കിടിലന്‍ ഫീച്ചറുകളുമായി മോട്ടോറോള എഡ്ജ് 50 അള്‍ട്രാ : Deepika.com Tech News

മോട്ടോറോള പുതിയ സ്മാര്‍ട്ട്ഫോണ്‍ എഡ്ജ് 50 അള്‍ട്രാ ഇന്ത്യന്‍ വിപണിയില്‍ അവതരിപ്പിക്കുന്നു. എഡ്ജ് 50 പ്രോ, എഡ്ജ് 50 ഫ്യൂഷന്‍ എന്നിവയ്ക്ക് ശേഷമാണ് എഡ്ജ് 50 അള്‍ട്രാ അവതരിപ്പിക്കുന്നത്. ജൂണ്‍ 18ന് ഇന്ത്യയില്‍ വില്‍പന ആരംഭിക്കുമെന്നാണ് കമ്പനി നല്‍കുന്ന വിവരം.

6.7 ഇഞ്ച് 1.5കെ pOLED പാനല്‍, 144ഹെഡ്‌സ് റിഫ്രഷ് റേറ്റ്, മൂന്നാം തലമുറയില്‍പ്പെട്ട ക്വാല്‍കോം സ്‌നാപ്പ് ഡ്രാഗണ്‍ 8എസ് ചിപ്‌സെറ്റ് ഫോണിന് നല്‍കിയിരിക്കുന്നു. 12 ജിബി റാമും 512 ജിബി മെമ്മറിയുമുള്ള മോഡലാകും ഇന്ത്യയില്‍ അവതരിപ്പിക്കുകയെന്നാണ് റിപ്പോര്‍ട്ട്.

125വാട്ട് ഫാസ്റ്റ് ചാര്‍ജിംഗ്, 50വാട്ട് വയര്‍ലെസ് ചാര്‍ജിംഗ് പിന്തുണയുള്ള 4,500 എംഎഎച്ച ബാറ്ററി പായ്ക്ക് ഫോണിന് നല്‍കിയിരിക്കുന്നു. ഫോണിലെ 10 വാട്ട് വയര്‍ലെസ് പവര്‍ ഷെയറിംഗ് ഉപയോഗിച്ച് സ്മാര്‍ട്ട് വാച്ച് ഇയര്‍ബഡ്‌സ് തുടങ്ങിയ ചെറിയ ഡിവൈസുകള്‍ ചാര്‍ജ് ചെയ്യാനും കഴിയും.

എഐ പിന്തുണയോടെ 50 എംപി പ്രൈമറി ഷൂട്ടര്‍, 50 എംപി അള്‍ട്രാ വൈഡ്, ഒഐഎസ് ഉള്ള 64 എംപി ടെലിഫോട്ടോ സെന്‍സര്‍ എന്നിവ ഉള്‍പ്പെടുന്നതാണ് പ്രൈമറി കാമറ. സെല്‍ഫികള്‍ക്കും വീഡിയോ ചാറ്റുകള്‍ക്കുമായി മുന്‍വശത്ത് 50 എംപി ഷൂട്ടറും ഉണ്ടാവും.

സ്മാര്‍ട്ട് കണക്ട് ഫീച്ചര്‍ ഉപയോഗിച്ച ഒരു വെബ് കാം പോലെ പ്രവര്‍ത്തിക്കാനും എഡ്ജ് 50 അള്‍ട്രക്കാകുമെന്ന് കമ്പനി അവകാശപ്പെടുന്നു. പി68 റേറ്റുചെയ്ത സ്മാര്‍ട്ട്ഫോണ്‍ മുന്‍വശത്ത് കോര്‍ണിംഗ് ഗോറില്ല ഗ്ലാസ് പരിരക്ഷയുണ്ടാകും.

അള്‍ട്രാ പ്രീമിയം സ്മാര്‍ട്ട്ഫോണ്‍ ശ്രേണിയില്‍ വരുന്ന ഫോണാണ് അവതരിപ്പിക്കാന്‍ പോകുന്നത്. മൂന്നു നിറങ്ങളില്‍ ഫോണ്‍ ലഭ്യമാകും. പ്രീമിയം ഫോണ്‍ ആയത് കൊണ്ട് ഇതിന് ഏകദേശം 50,000 രൂപ വില വരുമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.