കെഎസ്യു സംസ്ഥാന ക്യാന്പിലെ തമ്മിലടി; അന്വേഷണ സമിതി റിപ്പോർട്ട് കൈമാറി
Sunday, May 26, 2024 11:42 PM IST
തിരുവനന്തപുരം: കെഎസ്യു സംസ്ഥാന ക്യാന്പിലെ തമ്മിലടിയെക്കുറിച്ച് അന്വേഷിക്കാൻ കെപിസിസി നിയോഗിച്ച സമിതി റിപ്പോർട്ട് കൈമാറി. പാർട്ടി നേതൃത്വവുമായി ആലോചിക്കാതെയാണ് ക്യാമ്പ് നിശ്ചയിച്ചതെന്നും കെ.സുധാകരനെ ക്ഷണിക്കാഞ്ഞത് വിഭാഗീയതയുടെ ഭാഗമാണെന്നും റിപ്പോര്ട്ടിൽ പറയുന്നു.
വിശദമായ അന്വേഷണം നടത്തി കൂടുതല് പേര്ക്കെതിരെ അച്ചടക്കനടപടി വേണമെന്നും അന്വേഷണ സമിതി കെപിസിസി പ്രസിഡന്റിന് നൽകിയ പ്രാഥമിക റിപ്പോര്ട്ടിൽ പറയുന്നു. നെടുമങ്ങാട് കോളജിലെ കെഎസ്യു യൂണിറ്റിന്റെ വാട്സ് ആപ് ഗ്രൂപ്പ് അഡ്മിനെ ചൊല്ലിയാണ് തര്ക്കം ആരംഭിച്ചത്.
ഇന്നലെ അര്ധരാത്രിയോടെയാണ് നെയ്യാര്ഡാമിലെ രാജീവ് ഗാന്ധി ഇന്സ്റ്റിറ്റ്യൂട്ടിൽ നടന്ന ക്യാന്പിൽ കൂട്ടത്തല്ല് ഉണ്ടായത്. കൂട്ടത്തല്ല് പാര്ട്ടിക്കാകെ നാണക്കേടുണ്ടാക്കിയെന്നും റിപ്പോർട്ടിലുണ്ട്.
കെഎസ്യുവിന്റെ ജംബോ കമ്മിറ്റി സംഘടനയ്ക്ക് ഗുണകരമല്ലെന്നും അടിമുടി ശുദ്ധീകരണം വേണമെന്നും പഴകുളം മധു, എം.എം.നസീര്, എ.കെ.ശശി എന്നിവര് അംഗങ്ങളായ സമിതിയുടെ റിപ്പോര്ട്ടിൽ പറയുന്നു.