ഥാപനങ്ങളിൽ അധ്യാപകരുടെ കാൽ വിദ്യാർഥികളെക്കൊണ്ടു കഴുകിപ്പിച്ച സംഭവത്തിൽ രൂക്ഷമായ വിമർശനം ഉയർത്തി കൊടിക്കുന്നിൽ സുരേഷ് എംപി. കാസർഗോഡ് ബന്തടുക്കയിലെ സരസ്വതി വിദ്യാലയം, മാവേലിക്കരയിലെ വിദ്യാധിരാജ സെൻട്രൽ സ്കൂൾ, ഇടപ്പോൺ ആറ്റുവാ വിവേകാനന്ദ വിദ്യാപീഠം തുടങ്ങിയ സ്കൂളുകളിൽ ഉണ്ടായ സംഭവങ്ങൾ മൗലിക മനുഷ്യാവകാശങ്ങളും ജനാധിപത്യ മൂല്യങ്ങളും ദാരുണമായി ലംഘിക്കുന്നതാണെന്നും അദ്ദേഹം ആരോപിച്ചു. വിദ്യാഭ്യാസം പുരോഗമന ബോധം വളർത്താൻ ഉദ്ദേശിച്ചുള്ളതാണല്ലാതെ അധീനതയും അടിമത്ത മനോഭാവവുമല്ല. കുട്ടികളിൽ ജാതിയനുസൃതമായ വകഭേദങ്ങൾ നടപ്പിലാക്കാൻ സ്കൂൾ അധികാരികൾ ശ്രമിക്കുന്നത് സഹിഷ്ണുതയില്ലാത്തതും ഭരണഘടനാവിരുദ്ധവുമാണ്. ഇത്തരത്തിൽ കുട്ടികളെ മനുഷ്യാവകാശ ലംഘനത്തിലേക്കു നയിക്കുന്ന പ്രവൃത്തികളെ പ്രോത്സാഹിപ്പിക്കുന്ന ബിജെപി അനുഭാവി സംഘടനകൾ പ്രവർത്തിപ്പിക്കുന്ന വിദ്യാഭ്യാസ സ്ഥാപനങ്ങളെതിരെ സംസ്ഥാന പൊതുവിദ്യാഭ്യാസ വകുപ്പ് കർശനമായ നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു. വിദ്യാഭ്യാസ അവകാശ നിയമവും വിദ്യാഭ്യാസ മാനദണ്ഡങ്ങളും ലംഘിക്കുന്ന സ്കൂളുകളെ നിയമത്തിന് മുന്നിൽ കൊണ്ടുവരാൻ സർക്കാർ ആർജ്ജവം കാണിക്കണമെന്നും കുട്ടികളുടെ മാനസിക ക്ഷേമം സംരക്ഷിക്കാൻ വേണ്ട എല്ലാ നടപടികളും സ്വീകരിക്കണമെന്നും കൊടിക്കുന്നിൽ സുരേഷ് എംപി ആവശ്യപ്പെട്ടു. വിദ്യാഭ്യാസം പോലുള്ള വിശുദ്ധ മേഖലയെ ബഹുജന വിരോധിയായ ഹിന്ദുത്വ ആശയങ്ങൾക്കായി ഉപയോഗിക്കാൻ നടത്തുന്ന അർധചേതന പ്രവർത്തനങ്ങളാണ്. ജനാധിപത്യത്തെയും സാമൂഹിക നീതിയെയും അവഹേളിക്കുന്ന ഇത്തരം അപകടകരമായ ശ്രമങ്ങൾ സമൂഹം ശക്തമായി എതിർക്കേണ്ടതാണ്, എംപി പറഞ്ഞു.

വിദ്യാര്‍ഥികളെക്കൊണ്ട് ഗുരുപൂജ: പ്രതിഷേധം ഇരമ്പുന്നു

മാവേലിക്കര: ഭാരതീയ വിദ്യാനികേതന്‍റെ കീഴിലുള്ള മാവേലിക്കര വിദ്യാധിരാജ സെന്‍ട്രല്‍ ആൻഡ് സൈനിക് സ്‌കൂളിനെതിരേയാണ് പൊതു സമൂഹത്തിന്‍റെ പ്രതിഷേധം ഇരമ്പുന്നത്. സോഷ്യല്‍ മീഡിയയിലും സ്ഥിതി വ്യത്യസ്തമല്ല. വെള്ളിയാഴ്ച രാവിലെ ഒന്പതിനായിരുന്നു സ്‌കൂള്‍ വളപ്പില്‍ ഗുരുപൂജ എന്ന പരിപാടി അരങ്ങേറിയത്. പൊതുസമൂഹത്തില്‍ വിദ്യാഭ്യാസ മേഖലയിലും മറ്റ് വ്യത്യസ്ത മേഖലകളിലും ഉന്നതരായ വ്യക്തികളെ സ്‌കൂളിലേക്കു വിളിച്ചുവരുത്തി കുട്ടികളെക്കൊണ്ട് അവരുടെ പാദങ്ങള്‍ കഴുകിപ്പിക്കുകയും പുഷ്പവും മറ്റും സമര്‍പ്പിച്ച് ഒരു മണിക്കൂർ പൂജ നടത്തുകയും കാല്‍തൊട്ടു തൊഴുകയുമായിരുന്നു ചടങ്ങുകള്‍. 101 ഓളം പേരുടെ കാലുകളാണ് കുട്ടികള്‍ ഇത്തരത്തില്‍ കഴുകിയത്. വിഷയം പുറത്തായതിനെത്തുടര്‍ന്ന് വിവിധ തരത്തിലുള്ള എതിര്‍സ്വരങ്ങള്‍ ഉയര്‍ന്നുവന്നിരുന്നു. കൂടാതെ സോഷ്യല്‍ മീഡിയയിലും വിഷയം വലിയ രീതിയില്‍ ചര്‍ച്ചചെയ്തു കൊണ്ടിരിക്കുന്നു. അനുകൂലിച്ചും എതിര്‍ത്തും രണ്ടു വിഭാഗമായാണ് ചര്‍ച്ചകള്‍ നടക്കുന്നത്. തിങ്കളാഴ്ച സിപിഐ മണ്ഡലം കമ്മിറ്റിയുടെ നേതൃത്വത്തില്‍ സ്‌കൂളിലേക്ക് പ്രതിഷേധ മാര്‍ച്ച് സംഘടിപ്പിക്കുമെന്ന് ഭാരവാഹികല്‍ അറിയിച്ചിട്ടുണ്ട്. കൂടാതെ വിവിധ സാംസ്‌കാരിക രാഷ്ട്രീയ സംഘടനകളും വിഷയത്തില്‍ പ്രതിഷേധത്തിനൊരുങ്ങുകയാണെന്നാണ് ലഭിക്കുന്ന വിവരം.

കോടയും ചാരായവും പിടികൂടി

ഹരിപ്പാട്: പല്ലന ലക്ഷ്മി തോപ്പിൽ കുട്ടപ്പൻ എന്ന വ്യക്തിയുടെ പുരയിടത്തിൽനിന്ന് 350 ലിറ്റർ ചാരായ നിർമാണത്തിനുള്ള കോടയും 10 ലിറ്റർ ചാരായവും കാർത്തികപ്പള്ളി എക്സൈസ് റേഞ്ച് ഓഫീസർ വി.അരുൺകുമാറിന്‍റെ നേതൃത്വത്തിലുള്ള സംഘം പിടികൂടി. അസിസ്റ്റന്‍റ് എക്സൈസ് ഇൻസ്പെക്ടർ എസ്. അക്ബർ, പ്രിവന്‍റീവ് ഓഫീസർ അനീഷ് ആന്‍റണി, സിവിൽ എക്സൈസ് ഓഫീസർമാർ ഹരീഷ്, മഹേഷ് എന്നിവർ സംഘത്തിലുണ്ടായിരുന്നു. പ്രതികൾക്കായി അന്വേഷണം ഊർജിതമാക്കി.

ആശുപത്രി വാടകക്കെട്ടിടത്തിൽ; നഗരസഭയ്ക്ക് ലക്ഷങ്ങളുടെ നഷ്ടം

കായംകുളം: നഗരസഭാ പരിധിയിലെ രണ്ട് ആശുപത്രികള്‍ പ്രവർത്തിക്കുന്നത് വാടകക്കെട്ടിടത്തിൽ. സ്വന്തം കെട്ടിടത്തിന്‍റെ പോരായ്മയെത്തുടര്‍ന്നാണ് വാടകക്കെട്ടിടത്തിലേക്ക് പ്രവര്‍ത്തനം മാറിയത്. ഇതോടെ വാടകയിനത്തില്‍ നഗരസഭ നേരിടുന്നത് ലക്ഷങ്ങളുടെ നഷ്ടമാണ്. 30 സെന്‍റ് സ്ഥലം സ്വന്തമായുള്ള ഹോമിയോ ആശുപത്രിയില്‍ യഥാസമയം പുനരുദ്ധാരണം നടത്താത്തതിനാല്‍ പരിസരത്ത് വെള്ളക്കെട്ടായതോടെയാണ് വാടകക്കെട്ടിടത്തിലേക്കു മാറ്റേണ്ടിവന്നത്. കൊറ്റുകുളങ്ങരയില്‍ നൂറുകണക്കിന് രോഗികള്‍ക്ക് ആശ്രയമായിരുന്ന ആയുര്‍വേദാശുപത്രി പ്രവര്‍ത്തനം മാറ്റിയിട്ട് രണ്ടു വര്‍ഷത്തിലേറെയായി. ദേശീയപാത നിര്‍മാണത്തിന് സ്ഥലം ഏറ്റെടുത്തതോടെ ആശുപത്രി കെട്ടിടത്തിന്‍റെ ഒരു ഭാഗം പൊളിക്കേണ്ടിവന്നിരുന്നു. അവശേഷിക്കുന്ന ഭാഗത്ത് നിര്‍മിച്ച കെട്ടിടം നിയമപ്രകാരമല്ലെന്ന് പരാതി ഉയര്‍ന്നതോടെ ഇതിന്‍റെ ഭാവിയും തുലാസിലായി. ദുരൂഹത ഉയര്‍ത്തുന്നു സര്‍വീസ് റോഡില്‍നിന്ന് നിശ്ചിത അകലം പാലിക്കാതെയാണ് അടിത്തറകെട്ടി ഉയര്‍ത്തിയിരിക്കുന്നത്. രണ്ട് ആശുപത്രികള്‍ക്കുമായി വര്‍ഷംതോറും പത്തു ലക്ഷത്തിലേറെ രൂപ നഗരസഭ ചെലവഴിക്കുന്നത് ദുരൂഹത ഉയര്‍ത്തുന്നുണ്ടെന്ന് നഗരസഭാ കൗണ്‍സിലര്‍ എ.പി. ഷാജഹാന്‍ പറഞ്ഞു. ഹോമിയോ ആശുപത്രിയിലെ ഒപി യൂണിറ്റ് ഒരു വര്‍ഷം മുമ്പ് വാടകക്കെട്ടിടത്തിലേക്കു മാറ്റിയിരുന്നു. ഇപ്പോള്‍ ഐപി വിഭാഗവും ഇവിടെനിന്ന് മാറ്റി. നഗരസഭ 43 ാം വാര്‍ഡിലാണ് ഒപി, ഐപി വിഭാഗങ്ങള്‍ വാടകക്കെട്ടിടത്തില്‍ ഒരുമിച്ച് പ്രവര്‍ത്തിക്കുന്നത്. നാട്ടുകാര്‍ പണം സമാഹരിച്ചാണ് വര്‍ഷങ്ങള്‍ക്ക് മുമ്പ് ആശുപത്രിക്ക് സ്ഥലം വാങ്ങിയതെന്ന് തച്ചടി പ്രഭാകരന്‍ സ്മാരക ഹോമിയോ ആശുപത്രി സമിതി കണ്‍വീനര്‍ ആര്‍.ഭദ്രന്‍ പറഞ്ഞു. വരുത്തിയ വീഴ്ച ഒപി വിഭാഗം കെട്ടിട നിര്‍മാണത്തിന്, എംഎല്‍എ യായിരുന്ന എം.എം. ഹസന്‍ പ്രാദേശിക വികസന ഫണ്ടില്‍ നിന്ന് 25 ലക്ഷം രൂപയും ഐപി കെട്ടിട നിര്‍മാണത്തിന്, എംപിയായിരുന്ന വയലാര്‍ രവി 20 ലക്ഷം രൂപയും അനുവദിച്ചിരുന്നു. നഗരസഭയില്‍ മെയിന്‍റനന്‍സ് ഗ്രാന്‍റ് പ്രകാരമുള്ള തുക ചെലവഴിക്കുന്നില്‍ വരുത്തിയ വീഴ്ചയാണ് ആശുപത്രി പരിസരം വെള്ളക്കെട്ടിലാകാന്‍ കാരണമെന്ന് ആക്ഷേപമുണ്ട്. ആയുര്‍വേദാശുപത്രി കൊറ്റുകുളങ്ങരയിലെ ഇപ്പോഴത്തെ കെട്ടിടത്തില്‍ വീണ്ടും പ്രവര്‍ത്തിപ്പിക്കാനാകുമോയെന്ന് ആശങ്ക ഉയരുന്നുണ്ട്. പുനരുദ്ധരിക്കാന്‍ ശ്രമിക്കുന്ന കെട്ടിടത്തിന്‍റെ മുകളില്‍കൂടി 11 കെവി വദ്യുതി ലൈന്‍ കടന്നു പോകുന്നുണ്ട്. അതിനാല്‍ മകളിലത്തെ നിലയുടെ മേല്‍ക്കൂര കോണ്‍ക്രീറ്റ് ചെയ്യാന്‍ കഴിയാത്ത സാഹചര്യമുണ്ട്. ഈ ആശങ്കകള്‍ക്കിടയിലും നഗരസഭ 30 ലക്ഷത്തിലേറെ രൂപയാണ് ആശുപത്രി കെട്ടിടം പുനരുദ്ധരിക്കാനായി ചെലവഴിക്കുന്നത്.

എൻ.വി. പ്രഭൂ സ്മാരക അവാർഡ് വിതരണം

ആലപ്പുഴ: എൻ.വി. പ്രഭു സ്മാരക പത്രപ്രവർത്തക അവാർഡ് കെ.സി. വേണുഗോപാൽ എം.പി. ഏഴാച്ചേരി രാമചന്ദ്രന് നൽകി നിർവഹിച്ചു. മെഡിക്കൽ അവാർഡ് തൃശൂർ സ്വദേശി ഡോ. അരവിന്ദന് ടിഡി മെഡിക്കൽ കോളജ് പ്രിൻസിപ്പൽ ഡോ.ബി. പത്മകുമാർ നൽകി. ആലപ്പുഴ വൈഎംസിഎ ഹാളിൽ അവാർഡ് സമർപ്പണ സമ്മേളനവും കെ.സി. വേണുഗോപാൽ നിർവഹിച്ചു. പത്ര പ്രവർത്തകൻ പി.എ. അലക്സാണ്ടർ രചിച്ച എൻ.വി. പ്രഭുവിന്‍റെ ജീവചരിത്ര പുസ്തകമായ "പ്രഭുത്വം ഒഴിയാത്തസിംഹാസനം" സിനിമാ സംവിധായകൻ ആലപ്പി അഷറഫ് പ്രകാശനം ചെയ്തു. എസ്ജെയുകെ സംസ്ഥാന വൈസ് പ്രസിഡന്‍റ് ജെ.ആർ. പറത്തറ ഏറ്റുവാങ്ങി. പി.ജയനാഥ് അധ്യക്ഷത വഹിച്ചു. എച്ച്. സലാം എംഎൽഎ മുഖ്യ പ്രഭാഷണം നടത്തി. നഗരസഭാധ്യക്ഷ കെ.കെ. ജയമ്മ, എ.എ. ഷുക്കൂർ എക്സ് എംഎൽഎ, പ്രഫ. നെടുമുടി ഹരികുമാർ , നഗരസഭാ സ്റ്റാൻ‌ഡിംഗ് കമ്മിറ്റി ചെയർപേഴ്സൺ എം.ജി. സതീദേവി, എം.ആർ. പ്രേം, പ്രസ് ക്ലബ്ബ് പ്രസിഡന്‍റ് റോയി കൊട്ടാരച്ചിറ, സെക്രട്ടറി പി.ആർ. രജീഷ് കുമാർ, കളർ കോട് ഹരികുമാർ , വി. രാമചന്ദ്രപ്രഭു, വി. ഗിരീശ് പ്രഭു, ആർ. അജയകുമാർ, കെ. ജയപ്രകാശ്, എ. ഷൗക്കത്ത്, രാജൻ പ്രഭു എന്നിവർ പ്രസംഗിച്ചു. സീനിയർ ജേർണലിസ്റ്റ്സ്, യൂണിയൻ കേരള ആലപ്പുഴ ജില്ലാ കമ്മിറ്റിയും,എൻ.വി. പ്രഭു മെമ്മോറിയൽ ട്രസ്റ്റും ചേർന്നാണ് അവാർഡ് ഏർപ്പെടുത്തിയിട്ടുള്ളത്. പത്രപ്രവർത്തക അവാർഡ് 25,000 രൂപയും മൊമെന്‍റോയും പ്രശസ്തിപത്രവുമാണ്. 5,000 രൂപയും പ്രശസ്തി പത്രവുമാണ് മെഡിക്കൽ അവാർഡ്.

ഭരണകൂടങ്ങള്‍ ലഹരിയെ കണ്ടില്ലെന്നു നടിക്കുന്നു: ജേക്കബ് ജോണ്‍ കല്ലട കോര്‍ എപ്പിസ്‌കോപ്പ

മാവേലിക്കര: ഭരണകൂടങ്ങള്‍ ലഹരിയെ കണ്ടില്ലെന്നു നടിക്കുന്നുവെന്നും കോടിക്കണക്കിനു രൂപയുടെ ലഹരി ഉത്പന്നങ്ങളുടെ വരവ് അധികാരികള്‍ അറിയുന്നില്ലയെന്ന് പറയുന്നത് അവിശ്വസിനീയമാണെന്നും ജേക്കബ് ജോണ്‍ കല്ലട കോര്‍ എപ്പിസ്‌കോപ്പ. കേരള കോണ്‍ഗ്രസ് നിയോജക മണ്ഡലം കമ്മിറ്റി തുടക്കം കുറിച്ചിരിക്കുന്ന ലഹരിവിരുദ്ധ കാമ്പയിന്‍റെ ഭാഗമായി ലഹരി വിരുദ്ധ സെമിനാര്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.കേരള കോണ്‍ഗ്രസ് സംസ്ഥാന സെക്രട്ടറി ജെയിസ് ജോണ്‍ വെട്ടിയാര്‍ സെമനാറിന് മോഡറേറ്ററായി. തുടര്‍ന്നു നടന്ന കേരള കോണ്‍ഗ്രസ് നിയോജക മണ്ഡലം പ്രവര്‍ത്തക സമ്മേളനം കേരള കോണ്‍ഗ്രസ് ഉന്നതാധികാര സമിതി അംഗം തോമസ് സി. കുറ്റിശേരില്‍ ഉദ്ഘാടനം ചെയ്തു. പ്രസിഡന്‍റ് റോയി വര്‍ഗീസ് അധ്യക്ഷത വഹിച്ചു. എം.കെ. വര്‍ഗീസ് സാധുജന ചികില്‍സാ സഹായ വിതരണവും നടത്തി. സംസ്ഥാന സ്റ്റിയറിംഗ് കമ്മിറ്റി അംഗം അനീഷ് താമരക്കുളം നിയോജക മണ്ഡലം സെക്രട്ടറി ഉമ്മന്‍ ചെറിയാന്‍ ശങ്കുപറമ്പില്‍, തോമസ് കടവില്‍ അലക്‌സാണ്ടര്‍, കുറത്തികാട് രഘുനാഥ് , സിജു നെടിയത്ത്, അജി പേരാത്തേരില്‍, അനസ് കൊച്ചാലുംവിളയില്‍ തുടങ്ങിയവര്‍ പ്രസംഗിച്ചു.

