വെടിനിർത്തൽ ചർച്ചയിൽ പുരോഗതിയില്ല: ഹമാസ് : Deepika.com International News |

Click here for detailed news of all items

വെടിനിർത്തൽ ചർച്ചയിൽ പുരോഗതിയില്ല: ഹമാസ്

Monday, July 1, 2024 2:07 AM IST

ബെയ്റൂട്ട്: ഗാസാ വെടിനിർത്തൽ ചർച്ചകളിൽ പുരോഗതിയില്ലെന്ന് ഹമാസ്. എന്നെന്നേക്കുമായി യുദ്ധം അവസാനിപ്പിക്കുന്ന ഏതു ധാരണയോടും അനുകൂലമായി പ്രതി‌കരിക്കുമെന്നു ഹമാസിന്‍റെ മുതിർന്ന നേതാവ് ഒസാമ ഹംദാൻ ബെയ്റൂട്ടിൽ പറഞ്ഞു. ഇസ്രയേലിന്‍റെ ഉപാധികൾ അംഗീകരിക്കാൻ അമേരിക്ക ഹമാസിനുമേൽ സമ്മർദം ചെലുത്തുന്നതായി ഹംദാൻ കൂട്ടിച്ചേർത്തു.

വെടിനിർത്തലിന് അമേരിക്കയുടെ പിന്തുണയോടെ ഖത്തറും ഈജിപ്തും മാസങ്ങളായി നടത്തുന്ന ശ്രമം ഫലം കാണാത്ത അവസ്ഥയാണ്. വെടിനിർത്തൽ ഉണ്ടാകാത്തതിൽ ഇസ്രയേലും ഹമാസും പരസ്പരം കുറ്റപ്പെടുത്തുന്നു. സ്ഥിരം വെടിനിർത്തൽ വേണമെന്ന ഹമാസിന്‍റെ ആവശ്യം ഇസ്രയേൽ അംഗീകരിക്കുന്നില്ല. ഹമാസിനെ ഉന്മൂലനം ചെയ്യുമെന്നാണ് ഇസ്രയേൽ പ്രഖ്യാപിച്ചിരിക്കുന്നത്.

ഇതിനിടെ, ഗാസയിലെ ഇസ്രേലി ആക്രമണത്തിൽ കൊല്ലപ്പെട്ട പലസ്തീനികളുടെ എണ്ണം 38,000ന് അടുത്തായെന്നും ഹമാസ് അറിയിച്ചിട്ടുണ്ട്. ഈ കണക്കിൽ തീവ്രവാദികളെയും സിവിലിയന്മാരെയും വേർതിരിച്ചു കാണിച്ചിട്ടില്ല.

റാഫയുടെ തെക്ക്, വടക്ക്, മധ്യ മേഖലകളിൽ ഇസ്രേലി സേനയും ഭീകരരും തമ്മിൽ ഉഗ്ര പോരാട്ടം തുടരുന്നു. ഗാസാ സിറ്റിയിലെ ഷുജയായിൽ ഇന്നലെയും ഇസ്രേലി സേന ബോംബിട്ടു. ഹമാസ്, ഇസ്‌ലാമിക് ജിഹാദ് ഭീകരരുടെ തുരങ്കങ്ങളടക്കം ഒട്ടേറെ കേന്ദ്രങ്ങൾ തകർത്തതായി ഇസ്രേലി സേന പറഞ്ഞു. മേഖലയിൽനിന്ന് പതിനായിരങ്ങൾ ഒഴിഞ്ഞുപോയിട്ടുണ്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.