ഇന്ത്യ സഖ്യം തുടരും: ഖാർഗെ : Deepika.com National News |

Click here for detailed news of all items

ഇന്ത്യ സഖ്യം തുടരും: ഖാർഗെ

Sunday, June 9, 2024 1:09 AM IST

ന്യൂഡൽഹി: ഇന്ത്യ സഖ്യം തുടരുമെന്നത് ദൃഢനിശ്ചയമാണെന്നും പാർലമെന്‍റിലും പുറത്തും ഐക്യവും കൂട്ടായ പ്രവർത്തനവും നിലനിർത്തണമെന്നും കോണ്‍ഗ്രസ് അധ്യക്ഷൻ മല്ലികാർജുൻ ഖാർഗെ. നഗരപ്രദേശങ്ങളിലെയും നിയമസഭാ തെരഞ്ഞെടുപ്പിൽ മികച്ച പ്രകടനം നടത്തിയ സംസ്ഥാനങ്ങളിലെയും കോണ്‍ഗ്രസിന്‍റെ മോശം പ്രകടനം പ്രത്യേകം ചർച്ച ചെയ്യുമെന്നും അദ്ദേഹം അറിയിച്ചു.

ലോക്സഭാ തെരഞ്ഞെടുപ്പിനുശേഷം ആദ്യമായി ഇന്നലെ നടന്ന കോണ്‍ഗ്രസിന്‍റെ വിശാല പ്രവർത്തകസമിതി യോഗത്തിൽ ആമുഖ പ്രസംഗം നടത്തുകയായിരുന്നു ഖാർഗെ. ഗ്രാമപ്രദേശങ്ങളിലും പട്ടികജാതി, വർഗ, പിന്നാക്ക, ന്യൂനപക്ഷ വോട്ടർമാരും കർഷകരും പാർട്ടിയെ വലിയതോതിൽ പിന്തുണച്ചതിന് അദ്ദേഹം നന്ദി പറഞ്ഞു.

ഭിന്നിപ്പിന്‍റെയും വിദ്വേഷത്തിന്‍റെയും വർഗീയ ധ്രുവീകരണത്തിന്‍റെയും രാഷ്‌ട്രീയത്തെ രാജ്യത്തെ വോട്ടർമാർ നിരാകരിച്ചു. കഴിഞ്ഞ പത്തു വർഷത്തെ രാഷ്‌ട്രീയത്തിന്‍റെ നിർണായകമായ തിരസ്കരണമാണിത്. ബിജെപിയുടെ സ്വേച്ഛാധിപത്യപരവും ജനാധിപത്യവിരുദ്ധവുമായ നിലപാടുകൾക്കെതിരേ ജനങ്ങൾ വിധിയെഴുതി. "ഞങ്ങളിൽ വിശ്വാസം പ്രകടിപ്പിച്ചുകൊണ്ട് സ്വേച്ഛാധിപത്യ ശക്തികൾക്കും ഭരണഘടനാവിരുദ്ധ ശക്തികൾക്കും പൊതുജനങ്ങൾ ശക്തമായ മറുപടി നൽകി'-ഖാർഗെ പറഞ്ഞു.

അശോക ഹോട്ടലിൽ ഇന്നലെ രാവിലെ നടന്ന പ്രവർത്തകസമിതി യോഗത്തിൽ സോണിയ ഗാന്ധി, രാഹുൽ ഗാന്ധി, പ്രിയങ്ക ഗാന്ധി എന്നിവരും കോണ്‍ഗ്രസ് മുഖ്യമന്ത്രിമാരും മലയാളികളായ കെ.സി. വേണുഗോപാൽ, രമേശ് ചെന്നിത്തല, ഡോ. ശശി തരൂർ, കൊടിക്കുന്നിൽ സുരേഷ്, വി.ഡി. സതീശൻ, കെ. സുധാകരൻ തുടങ്ങിയവരും പങ്കെടുത്തു. പ്രവർത്തകസമിതി അംഗങ്ങൾ, നിയമസഭാ കക്ഷി നേതാക്കൾ, പിസിസി പ്രസിഡന്‍റുമാർ, പുതുതായി തെരഞ്ഞെടുക്കപ്പെട്ട എംപിമാർ എന്നിവർക്കായി ഖാർഗെ അത്താഴവിരുന്നും നൽകി. ആരോഗ്യകാരണങ്ങളാൽ മുതിർന്ന നേതാക്കളായ ഡോ. മൻമോഹൻ സിംഗും എ.കെ. ആന്‍റണിയും എത്തിയില്ല.

►മോദിയുടേത് ധാർമിക പരാജയം◄

പ്രധാനമന്ത്രി നരേന്ദ്ര മോദിയുടെ വ്യക്തിപരവും ധാർമികവുമായ പരാജയമാണു ജനവിധിയെന്ന് കോണ്‍ഗ്രസ് പ്രവർത്തക സമിതി പ്രമേയത്തിൽ അഭിപ്രായപ്പെട്ടു. ലോക്സഭയിൽ ബിജെപിക്ക് ഒറ്റയ്ക്ക് ഭൂരിപക്ഷം ലഭിക്കുന്നതു തടയാൻ ഇന്ത്യ സഖ്യത്തിനു കഴിഞ്ഞു. 2019ലെ 52ൽനിന്ന് നൂറു സീറ്റുകളോടെ രണ്ടാമത്തെ വലിയ കക്ഷിയാകാൻ പാർട്ടിക്ക് കഴിഞ്ഞു. ജനങ്ങളുടെ വിശ്വാസം വീണ്ടെടുക്കാൻ പാർട്ടിക്കായി. അതിനാൽ തെരഞ്ഞെടുപ്പുഫലം കേവലം രാഷ്‌ട്രീയ നഷ്‌ടമല്ലെന്നു യോഗം ചൂണ്ടിക്കാട്ടി.

