ആർട്ടിക്കിൾ 370: ജമ്മു കാഷ്മീർ നിയമസഭയിൽ ബഹളം, കൈയാങ്കളി : Deepika.com National News |

Click here for detailed news of all items

ആർട്ടിക്കിൾ 370: ജമ്മു കാഷ്മീർ നിയമസഭയിൽ ബഹളം, കൈയാങ്കളി

Friday, November 8, 2024 1:27 AM IST

ശ്രീനഗർ: സംസ്ഥാനത്തിന്‍റെ പ്രത്യേക പദവി പുനഃസ്ഥാപിക്കണമെന്ന പ്രമേയത്തിനെതിരേ ജമ്മു കാഷ്മീർ നിയമസഭയിൽ ബഹളം. പ്രതിഷേധവുമായി നടുത്തളത്തിലിറങ്ങിയ മൂന്ന് ബിജെപി എംഎൽഎമാരും മാർഷൽമാരും തമ്മിൽ ഉന്തുംതള്ളുമുണ്ടായി. ഇതോടെ സ്പീക്കർ സഭ നിർത്തിവച്ചു.

ബുധനാഴ്ച സഭ പാസാക്കിയ പ്രമേയത്തിനെതിരേ ബിജെപി എംഎൽഎമാർ പ്രതിഷേധിച്ചതോടെ ഇന്നലെ സഭ ആരംഭിച്ചതു മുതൽ ബഹളത്തിൽ മുങ്ങി. പ്രതിപക്ഷ നേതാവും ബിജെപി എംഎൽഎയുമായ സുനിൽ ശർമ പ്രമേയത്തിനെതിരായി സഭയിൽ സംസാരിക്കുന്നതിനിടെ അവാമി ഇത്തിഹാദ് പാർട്ടി എംഎൽഎ ഖുർഷിദ് അഹമ്മദ് ഷെയ്ഖ് ബാനർ ഉയർത്തി.

നടുത്തളത്തിൽ ചാടിയിറങ്ങിയാണ് ഖുർഷിദ് ബാനർ ഉയർത്തിയത്. കാഷ്മീരിനു സ്വയംഭരണാവകാശം നൽകുന്ന ആർട്ടിക്കിൾ 370, കാഷ്മീരിലെ സ്ഥിരം താമസക്കാരുടെ അവകാശങ്ങൾ നിർവചിക്കുന്ന ആർട്ടിക്കിൾ 35എ എന്നിവ പുനഃസ്ഥാപിക്കണമെന്നും രാഷ്‌ട്രീയ തടവുകാരെ മോചിപ്പിക്കണമെന്നുമായിരുന്നു ബാനറിലുണ്ടായിരുന്നത്.

ഇതിൽ പ്രകോപിതരായ ബിജെപി അംഗങ്ങൾ നടുത്തളത്തിലിറങ്ങി ബാനർ തട്ടിയെടുക്കുകയും കീറി എറിയുകയും ചെയ്തു. ഇതോടെ സ്പീക്കർ അബ്‌ദുൾ റഹിം 15 മിനിറ്റ് സഭാ നടപടികൾ നിർത്തിവച്ചു. എന്നാൽ, സഭ നിർത്തിവച്ച ശേഷവും ബിജെപി അംഗങ്ങൾ പ്രതിഷേധം തുടർന്നു.

സഭാനടപടികൾ പുനരാരംഭിച്ചതിനു പിന്നാലെ സ്പീക്കർ പ്രതിപക്ഷ അംഗങ്ങളോട് ഇരിപ്പിടങ്ങളിൽ ഇരിക്കാൻ ആവശ്യപ്പെട്ടെങ്കിലും ബിജെപി അംഗങ്ങൾ പ്രതിഷേധം തുടർന്നു. മേശപ്പുറത്തുകയറി പ്രതിഷേധിച്ച ബിജെപിയുടെ ഏക വനിതാ എംഎൽഎ ഷഗുൺ പരിഹാറിനെ താഴെയിറക്കാൻ സ്പീക്കർ വനിതാ മാർഷലുകളെ വിളിച്ചു.

ബഹളം തുടർന്നതോടെ സ്പീക്കർ സഭ വേഗത്തിൽ അവസാനിപ്പിച്ചു. ആർട്ടിക്കിൾ 370 പുനഃസ്ഥാപിക്കണമെന്ന് ആവശ്യപ്പെട്ട് ഇന്നും നിയമസഭ പ്രമേയം പാസാക്കി. പിഡിപിയാണു പ്രമേയം അവതരിപ്പിച്ചത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.