"ഒരു ജീവന് വേണ്ടിവന്നു'; ആമയിഴഞ്ചാനിലെ മാലിന്യ പ്രശ്നത്തില് അടിയന്തരയോഗം വിളിച്ച് മുഖ്യമന്ത്രി
Tuesday, July 16, 2024 9:34 AM IST
തിരുവനന്തപുരം: ആമയിഴഞ്ചാന് തോട്ടിലെ മാലിന്യ പ്രശ്നത്തില് മുഖ്യമന്ത്രി പിണറായി വിജയന് അടിയന്തരയോഗം വിളിച്ചു. വ്യാഴാഴ്ച രാവിലെ 11:30ന് ഓണ്ലൈന് ആയാണ് യോഗം. തോടിന്റെ റെയില്വേ സ്റ്റേഷനടിയില് കൂടി പോകുന്ന ഭാഗത്ത് മാലിന്യം കുന്നുകൂടി കിടക്കുന്നതിനാലുള്ള പ്രശ്നങ്ങളില് സ്വീകരിക്കേണ്ട നടപടികള് ചര്ച്ചചെയ്യും.
തദ്ദേശ സ്വയംഭരണം, പൊതുമരാമത്ത്, തൊഴില്, ഭക്ഷ്യം, കായികം, റെയില്വേ, ആരോഗ്യം, ജലവിഭവം വകുപ്പ് മന്ത്രിമാരും ബന്ധപ്പെട്ട എംഎല്എമാരും തിരുവനന്തപുരം മേയറും പങ്കെടുക്കും. ചീഫ് സെക്രട്ടറി ഉള്പ്പെടെയുള്ള ഉന്നത ഉദ്യോഗസ്ഥരും റെയില്വേ ഡിവിഷണല് മാനേജരും യോഗത്തിലുണ്ടാകും.
ശനിയാഴ്ച ആമഴയിഴഞ്ചാന് കനാലില് ശുചീകരണത്തിന് ഇറങ്ങിയ ജോയി എന്ന തൊഴിലാളിയെ കാണാതാവുകയും പിന്നീട് കഴിഞ്ഞദിവസം മൃതദേഹം കണ്ടെടുക്കുകയും ചെയ്തിരുന്നു. സംഭവം പ്രതിഷേധങ്ങള്ക്ക് വഴിവെച്ചതോടെയാണ് സര്ക്കാര് നടപടികള് ആരംഭിക്കുന്നത്.
തോട്ടിലിറങ്ങി മാലിന്യം മാറ്റുകയായിരുന്ന ജോയി ശക്തമായ അടിയൊഴുക്കില്പ്പെട്ടതോടെയാണ് കാണാതായത്. രക്ഷാപ്രവര്ത്തകര് മാലിന്യങ്ങള്ക്കടിയില് മുങ്ങി തപ്പിയെങ്കിലും കണ്ടെത്താനായില്ല. ഒടുവില് ജോയിയെ കാണാതായ സ്ഥലത്ത് നിന്ന് ഒന്നര കിലോ മീറ്ററിനപ്പുറത്ത് നിന്നാണ് മൃതദേഹം കണ്ടെത്തിയത്.