‘ദി കംപ്ലീറ്റ് ആർട്ട് കൊച്ചി’ ചിത്രപ്രദർശനത്തിന് തുടക്കം

അമ്പലപ്പുഴ: ദി കംപ്ലീറ്റ് ആർട്ട് കൊച്ചിയുടെ ചിത്രപ്രദർശനം എക്സ്പ്ലോർ യുവർ സെൽഫ് ആലപ്പുഴ നഗരചത്വരത്തിലെ ചിത്രകലാ അക്കാദമി ആർട്ട് ഗാലറിയിൽ തുടക്കമായി. എച്ച്. സലാം എംഎൽഎ പ്രദർശനം ഉദ്ഘാടനം ചെയ്തു. ആലപ്പുഴ മുനിസപ്പൽ ചെയർപേഴ്സൻ കെ.കെ. ജയമ്മ അധ്യക്ഷയായി. ജില്ലാ പഞ്ചായത്തംഗം ആർ. റിയാസ്, മാധ്യമപ്രവർത്തകൻ ബി. സുശിൽ കുമാർ, ആലപ്പുഴ നഗരസഭാ കൗൺസിലർമാരായ എ.എസ്. കവിത, മേരി ലീന, മാരാരി റോട്ടറി ക്ലബ് സെക്രട്ടറി ശരണ്യ, ചിത്രകാരൻമാരായ അമീൻ ഖലീൽ, ബിനുരാജ് കലാപീഠം, ഉദയൻ വാടക്കൽ, എം. ഹുസൈൻ, ശ്രീകാന്ത് നെട്ടൂർ, അവിനാഷ് മാത്യു എന്നിവർ പ്രസംഗിച്ചു. ശ്രീകാന്ത് നെട്ടൂർ ക്യൂറേറ്റ് ചെയ്യുന്ന പ്രദർശനത്തിൽ ചിത്രകാരന്മാരായ അർച്ചന കൃഷ്ണൻ, അവിനാഷ് മാത്യു, ഷെർളി ജോസഫ് ചാലിശേരി, ഫ്രാൻസിസ് കോടൻ കണ്ടത്ത്, സുരേഷ് കൂത്തുപറമ്പ്, ജമീല എം ദേവൻ, ഷീല സൈമൺ, ഡോ. ശ്യാം മോഹൻ, ഉദയൻ വാടക്കൽ, എം. ഹുസൈൻ, ബിനുരാജ് കലാപീഠം, ബിജി ഭാസ്കർ, രഘു മേനോൻ, പ്രൊഫ. ലൈല ആലപ്പാട്ട്, ഡയാന ജേക്കബ്, ഷാം ജോസഫ്, ഷിൻ്റാര, എം. സിംല, ലാലി റോഷൻ, സുജിത് എബ്രഹാം, ജോർജ് കാലയിൽ, യു. പ്രജീഷ്, ജിമിൻ രാജ്, രവീന്ദ്രനാഥ് ബാലകൃഷ്ണൻ, ദിലീപ് സുബ്രമണ്യൻ, റോഷൻ കൂട്ടുങ്കൽ, ജിജി പോൾ, ഡോ. മഞ്ജു വിശ്വഭാരതി, ദിലീപ് ദിവാകരൻ, രമ്യ രാജഗോപാൽ, ജെറോസ് ജെയിംസ്, ജൂലിയ രാജേഷ്, ശ്രീദേവി പ്രഭാകരൻ, പി. ഷീല, വി. കെ. ബിനോജ് എന്നിവർ പങ്കെടുത്തു.

വിൽപ്പനയ്ക്ക് കൊണ്ടുവന്ന എംഡിഎംഎയുമായി യുവാവ് പിടിയിൽ

കായംകുളം : വിൽപ്പനയ്ക്കു കൊണ്ടുവന്ന എംഡിഎംഎയുമായി യുവാവ് പോലീസ് പിടിയിലായി. കായംകുളം പത്തിയൂർ എരുവ കുഴിനാട്ട് വീട്ടിൽ ഉണ്ണി (26) യെയാണ് ജില്ലാ ലഹരിവിരുദ്ധ സ്ക്വാഡും കായംകുളം പോലീസും ചേർന്നു പിടികൂടിയത്. ഇയാളിൽനിന്നു 16 ഗ്രാം എംഡിഎംഎ കണ്ടെടുത്തു. അന്യസംസ്ഥാനത്തുനിന്ന് കൊണ്ടുവന്ന എംഡിഎംഎ ഷഹീദാർ പള്ളിക്കു സമീപം വിൽപ്പന നടത്തുന്നു എന്ന രഹസ്യവിവരം ലഭിച്ചതിനെത്തുടർന്ന് നടത്തിയ പരിശോധനയിലാണ് ഇയാൾ പിടിയിലായത്. ഇതിനു മുമ്പ് ഹാഷിഷ് ഓയിലുമായി ഇയാളെ പിടികൂടിയതാണ്. ഡിജിപിയുടെ ഓപ്പറേഷൻ ഡി ഹണ്ടിന്‍റെ ഭാഗമായി നർക്കോട്ടിക് സെൽ ഡിവൈഎസ്പി ബി. പങ്കജാക്ഷന്‍റെ നേതൃത്യത്തിലുള്ള ജില്ലാ ലഹരിവിരുദ്ധ സ്ക്വാഡും കായംകുളം ഡിവൈഎസ്പി ടി.ബിനുകുമാറിന്‍റെ നേതൃത്വത്തിൽ കായംകുളം സിഐ അരുൺഷാ, എസ്ഐമാരായ രതിഷ് ബാബു, സുധീർ, കൃഷ്ണലാൽ, എഎസ്ഐ റെജി, സീനിയർ സിവിൽ പോലീസ് ഓഫീസർ ജിജാ , സിപിഒമാരായ പത്മദേവ്, ശിവകുമാർ, അരുൺ എന്നിവരാണ് പ്രതിയെ പിടികൂടിയത്.

വചനങ്ങളുടെ പരിഭാഷ സാമൂഹ്യ പരിഷ്കരണത്തിന് അനിവാര്യം: ഡോ. സഖറിയാസ് മാര്‍ അപ്രേം

മാവേലിക്കര: വചനങ്ങളുടെ പരിഭാഷ സാമൂഹ്യ പരിഷ്കരണത്തിന് അനിവാര്യമാണെന്ന് സെനറ്റ് ഓഫ് സെറാംപുര്‍ പ്രസിഡന്‍റ് ഡോ. സഖറിയാസ് മാര്‍ അപ്രേം മെത്രാത്തോലീത്ത. ബൈബിള്‍ സൊസൈറ്റി ഓഫ് ഇന്ത്യ കേരള ഓക്‌സിലിയറി 69-ാമത് വാര്‍ഷിക സമ്മേളനവും സ്‌തോത്രശുശ്രൂഷയും സപ്തതി ആഘോഷങ്ങളുടെ ഉദ്ഘാടനവും നിര്‍വഹിക്കുകയായിരുന്നു അദ്ദേഹം. ഓക്‌സിലിയറി പ്രസിഡന്‍റ് ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്ത അധ്യക്ഷത വഹിച്ചു. ഓക്‌സിലിയറി വൈസ് പ്രസിഡന്‍റ് റവ. വി.എസ്. ഫ്രാന്‍സിസ്, റവ.ഡോ. തോമസ് ഏബ്രഹാം, ഡോ. സാമുവല്‍ മെയോഫിലോസ് മെത്രാപ്പോലീത്ത, മാത്യൂസ് മോര്‍ തിമോഥിയോസ് മെത്രാപ്പോലീത്ത, ഏബ്രഹാം മാര്‍ എപ്പിഫാനിയോസ് മെത്രാപ്പോലീത്ത, സഖറിയ മാര്‍ സേവേറിയോസ് മെത്രാപ്പോലീത്ത, റവ. ടി.ജെ. സാമുവല്‍, വൈ. റെജി, ഡോ. ജോണ്‍ കെ. മാത്യു, ലഫ്റ്റനന്‍റ് കേണല്‍ എന്‍.ഡി. ജോഷ്വ, റവ. ജേക്കബ് ആന്‍റണി കൂടത്തിങ്കല്‍, ഡോ. സാബു ടി. തോമസ്, റവ.ഡോ. സി.ഐ. ഡേവിഡ് ജോയ്, ജോണ്‍ തോമസ്, റവ.ഡോ. ജോസഫ് തോമസ് എന്നിവര്‍ പ്രസംഗിച്ചു.

അമ്പലപ്പുഴ-പൊടിയാടി റോഡിലെ വെള്ളക്കെട്ട് : നടപടി സ്വീകരിക്കണം

എടത്വ: അമ്പലപ്പുഴ-പൊടിയാടി റോഡിലെയും സമീപ പ്രദേശങ്ങളിലെ റോഡുകളിലെയും വെള്ളക്കെട്ട് ഒഴിവാക്കാന്‍ നടപടി സ്വീകരിക്കണമെന്നാവശ്യപ്പെട്ട് എടത്വ വികസനസമിതിയുടെ നേതൃത്വത്തില്‍ എടത്വ ടൗണ്‍ ഗാന്ധി സ്മൃതിക്കു സമീപം പ്രതിഷേധ നില്‍പ് സമരം നടത്തി. പ്രസിഡന്‍റ് ഐസക് എഡ്വേര്‍ഡ് ഉദ്ഘാടനം ചെയ്തു. വൈസ് പ്രസിഡന്‍റ് അഡ്വ. ഐസക് രാജു അധ്യക്ഷത വഹിച്ചു. കണ്‍വീനര്‍ സാബു മാത്യൂ കളത്തൂര്‍ പ്രമേയം അവതരിപ്പിച്ചു. ഗ്രാമപഞ്ചായത്തംഗം പി.സി. ജോസഫ്, രക്ഷാധികാരിമാരായ ജോജി കരിക്കംപള്ളില്‍, ആന്‍റണി ഫ്രാന്‍സിസ് കട്ടപ്പുറം, ഷാജി മാധവന്‍, ജനറല്‍ സെക്രട്ടറി ഡോ. ജോണ്‍സണ്‍ വി. ഇടിക്കുള, ട്രഷറര്‍, കുഞ്ഞുമോന്‍ പട്ടത്താനം, വൈസ് പ്രസിഡന്‍റുമാരായ ജോര്‍ജ് തോമസ് കളപ്പുര, പി.ഡി. രമേശ്കുമാര്‍, ജോയിന്‍റ് സെക്രട്ടറിമാരായ ടോമിച്ചന്‍ കളങ്ങര, അജി കോശി, ബാബു കൊഴുപ്പക്കളം, എം.വി. ആന്‍റണി, രാജു കറുകയില്‍, പീറ്റര്‍ വര്‍ഗീസ്, ബാബു കണ്ണന്തറ എന്നിവര്‍ നേതൃത്വം നല്‍കി. റോഡിന്‍റെ നിർമാണ കാലയളവില്‍ വെള്ളക്കെട്ടുണ്ടായപ്പോള്‍ അതു പരിഹരിക്കാനുള്ള സംവിധാനം ഉറപ്പ് വരുത്താന്‍ അധികൃതര്‍ നടപടി സ്വീകരിക്കണമെന്ന് ആവശ്യപ്പെട്ട് എടത്വ വികസന സമിതിയുടെ നേതൃത്വത്തില്‍ കേരള റോഡ് ഫണ്ട് ബോര്‍ഡ് എക്‌സിക്യൂട്ടീവ് എന്‍ജിനിയരുടെ ഓഫിസില്‍ നിവേദനം നല്കിയിരുതാണ്. ജല നിരപ്പ് ചെറിയ രീതിയില്‍ ഉയര്‍ന്നാല്‍ പോലും ഇവിടെ വെള്ളക്കെട്ട് ഉണ്ടാകുകയും ഗതാഗത തടസ്സം നേരിടുന്നത് പതിവു സംഭവമാണ്. ആലപ്പുഴ, പത്തനംതിട്ട ജില്ലകളെ തമ്മില്‍ ബന്ധിപ്പിക്കുന്ന ഈ സംസ്ഥാന പാതയില്‍ ഉണ്ടാവുന്ന വെള്ളക്കെട്ട് മൂലം കെഎസ്ആര്‍ടിസി സര്‍വീസ് മുടങ്ങുന്നത് നിരവധി യാത്രക്കാര്‍ക്ക് ബുദ്ധിമുട്ട് വരുത്തിയിരിക്കുകയാണ്. അത്യാഹിത സമയങ്ങളില്‍ തിരുവല്ലയിലുള്ള പ്രധാന ആശുപ്രതികളില്‍ പോലും എത്താന്‍ പറ്റാത്ത അവസ്ഥയാണ്.

ഭാരവാഹികളുടെ സ്ഥാനാരോഹണം

മാന്നാർ: ഇന്നർ വിൽ ക്ലബ് ഓഫ് ഗോൾഡൻ മാന്നാറിന്‍റെ 2025- 26 വർഷത്തെ പുതിയ ഭാരവാഹികളുടെ സ്ഥാനാരോഹണം ഇന്നു നടക്കും. മാന്നാർ റോട്ടറി ഭവനിൽ വൈകുന്നേരം അഞ്ചിന് ഇന്നർ വീൽ ക്ലബ് ഡിസ്ട്രിക് ചെയർമാൻ നീന ജയകുമാർ ഉദ്ഘാടനം നിർവഹിക്കും. പുതിയ ഭാരവാഹികളായി രശ്മി ശ്രീകുമാർ-പ്രസിഡന്‍റ്, വി. വിജയലക്ഷ്മി-വൈസ് പ്രസിഡന്‍റ്, സ്മിതാ രാജ്-സെക്രട്ടറി, കെ.ആർ. ബിന്ദു മേനോൻ -ട്രഷറർ, അപർണദേവ് -ഐഎസ്ഒ, എ.എം. ശ്രീകല-എഡിറ്റർ എന്നിവർ സ്ഥാനമേൽക്കും. ചടങ്ങിൽ രോഗികൾക്കുള്ള ധനസഹായ വിതരണം, വിദ്യാഭ്യാസ ധനസഹായം, അങ്കണവാടിക്കുള്ള കളിക്കോപ്പുകളുടെ വിതരണം എന്നിവയും നടക്കും. തുടർന്ന് അംഗങ്ങളുടെ കലാപരിപാടികളും അത്താഴവിരുന്നും നടക്കും. വിവിധ ബോധവത്കരണ പരിപാടികൾ, സൗജന്യ മെഡിക്കൽ ക്യാന്പുകൾ, അങ്കണവാടികൾക്കുള്ള സഹായം, കൃത്രിമ അവയവദാനം, പ്രതിമാസ പെൻഷൻ പദ്ധതി, ക്രിസ്മസ്, ഇഫ്താർ, വിഷു ആഘോഷങ്ങൾ, കുടുംബ തലത്തിൽ ലഹരിവിമുക്ത പരിപാടി, അവയവദാന ക്യാന്പ്, വിദ്യാർഥികൾക്കുള്ള ദന്ത- കാഴ്ച പരിശോധനാ ക്യാന്പുകൾ, വീൽ ചെയർ വിതരണം എന്നിവയും സേവന പ്രവർത്തനങ്ങളുടെ ഭാഗമായി ഈ വർഷം നടത്തും.

ചങ്ങങ്കരി സെന്‍റ് ജോസഫ് പള്ളി കുരിശടി വെഞ്ചരിപ്പു കര്‍മം നടത്തി

എടത്വ: എടത്വ ഇടവകയുടെ കുരിശുപള്ളിയായ ചങ്ങങ്കരി സെന്‍റ് ജോസഫ് പള്ളിയില്‍ വിശുദ്ധ യൗസേപ്പിതാവിന്‍റെ നാമത്തിലുള്ള കുരിശടിയുടെ വെഞ്ചരിപ്പു കര്‍മം നടന്നു. ഇന്നലെ വൈകുന്നേരം നാലിന് നടന്ന വിശുദ്ധ കുര്‍ബാനയ്ക്കു ശേഷം ചങ്ങനാശേരി അതിരൂപത ആര്‍ച്ച്ബിഷപ് മാര്‍ തോമസ് തറയില്‍ വെഞ്ചരിപ്പുകര്‍മം നിര്‍വഹിച്ചു. വികാരി ഫാ. ഫിലിപ്പ് വൈക്കത്തുക്കാരന്‍, കുരിശുപള്ളി വികാരി ഫാ. തോമസ് കാരയ്ക്കാട്, ഫാ. ജോണ്‍ വി. തടത്തില്‍, ഫാ. ജോസഫ് ചൂളപറമ്പില്‍, ഫാ. ഫ്രാന്‍സിസ് വടക്കേയറ്റം, ഫാ. പ്രതീഷ് നാല്‍പതില്‍ച്ചിറ, ഫാ. വര്‍ഗീസ് മതിലകത്തുകുഴി, ഫാ. ജിയോ അവന്നൂര്‍, ഫാ. വര്‍ഗീസ് പുത്തന്‍പുര, ഫാ. ജോര്‍ജ് കപ്പാംമൂട്ടില്‍, ഫാ. ജോര്‍ജ് വെള്ളാനിക്കല്‍, ഫാ. ആന്‍റണി തേവാരി, ഫാ. ജോസ് പുത്തന്‍ചിറ, ഫാ. സനൂപ് മുതുമാക്കുഴിയില്‍ എന്നിവര്‍ സഹകാര്‍മികരായിരുന്നു. കൈക്കാരന്‍മാരായ റോയി ഫിലിപ്പ് കൊച്ചുപുരയ്ക്കല്‍, ജോസുകുട്ടി പടിഞ്ഞാറേവീട്ടില്‍, നിര്‍മാണ കമ്മിറ്റി അംഗങ്ങളായ ഫിലിപ്പ് ചേക്കയില്‍, സാബു ആശാംപറമ്പില്‍, മാര്‍ട്ടിന്‍ കൊച്ചുപറമ്പില്‍, സാബു കണ്ണംകുളം, സാജു വേലിക്കളം എന്നിവര്‍ നേതൃത്വം നല്‍കി.

വാലടി ജലസംഭരണി നിർമാണത്തിന് അനുമതി

മങ്കൊമ്പ്: നീലംപേരൂർ ഗ്രാമപഞ്ചായത്തിൽ വാലടി ഓവർഹെഡ് ടാങ്ക് നിർമാണവും വിതരണ പൈപ്പുലൈൻ സ്ഥാപിക്കുന്ന പ്രവൃത്തികൾക്കുള്ള ദർഘാസിന് മന്ത്രിസഭാ യോഗം അംഗീകാരം നൽകി. മുട്ടാർ, വെളിയനാട്, നീലംപേരൂർ എന്നീ ഗ്രാമപഞ്ചായത്തു കളിലെ ഓവർഹെഡ് ടാങ്കുകളുടെ നിർമാണവും, വിതരണശൃംഖല സ്ഥാപിക്കലും നിലവിലുള്ള ഉന്നതതല ജലസംഭരണികളുടെ പുനരുദ്ധാരണവും എന്ന പ്രവൃത്തികളുടെ ദർഘാസിന് 59,92, 84,964 രൂപായാണ് മന്ത്രിസഭ അംഗീകരിച്ചത്.

നേഹയുടെ മരണം: അന്വേഷണം ശക്തമാക്കി

മാന്നാർ: ചെന്നിത്തല നവോദയ സ്കൂൾ പത്താം ക്ലാസ് വിദ്യാർഥിനി നേഹയുടെ മരണം സംബസിച്ച് പോലീസ് അന്വേഷണം ആരംഭിച്ചു. പോലീസിനു ലഭിച്ച പോസ്റ്റ്മോർട്ടം റിപ്പോർട്ടിലെ പ്രാഥമികവിവരങ്ങൾ പ്രകാരം ആത്മഹത്യയാണ്. എന്നാൽ, ഇതിന്‍റെ കാരണം എന്താണന്നതാണ് പോലീസിനെ കുഴക്കുന്നത്. നേഹയുടെ മുറിയിൽനിന്ന് ഒരു ഡയറി പോലീസിനു ലഭിച്ചിരുന്നു. അതിൽ ഒരു പേപ്പറിൽ പ്രത്യേകമായി ഒരു കുറിപ്പുമുണ്ടായിരുന്നു. അതിൽ തന്‍റെ സുഹൃത്തുക്കൾക്കുള്ള ഉപദേശങ്ങളാണ് ഉണ്ടായിരുന്നത്. എന്തെങ്കിലും പ്രശ്നങ്ങളുണ്ടെങ്കിൽ അത് പരിഹരിക്കപ്പെടുമെന്നും വിഷമിക്കരുതെന്നും ഡിപ്രഷനിലേക്കു പോകരുതെന്നും ഈ കുറിപ്പിൽ നേഹ സുഹൃത്തുക്കളോടു പറയുന്നുണ്ട്. എന്നാൽ,‌ അതിലേക്ക് നയിച്ച കാരണങ്ങളാണ് പോലീസ് ഇപ്പോൾ അന്വേഷിക്കുന്നത്. എല്ലാ കാര്യങ്ങളിലും സജീവ ഇടപെടൽ നടത്തിയിരുന്ന വിദ്യാർഥിനിയായിരുന്നുവെന്ന് അധ്യാപകർ പറയുന്നു. കഴിഞ്ഞദിവസം നടന്ന ബാസ്കറ്റ് ബോൾ സെലക്‌ഷൻ ക്യാന്പിലും നേഹ പങ്കെടുത്തിരുന്നു. അന്നത്തെ കലാപരിപാടികളിലും പങ്കെടുത്തു. പഠനത്തിൽ മിടുക്കിയായിരുന്നു. ഇതൊക്കെയായിട്ടും എന്താണ് സംഭവിച്ചതെന്ന കൂടുതൽ അന്വേഷണത്തിനുള്ള നീക്കത്തിലാണ് പോലീസ്. ആലപ്പുഴ ചെന്നിത്തല നവോദയ സ്കൂളിലെ പത്താം ക്ലാസ് വിദ്യാർഥിനി നേഹയെ കഴിഞ്ഞ ദിവസമാണ് സ്കൂൾ ഹോസ്റ്റലിൽ മരിച്ചനിലയിൽ കണ്ടെത്തിയത്. ആറാം ക്ലാസ് മുതൽ നേഹ നവോദയ വിദ്യാലയത്തിലാണ് പഠിക്കുന്നത്. ഇന്നലെ പുലർച്ചെ ഹോസ്റ്റലിന്‍റെ ശുചിമുറിയിലേക്കു പോകുന്ന ഇടനാഴിയിൽ നേഹയെ തൂങ്ങിമരിച്ച നിലയിൽ കണ്ടെത്തുകയായിരുന്നു.