►ഭാരത് ജോഡോ യാത്ര സഹായകമായി◄

ലോക്സഭാ തെരഞ്ഞെടുപ്പിലെ നേട്ടത്തിൽ രാഹുൽ ഗാന്ധിയുടെ നേതൃത്വത്തിൽ നടത്തിയ ഭാരത് ജോഡോ യാത്രയുടെ സംഭാവന എടുത്തുപറയേണ്ടതുണ്ടെന്ന് പ്രവർത്തകസമിതി അംഗീകരിച്ച പ്രമേയം ചൂണ്ടിക്കാട്ടി. പ്രചാരണത്തിലും പാർട്ടിയുടെ ഉയിർത്തെഴുന്നേൽപ്പിലും പാർട്ടി അധ്യക്ഷൻ ഖാർഗെ, സോണിയ, രാഹുൽ, പ്രിയങ്ക എന്നിവരുടെ പങ്കിനെ അഭിനന്ദിക്കുന്ന മറ്റൊരു പ്രമേയവും പ്രവർത്തകസമിതി യോഗം പാസാക്കി.

കലാപമുണ്ടായ മണിപ്പുരിലെ രണ്ടു സീറ്റുകളും കോണ്‍ഗ്രസ് നേടുന്നതിന് രാഹുലിന്‍റെ സന്ദർശനവും ഭാരത് ജോഡോ യാത്രയും സഹായകമായെന്ന് ഖാർഗെ ചൂണ്ടിക്കാട്ടി. നാഗാലാൻഡ്, ആസാം, മേഘാലയ എന്നീ വടക്കു-കിഴക്കൻ സംസ്ഥാനങ്ങളിലെയും മഹാരാഷ്‌ട്രയിലെയും അടക്കം വിജയങ്ങൾക്കും ജോഡോ യാത്ര കാരണമായി. ഭാരത് ജോഡോ യാത്ര കടന്നുപോയ പ്രദേശങ്ങളിൽ പാർട്ടിക്ക് വോട്ടുശതമാനത്തിലും സീറ്റുകളിലും ഗണ്യമായ വർധനയുണ്ടായെന്ന് ഖാർഗെ പറഞ്ഞു

►പ്രചാരണമായത് ജനകീയ വിഷയങ്ങൾ◄

ജനങ്ങളെ അലട്ടുന്ന വിഷയങ്ങളാണ് തെരഞ്ഞെടുപ്പു പ്രചാരണത്തിൽ കോണ്‍ഗ്രസ് ഉന്നയിച്ചതെന്ന് ഖാർഗെ ചൂണ്ടിക്കാട്ടി. അത് ഇനിയും തുടരും. ഭരണഘടന, സാന്പത്തിക അസമത്വം, തൊഴിലില്ലായ്മ, സാമൂഹികനീതി, ഐക്യം എന്നിവ പൊതുപ്രശ്നമാക്കിയതിന് രാഹുൽ ഗാന്ധിയെ അഭിനന്ദിക്കുന്നു. പ്രതികൂലസാഹചര്യങ്ങളിൽ പോരാടി വിജയിച്ച എംപിമാരെയും അഭിനന്ദിക്കുന്നു. ഇന്ത്യ സഖ്യത്തിലെ പങ്കാളികളുടെ സംഭാവനകളെയും ഖാർഗെ അഭിനന്ദിച്ചു. വിവിധ സംസ്ഥാനങ്ങളിൽ ഓരോ പാർട്ടിയും അതിന്‍റെ പങ്കു വഹിച്ചു.

നിയമസഭയിൽ മികച്ച പ്രകടനം നടത്തിയ ചില സംസ്ഥാനങ്ങളിൽ അതാവർത്തിക്കാനായില്ല. ഇവയെല്ലാം അവലോകനം ചെയ്ത് നഗരകേന്ദ്രങ്ങളിൽ പാർട്ടിയുടെ വോട്ടുവിഹിതം മെച്ചപ്പെടുത്താനുള്ള ശ്രമങ്ങൾ ശക്തമാക്കും. ഇക്കാര്യങ്ങൾ പ്രത്യേകം ചർച്ചചെയ്യും.

ഡൽഹി, മുംബൈ, കോൽക്കത്ത, ബംഗളൂരു തുടങ്ങിയ നഗരങ്ങളിൽ പാർട്ടിയുടെ നേട്ടം പരിമിതമായ സാഹചര്യത്തിലായിരുന്നു. പ്രവർത്തകസമിതിയിലടക്കം പാർട്ടി യോഗങ്ങളിലെ ചർച്ചകൾ പരസ്യമാക്കുന്ന പ്രവണത അവസാനിപ്പിക്കണമെന്നും പാർട്ടി പ്രവർത്തകരും നേതാക്കളും അച്ചടക്കത്തോടെയും ഐക്യത്തോടെയും തുടർന്നും പ്രവർത്തിക്കണമെന്നും കോണ്‍ഗ്രസ് പ്രസിഡന്‍റ് ആവശ്യപ്പെട്ടു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.