ഇന്ത്യൻ വ്യോമസേനയിൽ അഗ്നിവീർ (Agniveervayu Intake 02/2026) സെലക്ഷൻ ടെസ്റ്റിന് അവിവാഹിതരായ സ്ത്രീകൾക്കും പുരുഷന്മാർക്കും അവസരം. ഇത് കമ്മീഷൻഡ് ഓഫീസർ/പൈലറ്റ്/നാവിഗേറ്റർ/എയർമെൻ തസ്തികകളിലേക്കുള്ള തെരഞ്ഞെടുപ്പല്ല. 4 വർഷത്തേക്കാണു നിയമനം. ജൂലൈ 11 മുതൽ 31 വരെ ഓൺലൈനായി അപേക്ഷിക്കാം.
വിദ്യാഭ്യാസ യോഗ്യത
സയൻസ് വിഷയങ്ങൾ: 50% മാർക്കോടെ മാത്‌സ്,ഫിസിക്സ്, ഇംഗ്ലീഷ് പഠിച്ച് പ്ലസ് ടു ജയം/തത്തുല്യം. ഇംഗ്ലിഷിന് 50% മാർക്ക് വേണം. അല്ലെങ്കിൽ 50% മാർക്കോടെ 3 വർഷ എൻജിനിയറിംഗ് ഡിപ്ലോമ ജയം (മെക്കാനിക്കൽ/ഇലക്‌ട്രിക്കൽ/ഇലക്‌ട്രോണിക്‌സ്/ഓട്ടമൊബൈൽ/കംപ്യൂട്ടർ സയൻസ്/ ഇൻസ്ട്രുമെന്‍റേഷൻ ടെക്നോളജി/ഐടി). ഇംഗ്ലീഷിന് 50% മാർക്ക് വേണം.
ഡിപ്ലോമ തലത്തിൽ ഇംഗ്ലീഷ് ഒരു വിഷയമല്ലെങ്കിൽ പ്ലസ് ടു/പത്താം ക്ലാസിൽ ഇംഗ്ലീഷിന് 50% മാർക്ക് വേണം. അല്ലെങ്കിൽ 50% മാർക്കോടെ 2 വർഷ വൊക്കേഷനൽ കോഴ്‌സ് ജയം (ഫിസിക്സ്, മാത്‌സ് പഠിച്ച്). (ഇംഗ്ലീഷിന് 50% മാർക്ക് വേണം), വൊക്കേഷണൽ കോഴ്സസിന് ഇംഗ്ലീഷ് ഒരു വിഷയമല്ലെങ്കിൽ പ്ലസ് ടു/പത്താം ക്ലാസിൽ ഇംഗ്ലീഷിന് 50% മാർക്ക് വേണം.
സയൻസ് ഇതരവിഷയങ്ങൾ: 50% മാർക്കോടെ പ്ലസ് ടു ജയം/തത്തുല്യം (ഇംഗ്ലീഷിന് 50% മാർക്ക് വേണം) അല്ലെങ്കിൽ 50% മാർക്കോടെ 2 വർഷ വൊക്കേഷനൽ കോഴ്സ‌സ് ജയം. (ഇംഗ്ലീഷിന് 50% മാർക്ക് വേണം). വൊക്കേഷനൽ കോഴ്സിന് ഇംഗ്ലീഷ് ഒരു വിഷയമല്ലെങ്കിൽ പ്ലസ് ടു/പത്താം ക്ലാസിൽ ഇംഗ്ലീഷിന് 50% മാർക്ക് നേടിയിരിക്കണം.
സയൻസ് പഠിച്ചവർക്കു സയൻസ് ഇതര വിഭാഗങ്ങളിലേക്കും അപേക്ഷിക്കാം. ഓൺലൈൻ രജിസ്ട്രേഷൻ ഫോം പൂരിപ്പിക്കുമ്പോൾ ഇവർക്കു സയൻസ്, സയൻസ് ഇതര വിഷയങ്ങളുടെ പരീക്ഷയിൽ ഒറ്റ സിറ്റിംഗിൽ പങ്കെടുക്കാൻ ഓപ്ഷൻ ലഭിക്കും.
പ്രായം: 2005 ജൂലൈ 2നും 2009 ജനുവരി 2 നും മധ്യേ ജനിച്ചവരാകണം. (രണ്ടു തീയതികളും ഉൾപ്പെടെ). എൻറോൾ ചെയ്യുമ്പോൾ പ്രായപരിധി 21. ശാരീരികയോഗ്യത: ഉയരം: പുരുഷന്മാർക്ക്:കുറഞ്ഞത് 152 സെ.മീ. സ്ത്രീകൾക്ക്: 152 സെ മീ. പുരുഷൻമാർക്കു നെഞ്ചളവ് 77 സെന്‍റീമീറ്റർ.
കുറഞ്ഞത് അഞ്ചു സെ.മി. വികസിപ്പിക്കാൻ കഴിയണം. തൂക്കം ഉയരത്തിനും പ്രായത്തിനും ആനുപാതികം. കാഴ്ച യോഗ്യത: കാഴ്‌ചശക്‌തി: ഓരോ കണ്ണിനും 6/12, (കണ്ണടയോടെ 6/6), ദീർഘദൃഷ്ടി: +2.0D ,ഹ്രസ്വദൃഷ്ടി ID (± 0.50 D വിഷമ ദൃഷ്ട‌ി ഉൾപ്പെടെ), കളർവിഷൻ: CP-II)
ശാരീരികക്ഷമത: പുരുഷൻ: 7 മിനിറ്റിൽ 1.6 കിലോമീറ്റർ ഓട്ടം. നിശ്ചിത സമയത്തിനുള്ളിൽ 10 പുഷപ്പ്, 10 സിറ്റപ്പ്. 20 സ്ക്വാട്‌സ് എന്നിവയും പൂർത്തിയാക്കണം. സ്ത്രീ: 8 മിനിറ്റിൽ 1.6 കിലോമീറ്റർ ഓട്ടം നിശ്ചിതസമയത്തിനുള്ളിൽ 10 സിറ്റപ്പ്. 15 സ്ക്വാട്‌സ് എന്നിവയും പൂർത്തിയാക്കണം.
ഫീസ്: 550രൂപ. ഓൺലൈനായി അടയ്ക്കാം. തെരഞ്ഞെടുപ്പ്: ഷോർട്ട് ലിസ്റ്റ് ചെയ്യപ്പെടുന്നവർക്ക് ഓൺലൈൻ ടെസ്റ്റ്, അഡാപ്റ്റബിലിറ്റി ടെസ്റ്റ്, ശാരീരികക്ഷമതാ പരിശോധന, വൈദ്യപരിശോധന എന്നിവ ഉണ്ടാകും. സെപ്റ്റംബർ 25 മുതലാണ് ഓൺലൈൻ ടെസ്റ്റ്.
https://agnipathvayu.cdac.in