നാരകത്തറ ജംഗ്ഷനിലെ അടിപ്പാത: റിപ്പോർട്ട് സമർപ്പിക്കാൻ ധാരണയായി

ഹരിപ്പാട്: നാഷണൽ ഹൈവേ നിർമാണവുമായി ബന്ധപ്പെട്ട് തിരുവനന്തപുരത്ത് എംഎൽഎ ക്വാർട്ടേഴ്സിൽ രമേശ് ചെന്നിത്തലയുടെ അധ്യക്ഷതയിൽ എൻഎച്ച് പ്രൊജക്ട് ഡയറക്ടർ, സമരസമിതി പ്രതിനിധികൾ, പഞ്ചായത്ത് പ്രതിനിധികൾ വ്യാപാരി വ്യവസായി പ്രതിനിധികൾ എന്നിവരുടെ യോഗം ചേർന്നു. കഴിഞ്ഞ ദിവസം രമേശ് ചെന്നിത്തല എംഎൽഎ കേന്ദ്രമന്ത്രി നിതിൻ ഗഡ്ഗരിയെ കണ്ടതിന്‍റെ അടിസ്ഥാനത്തിൽ കേന്ദ്ര ഉപരിതല മന്ത്രിയുടെ ഓഫീസിൽനിന്ന് ഇതു സംബന്ധിച്ച് അടിയന്തര റിപ്പോർട്ട് സമർപ്പിക്കാൻ നിർദേശം ലഭിച്ചതായി പ്രോജക്റ്റ് ഡയറക്ടർ യോഗത്തെ അറിയിച്ചു. തുടർന്ന് സമരസമിതി നേതാക്കൽ യോഗത്തിൽ ആവശ്യങ്ങൾ വിശദീകരിച്ചു.അടുത്ത മൂന്നാഴ്ചയ്ക്കുള്ളിൽ അടിപ്പാത എന്ന ആവശ്യം നടപ്പിലാക്കാനുള്ള നടപടികൾപൂർത്തിയാക്കാൻ കഴിയുമെന്ന് രമേശ് ചെന്നിത്തല പറഞ്ഞു. കരുവാറ്റ ഹൈസ്കൂൾ ജഗ്ഷനിൽ ഫൂട് ഓവർബ്രിഡ്ജ് വേണമെന്ന പൊതുജന ആവശ്യം യോഗത്തിൽ ചർച്ചയായി അതിനായി സ്ഥലപരിശോധന നടത്താൻ നിർദേശം നല്കി. രമേശ് ചെന്നിത്തല അധ്യക്ഷനായ യോഗത്തിൽ പ്രോജക്ട് ഡയറക്ടർ ബിബിൻ മധു, ജില്ലാ പഞ്ചായത്ത് മെമ്പർ ജോൺ തോമസ്, പഞ്ചായത്ത് പ്രസിഡന്‍റ് സൂസി, സമരസമിതി നേതാക്കളായ പ്രസാദ്, സുരേഷ് ഭവാനി, ദിലീപ് മൂലയിൽ, എം. നാസർ, റിയാസ് തയ്യിൽ, ഗോപിനാഥൻ, നിർവഹണ കമ്പനി പ്രതിനിധികളായി രാജലിംഗം, സുരേഷ്കുമാർ തുടങ്ങിയവർ യോഗത്തിൽ പ്രസംഗിച്ചു.

മാവേലിക്കര പൊതു ശ്മശാനം: കോറം ചെയര്‍മാന് കത്തു നല്‍കി

മാവേലിക്കര: മാവേലിക്കര നഗരസഭയുടെ കീഴിലുള്ള പൊതുശ്മശാനം അടിയന്തരമായി പ്രവര്‍ത്തിപ്പിക്കണമെന്നാവശ്യപ്പെട്ട് കോണ്‍ഫെഡറേഷന്‍ ഓഫ് റസിഡന്‍റ്സ് അസോസിയേഷന്‍ മാവേലിക്കരയുടെ നേതൃത്വത്തില്‍ മുന്‍സിപ്പല്‍ ചെയര്‍മാന്‍ നൈനാന്‍ സി. കുറ്റിശേരിലിന് കത്തു നല്‍കി. നിരവധി പ്രാവശ്യം കോറം പൊതുശ്മശാനം പ്രവര്‍ത്തിപ്പിക്കണമെന്ന ആവശ്യവുമായി മുന്‍സിപ്പാലിറ്റിയെ സമീപിച്ചെങ്കിലും നടപടി ഉണ്ടാകാത്തതിനെത്തുടര്‍ന്നാണ് സമരത്തിനു മുന്നോടിയായുള്ള കത്തെന്ന് കോറം പ്രസിഡന്‍റ് കെ.പി. വിദ്യാധരന്‍ ഉണ്ണിത്താന്‍ പറഞ്ഞു. നഗരത്തില്‍ രണ്ടും മൂന്നും സെന്‍റ് വസ്തുവുള്ളവരും സ്വന്തമായി സ്ഥലമില്ലാത്തവരും മരണപ്പെടുമ്പോള്‍ മൃതദേഹം മറവുചെയ്യാന്‍ കഴിയാതെ ബുദ്ധിമുട്ടുന്ന സാഹചര്യത്തെ കൗണ്‍സില്‍ ഗൗരവമായി കാണണമെന്നും അദ്ദേഹം ആവശ്യപ്പെട്ടു. സ്റ്റാന്‍ഡിംഗ് കമ്മിറ്റി ഈ വിഷയത്തില്‍ തീരുമാനം എടുത്തിട്ടുകൂടി അതു കൗണ്‍സിലില്‍വച്ച് വേണ്ട തീരുമാനം കൈക്കൊള്ളാതിരുന്നത് പ്രതിഷേധാര്‍ഹമാണ്. നഗരത്തിലെ സാധാരണക്കാരനുതകുന്ന പ്രസ്തുത വിഷയത്തെ മുന്‍ ചെയര്‍മാനും നിലവിലെ വൈസ് ചെയര്‍പേഴ്‌സണും ഫലത്തില്‍ എതിര്‍ക്കുന്ന നിലപാടാണ് ഉണ്ടായിട്ടുള്ളത്. വിഷയത്തില്‍ അടിയന്തര നടപടി ഉണ്ടാകണമെന്ന് കോറം ചെയര്‍മാന് നല്‍കിയ കത്തില്‍ ആവശ്യപ്പെടുന്നു. പ്രസിഡന്‍റ് കെ.പി. വിദ്യാധരന്‍ ഉണ്ണിത്താന്‍, സെക്രട്ടറി ശശികുമാര്‍ മാവേലിക്കര, ട്രഷറര്‍ വി. സുനില്‍കുമാര്‍ എന്നിവരുടെ നേതൃത്വത്തില്‍ കോറം പ്രവര്‍ത്തകര്‍ ചെയര്‍മാന്‍റെ ചേംബറില്‍ എത്തിയാണ് കത്തു കൈമാറിയത്. വിഷയം കൗണ്‍സിലില്‍ ചര്‍ച്ചചെയ്ത് ഉടന്‍ നടപടിക്കായി ശ്രമിക്കാമെന്ന് ചെയര്‍മാന്‍ പറഞ്ഞതായും കോറം ഭാരവാഹികള്‍ അറിയിച്ചു.

ഫാ. ജോര്‍ജ് വലിയവീട്ടില്‍ കാരുണ്യത്തിന്‍റെ മുഖം: ജോബ് മൈക്കിള്‍ എംഎൽഎ

ചങ്ങനാശേരി: പൗരോഹിത്യ ശുശ്രൂഷയില്‍ പൊതുസമൂഹത്തില്‍ നന്മകള്‍ വിതറിയ കാരുണ്യത്തിന്‍റെ മുഖമായിരുന്നു ഫാ. ജോര്‍ജ് വലിയവീട്ടിലെന്ന് അഡ്വ. ജോബ് മൈക്കിള്‍ എംഎല്‍എ. പാവപ്പെട്ടവരെയും രോഗികളെയും അഗതികളെയും ചേര്‍ത്തുപിടിച്ചുകൊണ്ട് സമൂഹത്തില്‍ പൗരോഹിത്യത്തിന്‍റെ മഹനീയ മാതൃക കാട്ടിയ ഫാ. ജോര്‍ജ് വലിയവീട്ടില്‍ എന്നും സ്മരിക്കപ്പെടുമെന്നും അദ്ദേഹം പറഞ്ഞു. ഫാ. ജോര്‍ജ് വലിയവീട്ടില്‍ സ്മരണാര്‍ഥം ഏര്‍പ്പെടുത്തിയ പ്രഥമ മനുഷ്യമിത്ര പുരസ്‌കാരം രണ്ടാം കായല്‍ രാജാവ് ജോസ് ജോണ്‍ വെങ്ങാന്തറയ്ക്ക് സമ്മാനിച്ചു പ്രസംഗിക്കുകയായിരുന്നു അദ്ദേഹം. ചങ്ങനാശേരി സെന്‍റ് വിന്‍സന്‍റ് പുവര്‍ ഹോമില്‍ നടത്തിയ ചടങ്ങില്‍ അനുസ്മരണ സമിതി പ്രസിഡന്‍റ് അലക്‌സ് മാത്യൂ അധ്യക്ഷത വഹിച്ചു. വി.ജെ. ലാലി, കുട്ടനാട് എസ്എന്‍ഡിപി യൂണിയന്‍ കണ്‍വീനര്‍ സന്തോഷ് ശാന്തികള്‍, കത്തോലിക്ക കോണ്‍ഗ്രസ് ഗ്ലോബല്‍ വൈസ് പ്രസിഡന്‍റ് രാജേഷ് ജോണ്‍, സെക്രട്ടറി ടോമിച്ചന്‍ അയ്യരുകുളങ്ങര, അതിരൂപത ജനറല്‍ സെക്രട്ടറി ബിനു ഡൊമനിക് നടുവിലേഴം, സെക്രട്ടറിമാരായ സൈബി അക്കര, കെ.എസ്. ആന്‍റണി കരിമറ്റം, അനില്‍ തൈവീടന്‍, ചങ്ങനാശേരി എക്യൂമെനിക്കല്‍ മുവ്‌മെന്‍റ് പ്രസിഡന്‍റ് ജെസ്റ്റിന്‍ ബ്രൂസ്, വര്‍ഗീസ് ആന്‍റണി, ഔസേപ്പച്ചന്‍ ചെറുകാട്, ബിജു വലിയവീടന്‍, അമ്പിളി ജോസ്, സാബു കോയിപ്പള്ളി, ലിസി ജോസ് പൗവ്വക്കര,റോസിലിന്‍ കുരുവിള, സിസി അമ്പാട്ട്, കെ.ജെ. ജയിംസ് കൊച്ചുകുന്നേല്‍, മത്തായിച്ചന്‍ കാഞ്ഞിക്കല്‍, ജോഷി കൊല്ലാപുരം, ബിജു പാണ്ടിശേരി, സിസ്റ്റര്‍ ആന്‍സ് തോമസ് എഫ്സിസി എന്നിവര്‍ പ്രസംഗിച്ചു.

ലോറിയിൽ സൂക്ഷിച്ച സിമന്‍റ് സാമൂഹ്യവിരുദ്ധർ നശിപ്പിച്ചു

പൂച്ചാക്കൽ: ലോറിയിൽ സൂക്ഷിച്ചിരുന്ന സിമന്‍റ് സാമൂഹ്യവിരുദ്ധർ ഉപയോഗശൂന്യമാക്കി. കഴിഞ്ഞ ദിവസം രാത്രിയിലായിരുന്നു സംഭവം. പള്ളിപ്പുറം ചിറ്റേഴത്ത് ട്രഡേഴ്സ് ഉടമ ഒ.സി. വക്കച്ചന്‍റെ ഉടമസ്ഥതയിലുള്ള ലോറിയിൽ കയറ്റിയിരുന്ന ഒരു ലോഡ് സിമന്‍റാണ് സാമൂഹ്യവിരുദ്ധർ നശിപ്പിച്ചതെന്നാരോപിച്ച് പോലീസിൽ പരാതി നൽകിയത്. പള്ളിപ്പുറം പഞ്ചായത്തിലെ വിവിധ പ്രദേശങ്ങളിൽ അനധികൃതമായി സിലിക്ക മണൽ കടത്തുന്നതുമായി ബന്ധപ്പെട്ട് നിരവധി പ്രക്ഷോഭങ്ങൾ ഒ.സി. വക്കച്ചന്‍റെ നേതൃത്വത്തിൽ നടത്തിയിരുന്നു. ഇതിന്‍റെ അടിസ്ഥാനത്തിൽ ഖനനം നിർത്തിവയ്പ്പിക്കാനുള്ള നടപടികൾ അധികാരികൾ ആരംഭിച്ചിരുന്നു. അതിന്‍റെ വൈരാഗ്യത്തിനായിരിക്കാം അക്രമം നടത്തിയതെന്ന് പരാതിയിൽ പറയുന്നു. ഒറ്റപ്പുന്നയിലെ ചിറ്റേഴത്തിന്‍റെ വണ്ടി പാർക്ക് ചെയ്യുന്ന പുരയിടത്തിൽ ടാർപ്പായകൊണ്ടു മറച്ചുകെട്ടി സൂക്ഷിച്ചിരുന്ന സിമിന്‍റാണ് അക്രമികൾ രാത്രി പുരയിടത്തിൽ അതിക്രമിച്ചു കയറി നശിപ്പിച്ചത്. സിമന്‍റ് പൊതിഞ്ഞുകെട്ടിയ ടാർപ്പായ കുത്തിക്കീറി നശിപ്പിച്ചുകളഞ്ഞു. രാത്രിയിൽ പെയ്ത ശക്തമായ മഴയിൽ സൂക്ഷിച്ചിരുന്ന 200 പാക്കറ്റ് സിമന്‍റിൽ 155 എണ്ണവും ഉപയോഗിക്കാൻ പറ്റാത്തവിധം വെള്ളം കയറി കട്ടയായി. രാവിലെ എത്തിയ ജീവനക്കാരാണ് ടാർപ്പായ കീറി നശിപ്പിച്ച നിലയിൽ കണ്ടത്. ഏകദേശം ഒരു ലക്ഷം രൂപയുടെ നഷ്ടം കണക്കാക്കുന്നു.

മനോനില തെറ്റി അലഞ്ഞുനടന്നയാളെ പോലീസ് ശാന്തിഭവനിൽ എത്തിച്ചു

അമ്പലപ്പുഴ: മനോനില തെറ്റി അലഞ്ഞുനടന്നയാളെ പോലീസ് ശാന്തി ഭവനിൽ എത്തിച്ചു.പുന്നപ്ര പടിഞ്ഞാറ് പനച്ചുവട് ഭാഗത്ത് മനോനില തെറ്റി നാട്ടുകാർക്ക് ശല്യമായി കണ്ട 30 വയസു തോന്നിക്കുന്ന പുരുഷനെയാണ് നാട്ടുകാർ അറിയിച്ചതിനെത്തുടർന്ന് പുന്നപ്ര പോലീസ് പുന്നപ്ര ശാന്തിഭവനിൽ എത്തിച്ചത്. പുതിയ അതിഥിയെ ശാന്തിഭവൻ മാനേജിംഗ് ട്രസ്റ്റി ബ്രദർ മാത്യു ആൽബിൻ സ്വീകരിച്ചു. ഇയാളെക്കുറിച്ച് എന്തെങ്കിലും വിവരം ലഭിക്കുന്നവർ ശാന്തിഭവനുമായി ബന്ധപ്പെടണമെന്ന് മാത്യു ആൽബിൻ അറിയിച്ചു. ഫോൺ: 9447403035, 0477 2287322.

പാഴ്‌സൽ വാനിൽനിന്നു ‌കോടികളുടെ കവർച്ച: രണ്ടുപേർ കൂടി പിടിയിൽ

കായംകുളം: ദേശീയപാതയിൽ രാമപുരത്ത് സിനിമാ സ്റ്റൈലിൽ പാഴ്‌സൽ കമ്പനിയുടെ വാഹനം തടഞ്ഞു നിർത്തി മൂന്നു കോടി 24 ലക്ഷം രൂപ കവർന്ന കേസിൽ രണ്ടു പേർ കൂടി പിടിയിലായി .തമിഴ്‌നാട് തിരുനല്ലൂർ മാരിയംനഗർ ഹരികൃഷ്ണൻ (26), തിരുനല്ലൂർ, മടപ്പുറം കീരളത്തൂർ മാരിയപ്പൻ (47) എന്നിവരാണ് പിടിയിലായത്. കേസിൽ ഇതോടെ അറസ്റ്റിലായവരുടെ എണ്ണം നാലായി. കേസിൽ നാലുപേർ കൂടി പിടിയിലാകാനുണ്ട്. തമിഴ്നാട് തിരുപ്പൂർ സ്വദേശികളായ തിരുകുമാർ (37), ചന്ദ്രബോസ് (32) എന്നിവരെ ആദ്യം പോലീസ് അറസ്റ്റ് ചെയ്തിരുന്നു. കേസിൽ ബാക്കിയുള്ളവരെക്കൂടി അറസ്റ്റ് ചെയ്ത് ചോദ്യം ചെയ്താൽ മാത്രമേ കേസിൽ കൂടുതൽ പേർ ഉൾപ്പെട്ടുട്ടുണ്ടോ എന്ന് അറിയാൻ കഴിയുകയുള്ളൂ എന്ന് പോലീസ് വ്യക്തമാക്കി. സതീഷ്, ദുരൈ അരസ് എന്നിവരാണ് പണം കവർച്ച ആസൂത്രണം ചെയ്തത്. ഇവരെ പിടികൂടാൻ പോലീസ് ശ്രമം തുടങ്ങിയിട്ടുണ്ട്. കൊല്ലത്ത് താമസിക്കുന്ന അപ്പാസ് പാട്ടീൽ എന്നയാൾക്ക് കോയമ്പത്തൂരിലുള്ള ബന്ധു നമ്പർവൺ പാഴ്‌സൽ സർവീസിന്‍റെ ലോറിയിൽ കൊടുത്തവിട്ട പണമാണ് കഴിഞ്ഞ മാസം 13ന് പുലർച്ചെ നാലരയ്ക്ക് കവർന്നത്. ഒരു സ്‌കോർപ്പിയോയിലും ഇന്നോവയിലുമായി എത്തിയ എട്ടംഗസംഘം സിനിമാ സ്റ്റൈലിൽ പാഴ്‌സൽ വാൻ തടഞ്ഞ് പണം തട്ടിയെടുക്കുകയായിരുന്നു. അതിനുശേഷം ഇവർ തിരുപ്പൂരിലേക്കു കടന്നു. സിസി ടിവി ദ്യശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് മോഷ്ടാക്കൾ വന്ന വാഹനത്തിന്‍റെ നമ്പർ കിട്ടിയത്. ഇവർ തമിഴ്‌നാട്ടിലേക്കു കടന്നയുടൻ വാഹനത്തിന്‍റെ നമ്പർ മാറ്റി. മോഷ്ടാക്കളെല്ലാം തിരുപ്പൂർ, കുംഭകോണം, തിരുവള്ളുർ പ്രദേശങ്ങളിലുള്ളവരാണ്. ഇവർ കോയമ്പത്തൂരിൽ എത്തിയാണ് മോഷണം ആസൂത്രണം ചെയ്തത്. കരീലക്കുളങ്ങര പോലീസാണ് കേസ് അന്വേഷിക്കുന്നത്

‘പൊൻതിളക്കം’ എംഎൽഎ മെറിറ്റ് അവാർഡ് വിതരണം നാളെ

അമ്പലപ്പുഴ: എച്ച്. സലാം എംഎൽഎയുടെ മണ്ഡലത്തിലെ സമഗ്ര വിദ്യാഭ്യാസ പദ്ധതിയായ പൊൻതിളക്കം എംഎൽഎ മെറിറ്റ് അവാർഡ് വിതരണം നാളെ നടക്കും. വണ്ടാനം ഗവ. ടിഡി മെഡിക്കൽ കോളജ് ഓഡിറ്റോറിയത്തിൽ പകൽ രണ്ടിന് നടക്കുന്ന അവാർഡ് വിതരണം ധനകാര്യ മന്ത്രി കെ.എൻ. ബാലഗോപാൽ ഉദ്ഘാടനം ചെയ്യും. എച്ച്. സലാം എംഎൽഎ അധ്യക്ഷനാകുന്ന പരിപാടിയിൽ എസ്എസ്എൽസി, പ്ലസ് ടു ഉന്നത വിജയികളെയും സർകലാശാല റാങ്ക് ജേതാക്കളെയും വിവിധ മേഖലകളിൽ വ്യക്തിമുദ്ര പതിപ്പിച്ചവരെയും അനുമോദിക്കും. കളക്ടർ അലക്സ് വർഗീസ്, ചലച്ചിത്രതാരങ്ങളായ നിഖില വിമൽ, പ്രമോദ് വെളിയനാട്, യുവസാഹിത്യകാരൻ അഖിൽ പി. ധർമജൻ, എറണാകുളം അസിസ്റ്റന്‍റ് കളക്ടർ പാർവതി ഗോപകുമാർ എന്നിവർ മുഖ്യാതിഥികളാകും. മെഡിക്കൽ കോളജ് പ്രിൻസിപ്പൽ ഡോ.ബി. പത്മകുമാർ, ത്രിതല പഞ്ചായത്ത്, നഗരസഭാ ഭാരവാഹികൾ, മറ്റു ജനപ്രതിനിധികൾ, ആശുപത്രി സൂപ്രണ്ട് ഡോ.എ. ഹരികുമാർ എന്നിവർ പങ്കെടുക്കും. ഗവ. മുഹമ്മദൻസ് ബോയ്സ് ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്‍റെ ലഹരിവിരുദ്ധ സംഗീതശില്പം, ഡി. അജിത്ത് നയിക്കുന്ന ആർട്ടിഫിഷൽ ഇന്‍റലിജൻസ് ക്ലാസ് എന്നിവയും പരിപാടിയുടെ ഭാഗമായി നടത്തും.

