യുകെയിലെ കലാ പ്രതിഭകൾക്കായി 7ബീറ്റ്‌സ് വീണ്ടും വേദിയൊരുക്കുന്നു; സംഗീതോത്സവം ഫെബ്രുവരി 22ന് : Deepika.com Nri News Europe

കേംബ്രിഡ്ജ്: യുകെയിൽ സംഗീത - നൃത്ത വിസ്മയങ്ങളൊരുക്കിയും പുതുമുഖ പ്രതിഭകൾക്ക് അവസരമൊരുക്കിയും നിരവധി ജീവ കാരുണ്യ പ്രവർത്തനങ്ങൾ നടത്തിയും മലയാളികൾക്കിടയിൽ ഏറെ പ്രശസ്തമായ 7ബീറ്റ്‌സ് സംഗീതോത്സവത്തിനു കേംബ്രിഡ്ജിൽ വേദിയൊരുങ്ങുന്നു.

7ബീറ്റ്‌സ് സംഗീതോത്സവം സീസൺ എട്ട് ആൻഡ് ചാരിറ്റി ഇവന്‍റിന് ഇത്തവണ അണിയറ ഒരുക്കുന്നത് ഈസ്റ്റ് ആംഗ്ലിയയിലെ പ്രമുഖ സാംസ്‌കാരിക - സാമൂഹിക സംഘടനയായ കേംബ്രിഡ്ജ് മലയാളി അസോസിയേഷൻ ആണ്.

കേംബ്രിഡ്ജിൽ "ദ നെതെർഹാൾ സ്‌കൂൾ' ഓഡിറ്റോറിയത്തിലാണ് സംഗീത - നൃത്തോത്സവത്തിനായി വേദി ക്രമീകരിച്ചിരിക്കുന്നത്. 2025 ഫെബ്രുവരി 22ന് ഉച്ച‌യ്ക്ക് രണ്ടു മുതൽ രാത്രി 10 വരെയാണ് സംഗീതോത്സവം നടക്കുക.

ഒഎൻവി കുറുപ്പ് മാഷിന്‍റെ അനുസ്മരണവും 7ബീറ്റ്‌സ് സംഗീതോത്സവ വേദിയിൽ നടത്തപ്പെടും. ടൈറ്റിൽ സ്പോൺസറായി എത്തുന്നത് പ്രമുഖ മോർട്ടഗേജ് & ഇൻഷുറൻസ് സ്ഥാപനമായ ലൈഫ് ലൈൻ പ്രൊട്ടക്ട് ഇൻഷുറൻസ് & മോർട്ടഗേജ് സർവീസസ് ആണ്.

ഷാൻ പ്രോപ്പർട്ടീസ്, ടിഫിൻ ബോക്സ് റസ്റ്റോറന്‍റ്, ഡ്യു ഡ്രോപ്‌സ് കരിയർ സൊല്യൂഷൻസ്, പോൾ ജോൺ സോളിസിറ്റേഴ്‌സ്, ഗ്ലോബൽ സ്റ്റഡി ലിങ്ക്, മലബാർ ഫുഡ്സ്, ട്യൂട്ടേഴ്സ് വാലി മ്യൂസിക് അക്കാദമി, ജോയ് ആലുക്കാസ് ജ്യുവലേഴ്‌സ്, ഐഡിയൽ സോളിസിറ്റേഴ്സ്, കേരളം ഡിലൈറ്റ്സ്, തട്ടുകട റസ്റ്റോറന്‍റ്, അച്ചായൻസ് ചോയ്‌സ് ലിമിറ്റഡ് എന്നിവരും 7ബീറ്റ്‌സ് സംഗീതോത്സവത്തിനു പ്രായോജകരായി സഹകരിക്കുന്നുണ്ട്.

കലാസ്വാദകർക്കു സൗജന്യമായി പ്രവേശനമൊരുക്കുന്ന സംഗീതോത്സവം അതിസമ്പന്നമായ കലാവിരുന്നാണ് കലാസ്വാദകർക്കായി ഒരുക്കുക.സംഗീതോത്സവത്തോടൊപ്പം നടത്തപ്പെടുന്ന ചാരിറ്റി ഇവന്‍റ് മുഖാന്തിരം സ്വരൂപിക്കുന്ന സഹായ നിധിയിലൂടെ കഴിഞ്ഞ ഏഴു വർഷമായി കേരളത്തിലെ നിരവധി നിർധനരായ കുടുംബങ്ങളെ സഹായിക്കുവാൻ 7ബീറ്റ്‌സ് സംഗീതോത്സവം സംഘാടകർക്ക്‌ സാധിച്ചിട്ടുണ്ട്.

7ബീറ്റ്‌സ് സംഗീതോത്സവം സീസൺ എട്ടിന്‍റെ ഭാഗമാകുവാൻ ഏവരെയും ഹൃദയപൂർവം ക്ഷണിക്കുന്നതായി സംഘാടകർ അറിയിച്ചു.

വേദി: The Netherhall School, Queen Edith's Way, Cambridge, CB1 8NN.