രാസ ലഹരിയുമായി യുവാവ് പിടിയിൽ
Tuesday, May 28, 2024 11:19 PM IST
കൊച്ചി: ആറ് എൽഎസ്ഡി സ്റ്റാമ്പും, മൂന്ന് ഗ്രാമോളം രാസലഹരിയുമായി യുവാവ് കൊച്ചിയിൽ പിടിയിൽ. ഞാറയ്ക്കൽ ഇടവനക്കാട് കോട്ടത്തറ വീട്ടിൽ മുഹമ്മദ് അഫ്സൽ (36) നെയാണ് ഡാൻസാഫ് ടീമും ആലുവ പോലീസും ചേർന്ന് പിടികൂടിയത്.
ജില്ലാ പോലീസ് മേധാവി വൈഭവ് സക്സേനയ്ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് മയക്കുമരുന്നുമായി ഇയാളെ കസ്റ്റഡിയിലെടുത്തത്.
ബൈക്കിൽ മയക്കുമരുന്നുമായി പോകുമ്പോൾ യുസി കോളജിന് സമീപത്ത് വച്ചാണ് ഇയാളെ പിടികൂടിയത്. ബൈക്കിൽ സീറ്റിനടിയിൽ ഒളിപ്പിച്ച നിലയിലായിരുന്നു രാസലഹരിയും എൽഎസ്ഡി സ്റ്റാമ്പും. യുവാക്കൾക്കിടയിൽ വിൽപനയായിരുന്നു ഇയാളുടെ ലക്ഷ്യം.