പോലീസ് ജീപ്പിൽ ഇടിച്ച ഇന്നോവ കാറിൽ സഞ്ചരിച്ച യുവാക്കൾ മദ്യപിച്ചിരുന്നതായി അന്പലപ്പുഴ സിഐ

അമ്പലപ്പുഴ: പോലീസ് ജീപ്പ് ഉള്‍പ്പെടെ നിരവധി വാഹനങ്ങളില്‍ ഇടിച്ചശേഷം അമിതവേഗത്തിൽ പോയ ഇന്നോവ കാറിൽ സഞ്ചരിച്ചിരുന്ന യുവാക്കൾ മദ്യപിച്ചിരുന്നതായി അമ്പലപ്പുഴ സിഐ എം. പ്രതീഷ് കുമാർ. സംഭവത്തത്തെത്തുർന്ന് റിമാൻഡിലായ യുവാക്കളെ കസ്റ്റഡിയിൽ വാങ്ങി കൂടുതൽ അന്വഷണം നടത്തുമെന്നും സിഐ പറഞ്ഞു. സിഎച്ച് 01 എബി -7629 എന്ന രജിസ്റ്റർ നമ്പരിലുള്ള ഇന്നോവ കാറിൽ സഞ്ചരിച്ചെത്തിയ കൊല്ലം കരുനാഗപ്പള്ളി സ്വദേശികളായ ആലിൻകടവ് പുന്നമൂട്ടിൽ അഖിൽ (26), ദിലീപ് ഭവനത്തിൽ സഞ്ജയ് (25), പ്രവീൺ നിവാസിൽ പ്രവീൺ (25), ഓച്ചിറ ചങ്ങംകുളങ്ങര ഗൗരി ഭവനിൽ ആദർശ് (23), ഷിയാസ് മൻസിലിൽ നിയാസ് (22), കാട്ടിൽ കടവ് തറയിൽ വീട്ടിൽ സൂരജ് (21) എന്നിവരെയാണ് പോലീസ് കസ്റ്റഡിയിൽ വാങ്ങുക. ഇതിനായി അമ്പലപ്പുഴ കോടതിയിൽ കസ്റ്റഡി അപേക്ഷ അടുത്തദിവസം സമർപ്പിക്കും. രണ്ടു ദിവസം മുമ്പ് രാത്രി 12നാണ് ജോലിക്കു വിദേശത്തേക്കു പോകാൻ സഞ്ജയ് എന്ന സുഹൃത്തിനെ യാത്രയാക്കാൻ, നെടുമ്പാശേരിയിലേക്കു പുറപ്പെട്ട ഇവർ സഞ്ചരിച്ച കാർ വിവിധ വാഹനങ്ങളിലും പിന്നീട് അമ്പലപ്പുഴ പോലീസിന്‍റെ ജീപ്പിലും ഇടിച്ചത്. ചോദ്യം ചെയ്ത നാട്ടുകാരെ സംഘം അസഭ്യം പറയുകയും ഭീഷണിപ്പെടുത്തുകയും ചെയ്തു. കാക്കാഴം റയിൽവേ മേൽപ്പാലത്തിന്‍റെ ഫുട്പാത്തിലിടിച്ച് വലതുവശം പിൻഭാഗത്തെ ടയർ ഊരിത്തെറിച്ച കാറുമായി സംഘം പിന്നീട് ആറു കിലോമീറ്ററിലധികം സഞ്ചരിച്ചു. പുന്നപ്രയിൽ ദേശീയ പാതയ്ക്കു കിഴക്ക് ആളൊഴിഞ്ഞ പറമ്പിലെത്തിയ ആറംഗ സംഘത്തെ നാട്ടുകാരുടെ സഹായത്തോടെ പോലീസ് പിടികൂടുകയായിരുന്നു. പുന്നപ്ര പോലീസ് കസ്റ്റഡിയിലെടുത്ത കാർ പിന്നീട് അമ്പലപ്പുഴ സ്റ്റേഷനിലേക്കു മാറ്റിയിരുന്നു. യുവാക്കൾ മറ്റേതെങ്കിലും കേസിൽ ഉൾപ്പെട്ടവരാണോ എന്നതുൾപ്പടെയുള്ള കാര്യങ്ങൾ അന്വേഷിക്കുമെന്നും പോലീസ് പറഞ്ഞു.

പ്രവര്‍ത്തനസജ്ജമാകാതെ മാവേലിക്കര പൊതുശ്മശാനം

മാവേലിക്കര: ഭൂരഹിതരുടെയും പരിമിത ഭൂമിയുള്ളവരുടെയും പൊതുശ്മശാനം വേണമെന്ന പതിറ്റാണ്ടുകളുടെ ആവശ്യത്തെത്തുടര്‍ന്നാണ് രണ്ടു പതിറ്റാണ്ട് മുന്‍പ് മാവേലിക്കരയില്‍ വാതകശ്മശാനം സ്ഥാപിക്കുന്നത്. എന്നാല്‍, തുടക്കത്തില്‍ വിരലിലെണ്ണാവുന്ന മൃതദേഹങ്ങൾ സംസ്‌കരിച്ച ശേഷം പിന്നീട് അതിന്‍റെ സുഗമമായ പ്രവര്‍ത്തനം ഉണ്ടായിട്ടേയില്ല. ബജറ്റ് പുസ്തകത്തിലെ പാലിക്കാന്‍ സാധിക്കാത്ത ഒരു വാഗ്ദാനമായി അത് ഇന്നും തുടരുന്നു. 2005ല്‍ എംഎല്‍എയായിരുന്ന എം. മുരളിയുടെ പ്രദേശിക വികസനഫണ്ടും നഗരസഭയുടെ പദ്ധതി വിഹിതവും ചേര്‍ത്താണ് 14 ലക്ഷം രൂപ മുടക്കി കണ്ടിയൂര്‍ കാളച്ചന്തയില്‍ വാതകശ്മശാനം നിര്‍മിക്കാന്‍ ആരംഭിച്ചു. 2008ല്‍ ശ്മശാനം പൊതുജനങ്ങള്‍ക്കായി തുറന്നുകൊടുത്തു. എന്നാല്‍, എട്ടു മൃതദേഹങ്ങള്‍ മാത്രമാണ് ഇവിടെ സംസ്‌കരിക്കാനായത്. വൈദ്യുതിബന്ധം ഇടയ്ക്ക് മുടങ്ങുന്നതായിരുന്നു ശ്മശാനത്തിന്‍റെ പ്രവര്‍ത്തനത്തെ ബാധിച്ചത്. പ്രശ്‌നപരിഹാരം മൃതദേഹങ്ങള്‍ സംസ്‌കരിക്കുമ്പോള്‍ വൈദ്യുതി ലഭിക്കാതെയാകുകയും പകുതി കരിഞ്ഞവ പുറത്തേക്കെടുത്ത് കത്തിക്കേണ്ട അവസ്ഥവരെ ഉണ്ടായി. ഇങ്ങനെ പ്രവര്‍ത്തനം നിലച്ച ശ്മശാനം പിന്നീട് നഗരസഭ ജനറേറ്റര്‍ സ്ഥാപിച്ച് വീണ്ടും തുറന്നു. എന്നാല്‍, അധികകാലം പ്രവര്‍ത്തനം മുന്നോട്ടു പോയില്ല. പുകക്കുഴലായിരുന്നു അടുത്ത വില്ലന്‍. പുകക്കുഴലില്‍നിന്ന് പുക പുറത്തേക്കു പോകാതെ ചൂള പ്രവര്‍ത്തിക്കുന്ന മുറിയില്‍ തുങ്ങിനിറഞ്ഞു തുടങ്ങിയതോടെ വീണ്ടും പ്രവര്‍ത്തനം നിശ്ചലമായി. വര്‍ഷങ്ങള്‍ കഴിഞ്ഞ നഗരസഭാ ഭരണസമിതി പ്രശ്‌നം പരിഹരിക്കാനായി വകയിരുത്തി. എന്നാല്‍, നാളിതുവരെ പ്രശ്‌നപരിഹാരം ഉണ്ടായതേയില്ല. നിലവില്‍ നഗരസഭാ പ്രദേശത്ത് പൊതുശമശാനങ്ങളില്ലാത്തതിനാല്‍ ഭൂരഹിതരും പരിമിത ഭൂമിയുളളവരും വലിയ ദുരിതത്തിലാണ്. പരിമിത ഭൂമിയുള്ളവരില്‍ പലരും വീടിന്‍റെ ചില ഭാഗങ്ങള്‍ ഇളക്കിമാറ്റിയും വഴിയിലും മൃതസംസ്‌കാരങ്ങള്‍ നടത്തിയ നിരവധി സംഭവങ്ങള്‍ മാവേലിക്കരയില്‍ ഉണ്ടായിട്ടുണ്ട്. ഉറ്റവരുടെ മൃതദേഹം ഭൂരഹിതര്‍ തങ്ങളുടെ ഉറ്റവരുടെ മൃതദേഹം സംസ്‌കരിക്കാനായി അന്യനാടുകളിലേക്കു വരെ കൊണ്ടുപോകേണ്ട അവസ്ഥയാണ് മാവേലിക്കരയിലുള്ളത്. വാതകശ്മശാനത്തിന് തൊട്ടടുത്തുള്ള കാളച്ചന്തയിലെ ശ്മശാനത്തില്‍ കണ്ടിയൂര്‍ പ്രദേശത്തുള്ളവരുടെ മൃതദേഹം സംസ്‌കരിക്കാന്‍ മാത്രമാണ് അനുവാദവുമുള്ളത്. പതിവുപോലെ ബജറ്റില്‍ മാത്രം കാണുന്ന ഒരു വാഗ്ദാനമായി ശ്മശാനം മാറാന്‍ തുടങ്ങിയിട്ട് വര്‍ഷങ്ങളായി. എല്ലാ വര്‍ഷത്തെയും ബജറ്റ്പുസ്തകത്തില്‍ അധികൃതര്‍ ശ്മശാനത്തിനായി തുക നീക്കിവയ്ക്കാറുമുണ്ട്. ഈ വര്‍ഷത്തെ ബജറ്റിലും ശ്മശാനം പ്രവര്‍ത്തന സജ്ജമാക്കി നവീകരിക്കുവാന്‍ 20 ലക്ഷം രൂപ നീക്കിവച്ചിട്ടുണ്ട്. എന്നാല്‍, ഇനി ചുരുങ്ങിയ മാസങ്ങള്‍ മാത്രം കാലാവധിയുള്ള ഭരണസമിതി ഇതുസംബന്ധിച്ച് ചര്‍ച്ചകള്‍ പോലും നടത്തിയിട്ടില്ലെന്നാണ് പൊതുജനങ്ങളുടെ ആരോപണം. വിഷയം ഉന്നയിച്ച് വിവിധ സാംസ്‌കാരിക-സാമുദായിക സംഘടനകളും രംഗത്തെത്തിയിട്ടുണ്ട്. താത്കാലികമായി ഗ്യാസ് കൊണ്ട് പ്രവര്‍ത്തിപ്പാക്കാവുന്ന ശ്മശാനമെങ്കിലും ഉടന്‍ സജ്ജാകരിക്കണമെന്നാണ് ഇവരുടെ ആവശ്യം.

കാൽനടയാത്രക്കാർക്ക് അപകടഭീഷണി

കായംകുളം: കരിപ്പുഴ തോടിനു കുറുകെ ഏവുർ- മുട്ടം റോഡിൽ മത്സ്യമാർക്കറ്റിനു സമീപം മുട്ടം ബസാർ പാലം നവീകരണം കഴിഞ്ഞപ്പോൾ യാത്രക്കാർക്ക് അപകടഭീഷണി. പാലത്തിന്‍റെ ഇരുവശങ്ങളിലുമുള്ള നടപ്പാതകൾ ഉയർത്തിയതോടെ പാലത്തിന്‍റെ കൈവരിയും നടപ്പാതയും തമ്മിലുള്ള ഉയരം ഗണ്യമായി കുറഞ്ഞതാണ് അപകടഭീഷണി ഉയർത്തുന്നത്. കായംകുളം പട്ടണത്തിലൂടെ യാത്രചെയ്യുന്നവർ കരിപ്പുഴ തോട്ടിലേക്കു വീഴുമോ എന്ന ആശങ്കയിലാണ്. നട പ്പാതയിൽനിന്ന് ഏകദേശം ഒരടി ഉയരമാണ് കൈവരിക്കുള്ളത്. കാൽനടയാത്രക്കാരെയാണ് ഇതു ഗുരുതരമായി ബാധിക്കുന്നത്. നടപ്പാതയുടെ ഉയരം കൂട്ടിയതനുസരിച്ച് മുകളിലെ കൈവരിയുടെയും ഉയരം കൂട്ടേണ്ടതായിരുന്നു. അശാസ്ത്രീയമായ നിർമാണ പ്രവർത്തനമാണ് അപകടസാധ്യത വർധിപ്പിച്ചത്. വലിയ അഴീക്കൽ പൊഴിയുമായി ബന്ധിച്ചുകിടക്കുന്ന കരിപ്പുഴ തോടിനു കുറുകെയുള്ള നഗരത്തിലെ വളരെ പ്രധാനപ്പെട്ട പാലമാണിത്. പൊതുമരാമത്ത് വകുപ്പാണ്‌ പാലം നവീകരിച്ചത്. പാലത്തിന്‍റെ ഇരുവശങ്ങളിലും മുമ്പുണ്ടായിരുന്ന നടപ്പാത തകർന്ന് കാൽനട യാത്രപോലും ദുഷ്ക്കരമായതിനെത്തുടർന്നാണ് പൊതുമരാമത്ത് വകുപ്പ് ഇപ്പോൾ പാലം നവീകരിച്ചത്. നടപ്പാതയിൽ നിരത്തിയിരിക്കുന്ന സ്ലാബുകൾ നിരപ്പല്ലാത്തതു മൂലം യാത്രക്കാർ തട്ടിവീഴാനുള്ള സാധ്യതയും ഏറെയാണ്. പാലത്തിന്‍റെ കൈവരികൾ ഉയർത്തിയും നടപ്പാതയിലെ സ്ലാബുകൾ നിരപ്പാക്കിയും അപകടഭീഷണി ഒഴിവാക്കണമെന്നാണ് നാട്ടുകാരുടെ ആവശ്യം.

‘ശുചിത്വസാഗര സുന്ദരതീരം’ ജില്ലയില്‍ ഒന്നാംസ്ഥാനം ആലപ്പുഴ നഗരസഭയ്ക്ക്

ആലപ്പുഴ: കേരള സര്‍ക്കാര്‍ ഫിഷറീസ് വകുപ്പിന്‍റെ ആഭിമുഖ്യത്തില്‍ സംഘടിപ്പിച്ച ശുചിത്വസാഗരം സുന്ദരതീരം ഏകദിന പ്ലാസ്റ്റിക് നിര്‍മാര്‍ജനയജ്ഞത്തില്‍ ജില്ലയില്‍ ഒന്നാം സ്ഥാനം കരസ്ഥമാക്കി ആലപ്പുഴ നഗരസഭ. കൊല്ലം ജില്ലയിലെ കൊട്ടാരക്കര സൗപര്‍ണിക ഓഡിറ്റോറിയത്തില്‍ നടന്ന ചടങ്ങില്‍ ഫിഷറീസ് മന്ത്രി സജി ചെറിയാനില്‍നിന്നു നഗരസഭാധ്യക്ഷ കെ.കെ. ജയമ്മ പുരസ്‌കാരം ഏറ്റുവാങ്ങി. കേരളത്തിലെ കടലിനെയും കടലോരത്തെയും പ്ലാസ്റ്റിക് മുക്തമാക്കി ആവാസവ്യവസ്ഥ വീണ്ടെടുക്കുന്നതിനായി ഫിഷറീസ് വകുപ്പിന്‍റെ ആഭിമുഖ്യത്തില്‍ സംഘടിപ്പിച്ച കാമ്പയിന്‍റെ ഭാഗമായി ആലപ്പുഴ നഗരസഭാ പരിധിയില്‍ മംഗലം ബീച്ച്, കാഞ്ഞിരംചിറ, ബിഷപ് ഹൗസിനു സമീപം, ഹോമിയോ ഹോസ്പിറ്റലിനു സമീപം, ഇഎസ്‌ഐ, വാടയ്ക്കല്‍ എന്നീ ആറു കേന്ദ്രങ്ങളില്‍ ശുചീകരണപ്രവര്‍ത്തനങ്ങള്‍ സംഘടിപ്പിക്കുകയും 1680 കിലോഗ്രാം പ്ലാസ്റ്റിക് മാലിന്യങ്ങള്‍ നീക്കം ചെയ്യുകയും ചെയ്താണ് നഗരസഭ ഒന്നാം സ്ഥാനം കരസ്ഥമാക്കിയത്. നഗരസഭാ ആരോഗ്യ സ്ഥിരംസമിതി അധ്യക്ഷ എ.എസ്. കവിത, കൗണ്‍സിലര്‍മാരായ ഹെലന്‍ ഫെര്‍ണാണ്ടസ്, മേരിലീന, പ്രഭ ശശികുമാര്‍, ഫിഷറീസ് എക്സ്റ്റന്‍ഷന്‍ ഓഫീസര്‍ ബാലുശേഖര്‍, കോ-ഓര്‍ഡിനേറ്റര്‍ ഷീന സജി എന്നിവര്‍ പുരസ്‌കാരം ഏറ്റുവാങ്ങല്‍ ചടങ്ങില്‍ നഗരസഭാധ്യക്ഷക്കൊപ്പം പങ്കെടുത്തു. ജില്ലയില്‍ ചേര്‍ത്തല തെക്ക് ഗ്രാമപഞ്ചായത്താണ് രണ്ടാം സ്ഥാനം കരസ്ഥമാക്കിയത്. ആലപ്പുഴ നഗരസഭ ബഹുജന പങ്കാളിത്തോടെ നടത്തിയ കാമ്പയിനില്‍ ജനപ്രതിനിധികള്‍, എസ്ഡി കോളജ്, സെന്‍റ് ജോസഫ് കോളജ് എന്‍എസ്എസ് വോളണ്ടിയര്‍മാര്‍, സ്റ്റുഡന്‍റ്സ് പോലീസ്, കുടുംബശ്രീ അംഗങ്ങള്‍, കാന്‍ ആലപ്പി, ഹരിതകര്‍മസേനാംഗങ്ങള്‍, തൊഴിലുറപ്പു തൊഴിലാളികള്‍, ശുചീകരണ തൊഴിലാളികള്‍, സന്നദ്ധസംഘടനകള്‍, യുവജന സംഘടനകള്‍ തുടങ്ങിയവര്‍ കാമ്പയിന്‍റെ ഭാഗമായിരുന്നു.

