ഇന്ത്യ x ബംഗ്ലാദേശ് ഫൈനൽ : Deepika.com Sports News |

Click here for detailed news of all items

ഇന്ത്യ x ബംഗ്ലാദേശ് ഫൈനൽ

Saturday, December 21, 2024 1:24 AM IST

ക്വാലാലംപുർ: പ്രഥമ അണ്ടർ 19 വനിതാ ട്വന്‍റി-20 ഏഷ്യ കപ്പിൽ ഇന്ത്യ x ബംഗ്ലാദേശ് ഫൈനൽ. പുരുഷ അണ്ടർ 19 ഏഷ്യ കപ്പ് ഫൈനലിലും ഇന്ത്യയും ബംഗ്ലാദേശുമായിരുന്നു ഏറ്റുമുട്ടിയത്.

ഡിസംബർ എട്ടിനു നടന്ന ഫൈനലിൽ ഇന്ത്യയെ 59 റണ്‍സിനു കീഴടക്കി ബംഗ്ലാദേശ് ചാന്പ്യന്മാരായി. പുരുഷ വിഭാഗത്തിലെ ഫൈനൽ തോൽവിക്ക് വനിതകളിലൂടെ തിരിച്ചടിക്കാനാണ് ഇന്ത്യയുടെ ശ്രമം.

സൂപ്പർ ഫോറിൽ ഒന്നാം സ്ഥാനത്തു ഫിനിഷ് ചെയ്താണ് ഇന്ത്യൻ യുവതികൾ ഫൈനലിലേക്കു മുന്നേറിയത്. രണ്ടാം സ്ഥാനത്തോടെ ബംഗ്ലാദേശും കലാശപ്പോരാട്ടത്തിനെത്തി. നാളെ രാവിലെ ഏഴിനാണ് ഇന്ത്യ x ബംഗ്ലാദേശ് ഫൈനൽ.

തോൽക്കാതെ ഇന്ത്യ

സൂപ്പർ ഫോറിലെ അവസാന മത്സരത്തിൽ ഇന്നലെ ഇന്ത്യൻ വനിതകൾ ശ്രീലങ്കയെ നാലു വിക്കറ്റിനു കീഴടക്കി. 31 പന്ത് ബാക്കിനിൽക്കേയായിരുന്നു ഇന്ത്യയുടെ ജയം. ടോസ് നേടിയ ഇന്ത്യ ബൗളിംഗ് തെരഞ്ഞെടുത്തു.

ആയുഷി ശുക്ലയുടെ (4/10) ബൗളിംഗ് മികവിൽ ഇന്ത്യ ശ്രീലങ്കയെ 20 ഓവറിൽ 98/9 എന്ന നിലയിൽ ഒതുക്കി. തുടർന്നു ക്രീസിലെത്തിയ ഇന്ത്യ ആറു വിക്കറ്റ് നഷ്ടത്തിൽ ജയത്തിലെത്തി. ഗോങ്കടി തൃഷ (32), ജി. കമാലിനി (28) എന്നിവരാണ് ഇന്ത്യയുടെ ടോപ് സ്കോറർമാർ. മിഥില വിനോദ് 12 പന്തിൽ 17 റണ്‍സുമായി പുറത്താകാതെ നിന്നു.

ഇന്നലെ നടന്ന സൂപ്പർ ഫോറിലെ അവസാന മത്സരത്തിൽ നേപ്പാളിനെ ഒന്പതു വിക്കറ്റിനു കീഴടക്കിയാണ് ബംഗ്ലാദേശ് ഫൈനൽ ടിക്കറ്റ് കരസ്ഥമാക്കിയത്.

സ്കോർ: നേപ്പാൾ 11 ഓവറിൽ 54/8. ബംഗ്ലാദേശ് 9.5 ഓവറിൽ 58/1. മഴയെത്തുടർന്നു മത്സരം 11 ഓവറാക്കി നിജപ്പെടുത്തിയിരുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.