സ്റ്റേറ്റ് ബാങ്ക് ഓഫ് ഇന്ത്യയിൽ പ്രബേഷനറി ഓഫീസർ അവസരം 541 ഒഴിവ്. ഓൺലൈൻ അപേക്ഷ ജൂലൈ 14 വരെ. യോഗ്യത (2025 സെപ്റ്റംബർ 30ന്): ഏതെങ്കിലും വിഷയത്തിൽ ബിരുദം/തത്തുല്യം. അവസാനവർഷ ബിരുദക്കാർക്കും അപേക്ഷിക്കാം. മെഡിക്കൽ/എൻജിനിയറിംഗ് ചാർട്ടേഡ്/കോസ്റ്റ് അക്കൗണ്ടന്‍റ് യോഗ്യതയുള്ളവരെയും പരിഗണിക്കും.
പ്രായം: (1 /04 /20 25ന് ) 21-30. പട്ടികവിഭാഗത്തിനും വിമുക്തഭടന്മാർക്കും 5 വർഷം ഇളവ്. മറ്റു പിന്നാക്കവിഭാഗക്കാർക്കു മൂന്നും ഭിന്നശേഷിക്കാർക്കു പത്തും വർഷ ഇളവ്. ശമ്പളം: 48,480-85,920.
തെരഞ്ഞെടുപ്പ്: പ്രിലിമിനറി പരീക്ഷ ജൂലൈ /ഓഗസ്റ്റിൽ. ഒരു മണിക്കൂർ ദൈർഘ്യമുള്ള ഓൺലൈൻ പ്രിലിമിനറി പരീക്ഷയിൽ ഇംഗ്ലീഷ് ലാംഗ്വേജ്, ക്വാണ്ടിറ്റേറ്റീവ് ആപ്റ്റിറ്റ്യൂഡ്, റീസണിംഗ് എബിലിറ്റി വിഭാഗങ്ങളിൽനിന്നുള്ള 100 ഒബ്ജെക്ടീവ് ചോദ്യങ്ങളുണ്ടാകും. മെയിൻ പരീക്ഷ സെപ്റ്റംബറിൽ.
ഒബ്ജെക്റ്റീവ്, ഡിസ്ക്രിപ്റ്റീവ് മാതൃകയിലുള്ള ചോദ്യങ്ങൾ ഉൾപ്പെടുന്നതാണു മെയിൻ പരീക്ഷ. ഒബ്ജെക്റ്റീവ് മാതൃകയിലുള്ള 200 മാർക്കിന്‍റെ ചോദ്യങ്ങളും (3 മണിക്കൂർ) ഡിസ്ക്രിപ്റ്റീവ് മാതൃകയിലുള്ള 50 മാർക്കിന്‍റെ (അരമണിക്കൂർ) ചോദ്യങ്ങളുമാണുള്ളത്.
എഴുത്തു പരീക്ഷയ്ക്കുശേഷം സൈക്കോമെട്രിക് ടെസ്റ്റും ഗ്രൂപ്പ് എക്സർസൈസും അഭിമുഖവും നടത്തും. തെരഞ്ഞെടുക്കപ്പെടുന്നവർക്കു 2 വർഷം പ്രബേഷനുണ്ട്.
എസ്ബിഐ പ്രബേഷനറി ഓഫീസർ തസ്‌തികയിലേക്ക് മുന്പു 4 തവണ പരീക്ഷയെഴുതിയ ജനറൽ വിഭാഗം ഉദ്യോഗാർഥികൾ അപേക്ഷിക്കാൻ അർഹരല്ല. ഒബിസി/ഭിന്നശേഷിക്കാർക്ക്7 തവണയാണു പരിധി. പട്ടികവിഭാഗത്തിന് ഈ വ്യവസ്‌ഥ ബാധകമല്ല.
കേരളത്തിലെ പരീക്ഷാ കേന്ദ്രങ്ങൾ (സ്റ്റേറ്റ് കോഡ്: 25) പ്രിലിമിനറി പരീക്ഷയ്ക്ക് ആലപ്പുഴ, കണ്ണൂർ, എറണാകുളം, കൊല്ലം, കോട്ടയം, കോഴിക്കോട്, മലപ്പുറം പാലക്കാട്, തൃശൂർ, തിരുവനന്തപുരം എന്നിവിടങ്ങളിലും മെയിൻ പരീക്ഷയ്ക്കു കൊച്ചിയിലും തിരുവനന്തപുരത്തും തൃശൂരും.
ഫീസ്: 750. പട്ടികവിഭാഗം, ഭിന്നശേഷിക്കാർക്കു ഫീസില്ല. ഫീസ് ഓൺ‌ലൈനായി അടയ്ക്കണം. ഓൺലൈൻ രജിസ്ട്രേഷനും വിജ്‌ഞാപനത്തിനും www.banksbi/ careers, www.sbi.co.in/careers