കുമാരപുരത്ത് ജൂവലറിയിൽ മോഷണശ്രമം

ഹരിപ്പാട്: കുമാരപുരം പഞ്ചായത്ത് ഓഫീസിന് എതിർവശമുള്ള അറ്റ്‌ലസ് ജുവലറിയിലാണ് മോഷണശ്രമം നടന്നത്. കടയുടമ താമല്ലാക്കൽ സ്വദേശി സെയ്‌ഫുദീൻ ഇന്നലെ രാവിലെ കട തുറക്കാൻ എത്തിയപ്പോഴാണ് ഷട്ടറിന്‍റെ ഇരുവശവുമുള്ള പൂട്ടുകൾ അറുത്തുമാറ്റിയ നിലയിൽ കണ്ടെത്തിയത്. മോഷ്ടാക്കൾ ഷട്ടറിന്‍റെ മധ്യഭാഗത്തെ ലോക്ക് കുത്തിത്തുറക്കാനുള്ള ശ്രമം പരാജയപ്പെട്ടതാണ് മോഷണം നടക്കാതെ പോയത്. അറുത്തുമാറ്റിയ പൂട്ടുകൾ മോഷ്ടാക്കൾ കൊണ്ടുപോയി. പ്രകാശമേറിയ ഹൈമാസ്റ്റ് ലൈറ്റ് ഉൾപ്പെടെ തിരക്കുള്ള പഞ്ചായത്ത് ജംഗ്ഷനിൽ മോഷണശ്രമം നടന്നത് വ്യാപാരികളെയും നാട്ടുകാരെയും ഭീതിയിലാക്കിയിട്ടുണ്ട്. ഹരിപ്പാട് പോലീസ് അന്വേഷണം ആരംഭിച്ചു. കഴിഞ്ഞമാസം കുമാരപുരം കെവി ജെട്ടി ജംഗ്ഷനിൽ സൈനികന്‍റെ വീട് കുത്തിത്തുറന്ന് 15 പവൻ സ്വർണാഭരണങ്ങൾ മോഷ്ടിച്ചിരുന്നു. ഈ കേസിൽ ജയിൽമോചിതനായ കൊല്ലം കൊട്ടാരക്കര ചെമ്മങ്ങനാട് സ്വദേശി റഫീഖിനെ (സതീഷ് 45) പോലീസ് പിടികൂടിയിരുന്നു. കുമാരപുരത്ത് തുടർച്ചയായി ഉണ്ടാകുന്ന മോഷണങ്ങൾ തടയുന്നതിന് പോലീസ് ജാഗ്രത പാലിക്കണമെന്നും രാത്രികാല പരിശോധന ശക്തമാക്കണമെന്നും നാട്ടുകാർ ആവശ്യപ്പെട്ടു.

കോന്നിയിൽ ബൈക്കിൽ കാറിടിച്ച് അപകടം: രണ്ടു മാധ്യമപ്രവർത്തകർക്കു പരിക്ക്

ചെങ്ങന്നൂർ: കോന്നിയിലെ പാറമടയുടെ പ്രവർത്തനം നിർത്തണമെന്നാവശ്യപ്പെട്ട് പാറമടയ്ക്കു മുന്നിൽ നടന്ന ധർണയുടെ വാർത്ത ശേഖരിച്ച് ചെങ്ങന്നൂരിലേക്കു മടങ്ങുകയായിരുന്ന മാധ്യമപ്രവർത്തകർ സഞ്ചരിച്ച ബൈക്കിൽ അമിതവേഗത്തിലെത്തിയ കാറിടിച്ച് രണ്ടു പേർക്ക് ഗുരുതരമായി പരിക്കേറ്റു. എസിവി റിപ്പോർട്ടർ മഞ്ചീഷ് കുമാർ, കേരളവിഷൻ ചാനൽ റിപ്പോർട്ടർ ലിബിൻ എബ്രഹാം എന്നിവർക്കാണ് പരിക്കേറ്റത്. ഇടിയുടെ ആഘാതത്തിൽ ഇരുവരും റോഡരികിലെ കാനയിലേക്കു തെറിച്ചുവീഴുകയായിരുന്നു. വീഴ്ചയിൽ ലിബിനും മഞ്ചീഷിനും കൈക്കും കാലിനും പരിക്കേറ്റു. ലിബിന്‍റെ കാലിനാണ് ഗുരുതരമായ പരിക്ക്. അപകടമുണ്ടാക്കിയ കാർ നിർത്താതെ പോയെങ്കിലും നാട്ടുകാരുടെയും പോലീസിന്‍റെയും സമയോചിതമായ ഇടപെടൽ കാരണം പരിക്കേറ്റവരെ ഉടൻതന്നെ കോന്നി മെഡിക്കൽ കോളജിൽ എത്തിച്ചു. കോന്നി മെഡിക്കൽ കോളജിൽ പ്രാഥമികചികിത്സ നൽകിയ ശേഷം കൂടുതൽ വിദഗ്ധ ചികിത്സയ്ക്കായി ഇരുവരെയും കല്ലിശേരിയിലെ സ്വകാര്യ ആശുപത്രിയിലേക്കു മാറ്റി. സംഭവത്തിന് ശേഷം നിർത്താതെ പോയ കാർ പോലീസ് കസ്റ്റഡിയിലെടുത്തിട്ടുണ്ട്. കോന്നി പോലീസ് കല്ലിശേരിയിലെ ആശുപത്രിയിലെത്തി മാധ്യമപ്രവർത്തകരുടെ മൊഴികൾ രേഖപ്പെടുത്തി. അപകടത്തിനു പിന്നിൽ ഏതെങ്കിലും ഗൂഢാലോചന നടന്നിട്ടുണ്ടോ എന്നും പോലീസ് അന്വേഷിക്കുന്നുണ്ട്.

കൃപാസനം തീര്‍ഥാടനകേന്ദ്രത്തിന്‍റെ മുന്‍വശം മേല്‍പ്പാലവും ബസ്‌ബേയും നിര്‍മിക്കണമെന്ന്

ചേര്‍ത്തല: പതിനായിരക്കണക്കിന് തീര്‍ഥാടകര്‍ ദിവസേന എത്തുന്ന കലവൂര്‍ കൃപാസനം തീര്‍ഥാടന കേന്ദ്രത്തിന്‍റെ മുന്‍വശം ബസ്‌ബേയും ഫുട് ഓവര്‍ബ്രിഡ്ജും നിര്‍മിക്കണമെന്ന ആവശ്യം ശക്തമാകുന്നു. ഈ ആവശ്യമുന്നയിച്ചു ഹൈബി ഈഡന്‍ എംപി, കെ.ജെ. മാക്‌സി എംഎല്‍എ എന്നിവരുടെ സാന്നിധ്യത്തില്‍ കൃപാസനം ജനറല്‍ മാനേജര്‍ സണ്ണി പരുത്തിയില്‍, പിആര്‍ഒ അഡ്വ.എഡ്വേര്‍ഡ് തുറവൂര്‍, കെആര്‍എല്‍സിസി എക്‌സിക്യൂട്ടീവംഗം പി.ആര്‍. കുഞ്ഞച്ചന്‍, അഡ്വ. റോണി മായിത്തറ തുടങ്ങിയവര്‍ ചേര്‍ന്ന് കേന്ദ്രമന്ത്രി ജോര്‍ജ് കുര്യന് നിവേദനം നല്കി. കൃപാസനത്തില്‍ വരുന്ന ഭക്തജനങ്ങള്‍ക്ക് സുതാര്യമായി യാത്രചെയ്യുന്നതിനും കൃപാസനം പ്രത്യക്ഷീകരണ മാതാ സന്നിധിയില്‍ വരുന്നതിനും കൃപാസനം ഹെറിറ്റേജ് സ്റ്റഡി സെന്‍റര്‍ സന്ദര്‍ശിക്കുന്നതിനും ബസ്‌ബേയും ഡിപിആറില്‍ നിര്‍ദേശിക്കപ്പെട്ടിട്ടുള്ള ഫുട് ഓവര്‍ബ്രിഡ്ജും ദീര്‍ഘകാലമായി നിലകൊള്ളുന്ന ബസ് സ്‌റ്റോപ്പും ദേശീയപാതയുടെ പൂര്‍ത്തീകരണത്തോടനുബന്ധിച്ച് സ്ഥാപിക്കണമെന്ന് നിവേദനത്തില്‍ ആവശ്യപ്പെട്ടു.

വണ്ടാനം മെഡിക്കൽ കോളജാശുപത്രിയിൽ ഹൈഡ്രോളിക് സ്ട്രെക്ചറുകൾ കാഴ്ചവസ്തു

അമ്പലപ്പുഴ: വണ്ടാനം മെഡിക്കൽ കോളജ് ആശുപത്രിയിൽ ഹൈഡ്രോളിക് സ്ട്രെക്ചറുകൾ കാഴ്ച വസ്തുക്കളായി മാറുന്നു. അധികൃതർ തിരിഞ്ഞുനോക്കുന്നില്ല. പതിനായിരക്കണക്കിന് രൂപ വിലയുള്ള ഇത്തരം സ്ട്രെക്ച്ചറുകൾ നിസാര തകരാറ് സംഭവിക്കുമ്പോൾത്തന്നെ ആശുപത്രിയുടെ മൂലയിൽ തട്ടുകയാണ്. അത്യാസന്നനിലയിലായ രോഗികൾക്ക് ഡ്രിപ്പിടാനും ആവശ്യാനുസരണം ഉയർത്താനും താഴ്ത്താനും സൗകര്യമുള്ള ഹൈഡ്രോളിക് സ്ട്രെക്ചറുകൾ ആശുപത്രിയിൽ നിരവധിയുണ്ട്. എന്നാൽ, ആശുപത്രിയിലെത്തുന്ന സാധാരണ രോഗികൾക്ക് പ്രയോജനമാകുന്ന തരത്തിൽ ഉപയോഗപ്പെടുത്താൻ അധികൃതരും ജീവനക്കാരും തയാറായിട്ടില്ല. നിസാര തകരാറ് സംഭവിക്കുന്ന ഇത്തരം സ്ട്രെക്ചറുകളുടെ തകരാറ് പരിഹരിക്കുന്നതിനു പകരം ഇവ നീക്കംചെയ്ത് പുതിയത് വാങ്ങാനാണ് ആശുപത്രി അധികൃതർക്ക് താത്പര്യം. സൂപ്രണ്ട് ഉൾപ്പെടെയുള്ളവർ ഇതു പരിഹരിക്കാൻ ഇടപെടാറില്ല. പുതിയവ വാങ്ങുന്നതിലെ കമ്മീഷനിലാണ് അധികൃതരുടെ കണ്ണ്. തകരാറ് സംഭവിക്കുന്ന വില കൂടിയ ഇത്തരം സ്ട്രക്ചറുകൾ പിന്നീട് ആക്രിവിലയ്ക്ക് കൊടുക്കുകയാണ് പതിവ്.

വിദ്യാർഥിനിയുടെ മരണം: കളക്ടർ എത്തി

മാന്നാർ: ചെന്നിത്തല നവോദയ വിദ്യാലയത്തിലെ വിദ്യാർഥിനിയുടെ മരണവുമായി ബന്ധപ്പെട്ട് ചെയർമാൻ കൂടിയായ ജില്ലാ കളക്ടർ അലക്സ് വർഗീസ് സ്കൂളിൽ എത്തി. വിദ്യാർഥികൾ, രക്ഷകർത്താക്കൾ, അധ്യാപകർ എന്നിവരുടെ യോഗം പ്രത്യേകം ചേർന്ന് കാര്യങ്ങൾ ചോദിച്ചു മനസിലാക്കി. വിദ്യാർഥികളുടെയും രക്ഷാകർത്താക്കളുടെയും ആശങ്കകൾ കളക്ടറോടു പറഞ്ഞു. ഇവരുടെയെല്ലാം പ്രതിനിധികളുടെ പ്രത്യേക യോഗം ചേർന്നു. അനുശോചനത്തോടെ ആരംഭിച്ച യോഗത്തിൽ ചെങ്ങന്നൂർ ആർഡിഒ ഡി.സി. ദിലീപ് കുമാർ, നവോദയ വിദ്യാലയ സമിതി ഹൈദരാബാദ് റീജിയൻ അസിസ്റ്റന്‍റ് കമ്മീഷണർ സി. രാമകൃഷ്ണൻ, മാവേലിക്കര തഹസീൽദാർ അനീഷ് ഈപ്പൻ, ഡെപ്യൂട്ടി തഹസീൽദാർ കെ. സുരേഷ് ബാബു, എംപിയുടെ പ്രതിനിധി ബിനു സി. വർഗീസ് തുടങ്ങിയവർ യോഗത്തിൽ പങ്കെടുത്തു. സ്കൂളിൽ സ്ഥിരമായി കൗൺസിലർമാരെ നിയമിക്കാനും അധ്യാപകർക്കും മാതാപിതാക്കൾക്കും വിദ്യാർഥികൾക്കുമായി പ്രത്യേകം പ്രത്യേകമായി കൗൺസലിംഗ് ഏർപ്പെടുത്താനും മെഡിറ്റേഷൻ, യോഗ തുടങ്ങിയവ കുട്ടികൾക്കും ഉറപ്പാക്കാനും യോഗം തീരുമാനിച്ചു. വിദ്യാർഥികൾക്ക് മാതാപിതാക്കളുമായി കൂടുതൽ ദിവസം ഫോണിൽ സംസാരിക്കാൻ അവസരം നൽകണമെന്ന് കലക്ടർ നിർദേശിച്ചു. വിവിധ യോഗങ്ങളിൽ പങ്കെടുത്ത് നാലു മണിക്കൂറോളം കാന്പസിൽ ചെലവഴിച്ചാണ് കളക്ടർ മടങ്ങിയത്.

അഞ്ചുവയസുകാരനെ ഉപദ്രവിച്ചു പരിക്കേല്‍പ്പിച്ചതായി പരാതി

ചേര്‍ത്തല: അഞ്ചുവയസുകാരനെ അമ്മയും അമ്മൂ മ്മയും ചേര്‍ന്ന് ഉപദ്രവിച്ചു പരിക്കേല്‍പ്പിച്ചതായി പരാതി. നഗരസഭ 15ാം വാര്‍ഡിലാണ് സംഭവം. കുട്ടിയുടെ മൊഴിയുടെ അടിസ്ഥാനത്തില്‍ ചൈല്‍ഡ് ലൈന്‍ പ്രവര്‍ത്തകര്‍ ഇടപെടുകയും തുടര്‍ന്ന് പോലീസ് കേസെടുക്കുകയും ചെയ്തു. കുട്ടിയെ ശിശുക്ഷേമ സമിതി ഏറ്റെടുക്കാനും നടപടിയായി. നഗരത്തിലെ പ്രധാന സ്കൂളിലെ യുകെജി വിദ്യാർഥിയായ അഞ്ചുവയസുകാരനെ മുഖത്തും കഴുത്തിനും മുറിവേറ്റ നിലയിൽ കോടതിക്കവലയ്ക്കു സമീപമുള്ള ചായക്കടയിൽ കണ്ടെത്തിയത്. ഇതുവഴി വന്ന പിടിഎ പ്രസിഡന്‍റ് അഡ്വ. ദിനൂപിന്‍റെ ശ്രദ്ധയിൽപ്പെട്ടതോടെയാണ് സംഭവം പുറത്താകുന്നത്. മുഖത്തും കഴുത്തിലെയും മുറിവ് അമ്മ സ്കെയിലിന് അടിച്ചതാണെന്നും അമ്മൂമ്മയും തന്നെ ഉപദ്രവിക്കാറുണ്ടെന്നും കുട്ടി ദിനൂപിനോടു പറഞ്ഞു. കഴിഞ്ഞ മേയ് 24ന് അമ്മയുടെ ആൺസുഹൃത്ത് ഈ കുട്ടിയെ ഉപദ്രവിച്ച കേസിൽ അറസ്റ്റ് ചെയ്യപ്പെട്ടിരുന്നു. തുടർന്ന് റിമാൻഡിലിരിക്കേ ഇയാളെ ആശുപത്രിയിൽ മരിച്ചനിലയിൽ കണ്ടെത്തുകയും ചെയ്തു. പിന്നീട് പിടിഎ ഭാരവാഹികളുടെ നിരീക്ഷണം കുട്ടിക്കുണ്ടായിരുന്നു. ലോട്ടറിവിൽപ്പനയ്ക്കു പോകുമ്പോൾ കുട്ടിയെ ചായക്കടയിൽ ഇരുത്തിയശേഷമാണ് മാതാവ് സ്ഥിരമായി പോകുന്നത്. വ്യാഴാഴ്ച വൈകിട്ട് ദിനൂപാണ് കുട്ടി ചായക്കടയിൽ ഇരിക്കുന്നത് കണ്ടത്. തുടർന്നുള്ള അന്വഷണത്തിലാണ് ദിവസങ്ങളായി കുട്ടി ക്രൂരമർദനത്തിന് ഇരയായതെന്ന് കണ്ടെത്തിയത്. തുടർന്ന് ചേർത്തല പോലീസിലും ജില്ലാ ചൈൽഡ് പ്രൊട്ടക്‌ഷൻ യൂണിറ്റിലും പരാതി നൽകി. ഇതിന്‍റെ അടിസ്ഥാനത്തിൽ ജില്ലാ ചൈൽഡ് പ്രൊട്ടക്‌ഷൻ യൂണിറ്റ് സൂപ്പർ വൈസർ അലൻ വർഗീസ് കുട്ടിയെ ഏറ്റെടുക്കുകയും ചേർത്തല താലൂക്കാശുപത്രിയിൽ വൈദ്യ പരിശോധനയ്ക്കു വിധേയനാക്കുകയും ചെയ്തു. പരിശോധനയിൽ മർദനത്തിന്‍റെ പാടുകൾ കണ്ടെത്തിയതായി അലൻ വർഗീസ് പറഞ്ഞു. അലൻ വർഗീസ് ചേർത്തല പോലീസ് സ്റ്റേഷനിൽ എത്തി റിപ്പോർട്ട് നൽകിയതിന്‍റെ അടിസ്ഥാനത്തിൽ പോലീസ് കേസെടുത്തു. തുടർന്ന് കുട്ടിയെ ആലപ്പുഴ ശിശുസംരക്ഷണ കേന്ദ്രത്തിൽ ഏൽപ്പിച്ചു.

വയോധികയ്ക്കു നേരേ തെരുവുനായ ആക്രമണം

കായംകുളം: കരീലക്കുളങ്ങര ജംഗ്ഷനു പടിഞ്ഞാറുഭാഗത്ത് പാതയോരത്തുകൂടി നടന്നുപോയ വയോധികയ്ക്കു നേരേ തെരുവുനായ ആക്രമണം. കരീലക്കുളങ്ങര മലമേൽഭാഗം സിറിൽഭവനത്തിൽ ദേവകിയമ്മ(85)യെയാണ് തെരുവുനായ ക്രൂരമായി ആക്രമിച്ചത്. കടിയേറ്റ് റോഡിൽവീണ വയോധിക നിലവിളിച്ചതിനെത്തുടർന്നാണ് നാട്ടുകാർ ഓടിയെത്തിയത്. കഴിഞ്ഞ ദിവസം ഉച്ചയ്ക്ക് ഒരുമണിയോടെ മല്ലിക്കാട്ടുകടവ് റോഡിലാണ് സംഭവം. കടിയേറ്റ് റോഡിൽ വീണ ദേവകിയമ്മയെ തെരുവുനായ കടിച്ചുകീറി . കൈക്കും കാലിനും പരിക്കേറ്റ ദേവകിയമ്മയെ ആലപ്പുഴ വണ്ടാനം മെഡിക്കൽ കോളജിൽ പ്രവേശിപ്പിച്ചു ‌.

അരക്കിലോ കഞ്ചാവുമായി യുവാവ് പിടിയില്‍

ചേര്‍ത്തല: കഞ്ചാവു വില്‍പ്പന നടത്തുന്നുവെന്ന പരാതിയെത്തുടര്‍ന്ന് എക്‌സൈസ് സംഘം നടത്തിയ പരിശോധനയില്‍ 504 ഗ്രാം കഞ്ചാവുമായി യുവാവ് പിടിയില്‍. കഞ്ഞിക്കുഴി ഗ്രാമപഞ്ചായത്ത് 15ാം വാര്‍ഡ് കളത്തിവീട് വനസ്വര്‍ഗം മുത്തുവിലാസം വീട്ടില്‍ അജിത്കുമാറാണ് (30) പിടിയിലായത്. ചേര്‍ത്തല എക്‌സൈസ് റേഞ്ച് ഇന്‍സ്പക്ടര്‍ പി.എം. സുമേഷിന്‍റെ നേതൃത്വത്തിലായിരുന്നു പരിശോധന. കഞ്ഞിക്കുഴി, കളത്തിവീട്, വനസ്വര്‍ഗം ഭാഗത്ത് യുവാക്കള്‍ക്കു വ്യാപകമായി കഞ്ചാവു വില്‍പന നടത്തുന്നതായ പരാതിയുടെ അടിസ്ഥാനത്തിലായിരുന്നു പരിശോധന. അജിത്കുമാര്‍ ഇതിനുമുമ്പും കഞ്ചാവുകേസില്‍ പിടിയിലായിട്ടുണ്ടെന്ന് എക്‌സൈസ് അധികൃതര്‍ പറഞ്ഞു. ഇയാള്‍ക്കെതിരേ എന്‍ഡിപിഎസ് ആക്ട് പ്രകാരം കേസെടുത്തു. ഇയാളില്‍നിന്നു കഞ്ചാവു വാങ്ങിയവരുടെ വിവരങ്ങള്‍ ശേഖരിച്ചുവരികയാണ്.

