മൂന്നാം ടെസ്റ്റിൽ മൂന്നാംദിനവും മഴ : Deepika.com Sports News |

Click here for detailed news of all items

മൂന്നാം ടെസ്റ്റിൽ മൂന്നാംദിനവും മഴ

Tuesday, December 17, 2024 12:00 AM IST

ബ്രിസ്ബെയ്ൻ: ഓസ്ട്രേലിയയ്ക്കെതിരായ മൂന്നാം ടെസ്റ്റ് ക്രിക്കറ്റിൽ ഇന്ത്യയെ തോൽവിയിൽനിന്നു രക്ഷിക്കാൻ മഴയ്ക്കു മാത്രമേ സാധിക്കൂ എന്നതാണ് നിലവിലെ അവസ്ഥ.

മൂന്നാംദിനം മഴയെത്തുടർന്നു മത്സരം നിർത്തിവയ്ക്കുന്പോൾ ഓസ്ട്രേലിയയുടെ ഒന്നാം ഇന്നിംഗ്സ് സ്കോറായ 445ന് എതിരേ ഇന്ത്യ നാലു വിക്കറ്റ് നഷ്ടത്തിൽ 51 റണ്‍സ് എന്ന നിലയിലാണ്. ഒന്നാം ഇന്നിംഗ്സിൽ 394 റണ്‍സിനു പിന്നിലാണ് ഇന്ത്യ ഇപ്പോൾ. 17 ഓവർ മാത്രമാണ് ഇന്ത്യയുടെ ഒന്നാം ഇന്നിംഗ്സ് ഇന്നലെ നടന്നത്.

തുടക്കം മുതൽ വൈകി

മഴയെത്തുടർന്ന് ആദ്യദിനം 13.2 ഓവർ മാത്രമായിരുന്നു മത്സരം നടന്നത്. എന്നാൽ, രണ്ടാംദിനം പൂർണമായി ലഭിച്ചു. പ്രതികൂല കാലാവസ്ഥയെ തുടർന്നു മൂന്നാദിനം നിശ്ചയിച്ചതിനേക്കാൾ അഞ്ചു മിനിറ്റ് വൈകിയാണ് മത്സരം ആരംഭിച്ചത്.

101 ഓവറിൽ 405/7 എന്ന നിലയിൽ രണ്ടാംദിനം ഒന്നാം ഇന്നിംഗ്സ് അവസാനിപ്പിച്ച ഓസ്ട്രേലിയയ്ക്കുവേണ്ടി അലക്സ് കാരെയും മിച്ചൽ സ്റ്റാർക്കും ക്രീസിലെത്തി. കാരെ 88 പന്തിൽ 70 റണ്‍സ് നേടിയശേഷം പത്താമനായാണ് പുറത്തായത്. സ്റ്റാർക്ക് 18 റണ്‍സ് നേടി. മൂന്നാംദിനം 16.1 ഓവർകൂടി ഓസ്ട്രേലിയൻ ഒന്നാം ഇന്നിംഗ്സ് നീണ്ടു. ഓസ്ട്രേലിയൻ ഇന്നിംഗ്സ് അവസാനിക്കുന്നതിനു മുന്പുതന്നെ മത്സരം നിർത്തിവയ്ക്കേണ്ടിവന്നു.

ഇന്ത്യൻ ഇന്നിംഗ്സ് കൃത്യസമയത്ത് ആരംഭിക്കാനും പ്രതികൂല കാലവസ്ഥ സമ്മതിച്ചില്ല. 7.2 ഓവറിൽ 22/3 എന്ന നിലയിൽ ഇന്ത്യ പതറിയപ്പോൾ മഴ ശക്തിപ്പെട്ടു. അതോടെ മത്സരം നിർത്തിവച്ചു. ഉച്ചഭക്ഷണത്തിനുശേഷം വീണ്ടും മത്സരം ആരംഭിച്ചെങ്കിലും മഴ ഇടയ്ക്ക് തടസം സൃഷ്ടിച്ചു.

ഒടുവിൽ ഇന്ത്യൻ സമയം ഉച്ചയ്ക്ക് 12.43നു മൂന്നാംദിനത്തിലെ മത്സരം അവസാനിച്ചതായി അന്പയർമാർ അറിയിച്ചു. മഴയേക്കാൾ വെളിച്ചക്കുറവായിരുന്നു അപ്പോഴത്തെ പ്രശ്നം.

രാഹുൽ മാത്രം

ഇന്ത്യൻ ഇന്നിംഗ്സിൽ രണ്ടക്കം കണ്ടത് കെ.എൽ. രാഹുൽ മാത്രമാണ്. യശസ്വി ജയ്സ്വാളിനെ (4) പുറത്താക്കി മിച്ചൽ സ്റ്റാർക്കാണ് ഇന്ത്യയെ വേട്ടയാടാൻ തുടങ്ങിയത്. 64 പന്തിൽ 33 റണ്‍സുമായി രാഹുൽ ക്രീസിൽ തുടരുന്നു. ആറു പന്തിൽ റണ്‍ എടുക്കാതെ ക്യാപ്റ്റൻ രോഹിത് ശർമയാണ് കൂട്ടിന്. ആറാം നന്പറായാണ് രോഹിത് ക്രീസിലെത്തിയത്.

സ്കോർബോർഡ്

ഓസ്ട്രേലിയ ഒന്നാം ഇന്നിംഗ്സ്: 445.

ഇന്ത്യ ഒന്നാം ഇന്നിംഗ്സ്: ജയ്സ്വാൾ സി മാർഷ് ബി സ്റ്റാർക്ക് 4, രാഹുൽ നോട്ടൗട്ട് 33, ഗിൽ സി മാർഷ് ബി സ്റ്റാർക്ക് 1, കോഹ്‌ലി സി കാരെ ബി ഹെയ്സൽവുഡ് 3, പന്ത് സി കാരെ ബി കമ്മിൻസ് 9, രോഹിത് നോട്ടൗട്ട് 0, എക്സ്ട്രാസ് 1, ആകെ 17 ഓവറിൽ 51/4.

വിക്കറ്റ് വീഴ്ച: 1-4, 2-6, 3-22, 4-44.

ബൗളിംഗ്: സ്റ്റാർക്ക് 8-1-25-2, ഹെയ്സൽവുഡ് 5-2-17-1, കമ്മിൻസ് 2-0-7-1, ലിയോണ്‍ 1-0-1-0, ഹെഡ് 1-0-1-0.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.