കലയുടെ കൈത്തിരിനാളവുമായി ഡിഎംഎ മേഖലാതല മത്സരങ്ങൾ

ന്യൂഡൽഹി: കലയുടെ കൈത്തിരിനാളം പകർന്നേകി ഡിഎംഎ കലോത്സവത്തിന്‍റെ മേഖലാതല മത്സരങ്ങൾ സമാപിച്ചു. കാനിങ് റോഡ് കേരളാ സ്‌കൂൾ, ഡിഎംഎ സാംസ്കാരിക സമുച്ചയം, വികാസ് പുരി കേരളാ സ്‌കൂൾ എന്നിവിടങ്ങളിലാണ് മത്സരങ്ങൾ അരങ്ങേറിയത്.

കാനിങ് റോഡ് കേരളാ സ്‌കൂളിൽ നടന്ന ഈസ്റ്റ് സോൺ മത്സരങ്ങളുടെ ഉദ്ഘാടന സമ്മേളനത്തിൽ ഡിഎംഎ പ്രസിഡന്‍റ് സി.എ. നായർ അധ്യക്ഷത വഹിച്ചു. കേരളാ എഡ്യൂക്കേഷൻ സൊസൈറ്റി പ്രസിഡന്‍റ് ബാബു പണിക്കർ, സെക്രട്ടറി ജനറൽ പി.കെ. രവീന്ദ്രനാഥൻ, പ്രിൻസിപ്പാൾ കെ.ജി. ഹരികുമാർ, ഡോ. നിഷാ റാണി, വൈസ് പ്രസിഡന്‍റ് സി. കേശവൻ കുട്ടി, ജോയിന്‍ററ് ഇന്‍റേർണൽ ഓഡിറ്റർ പി.എൻ. ഷാജി, ഈസ്റ്റ് സോൺ കൺവീനർ വി.കെ. ചന്ദ്രൻ തുടങ്ങിയവർ ചടങ്ങിൽ പ്രസംഗിച്ചു.

ആർ.കെ.പുരത്തെ ഡിഎംഎ. സാംസ്കാരിക സമുച്ചയത്തിൽ നടന്ന സൗത്ത്-സെൻട്രൽ മത്സരങ്ങളുടെ ഉദ്ഘാടന സമ്മേളനത്തിൽ കലോത്സവം കൺവീനറും ഡിഎംഎ വൈസ് പ്രസിഡന്‍റുമായ വിനോദിനി ഹരിദാസ് അധ്യക്ഷത വഹിച്ചു. ഡിഡിഎ ലാൻഡ്‌സ് കമ്മിഷണർ സുബു റഹ്‌മാൻ, ഐഎഎ, ഡൽഹി യൂണിവേഴ്‌സിറ്റി അസോസിയേറ്റ് പ്രൊഫസർ (മ്യൂസിക്) ബിന്ദു ചന്ദ്രൻ, കലാനിധി ശിവരാജൻ, ട്രെഷറർ സി.ബി. മോഹനൻ, ജോയിന്‍റ് ട്രഷഷറർ കെ.ജെ. ടോണി, റിസോഴ്സ് കമ്മിറ്റി കൺവീനർ എൻ.സി. ഷാജി, കലോത്സവം ജോയിന്‍റ് കൺവീനർമാരായ എ. മുരളീധരൻ, ഒ. ഷാജികുമാർ, സൗത്ത്-സെൻട്രൽ സോൺ കൺവീനർ പി.ആർ. നായർ തുടങ്ങിയവർ പ്രസംഗിച്ചു.

വികാസ് പുരി കേരളാ സ്‌കൂളിൽ നടന്ന വെസ്റ്റ് സോൺ ഉദ്ഘാടന സമ്മേളനത്തിൽ ഡിഎംഎ ജനറൽ സെക്രട്ടറി സി. ചന്ദ്രൻ അധ്യക്ഷത വഹിച്ചു. കലാശ്രീ കലാമണ്ഡലം രാധാ മാരാർ, വികാസ് പുരി കേരളാ എഡ്യൂക്കേഷൻ സൊസൈറ്റി ചെയർമാൻ എൻ.സി.നായർ, സെക്രട്ടറി രാജശേഖരൻ നായർ, പ്രിൻസിപ്പൽ ജയന്തി രാമചന്ദ്രൻ, ഡിഎംഎ അഡീഷണൽ ജനറൽ സെക്രട്ടറി കെ.പി.എച്ച് ആചാരി, കലോത്സവം ജോയിന്‍റ് കൺവീനർ അജികുമാർ മേടയിൽ, വെസ്റ്റ് സോൺ കൺവീനർ കെ.ജി.രാഘുനാഥൻ നായർ തുടങ്ങിയവർ പ്രമത്സരാർഥികൾ പ്രസംഗിച്ചു.

ശാസ്ത്രീയ സംഗീതം, സിനിമാ ഗാനം, നാടക ഗാനം, ലളിത ഗാനം, മാപ്പിളപ്പാട്ട്, നാടൻ പാട്ട്, വയലിൻ, ഗിത്താർ, കീ ബോർഡ്, തബല, മൃദംഗം, ചെണ്ട, മോഹിനിയാട്ടം, ഭരതനാട്യം, കഥകളി, കുച്ചിപ്പുടി, നാടോടി നൃത്തം, സംഘ നൃത്തം, ഒപ്പന, മാർഗംകളി, കൈകൊട്ടിക്കളി (തിരുവാതിരകളി), മോണോ ആക്‌ട്, പ്രശ്ചന്ന വേഷം തുടങ്ങി വിവിധ ഇനങ്ങളിലും വിഭാഗങ്ങളിലുമായി ആയിരത്തിൽപരം മത്സരാർഥികൾ പങ്കെടുത്തു.

കലോത്സവത്തിന്‍റെ ഫൈനൽ മത്സരങ്ങൾ (സംസ്ഥാനതലം) ജനുവരി 26-നും 27-നും വികാസ് പുരി കേരളാ സ്കൂളിൽ നടക്കും. രണ്ടു ദിവസം നീണ്ടു നിൽക്കുന്ന ഫൈനൽ മത്സരങ്ങളുടെ ചടങ്ങിൽ സാമൂഹിക സാംസ്കാരിക രംഗത്തെ പ്രമുഖർ പങ്കെടുക്കും.