ക്ഷേമ സ്ഥാപങ്ങളില്‍നിന്ന് വിജയികളായ കുട്ടികളുടെ തുടര്‍ പഠനം സര്‍ക്കാര്‍ ഏറ്റെടുക്കണം: ഫാ. ലിജോ ചിറ്റിലപ്പള്ളി

ആലപ്പുഴ: ജില്ലയിലെ കുട്ടികളുടെ ക്ഷേമസ്ഥാപനങ്ങളില്‍ കഴിഞ്ഞ പൊതു പരീക്ഷയില്‍ വിജയികളായ മുഴുവന്‍ കുട്ടികളുടെയും തുടര്‍ പഠനച്ചെലവ് സര്‍ക്കാര്‍ ഏറ്റെടുക്കണമെന്ന് ഓര്‍ഫനേജ് അസോസിയേഷന്‍ സംസ്ഥാന പ്രസിഡന്‍റ് ഫാ. ലിജോ ചിറ്റിലപ്പള്ളി ആവശ്യപ്പെട്ടു. ജില്ലാ ഓര്‍ഫനേജ് അസോസിയേഷന്‍റെ നേതൃത്വത്തില്‍ ജില്ലയിലെ കുട്ടികളുടെ ക്ഷേമ സ്ഥാപനങ്ങളില്‍നിന്ന് എസ്എസ്എല്‍സി, പ്ലസ് ടു വിജയികളായ കുട്ടികളെ അനുമോദിക്കുന്ന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. വിവിധ സെന്‍ററുകളില്‍നന്ന് അമ്പതോളം വിദ്യാര്‍ഥികൾ പങ്കെടുത്തു. വിദ്യാര്‍ഥികള്‍ക്ക് കാഷ് അവാര്‍ഡും മെമന്‍റോയും സമ്മാനിച്ചു. അസോസിയേഷന്‍ ജില്ലാ പ്രസിഡന്‍റ് ഫാ. മൈക്കിള്‍ കുന്നേല്‍ അധ്യക്ഷത വഹിച്ചു. ജനറല്‍ സെക്രട്ടറി മുഹമ്മദ് ഷമീര്‍ ഗാന്ധിഭവന്‍, വൈസ് പ്രസിഡന്‍റുമാരായ ഫാ. സാനു ജോര്‍ജ്, സിസ്റ്റര്‍ അനുപമ, ജോയിന്‍റ് സെക്രട്ടറിമാരായ ബിനോയി തങ്കച്ചന്‍, സിസ്റ്റര്‍ മോളി, ജോണിക്കുട്ടി തുരുത്തേല്‍, ജി. രവീന്ദ്രന്‍പിള്ള, നിധിന്‍ എ.എസ്., എ.കെ. ഗോപിക്കുട്ടന്‍, ട്രഷറര്‍ മധു പോള്‍ എന്നിവര്‍ പ്രസംഗിച്ചു.

റോഡരികിൽ മാലിന്യം തള്ളൽ; കാടിറങ്ങി കാട്ടുപന്നികള്‍

ചാരുംമൂട്: കെപി റോഡിന്‍റെ വശങ്ങള്‍ കാട്ടുപന്നികളുടെ വാസസ്ഥലമായി മാറുന്നു. കായംകുളം-പുനലൂര്‍ റോഡിന്‍റെ വശങ്ങളിലെ കൊടുംകാടുകളാണ് സാനിറ്റോറിയം വളപ്പിലെത്തുന്ന കാട്ടുപന്നികളുടെ വാസസ്ഥലം. കഴിഞ്ഞദിവസം രാത്രി റോഡരികിലെ കാടുകളില്‍നിന്ന് കാട്ടുപന്നികള്‍ നിരനിരയായി ഇറങ്ങി സാനിറ്റോറിയം വളപ്പില്‍ ചെന്നതായും കൃഷി നശിപ്പിച്ചതായും പറയുന്നു. മിക്ക ദിവസങ്ങളിലും രാത്രി 12നുശേഷം റോഡിലൂടെ കാട്ടുപന്നികള്‍ വരിവരിയായി നടക്കുന്നത് യാത്രക്കാര്‍ കാണാറുണ്ട്. പറയംകുളം ജംഗ്ഷന് കിഴക്കുവശം മുതല്‍ ഐടിബിപി ജംഗ്ഷന് ഇപ്പുറം വരെയും പരസ്പരം കാണാന്‍ കഴിയാത്ത രീതിയിലുള്ള കൊടുംകാടുകളാണ്. രാത്രി കെപി റോഡിലൂടെ പോകുന്നവര്‍ക്ക് ഈ ഭാഗത്ത് എത്തുമ്പോള്‍ ഭയമാണ്. പലപ്പോഴും കാട്ടുപന്നികള്‍ കാറുകളുടെയും ഇരുചക്രവാഹനങ്ങളുടെയും മുന്നില്‍ ചാടിയിട്ടുണ്ട്. ഇതരസ്ഥലങ്ങളില്‍നിന്നു രാത്രി വാഹനത്തില്‍ മാലിന്യങ്ങള്‍ കാട്ടില്‍കൊണ്ടുവന്ന് തള്ളാറുണ്ട്. കാട്ടുപന്നികള്‍ക്ക് ആഹാരമായി ഇത് ലഭിക്കുന്നുണ്ട്. താമരക്കുളം പഞ്ചായത്ത് പരിധിയിലാണ് റോഡിന്‍റെ വശങ്ങളില്‍ കാടുള്ളത്. പൊതുമരാമത്ത് വകുപ്പും ഇത് ശ്രദ്ധിക്കാറില്ല. എട്ടുവര്‍ഷം മുന്‍പ് സാനിറ്റോറിയത്തിന്‍റെ മുന്‍വശം കെപി റോഡിന്‍റെ വശത്ത് ജനങ്ങള്‍ക്ക് വിശ്രമിക്കാനായി പാര്‍ക്ക് നിര്‍മിക്കാന്‍ ഭരണിക്കാവ് ബ്ലോക്ക് പഞ്ചായത്ത് തീരുമാനിച്ചിരുന്നു. പാര്‍ക്ക് നിര്‍മാണത്തിനാവശ്യമായ തുക എംഎല്‍എ ഫണ്ടില്‍നിന്ന് നല്‍കാനായിരുന്നു തീരുമാനം. റോഡിന്‍റെ വശങ്ങള്‍ അളന്ന് തിട്ടപ്പെടുത്തിയെങ്കിലും പാര്‍ക്ക് നിര്‍മാണം നടന്നില്ല. മത്സ്യവ്യാപാരത്തിനുശേഷം ഉപയോഗ ശൂന്യമായ പെട്ടികളും റോഡിന്‍റെ വശങ്ങളില്‍ തള്ളിയിരിക്കുകയാണ്. സമീപ പ്രദേശം ഉള്‍പ്പെടെയുള്ളിടത്ത് എന്ത് മാലിന്യം ഉണ്ടെങ്കിലും ഏതുതരം മാലിന്യമായാലും എല്ലാം തള്ളുന്നത് കെപി റോഡിനു സമീപത്തെ കാടുകളിലും റോഡിന്‍റെ വശങ്ങളിലുമാണ്. പൊതുമരാമത്ത് വകുപ്പും പഞ്ചായത്തും ബ്ലോക്ക് പഞ്ചായത്തും മുന്‍കൈയെടുത്ത് കാടുകള്‍ തെളിക്കണം എന്നാണ് ജനങ്ങളുടെ ആവശ്യം. ചാരുംമൂട് മാലിന്യം തള്ളുന്നവരെ കണ്ടെത്താന്‍ സ്ഥാപിച്ച കെപി റോഡിലെ കാമറകള്‍ നോക്കുകുത്തികളായി. അഞ്ചു വര്‍ഷം മുന്‍പ് ഭരണിക്കാവ് ബ്ലോക്ക് പഞ്ചായത്ത് കെപി റോഡില്‍ സാനിറ്റോറിയത്തിന്‍റെ റോഡ് വശങ്ങളിലും ചാരുംമൂടിന്‍റെ വിവിധ ഭാഗങ്ങളിലും മാലിന്യം തള്ളുന്നവരെ കണ്ടെത്താന്‍ ഭരണിക്കാവ് ബ്ലോക്ക് പഞ്ചായത്ത് സ്ഥാപിച്ച സിസി കാമറകളാണ് നോക്കുകുത്തികളായത്. ഐടിബിപി ജംഗ്ഷന്‍ മുതല്‍ കെപി റോഡില്‍ പാലൂത്തറ വരെയും കൊല്ലം-തേനി ദേശീയപാതയില്‍ ഭരണിക്കാവ് ബ്ലോക്ക് പഞ്ചായത്ത് മുതല്‍ ഫെഡറല്‍ ബാങ്കിനു സമീപം വരെയുമാണ് മാലിന്യം തള്ളുന്നത് കണ്ടെത്താന്‍ കാമറാകള്‍ സ്ഥാപിച്ചത്. ഇതോടൊപ്പം തന്നെ ഇരു റോഡുകളിലും പ്ലാസ്റ്റിക് മാലിന്യക്കൂടകള്‍ സ്ഥാപിച്ചിരുന്നു. എന്നാല്‍, ഇത് കാണാത്ത രീതിയിലാണ് ഇറച്ചി മാലിന്യങ്ങള്‍ ഉള്‍പ്പെടെയുള്ളവ ചാക്കുകളില്‍ കെട്ടി രാത്രി അതിനു വെളിയില്‍ തള്ളിയത്. ഇത് നീക്കം ചെയ്യുന്നതിനായി പിന്നീട് പതിനായിരക്കണക്കിന് രൂപ ചെലവായി.

പരിശീലകൻ മാത്യു ഡിക്രൂസിന്‍റെ മൃതദേഹത്തോടൊപ്പം ബാസ്‌കറ്റ്ബോളും അടക്കം ചെയ്തു

ആലപ്പുഴ: അന്തരിച്ച പ്രമുഖ ബാസ്‌കറ്റ്ബോൾ പരിശീലകൻ മാത്യു ഡിക്രൂസിന്‍റെ മൃതദേഹത്തോടൊപ്പം അദ്ദേഹത്തിന്‍റെ ആഗ്രഹപ്രകാരം ഏറ്റവും പ്രിയപ്പെട്ട ബാസ്‌കറ്റ്ബോളും കല്ലറയിൽ അടക്കം ചെയ്തു. സഹപ്രവർത്തകരും പരിശീലിക്കപ്പെട്ട കുട്ടികളും ചേർന്നാണ് ആഗ്രഹം സഫലീകരിച്ചത്. സിഎസ്ഐ ചർച്ചിൽ മൃതദേഹം സംസ്കരിച്ചു. രാജ്യാന്തര താരങ്ങളെ വളർത്തിയെടുത്ത കഴിവുറ്റ പരിശീലകനായിരുന്നു മാത്യു ഡിക്രൂസ്. ബാസ്കറ്റ്ബോൾ പരിശീലകൻ മാത്യു ഡിക്രൂസിന്‍റെ നിര്യാണത്തിൽ ആലപ്പി ഡിസ്ട്രിക്റ്റ് ബാസ്കറ്റ്ബോൾ അസോസിയേഷൻ (എഡിബിഎ) അനുശോചിച്ചു. പ്രസിഡന്‍റ് റോണി മാത്യു അധ്യക്ഷത വഹിച്ചു. സെക്രട്ടറി ജോൺ ജോർജ് അനുശോചനപ്രമേയം അവതരിപ്പിച്ചു.

ശ്രീകൃഷ്ണസ്വാമി ക്ഷേത്രാങ്കണത്തിൽ അഞ്ചുകോടിയുടെ അമിനിറ്റി സെന്‍റർ

അന്പലപ്പുഴ: ശ്രീകൃഷ്ണസ്വമി ക്ഷേത്രാങ്കണത്തിൽ ഒരുങ്ങുന്ന അഞ്ചുകോടി രൂപ ചെലവിൽ അമിനിറ്റി സെന്‍റർ. രണ്ടു നിലകളിലായി 17,300-സ്ക്വയർ ഫീറ്റിൽ പൂർത്തിയാക്കുന്ന സെന്‍ററിന്‍റെ താഴത്തെ നിലയിൽ 9 ഡീലക്സ് മുറികളും ഒരു സ്യൂട്ട് മുറിയും മുകൾനിലയിൽ 11 ഡീലക്സ് മുറികളും ഒരു സ്യൂട്ട് മുറിയുമാണ് ഉണ്ടാകുക. വിശാലമായ പാർക്കിംഗ് സൗകര്യത്തിനു പുറമേ സ്ത്രീകൾക്കും പുരുഷന്മാർക്കുമായ പ്രത്യേക ഡോർമെറ്ററികളും സ്റ്റോറേജും ശുചിമുറി സംവിധാനവുമുണ്ടാകും. അമ്പലപ്പുഴ ക്ഷേത്രത്തിൽ ദർശനത്തിന് ദൂരദേശത്തുനിന്ന് എത്തുന്നവർക്കുൾപ്പെടെ മെച്ചപ്പെട്ട സുഖസൗകര്യങ്ങളോടെ താമസസൗകര്യമൊരുക്കുന്നതിന്‍റെ ഭാഗമായാണ് അമിനിറ്റി സെന്‍റർ ഒരുക്കുന്നത്. ക്ഷേത്രത്തിന്‍റെ തെക്ക് പടിഞ്ഞാറെ ഭാഗത്ത് നിലവിൽ സ്ഥിതിചെയ്യുന്ന ദേവസ്വം സത്രം പൊളിച്ചുനീക്കിയാകും സെന്‍റർ നിർമിക്കുക. 40 വർഷം പഴക്കമുള്ള സത്രം കാലപ്പഴക്കം കൊണ്ട് താമസയോഗ്യമല്ലാതായതോടെ കഴിഞ്ഞ രണ്ടുവർഷമായി ഇതു ഭാഗികമായാണ് പ്രവർത്തിക്കുന്നത്. ഇതിനാൽ മറ്റു നാടുകളിൽനിന്ന് ക്ഷേത്രദർശനത്തിനെത്തുന്നവർ സ്വകാര്യ ലോഡ്ജുകളെയാണ് ആശ്രയിക്കുന്നത്. വിഷയം ശ്രദ്ധയിൽപ്പെട്ടതിനെത്തുടർന്നാണ് എച്ച്. സലാം, പൊതുമരാമത്തു മന്ത്രി മുഹമ്മദ് റിയാസുമായി ബന്ധപ്പെട്ട് അമിനിറ്റി സെന്‍ററിന് പണം അനുവദിപ്പിച്ചത്. അമിനിറ്റി സെന്‍ററിനു പുറമേ ക്ഷേത്രത്തിലെ ഉത്സവാഘോഷങ്ങളുടെ ഭാഗമായുള്ള കലാപരിപാടികൾ അരങ്ങേറുന്ന സ്റ്റേജും ഇതിനോടനുബന്ധിച്ച് ഓപ്പൺ എയർ ഓഡിറ്റോറിയവും പുനർനിർമിക്കും. അഞ്ചു കോടിക്കു പുറമേ ബജറ്റ് ഫണ്ടിൽനിന്നും ഒരുകോടി രൂപയാണ് ഇതിനായി അനുവദിച്ചത്. പൊതുമരാമത്ത് വകുപ്പിൽനിന്നും അനുവദിച്ച അഞ്ചു കോടി രൂപ ഉപയോഗിച്ചുള്ള കെട്ടിടത്തിന്‍റെ നിർമാണച്ചുമതല കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്‍റ് കോർപറേഷന് (കിഡ്ക്) ആണ്. ഇവയുടെ നിർമാണപ്രവർത്തനവുമായി ബന്ധപ്പെട്ട് ദേവസ്വം ബോർഡംഗം അഡ്വ. എ. അജിത് കുമാറിന്‍റെ അധ്യക്ഷതയിൽ എംഎൽഎ യോഗം വിളിച്ചുചേർത്തു. പഞ്ചായത്ത് പ്രസിഡന്‍റ് ശോഭ ബാലൻ, അംഗങ്ങളായ സുഷമ രാജീവ്, വവിത, ദേവസ്വം അസി. കമ്മീഷണർ എം. എം. നിഖിൽലാൽ, അഡ്മിനിസ്ട്രേറ്റീവ് ഓഫീസർ അജിത്ത് എന്നിവർ പങ്കെടുത്തു.

കൊല്ലം-തേനി ദേശീയപാത വികസനം; പാതയോര നിർമാണങ്ങൾക്ക് നിയന്ത്രണം

ചാരുംമൂട്: കൊല്ലം-തേനി ദേശീയപാത നാലുവരിപ്പാതയാക്കി മാറ്റുന്നതിനായി സ്ഥലം ഏറ്റെടുക്കൽ നടപടികളിലേക്കു കടക്കുന്നതിനാൽ പാതയോരത്തെ പുതിയ നിർമാണങ്ങൾക്ക് ഇനി അനുമതി നൽകരുതെന്ന് വില്ലേജ് ഓഫീസുകൾക്ക് രേഖാമൂലം നിർദേശം നൽകി. അതിനാൽ കൊല്ലം-തേനി ദേശീയപാതയ് ക്കരികിൽ പുതിയ നിർമാണ പ്രവർത്തനങ്ങൾക്ക് ഇനി പെർമിറ്റ് ലഭിക്കില്ല. തദ്ദേശ സ്വയംഭരണ സ്ഥാപനങ്ങൾക്കും ഇതുസംബന്ധമായ നിർദേശം നൽകിക്കഴിഞ്ഞു. ഏറ്റെടുക്കുന്ന സ്ഥലത്തിന്‍റെ വിശദാംശങ്ങൾ ഭൂരാശി പോർട്ടിലിൽ പ്രസിദ്ധീകരിച്ചിട്ട് മൂന്നുമാസമായിട്ടും സ്ഥലം ഏറ്റെടുക്കൽ നടപടികൾ വൈകുകയാണ്. വേണ്ടത്ര ഉദ്യോഗസ്ഥരെ നിയോഗിക്കാത്തതും നടപടികൾ വൈകാൻ കാരണമാകുന്നു. ആലപ്പുഴ ജില്ലയുടെ ചുമതല ദേശീയപാത വിഭാഗം ഹരിപ്പാട് സ്‌പെഷൽ ഡെപ്യൂട്ടി തഹീൽദാർക്കും കൊല്ലം ജില്ലയുടെ ചുമതല കൊല്ലം ദേശീയപാത വിഭാഗം ഡെപ്യൂട്ടി തഹസീൽദാർക്കുമാണ്. എന്നാൽ, ഇവർക്ക് ദേശീയപാത 66ന്‍റെ വികസനപ്രവർത്തനങ്ങൾക്കും ചുമതലകൾ വഹിക്കേണ്ടിവരുന്നതിനാൽ ഇതും മറ്റൊരു പ്രതിസന്ധിയാണ്. സ്ഥലം ഏറ്റെടുക്കൽ നടപടികൾ വേഗത്തിലാക്കണം എന്ന ആവശ്യവുമായി കേന്ദ്ര ഉപരിതല ഗതാഗതവകുപ്പ് മന്ത്രി നിധിൻ ഗഡ്കരിക്ക് കൊടിക്കുന്നിൽ സുരേഷ് എംപി നിവേദനം നൽകിയിരിക്കുകയാണ്. സ്ഥലം ഏറ്റെടുക്കൽ വേഗത്തിലാക്കാൻ റവന്യുവകുപ്പിന് നിർദേശം നൽകണമെന്ന് കാട്ടി മുഖ്യമന്ത്രിക്കും എംപി കത്ത് നൽകി. കൊല്ലം-തേനി ദേശീയപാതയുടെ വികസന പ്രവർത്തനങ്ങൾ വേഗത്തിലാക്കണമെന്ന ആവശ്യവുമായി സംസ്ഥാന സർക്കാരും കേന്ദ്രമന്ത്രിക്ക് കത്ത് നൽകിയിട്ടുണ്ട്. കൊല്ലം ബൈപ്പാസ് മുതൽ-ചെങ്ങന്നൂർ ആഞ്ഞിലിമൂട് വരെ 54 കിലോമീറ്റർ വികസനത്തിന് നിലവിൽ 1993.28 കോടി രൂപയാണ് നിർമാണച്ചെലവായി എസ്റ്റിമേറ്റിലുള്ളത്. എന്നാൽ, ഇത് 2200 കോടി ആയി ഉയർത്തുമെന്നാണ് സൂചന. പൊതുമരാമത്ത് പദ്ധതികളുടെ നിരക്ക് വർധിച്ചതാണ് കാരണം. സംസ്ഥാന റവന്യുവകുപ്പിന് നിർദേശം ലഭിച്ചാൽ കല്ലിടീൽ നടപടികൾ വേഗത്തിലാകും. ദേശീയപാത പൊതുമരാമത്ത് വിഭാഗവും സ്ഥലമേറ്റെടുക്കൽ സംഘവും നേരത്തെ പാത കടന്നുപോകുന്ന സ്ഥലങ്ങളിൽ സംയുക്ത പരിശോധന നടത്തിയിരുന്നു. 24 മീറ്റർ വീതിയിൽ കൊടുംവളവുകൾ നിവർത്തിയും ബ്ലാക്ക് സ്പോട്ടുകൾ ഒഴിവാക്കിയും ഗ്രേഡിംഗ് വർധിപ്പിച്ചുമാണ് ദേശീയപാത 183 യാഥാർഥ്യമാക്കുക. കൊല്ലം, ഭരണിക്കാവ്, വണ്ടിപ്പെരിയാർ, കുമളി, തേനി തുടങ്ങിയ ജംഗ്‌ഷനുകളിലൂടെയാണ് പാത കടന്നുപോവുക. കയറ്റിറക്കങ്ങൾ പരമാവധി ഒഴിവാക്കാൻ നിലവിലുള്ളതിനേക്കാൾ ഉയർത്തിയാകും റോഡ് നിർമിക്കുക. കൊല്ലം കടവൂർ-തേവള്ളി - തൃക്കടവൂർ - അഞ്ചാലുംമൂട്‌ - പെരിനാട് - ഈസ്റ്റ് കല്ലട - ഭരണിക്കാവ് -ചക്കുവള്ളി -ശൂരനാട് നോർത്ത് - ആനയടി - താമരക്കുളം-ചാരുംമൂട്‌ -ചുനക്കര - മാങ്കാംകുഴി -കൊല്ലക്കടവ് ആഞ്ഞിലിമൂട്‌-ചെങ്ങന്നൂർ-പൊൻകുന്നം -കാഞ്ഞിരപ്പള്ളി -മുണ്ടക്കയം -കുട്ടിക്കാനം -വണ്ടിപ്പെരിയാർ-കുമളി വഴിയാണ് റോഡ് തമിഴ്നാട്ടിലേക്ക് പ്രവേശിക്കുക. തുടർന്ന് കമ്പം ഉത്തമപാളയം വഴി തേനിയിൽ എത്തിച്ചേരും.

