പത്തനംതിട്ട: ഇന്ത്യന്‍ സംസ്ഥാനങ്ങള്‍ക്ക് മാതൃകയായിരുന്ന കേരള മോഡല്‍ വിദ്യാഭ്യാസ നയങ്ങള്‍ തകര്‍ക്കുന്ന പരിഷ്‌കാരങ്ങളില്‍നിന്ന് സംസ്ഥാന സര്‍ക്കാര്‍ പിന്‍മാറണമെന്ന് ആന്‍റോ ആന്‍റണി എംപി. ആറാം പ്രവൃത്തിദിനത്തില്‍ യുഡിഎഫ് അധ്യാപക സംഘടനാ നേതാക്കള്‍ മിനി സിവില്‍ സ്റ്റേഷന്‍ പടിക്കല്‍ നടത്തിയ ഉപവാസ സമരം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
ഹൈസ്‌കൂള്‍, ഹയര്‍ സെക്കന്‍ഡറി ഏകീകരണ നടപടികള്‍ അവസാനിപ്പിക്കുക, പൊതുവിദ്യാഭ്യാസ മേഖലയെ തകര്‍ക്കുന്ന സര്‍ക്കാര്‍ നയങ്ങള്‍ തിരുത്തുക, ക്ഷാമബത്ത - ശമ്പള പരിഷ്‌കരണ കുടിശിക അനുവദിക്കുക, പങ്കാളിത്ത പെന്‍ഷന്‍ പിന്‍വലിക്കുക തുടങ്ങിയ ആവശ്യങ്ങളും അധ്യാപകര്‍ ഉന്നയിച്ചു. സമിതി ചെയര്‍മാന്‍ ഫിലിപ്പ് ജോര്‍ജ് അധ്യക്ഷത വഹിച്ചു.
ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പില്‍ മുഖ്യപ്രഭാഷണം നടത്തി. വൈസ് പ്രസിഡന്‍റ് എ. സുരേഷ് കുമാര്‍, ജനറല്‍ സെക്രട്ടറി ലിജു ജോര്‍ജ്, കണ്‍വീനര്‍ ഹബീബ് മദനി, ഘടക സംഘടന ഭാരവാഹികളായ പി. ചാന്ദിനി, ടി.എച്ച്. ഹാഷിം, പി. പ്രമോദ്, വര്‍ഗീസ് ജോസഫ്, വി.ജി. കിഷോര്‍, ഡോ. അനിത ബേബി, എസ്. ചിത്ര, എസ്. ദിലീപ് കുമാര്‍, ഐജിന്‍ ഐപ്പ് ജോര്‍ജ്, എ.ആര്‍. ഹാഷിം, എസ്. പ്രേം എന്നിവര്‍ പ്രസംഗിച്ചു.