സൗഹൃദത്തിന്‍റെ രസക്കൂട്ടുമായി കുരിശുംമൂട് കോഫിഹൗസ് ഇന്നു തുറക്കും
1478057
Sunday, November 10, 2024 7:32 AM IST
ചങ്ങനാശേരി: നല്ല ചൂടന്‍ മസാലദോശയും വടയും കാപ്പിയും സൗഹൃദത്തിന്‍റെ രസക്കൂട്ടോടെ കുരിശുംമൂട്ടില്‍ കോഫീ ഹൗസ് ഇന്നു തുറക്കും. ഒരുമാസംമുമ്പ് പ്രവര്‍ത്തനം നിര്‍ത്തിയ ഇന്ത്യന്‍ കോഫീഹൗസ് പ്രവര്‍ത്തിച്ച അതേ കെട്ടിടത്തിലാണ് വിഭവസമൃദ്ധമായ ആഹാരങ്ങളുടെ കലവറയുമായി കുരിശുംമൂട് കോഫീഹൗസ് തുറക്കുന്നത്. ചങ്ങനാശേരി സ്വദേശികളായ ലിനു ജോബ്, ജോമിന്‍ കൈനിക്കര, ഡായി മാത്യു, റോയി ജോസ്, സോജി തോമസ് എന്നിവരുടെ കൂട്ടായ്മയാണ് കോഫീ ഹൗസിനു നേതൃത്വം നല്‍കുന്നത്.
കുരിശുംമൂട്ടില്‍ പ്രവര്‍ത്തിച്ചിരുന്ന ഇന്ത്യന്‍ കോഫി ഹൗസ് നിര്‍ത്തലാക്കിയത് നിരവധിപ്പേരുടെ ഇരിപ്പിടങ്ങളും സൃഹൃദ സംഭാഷണങ്ങളും നഷ്ടമാകുമെന്ന ബോധ്യത്തിലാണ് ഈ സുഹൃത്തുക്കള്‍ ചേര്‍ന്ന് കോഫി ഹൗസ് എന്ന ഉദ്യമത്തിന് താത്പര്യമെടുത്തത്. ഹോട്ടലിനോടൊപ്പം നവീകരിച്ച എസി ഹാളും തയാറാക്കിയിട്ടുണ്ട്.
ഇന്നു രാവിലെ 10.30ന് മന്ത്രി റോഷി അഗസ്റ്റിന്‍ ഉദ്ഘാടനം നിര്‍വഹിക്കും. ജോബ് മൈക്കില്‍ എംഎല്‍എ അധ്യക്ഷത വഹിക്കും. ഫ്രാന്‍സിസ് ജോര്‍ജ് എംപി, കൊടുക്കുന്നില്‍ സുരേഷ് എംപി, ഗവ. ചീഫ് വിപ് ഡോ.എന്‍. ജയരാജ്, മോന്‍സ് ജോസഫ് എംഎല്‍എ,
തോമസ് കെ. തോമസ് എംഎല്‍എ, മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, ഡോ. കെ.സി. ജോസഫ്, മുനിസിപ്പല്‍ വൈസ് ചെയര്‍മാന്‍ മാത്യൂസ് ജോര്‍ജ്, വാഴപ്പള്ളി പഞ്ചായത്ത് പ്രസിഡന്‍റ് മിനി വിജയകുമാര്‍ തുടങ്ങിവര്‍ സമ്മേളനത്തില്‍ സന്നിഹതരാകും.