സമഗ്ര കുട്ടനാട് കുടിവെള്ള പദ്ധതിക്ക് മന്ത്രിസഭ അംഗീകാരം നല്‍കി

എടത്വ: സമഗ്ര കുട്ടനാട് കുടിവെള്ള പദ്ധതിയിലെ മൂന്നു പാക്കേജുകളുടെ പൂര്‍ത്തീകരണത്തിനായി അധികതുക അനുവദിക്കാന്‍ മന്ത്രിസഭാ യോഗം അംഗീകാരം നല്‍കിയതായി തോമസ് കെ. തോമസ് എംഎല്‍എ അറിയിച്ചു. കുടിവെള്ള പദ്ധതിയുടെ രണ്ടാം ഘട്ടത്തിലെ പാക്കേജ് അഞ്ചില്‍ ഉള്‍പ്പെടുന്ന മുട്ടാര്‍, വെളിയനാട്, നീലംപേരൂര്‍ എന്നീ പഞ്ചായത്തുകളില്‍ ഉന്നതതല ജലസംഭരണികളുടെ നിര്‍മാണം, വിതരണ ശൃംഖല സ്ഥാപിക്കല്‍, നിലവിലുള്ള ജലസംഭരണികളുടെ പുനരുദ്ധാരണ പ്രവൃത്തി എന്നിവയ്ക്ക് 52,92,84,964 രൂപയും പാക്കേജ് ഏഴില്‍ രാമങ്കരി, ചമ്പക്കുളം പഞ്ചായത്തിലെ ഓവര്‍ഹെഡ് ടാങ്കിന്‍റെയും വിതരണ ശൃംഖലയുടെയും നിര്‍മാണം, രാമങ്കരി ഓവര്‍ഹെഡ് ടാങ്ക് സൈറ്റില്‍ ഓണ്‍ലൈന്‍ ക്ലോറിന്‍ ബൂസ്റ്റര്‍, നിലവിലുള്ള ഓവര്‍ ഹെഡ് ടാങ്കിന്‍റെ പുനരുദ്ധാരണം, പൈപ്പ് ലൈന്‍ സ്ഥാപിക്കല്‍ എന്നീ പ്രവൃത്തികള്‍ക്ക് 39,33,24,091 രൂപയും കുട്ടനാട് സമഗ്ര കുടിവെള്ള പദ്ധതി രണ്ടാം ഘട്ടത്തില്‍ പാക്കേജ്-ഒന്‍പതില്‍ ഉള്‍പ്പെടുന്ന വീയപുരം പഞ്ചായത്തിലെ ഉന്നതതല ജലസംഭരണിയുടെ നിര്‍മാണം, സ്റ്റാഫ് ക്വാര്‍ട്ടേഴ്‌സ്, എടത്വ ജല അഥോറിറ്റി ഓഫീസ് കെട്ടിടം എന്നിവയുടെ നിര്‍മാണം, പൈപ്പ് ലൈന്‍ സ്ഥാപിക്കല്‍ എന്നീ പ്രവൃത്തിക്ക് 5,90,70,537 രൂപയുമാണ് അനുവദിച്ചത്. പദ്ധതിയുടെ ടെന്‍ഡര്‍ നടപടികള്‍ നേരത്തെ പൂര്‍ത്തിയായിരുന്നു. പുതുക്കിയ റേറ്റിന് അനുസരിച്ച് തുക അനുവദിക്കണമെന്നാവശ്യത്തിനാണ് അംഗീകാരം ലഭിച്ചത്. ഒന്‍പത് പാക്കേജുകളിലായി നടപ്പാക്കുന്ന കുടിവെള്ള പദ്ധതിയുടെ ആദ്യഘട്ടത്തിലുള്ള നിര്‍മാണ പ്രവര്‍ത്തനങ്ങള്‍ അതിവേഗം പുരോഗമിച്ചുവരുന്നതായും രണ്ടാം ഘട്ടത്തിന്‍റെ പ്രവൃത്തികള്‍ ഉടന്‍ ആരംഭിക്കാന്‍ കഴിയുമെന്നും എംഎല്‍എ അറിയിച്ചു.

മുട്ടം റോട്ടറി ക്ലബ്‌ ഭാരവാഹികൾ ചുമതലയേറ്റു

ഹരിപ്പാട്: 2025-26 വർഷത്തെ മുട്ടം റോട്ടറി ക്ലബ്‌ ഭാരവാഹികൾ ചുമതലയേറ്റു. റോട്ടറി ക്ലബ്‌ ഹാളിൽ നടന്ന ചടങ്ങ് റോട്ടറി ഡിസ്ട്രിക്ട് 3211 ഗവർണർ ഇലക്ട് കൃഷ്ണൻ.ജി.നായർ ഉദ്ഘാടനം ചെയ്തു. പ്രസിഡന്‍റായി ഇ.കെ. ചന്ദ്രൻ, സെക്രട്ടറിയായി ജോർജ് വർഗീസ് തരകൻ, ട്രഷററായി പ്രസന്നകുമാർ. വി. തയ്യിൽ എന്നിവരാണ് ചുമതലയേറ്റത്. കെ.പി. അനിൽകുമാർ അധ്യക്ഷത വഹിച്ചു. സോൺ 23 അസിസ്റ്റന്‍റ് ഗവർണർ എബി ജോൺ, ജേക്കബ് വർഗീസ്, സൈമൺ, അരുൺനാഥ്, ആർ.കെ. പ്രകാശ്, ബി. രവികുമാർ, ആർ. ഓമനക്കുട്ടൻ, എസ്. സലികുമാർ, ആർ. രജനീകാന്ത്, ഹരികുമാർ മാടയിൽ, അഡ്വ. ജി. ഷിമുരാജ്, ഗോപകുമാർ മാടയിൽ, ഗിരീഷ്സദാശിവൻ എന്നിവർ പ്രസംഗിച്ചു. പളളിപ്പാട്, ചേപ്പാട്, പത്തിയൂർ പഞ്ചായത്തുകളിലെ ഹരിതകർമ സേനാംഗങ്ങൾക്ക് ഓവർകോട്ട് വിതരണം, ശ്രവണസഹായി വിതരണം തുടങ്ങി നിരവധിപ്രവർത്തനങ്ങൾക്കു തുടക്കം കുറിച്ചു.

അക്ഷരത്തിന്‍റെയും അറിവിന്‍റെയും അങ്കത്തിനിറങ്ങി ഗോപിദാസ്

അന്പലപ്പുഴ: ഗോപിദാസ് വീണ്ടും അക്ഷരത്തിന്‍റെയും അറിവിന്‍റെയും അങ്കത്തിനിറങ്ങി. മധുരം നുണയുന്നതു പോലെ വാർധക്യകാലത്തും പരീക്ഷയെഴുതി, അമ്മയുടെ സ്വപ്നം സാക്ഷാത്കരിക്കാനായി. പുന്നപ്ര പറവൂർ താന്നിപ്പടിച്ചിറയിൽ 79 വയസുകാരൻ ഗോപിദാസാണ് പ്രായത്തിന്‍റെ പരിമിതികളെ വെല്ലുവിളിച്ച് ഹയർ സെക്കൻഡറി തുല്യതാ പരീക്ഷയെഴുതിയത്. സംസ്ഥാനത്തെ ഏറ്റവും മുതിർന്ന പഠിതാവാണ് ഈ മുത്തച്ഛൻ. മകൻ സർക്കാർ ജീവനക്കാരനാകണമെന്നും പത്താം ക്ലാസ് പരീക്ഷ പാസാകണമെന്നുമായിരുന്നു മാതാവ് ഭവാനിയുടെ ആഗ്രഹം. പല കാരണം കൊണ്ട് അമ്മയുടെ ഈ രണ്ട് ആഗ്രഹവും പൂവണിയിക്കാൻ കഴിഞ്ഞില്ല. കുടുംബം പുലർത്താനായി പിന്നീട് കയർത്തൊഴിലാളിയായി. ഇതിനിടയിൽ മാതാവും മരണപ്പെട്ടു. എങ്കിലും പ്രിയപ്പെട്ട അമ്മയുടെ സ്വപ്നം യാഥാർഥ്യമാക്കാൻ ഗോപിദാസ് ഏഴാം ക്ലാസ് തുല്യതാ പരീക്ഷയെഴുതി. ഇതിൽ മികച്ച വിജയം നേടിയപ്പോൾ തുടർന്ന് പത്താം ക്ലാസ് തുല്യതാ പരീക്ഷയുമെഴുതി. നാലു വിഷയത്തിന് എ പ്ലസും മറ്റ് വിഷയങ്ങൾക്ക് എയും ലഭിച്ചു. അതിനേക്കാൾ മികച്ച വിജയം നേടുമെന്ന ആത്മവിശ്വാസമാണ് ഇത്തവണയുള്ളത്. വിവിധ ദിവസങ്ങളിലായി ആറു പരീക്ഷയാണ് എഴുതുന്നത്. ആദ്യ ദിവസം മലയാളമായിരുന്നു. ഞായറാഴ്ച മാത്രമാണ് അമ്പലപ്പുഴ കെ.കെ. കുഞ്ചുപിള്ള മെമ്മോറിയൽ സ്കൂളിൽ ക്ലാസുള്ളത്. മുടങ്ങാതെ ഈ ക്ലാസുകളിലെത്തുമായിരുന്നു. കൊച്ചുമക്കൾക്കൊപ്പം വാർധക്യം വീട്ടിലിരുന്ന് ആസ്വദിക്കുമ്പോഴും പഠനത്തിനും ഏറെ സമയം കണ്ടെത്തും. ഹയർ സെക്കൻഡറി തുല്യതാ എട്ടാം ബാച്ച് പഠിതാവാണ് ഈ മുത്തച്ഛൻ. പഠിക്കുന്ന സ്കൂളിൽത്തന്നെയാണ് പരീക്ഷയും. പ്രായവും അവശതയുമൊന്നും തന്‍റെ പഠനത്തിന് തടസമല്ലെന്ന് വീണ്ടും തെളിയിച്ചിരിക്കുകയാണ് ഗോപി ദാസ് എന്ന പഠിതാവ്. ആദ്യ ദിവസം പരീക്ഷ കഴിഞ്ഞിറങ്ങിയ ഗോപി ദാസിനെ എച്ച്. സലാം എംഎൽഎ പൊന്നാടയണിയിച്ച് ആദരിച്ചു.

എസി റോഡില്‍ നാളെമുതല്‍ ഗതാഗതനിയന്ത്രണം

ആലപ്പുഴ: എസി റോഡില്‍ പുതിയ പള്ളാത്തുരുത്തി പാലത്തിന്‍റെ ആര്‍ച്ച് കോണ്‍ക്രീറ്റിംഗ് പ്രവൃത്തികള്‍ നടക്കുന്നതിനാല്‍ 12 ശനിയാഴ്ച രാവിലെ 10 മുതല്‍ 13 ഞായറാഴ്ച രാവിലെ ആറു വരെ എസി റോഡിലൂടെയുള്ള ഗതാഗതത്തിന് നിയന്ത്രണമേര്‍പ്പെടുത്താന്‍ തീരുമാനം. കളക്‌ടറേറ്റില്‍ ചേര്‍ന്ന എസി റോഡ് നിര്‍മാണവുമായി ബന്ധപ്പെട്ട ഉദ്യോഗസ്ഥരുടെ യോഗത്തിലാണ് തീരുമാനം എടുത്തത്. കോട്ടയം- ചങ്ങനാശേരിയില്‍നിന്ന് ആലപ്പുഴയിലേക്ക് വരുന്ന ഭാരവാഹനങ്ങള്‍ തിരുവല്ല വഴി തിരുവല്ല -അമ്പലപ്പുഴ റോഡിലൂടെ ദേശീയപാതയില്‍ എത്തിച്ചേരണം. കോട്ടയം- ചങ്ങനാശേരിയില്‍നിന്നു വരുന്ന ചെറുവാഹനങ്ങള്‍ എസി റോഡിലൂടെ സഞ്ചരിച്ച് മങ്കൊമ്പ് ജംഗ്ഷനില്‍നിന്ന് ചമ്പക്കുളം ഭാഗത്തേക്ക് തിരിഞ്ഞ് നെടുമുടി പഞ്ചായത്ത് ഓഫീസ് ജംഗ്ഷന്‍ വഴി ദേശീയപാതയിലെ കാക്കാഴം റെയില്‍വേ മേല്‍പ്പാലത്തിന് വടക്ക് വശത്തുള്ള എസ്എന്‍ കവലയില്‍വന്ന് ആലപ്പുഴയിലേക്ക് യാത്ര തുടരണം. ആലപ്പുഴയില്‍നിന്നു ചങ്ങനാശേരിക്കു പോകുന്ന ഭാരവാഹനങ്ങള്‍ അമ്പലപ്പുഴ-തിരുവല്ല റോഡിലൂടെ ചങ്ങനാശേരിക്ക് പോകണം. ആലപ്പുഴയില്‍നിന്നു ചങ്ങനാശേരിക്കു പോകുന്ന ചെറു വാഹനങ്ങള്‍ ദേശീയപാതയിലെ എസ്എന്‍ കവലയില്‍നിന്നും കഞ്ഞിപ്പാടം-ചമ്പക്കുളം വഴി എസി റോഡിലെ പൂപ്പള്ളിയില്‍ ചെന്ന് ചങ്ങനാശേരിക്ക് യാത്ര തുടരണം. പള്ളാത്തുരുത്തി പഴയപാലത്തിന് സമാന്തരമായി പണിയുന്ന പുതിയ പാലത്തിന്‍റെ നടുവിലുള്ള 72 മീ. നീളമുള്ള ആര്‍ച്ചിന്‍റെ ആദ്യഘട്ട കോണ്‍ക്രീറ്റിംഗ് പ്രവൃത്തികളാണ് ശനിയാഴ്ച നടക്കുക. യോഗത്തില്‍ ജില്ലാ കളക്ടര്‍ അലക്‌സ് വര്‍ഗീസ് അധ്യക്ഷത വഹിച്ചു. കെഎസ്ടിപി എക്‌സി. എന്‍ജിനിയര്‍ ജി.എസ്. ജ്യോതി, അമ്പലപ്പുഴ ഡിവൈഎസ്പി കെ.എന്‍. രാജേഷ് തുടങ്ങിയവര്‍ പങ്കെടുത്തു. കെഎസ്ആര്‍ടിസി ബസ് റൂട്ടികളിലും മാറ്റം ആലപ്പുഴ: പള്ളാത്തുരുത്തി പാലത്തിന്‍റെ ആര്‍ച്ച് കോണ്‍ക്രീറ്റിംഗ് പ്രവൃത്തികള്‍ നടക്കുന്നതിനാല്‍ എസി റോഡിലൂടെയുള്ള കെഎസ്ആര്‍ടിസി ബസ് റൂട്ടുകളിലും മാറ്റമുണ്ടായിരിക്കും. ആലപ്പുഴ ഭാഗത്തുനിന്ന് ചങ്ങനാശേരി, കൈനകരി കോലത്ത് ജെട്ടി, തട്ടാശേരി എന്നീ സ്ഥലങ്ങളിലേക്കു പോകുന്ന ബസുകള്‍ കൈതവന കളര്‍കോട് ജംഗ്ഷന്‍ വഴി വണ്ടാനം എസ് എന്‍ കവല, ചമ്പക്കുളം വഴി പൂപ്പള്ളി ജംഗ്ഷനില്‍ എത്തി ചങ്ങനാശേരിക്കും മറ്റുള്ള സ്ഥലങ്ങളിലേക്കും പോകും. ചങ്ങനാശേരി ഭാഗത്തുനിന്ന് ആലപ്പുഴയ്ക്ക് വരുന്ന ബസുകള്‍ എസി റോഡിലെ മങ്കൊമ്പ് ജംഗ്ഷനില്‍നിന്ന് ഇടത്തോട്ട് തിരിഞ്ഞ് ചമ്പക്കുളം, കഞ്ഞിപ്പാടം വഴി എസ്എന്‍ കവലയില്‍ എത്തി ആലപ്പുഴയ്ക്ക് സര്‍വീസ് നടത്തും.

ഉയരപ്പാത നിര്‍മാണം മുന്നോട്ട്, യാത്രക്കാരുടെ പ്രതീക്ഷയും

തുറവൂര്‍: ലക്ഷ്യമിട്ട രീതിയില്‍ ഉയരപ്പാത നിര്‍മാണം നീങ്ങുന്നു. അരൂര്‍-തുറവൂര്‍ ഉയരപ്പാത നിര്‍മാണത്തിന്‍റെ 68 ശതമാനം ജോലികള്‍ പൂര്‍ത്തിയായി. 2023 ഫെബ്രുവരിയിലാണ് നിര്‍മാണം തുടങ്ങിയത്. 2026 ഫെബ്രുവരി അവസാനം പൂര്‍ത്തിയാക്കുന്ന വിധമാണ് നിര്‍മാണം. 12.75 കിലോ മീറ്റര്‍ പാതയില്‍ റാംപ്, ടോള്‍ ഗേറ്റ് എന്നിവയടക്കം 403 തൂണുകളാണ് നിര്‍മിക്കുന്നത്. ഇതില്‍ 394 തൂണിന്‍റെ നിര്‍മാണം പൂര്‍ത്തിയായി. ഇനി 9 തൂണുകള്‍ മാത്രമാണ് നിര്‍മിക്കാനുള്ളത്. പാതയ്ക്കു മാത്രമായി 354 തൂണുകളാണുള്ളത്. 9 മീറ്റര്‍ ഉയരത്തിലുള്ള ചിറക് വിരിച്ചിരിക്കുന്ന തൂണുകള്‍ക്ക് മുകളില്‍ കോണ്‍ക്രീറ്റ് ഗര്‍ഡറുകള്‍ സ്ഥാപിച്ചതിനുശേഷം 24 മീറ്റര്‍ വീതിയിലാണ് പാത ഒരുങ്ങുന്നത്. തുറവൂര്‍- പാട്ടുകുളങ്ങര, കുത്തിയതോട്-ചമ്മനാട്, എരമല്ലൂര്‍- ചന്തിരൂര്‍, അരൂര്‍ ക്ഷേത്രം കവല-അരൂര്‍ ബൈപാസ് തുടങ്ങി അഞ്ചു റീച്ചുകളായാണു വര്‍ക്കുകള്‍ നടക്കുന്നത്. അഞ്ചു റീച്ചുകളിലായി തൂണുകള്‍ക്കു മുകളില്‍ ഏഴു കിലോമീറ്റര്‍ പാതയുടെ കോണ്‍ക്രീറ്റിംഗ് പൂര്‍ത്തിയായി. തുറവൂര്‍ ജംഗ്ഷന്‍, അരൂര്‍ ബൈപാസ് കവല എന്നിവിടങ്ങളിലെ അപ്രോച്ച് റോഡിലൂടെ മാത്രമാണ് ഉയരപ്പാതയിലേക്ക് കയറുന്നതിനും ഇറങ്ങാനുമുള്ള സൗകര്യം. കുത്തിയതോട്, ചന്തിരൂര്‍ എന്നിവിടങ്ങളിലെ റാംപുകളിലൂടെ മാത്രമാണ് ഉയരപ്പാതയില്‍നിന്നു താഴേക്കിറങ്ങാന്‍ സൗകര്യമുള്ളത്. റാംപുകളുടെ നിര്‍മാണം നടന്നുവരികയാണ്. ഇതുകൂടാതെ 28 മീറ്റര്‍ വീതിയില്‍ ഉയരപ്പാതയുടെ മുകളില്‍ തന്നെ വാഹനങ്ങളുടെ ടോള്‍ പിരിക്കാനുള്ള ടോള്‍ ബൂത്തിന്‍റെ നിര്‍മാണം നടക്കുന്നു. അരൂര്‍-തുറവൂര്‍ ഉയരപ്പാതയുടെ പ്രധാന വെല്ലുവിളിയാണ് കാന നിര്‍മാണം. കാന നിര്‍മാണം പൂര്‍ത്തിയാകാത്തതുമൂലം വെള്ളം കെട്ടിനിന്നു പാതയിലെ റോഡുകള്‍ തകരുകയാണ്. നിര്‍മാണം പൂര്‍ത്തിയാക്കിയ കാനയില്‍നിന്നു പാതയോരത്തുള്ള ഇടത്തോടുകളിലേക്ക് വെള്ളം ഒഴുക്കിവിടുന്നതിനുള്ള പഞ്ചായത്തുകളുടെ അനുമതിക്കായി കരാറുകാര്‍ സമീപിച്ചെങ്കിലും ആറു മാസം വൈകിയാണ് അനുമതി നല്‍കിയത്.

ഒപ്പിട്ടവരെ ജോലിസ്ഥലത്തിരുത്തി വ്യത്യസ്ത സമരം

മാവേലിക്കര: ദേശീയ പണിമുടക്ക് ദിവസം സിപിഎം പ്രവർത്തകരുടെ നേതൃത്വത്തിൽ വ്യത്യസ്‌തമായ സമരം. കുന്നം ഗവ. എച്ച്എസ്എസിലാണു രജിസ്റ്ററിൽ ഒപ്പ് രേഖപ്പെടുത്തിയാൽ സ്കൂൾ സമയം അവസാനിക്കുന്നതുവരെ ജോലി സ്‌ഥലത്തു കാണണം എന്നാവശ്യപ്പെട്ടു സിപിഎം പ്രവർത്തകർ ആറ് മണിക്കൂറോളം സമരം നടത്തിയത്. ഇന്നലെ രാവിലെ 11നാണു സംഭവങ്ങളുടെ തുടക്കം. തഴക്കരയിൽ പണിമുടക്കിനെ അനുകൂലിച്ചു നടന്ന പ്രകടനത്തിനു പിന്നാലെ കുന്നം ഗവ. എച്ച്എസ്എസ് തുറന്നു പ്രവർത്തിക്കുന്നു എന്നറിഞ്ഞ സിപിഎം പ്രവർത്തകർ സ്‌കൂളിലെത്തി. എത്ര പേർ ഒപ്പിട്ടു എന്നു സമരക്കാർ അന്വേഷിച്ചപ്പോൾ 13 എന്ന മറുപടി ലഭിച്ചു. എന്നാൽ എണ്ണിയപ്പോൾ 11 പേർ മാത്രമേ ഉണ്ടായിരുന്നുള്ളൂ. രണ്ടുപേർ എവിടെ എന്നു ചോദിച്ചപ്പോൾ ഗ്രൗണ്ടിൽ ഉണ്ട് എന്നു മറ്റ് അധ്യാപകർ പറഞ്ഞു. സമരക്കാർ വീണ്ടും എത്തിയപ്പോഴും 11 പേർ മാത്രമേ സ്‌കൂളിൽ ഉണ്ടായിരുന്നുള്ളൂ. അന്വേഷിച്ചപ്പോൾ രണ്ടു പേർ മെഡിക്കൽ സ്റ്റോറിൽ പോയി എന്നായി നിലപാട്. തുടർന്നു സിപിഎം ലോക്കൽ കമ്മിറ്റി സെക്രട്ടറി എസ്. ശ്രീകുമാറിന്‍റെ നേതൃത്വത്തിൽ ഉപരോധ സമരം ആരംഭിച്ചു. സ്ഥലത്തെത്തിയ സിപിഎം നേതാവ് കെ. രഘുപ്രസാദ് ഹാജർ ബുക്ക്, മൂവ്‌മെന്‍റ് രജിസ്റ്റർ എന്നിവ കാണിച്ചാൽ സമരം അവസാനിപ്പിക്കാമെന്ന് അറിയിച്ചു. പ്രിൻസിപ്പലിന്‍റെ അഭാവത്തിൽ സ്‌കൂൾ ചുമതല ഉണ്ടായിരുന്ന അധ്യാപിക അതിനു തയാറായില്ല. ഇതോടെയാണു സമരം ശക്‌തമാക്കിയത്‌. വൈകിട്ട് അഞ്ചരയോടെ സ്‌ഥലത്തെത്തിയ പോലീസ് ഉപരോധം നടത്തിയവരെ അറസ്റ്റ് ചെയ്തു‌ നീക്കി. മുരളി തഴക്കര, വേണുഗോപാൽ, മെറിൽ എം. ദാസ് തുടങ്ങിയവർ സമരത്തിനു നേതൃത്വത്തിനു നൽകി. സമരക്കാർ എത്തിയ ശേഷമാണു മൂവ്‌മെന്‍റ് രജിസ്റ്ററിൽ രേഖപ്പെടുത്തൽ ഉണ്ടായതെന്നും ഹാജർ ബുക്കിലെയും മൂവ്‌മെന്‍റ് രജിസ്റ്ററിലെയും ഒപ്പ് വ്യത്യസ്‌തമാണെന്നും സിപിഎം ആരോപിച്ചു. ഇക്കാര്യം ചൂണ്ടിക്കാട്ടി വിദ്യാഭ്യാസ മന്ത്രിക്കു പരാതി അയച്ചു. സ്കൂളിൽ ഉണ്ടായിരുന്ന വനിതാ അധ്യാപകർ കാറിൽ പോകാൻ തുടങ്ങിയപ്പോൾ തടഞ്ഞെന്നും രണ്ട് അധ്യാപകർ മരുന്നു വാങ്ങാനായി ബൈക്കിലാണ് പോയതെന്നും ഉച്ചയ്ക്കുശേഷം ഇരുവരും ഒപ്പിട്ടില്ലെന്നും സ്കൂളിലെ മറ്റ് അധ്യാപകർ പറഞ്ഞു.

ജില്ലയിൽ സർക്കാർ മന്ദിരങ്ങൾ പലതും അത്യാസന്ന നിലയിൽ

ആലപ്പുഴ: കെഎസ്ആര്‍ടിസി ആലപ്പുഴ ഡിപ്പോയുടെ പതിറ്റാണ്ടുകള്‍ പഴക്കമുള്ള കെട്ടിടത്തിന്‍റെ മേല്‍ക്കൂരയിലെ കോണ്‍ക്രീറ്റ് പലയിടങ്ങളിലും ഇളകി വീണു കമ്പി തെളിഞ്ഞു നില്‍ക്കുന്നു. ഒന്നാം നിലയില്‍ മുന്‍പ് ഓഫീസുകള്‍ പ്രവര്‍ത്തിച്ചിരുന്ന ഭാഗത്തേക്കുള്ള പടിക്കെട്ടിനു മുകളില്‍ കമ്പി തെളിഞ്ഞു. ഇവിടെ കോണ്‍ക്രീറ്റിലും ഭിത്തിയിലും ജലം ഊര്‍ന്നിറങ്ങി ചോര്‍ച്ചയുമായി. മേല്‍ക്കൂരയില്‍ ചെടികളും മരങ്ങളും പിടിച്ചു. ഡിപ്പോയുടെ പ്രധാന കെട്ടിടത്തിനു പുറത്താണു മിക്കവരും ബസ് കാത്തു നില്‍ക്കുന്നത്. ഇത് ഒരു ഓഫീസിലെ മാത്രം പ്രശ്‌നമല്ല, പല സര്‍ക്കാര്‍ സ്ഥാപനങ്ങളിലും എപ്പോള്‍ വേണമെങ്കിലും ഇടിഞ്ഞു വീഴാവുന്ന, ചോര്‍ന്നൊലിക്കുന്ന കെട്ടിടങ്ങളിലാണു ജീവനക്കാര്‍ ജോലി ചെയ്യുന്നത്. ചിലയിടങ്ങളില്‍ പലതവണ പരാതി ഉന്നയിച്ചിട്ടും ഫലമില്ലാതെ വരുന്നതോടെ എല്ലാം സഹിച്ചു കഴിയേണ്ട സ്ഥിതിയിലാണ് ഉദ്യോഗസ്ഥര്‍. കെട്ടിടത്തിന്‍റെ തെക്കുവശത്ത് യാത്രികര്‍ ബസ് കാത്തുനില്‍ക്കുന്ന ഭാഗത്തും മേല്‍ക്കൂര ഇളകിയിട്ടുണ്ട്. ഇവിടെ കെട്ടിടം ദ്രവിച്ച സ്ഥിതിയിലാണ്. ശക്തമായ മഴയും കാറ്റുമുണ്ടായാല്‍ നിലംപൊത്താമെന്നതാണ് അവസ്ഥ. കെട്ടിടത്തിന്‍റെ ശോചനീയാവസ്ഥ കാരണം ഓഫിസ് പ്രവര്‍ത്തനങ്ങള്‍ സമീപത്തെ കെട്ടിടത്തിലേക്കു മാറ്റിയെന്നതു ജീവനക്കാര്‍ക്ക് ആശ്വാസമാണ്. എന്നാല്‍ ഇതേ കെട്ടിടത്തിനു താഴെ നില്‍ക്കേണ്ടി വരുന്ന യാത്രികര്‍ ഇപ്പോഴും അപകടാവസ്ഥയില്‍തന്നെ. വിണ്ടുകീറി കായംകുളം താലൂക്ക് ആശുപത്രി കെട്ടിടത്തിനും ബലക്ഷയം. കെട്ടിടത്തിന്‍റെ വിവിധ ഭാഗങ്ങളില്‍ മരങ്ങളും കുറ്റിച്ചെടികളും വളര്‍ന്നു ഭിത്തി വിണ്ടുകീറി. ആശുപത്രി ശുചിത്വത്തിനും മികച്ച പരിചരണത്തിനുമുള്ള കായകല്‍പ ഉള്‍പ്പെടെയുള്ള അവാര്‍ഡുകള്‍ നേടുമ്പോഴാണു മറുവശത്തു രോഗികള്‍ക്കും ജീവനക്കാര്‍ക്കും ഭീതിയുണ്ടാകും വിധം ഭിത്തി വിണ്ടുകീറുന്നത്. 20 വര്‍ഷം മാത്രം പഴക്കമുള്ള കെട്ടിടത്തില്‍ നൂറു കിടക്കകളുള്ള വാര്‍ഡിന്‍റെ വശങ്ങളിലാണു മരത്തിന്‍റെ വേര് ഇറങ്ങി പൊട്ടിപ്പൊളിയുന്നത്. ഡോക്ടര്‍മാരും നഴ്‌സുമാരും രോഗികളും കൂട്ടിരിപ്പുകാരും ഉള്‍പ്പെടെ തിങ്ങിനിറഞ്ഞു നില്‍ക്കുന്ന കാഴ്ചയാണ് മിക്കപ്പോഴും. പുരസ്‌കാരങ്ങള്‍ നേടുന്നതിനുള്ള മത്സര ഓട്ടത്തില്‍ പുറംമിനുക്കല്‍ മാത്രമാണു നടക്കുന്നതെന്ന് ആക്ഷേപമുണ്ട്. മരത്തിന്‍റെ ശിഖരങ്ങള്‍ മാറ്റുന്നതല്ലാതെ വേരോടെ പിഴുതു മാറ്റാന്‍ നടപടികള്‍ സ്വീകരിക്കാത്തതിനാല്‍ പ്രശ്‌നത്തിനു ശാശ്വത പരിഹാരമകുന്നില്ല. പൊളിഞ്ഞ നില ഒരു സര്‍ക്കാര്‍ ഓഫീസിന്‍റെ നിര്‍മാണത്തിന്‍റെ പേരില്‍ മറ്റൊരു ഓഫീസ് അപകടാവസ്ഥയിലായ കഥയാണു മാവേലിക്കര സബ് റജിസ്ട്രാര്‍ ഓഫീസിന്‍റേത്. തമ്മില്‍ ബന്ധിപ്പിച്ച നിലയിലായിരുന്നു മാവേലിക്കര താലൂക്ക് ഓഫീസും സബ് റജിസ്ട്രാര്‍ ഓഫീസും. പുതിയ കെട്ടിടം പണിയാനായി താലൂക്ക് ഓഫിസ് പൊളിച്ചതോടെ, സബ് റജിസ്ട്രാര്‍ ഓഫീസ് കെട്ടിട ഭാഗത്തിന്‍റെ പകുതി പൊളിഞ്ഞ നിലയിലായി. കെട്ടിടത്തിന്‍റെ പല ഭാഗങ്ങളിലും മേല്‍ക്കൂര ഇടിഞ്ഞു തുടങ്ങി. ഭിത്തിയിലെ ടൈലുകള്‍ ഇളകി വീഴുന്ന അവസ്ഥയുമുണ്ട്. താലൂക്ക് ഓഫീസ് നിര്‍മാണത്തിനായി ഭൂമി വേര്‍തിരിച്ചതോടെ സബ് റജിസ്ട്രാര്‍ ഓഫിസിലേക്കുള്ള പ്രധാന വഴിയും അടഞ്ഞു. ഇതോടെ പടിഞ്ഞാറു വശത്തുള്ള വഴിയിലൂടെ മാത്രമേ ഓഫീസില്‍ എത്താനാകൂ. വണ്ടിയെത്തില്ലെന്നതിനാല്‍ പ്രായമായവര്‍ക്ക് എത്താനും ബുദ്ധിമുട്ടായി. ഇടിഞ്ഞു വീണു ചേര്‍ത്തല താലൂക്ക് ഓഫീസില്‍ കാലപ്പഴക്കംകൊണ്ട് ഇടിഞ്ഞു വീഴാറായ ഓഫീസ് കെട്ടിടത്തിനുള്ളില്‍ ജീവന്‍ പണയംവച്ചാണ് 70ലേറെ ജീവനക്കാര്‍ ജോലി ചെയ്യുന്നത്. മഴ പെയ്താല്‍ ചോര്‍ന്നൊലിക്കുന്ന കെട്ടിടത്തില്‍ ഫയലുകള്‍ സൂക്ഷിക്കാന്‍പോലും ജീവനക്കാര്‍ ബുദ്ധിമുട്ടുകയാണ്. വര്‍ഷങ്ങള്‍ പഴക്കമുള്ള കെട്ടിടം ഭിത്തികളില്‍ വിള്ളല്‍ വീണും ഓടുകള്‍ ഇളകിയും ഇടിഞ്ഞുവീണു തുടങ്ങി. കഴിഞ്ഞ വര്‍ഷം ഓഫീസിന്‍റെ വടക്കുഭാഗത്തുള്ള കെട്ടിടത്തിന്‍റെ ഒരു ഭാഗം ഇടിഞ്ഞു വീണിരുന്നു. വടക്കുഭാഗത്തുള്ള കെട്ടിടങ്ങളില്‍ ജോലി ചെയ്യാന്‍ കഴിയാത്തിനാല്‍ ഓഫീസ് പ്രവര്‍ത്തനം തെക്കു ഭാഗത്തുള്ള കെട്ടിടത്തിലേക്ക് മാറ്റിയിരുന്നു. ഓഫീസിന്‍റെ പല ഭാഗങ്ങളും ഇടിഞ്ഞു വീണതോടെ സബ് ട്രഷറി ഓഫീസ് ഇവിടെനിന്നു മാറ്റി. മരപ്പട്ടി ശല്യവും രൂക്ഷമാണ്. വര്‍ഷങ്ങള്‍ക്കു മുന്‍പു താലൂക്ക് ഓഫീസ് കോംപ്ലക്‌സ് നിര്‍മിക്കാന്‍ ഫണ്ട് അനുവദിച്ചെങ്കിലും താത്കാലികമായി പ്രവര്‍ത്തിക്കാന്‍ സൗകര്യം ഒരുക്കാന്‍ കഴിയാതെ വന്നതോടെ കോംപ്ലക്‌സ് നിര്‍മാണവും മുടങ്ങി. മറ്റൊരു സ്ഥലത്ത് ഓഫീസ് പ്രവര്‍ത്തിപ്പിക്കാന്‍ സൗകര്യം ഒരുക്കണമെന്നാണു ജീവനക്കാരുടെ ആവശ്യം.

ഇന്നോവകാറിൽ മരണപ്പാച്ചിലിൽ യുവാക്കളുടെ സംഘം; നാട്ടുകാരുടെ സഹായത്തോടെ പോലീസ് വലയിലാക്കി

അമ്പലപ്പുഴ: അമിത വേഗത്തിൽ യാത്ര ചെയ്ത് നിരവധി വാഹനങ്ങളിൽ തട്ടിയ ഇന്നോവ കാറിൽ സഞ്ചരിച്ച യുവാക്കളുടെ സംഘത്തെ നാട്ടുകാരുടെ സഹായത്തോടെ പോലീസ് പിടികൂടി. കെഎൽ 01 സി എച്ച്-7629 എന്ന രജിസ്റ്റർ നമ്പരിലുള്ള ഇന്നോവ കാറാണ് അമ്പലപ്പുഴ പോലീസ് പിടികൂടിയത്. കാറിലുണ്ടായിരുന്ന കൊല്ലം കരുനാഗപ്പള്ളി സ്വദേശികളായ ആലിൻകടവ് പുന്നമൂട്ടിൽ അഖിൽ (26), ദിലീപ് ഭവനത്തിൽ സഞ്ജയ് (25), പ്രവീൺ നിവാസിൽ പ്രവീൺ (25), ഓച്ചിറ ചങ്ങംകുളങ്ങര ഗൗരി ഭവനിൽ ആദർശ് (23), ഷിയാസ് മൻസിലിൽ നിയാസ് (22), കാട്ടിൽ കടവ് തറയിൽ വീട്ടിൽ സൂരജ് (21) എന്നിവരെയും പോലീസ് കസ്റ്റഡിയിലെടുത്തു. ഞായറാഴ്ച രാത്രി 11.30നായിരുന്നു സംഭവം. സുഹൃത്തുകളായ ഇവർ സഞ്ജയിയെ വിദേശത്തേക്ക് യാത്രയാക്കാൻ കൊച്ചിയിലേക്ക് പോകുകയായിരുന്നു. വലിയഴീക്കൽ പാലം കടന്ന് തീരദേശ റോഡുവഴി എത്തിയ ഇവർ സഞ്ചരിച്ച വാഹനം എതിരേ വന്ന മാരുതിക്കാറിൽ തട്ടി മാരുതിയുടെ ഒരു വശത്തെ കണ്ണാടി തകർന്നു. ഇതിനുള്ള നഷ്ടപരിഹാരം നൽകി യാത്ര തുടർന്നതായി പോലീസ് പറഞ്ഞു. വീണ്ടുമുള്ള യാത്രയ്ക്കിടെ സ്കൂട്ടറിൽ തട്ടിയെങ്കിലും ഇവർ നിർത്താതെ പോയതായി നാട്ടുകാർ പറയുന്നു. ഇതിനിടെ സമീപത്തെ കടയിൽ നിർത്തി കുടിവെള്ളം വാങ്ങുന്നതിനിടെ നാട്ടുകാരുമായി വാക്കേറ്റമുണ്ടായി. നാട്ടുകാരെ അസഭ്യം പറഞ്ഞശേഷം വേഗത്തിൽ വാഹനമോടിച്ചുപോയ ഇവരുടെ പിന്നാലെ പല്ലന സ്വദേശികളായ ഒരു സംഘം നാട്ടുകാർ കാറിലും ഇരുചക്ര വാഹനങ്ങളിലുമായി ഇവരെ പിൻതുടർന്നു. വിവരമറിഞ്ഞ് അമ്പലപ്പുഴയിൽ വാഹനം തടയാൻനിന്ന പോലീസിനെ വെട്ടിച്ച് ഇന്നോവ കാർ മുന്നോട്ടു പാഞ്ഞു. പോലീസ് ജീപ്പിന്‍റെ വശത്തെ കണ്ണാടി, ബംന്പർ എന്നിവ തകർത്ത് അമിത വേഗത്തിൽ മുമ്പോട്ടു പാഞ്ഞ കാർ കാക്കാഴം റയിൽവേ മേൽപ്പാലത്തിന്‍റെ വലത് ഫുട്പാത്തിൽ ഇടിച്ചു കയറി. വലതുവശം പിൻഭാഗത്തെ ടയർ പൊട്ടിത്തെറിച്ചു. പിന്നീട് അഞ്ച് കിലോമീറ്ററോളം മുന്നോട്ട് ഓടിയ കാർ പുന്നപ്ര പോലീസ് സ്റ്റേഷന് സമീപത്തുനിന്ന് കിഴക്കോട്ട് പോയി കളരി ക്ഷേത്രത്തിന് സമീപത്തെ ആളൊഴിഞ്ഞ പറമ്പിലാണ് നിർത്തിയത്. കാറിൽനിന്ന് ഓടി രക്ഷപ്പെടാൻ ശ്രമിച്ച മൂന്നു പേരെ നാട്ടുകാർ പിടികൂടി പുന്നപ്ര സ്റ്റേഷനിലെത്തിച്ചു. മറ്റു മൂന്നുപേരെ പിന്നാലെയെത്തിയ അമ്പലപ്പുഴ പോലീസും പിടികൂടി. അഖിലാണ് കാർ ഓടിച്ചതെന്ന് പോലീസ് പറഞ്ഞു. യുവാക്കൾക്കെതിരേ പൊതുമുതൽ നശിപ്പിച്ചതിനുൾപ്പടെ കേസെടുത്തു. അമ്പലപ്പുഴ കോടതിയിൽ ഹാജരാക്കിയ പ്രതികളെ റിമാൻഡു ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]